“Nyɛtsia Nyɛbɛŋkɛa Nyɔŋmɔ”
“Nyɛtsia nyɛbɛŋkɛa Nyɔŋmɔ, ni eeetsi eeebɛŋkɛ nyɛ.”—YAKOBO 4:8.
1, 2. (a) Mɛɛ saji gbɔmɛi fɔɔ kɛɛmɔ? (b) Mɛɛ kɔkɔbɔɔ Yakobo kɛha, ni mɛni hewɔ ehe hiaa amɛ lɛ?
“NYƆŊMƆ kɛ wɔ yɛ.” Akɛ nakai wiemɔi lɛ ewo maŋ okadii kɛ asraafoi atadei po ahiɛ nyam. Ákpɛ wiemɔ ni ji “Nyɔŋmɔ ji wɔ hekɛnɔfɔ̃ɔ” yɛ ŋmɛnɛŋmɛnɛ beaŋ shika babaoo ni áshwie kɛ ehe woji lɛ anɔ. Ewaaa kwraa akɛ adesai aaakɛɛ akɛ amɛkɛ Nyɔŋmɔ yɛ wekukpãa ni bɛŋkɛ kpaakpa mli. Shi ani okpɛlɛŋ nɔ akɛ, wekukpãa ni tamɔ nɛkɛ ni ayɔɔ diɛŋtsɛ lɛ biɔ babaoo fe ni aaawie he loo ni aaaŋmala ehe saji koni mɛi ana?
2 Biblia lɛ tsɔɔ akɛ abaanyɛ aná mɔ kɛ Nyɔŋmɔ teŋ wekukpãa. Shi ebiɔ mɔdɛŋbɔɔ. Ehe bahia ni Kristofoi ni afɔ amɛ mu yɛ klɛŋklɛŋ afii oha lɛ mli lɛ ateŋ mɛi komɛi po awaje wekukpãa ni kã amɛkɛ Yehowa Nyɔŋmɔ teŋ lɛ. Ehe bahia ni Kristofonyo nɔkwɛlɔ Yakobo abɔ mɛi komɛi kɔkɔ yɛ amɛ heloonaa subaŋi komɛi kɛ mumɔŋ hetsemɔ ni amɛlaaje lɛ ahe. Ekɛ kɔkɔbɔɔ ni mli wa nɛɛ ha yɛ nakai ŋaawoo lɛ mli, akɛ: “Nyɛtsia nyɛbɛŋkɛa Nyɔŋmɔ, ni eeetsi eeebɛŋkɛ nyɛ.” (Yakobo 4:1-12) Mɛni Yakobo kɛ wiemɔ ni ji “nyɛtsia nyɛbɛŋkɛa” lɛ tsɔɔ?
3, 4. (a) Yɛ mɛni he ekolɛ akɛ wiemɔ ni ji “nyɛtsia nyɛbɛŋkɛa Nyɔŋmɔ” lɛ kai mɛi ni kane Yakobo wiemɔi lɛ yɛ klɛŋklɛŋ afii oha lɛ mli lɛ? (b) Mɛni hewɔ wɔbaanyɛ wɔná nɔmimaa akɛ abaanyɛ abɛŋkɛ Nyɔŋmɔ lɛ?
3 Yakobo kɛ wiemɔ ni mɛi ni kane ewolo lɛ yɛ egbii lɛ amli lɛ ateŋ mɛi pii le momo tsu nii. Mose Mla lɛ kɛ famɔi pɔtɛɛi komɛi ha osɔfoi lɛ yɛ gbɛ ni amɛtsɔɔ nɔ ‘amɛbɛŋkɛɔ’ loo amɛyaa Yehowa ŋɔɔ kɛha ewebii lɛ mli. (2 Mose 19:22) Belɛ ekolɛ akai mɛi ni kaneɔ Yakobo wolo lɛ akɛ Yehowa ni amɛaabɛŋkɛ lɛ lɛ jeee nɔ ko ni abuɔ lɛ akɛ ejeee hiɛdɔɔ sane. Yehowa ji mɔ ni nɔ kwɔ ni je agbo fe fɛɛ yɛ jeŋ muu fɛɛ.
4 Yɛ gbɛ kroko nɔ lɛ, taakɛ Biblia he nilelɔ ko wie lɛ, “kɔkɔbɔɔ ni jeɔ kpo [yɛ Yakobo 4:8] lɛ jieɔ jwɛŋmɔ kpakpa ko ni mli wa kpo.” Yakobo le akɛ Yehowa ejɛ esuɔmɔ mli etee nɔ efɔ̃ gbɔmɛi ni yeee emuu lɛ nine be fɛɛ be koni amɛtsi amɛbɛŋkɛ Lɛ. (2 Kronika 15:2) Yesu afɔleshãa lɛ gbele gbɛ ni atsɔɔ nɔ abɛŋkɛɔ Yehowa lɛ naa yɛ gbɛ ni mɔɔ shi jogbaŋŋ nɔ. (Efesobii 3:11, 12) Ŋmɛnɛ, ágbele gbɛ ni atsɔɔ nɔ abɛŋkɛɔ Nyɔŋmɔ lɛ naa aha mɛi akpekpei abɔ! Shi kɛlɛ, mɛɛ gbɛ nɔ wɔɔtsɔ ni wɔkɛ hegbɛ ni nɔ bɛ nɛɛ atsu nii? Wɔbaasusu gbɛ̀i srɔtoi ni wɔbaanyɛ wɔtsɔ nɔ wɔtsi wɔbɛŋkɛ Yehowa Nyɔŋmɔ lɛ mli etɛ he kuku.
Yaa Nɔ ‘Oná Nyɔŋmɔ He Nilee’
5, 6. Yɛ mɛɛ gbɛ nɔ Samuel ni edako lɛ he sane lɛ feɔ nɔ ni yɔɔ Nyɔŋmɔ ‘he nilee ni aaaná’ lɛ mli lɛ he nɔkwɛmɔnɔ?
5 Taakɛ Yohane 17:3 tsɔɔ lɛ, Yesu kɛɛ akɛ: “Shi enɛ ji naanɔ wala lɛ, ákɛ amɛle bo, anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ.” Nɛkɛ ŋmalɛ kuku nɛɛ shishitsɔɔmɔi pii yɛ srɔto fioo yɛ New World Translation lɛ he. Yɛ nɔ najiaŋ ni amɛaakɛɛ akɛ ‘amɛya nɔ amɛná’ Nyɔŋmɔ ‘he nilee’ lɛ, amɛtsɔɔ feemɔ wiemɔ lɛ shishi akɛ “ní amɛle” Nyɔŋmɔ loo Nyɔŋmɔ “ni amɛaale” lɛ. Shi kɛlɛ, woloŋlelɔi pii ekadi akɛ shishinumɔ ni yɔɔ wiemɔ ni akɛtsu nii yɛ shishijee Hela mli lɛ kɔɔ nɔ kroko hu he—nɔ ko ni ayaa nɔ afeɔ, nɔ ni baaya ayagbe naa yɛ mɔ ko ni abaale lɛ jogbaŋŋ mli.
6 Ni aaale Nyɔŋmɔ jogbaŋŋ lɛ jeee nɔ ko hee yɛ Yesu gbii lɛ amli. Ákɛ nɔkwɛmɔnɔ lɛ, wɔkaneɔ yɛ Hebri Ŋmalɛi lɛ amli akɛ, beni Samuel ji gbekɛ lɛ, “no mli lɛ Samuel náko ale Yehowa.” (1 Samuel 3:7) Ani enɛ tsɔɔ akɛ nɔ ko bibioo ko pɛ Samuel le yɛ e-Nyɔŋmɔ lɛ he? Dabi. Eyɛ faŋŋ akɛ efɔlɔi kɛ osɔfoi lɛ tsɔɔ lɛ nii babaoo. Shi kɛlɛ, taakɛ woloŋlelɔ ko tsɔɔ mli lɛ, abaanyɛ ni akɛ Hebri wiemɔ ni akɛtsu nii yɛ nakai ŋmalɛ kuku lɛ mli lɛ “atsu nii aha le ni aleɔ mɔ jogbaŋŋ.” No mli lɛ Samuel náko ale Yehowa jogbaŋŋ, taakɛ ebale lɛ yɛ sɛɛ mli beni esɔmɔɔ akɛ Yehowa naawielɔ lɛ. Beni Samuel yaa nɔ edaa lɛ, ebale Yehowa diɛŋtsɛ yɛ anɔkwale mli, ebaná ekɛ lɛ teŋ wekukpaa ni bɛŋkɛ kpaakpa.—1 Samuel 3:19, 20.
7, 8. (a) Mɛni hewɔ esaaa akɛ Biblia mli tsɔɔmɔi ni mli kwɔlɔ lɛ akasemɔ jeɔ wɔnijiaŋ wui lɛ? (b) Mɛni ji Nyɔŋmɔ Wiemɔ lɛ mli anɔkwalei komɛi ní mli kwɔlɔ ní wɔɔfee jogbaŋŋ akɛ wɔɔkase lɛ?
7 Ani ooná Yehowa he nilee bɔni afee ni obale lɛ jogbaŋŋ? Kɛji akɛ obaafee nakai lɛ, belɛ esa akɛ ‘oshwe’ mumɔŋ niyenii ni Nyɔŋmɔ kɛhaa lɛ. (1 Petro 2:2) Otsui akanyɔ omli yɛ shishijee tsɔɔmɔi lɛ pɛ he. Bɔɔ mɔdɛŋ ni okase Biblia mli tsɔɔmɔi ni mli kwɔlɔ lɛ. (Hebribii 5:12-14) Ani nɛkɛ tsɔɔmɔi nɛɛ jeɔ onijiaŋ wui, ni oosusu akɛ amɛshishinumɔ wa tsɔ? Kɛji nakai lɛ, kaimɔ akɛ Yehowa ji ‘Tsɔɔlɔ Kpele’ lɛ. (Yesaia 30:20) Ele bɔ ni efeɔ ni ekɛ anɔkwalei ni mli kwɔlɔ woɔ adesai ni yeee emuu lɛ ajwɛŋmɔi amli. Ni ebaanyɛ ejɔɔ mɔdɛŋ ni obɔɔ yɛ anɔkwayeli mli koni onu nɔ ni etsɔɔ bo lɛ shishi lɛ nɔ.—Lala 25:4.
8 Mɛni hewɔ opɛiii bo diɛŋtsɛ omli okwɛɛɛ yɛ “Nyɔŋmɔ nibii ni mli kwɔlɔ” lɛ ekomɛi ahe? (1 Korintobii 2:10) Enɛɛmɛi jeee saji ni ayaa nɔ awieɔ ni eŋɔɔɔ, tamɔ nɔ ni Nyɔŋmɔ jamɔ he nilelɔi kɛ osɔfoi baanyɛ aje he ŋwane lɛ. Amɛji tsɔɔmɔi ni sɛɛnamɔ yɔɔ he ni kɔɔ wɔbei nɛɛ ahe ni wɔbaanyɛ wɔkase nibii ni yɔɔ miishɛɛ kɛjɛ mli koni wɔle wɔsuɔmɔ Tsɛ lɛ jwɛŋmɔ kɛ etsui mli saji ahe nɔ ko. Ákɛ nɔkwɛmɔnɔ lɛ, kpɔmɔnɔ lɛ, ‘teemɔŋ sane krɔŋkrɔŋ’ lɛ, kɛ kpaŋmɔi srɔtoi ni Yehowa kɛtsu nii ni ekɛjɔɔ ewebii lɛ ní ekɛha eyiŋtoo ba mli lɛ—nɛkɛ saji nɛɛ kɛ babaoo ni tamɔ enɛɛmɛi ji saji otii ni ŋɔɔ ni sɛɛnamɔ yɔɔ he ni mɔ diɛŋtsɛ baanyɛ apɛi mli ni ekase.—1 Korintobii 2:7.
9, 10. (a) Mɛni hewɔ henɔwomɔ ji oshara lɛ, ni mɛni baaye abua wɔ ni wɔkwa enɛ? (b) Kɛ aawie Yehowa nilee he lɛ, mɛni hewɔ esa akɛ wɔbɔ mɔdɛŋ ni wɔba wɔhe shi lɛ?
9 Yɛ be mli ni oyaa nɔ odaa yɛ mumɔŋ anɔkwalei ni mli kwɔlɔ lɛ ahe nilee mli lɛ, kwɛmɔ ohe nɔ jogbaŋŋ yɛ oshara ni nilee baanyɛ ekɛba, ni ji—henɔwomɔ he. (1 Korintobii 8:1) Henɔwomɔ yɛ oshara, ejaakɛ egbalaa adesai kɛjɛɔ Nyɔŋmɔ he. (Abɛi 16:5; Yakobo 4:6) Kaimɔ akɛ gbɔmɔ ko bɛ hegbɛ ni eshwãa yɛ enilee he. Ákɛ nɔkwɛmɔnɔ lɛ, susumɔ wiemɔi ni akɛkpá wolo ko ni pɛiɔ adesa jeŋ nilee mli nɔyaa ni ená nyɛsɛɛ nɛɛ lɛ amli ekwɛɔ lɛ hiɛ lɛ he okwɛ: “Babaoo ni wɔbaleɔ lɛ, babaoo ni wɔyɔseɔ akɛ nɔ ko bibioo pɛ wɔle. . . . Nɔ fɛɛ nɔ ni wɔkase lɛ jeee nɔ ko kwraa kɛ́ akɛto nɔ ni yɔɔ ni wɔbaakase lolo lɛ he.” Heshibaa ni tamɔ nɛkɛ shɛjeɔ mɔ mii. Ni agbɛnɛ kɛ́ eba nilee muu ni fe fɛɛ he, ni ji—Yehowa Nyɔŋmɔ he nilee—lɛ he lɛ, wɔnáa nɔ ni wɔɔdamɔ nɔ wɔba wɔhe shi be fɛɛ be. Mɛni hewɔ?
10 Kadimɔ Biblia mli wiemɔi komɛi ni kɔɔ Yehowa he lɛ. “Ojwɛŋmɔi lɛ amli kwɔlɔ naakpa.” (Lala 92:6) “[ Yehowa] da ni ehewalɛ fa, ni enilee hu aleee naa.” (Lala 147:5) “[ Yehowa] ejwɛŋmɔ lɛ anyɛɛɛ mli atao.” (Yesaia 40:28) “Oo, bɔ ni Nyɔŋmɔ nifálɛ kɛ ŋaa kɛ nilee mli kwɔ ha nɛ!” (Romabii 11:33) Eka shi faŋŋ akɛ, wɔnyɛŋ wɔle nɔ fɛɛ nɔ ni yɔɔ ni esa akɛ wɔle yɛ Yehowa he lɛ kɔkɔɔkɔ. (Jajelɔ 3:11) Etsɔɔ wɔ naakpɛɛ nibii babaoo, ni kɛlɛ, wɔbaaná nilee he nibii babaoo ni jwere wɔhiɛ ni wɔbaajɛ mli wɔkase babaoo lolo. Ani wɔnaaa akɛ gbɛkpamɔ ni tamɔ nɛkɛ yɛ miishɛɛ ni ehaa mɔ baa ehe shi hu? Belɛ, yɛ be mli ni wɔkaseɔ nii lɛ, nyɛhaa wɔkɛ wɔnilee lɛ atsua nii be fɛɛ be akɛ nɔ ni wɔɔdamɔ nɔ wɔtsi wɔbɛŋkɛ Yehowa, ní wɔkɛye wɔbua mɛi krokomɛi ni amɛfee nakai—jeee akɛ nɔ ni wɔɔdamɔ nɔ wɔwó wɔhe nɔ kɛteke mɛi krokomɛi.—Mateo 23:12; Luka 9:48.
Jiemɔ Suɔmɔ ni Oyɔɔ Kɛha Yehowa lɛ Kpo
11, 12. (a) Te esa akɛ Yehowa he nilee ni wɔnáa lɛ aná wɔnɔ hewalɛ aha tɛŋŋ? (b) Mɛni tsɔɔ kɛji ákɛ suɔmɔ ni mɔ ko yɔɔ kɛha Nyɔŋmɔ lɛ ji anɔkwale nɔ̃?
11 Nɔ ni sa jogbaŋŋ lɛ, bɔfo Paulo kɛ tsakpãa ko ba nilee kɛ suɔmɔ teŋ. Eŋma akɛ: “Ni enɛ he fai mikpaa, akɛ nyɛsuɔmɔ lɛ afá kɛya nɔ, ni eteke nɔ fe tsutsu lɛ yɛ nilee kɛ sɛɛyoomɔ fɛɛ gbɛfaŋ.” (Filipibii 1:9) Yɛ nɔ najiaŋ ni eeeha wɔfũ kɛ henɔwomɔ lɛ, esa akɛ anɔkwale fɛɛ anɔkwale ni jara wa ni wɔkaseɔ yɛ Yehowa kɛ eyiŋtoi ahe lɛ aha suɔmɔ ni wɔyɔɔ kɛha wɔŋwɛi Tsɛ lɛ afa.
12 Shi, mɛi ni kɛɔ akɛ amɛsumɔɔ Nyɔŋmɔ lɛ efeee nakai diɛŋtsɛ. Ekolɛ amɛbaaye henumɔi ni mli wawai ni yiɔ amɛtsuii amli obɔ lɛ anɔkwa. Nɛkɛ henumɔi nɛɛ hi, ni amɛsa yijiemɔ po, kɛ́ ekɛ anɔkwa nilee kpãa gbee. Shi enɛɛmɛi diɛŋtsɛ po tamɔɔɔ suɔmɔ diɛŋtsɛ ni ayɔɔ kɛha Nyɔŋmɔ. Mɛni hewɔ etamɔɔɔ nakai? Kadimɔ bɔ ni Nyɔŋmɔ Wiemɔ lɛ tsɔɔ suɔmɔ ni tamɔ nɛkɛ mli ehaa lɛ, akɛ: “Enɛ ji Nyɔŋmɔ suɔmɔ lɛ, akɛ wɔye ekitai lɛ anɔ; ni ekitai lɛ waaa.” (1 Yohane 5:3) Belɛ suɔmɔ kɛha Yehowa feɔ anɔkwale beni ajieɔ lɛ kpo yɛ toiboo nifeemɔi amli lɛ.
13. Mɛɛ gbɛ nɔ Nyɔŋmɔ gbeyeishemɔ baaye abua wɔ koni wɔjie suɔmɔ ni wɔyɔɔ kɛha Yehowa lɛ kpo yɛ?
13 Nyɔŋmɔ gbeyeishemɔ baaye abua wɔ ni wɔfee toiboo wɔha Yehowa. Nɛkɛ woo ni mli kwɔ kɛ bulɛ kpakpa kɛha Yehowa nɛɛ baa kɛjɛɔ ehe nilee ni anáa, ekrɔŋkrɔŋfeemɔ ni bɛ naagbee, enunyam, hewalɛ, jalɛsaneyeli, nilee, kɛ suɔmɔ he nikasemɔ mli. Gbeyeishemɔ ni tamɔ nɛkɛ he hiaa waa kɛha bɛŋkɛmɔ ni atsiɔ abɛŋkɛɔ lɛ lɛ mli. Yɛ anɔkwale mli lɛ, kadimɔ nɔ ni Lala 25:14 kɛɔ lɛ, akɛ: “Yehowa jieɔ eyitsoŋ sane etsɔɔ mɛi ní sheɔ lɛ lɛ.” No hewɔ lɛ, kɛ́ wɔyɛ gbeyeishemɔ kpakpa akɛ wɔfeŋ nɔ ko ni esaaa wɔŋwɛi Tsɛ ni yɔɔ suɔmɔ lɛ hiɛ lɛ, no lɛ wɔbaanyɛ wɔtsi wɔbɛŋkɛ lɛ. Nyɔŋmɔ gbeyeishemɔ baaye abua wɔ ni wɔbo ŋaawoo ni nilee yɔɔ mli ni aŋma yɛ Abɛi 3:6 lɛ toi, akɛ: “Kaimɔ lɛ yɛ ogbɛ̀i fɛɛ mli, ni lɛ eeejaje otempɔŋi lɛ!” Mɛni enɛ tsɔɔ?
14, 15. (a) Mɛni ji yiŋkpɛi ni wɔkɛkpeɔ yɛ daa gbi shihilɛ mli lɛ ekomɛi? (b) Mɛɛ gbɛ nɔ wɔɔtsɔ wɔkpɛ yiŋ yɛ gbɛ ni tsɔɔ akɛ wɔsheɔ Nyɔŋmɔ gbeyei nɔ?
14 Esa akɛ okpɛ oyiŋ daa gbi, yɛ sane ni tsii kɛ nɔ ni etsiii fɛɛ mli. Ákɛ nɔkwɛmɔnɔ lɛ, mɛɛ sane okɛ onanemɛi nitsulɔi, skulbii, kɛ akutsoŋbii baagba? (Luka 6:45) Ani obaatsu nitsumɔi ni akɛha bo lɛ ahe nii waa, aloo obaatao gbɛ̀i ni oootsɔ nɔ otsu amɛhe nii fioo ko kɛkɛ? (Kolosebii 3:23) Ani obaatsi obɛŋkɛ mɛi ni suɔmɔ fioo ko pɛ amɛyɔɔ kɛha Yehowa loo amɛbɛ eko po kɛha lɛ lɛ ahe, aloo obaasumɔ ni otsɔ mɛi ni amɛjwɛŋmɔ yɔɔ mumɔŋ nibii anɔ lɛ anɔ owaje owekukpãai lɛ? (Abɛi 13:20) Mɛni obaafee, yɛ gbɛ̀i bibii anɔ po, koni oha Nyɔŋmɔ Maŋtsɛyeli lɛ he nibii ashwere? (Mateo 6:33) Kɛji akɛ Ŋmalɛ naa shishitoo taomɔ nii ni tamɔ nɛkɛ ni átsɛ sɛɛ yɛ biɛ lɛ kudɔɔ odaa gbi yiŋkpɛi lɛ, belɛ, yɛ anɔkwale mli lɛ, ookai Yehowa “yɛ ogbɛ̀i fɛɛ mli.”
15 Enɛ miitsɔɔ akɛ, esa akɛ wɔha susumɔ nɛɛ akudɔ yiŋkpɛɛ fɛɛ yiŋkpɛɛ ni wɔfeɔ, akɛ: ‘Mɛni Yehowa baasumɔ ni mafee? Mɛɛ gbɛ baasa ehiɛ jogbaŋŋ?’ (Abɛi 27:11) Nyɔŋmɔ gbeyeishemɔ ni wɔɔjie lɛ kpo yɛ nɛkɛ gbɛ nɔ lɛ ji gbɛ ni hi fe fɛɛ ni wɔkɛaajie suɔmɔ ni wɔyɔɔ kɛha Yehowa lɛ kpo. Nyɔŋmɔ gbeyeishemɔ hu baatsirɛ wɔ koni wɔhe atse—yɛ mumɔŋ, yɛ jeŋba mli, kɛ gbɔmɔtsoŋ. Kaimɔ akɛ, yɛ ŋmalɛ kuku ni Yakobo wo Kristofoi hewalɛ akɛ “nyɛtsia nyɛbɛŋkɛa Nyɔŋmɔ” lɛ nɔŋŋ mli lɛ, ewo ŋaa hu akɛ: “Nyɛtsuua nyɛniji ahe, nyɛ eshafeelɔi, ní nyɛhaa nyɛtsuii ahe atsea, nyɛ jwɛŋmɔi enyɔnyɔtsɛmɛi.”—Yakobo 4:8.
16. Mɛni wɔnyɛŋ wɔtsu kɔkɔɔkɔ yɛ be mli ni wɔkɛ nɔ ko haa Yehowa lɛ, ni kɛlɛ mɛni wɔbaanyɛ wɔye omanye yɛ efeemɔ mli be fɛɛ be?
16 Shi, babaoo fata Yehowa ni wɔjieɔ wɔsuɔmɔ kpo wɔtsɔɔ lɛ lɛ he fe nɔ̃ fɔŋ he kɛkɛ ni wɔtsiɔ wɔhe kɛjɛɔ. Suɔmɔ hu tsirɛɔ wɔ koni wɔfee nɔ kpakpa. Ákɛ nɔkwɛmɔnɔ lɛ, mɛni wɔtsuɔ yɛ ejurɔ babaoo ni Yehowa feɔ kɛtekeɔ nɔ lɛ he? Yakobo ŋma akɛ: “Duromɔ nii kpakpai fɛɛ kɛ nikeenii ni hi kɛwula shi fɛɛ lɛ, ŋwɛi ejɛɔ ekpelekeɔ shi, kɛjɛɔ lai atsɛ lɛ ŋɔɔ.” (Yakobo 1:17) Eji anɔkwale akɛ, kɛ́ wɔkɛ nibii ni wɔyɔɔ lɛ ha Yehowa lɛ, ehaaa wɔfee lɛ niiatsɛ. Enii ji je lɛŋ nibii fɛɛ ni yɔɔ lɛ. (Lala 50:12) Ni kɛji akɛ wɔkɛ wɔbe kɛ wɔnyɛmɔ ha Yehowa lɛ, no etsɔɔɔ akɛ wɔmiitsu hiamɔ nii ko ni enyɛɛɛ etsu he nii lɛ he nii. Kɛji akɛ wɔkɛɛ wɔshiɛɛɛ Nyɔŋmɔ Maŋtsɛyeli lɛ he sane kpakpa lɛ dɔŋŋ po lɛ, ebaaha tɛi ashiɛ! Belɛ, mɛni hewɔ ni esa akɛ wɔkɛ wɔheloo gbɛfaŋ nibii, be, kɛ nyɛmɔ aha Yehowa mɔ? Nɔ titri ji akɛ, wɔtsɔɔ nɔ wɔjieɔ wɔsuɔmɔ kpo wɔtsɔɔ lɛ kɛtsɔɔ wɔtsui muu fɛɛ, susuma fɛɛ, jwɛŋmɔ fɛɛ, kɛ hewalɛ fɛɛ nɔ.—Marko 12:29, 30.
17. Mɛni baanyɛ akanya wɔ ni wɔkɛ nii aha Yehowa yɛ tsuijurɔnaa?
17 Kɛ́ wɔkɛ nɔ ko ha Yehowa lɛ, esa akɛ wɔfee nakai yɛ miishɛɛ mli, “ejaakɛ tsuijurɔnaa halɔ Nyɔŋmɔ sumɔɔ.” (2 Korintobii 9:7) Shishitoo mla ni aŋma afɔ shi yɛ 5 Mose 16:17 lɛ baanyɛ aye abua wɔ ni wɔkɛ nii ahã yɛ tsuijurɔnaa, akɛ: “Mɔ fɛɛ mɔ aha bɔ ni eeenyɛ, bɔ fɛɛ bɔ ni Yehowa, o-Nyɔŋmɔ lɛ, ejɔɔo eha lɛ.” Kɛji akɛ wɔsusu ejurɔ babaoo ni Yehowa efee wɔ lɛ he lɛ, wɔshweɔ ni wɔkɛha lɛ kɛ tsuijurɔ yɛ miishɛɛ mli. Nihamɔ ni tamɔ nɛkɛ haa etsui nyaa, tamɔ bɔ ni nikee fioo ni jɛ gbekɛ ni asumɔɔ esane lɛ ŋɔɔ haa efɔlɔ náa miishɛɛ lɛ. Wɔsuɔmɔ ni wɔjieɔ lɛ kpo yɛ nɛkɛ gbɛ nɔ lɛ baaye abua wɔ ni wɔtsi wɔbɛŋkɛ Yehowa.
Tsɔ Sɔlemɔ nɔ Otswa Naanyobɔɔ ni Mli Wa Oma Shi
18. Mɛni hewɔ esa jogbaŋŋ akɛ wɔsusu gbɛ ni wɔɔtsɔ nɔ wɔha wɔsɔlemɔi lɛ ahilɛ aya hiɛ lɛ he lɛ?
18 Be ni wɔkɛsɔleɔ lɛ haa wɔnáa hegbɛ ni nɔ bɛ—bei kɛha mɔ kɛ mɔ teŋ teemɔŋ sanegbaa ni baaya nɔ yɛ wɔkɛ wɔŋwɛi Tsɛ lɛ teŋ. (Filipibii 4:6) Akɛni sɔlemɔ ji nɔ titri ni atsɔɔ nɔ abɛŋkɛɔ Nyɔŋmɔ hewɔ lɛ, sɛɛnamɔ yɛ he akɛ wɔɔmɛ fioo ni wɔsusu wɔsɔlemɔi lɛ ahilɛ he. Jeee akɛ esa akɛ amɛfee naatselɛ ni áto he gbɛjianɔ jogbaŋŋ he nɔkwɛmɔnɔ, shi esa akɛ amɛfee anɔkwa wiemɔi ni baa kɛjɛɔ tsui lɛ mli. Te wɔɔfee tɛŋŋ wɔha wɔsɔlemɔi lɛ ahilɛ aya hiɛ?
19, 20. Mɛni hewɔ esa akɛ wɔjwɛŋ sane nɔ dani wɔsɔle, ni mɛni ji saji komɛi ni sa kɛha sane nɔjwɛŋmɔ?
19 Wɔbaanyɛ wɔbɔ mɔdɛŋ wɔjwɛŋ sane nɔ dani wɔsɔle. Kɛji akɛ wɔtsɔ hiɛ wɔjwɛŋ sane nɔ lɛ, wɔbaanyɛ ni wɔha wɔsɔlemɔi lɛ akɔ sane pɔtɛɛ ko he koni shishinumɔ ahi mli, ni ebaaha wɔkwa saji ni wɔle momo ni baa jwɛŋmɔ mli amrɔ nɔŋŋ lɛ amlitii. (Abɛi 15:28, 29) Ekolɛ saneyitsei komɛi ni Yesu tsĩ ta yɛ esɔlemɔ nɔkwɛmɔnɔ lɛ mli lɛ ahe susumɔ kɛ bɔ ni enɛɛmɛi kɔɔ shihilɛ ni wɔ diɛŋtsɛ wɔyɔɔ mli lɛ ahe lɛ he susumɔ baanyɛ aye abua. (Mateo 6:9-13) Ákɛ nɔkwɛmɔnɔ lɛ, wɔbaanyɛ wɔbi wɔ diɛŋtsɛ wɔhe akɛ, mɛɛ gbɛfaŋnɔ fioo ko wɔbaanyɛ wɔtsu yɛ Yehowa suɔmɔnaa nifeemɔ mli yɛ shikpɔŋ nɛɛ nɔ. Ani wɔbaanyɛ wɔtsɔɔ Yehowa bɔ ni wɔshweɔ ni wɔhe aba sɛɛnamɔ kɛha lɛ bɔ ni wɔɔnyɛ, ni wɔbi eyelikɛbuamɔ yɛ nitsumɔ fɛɛ nitsumɔ ni ekɛha wɔ lɛ tsumɔ mli? Ani wɔheloonaa hiamɔ nii ahe susumɔ etsɔ tamɔ jatsu ni tere wɔ? Mɛɛ eshai nɛkɛ ehe hiaa ni akɛke wɔ, ni namɛi hu ehe hiaa ni wɔkɛ amɛhe ake amɛ babaoo? Mɛɛ kaai haoɔ wɔ, ni ani wɔyɔseɔ bɔ ni Yehowa hebuu he hiaa wɔ waa yɛ enɛ mli lɛ?
20 Kɛfata he lɛ, wɔbaanyɛ wɔsusu gbɔmɛi ni wɔle amɛ ni Yehowa yelikɛbuamɔ he hiaa amɛ yɛ nɔ ko pɔtɛɛ ko he lɛ ahe. (2 Korintobii 1:11) Nɔ ni esaaa akɛ wɔhiɛ kpaa nɔ hu ji, shidaa ni wɔkɛaaha. Kɛji akɛ wɔhe be ni wɔsusu he lɛ, bɔ fɛɛ bɔ ni eji lɛ, wɔbaanyɛ wɔná yiŋtoi ni wɔɔdamɔ nɔ wɔda Yehowa shi, ni wɔjie eyi daa gbi yɛ enijuji babaoo lɛ hewɔ. (5 Mose 8:10; Luka 10:21) Nakai feemɔ kɛ sɛɛnamɔ kroko baa—ebaanyɛ eye ebua wɔ ni wɔná shihilɛ he jwɛŋmɔ kpakpa kɛ shidaa su babaoo.
21. Mɛɛ Ŋmalɛ mli nɔkwɛmɔnii akasemɔ baanyɛ aye abua wɔ kɛ wɔbɛŋkɛ Yehowa yɛ sɔlemɔ mli?
21 Nikasemɔ baanyɛ aye abua wɔsɔlemɔi hu. Áŋmala hii kɛ yei anɔkwafoi asɔlemɔi ni ekaaa yɛ Nyɔŋmɔ Wiemɔ lɛ mli. Ákɛ nɔkwɛmɔnɔ lɛ, kɛji akɛ naagba ko ni kaa mɔ kã wɔhiɛ, ni eha wɔfee yeyeeye, ni wɔmiishe wɔhilɛ-kɛhamɔ loo wɔsuɔlɔi anɔ̃ po he gbeyei lɛ, wɔbaanyɛ wɔkane Yakob sɔlemɔ ni kɔɔ enyɛmi Esau ni taoɔ atɔ owele, ni ekɛ lɛ baakpe lɛ he lɛ. (1 Mose 32:10-13) Aloo wɔbaanyɛ wɔkase Maŋtsɛ Asa sɔlemɔ lɛ, beni Kushbii ata babaoo ni shɛɔ aaafee akpeiakpe kome wo Nyɔŋmɔ webii ahe gbeyei lɛ. (2 Kronika 14:10, 11) Kɛji akɛ wɔhao yɛ naagba ko ni miihe ekɛ ahorabɔɔ aba Yehowa gbɛi kpakpa lɛ nɔ lɛ he lɛ, no lɛ esa akɛ wɔsusu Elia sɔlemɔ yɛ Baal jálɔi lɛ ahiɛ yɛ Karmel Gɔŋ lɛ nɔ lɛ he, tamɔ bɔ ni Nehemia sɔlemɔ ni kɔɔ shihilɛ ni ehiii kwraa ni Yerusalem yɔɔ mli lɛ he lɛ ji lɛ. (1 Maŋtsɛmɛi 18:36, 37; Nehemia 1:4-11) Sɔlemɔi nɛɛ akanemɔ kɛ amɛ nɔjwɛŋmɔ lɛ baanyɛ awaje wɔhemɔkɛyeli, ni ebaanyɛ eha wɔná susumɔi ni kɔɔ gbɛ ni hi fe fɛɛ ni wɔɔtsɔ nɔ wɔkɛ nibii ni gbaa wɔnaa lɛ aya Yehowa hiɛ lɛ ahe.
22. Mɛni ji afi 2003 afi ŋmalɛ lɛ, ni mɛɛ saji wɔbaanyɛ wɔbi wɔhe yɛ be kɛ bei amli yɛ afi muu lɛ fɛɛ mli?
22 Eyɛ faŋŋ akɛ, woo ko bɛ ni da, ni oti ko bɛ ni nɔ kwɔ, fe nɔ ni wɔɔbo Yakobo ŋaawoo lɛ toi akɛ, “nyɛtsia nyɛbɛŋkɛa Nyɔŋmɔ.” (Yakobo 4:8) Eba akɛ wɔɔfee nakai kɛtsɔ Nyɔŋmɔ he nilee ni wɔɔya nɔ wɔná lɛ nɔ, kɛtsɔ wɔsuɔmɔ ni wɔɔjie lɛ kpo wɔtsɔɔ lɛ babaoo be fɛɛ be lɛ nɔ, ni agbɛnɛ kɛtsɔ naanyobɔɔ ni mli wa ni wɔkɛ lɛ baaná kɛtsɔ wɔsɔlemɔi anɔ lɛ nɔ. Yɛ be mli ni wɔhaa Yakobo 4:8 lɛ hiɔ wɔjwɛŋmɔ mli akɛ afi ŋmalɛ yɛ afi 2003 lɛ mli fɛɛ lɛ, nyɛhaa wɔyaa nɔ wɔpɛia wɔ diɛŋtsɛ wɔmli wɔkwɛa akɛ, yɛ anɔkwale mli lɛ, wɔmiitsi wɔmiibɛŋkɛ Yehowa lo. Shi nakai wiemɔ lɛ naagbee fã lɛ hu? Mɛɛ shishinumɔ naa Yehowa ‘aaatsi abɛŋkɛ bo’ yɛ, ni mɛɛ jɔɔmɔi ekɛbaaba? Nikasemɔ ni nyiɛ sɛɛ lɛ baasusu nɛkɛ sane nɛɛ he.
Ani Okaiɔ?
• Mɛni hewɔ esa akɛ wɔkɛ hiɛdɔɔ asusu Yehowa ni atsiɔ abɛŋkɛɔ lɛ lɛ he jogbaŋŋ lɛ?
• Mɛni ji otii komɛi ni wɔkɛbaamamɔ shi yɛ Yehowa he nilee ni wɔnáa lɛ mli?
• Mɛɛ gbɛ nɔ wɔɔtsɔ wɔtsɔɔ akɛ wɔyɛ anɔkwa suɔmɔ kɛha Yehowa?
• Mɛɛ gbɛ̀i anɔ wɔɔtsɔ wɔtswa wɔkɛ Yehowa teŋ naanyobɔɔ ni mli wa wɔma shi yɛ sɔlemɔ mli?
[Wiemɔ ni akɔ ni akɛmiitsu nii ni yɔɔ baafa 12]
Afi ŋmalɛ kɛha afi 2003 lɛ baafee: “Nyɛtsia nyɛbɛŋkɛa Nyɔŋmɔ, ni eeetsi eeebɛŋkɛ nyɛ.”—Yakobo 4:8.
[Mfoniri ni yɔɔ baafa 8, 9]
Beni Samuel daa lɛ, ebale Yehowa jogbaŋŋ
[Mfoniri ni yɔɔ baafa 12]
Sɔlemɔ ni Elia sɔle yɛ Karmel Gɔŋ lɛ nɔ lɛ ji nɔkwɛmɔnɔ kpakpa kɛha wɔ