Yitso 15

Sɛɛkuu Kɛmiiya Anɔkwa Nyɔŋmɔ lɛ Ŋɔɔ

“Kita hee miŋɔhaa nyɛ, akɛ nyɛsumɔ nyɛhe; taakɛ bɔ ni misumɔ nyɛ lɛ, nakai nyɛ hu nyɛsumɔa nyɛhe. Kɛji nyɛsumɔɔ nyɛhe lɛ, no mɛi fɛɛ kɛaale akɛ mikaselɔi ji nyɛ.”—Yohane 13:34, 35.

1, 2. Mɛni esa akɛ ejɛ suɔmɔ ni yɔɔ Kristofoi ateŋ lɛ mli aba?

NƐKƐ wiemɔi nɛɛ Yesu kɛfee taomɔ nii eha mɛi ni kɛɔ akɛ amɛji enɔkwa sɛɛnyiɛlɔi lɛ. Esa akɛ Kristofoi asuɔmɔ ateke hewolonɔ su, wiemɔ kɛ maji amligbalamɔi fɛɛ. Ebaabi ni anɔkwa Kristofoi afee “mɛi ni jɛɛɛ je lɛ mli,” taakɛ Yesu ji ni “ejɛɛɛ je lɛ mli lɛ.”—Yohane 17:14, 16; Romabii 12:17-21.

² Mɛɛ gbɛ nɔ Kristofonyo lɛ tsɔɔ ejieɔ ehe kpo akɛ mɔ “ni jɛɛɛ je lɛ mli”? Akɛ nɔkwɛmɔ nɔ lɛ, te esa akɛ efee enii yɛ maŋkwramɔŋ, maŋ hiɛ atuatsemɔi, kɛ wɔgbii nɛɛ amli tai ni yɔɔ basabasa nɛɛ ahe eha tɛŋŋ? Kristofonyo bɔfo Yohane ŋma yɛ Yesu wiemɔi ni yɔɔ yiteŋgbɛ nɛɛ kɛ gbeekpamɔ naa akɛ: “Mɔ fɛɛ mɔ ni tsuuu jalɛ nii lɛ, ejɛɛɛ Nyɔŋmɔ mli, kɛ mɔ ni sumɔɔɔ enyɛmi hu. Ejaakɛ enɛ ji bɔfosane ni nyɛnu kɛjɛ shishijee lɛ, akɛ wɔsumɔsumɔɔ wɔhe.” Ni Yesu diɛŋtsɛ tsɔɔ nɔ hewɔ ni ekaselɔi lɛ kɛ amɛ wuuu ta koni amɛjie lɛ lɛ mli, akɛ: “Mi-maŋtsɛyeli lɛ jɛɛɛ je nɛŋ; mi-maŋtsɛyeli lɛ jɛ je nɛɛ mli jikulɛ, misɔɔlɔi lɛ aaapele he . . . shi enɛ lɛ mi-maŋtsɛyeli lɛ jɛɛɛ biɛ.” Yɛ be mli ni oshara eba Yesu wala he po lɛ, nakai sɔɔlɔi lɛ kɛ amɛhe wooo nakai béi lɛ saamɔ yɛ je lɛŋ tawuu gbɛi anɔ lɛ amli.—1 Yohane 3:10-12; Yohane 18:36.

3, 4. (a) Mɛni Yesaia gba yɛ “naagbee gbii lɛ” ahe? (b) Mɛɛ saji esa akɛ aha hetoo?

³ Yesaia gba, nɔ ni fe afii 700 dani Kristo ba, akɛ gbɔmɛi ni jɛ jeŋmaji fɛɛ mli baabua amɛhe naa kɛba Yehowa anɔkwa jamɔ he ni amɛkaseŋ tawuu dɔŋŋ. Ekɛɛ: “Ni aaaba mli akɛ naagbee gbii lɛ amli lɛ, Yehowa we lɛ gɔŋ lɛ aaama shi yɛ gɔji lɛ ayiteaŋ, . . . ni jeŋmaji fɛɛ aaaho kɛaaba he; ni majimaji pii aaatee ayakɛɛ: ‘Nyɛbaa ni wɔyakwɔa Yehowa gɔŋ lɛ, kɛyaa Yakob Nyɔŋmɔ lɛ we lɛ, koni etsɔɔ wɔ egbɛi lɛ, ni wɔnyiɛ etempɔŋi lɛ anɔ!’ Ejaakɛ mla lɛ, Zion ebaajɛ, ni Yehowa wiemɔ lɛ, Yerusalem ebaajɛ. Ni eeekojo jeŋmaji lɛ ateŋ ni eeeka maji babaoo; ni amɛkɛ amɛ klantei aaasɔ kɔii, ni amɛkɛ amɛ kpɔlɔi hu aaasɔ adedai. Jeŋmaŋ ko woŋ klante nɔ eshiŋ jeŋmaŋ ko, ni amɛkaseŋ tawuu dɔŋŋ.”a—Yesaia 2:2-4.

⁴ Te jamɔi fɛɛ ni yɔɔ je lɛ mli lɛ ateŋ nɔ ni ana nɛkɛ taomɔ nii nɛɛ yɛ amɛhe waa lɛ? Namɛi ekpoo tawuu kasemɔ yɛ tsuŋwooi, gboklɛfoi aŋsaraŋ, kɛ gbele ni akɛgbalaa amɛtoi lɛ fɛɛ sɛɛ?

Kristofoi Asuɔmɔ kɛ He ni Akɛwooo Maŋ Saji Amli

5. Mɛɛ saji ni kɔɔ Kristofoi ni kɛ amɛhe wooo maŋ saji amli lɛ he Yehowa Odasefoi kɛmamɔ shi akɛ aŋkroaŋkroi, ni mɛni hewɔ?

⁵ Ale Yehowa Odasefoi yɛ jeŋ fɛɛ yɛ amɛhenilee mli ni amɛjɛɔ amɛdamɔɔ shi aŋkroaŋkroi akɛ Kristofoi ni kɛ amɛhe wooo maŋ saji amli lɛ hewɔ. Amɛŋmɛ amɛtsui shi yɛ tsuŋwooi, gboklɛfoi aŋsaraŋ, niseniianifeemɔ, amɛnaneshi tutswaa, kɛ yiwaai amli yɛ afii ohai 20 lɛ mli fɛɛ ejaakɛ amɛkpoo akɛ amɛkɛ amɛsuɔmɔ kɛ ekomefeemɔ akɛ jeŋ muu fɛɛ Kristofoi asafo ni agbala amɛ abɛŋkɛ Nyɔŋmɔ he lɛ aaasha afɔle. Yɛ Nazi Germany, yɛ 1933-45 afii lɛ amli lɛ, aaafee Odasefoi akpe gboi, ni awo akpei abɔ tsuŋ, akɛni amɛkpɛlɛɛɛ nɔ akɛ amɛkɛ Hitler tawuu he mɔdɛŋbɔɔi lɛ aaakpa gbee hewɔ. Nakai nɔŋŋ hu awo obalaŋtai Odasefoi ohai abɔ tsuŋ, ni amɛteŋ mɛi pii hi asraafoi atsuŋwoo hei, ni kɛ aja mli lɛ mɔ fɛɛ mɔ naa afii nyɔŋma, fe ni amɛaakase tawuu, yɛ Fascist Spania yɛ Franco shishi. Yehowa Odasefoi obalaŋtai pii yɛ tsuŋwoo hei yɛ maji pii anɔ, kɛbashi ŋmɛnɛ gbi nɛɛ, yɛ amɛshidaamɔ akɛ Kristofoi ni kɛ amɛhe wooo maŋ saji amli lɛ hewɔ. Shi, Yehowa Odasefoi etsiii nɔyelii lɛ atawuu he gbɛjianɔtoi lɛ agbɛ hu. Kristofoi ni hosooo ni kɛ amɛhe wooo maŋkwramɔŋ saji amli ni Odasefoi lɛ hiɛɔ mli lɛ efee amɛhemɔkɛyelii ni tsakeee yɛ afii ohai 20 lɛ mli béi kɛ tawuu lɛ fɛɛ mli lɛ ateŋ ekome. Ekadiɔ amɛ akɛ Kristo sɛɛnyiɛlɔi anɔkwafoi ni ejieɔ amɛ kɛjɛɔ Kristendom jamɔi lɛ ahe.—Yohane 17:16; 2 Korintobii 10:3-5.

6, 7. Mɛni Yehowa Odasefoi ebanu shishi yɛ Kristojamɔ he?

⁶ Yɛ Biblia lɛ ni amɛkpɛtɛɔ he kɛ Kristo nɔkwɛmɔ nɔ lɛ sɛɛ ni amɛnyiɛɔ hewɔ lɛ, Yehowa Odasefoi jieɔ amɛhe kpo akɛ amɛmiitsu Yehowa, anɔkwa Nyɔŋmɔ lɛ jamɔ he nii. Amɛyɔseɔ Nyɔŋmɔ suɔmɔ lɛ ni jeɔ kpo yɛ Yesu shihilɛ kɛ efɔleshaa lɛ mli lɛ. Amɛnuɔ shishi akɛ nɔ ni jɛɔ anɔkwa Kristofoi asuɔmɔ mli baa ji jeŋ muu fɛɛ nyɛmifeemɔ ni anyɛɛɛ agbala amɛmli—ni tekeɔ maŋkwramɔ, hewolonɔ su, kɛ maji amligbalamɔi. Yɛ gbɛ kroko nɔ lɛ, Kristojamɔ fe majimaji ateŋ nɔ ko kɛkɛ; eji nɔ ni nɔ kwɔ fe jeŋmaji anɔyelii, etekeɔ majimaji ahusui, hegbɛi, loo nibii ni amɛsumɔɔ. Ebuɔ gbɔmɛi adesai fɛɛ akɛ weku kome ni jɛ blematsɛ kome mli ni yɔɔ Bɔlɔ kome, ni ji Yehowa Nyɔŋmɔ.—Bɔfoi lɛ Asaji 17:24-28; Kolosebii 3:9-11.

⁷ Yɛ be mli ni etamɔ nɔ ni jamɔi krokomɛi lɛ fɛɛ kɛ amɛhe ewo tai—ni akɛgbeɔ wekumɛi kɛ gbɔmɛi krokomɛi amli lɛ—Yehowa Odasefoi etsɔɔ akɛ amɛboɔ gbalɛ ni yɔɔ Yesaia 2:4, ni atsɔ hiɛ atsɛ emli wiemɔi asɛɛ lɛ toi. ‘Shi,’ ekolɛ obaabi akɛ, ‘nɛgbɛ Yehowa Odasefoi jɛ? Mɛɛ gbɛ nɔ amɛtsɔɔ amɛtsuɔ nii?’

Nyɔŋmɔ Odasefoi ni Ato Amɛ Kakadaŋŋ

8, 9. Mɛɛ ninefɔɔ Nyɔŋmɔ ekpa mli kɛha adesai?

⁸ Nɔ ni fe afii 2,700 ni eho nɛ, ni gbalɔ Yesaia kɛ ninefɔɔ wiemɔi nɛɛ hu ha: “Nyɛtaoa Yehowa, be mli ni eeeha ana lɛ, nyɛtsɛa lɛ, be mli ni ebɛŋkɛ! Ha ni mɔ fɔŋ akwa egbɛi lɛ, ni nɔshafeelɔ akwa ejwɛŋmɔi lɛ, ni eku esɛɛ kɛba Yehowa ŋɔɔ, ni emusuŋ aaatsɔ lɛ yɛ ehewɔ, kɛ wɔ-Nyɔŋmɔ lɛ ŋɔɔ, shi ekɛaafa lɛ aahu.”—Yesaia 55:6, 7.

⁹ Yɛ afii ohai komɛi asɛɛ lɛ, Kristofonyo bɔfo Paulo tsɔɔ mli etsɔɔ nakai Helabii ni yɔɔ Ateene ni “jaa [blema adesãi amli] wɔji pɛpɛɛpɛ” lɛ akɛ: “La kome [Nyɔŋmɔ] ŋɔfee gbɔmɛi adesai fɛɛ, ni amɛhi shikpɔŋ lɛ fɛɛ hiɛ, ni yinɔi ni eto lɛ kɛ amɛshihilɛ hei lɛ ahusui lɛ ekpɛ mli eto momo, koni amɛtao Nyɔŋmɔ sɛɛ gbɛ, akɛ aleenɔ kɛ amɛgbugbuu shi lɛ, amɛaana lɛ lo; tsɛbelɛ ekɛ wɔteŋ mɔ fɛɛ mɔ teŋ jɛkɛɛɛ.”—Bɔfoi lɛ Asaji 17:22-28.

10. Te wɔfeɔ tɛŋŋ wɔleɔ akɛ Nyɔŋmɔ kɛ Adam kɛ Hawa kɛ amɛbii lɛ ateŋ jɛkɛɛɛ?

¹⁰ Eka shi faŋŋ akɛ Nyɔŋmɔ kɛ ebɔɔnii ni ji adesai, Adam kɛ Hawa, teŋ jɛkɛɛɛ. Ekɛ amɛ wie, ni etsɔɔ amɛ ekitai kɛ esuɔmɔnaa nii. Agbɛnɛ, Nyɔŋmɔ eteee ehe kɛjɛɛɛ amɛbii ni ji Kain kɛ Habel he. Ewo Kain ni nyɛɔ mɔ lɛ ŋaa beni emli fu yɛ enyɛminuu lɛ afɔle ni esha eha Nyɔŋmɔ lɛ he lɛ. Shi, ni Kain aaatsake ejamɔ su lɛ moŋ lɛ, ejie awuŋayeli, kɛ jamɔ he tsui ni anaaa kpo, kɛkɛ ni egbe enyɛminuu Habel.—1 Mose 2:15-17; 3:8-24; 4:1-16.

11. (a) Mɛni ji wiemɔ “la odasefonyo” lɛ shishi? (b) Te fee tɛŋŋ ni Habel batsɔ klɛŋklɛŋ la odasefonyo?

¹¹ Yɛ anɔkwale ni Habel ye Nyɔŋmɔ kɛyashi gbele mli po lɛ hewɔ lɛ, ebatsɔ klɛŋklɛŋ la odasefonyo.b Agbɛnɛ lɛ ji klɛŋklɛŋ Yehowa odasefonyo, kɛ klɛŋklɛŋ mɔ yɛ odasefoi emuuyeli-mlihiɛlɔi ni ato amɛ kakadaŋŋ yɛ yinɔsane be fɛɛ mli lɛ ateŋ. No hewɔ lɛ Paulo baanyɛ ajaje akɛ: “Hemɔkɛyeli Habel kɛsha afɔle ni fe Kain nɔ lɛ eha Nyɔŋmɔ, no hewɔ hu ni aye ehe odase akɛ jalɔ ji lɛ lɛ; ejaakɛ Nyɔŋmɔ ye enikeenii lɛ ahe odase; ni no nɔŋŋ ekɛwieɔ lolo, tsɛ egbo.”—Hebribii 11:4.

12. Namɛi hu ji Yehowa odasefoi anɔkwafoi ni fee nɔkwɛmɔ nii?

¹² Paulo tsi hii kɛ yei anɔkwafoi babaoo ni eto amɛ naa, tamɔ Noa, Abraham, Sara kɛ Mose, ni yɛ amɛ emuuyeli nitsumɔi ahewɔ lɛ, amɛbatsɔ ‘odasefoi [Hela, mar·tyʹron] tamɔ atatu,’ ni amɛsɔmɔ akɛ hewalɛwoo he nɔkwɛmɔ nii kɛha mɛi krokomɛi ni miisumɔ ni amɛle ni amɛsɔmɔ anɔkwa Nyɔŋmɔ lɛ agbɛi ata yɛ nakai wolo ni eŋma eyaha Hebribii lɛ nɔŋŋ mli. Amɛji hii kɛ yei ni kɛ Yehowa Nyɔŋmɔ yɔɔ wekukpaa. Amɛtao lɛ ni amɛna lɛ.—Hebribii 11:1–12:1.

13. (a) Mɛni hewɔ Yesu ji Nyɔŋmɔ suɔmɔ lɛ kpojiemɔ yɛ gbɛ ni ekaaa nɔ lɛ? (b) Yɛ mɛɛ gbɛ nɔ Yesu ji nɔkwɛmɔ nɔ kɛha esɛɛnyiɛlɔi lɛ yɛ gbɛ krɛdɛɛ nɔ?

¹³ Mɔ ni esoro lɛ kwraa yɛ odasefoi nɛɛ ateŋ ji mɔ ni atsɔɔ bɔ ni eji yɛ Kpojiemɔ wolo lɛ mli lɛ, “Yesu Kristo, ‘Odasefonyo Anɔkwafo lɛ.’” Yesu ji Nyɔŋmɔ suɔmɔ lɛ he odaseyeli kroko ni mli ka shi faŋŋ, ejaakɛ taakɛ Yohane ŋma lɛ: “Ni wɔ lɛ wɔna, ni wɔmiiye odase akɛ Tsɛ lɛ etsu e-Bi lɛ akɛ je lɛ Yiwalaherelɔ. Mɔ fɛɛ mɔ ni jajeɔ akɛ Yesu [Kristo] ji Nyɔŋmɔ Bi lɛ, Nyɔŋmɔ hiɔ emli, ni lɛ hu ehiɔ Nyɔŋmɔ mli. Ni wɔ lɛ wɔle ni wɔhe suɔmɔ ni Nyɔŋmɔ sumɔɔ wɔ lɛ wɔye.” Akɛni afɔ lɛ akɛ Yudanyo hewɔ lɛ, Yesu ji anɔkwa odasefonyo, ni egbo akɛ la odasefonyo anɔkwafo eha e-Tsɛ lɛ, ni ji Yehowa. Kristo anɔkwa sɛɛnyiɛlɔi kɛtsɔ yinɔi lɛ amli lɛ hu baafee lɛ kɛ anɔkwa Nyɔŋmɔ, Yehowa he odasefoi.—Kpojiemɔ 1:5; 3:14; 1 Yohane 4:14-16; Yesaia 43:10-12; Mateo 28:19, 20; Bɔfoi lɛ Asaji 1:8.

14. Mɛɛ sane ebiɔ ni aha hetoo agbɛnɛ?

¹⁴ Yesaia gbalɛ lɛ tsɔɔ akɛ sɛɛ ni akuɔ kɛyaa anɔkwa Nyɔŋmɔ, Yehowa ŋɔɔ lɛ baafee “naagbee gbii lɛ” aloo nɔ ni Biblia lɛ wieɔ he yɛ hei krokomɛi akɛ “naagbee gbii lɛ anɔ” lɛ he okadi lɛ fa.c Yɛ jamɔi sɔrɔtoi babaoo kɛ yiŋfutumɔ ni yɔɔ ni wɔtsɔɔ mli yɛ wolo nɛɛ mli lɛ hewɔ lɛ, sanebimɔ lɛ teɔ shi akɛ: Namɛi etao anɔkwa Nyɔŋmɔ lɛ sɛɛ gbɛ diɛŋtsɛ, koni amɛsɔmɔ lɛ “yɛ mumɔ kɛ anɔkwale mli” yɛ nɛkɛ naagbee gbii ni wɔyɔɔ mli nɛɛ mli? Bɔni afee ni wɔha nakai sanebimɔ lɛ hetoo lɛ, klɛŋklɛŋ lɛ, esa akɛ wɔgbala wɔjwɛŋmɔ kɛya saji ni ba yɛ afii ohai 19 lɛ mli lɛ anɔ.—Yesaia 2:2-4; 2 Timoteo 3:1-5; Yohane 4:23, 24.

Obalanyo ko ni Miitao Nyɔŋmɔ Sɛɛ Gbɛ

15. (a) Namɔ ji Charles Taze Russell? (b) Mɛni ji jamɔ he tsɔɔmɔi ni eyiŋ feɔ lɛ kɔshikɔshi yɛ he lɛ ekomɛi?

¹⁵ Yɛ afi 1870 mli lɛ, obalanyo ko ni yɔɔ ekaa, Charles Taze Russell (1852-1916), je shishi ebi saji babaoo yɛ Kristendom blema tsɔɔmɔi lɛ ahe. Akɛ obalanyo lɛ, etsu nii yɛ etsɛ shwapo mli akɛ mamai ahɔɔlɔ yɛ guɔyeli nibii afeemɔ maŋ ni yɔɔ hoo ni ji Allegheny maŋtiase lɛ (amrɔ nɛɛ Pittsburgh fa) ni yɔɔ Pennsylvania lɛ mli yɛ U.S. Amerika. Eji Presbyterian kɛ Congregational jamɔ lɛ mlinyo. Shi, tsɔɔmɔi tamɔ shɛɛ-mli-sane kɛ naanɔ piŋmɔ yɛ hɛl la mli lɛ gba enaa waa. Mɛni ji eyiŋtoi ahewɔ ni haa eyiŋ feɔ lɛ kɔshikɔshi yɛ nɛkɛ Kristendom jamɔi lɛ ekomɛi ashishijee tsɔɔmɔi nɛɛ ahe lɛ? Eŋma akɛ: “Nyɔŋmɔ ko ni kɛ ehewalɛ baatsu nii ni ekɛbɔ adesai ni etsɔ hiɛ ele amɛ ni eha amɛshɛ akɛ esa akɛ apiŋ amɛ kɛya naanɔ lɛ, nyɛŋ afee nilelɔ, mɔ ni ja loo mɔ ni yɔɔ suɔmɔ. Tɛi ni efolɔ eshwie shi kɛha ehe lɛ baafee nɔ ni baa shi fe gbɔmɛi pii anɔ.”—Yeremia 7:31; 19:5; 32:35; 1 Yohane 4:8, 9.

16, 17. (a) Mɛɛ tsɔɔmɔi Russell Biblia kasemɔ kuu lɛ na he miishɛɛ waa? (b) Mɛɛ sane wulu ko ni akpaaa gbee yɛ he te shi, ni te Russell ha enɛ hetoo eha tɛŋŋ?

¹⁶ Beni Russell ka he eji obalanyo fioo ni eyeko afii nyɔŋmai enyɔ lɛ mli ni ekɛ obalahii krokomɛi je daa otsi Biblia kasemɔ kuu ko shishi. Amɛje shishi amɛbɔi Biblia mli tsɔɔmɔi ni kɔɔ saji krokomɛi ahe, tamɔ susuma ni gbooo lɛ kɛ agbɛnɛ Kristo kpɔmɔ afɔleshaa lɛ kɛ ebaa ni ji enyɔ lɛ mlitaomɔ. Yɛ afi 1877, beni Russell eye afii 25 lɛ, ehɔ̃ɔ gboshinii ni baafee enɔ yɛ etsɛ nitsumɔ ni shwereɔ lɛ mli lɛ, kɛkɛ ni eje be-fɛɛ shiɛmɔ nitsumɔ shishi akɛ nɔ ni ebaatsu agbɛnɛ.

¹⁷ Yɛ afi 1878 mli lɛ, Russell kɛ mɛi ni ekɛ amɛ efee ekome lɛ ateŋ mɔ kome, ni kpoo tsɔɔmɔ akɛ Kristo gbele lɛ baanyɛ afee kpatamɔ nɔ kɛha eshafeelɔi lɛ yakpaaa gbee kwraa. Beni ekɛ odaseyeli ni kuɔ enɛ naa haa lɛ, Russell ŋma akɛ: “Kristo tsu nibii sɔrɔtoi babaoo ni hi kɛha wɔ yɛ egbele kɛ eshitee lɛ mli. Akɛ lɛ to wɔnajiaŋ yɛ gbele mli; egbo akɛ jalɔ kɛha mɛi ni ejaaa—wɔ fɛɛ wɔjaaa. Yɛ Nyɔŋmɔ duromɔ hewɔ lɛ, Yesu Kristo kɛ gbele sa enaa kɛha gbɔmɔ fɛɛ gbɔmɔ. . . . Ebafee mɔ ni kɛ naanɔ wala haa mɛi fɛɛ ni boɔ lɛ toi lɛ.” Etee nɔ akɛ: “Ni aaakpɔ mɔ lɛ tsɔɔ akɛ aahe mɔ lɛ kɛba ekoŋŋ. Mɛni Kristo he ekoŋŋ kɛha gbɔmɛi fɛɛ? Wala. Wɔlaaje enɛ kɛtsɔ klɛŋklɛŋ Adam lɛ toigbele nɔ. Adam ni ji enyɔ lɛ [Kristo] kɛ lɛ diɛŋtsɛ ewala hé enɛ ekoŋŋ.”—Marko 10:45; Romabii 5:7, 8; 1 Yohane 2:2; 4:9, 10.

18. (a) Mɛni nyiɛ gbeekpamɔ ni baaa yɛ kpɔmɔ nɔ lɛ he lɛ sɛɛ ba? (b) Mɛɛ nɔkwɛmɔ nɔ Biblia Kaselɔi lɛ nyiɛ sɛɛ yɛ tooyeli loo oniatsumɔ he?

¹⁸ Akɛni Russell fiɔ kpɔmɔ nɔ he tsɔɔmɔ lɛ sɛɛ waa yɛ be fɛɛ mli hewɔ lɛ, ekɛ etsutsu hefatalɔ lɛ gbala mli kwraa yɛ nɔ fɛɛ nɔ mli. Yɛ July 1879 mli lɛ, Russell je shishi eŋma Zion’s Watch Tower and Herald of Christ’s Presence, ni ale yɛ jeŋ fɛɛ ŋmɛnɛ akɛ Buu-Mɔɔ—Eetswa Yehowa Maŋtsɛyeli He Adafi lɛ. Yɛ afi 1881 mli lɛ, lɛ kɛ Kristofoi krokomɛi ni amɛjɔɔ amɛhe nɔ lɛ to Biblia asafo ni taooo sɛɛnamɔ amɛma shi. Atsɛ enɛ akɛ Zion’s Watch Tower Tract Society, ni ale ŋmɛnɛ akɛ Watch Tower Bible and Tract Society of Pennsylvania, ni ji mla naa gbɛjianɔtoo ni tsuɔ nii ehaa Yehowa Odasefoi lɛ. Kɛjɛ shishijee be lɛ mli beebe ni Russell ma nɔ mi akɛ aheŋ too yɛ asafoŋ kpeei ashishi ni atsɔŋ Buu Mɔɔ Asafo lɛ woji anɔ abiŋ shika. Abale gbɔmɛi ni yafata Russell he kɛha Biblia lɛ kasemɔ vii lɛ kɛkɛ akɛ Biblia Kaselɔi.

Sɛɛkuu Kɛmiiya Biblia Mli Anɔkwale He

19. Mɛɛ Kristendom tsɔɔmɔi Biblia Kaselɔi lɛ kpoo?

¹⁹ Yɛ amɛ Biblia lɛ kasemɔ hewɔ lɛ, Russell kɛ ehefatalɔi lɛ bakpoo Kristendom tsɔɔmɔi ni kɔɔ “Triniti Krɔŋkrɔŋ Fe Fɛɛ” ni yɔɔ naakpɛɛ lɛ, adesa susuma ni hɔ mɔ mli ni gbooo, kɛ naanɔ piŋmɔ yɛ hɛl la mli lɛ he lɛ. Agbɛnɛ hu amɛkpoo hiamɔ akɛ ana osɔfoi akuu ni atsɔse amɛ yɛ osɔfoi anikasemɔ he ni amɛtse amɛhe lɛ. Amɛmiisumɔ ni amɛku amɛsɛɛ kɛya Kristojamɔ shishijee ni baa ehe shi, kɛ onukpai ni amɛhe esa yɛ mumɔŋ ni baanyiɛ asafoi lɛ ahiɛ ni shika nyɔmɔwoo he susumɔ ko bɛ mli lɛ he.—1 Timoteo 3:1-7; Tito 1:5-9.

20. Mɛni nakai Biblia Kaselɔi lɛ yɔse yɛ Kristo pa·rou·siʹa lɛ kɛ 1914 he?

²⁰ Nakai Biblia Kaselɔi lɛ yɛ Kristofoi a-Hela Ŋmalɛi lɛ amli gbalɛi ni kɔɔ “je nɛŋ naagbee” lɛ kɛ Kristo “baa” lɛ he lɛ he miishɛɛ waa yɛ Nyɔŋmɔ Wiemɔ lɛ ni amɛpɛiɔ mli lɛ mli. (Mateo 24:3, KJ) Beni amɛgbele Hela ŋmalɛ lɛ mli lɛ, amɛyɔse akɛ, yɛ anɔkwale mli lɛ, Kristo “baa” lɛ ji “pa·rou·siʹa,” loo ba ni eba ni anaaa lɛ. No hewɔ lɛ, Kristo kɛ ba ni eba ni anaaa lɛ yɛ naagbee be lɛ mli lɛ he odaseyeli eha ekaselɔi lɛ, jeee ebaa yɛ wɔsɛɛ be mli ni abaana lɛ. Nɔ ni fata nikasemɔ nɛɛ he ji akɛ, nakai Biblia kaselɔi lɛ miisumɔ waa ni amɛnu Biblia be he akɔntaabuu ni kɔɔ ba ni Kristo eba lɛ he lɛ hu shishi. Eyɛ mli akɛ amɛbɛ nibii lɛ fɛɛ ahe shishinumɔ moŋ, shi Russell kɛ ehefatalɔi lɛ yɔse akɛ 1914 baafee be ni he hiaa waa yɛ adesa yinɔsane mli.—Mateo 24:3-22; Luka 21:7-33, Int.

21. Mɛɛ gbɛnaa nii Russell kɛ enanemɛi heyelilɔi lɛ nu he akɛ ebaka amɛnɔ?

²¹ Russell le akɛ esa akɛ atsu shiɛmɔ nitsumɔ wulu ko. Ehiɛ yɛ Yesu wiemɔi ni Mateo ŋmala eshwie shi lɛ anɔ: “Ni aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase; ni no dani naagbee lɛ aaaba.” (Mateo 24:14; Marko 13:10) Hehiamɔ henumɔ ko yɛ nakai Biblia Kaselɔi lɛ anitsumɔ lɛ he dani 1914 shɛ. Amɛhe amɛye akɛ amɛshiɛmɔ nitsumɔ lɛ baashɛ enaagbee kwraa yɛ nakai afi lɛ mli, no hewɔ lɛ amɛnu he akɛ esa akɛ amɛkɛ amɛ mɔdɛŋbɔɔ fɛɛ awo mli ni amɛkɛye amɛbua mɛi krokomɛi ni amɛle “maŋtsɛyeli lɛ he sanekpakpa nɛɛ.” Beni be shwieɔ mli lɛ, aakala C. T. Russell Biblia mli shiɛmɔ wiemɔi lɛ yɛ adafitswaa woji akpei abɔ mli yɛ jeŋ fɛɛ.

Kaai kɛ Tsakemɔi

22-24. (a) Mɛni bafee Biblia Kaselɔi lɛ ateŋ mɛi pii anifeemɔ beni C. T. Russell gbo lɛ? (b) Namɔ baye Russell sɛɛ akɛ Buu Mɔɔ Asafo lɛ sɛinɔtalɔ?

²² Charles Taze Russell gbo trukaa beni eye afii 64, yɛ be mli ni eshiɛɔ kɛkpaa U.S. Amerika fɛɛ yɛ 1916 lɛ. Agbɛnɛ mɛni baaba Biblia Kaselɔi lɛ anɔ? Ani amɛbaakpa shiɛmɔ tamɔ nɔ ni amɛji gbɔmɔ ko kɛkɛ sɛɛnyiɛlɔi? Te amɛbaakpee Jeŋ Ta I (1914-18), ni etsɛŋ ni U.S. Amerika kɛ ehe baawo nakai gbɔmɛi agbee lɛ mli lɛ mli kaai lɛ anaa amɛha tɛŋŋ?

²³ Bɔ ni Biblia Kaselɔi lɛ ateŋ mɛi pii fee amɛnii amɛha lɛ tamɔ W. E. Van Amburgh, ni ji Buu Mɔɔ Asafo lɛ onukpai lɛ ateŋ mɔ kome lɛ wiemɔi lɛ: “Nɛkɛ jeŋ muu fɛɛ nitsumɔ kpeteŋkpele nɛɛ jeee gbɔmɔ kome nitsumɔ. Eda kwraa tsɔ fe nakai. Eji Nyɔŋmɔ nitsumɔ ni etsakeee. Nyɔŋmɔ kɛ tsuji babaoo etsu nii yɛ tsutsu, ni ŋwanejee ko bɛ he akɛ E-kɛ mɛi pii baatsu nii yɛ wɔsɛɛ be mli. Wɔjɔɔɔ wɔhe nɔ wɔhaaa gbɔmɔ ko, aloo gbɔmɔ nitsumɔ ko, shi akɛ wɔbaafee Nyɔŋmɔ suɔmɔnaa nii, yɛ bɔ ni E-baajie lɛ kpo etsɔɔ wɔ kɛtsɔ E-Wiemɔ kɛ ŋwɛi hiɛnyiɛmɔ naa lɛ nɔ. Nyɔŋmɔ ji mɔ ni ka he ekudɔɔ nibii.”—1 Korintobii 3:3-9.

²⁴ Yɛ January 1917 mli lɛ, ahala Joseph F. Rutherford, ni eji mlalelɔ kɛ mɔ ni nyaa Biblia lɛ kasemɔ he waa lɛ, akɛ Buu Muu Asafo lɛ sɛinɔtalɔ ni ji enyɔ. Esu kɛ baŋ tsɔɔ gbɔmɔ ni yɔɔ hewalɛ ni anyɛɛɛ awo ehe gbeyei. Ele akɛ esa akɛ ashiɛ Nyɔŋmɔ Maŋtsɛyeli lɛ.—Marko 13:10.

Ekaa ni Awo Mli Hewalɛ kɛ Gbɛi Hee

25. Te Biblia Kaselɔi lɛ kpee kaa ni nyiɛ klɛŋklɛŋ jeŋ ta lɛ sɛɛ ba lɛ naa amɛha tɛŋŋ?

²⁵ Buu Mɔɔ Asafo lɛ to kpeei ahe gbɛjianɔ yɛ U.S. Amerika yɛ 1919 kɛ 1922. Yɛ Jeŋ Ta I yiwaa ni tee nɔ yɛ U.S. Amerika lɛ sɛɛ lɛ, ebatsɔ tamɔ Pentekoste be kroko kɛha Biblia Kaselɔi akpei fioo ni yɔɔ nakai be lɛ mli lɛ. (Bɔfoi lɛ Asaji 2:1-4) Ni amɛaaŋmɛɛ amɛhe amɛha gbɔmɔ gbeyeishemɔ moŋ lɛ, amɛkɛ ekaa babaoo here Biblia tsɛmɔ akɛ aya ni ayashiɛ atsɔɔ jeŋmaji lɛ nɔ. Afi 1919 mli ni Buu Bɔɔ Asafo lɛ fee wolo tɛtrɛɛ kroko kɛfata Buu-Mɔɔ lɛ he ni atsɛɔ lɛ The Golden Age, ni ale yɛ jeŋ fɛɛ ŋmɛnɛ akɛ Awake! lɛ. Enɛ efee dɛŋdade ko ni yɔɔ hewalɛ waa, ni ehɛle gbɔmɛi ashi yɛ nɔ ni bei ni wɔyɔɔ mli lɛ tsɔɔ diɛŋtsɛ lɛ he, koni etswa hekɛnɔfɔɔ yɛ Bɔlɔ lɛ shiwoo ni kɔɔ toiŋjɔlɛ jeŋ hee ko he lɛ mli.

26. (a) Mɛɛ gbɛnaa nii Biblia Kaselɔi lɛ ma nɔ mi babaoo? (b) Mɛɛ Biblia lɛ he shishinumɔ ni mli ka shi faŋŋ Biblia Kaselɔi lɛ anine shɛ nɔ?

²⁶ Biblia Kaselɔi lɛ ma gbɛ ni mra be mli Kristofoi lɛ tsɔɔ nɔ amɛshiɛɔ—kɛjɛɔ shia kɛyaa shia, lɛ nɔ mi babaoo yɛ 1920 kɛ 1930 afii lɛ amli. (Bɔfoi lɛ Asaji 20:20) Gbɛnaa nii ka heyelilɔ fɛɛ heyelilɔ nɔ akɛ eye Kristo Maŋtsɛyeli nɔyeli lɛ he odase etsɔɔ mɛi pii bɔ ni eeenyɛ. Amɛbana faŋŋ kɛjɛ Biblia lɛ mli akɛ sane kpele ni ka adesai fɛɛ hiɛ ji jeŋ muu fɛɛ nɔyeli he sane lɛ, ni akɛ Yehowa Nyɔŋmɔ baaha enɛ aba naagbee kɛtsɔ Satan kɛ enitsumɔi gbohii ni yaa nɔ yɛ shikpɔŋ nɔ lɛ fɛɛ hiɛkpatamɔ nɔ. (Romabii 16:20; Kpojiemɔ 11:17, 18) Abayoo yɛ nɛkɛ sane nɛɛ he akɛ, Nyɔŋmɔ bembuu, ákɛ Jeŋ Muu Fɛɛ Maŋtsɛ ni ja lɛ baa dani gbɔmɔ yiwalaheremɔ baa. No hewɔ lɛ, esa akɛ odasefoi anɔkwafoi ni baajɛ amɛsuɔmɔ mli amɛye Nyɔŋmɔ yiŋtoi kɛ ofe ni eji lɛ he odase ahi shikpɔŋ lɛ nɔ. Mɛɛ gbɛ nɔ atsɔ atsu hiamɔ nɛɛ he nii yɛ?—Hiob 1:6-12; Yohane 8:44; 1 Yohane 5:19, 20.

27. (a) Mɛɛ nifeemɔ ko ni sa kadimɔ jogbaŋŋ ba yɛ 1931? (b) Mɛni ji Odasefoi lɛ ahemɔkɛyelii ni yɔɔ sɔrɔto lɛ ekomɛi?

²⁷ Biblia Kaselɔi lɛ fee kpee ko yɛ Columbus, Ohio, yɛ July 1931, ni no mli ni mɛi akpei abɔ ni yɔɔ kpee lɛ shishi lɛ kpɛlɛ yiŋkpɛɛ ko nɔ. Amɛkɛ miishɛɛ kpɛlɛ “gbɛi ni Nuŋtsɔ Nyɔŋmɔ lɛ kɛ enaabu etsi ta lɛ nɔ,” ni amɛjaje akɛ: “Wɔmiisumɔ ni ale wɔ ni atsɛ wɔ kɛ gbɛi, ni ji, ‘Yehowa odasefoi.’” Kɛjɛ nakai gbi lɛ nɔ kɛbaa nɛɛ, abale Yehowa Odasefoi yɛ jeŋ fɛɛ, ni jeee yɛ amɛhemɔkɛyelii ni yɔɔ sɔrɔto lɛ pɛ hewɔ, shi moŋ yɛ amɛ shia kɛ shia kɛ gbɛjegbɛi anɔ sɔɔmɔ nitsumɔ ni amɛkɛ ekaa tsuɔ lɛ hu hewɔ. (Kwɛmɔ baafai 356-7.)—Yesaia 43:10-12; Mateo 28:19, 20; Bɔfoi lɛ Asaji 1:8.

28. Mɛɛ shishinumɔ ni mli ka shi faŋŋ ni kɔɔ Maŋtsɛyeli nɔyeli lɛ he Odasefoi lɛ anine shɛ nɔ yɛ 1935 mli?

²⁸ Afi 1935 mli lɛ, Odasefoi lɛ bana ŋwɛi Maŋtsɛyeli kuu ni kɛ Kristo baaye maŋtsɛ lɛ kɛ amɛ shishibii ni yɔɔ shikpɔŋ nɔ lɛ ahe shishinumɔ ni mli ka shi faŋŋ. No mli lɛ amɛle momo akɛ Kristofoi ni afɔ amɛ mu ni atsɛ amɛ ni amɛkɛ Kristo abaye maŋtsɛ kɛjɛ ŋwɛi lɛ ayibɔ baafee 144,000 pɛ. No hewɔ lɛ, mɛni baafee adesai ateŋ mɛi ni eshwɛ lɛ ahiɛnɔkamɔ? Ehe hiaa ni nɔyeli ko ana eshishibii koni ekɛbu shihilɛ mli ni eyɔɔ lɛ bem. Nɛkɛ ŋwɛi nɔyeli nɛɛ, ni ji Maŋtsɛyeli lɛ hu baana eshishibii toibolɔi akpekpei abɔ yɛ shikpɔŋ nɛɛ nɔ. Mɛnɛɛmɛi baafee “asafo babaoo ni mɔ ko mɔ ko nyɛŋ akane ni jɛ jeŋmaŋ fɛɛ jeŋmaŋ kɛ akutsei kɛ maji kɛ majianɔ wiemɔi amli,” ni bolɔɔ akɛ: “Yiwalaheremɔ lɛ ji wɔ-Nyɔŋmɔ [Yehowa] ni ta maŋtsɛsɛi lɛ nɔ lɛ, kɛ Toobi lɛ [Kristo Yesu] nɔ.”—Kpojiemɔ 7:4, 9, 10; 14:1-3; Romabii 8:16, 17.

29. Mɛɛ kaa Odasefoi lɛ yɔse ni amɛkpɛlɛ nɔ hu?

²⁹ Shishinumɔ ni kɔɔ asafo babaoo lɛ he nɛɛ ye ebua Yehowa Odasefoi koni amɛna akɛ nitsumɔ kpele ni tamɔ kaa ko ka amɛhiɛ—ni amɛtao ni amɛtsɔɔ nakai akpekpei abɔ ni taoɔ anɔkwa Nyɔŋmɔ lɛ sɛɛ gbɛ ni baafee “asafo babaoo” lɛ fɛɛ anii. Enɛ baabi majimaji ateŋ tsɔsemɔ he tafaa. Ebaabi ni ana wielɔi kɛ sɔɔlɔi ni atsɔse amɛ. Skul sɔrɔtoi ahe baahia. Buu Mɔɔ Asafo lɛ sɛinɔtalɔ ni nyiɛ sɛɛ lɛ susu enɛɛmɛi fɛɛ he.

Mɛi ni Taoɔ Nyɔŋmɔ Sɛɛ Gbɛ lɛ Ataomɔ yɛ Jeŋ Fɛɛ

30. Mɛɛ saji ni ba yɛ 1930 kɛ 1940 afii lɛ amli sa Odasefoi lɛ ahe?

³⁰ Odasefoi ni shɛɛɛ 50,000 yɔɔ maji ni shɛɛɛ 50 mli yɛ 1931 mli. Saji ni ba yɛ 1930 kɛ 1940 afii lɛ amli lɛ haaa amɛshiɛmɔ lɛ afee mlɛo. Nɛkɛ be nɛɛ mli abaje Fascist kɛ Nazi nɔyelii lɛ ashishi, ni Jeŋ Ta II fɛ. 1942 mli ni J. F. Rutherford gbo. Esa akɛ Buu Mɔɔ Asafo lɛ ana hiɛnyiɛmɔ ni ekãa yɔɔ mli bɔni afee ni ewo Yehowa Odasefoi ashiɛmɔ nitsumɔ lɛ mli hewalɛ.

31. Mɛni bɔi nitsumɔ yɛ 1943 koni akɛlɛɛ sanekpakpa lɛ shiɛmɔ mli?

³¹ Ahala Nathan H. Knorr yɛ 1942, yɛ be mli ni eye afii 36 lɛ, koni efee Buu Mɔɔ Asafo lɛ sɛinɔtalɔ ni ji etɛ. Eji gbɛjianɔtolɔ ni yɔɔ ekãa ni nuɔ bɔ ni ehe hiaa ni aha sanekpakpa lɛ shiɛmɔ yɛ jeŋ fɛɛ lɛ aya nɔ yɛ oyaiyeli mli bɔ ni aaanyɛ lɛ shishi yɛ faŋŋ mli, eyɛ mli akɛ jeŋmaji lɛ kɛ amɛhe ewo Jeŋ Ta II mli. Nɔ ni jɛ mli ba ji akɛ, etsu gbɛjianɔ ni ato koni ana skul ni baatsɔse maŋsɛɛ sanekpakpa shiɛlɔi, ni atsɛɔ lɛ akɛ Buu-Mɔɔ Gilead Biblia Skul lɛ he nii.d Ahala klɛŋklɛŋ nikaselɔi oha, ni amɛ fɛɛ amɛji be-fɛɛ sɔɔlɔi lɛ yɛ January 1943. Amɛkase Biblia lɛ kɛ nibii krokomɛi ni kɔɔ sɔɔmɔ nitsumɔ lɛ he lɛ kɛ hiɛdɔɔ nɔ ni miihe ashɛ nyɔji ekpaa, dani atsu amɛ kɛtee amɛnitsumɔi anɔ, titri lɛ yɛ maŋsɛɛ shikpɔji anɔ. Kɛbashi 1990 lɛ, kui sɔrɔtoi 89 egbe nikasemɔ naa, ni sɔɔlɔi akpei abɔ ejɛ Gilead amɛtee koni amɛyasɔmɔ yɛ jeŋ fɛɛ.

32. Mɛɛ nɔyaa Yehowa Odasefoi ena kɛjɛ 1943?

³² Beni shɛɔ 1943 lɛ, no mli lɛ Odasefoi 126,329 pɛ shiɛɔ yɛ maji 54 nɔ. Yɛ shitee-kɛ-woo ni ehiii kwraa ni jɛ Nazi, Fascist, Komunist, kɛ Katolek Kui kɛ agbɛnɛ nɔ ni akɛɛ atsɛɔ lɛ maŋbii anɔyelii lɛ adɛŋ ba yɛ Jeŋ Ta II mli lɛ fɛɛ sɛɛ lɛ, beni shɛɔ 1946 lɛ, no mli lɛ Yehowa Odasefoi ayifalɛ ni fe fɛɛ lɛ fe Maŋtsɛyeli shiɛlɔi 176,000. Afii nyɔŋmai ejwɛ-kɛ-ejwɛ sɛɛ lɛ, amɛmiihe amɛshɛ akpekpei ejwɛ ni yɔɔ ekãa yɛ shikpɔji, ŋshɔkpɔi, kɛ shikpɔŋkukuji fe 200 nɔ. Ŋwanejee ko bɛ he akɛ, bɔ ni amɛgbɛi kɛ nifeemɔ haa ayɔseɔ amɛ yɛ faŋŋ mli lɛ eha ale amɛ yɛ jeŋ fɛɛ. Shi nibii krokomɛi fata he ni eye ebua babaoo yɛ amɛnitsumɔ ni mɔɔ shi lɛ mli.—Zakaria 4:6.

Biblia Tsɔsemɔ Gbɛjianɔtoo

33. Mɛni hewɔ Yehowa Odasefoi yɔɔ Maŋtsɛyeli Asai lɛ?

³³ Yehowa Odasefoi feɔ Biblia kasemɔ he kpeei daa otsi yɛ amɛ Maŋtsɛyeli Asai ni sɔmɔɔ asafoi fe 60,000 yɛ jeŋ fɛɛ lɛ amli. Nɛkɛ kpeei nɛɛ damɔɔɔ kusum-nifeemɔ loo henumɔ nɔ, shi moŋ edamɔ Nyɔŋmɔ, e-Wiemɔ lɛ, kɛ eyiŋtoi ahe anɔkwale nilee ni aaana nɔ. No hewɔ lɛ, Yehowa Odasefoi buaa amɛhe naa shii etɛ yɛ daa otsi mli koni amɛha shishinumɔ ni amɛyɔɔ yɛ Biblia lɛ he lɛ aya hiɛ, ni amɛkase bɔ ni amɛaafee ni amɛshiɛ ni amɛtsɔɔ mɛi krokomɛi emli saji lɛ.—Romabii 12:1, 2; Filipibii 1:9-11; Hebribii 10:24, 25.

34. Mɛni ji yiŋtoo ni yɔɔ Teokrase Sɔɔmɔ Skul lɛ sɛɛ?

³⁴ Akɛ nɔkwɛmɔ nɔ lɛ, nɔ ni fata otsi teŋ kpee lɛ he ji Teokrase Sɔɔmɔ Skul ni asafo lɛ mlibii baanyɛ amɛkɛ amɛhe awo mli. Nɛkɛ skul, ni Kristofonyo onukpa ni he esa kwɛɔ nɔ nɛɛ tsɔseɔ hii, yei, kɛ gbekɛbii yɛ nitsɔɔmɔ kɛ wiemɔ he ŋaa mli yɛ Biblia shishitoo mlai kɛ gbeekpamɔ naa. Bɔfo Paulo wie akɛ: “Nyɛhaa nyɛwiemɔ he abaa nyam daa, ni ŋoo ahi mli, ni nyɛle bɔ ni sa akɛ nyɛhaa mɔ fɛɛ mɔ hetoo.” Yɛ amɛ Kristofoi akpeei ashishi hu lɛ, Odasefoi lɛ kaseɔ gbɛ ni amɛaatsɔ nɔ amɛshiɛ Maŋtsɛyeli sane lɛ, yɛ “mlijɔlɛ kɛ gbeyeishemɔ” mli.—Kolosebii 4:6; 1 Petro 3:15.

35. Mɛni ji kpeei krokomɛi ni Odasefoi lɛ feɔ, ni mɛni ji sɛɛnamɔi ni yɔɔ he?

³⁵ Odasefoi lɛ kpeɔ ekoŋŋ, yɛ gbi kroko nɔ, kɛha Biblia mli wiemɔ ni heɔ minitii 45, ni yɛ no sɛɛ lɛ asafo lɛ susuɔ Biblia mli saneyitso ko ni kɔɔ Kristofoi atsɔɔmɔ loo jeŋba he (kɛtsɔɔ sanebimɔi kɛ hetooi anɔ). Asafo lɛ mlibii yɛ hegbɛ akɛ amɛkɛ amɛhe woɔ mli. Odasefoi lɛ hu yaa kpeei wuji sɔrɔtoi etɛ daa afi, ni nɛkɛ kpeei nɛɛ heɔ kɛjɛ gbi kome kɛyashi gbii ejwɛ, ni gbɔmɛi akpei abɔ buaa amɛhe naa kutuu koni amɛbo Biblia mli wiemɔi atoi. Yɛ enɛ kɛ kpeei krokomɛi ni aheee shika yɛ shishi lɛ hewɔ lɛ, Odasefonyo fɛɛ Odasefonyo haa nilee ni eyɔɔ yɛ Nyɔŋmɔ shiwooi kɛha shikpɔŋ nɛɛ kɛ adesai ahe lɛ mli kwɔɔ kɛfataa tsɔsemɔ ni nɔ bɛ ni enine shɛɔ nɔ yɛ Kristofoi ajeŋba he lɛ he. Kristo Yesu tsɔɔmɔi kɛ nɔkwɛmɔ nɔ lɛ sɛɛnyiɛmɔ gbalaa mɔ fɛɛ mɔ kɛbɛŋkɛɔ anɔkwa Nyɔŋmɔ, Yehowa he kpaakpa.—Yohane 6:44, 65; 17:3; 1 Petro 1:15, 16.

Te Ato Odasefoi lɛ Gbɛjianɔ Aha Tɛŋŋ?

36. (a) Ani Odasefoi lɛ yɛ osɔfoi akuu ni awoɔ amɛ nyɔmɔ? (b) Belɛ, namɛi nyiɛɔ asafo lɛ hiɛ?

³⁶ Yɛ sane naatsɔɔmɔ ni ja naa lɛ, kɛji Yehowa Odasefoi feɔ kpeei, ni áto amɛ gbɛjianɔ koni amɛshiɛ lɛ, belɛ esa akɛ amɛna mɔ ko ni baanyiɛ hiɛ. Shi, amɛbɛ osɔfoi akuu ni awoɔ amɛ nyɔmɔ ni asaŋ amɛbɛ hiɛnyiɛlɔ ko ni mumɔ yiɔ enɔ ni abuɔ lɛ waa fe fɛɛ. (Mateo 23:10) Yesu kɛɛ: “Yaka nyɛna, yaka nyɛŋɔ-haa.” (Mateo 10:8; Bɔfoi lɛ Asaji 8:18-21) Onukpai ni he esa yɛ mumɔŋ kɛ asafoŋ sɔɔlɔi yɛ asafo fɛɛ asafo mli, ni amɛteŋ mɛi pii yɛ heloo gbɛfaŋ nitsumɔ, ni amɛkwɛɔ weku nɔ, ni amɛjɛɔ amɛsuɔmɔ mli amɛnyiɛɔ asafo lɛ hiɛ yɛ nitsɔɔmɔ kɛ kudɔmɔ mli. Enɛ ji nɔkwɛmɔ nɔ diɛŋtsɛ ni klɛŋklɛŋ afii oha lɛ mli Kristofoi lɛ fee kɛ-fɔ shi.—Bɔfoi lɛ Asaji 20:17; Filipibii 1:1; 1 Timoteo 3:1-10, 12, 13.

37. Mɛɛ gbɛ nɔ atsɔɔ ahalaa onukpai kɛ asafoŋ sɔɔlɔi yɛ?

³⁷ Mɛɛ gbɛ nɔ atsɔɔ ahalaa onukpai kɛ asafoŋ sɔɔlɔi nɛɛ yɛ? Amɛhalamɔ lɛ baa yɛ nɔyeli kuu ko ni onukpai ni akɛ mumɔ efɔ amɛ mu ni jɛ maji sɔrɔtoi anɔ ni amɛnitsumɔ tamɔ bɔfoi akuu lɛ kɛ onukpai ni yɔɔ Yerusalem ni nyiɛ klɛŋklɛŋ Kristofoi asafo lɛ hiɛ lɛ anɔ lɛ anɔkwɛmɔ shishi. Taakɛ wɔna yɛ Yitso 11 lɛ, bɔfoi lɛ ateŋ mɔ ko bɛ ni nɔ kwɔ fe mɛi krokomɛi lɛ. Amɛkpɛɔ amɛyiŋ akɛ kuu, ni asafoi ni egbɛ eshwa blema Roma je lɛ mli lɛ kɛ bulɛ haa enɛ.—Bɔfoi lɛ Asaji 15:4-6, 22, 23, 30, 31.

38. Nɔyeli Kuu lɛ tsuɔ nii yɛ mɛɛ gbɛ nɔ?

³⁸ Nakai gbɛjianɔtoo lɛ nɔŋŋ Yehowa Odasefoi a-Nɔyeli Kuu lɛ kɛtsuɔ nii ŋmɛnɛ. Amɛfeɔ daa otsi kpeei yɛ amɛ jeŋ fɛɛ nitsumɔ he yitso lɛ yɛ Brooklyn, New York, ni ajɛɔ jɛmɛ akɛ famɔi yahaa Nitsumɔ He Nine Ajinafoi ni yɔɔ jeŋ fɛɛ ni kwɛɔ sɔɔmɔ nitsumɔ ni yaa nɔ yɛ nakai maŋ lɛ mli lɛ anɔ lɛ. Akɛni amɛnyiɛɔ mra be mli Kristofoi lɛ anɔkwɛmɔ nɔ lɛ sɛɛ hewɔ lɛ, Yehowa Odasefoi enyɛ amɛkɛ Nyɔŋmɔ Maŋtsɛyeli lɛ he sanekpakpa shiɛmɔ lɛ etee shikpɔŋ lɛ fa ni da titri nɔ. Nakai nitsumɔ lɛ miiya nɔ yɛ jeŋ muu fɛɛ.—Mateo 10:23; 1 Korintobii 15:58.

Aabua he Naa Kɛmiiya Anɔkwa Nyɔŋmɔ lɛ Ŋɔɔ

39. (a) Mɛni hewɔ Odasefoi lɛ kɔɔ shidaamɔ ni tsɔɔ he ni akɛwooo maŋkwramɔŋ saji amli lɛ? (b) Odasefoi lɛ eshwere yɛ naatsii shishi yɛ mɛɛ gbɛ nɔ?

³⁹ Yehowa Odasefoi eshwere yɛ shikpɔŋ muu lɛ fɛɛ nɔ yɛ afii ohai 20 lɛ mli. Enɛ efee anɔkwale po yɛ shikpɔji ni agu amɛnitsumɔ lɛ loo atsi amɛ naa yɛ jɛmɛ lɛ anɔ. Nɛkɛ naatsii loo gu ni agu amɛ nɛɛ jɛ nɔyelii ni nuuu maŋ saji ni Yehowa Odasefoi kɛ amɛhe wooo mli yɛ maŋkwramɔŋ kɛ je nɛŋ maŋhedɔɔ mli lɛ shishi lɛ hewɔ. (Kwɛmɔ akrabatsa lɛ, baafa 347.) Ni kɛlɛ, gbɔmɛi akpei nyɔŋmai abɔ ni yɔɔ nɛkɛ maji nɛɛ amli lɛ etsɔ amɛhe kɛtee Nyɔŋmɔ Maŋtsɛyeli lɛ he akɛ adesai anɔkwa hiɛnɔkamɔ kome pɛ kɛha toiŋjɔlɛ kɛ shweshweeshwe shihilɛ. Aye odase kpeteŋkpele yɛ maji pii amli, ni amrɔ nɛɛ, Odasefoi akpekpei abɔ ni yɔɔ ekaa yɛ he fɛɛ he.—Kwɛmɔ tao lɛ, yɛ baafa 361.

40, 41. (a) Mɛni Yehowa Odasefoi mɛɔ bianɛ? (b) Mɛɛ sanebimɔ yɔɔ lolo ni esa akɛ aha hetoo?

⁴⁰ Yehowa Odasefoi kɛ amɛ Kristofoi asuɔmɔ kɛ amɛ hiɛnɔkamɔ ni kɔɔ “ŋwɛi hee kɛ shikpɔŋ hee” lɛ he lɛ miikwɛ wɔsɛɛ be ni ebɛŋkɛ ni saji ni hosoɔ je lɛ ni etsɛŋ ekɛ jalɛsane ni ayeee, fitemɔ, kɛ nii ni ejaaa gbɛ fɛɛ ni yaa nɔ yɛ shikpɔŋ nɛɛ nɔ lɛ baaba naagbee lɛ gbɛ. Yɛ yiŋtoo nɛɛ hewɔ lɛ, amɛbaaya nɔ ni amɛyasara amɛ akutseiaŋbii kɛ mɔdɛŋbɔɔ yɛ anɔkwayeli mli, koni amɛkɛ mɛi ni yɔɔ tsuijurɔ lɛ abɛŋkɛ anɔkwa Nyɔŋmɔ, Yehowa.—Kpojiemɔ 21:1-4; Marko 13:10; Romabii 10:11-15.

⁴¹ Dani enɛ aaaba lɛ, taakɛ Biblia gbalɛ tsɔɔ lɛ, mɛni yɔɔ wɔsɛɛ be kɛha adesai, kɛha jamɔ, kɛ agbɛnɛ shikpɔŋ ni nɔ ewo muji nɛɛ? Wɔ naagbee yitso lɛ baaha nakai sanebimɔ ni he hiaa lɛ hetoo.—Yesaia 65:17-25; 2 Petro 3:11-14.

[Shishigbɛ niŋmai]

[Akrabatsa ni yɔɔ baafa 347]

Maŋ Saji ni Kristofoi kɛ Amɛhe Wooo Mli yɛ Wɔŋjamɔ Roma

Yɛ suɔmɔ kɛ toiŋjɔlɛ shishitoo mlai ni Yesu tsɔɔ, ni damɔ Nyɔŋmɔ Wiemɔ lɛ ni amɛkase yɛ teemɔŋ lɛ nɔ lɛ kɛ gbeekpamɔ naa lɛ, mra be mli Kristofoi lɛ kɛ amɛhe woŋ tawuu mli aloo ni amɛaakase nakai feemɔ. Yesu ekɛɛ akɛ: “Mi-maŋtsɛyeli lɛ jɛɛɛ je nɛŋ; mi-maŋtsɛyeli lɛ jɛ je nɛɛ mli jikulɛ, misɔɔlɔi lɛ aaapele he, koni akaŋɔ mi aha Yudafoi lɛ; shi enɛ lɛ, mi-maŋtsɛyeli lɛ jɛɛɛ biɛ.”—Yohane 18:36.

Yɛ sɛɛ mli be ni ji afi 295 Ŋ.B. lɛ, aŋɔ Maximilianus ni jɛ Theveste, ni ji tsutsu Roma asraafonyo ko binuu lɛ awo asraafoi anitsumɔ mli. Beni amralo lɛ bi lɛ egbɛi lɛ, eha hetoo akɛ: “Mɛni hewɔ otaoɔ ni ole migbɛi? Mihenilee teɔ shi ewoɔ asraafoi anitsumɔ ni mikɛ mihe aaawo mli: Kristofonyo ji mi. . . . Minyɛŋ masɔmɔ; minyɛŋ mafee esha mashi mihenilee.” Amralo lɛ bɔ lɛ kɔkɔ akɛ kɛ ebooo toi lɛ ebaalaaje ewala. “Misɔmɔŋ. Obaanyɛ ofo miyitso, shi misɔmɔŋ Je Nɛɛ hewalɛi lɛ; masɔmɔ mi-Nyɔŋmɔ lɛ.”—An Historian’s Approach to Religion, ni Arnold Toynbee ŋma.

Yɛ ŋmɛnɛŋmɛnɛ beaŋ hu lɛ, Biblia lɛ ni Yehowa Odasefoi ni yɔɔ jeŋ fɛɛ lɛ ekase yɛ teemɔŋ akɛ aŋkroaŋkroi lɛ eha amɛnyiɛ amɛhenilee sɛɛ ni amɛkɔ shidaamɔ ni tamɔ nakai nɔŋŋ. Agbe amɛteŋ mɛi pii po yɛ maji komɛi anɔ, titri lɛ yɛ Nazi Germany, he ni atswia amɛ tui, asɛŋ amɛ, ni afolɔ amɛyitsei yɛ Jeŋ Ta II be lɛ mli lɛ. Shi afiteko amɛ jeŋ muu fɛɛ ekomefeemɔ, ni damɔ Kristofoi asuɔmɔ nɔ lɛ da. Mɔ ko gboko yɛ tawuu mli yɛ Yehowa Odasefoi Kristofoi lɛ ateŋ mɔ ko dɛŋ pɛŋ. Kwɛ bɔ ni kulɛ jeŋ yinɔsane baanyɛ afee sɔrɔto kwraa aha, kɛ mɔ fɛɛ mɔ ni tsɛɔ ehe Kristofonyo lɛ hu hi shi yɛ Kristo mla ni ji suɔmɔ lɛ naa!—Romabii 13:8-10; 1 Petro 5:8, 9.

[Akrabatsa/Mfonirii ni yɔɔ baafa 356, 357]

Nɔ Ni Yehowa Odasefoi Heɔ Yeɔ

Sanebimɔ: Mɛni ji susuma?

Hetoo: Yɛ Biblia mli lɛ, susuma (Hebri, neʹphesh; Hela, psy·kheʹ) lɛ ji gbɔmɔ loo kooloo aloo wala ni gbɔmɔ loo kooloo lɛ naa mli ŋɔɔmɔ.

“Ni Nyɔŋmɔ kɛɛ: ‘Shikpɔŋ lɛ awo bɔɔnii ni hiɛ kamɔ yɛ amɛ henɔ, shia kooloi kɛ nii ni wamɔɔ kɛ shikpɔŋ nɔ kooloi yɛ amɛ henɔ.’ Ni efee nakai. Ni Yehowa Nyɔŋmɔ kɛ shikpɔŋ su shɔ gbɔmɔ, ni emu wala mumɔ ewo egugɔ mli, ni gbɔmɔ tsɔ wala susuma.”—1 Mose 1:24; 2:7.

Wala susumai JI kooloi kɛ gbɔmɛi fɛɛ. Susuma lɛ jeee nɔ ko ni ekome ehiɔ shi yɛ he ko. Ebaanyɛ egbo ni egboɔ. “Naa, susumai lɛ fɛɛ lɛ, minii ni; bɔ ni tsɛ susuma ji minɔ lɛ, nakai nɔŋŋ bi susuma hu ji minɔ; susuma ni feɔ esha lɛ, lɛ nɔŋŋ eeegbo.”—Ezekiel 18:4.

Sanebimɔ: Ani Nyɔŋmɔ lɛ Triniti ni?

Hetoo: Yehowa Odasefoi heɔ yeɔ akɛ Yehowa ji jeŋ muu fɛɛ Nuŋtsɔ Maŋtsɛ ni mɔ ko kɛ lɛ yeee egbɔ. “Bo toi, Israel! Yehowa, wɔ-Nyɔŋmɔ lɛ, Yehowa kome ni.” (5 Mose 6:4) Kristo Yesu, ákɛ Wiemɔ lɛ, ji mumɔŋ bɔɔnɔ, ni ba shikpɔŋ nɔ yɛ toiboo ni efeɔ ehaa e-Tsɛ lɛ suɔmɔnaa nii hewɔ. Ehɔ Yehowa shishi. “Shi beni aŋɔ nii fɛɛ ato Bi lɛ [Kristo] shishi lɛ, no lɛ lɛ diɛŋtsɛ hu eeeŋɔ ehe eto Mɔ ni ŋɔ nii fɛɛ to eshishi lɛ shishi, koni Nyɔŋmɔ afee nibii afɛɛ ayitso.”—1 Korintobii 15:28; kwɛmɔ Mateo 24:36; Marko 12:29; Yohane 1:1-3, 14-18; Kolosebii 1:15-20 hu.

Mumɔ krɔŋkrɔŋ lɛ ji Nyɔŋmɔ nifeemɔ hewalɛ, loo hewalɛ ni miitsu nii, ejeee gbɔmɔ.—Bɔfoi lɛ Asaji 2:1-4, 17, 18.

Sanebimɔ: Ani Yehowa Odasefoi jaa amagai loo amɛkɛ woo haa amɛ?

Hetoo: Yehowa Odasefoi jaaa amagai yɛ gbɛ ko kwraa nɔ, kɛji akɛ amɛji amagai diɛŋtsɛ, gbɔmɛi, loo gbɛjianɔtoi.

“Wɔle akɛ amaga jeee nɔ ko nɔ ko yɛ je lɛ mli, ni akɛ Nyɔŋmɔ ko bɛ akɛ ja ekome pɛ. Eyɛ mli akɛ mɛi komɛi yɛ ni atsɛɔ amɛ ‘nyɔŋmɔi,’ kɛji akɛ yɛ ŋwɛi loo shikpɔŋ nɔ jio, taakɛ bɔ ni ‘nyɔŋmɔi’ pii kɛ ‘nuŋtsɔmɛi’ pii yɔɔ lɛ, kɛlɛ wɔ lɛ Nyɔŋmɔ kome pɛ ni ji Tsɛ lɛ yɔɔ, mɔ mli ni nibii fɛɛ jɛ, ni wɔyɔɔ kɛha lɛ lɛ; ni wɔyɛ Nuŋtsɔ kome, Yesu Kristo, mɔ ni nibii fɛɛ tsɔ enɔ kɛba, ni wɔ hu wɔtsɔ enɔ lɛ.”—1 Korintobii 8:4-6, NW; kwɛmɔ Lala 135:15-18 hu.

Sanebimɔ: Ani Yehowa Odasefoi yeɔ Mass loo Communion niyenii lɛ?

Hetoo: Yehowa Odasefoi heee aboloo ni tsakeɔ etsɔɔ gbɔmɔ heloo, ni ji Roma Katolek tsɔɔmɔ lɛ amɛyeee. Amɛyeɔ Nuŋtsɔ lɛ Gbɛkɛnaashi Niyenii lɛ akɛ gbijurɔ yɛ be ni kɛ Yudafoi a-Nisan 14 (efɔɔ baa yɛ March loo April) kpaa gbee lɛ nɔ akɛ daa afi Kristo gbele lɛ kaimɔ. Amɛkɛ aboloo akpiti kɛ wein tsuru ni feɔ Kristo gbɔmɔtso kɛ afɔleshaa la ni esha bɛ mli lɛ he okadi lɛ tsɔɔ asafo muu lɛ fɛɛ hiɛ yɛ nɛkɛ kpee nɛɛ shishi. Mɛi ni yɔɔ hiɛnɔkamɔ akɛ amɛkɛ Kristo baaye maŋtsɛ yɛ eŋwɛi Maŋtsɛyeli lɛ mli lɛ pɛ yeɔ okadi nibii nɛɛ eko.—Marko 14:22-26; Luka 22:29; 1 Korintobii 11:23-26; Kpojiemɔ 14:1-5.e

[[Mfonirii]

Yehowa Odasefoi kpeɔ daa yɛ Maŋtsɛyeli Asai amli kɛha Biblia kasemɔ

Maŋtsɛyeli Asai: Ichihara City, Japan (abɛku baafa lɛ), kɛ Boituva, Brazil

[Shishigbɛ niŋmai]

[Akrabatsa ni yɔɔ baafa 361]

Maji Komɛi ni Odasefoi Shiɛɔ yɛ Nɔ

Maŋ Odasefoi ni Shiɛɔ

Argentina 79,000

Australia 51,000

Brazil 267,000

Britain 117,000

Canada 98,000

Colombia 42,000

El Salvador 18,000

Finland 17,000

France 109,000

Germany, F. R. 129,000

Greece 24,000

Hungary 10,000

India 9,000

Italy 172,000

Japan 138,000

Korea 57,000

Lebanon 2,500

Mexico 277,000

Nigeria 137,000

Philippines 102,000

Poland 91,000

Portugal 36,000

Puerto Rico 24,000

South Africa 46,000

Spain 78,000

U.S.A. 818,000

Venezuela 47,000

Zambia 72,000

36 ni atsi naa 220,000

1989 Jeŋ Fɛɛ Yibɔ Asafoi 60,192 Odasefoi 3,787,000

[Mfonirii ni yɔɔ baafa 346]

Jeŋmaji Ekomefeemɔ amaga lɛ hiɛ niŋmaa kaneɔ akɛ: “Wɔkɛ wɔ klantei aaasɔ kɔii”; aŋma Biblia ŋmalɛ nɛɛ yɛ “Yesaia Gbogbo” lɛ he

[Mfoniri ni yɔɔ baafa 351]

Yehowa Odasefoi heɔ Kristo kpɔmɔ afɔleshaa kɛha adesai eshai lɛ amɛyeɔ

[Mfonirii ni yɔɔ baafa 363]

Yehowa Odasefoi Kpeei Asai: East Pennines, England asa ni ajɛ ŋwɛi asha

Fort Lauderdale, Florida, U.S.A. Kpee Asa, kɛha

Ŋleshi, Spanish, kɛ French wiemɔi

[Mfonirii ni yɔɔ baafa 364]

Buu Mɔɔ Asafo lɛ Jeŋ Fɛɛ Yitso, ni yɔɔ Brooklyn, New York; (kɛjɛ ŋwɛi abɛkugbɛ) ɔfis, nitsumɔ hei, kɛ shihilɛ hei (nɔ ni eje kpo jogbaŋŋ lɛ)

[Mfonirii ni yɔɔ baafa 365]

Buu Mɔɔ Asafo lɛ Nitsumɔ He Niji (kɛjɛ ŋwɛi abɛkugbɛ) yɛ South Africa, Spain, kɛ New Zealand