Yitso 123

“Naa, Gbɔmɔ Lɛ!”

AKƐNI bɔ ni Yesu fee enii lɛ sa Pilato hiɛ, ni ena akɛ eyeɔ bem hu hewɔ lɛ, etao gbɛ kroko ni eeetsɔ nɔ eŋmɛɛ ehe. Ekɛɛ gbɔmɛi asafo babaoo lɛ akɛ: “Shi nyɛyɛ gbɛnaa ko akɛ miŋmɛɛɔ mɔ kome he mihaa nyɛ yɛ Hehoo gbijurɔ lɛ nɔ.”

No mli lɛ, awo Baraba, ni ji gbɔmɔgbelɔ ko ni ale lɛ jogbaŋŋ lɛ hu tsuŋ, no hewɔ lɛ Pilato bi akɛ: “Namɔ he nyɔsumɔɔ akɛ miŋmɛɛ miha nyɛ: Baraba, aloo Yesu ni atsɛɔ lɛ Kristo lɛ?”

Akɛni osɔfonukpai lɛ ni eha amɛfeɔ basabasa lɛ tsirɛ amɛyisɛɛ hewɔ lɛ, gbɔmɛi lɛ bi ni aŋmɛɛ Baraba he, shi Yesu lɛ amɛbi ni agbe lɛ. Shi Pilato nijiaŋ ejeee wui, ni ehere nɔ, ni ebi amɛ ekoŋŋ akɛ: “Amɛyi enyɔ lɛ ateŋ namɔ he nyɛsumɔɔ akɛ miŋmɛɛ miha nyɛ?”

Ni amɛbolɔ akɛ: “Baraba.”

Kɛkɛ ni Pilato bi kɛ hejɔ̃mɔ akɛ: “Belɛ mɛni mifee Yesu ni atsɛɔ lɛ Kristo lɛ he mɔ?”

Ni amɛkɛ gbee kome bolɔ waa, ni amɛha lɛ hetoo akɛ: “Ha ni asɛŋ lɛ!” “Sɛŋmɔ, sɛŋmɔ lɛ!”

Akɛni Pilato le akɛ amɛmiibi ni agbe mɔ ko ni yeee fɔ hewɔ lɛ, ekpa amɛ fai akɛ: “Shi mɔ nɛ lɛ, mɛɛ efɔŋ efee? Minako nɔ ko ni sa gbele yɛ emli; no hewɔ lɛ mibaha ayi lɛ ni maŋmɛɛ ehe.”

Yɛ emɔdɛŋbɔi nɛɛ fɛɛ sɛɛ lɛ, nɛkɛ gbɔmɛi asafo babaoo ni feɔ hoo, ni amɛ jamɔ mli hiɛnyiɛlɔi lɛ woɔ amɛ hewalɛ nɛɛ tee nɔ amɛbolɔ akɛ: “Ha ni asɛŋ lɛ!” Akɛni osɔfoi lɛ eha amɛna basabasa-feemɔ lɛ he miishɛɛ hewɔ lɛ, gbɔmɛi lɛ miitao ni ashwie la shi. Ni kɛ wɔɔsusu he lɛ, gbii enumɔ pɛ ni eho lɛ, ekolɛ amɛteŋ mɛi komɛi fata mɛi ni here Yesu atuu kɛba Yerusalem akɛ Maŋtsɛ lɛ ahe! Beni enɛɛmɛi fɛɛ yaa nɔ lɛ, kɛ Yesu kaselɔi lɛ yɛ jɛmɛ po lɛ, no mli lɛ amɛfee dioo ni ayooo amɛ hu.

Beni Pilato na akɛ nɔ kpakpa jɛɛɛ efaikpamɔi lɛ amli baaa, shi moŋ basabasa-feemɔ ko miihe aje shishi lɛ, kɛkɛ ni ewo nu ni efɔ edɛ yɛ asafo lɛ hiɛ, ni ekɛɛ: “Mi lɛ miyeee jalɔ nɛɛ la yi sɔ̃; nyɛ nyɛkwɛɔ nɔ!” Kɛkɛ ni gbɔmɛi lɛ ha lɛ hetoo akɛ: “Ela aba wɔkɛ wɔbii anɔ!”

No hewɔ lɛ, yɛ nɔ ni amɛtaoɔ lɛ kɛ gbeekpamɔ naa—ni akɛni eetao ni esa gbɔmɛi asafo babaoo lɛ hiɛ fe ni eeefee nɔ ni ele akɛ no ja lɛ hewɔ lɛ—Pilato ŋmɛɛ Baraba he eha amɛ. Kɛkɛ ni eha amɔ Yesu ni agbala eha atadei lɛ ni akɛ kplebi yi lɛ. Jeee yii folo ko kɛkɛ nɛ. The Journal of the American Medical Association lɛ tsɔɔ bɔ ni Romabii yiɔ mɔ amɛhaa lɛ mli akɛ:

“Nɔ ni akɛfɔɔ feemɔ ji kplebi kuku ko (flagrum loo flagellum) kɛ enaa kpaa loo kpai ni akɛ kooloi ahewolo fee ni esoro amɛkɛlɛmɔ, ni akɛ dadei koklobii aloo gwantɛŋ wui ni ajɔ naa waa efimɔ kpai lɛ ateaŋ. . . . Yɛ be mli ni Roma asraafoi lɛ yiɔ mɔ lɛ sɛɛ kɛ amɛhewalɛ fɛɛ lɛ, dadei koklobii lɛ pilaa mɔ lɛ ni efũuɔ, ni kooloi ahewolo kpaai lɛ kɛ gwantɛŋ wui lɛ folɔɔ ehewolo nɔ kɛ ehewolo nɔ fai lɛ ekomɛi po. Kɛkɛ lɛ, beni yii lɛ yaa nɔ lolo lɛ, pilamɔi lɛ mli woɔ wu kɛyashɛɔ fai ni yɔɔ ewui ahe lɛ he tɔɔ ni ehaa eheloo lɛ tserɛɔ ni ehoɔ la waa hu.”

Beni ayi Yesu yɛ nɛkɛ yiwaa gbɛ nɛɛ nɔ sɛɛ lɛ, amɛkɛ lɛ tee amralo lɛ shia lɛ, ni atsɛ asraafoi akuu lɛ fɛɛ ni amɛbabua shi. Jɛmɛ kɛkɛ ni asraafoi lɛ saa amɛye ehe fɛo ekoŋŋ kɛtsɔ ŋmeei akekre ko ni amɛfee ni amɛkɛfi eyitso lɛ nɔ. Ni amɛkɛ pamplo ha lɛ ehiɛ yɛ eninejurɔ, ni amɛkɛ atade tsuru yuu, nɔ ni maŋtsɛmɛi woɔ lɛ eko wo lɛ. Kɛkɛ ni amɛye ehe fɛo ni amɛkɛɛ: “Oshwiee, Yudafoi a-Maŋtsɛ!” Agbɛnɛ hu, amɛtsɛ̃rɛ lajɔ̃ amɛshwie ehe ni amɛgbala ehiɛ mai. Kɛkɛ ni amɛhe pamplo lɛ yɛ edɛŋ, ni amɛkɛtswia eyiteŋ, ni amɛha “akekre” ni amɛkɛfi lɛ ni amɛkɛshwieɔ ehiɛ shi lɛ mli ŋmeei ni naa ba lɛ tsurɔ eyiteŋ.

Bulɛ ni sa kadimɔ waa kɛ hewalɛ ni Yesu kɛdamɔ nɛkɛ niseniianifeemɔ nɛɛ naa lɛ sa Pilato hiɛ aahu akɛ enɛ tsirɛ lɛ ni ebɔ mɔdɛŋ shikome ekoŋŋ akɛ eeeŋmɛɛ ehe. Kɛkɛ ni ekɛɛ asafo lɛ akɛ: “Naa, mikɛ lɛ eje kpo kɛba nyɛŋɔɔ, koni nyɛna nyɛle akɛ minaaa fɔbuu sane ko yɛ ehe.” Ekolɛ esusu akɛ kɛji amɛna bɔ ni awa Yesu yi aha lɛ, no baaha amɛtsuii ahe ajɔ. Beni Yesu damɔ gbɔmɛi asafoi babaoo ni yi wa ni feɔ basabasa nɛɛ ahiɛ, ni efi ŋmeei akekre lɛ kɛ atade tsuru yuu ni ewo ni ehiɛ fɛɛ hoɔ la ni epiŋɔ hu lɛ, Pilato jaje akɛ: “Naa, gbɔmɔ lɛ!”

Eyɛ mli akɛ ayi lɛ ni apila lɛ moŋ, shi naa nuu ni ehe gbɛi fe fɛɛ yɛ yinɔsane mli lɛ ni edamɔ shi, lɛlɛŋ gbɔmɔ ni fe mɔ fɛɛ mɔ ni ehi shi pɛŋ lɛ! Hɛɛ, Yesu tsɔɔ bulɛ ko yɛ kpoofeemɔ mli ni tsɔɔ bɔ ni eji mɔ kpele eha ni esa akɛ Pilato po akpɛlɛ nɔ, ejaakɛ etamɔ nɔ ni ewiemɔi lɛ tsɔɔ bulɛ kɛ mɔbɔnalɛ fɛɛ ni efutu. Yohane 18:39–19:5; Mateo 27:15-17, 20-30; Marko 15:6-19; Luka 23:18-25.

▪ Mɛɛ gbɛ nɔ Pilato bɔ mɔdɛŋ akɛ eeeha aŋmɛɛ Yesu he yɛ?

▪ Mɛɛ gbɛ nɔ Pilato tsɔ eka akɛ eeejie ehe kɛjɛ sane lɛ mli yɛ?

▪ Mɛni baa yɛ be mli ni ayiɔ mɔ ko lɛ?

▪ Yɛ be mli ni ayi Yesu sɛɛ lɛ, mɛɛ gbɛ nɔ aye ehe fɛo yɛ?

▪ Mɛɛ gbɛ nɔ Pilato bɔ mɔdɛŋ ekoŋŋ akɛ eeeha aŋmɛɛ Yesu he yɛ?