Yehowa Ni Akɛ Lɛ Aaatsu Nii Yɛ Anɔkwayeli Mli
“Nyɔŋmɔ, otsɔɔ mi nii kɛjɛ mibalahiaŋ, ni miijaje onaakpɛɛ nitsumɔi lɛ kɛbashi ŋmɛnɛ.”—LALA 71:17.
1. Mɛni hewɔ wɔbaanyɛ wɔkɛɛ akɛ nitsumɔ ji nikeenii ni jɛ Yehowa ŋɔɔ lɛ?
NITSUMƆ ji Nyɔŋmɔ nikeenii lɛ ateŋ ekome kɛha gbɔmɔ. Yehowa kɛɛ wɔ klɛŋklɛŋ fɔlɔi, Adam kɛ Hawa akɛ: “Nyɛyia shikpɔŋ lɛ nɔ obɔ, ni nyɛyɛa nɔ.” Eji nitsumɔ ni kaa mɔ diɛŋtsɛ shi eji nɔ ni amɛbaanyɛ amɛtsu. Gbɔmɔtsoŋ kɛ jwɛŋmɔŋ mɔdɛŋbɔɔ ni he hiaa lɛ baaha amɛmiishɛɛ yɛ shihilɛ mli lɛ afa kɛteke nɔ fɛɛ nɔ ni kooloi ni yɔɔ amɛshikpɔŋ nɔ shia lɛ mli lɛ naa.—1 Mose 1:28.
2, 3. (a) Nitsumɔ ebatsɔ mɛni kɛha mɛi pii ŋmɛnɛ, ni mɛni hewɔ? (b) Mɛɛ hegbɛ ni wɔna ni wɔkɛaatsu nitsumɔ krɛdɛɛ ko ehe hiaa ni wɔsusu he?
2 Yɛ wɔshihilɛ ni yeee emuu nɛɛ po mli lɛ, nɔ ni jɛɔ “deŋmegbomɔ” mli baa ji “nii kpakpai,” ni enɛ hu ji “Nyɔŋmɔ nikeenii,” taakɛ nilelɔ Salomo ŋma lɛ. (Jajelɔ 3:13) Ehe miihia ni gbɔmɔ kɛ ejwɛŋmɔ kɛ egbɔmɔtso atsu nii lolo. Kɛ mɔ ko bɛ nitsumɔ lɛ, ehaoɔ. Shi kɛlɛ, jeee nitsumɔi fɛɛ hi loo amɛsa. Kɛha mɛi pii lɛ, nitsumɔ eŋɔɔɔ, ni ejɛ hiamɔ ni ehe hiaa akɛ ena edaaŋ ŋmaa lɛ hewɔ.
3 Shi kɛlɛ, nitsumɔ ko ni nyɔmɔwoo diɛŋtsɛ yɔɔ mli yɛ ni aafɔ mɛi fɛɛ nine koni amɛkɛ amɛhe abawo mli. Mɛi ni kɛ amɛhe woɔ mli lɛ kɛ shitee-kɛ-wolɔi baakpe kɛ naagbai hu ni esa akɛ amɛye nɔ kunim. Mɛni hewɔ ehe hiaa akɛ wɔhe aaasa kɛha nitsumɔ ni tamɔ nɛkɛ lɛ? Te wɔfeɔ tɛŋŋ wɔfeɔ nakai? Dani wɔɔha nɛkɛ sanebimɔi nɛɛ ahetoo lɛ, klɛŋklɛŋ lɛ nyɛhaa wɔsusu enɛɛmɛi ahe:
Namɔ Wɔtsuɔ Nii Wɔhaa?
4. Mɛɛ nitsumɔ nɛkɛ kɛ miishɛɛ kɛ tsui ni nyɔɔ mɔ mli baha Yesu?
4 Yesu Kristo kɛɛ: “Miŋmaa ji akɛ mafee mɔ ni tsu mi lɛ suɔmɔnaa nii, ni magbe enitsumɔ lɛ naa.” (Yohane 4:34) Anɔkwayeli mli ni Yesu jɛ etsu nii eha Yehowa lɛ kɛ miishɛɛ kɛ tsui ni nyɔɔ mɔ mli babaoo baha lɛ. No ha ena yiŋtoo yɛ shihilɛ mli, ni yɛ esɔɔmɔ nitsumɔ ni he afii etɛ kɛ fa lɛ naagbee lɛ, ebaanyɛ ekɛɛ eŋwɛi Tsɛ lɛ yɛ anɔkwayeli fɛɛ mli akɛ: “Miwo ohiɛ nyam yɛ shikpɔŋ lɛ nɔ, akɛni nitsumɔ lɛ ni oŋɔha mi tsumɔ lɛ, migbe naa lɛ.” (Yohane 17:4) Taakɛ bɔ ni heloo naa niyenii wajeɔ mɔ lɛ, nakai nɔŋŋ hu mumɔŋ nitsumɔ feɔ. Yesu ma enɛ nɔ mi yɛ be kroko mli beni ewo ŋaa akɛ: “Nyɛkatsua ŋmaa ni fiteɔ lɛ he nii, shi moŋ ŋmaa ni hiɔ shi kɛyaa naanɔ wala mli.” (Yohane 6:27) Nɔ ni tamɔɔɔ enɛ lɛ, nitsumɔ ni wooo yibii yɛ mumɔŋ lɛ kɛ nijiaŋwujee kɛ gbele baa.
5. Namɛi te shi wo nitsumɔ kpakpa ni Yesu tsuɔ lɛ, ni mɛni hewɔ?
5 “Mitsɛ miitsu nii kɛbashi be nɛɛ, no hewɔ ni mi hu mitsuɔ lɛ.” Yesu wie wiemɔi nɛɛ etsɔɔ Yudafoi ni wieɔ shiɔ lɛ akɛni etsa nuu ko ni he eye afii 38 hela eha lɛ yɛ Hejɔɔmɔ gbi nɔ lɛ hewɔ. (Yohane 5:5-17) Eyɛ mli akɛ Yesu miitsu Yehowa nitsumɔ moŋ, shi jamɔ mli shitee-kɛ-wolɔi lɛ kpoo akɛ amɛaakpɛlɛ nakai anɔkwa sane lɛ nɔ ni amɛfee nɔ fɛɛ nɔ ni amɛaanyɛ koni amɛkɛha ekpa. Mɛni hewɔ? Ejaakɛ amɛjɛ amɛtsɛ Satan Abonsam, mɔ ni teɔ shi ewoɔ Yehowa nitsumɔ yɛ be fɛɛ mli lɛ mli. (Yohane 8:44) Akɛni Satan baanyɛ ‘atsake ehe etsɔ la bɔfo,’ ni ekɛ “nii ni ejaaa gbɛ fɛɛ ni akɛshishiuɔ mɛi” tsuɔ nii hewɔ lɛ, mumɔŋ shishinamɔ kɛ jwɛŋmɔ ni mli ka shi faŋŋ he miihia wɔ koni wɔkɛyoo enitsumɔi lɛ ni wɔle nɔ ni amɛji. Kɛ jeee nakai lɛ, wɔbaana ni wɔmiitsu nii moŋ kɛmiite shi kɛmiiwo Yehowa.—2 Korintobii 11:14; 2 Tesalonikabii 2:9, 10.
Shitee-Kɛ-Wolɔi Miitsu Nii
6. Mɛni hewɔ hemɔkɛyeli kwalɔi ji “nitsulɔi shishiulɔi” lɛ? Feemɔ enɛ he nɔkwɛmɔ nɔ.
6 Mɛi komɛi yɛ ni tamɔ mɛi ni amɛkwa hemɔkɛyeli lɛ ŋmɛnɛ, ni yeee anɔkwale ni miitsu nii akɛ Satan najiaŋdamɔlɔi koni amɛkɛfite mɛi heei ni kɛ amɛhe ebabɔ Kristofoi asafo lɛ he lɛ ahemɔkɛyeli. (2 Korintobii 11:13) Ni amɛkɛ Biblia lɛ aaatsu nii akɛ nɔ ni amɛdamɔɔ nɔ amɛtsɔɔ anɔkwale tsɔɔmɔi lɛ, amɛkɛ amɛjwɛŋmɔ maa mɔdɛŋ ni amɛbɔɔ koni amɛgbe New World Translation of the Holy Scriptures lɛ he guɔ tamɔ nɔ ni no pɛ Yehowa Odasefoi kɛ amɛhe fɔɔ nɔ kɛhaa amɛsɛɛfimɔ. Shi jeee nakai kwraa sane lɛ ji. Odasefoi lɛ kɛ King James Version loo Ga Biblia lɛ kɛ Roma Katolek Douay Version loo shishitsɔɔmɔ fɛɛ shishitsɔɔmɔ ni yɔɔ amɛwiemɔ mli lɛ etsu nii fe afii nyɔŋmai enumɔ, ni amɛkɛkase anɔkwalei ni kɔɔ Yehowa kɛ eyiŋtoi ahe lɛ he nii. Ni amɛkɛ nɛkɛ shishitsɔɔmɔi ni etsɛ nɛɛ etsu nii ni amɛkɛjaje anɔkwalei ni kɔɔ shihilɛ mli ni gbohii lɛ yɔɔ, wekukpaa ni ka Nyɔŋmɔ kɛ e-Bi lɛ teŋ, kɛ nɔ hewɔ ni asafoku bibioo ko pɛ yaa ŋwɛi lɛ amɛtsɔɔ. Mɛi ni le saji ni yaa nɔ lɛ hu le akɛ Yehowa Odasefoi yaa nɔ amɛkɛ Biblia mli shishitsɔɔmɔi babaoo tsuɔ nii yɛ amɛ jeŋ muu fɛɛ sanekpakpa shiɛmɔ nitsumɔ lɛ mli. Shi kɛjɛ 1961 mli kɛbaa nɛɛ, amɛna New World Translation lɛ kɛ eshishitsɔɔmɔi ni ja kɛ ekanemɔ ni waaa lɛ kɛ nitsumɔ hu he miishɛɛ.
7. (a) Mɛni hewɔ Yesu kɛɛ eleee mɛi pii ni kɛɔ akɛ amɛheɔ lɛ amɛyeɔ lɛ? (b) Mɛni hewɔ ehe hiaa akɛ wɔbo ŋaawoo ni yɔɔ 1 Yohane 4:1 lɛ toi lɛ?
7 Yesu kɛɛ akɛ ebaakwa mɛi pii ni kɛɔ akɛ amɛheɔ lɛ amɛyeɔ lɛ. Ekpɛlɛ nɔ akɛ amɛbaagba, ni amɛfamɔ daimonioi, ni amɛbaafee “hewalɛ nibii pii” yɛ egbɛi amli. Shi kɛlɛ, eyɔseɔ nɛkɛ nitsumɔi nɛɛ akɛ “nibii ni ejaaa gbɛ!” (Mateo 7:21-23) Mɛni hewɔ? Ejaakɛ amɛfeee e-Ŋwɛi Tsɛ lɛ suɔmɔnaa nii, ni yɛ Yehowa Nyɔŋmɔ hiɛ lɛ, sɛɛnamɔ ko kwraa bɛ he. Nɔ ko ni tamɔ naakpɛɛ nitsumɔ ni ekaaa ŋmɛnɛ po baanyɛ afee nɔ ni jɛ shishijee shishiulɔ, Satan. Yɛ be mli ni bɔfo Yohane ŋmaa eklɛŋklɛŋ wolo lɛ yɛ Yesu gbele kɛ eshitee lɛ sɛɛ aaafee afii 60 lɛ, ewo Kristofoi lɛ aŋaa akɛ “nyɛkahea mumɔ fɛɛ mumɔ nyɛyea; shi moŋ nyɛkaa mumɔi lɛ nyɛkwɛa akɛ Nyɔŋmɔ mli amɛjɛ lo.” Ehe miihia ni wɔfee nakai nɔŋŋ.—1 Yohane 4:1.
Nitsumɔi ni Nyɔmɔwoo Bɛ Mli
8. Te esa akɛ wɔnu heloo lɛ nitsumɔi lɛ ahe wɔha tɛŋŋ?
8 Kɛji akɛ wɔkɛ wɔhe wooo mumɔŋ nitsumɔ ni wooo yibii kpakpai amli po lɛ, wɔdeŋmegbomɔ lɛ bafeɔ nɔ ni sɛɛnamɔ bɛ he kɛji akɛ wɔtee nɔ wɔtsu heloo ni egbee shi lɛ akɔnɔi ahe nii. Bɔfo Petro kɛɛ akɛ wɔfite be babaoo diɛŋtsɛ wɔkɛtsu “jeŋmajiaŋbii lɛ atsuinaa nii lɛ, ni wɔba wɔjeŋ yɛ nyenyeŋtswibɔɔi, akɔnɔi, daatɔɔi, shwɛmɔi, fufeemɔi, kɛ wɔŋjamɔi ni ahiɔ lɛ amli.” (1 Petro 4:3, 4) Shi enɛ etsɔɔɔ akɛ mɛi fɛɛ ni amrɔ nɛɛ amɛji Kristofoi ni amɛjɔɔ amɛhe nɔ lɛ kɛ amɛhe wo nitsumɔi ni tamɔ nɛkɛ mli yɛ be ko mli, shi moŋ etsɔɔ akɛ kulɛ esa akɛ mɛi ni efee nakai pɛŋ lɛ asubaŋ atsake oya yɛ be mli ni amɛyaa amɛhiɛ yɛ mumɔŋ shishinumɔ mli lɛ. Je lɛ baawie amɛhe efɔŋ yɛ amɛtsakemɔi lɛ ahewɔ; abaakpɛ enɛ gbɛ. Ni kɛlɛ, esa akɛ amɛtsake kɛji akɛ amɛaanyɛ amɛtsɔmɔ nitsulɔi anɔkwafoi yɛ Yehowa sɔɔmɔ mli.—1 Korintobii 6:9-11.
9. Mɛni wɔkaseɔ kɛjɛɔ Odasefonyo ni je shishi akɛ eekase bɔ ni eeefee etsɔ mɔ ni laa ni ekɛshɛjeɔ mɛi amii yɛ nikwɛmɔ he lɛ niiashikpamɔ lɛ mli?
9 Yehowa eduro wɔ nikeenii babaoo ni wɔbaanyɛ wɔna mli ŋɔɔmɔ, ni lalai ni ŋɔɔ hu fata he. Shi, akɛni “jeŋ muu lɛ fɛɛ ka mɔ fɔŋ lɛ mli” ni ji [Satan Abonsam] hewalɛ mli hewɔ lɛ, ani lalai aje lɛ hu fataaa enɛ he? (1 Yohane 5:19) Hɛɛ, lalai baanyɛ atsɔ mɔ tsɔne nigii, taakɛ bɔ ni Sylvana yoo lɛ. Ena hegbɛ akɛ aaatsɔse lɛ yɛ France akɛ mɔ ni laa yɛ nikwɛmɔ he. Etsɔɔ mli akɛ, “ni kɛlɛ miyɛ henumɔ ni mli wa akɛ masɔmɔ Yehowa. Miinya gbɛgbalɔi awamɔ sɔɔmɔ he, ni miyɛ hiɛnɔkamɔ akɛ maha nɛkɛ nibii enyɔ nɛɛ akpa gbee yɛ mishihilɛ mli. Shi klɛŋklɛŋ naagba ni esa akɛ mikɛkpe yɛ mishihilɛ mli nitsumɔ nɛɛ mli ji jeŋba shara. Kɛjɛ shishijee lɛ, minanemɛi lɛ bu mi akɛ mɔ ni leee nɔ ko nɔ ko kwraa kɛ mikɛ mihe wooo amɛyakayaka wiemɔi kɛ nɔkwɛmɔ nii amli lɛ. Yɛ sɛɛ mli lɛ, shihilɛ ni ekpɔtɔ ni ebɔle mihe lɛ je shishi akɛ eeena minɔ hewalɛ, ni eha miku mihiɛ mishwie nibii ni Yehowa nyɛɔ lɛ anɔ. Wɔ tsɔɔlɔi lɛ ateŋ mɔ kome tee nɔ ewo mi hewalɛ akɛ mikɛ lala afee mijamɔ, ni atsɔɔ mi bɔ ni mafee ni mihiɛ awa yɛ kpoku nɔ koni masusu akɛ minɔ kwɔ fe mɔ fɛɛ mɔ. Enɛɛmɛi fɛɛ haaa mana miishɛɛ. Shi yɛ naagbee lɛ, ehe bahia ni masaa mihe maha kaa krɛdɛɛ ko ni ji nibii ni aaka akwɛ akɛ ehi loo esa yɛ mihe lo lɛ. Misɔle miha Yehowa koni eha he ni esa akɛ matsɔ lɛ afee faŋŋ aha mi. Eyɛ mli akɛ mila jogbaŋŋ ni minu he akɛ mibɔ mɔdɛŋ moŋ, shi mifataaa mɛi ni ahala amɛ lɛ ahe. No hewɔ lɛ mibana mile nɔ hewɔ—atsɔ hiɛ atsɔɔ nɔ ni baajɛ mli aba lɛ yɛ teemɔŋ momo dani mije kaa lɛ shishi. Shi mina hetoo ni mli ka shi faŋŋ kɛha misɔlemɔ lɛ, ni mikpɛ miyiŋ akɛ mashi shwɛmɔ he lɛ ni matsɔɔ lalai moŋ yɛ shia.” Yɛ naagbee lɛ nɛkɛ nyɛmiyoo nɛɛ kɛ onukpa ko hi shi yɛ Kristofoi asafo lɛ mli, he ni amɛyi enyɔ lɛ fɛɛ sɔmɔɔ yɛ, yɛ anɔkwayeli mli ni amɛkɛhaa Maŋtsɛyeli lɛ he nibii lɛ shwereɔ.
10. Te omuɔ Yesu wiemɔ ni yɔɔ Yohane 3:19-21 lɛ naa ohaa tɛŋŋ?
10 Yesu kɛɛ: “Mɔ fɛɛ mɔ ni tsuɔ nifɔjianii lɛ nyɛɔ la lɛ, ni ebaaa la lɛ he, koni akaka enitsumɔi lɛ.” Shi yɛ gbɛ kroko nɔ lɛ, “mɔ ni feɔ anɔkwale nii lɛ baa la lɛ he, koni enitsumɔi lɛ aje kpo, ejaakɛ Nyɔŋmɔ mli atsuɔ amɛ yɛ.” (Yohane 3:19-21) Mɛɛ jɔɔmɔ ji enɛ akɛ oootsu nii ni ekɛ Yehowa suɔmɔnaa nii kɛ eyiŋtoo akpa gbee! Shi kɛ wɔɔfee nakai yɛ omanyeyeli mli lɛ, belɛ esa akɛ wɔŋmɛ gbɛ ni akɛ Nyɔŋmɔ Wiemɔ lɛ mli la lɛ aka wɔnitsumɔi lɛ yɛ be fɛɛ mli. Wɔdarako tsɔ ni ekpɛko sɛɛ tsɔ akɛ wɔɔtsake wɔshihilɛ gbɛ ni wɔkpɛlɛ ninefɔɔ akɛ wɔkɛ wɔhe awo Yehowa sɔɔmɔ ni sɛɛnamɔ yɔɔ he lɛ mli lɛ nɔ.
“Nitsumɔi Kpakpai” ni Atsuɔ Ŋmɛnɛ
11. Mɛni mɛi pii diɔ sɛɛ akɛ “nitsumɔi kpakpai,” ni mɛni hewɔ nitsumɔ ni tamɔ nɛkɛ baanyɛ ni ekɛ nijiaŋwujee aba lɛ?
11 Esa akɛ nitsumɔ ni sa ŋmɛnɛ lɛ atsɔɔ bɔ ni wɔbe nɛɛ he hiaa ha lɛ. Gbɔmɛi anɔkwafoi pii kpɛlɛɔ nɔ ni amɛkɛ amɛhe woɔ nitsumɔi ni yɛ be babaoo mli lɛ atsɔɔ akɛ eji “nitsumɔi kpakpai” ni afeɔ koni ehe aba sɛɛnamɔ aha adesai fɛɛ loo kɛha nɔ ko pɔtɛɛ lɛ mli. Ni kɛlɛ, kwɛ bɔ ni nijiaŋwujee baanyɛ aba nitsumɔ ni tamɔ nɛkɛ he aha! Yɛ Ŋleshi Ablotsiri lɛ, CAFOD (Katolek Shika Kɛha Maŋsɛɛ Yelikɛbuamɔ) ni buaa shika naa amɛkɛyeɔ amɛbuaa shikpɔji ni hɔmɔ yeɔ mɛi yɛ jɛmɛ lɛ anɔ bii lɛ bɔ amaniɛ yɛ etafaa koni aha gbɔmɛi ni hɔmɔ yeɔ amɛ waa lɛ aniyenii lɛ he, ni wolo lɛ kɛɛ: “Afii etɛ ni eho nɛ . . . ni abua shika ni shɛɔ Ŋleshi shika pounds akpekpei abɔ naa koni akɛye abua nakai gbɔmɛi lɛ. Ahere gbɔmɛi akpei abɔ yiwala. Agbɛnɛ oshara eba nakai gbɔmɛi ni be ko lɛ ahere amɛyiwala lɛ awala he ekoŋŋ . . . Mɛni hewɔ? Mɛni etɔtɔ?” Yɛ be mli ni eyaa nɔ yɛ sane lɛ mli lɛ, CAFOD Journal lɛ tsɔɔ mli akɛ amɛtsuuu naagba lɛ he nii kɛmɔɔɔ shi, ni akɛ “akɛ nibii ni he hiaa waa ni akɛaaha adesai ashihilɛ aya hiɛ lɛ moŋ tsu nii ni amɛkɛwo tawuu ni yaa nɔ [yɛ maŋ kome mli] lɛ mli wu.” Ŋwanejee ko bɛ he akɛ, onu wiemɔi ni tamɔ nɛkɛ ni kui ni tsuɔ nitsumɔi ni tamɔ nɛkɛ lɛ wieɔ lɛ he.
12. Mɛni ji hetoo pɛ ni yɔɔ kɛha naagbai ni ka je lɛ nɔ ŋmɛnɛ lɛ?
12 Hɔmɔ ji naagba ko ni esa akɛ atsu he nii mra. Ni kɛlɛ, namɛi ji mɛi ni yɔseɔ ŋmɛnɛ haomɔi ni ji hɔmɔ kɛ tawuu nɛɛ akɛ eji Yesu Kristo gbalɛ ni tsɔɔ ŋmɛnɛŋmɛnɛ nibii agbɛjianɔtoo nɛɛ naagbee lɛ mlibaa? (Mateo 24:3, 7) Namɛi eŋmala woji ni amɛkɛ nɛkɛ odaseyelii nɛɛ eto okpɔŋɔ nɔ taralɔi ejwɛ ni atsɔɔ bɔ ni amɛji lɛ mli yɛ Biblia mli wolo ni ji Kpojiemɔ, yitso 6 lɛ mli lɛ he lɛ? Yehowa Odasefoi etee nɔ amɛkɛ anɔkwayeli efee nakai yɛ wolo tɛtrɛɛ nɛɛ mli. Mɛni hewɔ? Ni amɛkɛtsɔɔ akɛ gbɔmɔ bɛ hewalɛ ko ni ekɛaana naanɔ tsabaa. Enɛ etsɔɔɔ akɛ Kristofoi efee shikpilikpii yɛ je lɛŋ naagbai lɛ ahe. Dabida. Amɛkɛ henumɔ naa enɛ ni amɛbaafee nɔ fɛɛ nɔ ni amɛbaanyɛ ni amɛkɛjie piŋmɔi nɛɛ kɛya. Shi kɛlɛ, amɛkɛ anɔkwa sane lɛ kpeɔ diɛŋtsɛ akɛ, kɛ Nyɔŋmɔ kɛ ehe wooo mli lɛ, je lɛŋ naagbai lɛ baŋ naagbee kɔkɔɔkɔ. Taakɛ ohiafoi ji lɛ, nɛkɛ naagbai nɛɛ baaya nɔ ahi shi, bei abɔ ni aŋmɛ Satan gbɛ akɛ eya nɔ ehi shi akɛ je nɛɛ nɔyelɔ lɛ.—Marko 14:7; Yohane 21:31.
Nitsumɔ ni Sɛɛnamɔ Yɔɔ He Fe Fɛɛ
13. Mɛni ji nitsumɔ ni he hiaa fe fɛɛ ŋmɛnɛ, ni namɛi tsuɔ enɛ?
13 Hiamɔ ni fe fɛɛ ni yɔɔ ŋmɛnɛ ji ni ashiɛ sanekpakpa lɛ akɛ etsɛŋ ni Yehowa Nyɔŋmɔ Maŋtsɛyeli lɛ baaba abaye je lɛŋ nɔyelii fɛɛ najiaŋ ni ekɛ heyeli loo hejɔlɛ ni gbɔmɛi ni sheɔ Nyɔŋmɔ gbeyei lɛ tsui shweɔ lɛ aba. (Daniel 2:44; Mateo 24:14) Yesu Kristo kɛ ŋwɛi Maŋtsɛyeli lɛ shiɛmɔ fee eyiŋtoo titri yɛ shihilɛ mli, eyɛ mli akɛ Palestina shikpɔŋ lɛ nɔ pɛ eshiɛ yɛ. Ŋmɛnɛ, shiɛmɔ nɛɛ eyashɛ jeŋ fɛɛ, tamɔ bɔ ni Yesu kɛɛ akɛ ebaabalɛ lɛ. (Yohane 14:12; Bɔfoi lɛ Asaji 1:8) Ni aaana gbɛfaŋnɔ, kɛ fioo ko po, yɛ Nyɔŋmɔ nitsumɔ nɛɛ mli lɛ ji hegbɛ ni anyɛŋ akɛ nɔ ko ato he. Hii kɛ yei, onukpai kɛ gbekɛbii fɛɛ, ni be ko lɛ amɛlako da akɛ amɛaatsɔmɔ sanekpakpa lɛ he shiɛlɔi lɛ nyiɛ sanekpakpa jajemɔ nitsumɔ nɛɛ ni Yehowa Odasefoi tsuɔ ŋmɛnɛ lɛ hiɛ. Taakɛ Noa kɛ eweku lɛ ji lɛ, amɛkɛ anɔkwayeli miitsu Nyɔŋmɔ nitsumɔ lɛ akɛ famɔ ni jɛ Lɛ eŋɔɔ, ni no hewɔ lɛ Lɛ ehewalɛ mli amɛtsuɔ enɛ yɛ, akɛ nɔ ni baatsɔ nibii agbɛjianɔtoo nɛɛ naagbee lɛ hiɛ—Filipibii 4:13; Hebribii 11:7.
14. Shiɛmɔ lɛ ji yiwalaheremɔ nitsumɔ, ni yɛ nakai beaŋ nɔŋŋ lɛ ebuɔ mɔ he yɛ mɛɛ gbɛ nɔ?
14 Odaseyeli nitsumɔ ni Yehowa Odasefoi tsuɔ yɛ naagbee gbii nɛɛ mli lɛ ji yiwalaheremɔ kɛha mɛi ni boɔ toi ni tsuɔ sanekpakpa ni amɛnuɔ lɛ he nii lɛ. (Romabii 10:11-15) Eji yibaamɔ hu kɛha mɛi ni shiɛɔ lɛ. Akɛni wɔyɔɔ he miishɛɛ diɛŋtsɛ akɛ wɔɔye wɔbua gbɔmɛi ni naagbai lɛ dara fe wɔ diɛŋtsɛ wɔnɔ lɛ hewɔ lɛ, enyɛŋ eba akɛ wɔbaasusu wɔ diɛŋtsɛ wɔnaagbai ni wɔyɔɔ lɛ ahe tsɔ. Wɔyɔseɔ akɛ nɛkɛ je ni ejeŋba he tɛi fɛɛ baa shi nɛɛ baasumɔ ni wɔhi shi yɛ egbɛi anɔ. No hewɔ lɛ Nyɔŋmɔ susumɔi ni wɔkɛaawo wɔ jwɛŋmɔi amli obɔ yɛ wɔshiɛmɔ be mli lɛ feɔ babaoo yɛ wɔhemɔkɛyeli wajemɔ mli; ni ehi kɛha wɔ diɛŋtsɛ. Taakɛ Odasefonyo ko wie he lɛ: “Kɛji akɛ mibɔɔɔ mɔdɛŋ akɛ matsake gbɔmɛi ni mikɛ amɛ kpeɔ lɛ, amɛbaanyɛ amɛtsake mi!’”—Okɛto 2 Petro 2:7-9 he.
Asafo lɛ ni Wɔkɛtsuɔ Nii
15. Mɛɛ gbɛnaa nii ka tookwɛlɔi bibii anɔ ŋmɛnɛ, ni te esa akɛ hii ni yɔɔ asafo lɛ mli lɛ anu he amɛha tɛŋŋ yɛ 1 Timoteo 3:1 hewɔ?
15 Kɛ mɛi heei ni yɔɔ wiemɔ lɛ he miishɛɛ ba asafo lɛ mli lɛ, amɛbaa Tookwɛlɔ Kpeteŋkpele, Yehowa Nyɔŋmɔ kɛ e-Tookwɛlɔ Kpakpa, Yesu Kristo kwɛmɔ shishi. (Lala 23:1; Yohane 10:11) Mɛi ni damɔɔ ŋwɛi Tookwɛlɔi nɛɛ anajiaŋ yɛ shikpɔŋ nɔ ji tooi lɛ akwɛlɔi anɔkwafoi bibii lɛ, hii ni ahala amɛ yɛ asafoi lɛ amli. (1 Petro 5:2, 3) Ni mɔ ko aaana nitsumɔ ni tamɔ nɛkɛ lɛ ji hegbɛ ni nɔ bɛ yɛ nɛkɛ naagbee gbii nɛɛ amli. Tookwɛlɔ lɛ nitsumɔ lɛ ji nɔ ni tsii diɛŋtsɛ, jeee hiɛnyiɛmɔ yɛ asafo lɛ mli yɛ nitsɔɔmɔ kɛ sanekpakpa lɛ shiɛmɔ mli lɛ pɛ fata enɛ he, shi moŋ tooi lɛ ahebuu kɛmiijɛ mɛi ni baaye amɛ awui yɛ mumɔŋ lɛ ahe, ni amɛtsɔmɔ abobaa hei amɛha amɛ yɛ jeŋ ni wɔyɔɔ mli ni emli kɔɔyɔɔ lɛ tswaa tamɔ ahum lɛ mli. Nitsumɔ ko bɛ ni hi fe enɛ ni hii ni yɔɔ asafo lɛ mli lɛ aaatao fe ni amɛnine aaashɛ enɛ nɔ ni amɛkɛye amɛbua ni amɛkwɛ Kristofoi asafo ni mli lɛɛɔ lɛ amlibii lɛ mumɔŋ hewalɛnamɔ kɛ hilɛ nɔ.—1 Timoteo 3:1; okɛto Yesaia 32:1, 2 he.
16. Mɛɛ gbɛi anɔ nɛkɛ Kristofoi tookwɛlɔi lɛ yeɔ buaa amɛhe amɛhe yɛ?
16 Shi kɛlɛ, esaaa akɛ wɔhiɛ kpaa nɔ akɛ gbɔmɛi ji tookwɛlɔi ni tamɔ nɛkɛ, ni amɛhiɛ sui kɛ gbɔjɔmɔi sɔrɔtoi taakɛ tooi ni eshwe lɛ ji lɛ nɔŋŋ. Ye be mli ni mɔ ko baabɔ mɔdɛŋ yɛ tookwɛmɔ nitsumɔ lɛ fa ko mli lɛ, mɔ kroko nikeenii lɛ he baaba sɛɛnamɔ aha asafo lɛ yɛ gbɛ kroko nɔ. Amɛ nitsumɔ akɛ onukpai ni ji Kristofoi lɛ yeɔ buaa amɛhe amɛhe koni amɛkɛwo asafo lɛ hewalɛ. (1 Korintobii 12:4, 5) Ekaba akɛ akaŋshii mumɔ ko aaaba amɛteŋ. Amɛ fɛɛ amɛtsuɔ nii yɛ ekomefeemɔ mli amɛkɛbuɔ asafo lɛ he ni amɛhaa Maŋtsɛyeli nitsumɔ lɛ yaa hiɛ, “amɛholeɔ niji ni he tse nɔ” yɛ sɔlemɔ mli amɛhaa Yehowa, ni amɛkɛtaoɔ ejɔɔmɔ kɛ gbɛtsɔɔmɔ yɛ amɛnifeemɔi kɛ yiŋkpɛi fɛɛ mli.—1 Timoteo 2:8.
17. (a) Mɛɛ gbɛnaa nii ka wɔnɔ? (b) Mɛni nibii esa akɛ wɔkwa kɛji akɛ wɔɔnyɛ wɔtsu gbɛnaa nii ni ka wɔnɔ lɛ ahe nii jogbaŋŋ lɛ?
17 Shiɛmɔ nitsumɔ lɛ etsɔ nɔ ni he hiaa babaoo fe be fɛɛ agbɛnɛ akɛni Satan maŋtsɛyeli lɛ naagbee bɛŋkɛɔ oyayaayai lɛ hewɔ. Akɛni wɔyɔɔ Yehowa Nyɔŋmɔ Wiemɔ lɛ mli anɔkwale lɛ hewɔ lɛ, wɔ akɛ e-Dasefoi lɛ yɛ gbɛnaa nii ko akɛ wɔgbɛ sanekpakpa lɛ wɔshwa yɛ hegbɛ fɛɛ hegbɛ ni wɔɔna mli. Nitsumɔ ni akɛwo wɔdɛŋ lɛ fa babaoo diɛŋtsɛ, ni wɔ fɛɛ wɔbaana nɔ ni fa kɛteke nɔ wɔtsu kɛyashi naagbee lɛ mli tɔɔ. Esaaa akɛ wɔŋmɛɔ gbɛ koni miishɛɛnamɔ sɛɛdii, jeŋba shara sɛɛdii loo wɔŋmɛ gbɛ koni heloo gbɛfaŋ nibii asɛɛdii agbala wɔjwɛŋmɔ. Esaaa akɛ wɔkɛ wɔhe woɔ yaka yiŋsusumɔi amli, ni wɔje wiemɔi ahe ŋwane, ejaakɛ sɛɛnamɔ baŋ enɛ he, ni ebaafite be. (2 Timoteo 2:14; Tito 1:10; 3:9) Beni kaselɔi lɛ bi Yesu akɛ, “Nuŋtsɔ, ani nɛkɛ be nɛɛ mli obaatee maŋtsɛyeli lɛ shi oma shi oha Israel lɛ?” lo lɛ, Yesu gbala amɛjwɛŋmɔ kɛtee nitsumɔ ni he hiaa ni ka shi lɛ nɔ, akɛ: “Nyɛaatsɔmɔ midasefoi yɛ Yerusalem kɛ Yudea kɛ Samaria fɛɛ, kɛyashi shikpɔŋ lɛ naagbee hei lɛ.” Nɛkɛ nitsumɔ nɛɛ mli kpaa kɛbashiɔ wɔgbii nɛɛ amli.—Bɔfoi lɛ Asaji 1:6-8.
18. Mɛni hewɔ Yehowa ni wɔkɛ lɛ aaatsu nii lɛ kɛ nyɔmɔwoo babaoo bahaa wɔ lɛ?
18 Yehowa ni wɔkɛ lɛ tsuɔ nii, shiɛmɔ ni wɔkɛ ejeŋ muu fɛɛ asafo lɛ shiɛɔ ŋmɛnɛ lɛ, kɛ miishɛɛ, tsui ni nyɔɔ mɔ mli kɛ yiŋtoo diɛŋtsɛ baa wɔshihilɛi amli. Eji hegbɛ ni mɔ fɛɛ mɔ ni sumɔɔ Yehowa lɛ ena ni ekɛaajie hetuu-kɛhamɔ kɛ anɔkwayeli kɛha lɛ lɛ kpo. Nitsumɔ nɛɛ ni atsuɔ lɛ yɛ gbɛi sɔrɔtoi anɔ lɛ baafee nɔ ni atsuŋ eko dɔŋŋ. Akɛni naanɔ wala gbɛkpamɔ ka wɔhiɛ nɔŋŋ hewɔ lɛ, eba akɛ wɔkɛ anɔkwayeli aaaya nɔ “ni wɔkɛ sɔɔmɔ krɔŋkrɔŋ aha Nyɔŋmɔ yɛ woo kɛ gbeyeishemɔ fɛɛ mli,” kɛha eyijiemɔ kɛ wɔ diɛŋtsɛ hu wɔyiwalaheremɔ.—Hebribii 12:28, New World Translation.
Mɛni ji Ohetoo
◻ Yesu na miishɛɛ kɛ tsui ni nyɔɔ mɔ mli kɛjɛ mɛɛ nitsumɔ mli?
◻ Namɛi teɔ shi woɔ Yehowa nitsumɔ lɛ ŋmɛnɛ, ni mɛni hewɔ?
◻ Kɛ akɛ je lɛŋ “nitsumɔi kpakpai” Iɛ to Nyɔŋmɔ Maŋtsɛyeli lɛ he sanekpakpa Iɛ shiɛmɔ he lɛ te anaa tɛŋŋ?
[Mfoniri ni yɔɔ baafa 18]
Yesu kɛ nitsumɔ wo kaselɔi lɛ adɛŋ akɛ amɛya ni amɛyashiɛ