Biblia Mli Wolo ni Ji 43—Yohane

Mɔ ni Ŋma: Bɔfo Yohane

Heni Aŋma Yɛ: Efeso loo he ko ni bɛŋkɛ jɛmɛ

Be ni Aŋma Agbe Naa: Aaafee afi 98 Ŋ.B.

Be ni Emli Saji lɛ Tee Nɔ: Yɛ sane ko ni tee nɔ lɛ sɛɛ, afi 29–33 Ŋ.B.

AKƐ Mateo, Marko, kɛ Luka Sanekpakpai lɛ etsu nii nɔ ni fe afii 30, ni Kristofoi ni hi shi yɛ klɛŋklɛŋ afii 100 lɛ mli lɛ bu enɛ akɛ woji ni mumɔ krɔŋkrɔŋ lɛ ye ebua hii ni amɛŋma. Agbɛnɛ, beni afii 100 lɛ baa naagbee ní mɛi ni kɛ Yesu nyiɛ lɛ anɔ gbɔɔ lɛ, ekolɛ mɛi komɛi baabi akɛ, Ani nɔ kroko ko yɛ ni abaakɛɛ wɔ? Ani mɔ ko yɛ lolo ni baanyɛ ejɛ nibii ni lɛ diɛŋtsɛ ekɛ ehiŋmɛi na lɛ mli egba Yesu sɔɔmɔ nitsumɔ ni he hiaa lɛ ahe saji fitsofitso? Hɛɛ, mɔ ko yɛ. Ajɔɔ nuumo Yohane jogbaŋŋ yɛ naanyo ni ekɛ Yesu bɔ lɛ mli. Eeenyɛ efee akɛ efata Yohane Baptisilɔ lɛ klɛŋklɛŋ kaselɔi ni ajie Nyɔŋmɔ Toobi lɛ shi atsɔɔ amɛ lɛ ahe, ni efata mɛi ejwɛ ni Nuŋtsɔ lɛ fɔ̃ amɛ nine klɛŋklɛŋ koni amɛbafata ehe yɛ be-fɛɛ sɔɔmɔ nitsumɔ lɛ mli lɛ he. (Yoh. 1:35-39; Mar. 1:16-20) Etee nɔ ekɛ Yesu bɔ beni etsuɔ esɔɔmɔ nitsumɔ lɛ, ni lɛ ji kaselɔ ni “Yesu sumɔɔ lɛ” ní kpasa Yesu tsitsi yɛ naagbee Hehoo lɛ shishi lɛ. (Yoh. 13:23; Mat. 17:1; Mar. 5:37; 14:33) Beni asɛŋ Yesu musuŋshãa lɛ eyɛ jɛmɛ, ni lɛ Yesu kɛ enyɛ wo edɛŋ koni ekwɛ lɛ eha lɛ lɛ, ni lɛ nɔŋŋ ji mɔ ni ho Petro he beni amɛjoɔ foi koni amɛyakwɛ akɛ atee Yesu shi lɛɛlɛŋ lo lɛ.—Yoh. 19:26, 27; 20:2-4.

² Yɛ ekãa ni Yohane kɛshiɛ nɔ ni miihe ashɛ afii 70 dani egbɔjɔ, kɛ ninaai ni ajie kpo atsɔɔ lɛ kɛ nii anɔ ni ejwɛŋ beni ehe efee shoo yɛ Patmo ŋshɔkpɔ lɛ nɔ lɛ hewɔ lɛ, ebaafee mɔ ni sa jogbaŋŋ akɛ eeeŋma saji ni kã etsui nɔ afii babaoo ni eho lɛ. Agbɛnɛ mumɔ krɔŋkrɔŋ lɛ kanya ejwɛŋmɔ ni eŋmala saji ni he hiaa ni hereɔ mɔ yiwala lɛ babaoo eshwie shi koni mɔ fɛɛ mɔ ni kaneɔ lɛ ‘ahé aye akɛ Yesu ji Kristo, Nyɔŋmɔ bi lɛ, ni kɛ́ amɛhe amɛye lɛ, ní amɛná wala yɛ Yesu gbɛi lɛ mli.’—20:31.

³ Kristofoi ni hi shi yɛ afi 100 afii lɛ shishijee mli lɛ kpɛlɛ nɔ akɛ Yohane ji sanekpakpa nɛɛ ŋmalɔ, ni amɛbu ewolo lɛ akɛ Ŋmalɛi ni jɛ mumɔŋ ni akpɛlɛɔ nɔ lɛ ateŋ ekome. Clement ni jɛ Aleksandria, Irenaeus, Tertullian, kɛ Origen ni amɛ fɛɛ amɛhi shi yɛ afi 100 afii lɛ naagbee kɛ afi 200 afii lɛ shishijee gbɛ lɛ fɛɛ kpɛlɛ nɔ akɛ Yohane ji mɔ ni ŋma. Kɛfata he lɛ, wolo lɛ diɛŋtsɛ mli saji babaoo yeɔ he odase akɛ Yohane ji mɔ ni ŋma. Ekã shi faŋŋ akɛ mɔ ni ŋma lɛ ji Yudanyo, ni ele Yudafoi akusumii kɛ amɛshikpɔŋ lɛ he saji waa diɛŋtsɛ. (2:6; 4:5; 5:2; 10:22, 23) Naanyobɔɔ ni yɔɔ gbagbalii ni je kpo yɛ amaniɛbɔɔ lɛ mli lɛ tsɔɔ akɛ ejeee bɔfo kɛkɛ, shi moŋ eji yitsei ahe loo etɛ ni fataa Yesu he kɛyaa heei krɛdɛɛi lɛ ateŋ mɔ kome—Petro, Yakobo, kɛ Yohane. (Mat. 17:1; Mar. 5:37; 14:33) Jeee Yakobo (Zebedeo bi lɛ) ni ŋma wolo nɛɛ, ejaakɛ Herode Agripa 1 gbe lɛ yɛ aaafee afi 44 Ŋ.B., no sɛɛ kwraa dani aŋma wolo nɛɛ. (Bɔf. 12:2) Jeee Petro hu ni ŋma, ejaakɛ atsĩ ekɛ mɔ ni ŋma lɛ tã yɛ Yohane 21:20-24.

⁴ Yɛ naagbee kukuji lɛ amli lɛ, atsɛ mɔ ni ŋma lɛ akɛ kaselɔ ni “Yesu sumɔɔ lɛ,” ni eyɛ mli akɛ atsĩii Yohane gbɛi atã yɛ wolo nɛɛ mli moŋ, shi akɛ wiemɔ nɛɛ kɛ wiemɔi krokomɛi ni tamɔ no tsu nii shiii abɔ yɛ wolo lɛ mli. Yesu wie ehe akɛ: “Kɛji miisumɔ akɛ ehĩ shi kɛyashi mibaa be lɛ, ohe sane mɛni ji no?” (Yoh. 21:20, 22) Enɛ tsɔɔ akɛ Petro kɛ bɔfoi krokomɛi lɛ baagboi amɛshi kaselɔ ni awieɔ ehe lɛ. Enɛɛmɛi fɛɛ tsɔɔ akɛ bɔfo Yohane ji nakai kaselɔ lɛ. Enɛ hewɔ ni beni ajie Yesu baa lɛ he ninaa atsɔɔ Yohane lɛ, emu nakai gbalɛ lɛ naa yɛ gbɛ ni sa nɔ akɛ: “Amen. Hɛɛ, ba, Nuŋtsɔ Yesu!”—Kpoj. 22:20.

⁵ Eyɛ mli akɛ Yohane niŋmaai lɛ haaa ana be pɔtɛɛ ni eŋmala saji lɛ moŋ, shi mɛi babaoo heɔ amɛyeɔ akɛ Yohane ŋma e-Sanekpakpa lɛ yɛ tsuŋ ni awo lɛ yɛ Patmo ŋshɔkpɔ lɛ nɔ lɛ sɛɛ. (Kpoj. 1:9) Roma nɔyelɔ Nerva, ní ye nɔ yɛ afi 96-98 Ŋ.B. lɛ kɛɛ akɛ yɛ nɔyelɔ Domitian ni hi shi dani eba lɛ nɔyeli lɛ naagbee gbɛ lɛ, atswa mɛi babaoo anane shishi tu. Mɛi pii heɔ yeɔ akɛ beni Yohane ŋma e-Sanekpakpa lɛ egbe naa yɛ aaafee afi 98 Ŋ.B. lɛ, egbo yɛ hejɔlɛ mli yɛ Efeso yɛ Nɔyelɔ Trajan nɔyeli afi ni ji etɛ lɛ mli yɛ afi 100 Ŋ.B.

⁶ Nɔ ni haa anaa akɛ aŋma wolo nɛɛ yɛ Efeso loo he ko ni bɛŋkɛ jɛmɛ lɛ ji akɛ, yinɔsaneŋmalɔ Eusebius (aaafee afi 260-342 Ŋ.B.) tsɛ Irenaeus wiemɔi ayisɛɛ akɛ: “Yohane, ni ji Nuŋtsɔ lɛ kaselɔ, ni kpasa etsitsi lɛ hu diɛŋtsɛ ŋma sanekpakpa lɛ beni eyɔɔ Efeso yɛ Asia lɛ.”a Gbɛi ni ji “Yudafoi” ni akɛtsu nii yɛ wolo lɛ mli moŋ fe nɔ ni akɛ wiemɔi ni ji “Farisifoi,” “osɔfonukpai,” kɛ ekrokomɛi lɛ aaatsu nii lɛ maa nɔ mi akɛ jeee Palestina aŋma wolo lɛ yɛ. (Yoh. 1:19; 12:9) Kɛfata he lɛ, etsɛ Galilea Ŋshɔ lɛ yɛ Roma wiemɔ mli akɛ Tiberia Ŋshɔ. (6:1; 21:1) Bɔni afee ni mɛi ni jeee Yudafoi lɛ anu shishi lɛ, Yohane gbála Yudafoi agbijurɔyelii lɛ amli jogbaŋŋ. (6:4; 7:2; 11:55) Patmo ni ji he ni atswa enaneshi tu kɛtee lɛ bɛŋkɛ Efeso, ni bɔ ni ele Efeso kɛ agbɛnɛ hu asafoi krokomɛi ni yɔɔ Asia Bibioo lɛ jeɔ kpo faŋŋ yɛ Kpojiemɔ yitso 2 kɛ 3.

⁷ Woji ni he hiaa ni ana yɛ afi 1900 afii lɛ amli lɛ maa nɔ mi akɛ Yohane Sanekpakpa lɛ ja. Woji nɛɛ ateŋ ekome ji Yohane Sanekpakpa lɛ fã ko ni ana yɛ Mizraim, ni awo lɛ gbɛi akɛ Papyrus Rylands 457 (P⁵²) ní Yohane 18:31-33, 37, 38 lɛ yɔɔ nɔ, ni akɛto John Rylands Wojiatoohe ni yɔɔ Manchester yɛ England lɛ.b Odaseyeli ni tsɔɔ akɛ Yohane ŋma esanekpakpa lɛ yɛ klɛŋklɛŋ afi 100 lɛ naagbee gbɛ lɛ ji akɛ, Owula Frederic Kenyon ni etsɔ esɛɛ lɛ wie yɛ ewolo ni eŋma yɛ afi 1949, ni ji The Bible and Modern Scholarship lɛ baafa 21 lɛ mli akɛ: “Eyɛ mli akɛ wolo fã ni ayana nɛɛ edaaa moŋ, shi etsɔɔ akɛ ekolɛ mɛi anine shɛ woji ni aŋma Sanekpakpa nɛɛ yɛ nɔ lɛ nɔ yɛ Mizraim maŋ mli ni ana yɛ lɛ mli, yɛ aaafee afi 130-150 Ŋ.B. Akɛni ebaahe be fioo dani mɛi anine baashɛ ewolo lɛ nɔ yɛ heni eŋma yɛ lɛ hewɔ lɛ, enɛ tsɔɔ akɛ eŋma wolo nɛɛ yɛ klɛŋklɛŋ afi 100 afii lɛ anaagbee gbɛ, ni yiŋtoo ko bɛ ni abaanyɛ adamɔ nɔ aje be ni ekɛŋma ewolo lɛ he ŋwane.”

⁸ Yohane Sanekpakpa lɛ sa kadimɔ waa, ejaakɛ ehiɛkpamɔ wiemɔ lɛ haa anaa Wiemɔ lɛ, mɔ ni “shishijee lɛŋ lɛ ekɛ Nyɔŋmɔ yɔɔ” lɛ akɛ Mɔ ni nibii fɛɛ tsɔ enɔ kɛba shihilɛ mli. (1:2) Beni Yohane ha ale wekukpãa kpakpa ni yɔɔ Tsɛ lɛ kɛ Bi lɛ teŋ lɛ, ewie Yesu nitsumɔi kɛ shiɛmɔi lɛ ahe jogbaŋŋ, titri lɛ nɔ ni kɔɔ suɔmɔ ni mli wa ni haa Nyɔŋmɔ gbɛjianɔtoo kpele lɛ mlibii fɛɛ feɔ ekome lɛ he lɛ. Ewolo lɛ wie Yesu shihilɛ he sane ni tee nɔ yɛ afi 29-33 Ŋ.B. lɛ he, ni etsĩ Hehoo gbijuji ejwɛ ni eye beni etsuɔ esɔɔmɔ nitsumɔ lɛ atã, ni enɛ ji odaseyelii ni tsɔɔ akɛ Yesu kɛ afii etɛ kɛ fã tsu esɔɔmɔ nitsumɔ lɛ ateŋ ekome. Etsɛ gbijuji nɛɛ ateŋ etɛ akɛ Hehoo. (2:13; 6:4; 12:1; 13:1) Etsɛ amɛteŋ ekome akɛ ‘Yudafoi lɛ agbijurɔ,’ shi amaniɛbɔɔ lɛ tsĩ tã akɛ beni Yesu wie akɛ “eshwɛ nyɔji ejwɛ ni abelekpamɔ be lɛ” baashɛ lɛ etsɛɛɛ nɔŋŋ ni ewie enɛ, ni tsɔɔ akɛ gbijurɔyeli ni ewie he lɛ ji Hehoo lɛ ni jeɔ shishi yɛ nikpamɔ lɛ shishijee lɛ.—4:35; 5:1.c

⁹ “Yohane” sanekpakpa lɛ wie saji krokomɛi babaoo ahe; esane lɛ 100 mlijaa 92 ejeee kpo yɛ Sanekpakpai krokomɛi etɛ lɛ amli. Enɛ fɛɛ sɛɛ po lɛ, Yohane mu ewiemɔi lɛ anaa akɛ: “Shi nii krokomɛi pii hu yɛ ni Yesu fee, ni kɛji akɛɛ aaaŋma fɛɛ ekomekome lɛ, misusuɔ akɛ je lɛ diɛŋtsɛ nyɛŋ woji ni kulɛ aaaŋma lɛ ato.”—21:25.

NƆ HEWƆ NI EHE YƆƆ SƐƐNAMƆ

³⁰ Akɛni “Yohane” sanekpakpa lɛ mli wiemɔi lɛ yɛ tɛ̃ɛ, ni ekɛ wiemɔi ni tsɔɔ mɔ yiŋ ni taa mɔ mli tsɔɔ Wiemɔ, ní batsɔ Kristo lɛ mli hewɔ lɛ, ehaa wɔnaa Nyɔŋmɔ Bi lɛ wiemɔ kɛ enifeemɔ lɛ mli faŋŋ. Eyɛ mli akɛ Yohane kɛ wiemɔi ni yɔɔ mlɛo tsu nii ni eniŋmaa lɛ yɛ mlɛo, ni tsɔɔ akɛ ‘ejeee woloŋlelɔ’ moŋ, shi hewalɛ yɛ ewiemɔ lɛ mli diɛŋtsɛ. (Bɔf. 4:13) E-Sanekpakpa lɛ he baa sɛɛnamɔ waa yɛ le ni ehaa aleɔ suɔmɔ ni mli wa ni yɔɔ Tsɛ lɛ kɛ Bi lɛ teŋ, kɛ agbɛnɛ hu wekukpãa kpakpa ni mɔ náa yɛ ekome ni ekɛ amɛ feɔ lɛ mli lɛ. Kɛ́ abua wiemɔi ni ji ‘sumɔ’ kɛ ‘suɔmɔ’ ni Sanekpakpa ŋmalɔi krokomɛi etɛ lɛ kɛtsu nii lɛ naa lɛ, eshɛɛɛ shii abɔ ni Yohane kɛ wiemɔi nɛɛ tsu nii lɛ.

³¹ Mɛɛ wekukpãa ni yɔɔ naakpɛɛ po hi Wiemɔ lɛ kɛ Nyɔŋmɔ ni ji Tsɛ lɛ teŋ yɛ shishijee mli nɛkɛ! Yɛ Nyɔŋmɔ hewalɛ naa lɛ, “wiemɔ lɛ tsɔ heloo, ni ebashi buu yɛ wɔteŋ, ni wɔna enunyam lɛ, akɛ tsɛ lɛ bi koome lɛ anunyam, ni duromɔ kɛ anɔkwale eyi lɛ obɔ.” (Yoh. 1:14) Kɛkɛ ni yɛ Yohane sanekpakpa lɛ mli fɛɛ lɛ, Yesu ma bɔ ni ebaa ehe shi, ni efeɔ toiboo kwraa ehaa Tsɛ lɛ yɛ wekukpãa nɛɛ mli lɛ nɔ mi. (4:34; 5:19, 30; 7:16; 10:29, 30; 11:41, 42; 12:27, 49, 50; 14:10) Ewie wekukpãa ni yɔɔ gbagbalii nɛɛ he fɛfɛo yɛ sɔlemɔ ni taa mɔ tsuiŋ ni eŋma yɛ Yohane yitso 17 lɛ, Yesu kɛɛ e-Tsɛ lɛ yɛ jɛmɛ akɛ egbe nitsumɔ ni ekɛha lɛ yɛ shikpɔŋ lɛ nɔ lɛ naa, ni ekɛfata he akɛ: “Ni agbɛnɛ, Ataa, ŋɔɔ anunyam ni miyɔɔ yɛ oŋɔɔ dani je lɛ yɔɔ lɛ owo mihiɛ nyam.”—Yoh. 17:5.

³² Ni wekukpãa ni yɔɔ Yesu kɛ ekaselɔi lɛ ateŋ lɛ hu? Etee nɔ eha ana akɛ gbɛfaŋnɔ ni Yesu tsuɔ akɛ gbɛ pɛ ni Nyɔŋmɔ baatsɔ nɔ ejɔɔ ekaselɔi lɛ kɛ adesai fɛɛ lɛ he miihia waa. (14:13, 14; 15:16; 16:23, 24) Etsɛ Yesu akɛ “Nyɔŋmɔ toobi lɛ,” “wala aboloo lɛ,” “je lɛ mli la lɛ,” “tookwɛlɔ kpakpa lɛ,” “shitee lɛ kɛ wala lɛ,” “gbɛ lɛ kɛ anɔkwale lɛ,” kɛ “anɔkwa wein tso lɛ.” (1:29; 6:35; 8:12; 10:11; 11:25; 14:6; 15:1) Abɛbua ni kɔɔ “anɔkwa wein tso lɛ” he lɛ nɔ Yesu tsɔ eha ale ekomefeemɔ diɛŋtsɛ ni yɔɔ ekɛ enɔkwa sɛɛnyiɛlɔi lɛ kɛ e-Tsɛ teŋ. Kɛ́ amɛwo yibii babaoo lɛ, amɛkɛ no baawo e-Tsɛ lɛ hiɛ nyam. Yesu wo amɛ ŋaa akɛ: “Bɔ ni tsɛ lɛ sumɔ mi lɛ, nakai mi hu misumɔɔ nyɛ; nyɛhia shi yɛ misuɔmɔ lɛ mli.”—15:9.

³³ Ni mɛɛ hewalɛ po ekɛsɔle koni Yehowa aha ekaselɔi lɛ fɛɛ kɛ ‘mɛi ni baahe enɔ aye yɛ amɛwiemɔ naa lɛ’ hu kɛ e-Tsɛ lɛ kɛ lɛ afee ekome, koni amɛfee krɔŋkrɔŋ yɛ anɔkwale wiemɔ lɛ mli nɛkɛ! Yɛ anɔkwale mli lɛ, Yesu tsɔɔ yiŋtoo fɛɛ hewɔ ni eshiɛ lɛ mli fɛfɛo yɛ naagbee wiemɔ ni ewie beni esɔleɔ ehaa e-Tsɛ lɛ mli akɛ: “Mijie ogbɛi lɛ kpo mitsɔɔ amɛ, ni masaa majie lɛ kpo matsɔɔ, koni suɔmɔ ni okɛ sumɔ mi lɛ ahi amɛmli, ni mi hu mahi amɛmli.”—17:20, 26.

³⁴ Eyɛ mli akɛ Yesu miishi ekaselɔi lɛ moŋ, shi eha amɛ yelikɛbualɔ ni ji “anɔkwale mumɔ lɛ.” Kɛfata he lɛ, ewo amɛ ŋaa ni yɔɔ ebe naa yɛ wekukpãa ni esa akɛ ehi amɛkɛ je lɛ teŋ lɛ he, ni etsɔɔ amɛ bɔ ni amɛaafee amɛye omanye akɛ “la bii.” (14:16, 17; 3:19-21; 12:36) Yesu kɛɛ akɛ: “Kɛji nyɛhi shi yɛ miwiemɔ lɛ mli lɛ, minɔkwa kaselɔi ji nyɛ, ni nyɛaale anɔkwale lɛ, ni anɔkwale lɛ aaaha nyɛye nyɛhe.” Nɔ ni tamɔɔɔ nakai lɛ ekɛɛ duŋbii lɛ akɛ: “Nyɛ lɛ nyɛtsɛ ni nyɛjɛ emli ji abonsam, ni nyɛtsɛ lɛ tsinebaa nii nyɛsumɔɔ akɛ nyɛfee . . . edamɔɔɔ anɔkwale lɛ mli, ejaakɛ anɔkwale bɛ emli.” Belɛ nyɛhaa wɔtswaa wɔfai shi akɛ wɔbaahi anɔkwale lɛ mli daa, hɛɛ ní ‘wɔja tsɛ lɛ yɛ mumɔ kɛ anɔkwale mli,’ ni wɔha Yesu wiemɔi nɛɛ awo wɔ hewalɛ akɛ: “Nyɛtsui anyɔa nyɛmli: miye je lɛ nɔ kunim.”—8:31, 32, 44; 4:23; 16:33.

³⁵ Enɛɛmɛi fɛɛ kɔɔ Nyɔŋmɔ Maŋtsɛyeli lɛ hu he. Yesu ye enɛ he odase beni akaa lɛ lɛ, ewie akɛ: “Mimaŋtsɛyeli lɛ jɛɛɛ je nɛŋ; mimaŋtsɛyeli lɛ jɛ je nɛɛ mli jikulɛ, misɔɔlɔi lɛ aaapele he, koni akaŋɔ mi aha Yudafoi lɛ; shi enɛ lɛ, mimaŋtsɛyeli lɛ jɛɛɛ biɛ.” Kɛkɛ lɛ beni ehaa Pilato sanebimɔ lɛ hetoo lɛ, ekɛɛ akɛ: “Okɛɛ; ejaakɛ maŋtsɛ ji mi. Mi lɛ, enɛ hewɔ afɔ́ mi ni enɛ hewɔ nɔŋŋ miba je lɛ mli, koni mibaye anɔkwale lɛ he odase. Mɔ fɛɛ mɔ ni jɛ anɔkwale lɛ mli lɛ nuɔ migbee.” (18:36, 37) Mɛi ni boɔ toi kɛ mɛi ni ‘afɔ amɛ ekoŋŋ’ ni amɛkɛ Maŋtsɛ lɛ ‘baabote Nyɔŋmɔ maŋtsɛyeli lɛ mli lɛ’ yɛ miishɛɛ diɛŋtsɛ. “Tooi krokomɛi” ni boɔ Tookwɛlɔ ni ji Maŋtsɛ lɛ gbee toi koni amɛná wala lɛ yɛ miishɛɛ. Yɛ anɔkwale mli lɛ, esa akɛ wɔda shi yɛ Yohane Sanekpakpa lɛ he, ejaakɛ aŋma “koni nyɛhé nyɛye akɛ Yesu ji Kristo, Nyɔŋmɔ bi lɛ, ni kɛ́ nyɛheɔ nyɛyeɔ lɛ, ní nyɛná wala yɛ gbɛi lɛ mli.”—3:3, 5; 10:16; 20:31.

[Shishigbɛ niŋmai]