Onukpai—Nyɛtsɔsea Mɛi Krokomɛi ni Amɛtsu Sɔ̃i Ahe Nii

HII ní amɛbaanyɛ amɛsɔmɔ yɛ nɔkwɛmɔ gbɛhei amli lɛ ahe miihia waa yɛ Yehowa Odasefoi asafoi amli yɛ jeŋ fɛɛ. Yiŋtoi titrii etɛ yɛ kɛha hiamɔ nɛɛ.

Klɛŋklɛŋ lɛ, Yehowa miiha eshiwoo akɛ ebaaha ‘mɔ fioo hu atsɔ maŋ ni wa’ lɛ miiba mli. (Yesaia 60:22) Kɛtsɔ emlihilɛ lɛ nɔ lɛ, kaselɔi heei ni miihe ashɛ akpekpe kome ebatsɔmɔ mɛi ni abaptisi amɛ ákɛ Yehowa Odasefoi yɛ afii etɛ ni eho lɛ mli. Hii ni abaanyɛ akɛ gbɛnaa nii awo amɛdɛŋ ahe miihia koni amɛye amɛbua mɛi heei ni abaptisi amɛ nɛɛ koni amɛdara kɛshɛ Kristofoi adalɛ mli.—Hebribii 6:1.

Nɔ ni ji enyɔ lɛ, gbɔlɛ loo gbɔmɔtsoŋ naagbai enyɛ mɛi komɛi ni kɛ afii nyɔŋmai abɔ esɔmɔ ákɛ onukpai lɛ anɔ ni eha nitsumɔ ní amɛtsuɔ yɛ asafo lɛ mli lɛ eba shi.

Nɔ ni ji etɛ lɛ, Kristofoi onukpai ni yɔɔ ekãa waa miisɔmɔ bianɛ ákɛ Hospital Liaison Committee lɛ mli bii, Kpokpaa Wuji Anɔ Tsumaa Ajinafoi Akui amli bii, loo Assembly Hall Committee kui lɛ amli bii. Yɛ shihilɛi komɛi amli lɛ, kɛ hoo lɛ ehe bahia ni amɛŋmɛ pɛpɛɛpɛ yɛ amɛgbɛnaa nii srɔtoi lɛ amli kɛtsɔ amɛgbɛnaa nii ni amɛhiɛ yɛ amɛ asafo lɛ mli lɛ eko ní amɛaaŋmɛɛ he lɛ nɔ.

Te aaafee tɛŋŋ atsu hiamɔ ni eba waa yɛ hii krokomɛi ni he esa ni ataoɔ lɛ ahe nii lɛ? Tsɔsemɔ ji hiamɔ ni eba nɛɛ naa tsabaa. Biblia lɛ woɔ Kristofoi nɔkwɛlɔi lɛ hewalɛ koni amɛtsɔse “gbɔmɛi anɔkwafoi . . ., mɛi ni yɔɔ hewalɛ ni amɛkɛaatsɔɔ mɛi krokomɛi hu” nii lɛ. (2 Timoteo 2:2) Taakɛ wiemɔi komekomei ashishitsɔɔmɔ wolo ko tsɔɔ lɛ, feemɔ wiemɔ ni ji “atsɔse” lɛ shishitsɔɔmɔ ji “ni atsɔɔ nii bɔni afee ni he asa.” Nyɛhaa wɔsusua bɔ ni onukpai baanyɛ afee atsɔse hii krokomɛi ni he esa lɛ he wɔkwɛa.

Nyɛkasea Yehowa Nɔkwɛmɔnɔ Lɛ

Eka shi faŋŋ akɛ Yesu Kristo ‘he esa’ yɛ enitsumɔ lɛ mli—ni enɛ bɛ naakpɛɛ! Yehowa Nyɔŋmɔ diɛŋtsɛ tsɔse lɛ. Mɛɛ nibii ha nɛkɛ tsɔsemɔ gbɛjianɔtoo nɛɛ fee nɔ ni mɔɔ shi jogbaŋŋ lɛ? Yesu tsĩ etɛ tã, taakɛ aŋma afɔ̃ shi yɛ Yohane 5:20 lɛ, akɛ: “Tsɛ lɛ [1] sumɔɔ bi lɛ, ni [2] etsɔɔ lɛ nibii fiaa ní lɛ diɛŋtsɛ efeɔ lɛ, ni eeetsɔɔ lɛ [3] nitsumɔi wuji ní fe enɛɛmɛi tete.” (Wɔma efã ko nɔ mi.) Nibii nɛɛ eko fɛɛ eko ni wɔɔpɛi mli lɛ baaha wɔnu nɔ ni yɔɔ tsɔsemɔ lɛ mli lɛ shishi.

Kadimɔ akɛ Yesu kɛɛ klɛŋklɛŋ akɛ: ‘Tsɛ lɛ sumɔɔ Bi lɛ.’ Kɛjɛ adebɔɔ shishijee tɔŋŋ lɛ, suɔmɔ ni yɔɔ miishɛɛ ko kã Yehowa kɛ e-Bi lɛ teŋ. Abɛi 8:30 haa wɔnuɔ nakai wekukpaa lɛ shishi: “No mli lɛ [Yesu] miyɛ emasɛi [Yehowa Nyɔŋmɔ] akɛ ŋaalɔ; ni mimii shɛɔ mihe daa, mishwɛɔ yɛ ehiɛ be fɛɛ be.” (Wɔma efã ko nɔ mi.) Yesu yiŋ efeee lɛ kɔshikɔshi akɛ Yehowa ‘náa ehe miishɛɛ.’ Ni Yesu kɛ miishɛɛ ni enáa beni etsuɔ nii yɛ e-Tsɛ lɛ masɛi eteee. Kwɛ bɔ ni ehi, kɛ́ wekukpaa kpakpa ni miishɛɛ yɔɔ mli kã Kristofoi onukpai kɛ mɛi ni amɛtsɔseɔ amɛ lɛ ateŋ!

Nɔ ni ji enyɔ ni Yesu tsĩ tã lɛ ji akɛ Tsɛ lɛ ‘etsɔɔ lɛ nibii fiaa ní lɛ diɛŋtsɛ efeɔ lɛ.’ Nɛkɛ wiemɔi nɛɛ maa nɔ ni awie yɛ Abɛi 8:30 lɛ nɔ mi, ni ji akɛ, Yesu ‘yɛ’ Yehowa ‘masɛi’ beni ebɔɔ je lɛ. (1 Mose 1:26) Onukpai baanyɛ anyiɛ nakai nɔkwɛmɔnɔ kpakpa lɛ sɛɛ kɛtsɔ asafoŋ sɔɔlɔi ni amɛkɛ amɛ aaafee ekome kɛtsu nii lɛ nɔ, ni amɛtsɔɔ amɛ bɔ ni amɛaafee ni amɛtsu amɛsɔ̃i lɛ ahe nii yɛ gbɛ ni ja nɔ. Shi kɛlɛ, jeee asafoŋ sɔɔlɔi heei pɛ ji mɛi ni ebaabi ni atsɔse amɛ fiofio. Ni nyɛmimɛi anɔkwafoi ni kɛ afii babaoo miishɛ nɔkwɛmɔ nitsumɔ lɛ he, shi ahalako amɛ lɛ, no hu? (1 Timoteo 3:1) Esa akɛ onukpai lɛ aha amɛle hei pɔtɛɛ ni ehe hiaa ni nɛkɛ hii nɛɛ aya amɛhiɛ yɛ mli.

Ákɛ nɔkwɛmɔnɔ lɛ, asafoŋ sɔɔlɔ ko baanyɛ afee mɔ ni anyɛɔ akɛ he fɔ̃ɔ enɔ, mɔ ni yeɔ ebe nɔ kɛ mɔ ni tsuɔ egbɛnaa nii ahe nii jogbaŋŋ. Ebaanyɛ efee tsɔɔlɔ kpakpa hu. Yɛ shihilɛi babaoo mli lɛ, ebaanyɛ efee mɔ ni miitsu nii jogbaŋŋ yɛ asafo lɛ mli. Shi kɛlɛ, ekolɛ eyɔseee akɛ efeɔ keketee yɛ bɔ ni ekɛ nanemɛi Kristofoi lɛ yeɔ haa lɛ mli. Ehe miihia ni onukpai lɛ ajie “nilee kpoofeemɔ” kpo. (Yakobo 3:13) Ani efeŋ nɔ ni mlihilɛ yɔɔ mli akɛ onukpa ko kɛ asafoŋ sɔɔlɔ lɛ baawie, ni etsɔɔ lɛ naagbai lɛ yɛ faŋŋ mli, ni ekɛ nɔkwɛmɔnii pɔtɛɛ komɛi aha lɛ, ni ekɛ ŋaawoi ni anyɛɔ atsuɔ he nii kɛha hiɛyaa aha? Kɛ́ onukpa lɛ ha ‘ŋoo hi eŋaawoo lɛ mli lɛ,’ eka shi faŋŋ akɛ ebaabo ewiemɔi lɛ atoi jogbaŋŋ. (Kolosebii 4:6) Eji anɔkwale akɛ, asafoŋ sɔɔlɔ lɛ baaha onukpa lɛ nitsumɔ lɛ afee nɔ ni yɔɔ miishɛɛ waa kɛtsɔ gbɛ ni eeegbele ni ebo ŋaawoo fɛɛ ni akɛhaa lɛ lɛ toi lɛ nɔ.—Lala 141:5.

Yɛ asafoi komɛi amli lɛ, onukpai lɛ kɛ tsɔsemɔ ni yaa nɔ, ni anyɛɔ atsuɔ he nii miiha asafoŋ sɔɔlɔi lɛ. Ákɛ nɔkwɛmɔnɔ lɛ, amɛŋɔɔ asafoŋ sɔɔlɔi ni he esa lɛ amɛfataa amɛhe kɛyasaraa mɛi ni he yeɔ loo mɛi ni egbɔlɔ. Kɛtsɔ nɛkɛ gbɛ nɔ lɛ, asafoŋ sɔɔlɔi náa niiashikpamɔ yɛ nyɛmimɛi asaramɔ nitsumɔ lɛ mli. Eji anɔkwale akɛ, nibii babaoo yɛ ni asafoŋ sɔɔlɔ ko baanyɛ afee koni ekɛha emumɔŋ shweremɔ lɛ aya hiɛ.—Kwɛmɔ akrabatsa ni yɔɔ shishigbɛ ni yitso ji “Nɔ ni Asafoŋ Sɔɔlɔi Baanyɛ Afee.”

Nɔ ni ji etɛ ni ha tsɔsemɔ ni Yehowa kɛha Yesu lɛ mɔɔ shi jogbaŋŋ lɛ ji akɛ, etsɔse lɛ koni eha ehi ejwɛŋmɔŋ akɛ ehiɛyaa lɛ baafee faŋŋ wɔsɛɛ ko. Yesu kɛɛ akɛ Tsɛ lɛ baatsɔɔ Bi lɛ “nitsumɔi wuji ní fe enɛɛmɛi tete.” (Wɔma efã ko nɔ mi.) Beni Yesu yɔɔ shikpɔŋ lɛ nɔ lɛ, niiashikpamɔ ni enine shɛ nɔ lɛ ye ebua lɛ ni enyɛ ená sui ni he baahia lɛ bɔni afee ni enyɛ etsu nitsumɔi ahe nii wɔsɛɛ. (Hebribii 4:15; 5:8, 9) Ákɛ nɔkwɛmɔnɔ lɛ, mɛɛ nitsumɔ ni tsii etsɛŋ Yesu nine baashɛ nɔ nɛkɛ—ni ji gbɔmɛi akpekpei akpei abɔ ni egboi bianɛ lɛ ashitee kɛ kojomɔ!—Yohane 5:21, 22.

Kɛ́ onukpai miitsɔse asafoŋ sɔɔlɔi ŋmɛnɛ lɛ, esa akɛ amɛha wɔsɛɛ hiamɔ nii ahi amɛjwɛŋmɔ mli. Yɛ be mli ni ebaafee tamɔ nɔ ni onukpai kɛ asafoŋ sɔɔlɔi bɔ ni sa yɛ kɛha amrɔ nɛɛ hiamɔ nii lɛ, ani amɛyi baafa bɔ ni sa nakai kɛji atse asafo hee? Ani amɛyi baafa bɔ ni sa kɛji atse asafoi babaoo? Yɛ afii etɛ ni eho lɛ mli lɛ, aná asafoi heei ni fa fe 6,000 yɛ jeŋ fɛɛ. Kwɛ bɔ ni onukpai kɛ asafoŋ sɔɔlɔi babaoo ahe bahia koni amɛkwɛ asafoi heei nɛɛ anɔ!

Onukpai, ani nyɛmiikase Yehowa nɔkwɛmɔnɔ lɛ kɛtsɔ wekukpaa ni hedɔɔ yɔɔ mli ni nyɛhaa ehiɔ nyɛ kɛ hii ni nyɛtsɔseɔ amɛ lɛ ateŋ lɛ nɔ? Ani nyɛmiitsɔɔ amɛ bɔ ni amɛaafee ni amɛtsu amɛnitsumɔ lɛ he nii? Ani nyɛhaa wɔsɛɛ hiamɔ nii hiɔ nyɛjwɛŋmɔ mli? Kɛ́ nyɛkase Yehowa nɔkwɛmɔnɔ lɛ yɛ bɔ ni etsɔse Yesu eha lɛ mli lɛ, ekɛ jɔɔmɔ kpelei baaba ebaha mɛi babaoo.

Nyɛkashashaoa Shi akɛ Nyɛaatuu Nitsumɔ Nyɛwo Mɛi Adɛŋ

Onukpai ni yɔɔ nyɛmɔ ni fɔɔ sɔ̃i babaoo ni mli tsii ahe nitsumɔ amɛ kome too lɛ baanyɛ ashashao shi akɛ amɛaatuu nitsumɔ nɔkwɛmɔ amɛwo mɛi krokomɛi adɛŋ. Ekolɛ, amɛka enɛ yɛ be ko ni eho lɛ mli shi amɛnaaa yibiiwoo kpakpa ko. No hewɔ lɛ, amɛbaakɔ su ni ji, ‘Kɛ́ oosumɔ ni atsu nitsumɔ ko he nii jogbaŋŋ lɛ, no lɛ esa akɛ bo diɛŋtsɛ otsu he nii.’ Shi ani nɛkɛ su nɛɛ kɛ Yehowa suɔmɔnaa nifeemɔ, taakɛ atsɔɔ mli yɛ Ŋmalɛi lɛ amli lɛ kpãa gbee, ákɛ hii ni bɛ niiashikpamɔ tsɔ lɛ nine ashɛ tsɔsemɔ nɔ yɛ mɛi ni yɔɔ niiashikpamɔ babaoo lɛ adɛŋ lɛ?—2 Timoteo 2:2.

Bɔfo Paulo hao beni enanemɛi gbɛfalɔi lɛ ateŋ mɔ kome, Yohane Marko, shi enitsumɔ lɛ yɛ Pamfilia ni eku esɛɛ kɛtee shia lɛ. (Bɔfoi lɛ Asaji 15:38, 39) Shi kɛlɛ, Paulo haaa nakai gbɛtsii nii lɛ aje enijiaŋ wui koni ekatsɔse mɛi krokomɛi. Ehala oblanyo kroko, Timoteo, ni etsɔse lɛ yɛ maŋsɛɛ sanekpakpa shiɛmɔ nitsumɔ lɛ mli.a (Bɔfoi lɛ Asaji 16:1-3) Maŋsɛɛ sanekpakpa shiɛlɔi lɛ kɛ shitee-kɛ-woo ni naa wa waa kpe yɛ Beroia aahu akɛ Paulo nyɛɛɛ ahi jɛmɛ dɔŋŋ. No hewɔ lɛ, eshi asafo hee lɛ nɔkwɛmɔ lɛ ewo Sila, ni ji nyɛminuu onukpa ko ni he esa kɛ Timoteo dɛŋ. (Bɔfoi lɛ Asaji 17:13-15) Ŋwanejee ko bɛ he akɛ Timoteo kase nibii babaoo kɛjɛ Sila ŋɔɔ. Sɛɛ mli lɛ, beni Timoteo he basa koni etsu gbɛnaa nii krokomɛi ahe nii lɛ, Paulo tsu lɛ kɛtee Tesalonika koni eyawo asafo lɛ hewalɛ yɛ jɛmɛ.—1 Tesalonikabii 3:1-3.

Naanyobɔɔ su yɛ wekukpaa ni kã Paulo kɛ Timoteo teŋ lɛ mli. No mli lɛ, ekomefeemɔ ni yɔɔ miishɛɛ kã amɛteŋ. Beni Paulo ŋmaa wolo eyaha Korinto asafo lɛ, ewie Timoteo, mɔ ni etoɔ gbɛjianɔ koni etsu kɛya jɛmɛ lɛ he akɛ “misuɔmɔ bi kɛ anɔkwafo yɛ Nuntsɔ lɛ mli.” Ekɛfata he akɛ: “[Timoteo] ebakai nyɛ migbɛ̀i ni yɔɔ Kristo mli lɛ.” (1 Korintobii 4:17, wɔma efã ko nɔ mi.) Timoteo kpɛlɛ tsɔsemɔ ni enine shɛ nɔ kɛjɛ Paulo dɛŋ lɛ nɔ, ni ebafee mɔ ni he esa ni ekɛaatsu enitsumɔi ahe nii. Nyɛmimɛi oblahii babaoo ebatsɔmɔ asafoŋ sɔɔlɔi ni he esa, onukpai, loo nɔkwɛlɔi gbɛfalɔi po ejaakɛ amɛná tsɔsemɔ ni amɛnine shɛ nɔ kɛjɛ hii onukpai ni susuɔ amɛhe, ni amɛná amɛhe miishɛɛ diɛŋtsɛ tamɔ Paulo fee yɛ Timoteo gbɛfaŋ lɛ dɛŋ lɛ he sɛɛ.

Onukpai, Nyɛtsɔsea Mɛi Krokomɛi!

Tɔmɔ ko bɛ he akɛ, gbalɛ ni yɔɔ Yesaia 60:22 miiba mli ŋmɛnɛ. Yehowa miiha ‘mɔ bibioo ko miitsɔ mɛi akpe.’ Bɔni afee ni nakai maŋ lɛ afee maŋ ni “wa” lɛ, esa akɛ ato he gbɛjianɔ jogbaŋŋ. Onukpai, mɛni hewɔ nyɛsusuuu gbɛ̀i ni nyɛaatsɔ nɔ nyɛkɛ tsɔsemɔ kroko afata he aha hii ni ejɔɔ amɛhe nɔ ni he saa koni amɛnine ashɛ nɔ lɛ? Nyɛkwɛa koni asafoŋ sɔɔlɔ fɛɛ asafoŋ sɔɔlɔ ale nɔ ni he hiaa ni efee bɔni afee ni enyɛ eya ehiɛ lɛ jogbaŋŋ. Ni nyɛ nyɛmimɛi hii ni abaptisi nyɛ, nyɛkɛ jwɛŋmɔ fɛɛ jwɛŋmɔ ni abaagbala kɛba nyɛnɔ lɛ atsua nii jogbaŋŋ. Nyɛkɛ hegbɛi ni nyɛaaná koni nyɛha nyɛnyɛmɔi, nilee, kɛ niiashikpamɔ aya hiɛ lɛ atsua nii jogbaŋŋ. Eka shi faŋŋ akɛ, Yehowa baajɔɔ nakai yelikɛbuamɔ ni suɔmɔ yɔɔ mli lɛ he gbɛjianɔtoo lɛ nɔ.—Yesaia 61:5.

[Shishigbɛ niŋmaa]

[Akrabatsa ni yɔɔ baafa 30

Nɔ ni Asafoŋ Sɔɔlɔi Baanyɛ Afee

Yɛ be mli ni onukpai baanyɛ amɛkɛ tsɔsemɔ aha asafoŋ sɔɔlɔi lɛ, nibii babaoo yɛ ni asafoŋ sɔɔlɔi lɛ baanyɛ afee koni amɛkɛha amɛ diɛŋtsɛ amɛmumɔŋ shweremɔ lɛ aya hiɛ.

—Esa akɛ asafoŋ sɔɔlɔi afee mɛi ni kɛ ekãa tsuɔ amɛnitsumɔi ahe nii ni anyɛɔ akɛ he fɔ̃ɔ amɛnɔ. Esa akɛ amɛná nikasemɔ sui kpakpa hu. Yɛ gbɛ ko nɔ lɛ, shweremɔ damɔ nikasemɔ kɛ nibii ni akase lɛ kɛ nitsumɔ nɔ.

—Kɛ́ asafoŋ sɔɔlɔ ko miisaa ehe koni eha wiemɔ yɛ Kristofoi akpee ko shishi lɛ, esaaa akɛ eshashaoɔ shi akɛ ebaabi onukpa ko ni he esa lɛ ŋaawoi yɛ bɔ ni ebaawie sane lɛ he eha lɛ he.

—Asafoŋ sɔɔlɔ lɛ baanyɛ abi onukpa ko hu koni ekwɛ bɔ ni ehaa Biblia mli wiemɔ ko ni ekɛ ŋaawoo kɛha hiɛyaa aha lɛ.

Esa akɛ asafoŋ sɔɔlɔi atao ŋaawoo kɛjɛ onukpai lɛ adɛŋ ni amɛkpɛlɛ nɔ ni amɛkɛtsu nii. Kɛtsɔ nɛkɛ gbɛ nɔ lɛ, ‘mɛi fɛɛ baana’ amɛshweremɔ lɛ “faŋŋ.”—1 Timoteo 4:15.