Yitso 12
Nɔ ni Obaptisimɔ lɛ Tsɔɔ
1, 2. (a) Mɛni hewɔ esa akɛ nu mli baptisimɔ afee nɔ ni wɔteŋ mɔ fɛɛ mɔ nyaa he lɛ? (b) Yɛ wiemɔ kuku mli lɛ, te obaaha sanebimɔi ni yɔɔ kuku 2 lɛ ahetoo tɛŋŋ?
AMII Yesu nu yɛ afi 29 Ŋ.B. yɛ Yordan Faa lɛ mli. Yehowa diɛŋtsɛ miikwɛ ni ekpɛlɛ nɔ. (Mat. 3:16, 17) Yɛ afii etɛ kɛ fa sɛɛ, yɛ egbohiiashitee lɛ sɛɛ lɛ, Yesu kɛ famɔi ha ekaselɔi lɛ akɛ: “Aŋɔ hegbɛ fɛɛ aha mi yɛ ŋwɛi kɛ shikpɔŋ nɔ. No hewɔ lɛ nyɛyaa ni nyɛyafea jeŋmaji fɛɛ mikaselɔi, nyɛbaptisia amɛ.” (Mat. 28:18, 19) Ani abaptisi bo yɛ nɔ ni Yesu fa yɛ jɛmɛ lɛ kɛ gbeekpamɔ naa? Aloo oosaa ohe koni ofee nakai?
2 Baptisimɔ he shishinumɔ ni mli ka shi faŋŋ he miihia yɛ saji nɛɛ eko fɛɛ eko mli. Enɛɛmɛi fata sanebimɔi ni esa akɛ asusu he lɛ ahe: Ani Kristofoi abaptisimɔ ŋmɛnɛ lɛ hiɛ shishinumɔ ni tamɔ Yesu nɔ lɛ nɔŋŋ? Ani nɔ fɛɛ nɔ ni Biblia lɛ kɛɔ yɛ baptisimɔ he lɛ kɔɔ ohe? Mɛni yɔɔ nɔ ni Kristofoi anu mli baptisimɔ lɛ tsɔɔ ni aaahi shi yɛ naa lɛ mli?
BAPTISIMƆI NI YOHANE FEE LƐ
3. Yohane baptisimɔ lɛ yɛ kɛha namɛi pɛ?
3 Aaafee nyɔji ekpaa dani aaabaptisi Yesu lɛ, Yohane Baptisilɔ lɛ tee Yudea ŋa lɛ nɔ ni eshiɛ akɛ: “Nyɛtsakea nyɛtsuii; shi ŋwɛi maŋtsɛyeli lɛ ebɛŋkɛ.” (Mat. 3:1, 2) Gbɔmɛi ni jɛ jɛi niiaŋ fɛɛ lɛ nu nɔ ni Yohane kɛɛ lɛ, ni amɛjaje amɛhe eshai amɛtsɔɔ yɛ faŋŋ mli ni ebaptisi amɛ yɛ Yordan mli. Nakai baptisimɔ lɛ yɛ kɛha Yudafoi lɛ.—Bɔf. 13:23, 24; Luka 1:13-16.
4. (a) Mɛni hewɔ ehe hiaa ni Yudafoi lɛ kɛ oyaiyeli atsake amɛtsui lɛ? (b) Mɛni abiɔ kɛji amɛaakwa ‘la ni akɛaabaptisi amɛ’ lɛ?
4 Tsuitsakemɔ he miihia nakai Yudafoi lɛ waa diɛŋtsɛ. Amɛblematsɛmɛi lɛ kɛ Yehowa Nyɔŋmɔ bote maŋ kpaŋmɔ mli yɛ afi 1513 D.Ŋ.B. yɛ Sinai Gɔŋ lɛ he. Shi amɛhiii shi yɛ gbɛnaa nii ni jwere amɛnɔ yɛ nakai kpaŋmɔ lɛ shishi lɛ naa, no hewɔ lɛ ebu amɛ fɔ akɛ eshafeelɔi. Hiɛdɔɔ yɛ shihilɛ ni amɛyɔɔ mli lɛ mli. “Yehowa gbi wulu kpele ni he yɔɔ gbeyei” ni Maleaki gba fɔ shi lɛ ebɛŋkɛ, ni eba Yerusalem nɔ oya kɛ hiɛkpatamɔ yɛ afi 70 Ŋ.B. Atsɔ hiɛ atsu Yohane Baptisilɔ lɛ ni yɔɔ ekaa kɛha anɔkwale jamɔ tamɔ Elia lɛ kɛtsɔ nakai hiɛkpatamɔ lɛ hiɛ “ni esaa maŋ ni efee klalo eto Nuŋtsɔ lɛ [Yehowa].” Ehe miihia ni amɛtsake ni amɛshwa amɛhe yɛ eshai ni amɛfee amɛshi Mla kpaŋmɔ lɛ hewɔ, ni asaa amɛtsui kɛ amɛjwɛŋmɔ ni amɛkpɛlɛ Nyɔŋmɔ Bi lɛ ni Yehowa tsuɔ lɛ kɛbaa amɛŋɔɔ lɛ nɔ. (Mal. 4:4-6; Luka 1:17; Bɔf. 19:4) Taakɛ Yohane tsɔɔ mli lɛ, Nyɔŋmɔ Bi lɛ kɛ mumɔ krɔŋkrɔŋ baabaptisi mɛi, (ni ji baptisimɔ ni kaselɔi anɔkwafoi lɛ anine shɛ nɔ klɛŋklɛŋ yɛ Pentekoste yɛ afi 33 Ŋ.B. lɛ) kɛ la hu (ni ba mɛi ni tsakeee amɛtsui lɛ anɔ akɛ hiɛkpatamɔ yɛ afi 70 Ŋ.B. lɛ). (Luka 3:16) Bɔni afee ni amɛkwa nakai ‘la baptisimɔ’ lɛ, ehe miihia ni nakai klɛŋklɛŋ afii oha lɛ mli Yudafoi lɛ ana baptisimɔ yɛ nu mli ni amɛkɛfee amɛtsuitsakemɔ lɛ he okadi, ni esa akɛ amɛtsɔmɔ Yesu Kristo kaselɔi kɛ́ hegbɛ lɛ gbele kɛha amɛ.
5. (a) Mɛni hewɔ Yohane bi sane yɛ be mli ni Yesu ba koni ebaptisi lɛ lɛ? (b) Mɛni feɔ Yesu baptisimɔ yɛ nu mli lɛ he okadi? (d) Yesu hiɛ dɔɔ Nyɔŋmɔ suɔmɔnaa nii kɛha lɛ lɛ he nitsumɔ he yɛ mɛɛ gbɛ nɔ?
5 Mɛi ni ba Yohane ŋɔɔ koni ebaptisi amɛ lɛ ateŋ mɔ kome ji Yesu diɛŋtsɛ. Shi mɛni hewɔ? Yohane le akɛ Yesu bɛ eshai ni ebaajaje etsɔɔ, no hewɔ lɛ ekɛɛ: “Mi moŋ ni ehia mi akɛ bo obaptisiɔ mi lɛ, ni bo obaa miŋɔɔ nɛɛ?” Shi Yesu baptisimɔ lɛ baafee nɔ kroko kwraa he okadi. No hewɔ lɛ eha hetoo akɛ: “Kpɛlɛmɔ kɛkɛ, shi nɛkɛ sa akɛ wɔgbeɔ jalɛ fɛɛ naa.” (Mat. 3:13-15) Yesu baptisimɔ lɛ nyɛŋ afee tsuitsakemɔ yɛ esha ko hewɔ he okadi; ni asaŋ ehe ehiaaa ni ejɔɔ ehe nɔ eha Nyɔŋmɔ, ejaakɛ eji nakai maŋ ni amɛjɔɔ amɛhe nɔ momo amɛha Yehowa lɛ mli nyo. Shi, ebaptisimɔ, yɛ be mli ni ebatsɔ Yudanyo ni eda eye afii 30 lɛ feɔ ehe ni ekɛhaa eŋwɛi Tsɛ lɛ koni efee E-suɔmɔnaa nii lolo lɛ he okadi. Nyɔŋmɔ suɔmɔnaa nii kɛha “gbɔmɔ, Kristo Yesu” lɛ kɔɔ Maŋtsɛyeli lɛ he nitsumɔ he, agbɛnɛ egbɔmɔtso ni yeɔ emuu akɛ adesa ni ekɛbaasha afɔle akɛ kpɔmɔ nɔ kɛ nɔ ni abaadamɔ nɔ afee kpaŋmɔ hee lɛ he. (Luka 8:1; 17:20, 21; Heb. 10:5-10; Mat. 20:28; 26:28; 1 Tim. 2:5, 6) Yesu kɛ hiɛdɔɔ tsu nɔ ni enu mli baptisimɔ lɛ feɔ he mfoniri lɛ he nii. Eŋmɛɛɛ gbɛ ni agbala lɛ kɛya nibii krokomɛi ahe. Ekɛ ehe kpɛtɛ Nyɔŋmɔ suɔmɔnaa nifeemɔ he kɛyashi eshikpɔŋ nɔ shihilɛ lɛ naagbee.—Yoh. 4:34.
BAPTISIMƆ KƐMIIBOTE GBELE MLI
6. Mɛɛ baptisimɔ kroko Yesu tsɔ mli, ni enɛ he mɛɛ be?
6 Yɛ nɔ ni Yesu baptisimɔ yɛ nu mli lɛ feɔ he okadi lɛ kɛ gbeekpamɔ naa lɛ, etsɔ baptisimɔ kroko hu mli. Ele akɛ nitsumɔ ni Nyɔŋmɔ kɛma ehiɛ lɛ baabi ni ekɛ ewala akɛ adesa lɛ aha akɛ afɔleshaa nɔ, shi abaatee lɛ shi ekoŋŋ yɛ mumɔŋ yɛ gbi ni ji etɛ lɛ nɔ. Ewie enɛ he akɛ baptisimɔ. Nɛkɛ “baptisimɔ” nɛɛ je shishi yɛ afi 29 Ŋ.B. shi ebaaa naagbee aahu kɛyashi be mli ni egbo diɛŋtsɛ ni atee lɛ shi. No hewɔ lɛ enu mli baptisimɔ lɛ sɛɛ afii etɛ lɛ ebaanyɛ ekɛɛ yɛ gbɛ ni ja nɔ akɛ: “Miyɛ baptisimɔ ko ni akɛbaabaptisi mi, ni kwɛ bɔ ni mihe hiaa mi kɛyashi beyinɔ ni aaagbe naa!”—Luka 12:50.
7. (a) Namɛi hu abaptisi amɛ awo gbele mli lɛ? (b) Namɔ baptisiɔ mɛi lɛ?
7 Esa akɛ abaptisi mɛi ni kɛ Kristo baaye maŋtsɛ yɛ eŋwɛi Maŋtsɛyeli lɛ mli lɛ hu awo gbele mli nakai nɔŋŋ. (Mar. 10:37-40; Kol. 2:12) Kɛ amɛgboi lɛ, amɛkɛ amɛwala akɛ adesai lɛ fɔɔ shi kwraa kɛyaa naanɔ, taakɛ Yessu fee lɛ. Ni yɛ amɛgbohiiashitee lɛ mli lɛ amɛyafataa ehe yɛ eŋwɛi nɔyeli lɛ mli. Enɛ jeee baptisimɔ ko ni adesa ko feɔ, shi moŋ Nyɔŋmɔ, kɛtsɔ eŋwɛi Bi lɛ nɔ.
8. Mɛni ji baptisimɔ ni ‘abaptisi amɛ awo Kristo Yesu mli’ lɛ hu shishi?
8 Awieɔ mɛi ni abaptisiɔ amɛ awoɔ Yesu gbele mli lɛ hu he akɛ ‘abaptisi amɛ awo Kristo Yesu mli.’ Atsɔ mumɔ krɔŋkrɔŋ lɛ ni Kristo kudɔɔ lɛ nɔ eha amɛkɛ lɛ ni ji amɛyitso lɛ fee ekome, akɛ asafo ni akɛ mumɔ efɔ amɛ mu, ‘egbɔmɔtso lɛ,’ mlibii. Akɛni nakai mumɔ lɛ yeɔ ebuaa amɛ ni amɛjieɔ Kristo su kɛ baŋ ni hi fe fɛɛ lɛ kpo yɛ amɛshihilɛ mli hewɔ lɛ, abaanyɛ akɛɛ yɛ amɛhe akɛ amɛ fɛɛ amɛbaatsɔɔ “mɔ kome . . . yɛ Kristo Yesu mli.”—Rom. 6:3-5; 1 Kor. 12:13; Gal. 3:27, 28; Bɔf. 2:32, 33.
KASELƆI KRISTOFOI LƐ ANU MLI BAPTISIMƆ
9. (a) Mɛ be mli baptisimɔ taakɛ atsɔɔ yɛ Mateo 28:19 lɛ je shishi klɛŋklɛŋ? (b) Okɛ sanebimɔi kɛ ŋmalɛi ni akɛha yɛ kuku nɛɛ mli lɛ atsɔɔ nɔ ni Yesu tsɔɔ akɛ esa akɛ mɛi ni taoɔ baptisimɔ lɛ ayoo lɛ mli.
9 Yohane baptisi Yesu klɛŋklɛŋ kaselɔi lɛ yɛ nu mli ni etsɔɔ amɛ gbɛ kɛtee Yesu ŋɔɔ akɛ mɛi ni baatsɔmɔ emumɔŋ ayemforo kuu lɛ mlibii. (Yoh. 3:25-30) Amɛ hu amɛbaptisi mɛi krokomɛi yɛ Yesu gbɛtsɔɔmɔ shishi, ni enɛ hu tamɔ Yohane baptisimɔ lɛ nɔŋŋ. (Yoh. 4:1-3) Shi kɛjɛ Pentekoste afi 33 Ŋ.B. kɛyaa lɛ, amɛje shishi akɛ amɛaaha nitsumɔ akɛ amɛbaptisi “yɛ Tsɛ lɛ kɛ Bi lɛ kɛ mumɔ krɔŋkrɔŋ lɛ gbɛi amli” lɛ aba mli. (Mat. 28:19) Obaana akɛ ehe baaba sɛɛnamɔ kɛha bo akɛ ooosusu nɔ ni enɛ tsɔɔ lɛ he ekoŋŋ, kɛtsɔ ŋmalɛi ni atsɛ nɛɛ kɛ sanebimɔi ni nyiɛ sɛɛ nɛɛ anɔ:
Kɛji aaabaptisi mɔ ko “yɛ Tsɛ lɛ” gbɛi amli lɛ, mɛni esa akɛ mɔ lɛ ayɔse yɛ Tsɛ lɛ he? (2 Maŋ. 19:15; Lala 3:9; 73:28; Yes. 6:3; Rom. 15:6; Heb. 12:9; Yak. 1:17)
Baptisimɔ “yɛ Bi lɛ” gbɛi amli biɔ ni ayoo mɛni? (Mat. 16:16, 24; Fil. 2:9-11; Heb. 5:9, 10)
Mɛni esa akɛ mɔ ko ahe aye dani abaptisi lɛ yɛ “mumɔ krɔŋkrɔŋ lɛ gbɛi amli”? (Luka 11:13; Yoh. 14:16, 17; Bɔf. 1:8; 10:38; Gal. 5:22, 23; 2 Pet. 1:21)
10. (a) Kristofoi anu mli baptisimɔ ŋmɛnɛ lɛ damɔ shi kɛha mɛni? (b) Enɛ yɛ sɔrɔto yɛ Yesu diɛŋtsɛ baptisimɔ lɛ he yɛ mɛɛ gbɛ nɔ? (d) Kɛ abaptisi mɛi ni sa yɛ Ŋmalɛ naa lɛ, mɛni amɛbatsɔmɔɔ?
10 Klɛŋklɛŋbii ni abaptisi amɛ yɛ nakai famɔ ni Yesu kɛha lɛ kɛ gbeekpamɔ naa ji Yudafoi (kɛ mɛi ni amɛtsɔmɔ Yudafoi), ni akɛ maŋ lɛ, amɛjɔɔ amɛhe nɔ momo amɛha Nyɔŋmɔ ni ajie mɔbɔnalɛ krɛdɛɛ ko kpo atsɔɔ amɛ aahu kɛbashi afi 36 Ŋ.B. lɛ. Shi, beni akɛ hegbɛ ha Samariabii kɛ Jeŋmajiaŋbii lɛ akɛ amɛbatsɔmɔ Kristo kaselɔi lɛ, ehe bahia ni amɛ diɛŋtsɛ amɛjɛ amɛsuɔmɔ mli amɛjɔɔ amɛhe nɔ kwraa amɛha Yehowa akɛ amɛbaasɔmɔ lɛ akɛ e-Bi lɛ kaselɔi dani abaptisi amɛ. Enɛ etee nɔ efee nɔ ni Kristofoi anu mli baptisimɔ lɛ tsɔɔ kɛha mɛi fɛɛ, ni Yudafoi lɛ fata he, kɛbashi ŋmɛnɛ. Nɛkɛ “baptisimɔ kome” nɛɛ kɔɔ mɛi fɛɛ ni batsɔmɔɔ anɔkwa Kristofoi lɛ ahe. No hewɔ lɛ amɛbatsɔmɔ Yehowa odasefoi Kristofoi, Nyɔŋmɔ sɔɔlɔi ni ehala amɛ.—Efes. 4:5; 2 Kor. 6:3, 4.
11. (a) Kristofoi anu mli baptisimɔ kɛ mɛni kpaa gbee, ni yɛ mɛɛ gbɛ nɔ? (b) No hewɔ lɛ ahereɔ Kristofonyo lɛ yiwala kɛjɛɔ mɛni mli?
11 Baptisimɔ ni tamɔ nɛkɛ jara wa yɛ Nyɔŋmɔ hiɛ. Yɛ be mli ni etsi adeka ni Noa kpɛ ni abaa lɛ kɛ eweku lɛ yi yɛ mli kɛtsɔ Nu Afua lɛ mli lɛ ta lɛ, bɔfo Petro gbala jwɛŋmɔ kɛba enɛ nɔ. Eŋma akɛ: “No nɔŋŋ agbɛnɛ ehereɔ wɔ hu wɔyiwala yɛ baptisimɔ ni akɛ no to he okadi lɛ mli, nɔ ni jeee hewolo nɔ muji jiemɔ, shi moŋ eji henilee kpakpa kpaŋmɔ ni akɛ Nyɔŋmɔ kpaŋɔ, kɛtsɔ Yesu Kristo shitee lɛ nɔ.” (1 Pet. 3:21) Adeka lɛ ji odaseyeli ni anaa faŋŋ ni tsɔɔ akɛ Noa ejɔɔ ehe nɔ akɛ ebaafee Nyɔŋmɔ suɔmɔnaa nii, ni no mli lɛ ekɛ anɔkwayeli etsu nitsumɔ ni akɛwo edɛŋ lɛ. Nɔ ni jɛ mli ba ji eyi ni abaa lɛ. Nakai nɔŋŋ hu, mɛi ni jɔɔ amɛhe nɔ amɛhaa Yehowa yɛ hemɔkɛyeli ni amɛyɔɔ yɛ Kristo ni atee lɛ shi lɛ mli hewɔ ni amɛhaa abaptisiɔ amɛ amɛkɛfeɔ enɛ he okadi ni amɛyaa nɔ amɛfeɔ Nyɔŋmɔ suɔmɔnaa nii kɛha etsuji yɛ wɔgbii nɛɛ amli lɛ, ahereɔ amɛyiwala kɛjɛɔ ŋmɛnɛŋmɛnɛ yiwalɛ jeŋ nɛɛ mli. (Gal. 1:3, 4) Amɛjeee mɛi ni nyiɛ hiɛkpatamɔ ni baa je lɛ nɔ lɛ gbɛ lɛ nɔ dɔŋŋ. Ahere amɛyiwala kɛjɛ enɛ mli ni Nyɔŋmɔ eduro amɛ henilee kpakpa.
WƆ GBƐNAA NII LƐ NI WƆƆHI SHI YƐ NAA
12. Mɛni hewɔ kɛ abaptisi mɔ ko lɛ no etsɔɔɔ akɛ eji yiwalaheremɔ nɔdaamɔ nɔ lɛ?
12 Ebaafee tɔmɔ akɛ aaamu sane naa akɛ ni aaabaptisi mɔ ko lɛ diɛŋtsɛ ji yiwalaheremɔ kɛha mɔ lɛ. Ebafeɔ nɔ ni sɛɛnamɔ yɔɔ he kɛji akɛ mɔ lɛ ejɔɔ ehe nɔ diɛŋtsɛ eha Yehowa kɛtsɔ Yesu Kristo nɔ, ni yɛ no sɛɛ lɛ etsuɔ Nyɔŋmɔ suɔmɔnaa nii he nii yɛ anɔkwayeli mli kɛyashiɔ naagbee.—Mat. 24:13.
13. (a) Mɛni ji Nyɔŋmɔ suɔmɔnaa nii yɛ gbɛ ni Kristofoi ni abaptisi amɛ lɛ kɛ amɛshihilɛ tsuɔ nii amɛhaa lɛ mli? (b) Te esa akɛ Kristofoi akaselɔ-feemɔ nitsumɔ lɛ afee hehiamɔ nii yɛ wɔshihilɛ mli aha tɛŋŋ?
13 Nɔ ni fata Nyɔŋmɔ suɔmɔnaa nii kɛha Yesu lɛ he ji bɔ ni ekɛ ewala akɛ adesa lɛ tsuɔ nii ehaa. Esa akɛ ekɛfɔ shi yɛ gbele mli akɛ afɔleshaa nɔ. Yɛ wɔgbɛfaŋ lɛ, esa akɛ wɔkɛ wɔgbɔmɔtsei aha Nyɔŋmɔ, akɛ wɔshihilɛ baafee nɔ ni wɔkɛshaa afɔle. Esa akɛ wɔkɛ wɔshihilɛ aha Nyɔŋmɔ suɔmɔnaa nifeemɔ pɛ. (Rom. 12:1, 2) Eka shi faŋŋ akɛ wɔnyɛŋ wɔfee nakai kɛji akɛ, yɛ be kɛ bei amli lɛ, wɔje gbɛ wɔba wɔjeŋ tamɔ jeŋ ni ebɔle wɔhe kɛkpe lɛ, aloo kɛ wɔtswa wɔshihilɛ wɔbɔle pɛsɛmkunya nibii asɛɛdii yɛ be mli ni wɔkɛ sɔɔmɔ fioo ko pɛ haa Nyɔŋmɔ lɛ. (1 Pet. 4:1-3; 1 Yoh. 2:15-17) Beni Yudanyo ko bi nɔ ni esa akɛ efee koni ena naanɔ wala lɛ, Yesu kai lɛ bɔ ni ehe hiaa akɛ eeehi shi yɛ jeŋba hetsemɔ mli lɛ, kɛkɛ ni etsɔɔ lɛ bɔ ni ehe hiaa akɛ efee kaselɔ ni ji Kristofonyo, efee Yesu sɛɛnyiɛlɔ, nɔ ni he hiaa fe fɛɛ yɛ shihilɛ mli lɛ. Enyɛŋ efee nɔ ni ji enyɔ ni baa yɛ heloo gbɛfaŋ nibii asɛɛ.—Mat. 19:16-21.
14. (a) Mɛɛ gbɛnaa nii ni kɔɔ Maŋtsɛyeli lɛ he ka Kristofoi fɛɛ nɔ? (b) Taakɛ afee he mfoniri yɛ baafa 101 lɛ, mɛni ji gbɛ ni hi jogbaŋŋ ni aaatsɔ nɔ atsu nitsumɔ nɛɛ? (d) Kɛ wɔkɛ wɔtsui muu fɛɛ wo nɛkɛ nitsumɔ nɛɛ mli lɛ, mɛɛ odase enɛ yeɔ?
14 Esa akɛ akai hu akɛ nɔ ni fata Nyɔŋmɔ suɔmɔnaa nii kɛha Yesu lɛ he ji nitsumɔi ni he hiaa yɛ Maŋtsɛyeli lɛ he. Afɔ Yesu diɛŋtsɛ mu akɛ Maŋtsɛ. Shi beni eyɔɔ shikpɔŋ nɔ lɛ, no mli lɛ eyɛ ekaa yɛ Maŋtsɛyeli lɛ he shiɛmɔ mli. Wɔ hu wɔyɛ odaseyeli nitsumɔ ko ni tamɔ nakai nɔŋŋ ni wɔbaatsu, ni wɔyɛ nɔ ni wɔɔdamɔ nɔ wɔkɛ wɔhe awo mli kɛ wɔtsui muu lɛ fɛɛ. Kɛtsɔ nakai feemɔ nɔ lɛ wɔjieɔ hiɛsɔɔ ni wɔyɔɔ kɛha jeŋ muu fɛɛ Maŋtsɛ ni Yehowa ji lɛ kɛ suɔmɔ ni wɔyɔɔ kɛha wɔnanemɛi gbɔmɛi lɛ kpo. Wɔtsɔɔ hu akɛ wɔkɛ wɔnanemɛi jalɔi ni yɔɔ jeŋ muu lɛ efee ekome, amɛ fɛɛ lɛ Maŋtsɛyeli lɛ he odasefoi ji amɛ, ni amɛ fɛɛ amɛmiiya amɛhiɛ kɛyashɛ naanɔ wala oti lɛ he yɛ Maŋtsɛyeli nɔyeli lɛ shishi.
Sanegbaa Ni Akɛtiɔ Mli
● Mɛɛ nibii ni jejee amɛhe kɛ nɔ ni yɔɔ sɔrɔto hu yɔɔ Yesu baptisimɔ lɛ kɛ nu mli baptisimɔ ŋmɛnɛ lɛ he?
● Yohane baptisimɔ lɛ yɛ kɛha namɛi? Namɛi abaptisiɔ amɛ awoɔ gbele mli lɛ? Ni namɛi ‘abaptisiɔ amɛ awoɔ Kristo Yesu mli’ lɛ?
● Mɛni yɔɔ Kristofoi anu mli baptisimɔ he gbɛnaa nii ni wɔɔhi shi yɛ naa lɛ mli?
[Akrabatsa/Mfonirii ni yɔɔ baafa 101]
Mɛɛ Gbɛi Anɔ Otsɔɔ Ojajeɔ Maŋtsɛyeli Lɛ Otsɔɔ?
Kɛjɛ shia kɛmiiya shia
Kɛtsɔ sɛɛkuu kɛ saramɔ yɛ mɛi ni yɔɔ wiemɔ lɛ he miishɛɛ lɛ nɔ
Yɛ shia Biblia mli nikasemɔi amli
Yɛ gbɛjegbɛi anɔ
Kɛha nanemɛi skulbii
Kɛha nanemɛi nitsulɔi