Nyɛyaa Nɔ ‘Nyɛwoa Yibii Pii’
1 Yesu kɛ mfonirifeemɔŋ wiemɔ tsu nii, ni ekɛ ehe to anɔkwa wein tso he, ekɛ e-Tsɛ to Okwaafonyo he, ni ekɛ esɛɛnyiɛlɔi ni akɛ mumɔ efɔ amɛmu lɛ to wein tso niji ni woɔ yibii he. Beni Yesu tsɔɔ nitsumɔ ni mfonirifeemɔŋ Okwaafonyo lɛ tsuɔ lɛ mli lɛ, ema nɔ mi akɛ ehe miihia ni wein tso niji lɛ aya nɔ akpɛtɛ wein tso lɛ he gbagbalii. (Yoh. 15:1-4) Enɛ tsɔɔ akɛ esa akɛ mɔ fɛɛ mɔ ni kɛ Yehowa yɔɔ wekukpaa ni yɔɔ kpakpa lɛ afee tamɔ wein tso nine ni woɔ yibii yɛ “anɔkwa wein tso” ni ji Yesu Kristo lɛ he. Esa akɛ wɔya nɔ wɔwo “mumɔ lɛ yibii” lɛ kɛ Maŋtsɛyeli lɛ yibii lɛ babaoo.—Gal. 5:22, 23; Mat. 24:14; 28:19, 20.
2 Mumɔ lɛ Yibii: Abaanyɛ ana bɔ ni wɔtee hiɛ yɛ Nyɔŋmɔjamɔ mli wɔha lɛ kɛtsɔ bɔ ni wɔjieɔ mumɔ lɛ yibii lɛ kpo jogbaŋŋ lɛ nɔ. Ani obɔɔ mɔdɛŋ koni owo Nyɔŋmɔ mumɔ lɛ yibii lɛ kɛtsɔ Nyɔŋmɔ Wiemɔ lɛ kasemɔ daa kɛ enɔjwɛŋmɔ nɔ? (Fil. 1:9-11) Kaashashao shi akɛ ooosɔle kɛbi ni aha bo mumɔ krɔŋkrɔŋ ni baanyɛ aha oná sui ni woɔ Yehowa hiɛ nyam, ni baaye abua bo ni oya hiɛ yɛ Nyɔŋmɔjamɔ mli daa lɛ.—Luka 11:13; Yoh. 13:35.
3 Mumɔ lɛ yibii ni wɔɔwo lɛ baaye abua wɔ hu koni wɔfee shiɛlɔi ni yɔɔ ekãa babaoo. Ákɛ nɔkwɛmɔnɔ lɛ, suɔmɔ kɛ hemɔkɛyeli tsirɛɔ wɔ koni yɛ dekã ni wɔbɛ lɛ fɛɛ sɛɛ lɛ, wɔto wɔbe he gbɛjianɔ ni wɔkɛ wɔhe awo shiɛmɔ nitsumɔ lɛ mli daa. Sui tamɔ hejɔlɛ, tsuishitoo, mlihilɛ, mlijɔlɛ kɛ henɔyeli yeɔ buaa wɔ koni wɔkɛ shitee-kɛwolɔi aye yɛ gbɛ kpakpa nɔ. Miishɛɛ haa wɔtsui nyɔɔ wɔmli yɛ shiɛmɔ nitsumɔ lɛ mli kɛ́ mɛi booo wɔ toi po.
4 Maŋtsɛyeli lɛ Yibii: Ehe miihia hu ni wɔwo Maŋtsɛyeli lɛ yibii lɛ. No ji ‘yijiemɔ afɔle ni wɔkɛhaa Nyɔŋmɔ daa; ni ji naabui ní jajeɔ egbɛi lɛ ayibii lɛ.’ (Heb. 13:15) Wɔfeɔ enɛ kɛtsɔ ekãa kɛ shifimɔ ni wɔkɛjajeɔ sanekpakpa lɛ nɔ. Ani oobɔ mɔdɛŋ koni owo Maŋtsɛyeli lɛ yibii babaoo kɛtsɔ oshiɛmɔ nitsumɔ lɛ ni oooha emɔ shi jogbaŋŋ lɛ nɔ?
5 Yesu tsɔɔ mli akɛ esɛɛnyiɛlɔi anɔkwafoi lɛ baawo yibii yibɔi srɔtoi. (Mat. 13:23) No hewɔ lɛ, esaaa akɛ wɔkɛ wɔhe toɔ mɛi krokomɛi ahe, shi moŋ esa akɛ wɔsɔmɔ Yehowa kɛ wɔnyɛmɔ fɛɛ. (Gal. 6:4) Kɛ́ wɔjɛ anɔkwayeli mli wɔkɛ Nyɔŋmɔ Wiemɔ lɛ pɛi wɔshihilɛ mli lɛ, ebaaye ebua wɔ koni wɔya nɔ wɔwo Yehowa hiɛ nyam kɛtsɔ ‘yibii pii ni wɔɔwo’ lɛ nɔ.—Yoh. 15:8.