“La Lɛ Eba Je Lɛ Mli”
“Shi kojomɔ lɛ nɛ, akɛ la lɛ ebaje lɛ mli, ni gbɔmɛi sumɔɔ duŋ lɛ moŋ fe la lɛ.”—YOHANE 3:19.
1. Mɛni hewɔ esa akɛ mɔ fɛɛ mɔ asusu Nyɔŋmɔ kojomɔ he lɛ?
GBƆMƐI ni yɔɔ ŋmɛnɛ lɛ ateŋ mɛi babaoo susuuu Nyɔŋmɔ kojomɔ lɛ he tsɔ ko. Efeɔ mɛi komɛi po akɛ kɛji amɛyaa sɔlemɔ daa ni amɛyeee amɛnanemɛi awui ko lɛ, no baaha Nyɔŋmɔ abu amɛ bem yɛ kojomɔ mli. Kɛha mɛi babaoo lɛ, Kristendom tsɔɔmɔi ni kɔɔ hɛl la kɛ hetsuumɔ he he lɛ egbe ŋwɛi kojomɔ lɛ he guɔ kwraa eha amɛ. Shi bɔ ni mɛi babaoo hiɔ shi ni jeee amɛhe sane ji nɔ ko lɛ kɛ Kristendom amalei lɛ nyɛŋ atsake anɔkwa sane ni tsɔɔ akɛ Nyɔŋmɔ baakojo adesa fɛɛ adesa yɛ naagbee lɛ kɔkɔɔkɔ. (Romabii 14:12; 2 Timoteo 4:1; Kpojiemɔ 20:13) Ni nibii babaoo baadamɔ nɛkɛ kojomɔ nɛɛ nɔ. Mɛi ni akojoɔ amɛ akɛ amɛyeɔ bem lɛ anine baashɛ Nyɔŋmɔ nikeenii ni ji naanɔ wala lɛ nɔ, ni mɛi ni akojoɔ amɛ akɛ amɛyeɔ fɔ lɛ anine baashɛ esha he nyɔmɔwoo muu lɛ fɛɛ nɔ: gbele—Romabii 6:23.
2. Mɛni ji Nyɔŋmɔ kojomɔ lɛ nɔdaamɔ nɔ?
2 No hewɔ lɛ, anɔkwa Kristofoi susuɔ Nyɔŋmɔ kojomɔ lɛ he, ni amɛbɔɔ mɔdɛŋ waa ni amɛsa ehiɛ. Mɛɛ gbɛ nɔ amɛaatsɔ amɛfee enɛ? Yesu tsɔɔ gbɛ pɔtɛɛ lɛ yɛ Yohane 3:19. Ekɛɛ: “Shi kojomɔ lɛ nɛ, akɛ la lɛ eba je lɛ mli, ni gbɔmɛi sumɔɔ duŋ lɛ moŋ fe la lɛ, ejaakɛ amɛnitsumɔi lɛ efɔji ni.” Hɛɛ, Nyɔŋmɔ kojomɔ lɛ baadamɔ nɔ ni wɔsumɔɔ lɛ nɔ, kɛji wɔsumɔɔ la lɛ moŋ fe duŋ lɛ.
“Nyɔŋmɔ lɛ, La Ji Lɛ”
3. Mɛni ji duŋ lɛ, ni mɛni ji la lɛ?
3 Yɛ mumɔŋ shishinumɔ naa lɛ, duŋ kɔɔ nilee ni abɛ kɛ shihilɛ ni hiɛnɔkamɔ bɛ mli ni yɔɔ Satan maŋtsɛyeli he lɛ he—eyɛ mli akɛ yɛ be babaoo mli lɛ Satan kwaa efeɔ ehe “la bɔfo.” (2 Korintobii 4:4; 11:14; Efesobii 6:12) Shi yɛ gbɛ kroko nɔ lɛ, la kɔɔ sane shishinumɔ kɛ nilee ni jɛɔ Yehowa Nyɔŋmɔ ŋɔɔ baa lɛ he. Paulo wie la lɛ he beni eŋma nɛkɛ lɛ: “Ejaakɛ Nyɔŋmɔ ni kɛɛ akɛ: ‘La ajɛ duŋ lɛ mli akpɛ lɛ,’ lɛ nɔŋŋ ekpɛ yɛ wɔtsuii amli hu, koni Nyɔŋmɔ anunyam he nilee lɛ akpɛ yɛ Yesu Kristo hiɛ.” (2 Korintobii 4:6) Anaa mumɔŋ la yɛ Yehowa Nyɔŋmɔ he babaoo yɛ faŋŋ mli aahu akɛ bɔfo Yohane ŋma akɛ: “Nyɔŋmɔ lɛ, la ji lɛ.”—1 Yohane 1:5; Kpojiemɔ 22:5.
4. (a) Mɛɛ gbɛ nɔ Yehowa eha ana la lɛ yɛ? (b) Mɛɛ gbɛ nɔ wɔɔtsɔ wɔjie la lɛ he suɔmɔ kpo yɛ?
4 Yehowa eha ana la lɛ kɛtsɔ ewiemɔ, ni ŋmɛnɛ nine enyɛ eshɛ nɔ akɛ wolo ni aŋma ni ji Biblia loo Ŋmalɛ Krɔŋkrɔŋ lɛ nɔ. (Lala 119:105; 2 Petro 1:19) No hewɔ lɛ, lalatsɛ lɛ miitsɔɔ bɔ ni esumɔɔ la lɛ waa diɛŋtsɛ beni eŋma nɛkɛ lɛ: “Misumɔɔ omla lɛ akɛ nɔ ko! Jenamɔ fɛɛ lɛ no he mijwɛŋɔ. Misusuma yeɔ odasei lɛ anɔ, ni misumɔɔ amɛ naakpa.” (Lala 119:97, 167) Ani osumɔɔ la lɛ babaoo taakɛ anaa faŋŋ akɛ lalatsɛ lɛ fee lɛ? Ani okaneɔ Nyɔŋmɔ Wiemɔ lɛ daa, ni ojwɛŋɔ nɔ, ni obɔɔ mɔdɛŋ waa ni okɛ nɔ ni ekɛɔ lɛ atsu nii? (Lala 1:1-3) Kɛji nakai lɛ, no lɛ ootao ni onine ashɛ bembuu kojomɔ nɔ kɛjɛ Yehowa dɛŋ.
“Je Lɛŋ La Ji Mi”
5. Ŋwɛi la lɛ gbalaa jwɛŋmɔ kɛyaa namɔ nɔ?
5 La ni haa wala ni jɛɔ Yehowa ŋɔɔ lɛ gbalaa jwɛŋmɔ kɛyaa mɔ ni Yesu Kristo ji nɔ. Wɔkaneɔ yɛ Yohane Sanekpakpa lɛ hiɛkpamɔ wiemɔi lɛ amli akɛ: “[Yesu] mli wala yɔɔ, ni wala lɛ ji gbɔmɛi ala lɛ; ni la lɛ tsoɔ yɛ duŋ lɛ mli, ni duŋ lɛ enaaa naa.” (Yohane 1:4, 5) Lɛlɛŋ, Yesu kɛ la lɛ yɛ wekukpaa ko ni bɛŋkɛ kpaakpa mli akɛ atsɛɔ lɛ “anɔkwa la lɛ ni tɛjeɔ mɔ fɛɛ mɔ nɔ lɛ.” (Yohane 1:9) Yesu diɛŋtsɛ kɛɛ: “Gbii abɔ ni miyɔɔ je lɛ mli nɛɛ, je lɛŋ la ji mi.”—Yohane 9:5.
6. Mɛni esa akɛ mɔ ko afee koni enine ashɛ kojomɔ kpakpa ni kɛ mɔ yaa naanɔ wala mli lɛ nɔ?
6 No hewɔ lɛ, mɛi ni sumɔɔ la lɛ sumɔɔ Yesu ni amɛyɛ hemɔkɛyeli yɛ emli. Mɔ ko nyɛŋ ana bembuu yɛ ekojomɔ mli ni Yesu he bɛ mli. Hɛɛ, ja wɔkwɛ lɛ akɛ gbɛ ni Nyɔŋmɔ ehala kɛha wɔyiwalaheremɔ dani wɔnine baashɛ kojomɔ kpakpa nɔ. Yesu kɛɛ: “Mɔ ni heɔ Bi lɛ nɔ yeɔ lɛ, eyɛ naanɔ wala; shi mɔ ni booo Bi lɛ toi lɛ, enaŋ wala, shi moŋ Nyɔŋmɔ mlifu hiɔ enɔ.” (Yohane 3:36) Shi, mɛni hemɔkɛyeli ni aaana yɛ Yesu mli lɛ tsɔɔ?
7. Hemɔkɛyeli ni aaana yɛ Yesu mli lɛ tsɔɔ akɛ ayɛ hemɔkɛyeli yɛ namɔ hu mli?
7 Klɛŋklɛŋ lɛ, Yesu diɛŋtsɛ kɛɛ: “Mɔ ni heɔ minɔ eyeɔ lɛ, jeee mi minɔ eheɔ eyeɔ lɛ, shi moŋ mɔ ni tsu mi lɛ; ni mɔ ni naa mi lɛ naa mɔ ni tsu mi lɛ. Mi lɛ miba je lɛ mli akɛ la, koni mɔ fɛɛ mɔ ni heɔ minɔ yeɔ lɛ akahi duŋ lɛ mli.” (Yohane 12:44-46) Esa akɛ mɛi ni sumɔɔ Yesu ni amɛnaa hemɔkɛyeli yɛ emli lɛ ana suɔmɔ ni mli kwɔ amɛha Nyɔŋmɔ kɛ Yesu Tsɛ, Yehowa, ni amɛna hemɔkɛyeli hu yɛ emli. (Mateo 22:37; Yohane 20:17) Mɔ fɛɛ mɔ ni kɛ Yesu gbɛi tsuɔ nii yɛ ejamɔ mli shi ekɛ woo ni da fe fɛɛ lɛ haaa Yehowa lɛ ejieee anɔkwa suɔmɔ ni eyɔɔ kɛha la lɛ kpo.—Lala 22:28; Romabii 14:7, 8; Filipibii 2:10, 11.
Nyɔŋmɔ “Najiaŋdamɔlɔ Nukpa” Lɛ
8. Mɛɛ gbɛ nɔ ŋwɛi la lɛ gbala jwɛŋmɔ kɛtee Yesu nɔ dani afɔ lɛ akɛ adesa po?
8 Hemɔkɛyeli ni anaa yɛ Yesu mli lɛ hu tsɔɔ kpɛlɛmɔ ni akpɛlɛɔ egbɛhe yɛ Yehowa yiŋtoi amli lɛ nɔ kwraa. Ama bɔ ni nɛkɛ gbɛhe nɛɛ he hiaa ha lɛ nɔ mi beni ŋwɛibɔfo lɛ kɛɛ Yohane akɛ: “Yesu odase lɛ ji gbalɛ mumɔ lɛ.” (Kpojiemɔ 19:10; Bɔfoi lɛ Asaji 10:43; 2 Korintobii 1:20) Kɛjɛ klɛŋklɛŋ gbalɛ ni akɛha yɛ Eden lɛ nɔ kɛbaa fɛɛ lɛ, gbalɛi fɛɛ ni ajɛ Nyɔŋmɔ mumɔ mli akɛha kɛjɛ ŋwɛi lɛ kɔɔ Yesu kɛ egbɛhe yɛ Nyɔŋmɔ yiŋtoi ahe nitsumɔ mli lɛ he. Nakai nɔŋŋ hu, Paulo kɛɛ Galata Kristofoi lɛ akɛ Mla kpaŋmɔ lɛ ji “tsɔselɔ kɛmiiya Kristo ŋɔɔ.” (Galatabii 3:24) Ato blema Mla kpaŋmɔ lɛ he gbɛjianɔ koni esaa maŋ lɛ kɛha Yesu baa akɛ Mesia lɛ. No hewɔ lɛ, dani aaafɔ lɛ akɛ adesa po lɛ, no mli lɛ la ni jɛɔ Yehowa ŋɔɔ lɛ egbala jwɛŋmɔ kɛtee Yesu nɔ momo.
9. Mɛni fata suɔmɔ ni aaana aha la lɛ he kɛjɛ afi 33 Ŋ.B. kɛbaa?
9 Yɛ afi 29 Ŋ.B. lɛ, Yesu kɛ ehe ha kɛha baptisimɔ ni akɛ mumɔ krɔŋkrɔŋ fɔ lɛ mu, ni etsɔ no nɔ ebatsɔ Mesia ni awo shi yɛ ehe lɛ. Egbo yɛ afi 33 Ŋ.B. akɛ gbɔmɔ ni eye emuu, ni atee lɛ shi kɛjɛ gbohii ateŋ, ekwɔ kɛtee ŋwɛi, ni ekɛ ewala lɛ jarawalɛ lɛ yaha yɛ jɛmɛ yɛ wɔhe eshai lɛ ahewɔ. (Hebribii 9:11-14, 24) Nɛkɛ nibii ni tsara nɔ kɛba nɛɛ kadi tsakemɔ be krɛdɛɛ ko yɛ bɔ ni Nyɔŋmɔ kɛ adesai yeɔ haa lɛ mli. Agbɛnɛ Yesu ebatsɔ “wala Lumɔ,” ‘yiwalaheremɔ Tatsɛnukpa lɛ,’ “hemɔkɛyeli Shishijelɔ kɛ Naagbeelɔ” lɛ. (Bɔfoi lɛ Asaji 3:15; Hebribii 2:10; 12:2; Romabii 3:23, 24) Kɛjɛ afi 33 Ŋ.B. kɛbaa lɛ, mɛi ni sumɔɔ la lɛ eyoo ni amɛkpɛlɛ nɔ akɛ, yɛ Yesu sɛɛ lɛ, “yiwalaheremɔ bɛ mɔ ko mɔ ko mli; ni asaŋ gbɛi kroko hu bɛ ŋwɛi shishi ni aŋɔha gbɔmɛi ni sa akɛ atsɔ nɔ ahere wɔyiwala.”—Bɔfoi lɛ Asaji 4:12.
10. Mɛni hewɔ ehe hiaa ni abo Yesu wiemɔi atoi ni aye nɔ lɛ?
10 Hemɔkɛyeli ni wɔɔna yɛ Yesu mli lɛ hu tsɔɔ akɛ wɔkpɛlɛɔ enɔ akɛ “Wiemɔ lɛ,” kɛ “Naakpɛɛ Ŋaawolɔ” lɛ. (Yohane 1:1; Yesaia 9:6) Nɔ ni Yesu wieɔ lɛ jieɔ ŋwɛi anɔkwale lɛ kpo yɛ bei fɛɛ mli. (Yohane 8:28; Kpojiemɔ 1:1, 2) Toiboo ni wɔɔfee wɔha lɛ lɛ ji wala kɛ gbele sane. Yesu kɛɛ Yudafoi ni hi shi yɛ egbii lɛ amli lɛ akɛ: “Mɔ ni nuɔ miwiemɔi ni eheɔ mɔ ni tsu mi lɛ eyeɔ lɛ, eyɛ naanɔ wala, ni ebaŋ kojomɔ mli, shi moŋ efoŋ yɛ gbele mli kɛtee wala mli.” (Yohane 5:24) Yɛ Ŋ.B. klɛŋklɛŋ afii oha lɛ mli lɛ, akpɔ̃ mɛi ni tsu Yesu wiemɔi lɛ ahe nii lɛ kɛjɛ Satan je lɛŋ duŋ lɛ mli, ni kɛ wɔɔkɛɛ lɛ akɛ amɛ ba wala mli. Abu amɛ jalɔi kɛ hiɛnɔkamɔ akɛ amɛaafata ehe akɛ gboshiniyelɔi yɛ eŋwɛi Maŋtsɛyeli lɛ mli. (Efesobii 1:1; 2:1, 4-7) Ŋmɛnɛ, Yesu wiemɔi lɛ atoiboo gbeleɔ gbɛ kɛhaa mɛi babaoo akɛ aaatsɛ amɛ jalɔi kɛ hiɛnɔkamɔ akɛ amɛaana yiwalaheremɔ yɛ Harmagedon ni amɛshɛ adesai awala emuuyeli mli yɛ jeŋ hee lɛ mli.—Kpojiemɔ 21:1-4; okɛto Yakobo 2:21, 25 he.
“Nibii Fɛɛ Yitso”
11. Mɛɛ hegbɛ ni nɔ kwɔ waa akɛha Yesu yɛ afi 33 Ŋ.B.?
11 Yɛ eshitee lɛ sɛɛ lɛ, Yesu jie la lɛ fa kroko kpo etsɔɔ esɛɛnyiɛlɔi lɛ. Ekɛɛ: “Aŋɔ hegbɛ fɛɛ aha mi yɛ ŋwɛi kɛ shikpɔŋ nɔ.” (Mateo 28:18) No hewɔ lɛ atsɔ nɛkɛ gbɛ nɔ awo Yesu nɔ kɛtee gbɛhe ni nɔ kwɔ fe fɛɛ mli yɛ Yehowa jeŋ muu fɛɛ gbɛjianɔtoo lɛ mli. Paulo tsɔɔ enɛ mli babaoo beni ekɛɛ nɛkɛ lɛ: “[Nyɔŋmɔ] tee [Yesu] shi kɛjɛ gbohii ateŋ, ni ekɛ lɛ ta eninejurɔ nɔ yɛ ŋwɛiniiaŋ yɛ onukpayeli kɛ hegbɛ kɛ hewalɛ kɛ nɔyeli fɛɛ kɛ gbɛi fɛɛ gbɛi ni awo, jeee benɛbe nɛɛ mli kɛkɛ, shi be ni baaba lɛ mli hu lɛ anɔ, ni eŋɔ nibii fiaa eto enajiashi, ni eŋɔ lɛ efee nibii fɛɛ yitso eha asafo lɛ ni ji egbɔmɔtso lɛ.” (Efesobii 1:20-23; Filipibii 2:9-11) Kɛjɛ afi 33 Ŋ.B. kɛbaa lɛ, nɔ ni fata suɔmɔ ni ayɔɔ kɛha la lɛ he ji kpɛlɛmɔ ni aaakpɛlɛ Yesu gbɛhe ni nɔ kwɔ nɛɛ nɔ.
12. Mɛni Kristofoi ni afɔ amɛ mu lɛ kɛ miishɛɛ kpɛlɛ nɔ kɛjɛ shishijee mli tɔŋŋ, ni amɛtsɔɔ enɛ yɛ mɛɛ gbɛ pɔtɛɛ nɔ?
12 Yɛ naagbee lɛ, adesai fɛɛ baakpɛlɛ hegbɛ ni nɔ kwɔ ni Yesu yɔɔ nɛɛ nɔ. (Mateo 24:30; Kpojiemɔ 1:7) Shi kɛlɛ, mɛi ni sumɔɔ la lɛ kɛ miishɛɛ eyoo la lɛ kɛjɛ shishijee tɔŋŋ, Kristofoi asafo lɛ mlibii ni afɔ amɛ mu lɛ kpɛlɛɔ Yesu nɔ akɛ “lɛ nɔŋŋ ji gbɔmɔtso lɛ ni ji asafo lɛ yitso.” (Kolosebii 1:18; Efesobii 5:23) Kɛ amɛbatsɔmɔ nakai gbɔmɔtso lɛ fa lɛ, ‘ajieɔ amɛ kɛjɛɔ duŋ lɛ hewalɛ lɛ mli, ni akɛ amɛ batoɔ Nyɔŋmɔ suɔmɔ Bi lɛ maŋtsɛyeli lɛ mli.’ (Kolosebii 1:13) Kɛjɛ no nɔ kɛyaa lɛ, amɛkɛ ekaa nyiɛɔ Yesu hiɛnyiɛmɔ sɛɛ yɛ amɛshihilɛ mli nibii fɛɛ mli, ni yɛ wɔbe nɛɛ mli hu lɛ, amɛtsɔɔ “tooi krokomɛi” lɛ hu koni amɛfee nakai nɔŋŋ. (Yohane 10:16) Yesu yitsoyeli lɛ nɔkpɛlɛmɔ ji taomɔ nii titri kɛha kojomɔ kpakpa namɔ.
13. Mɛɛ be Yesu bɔi Maŋtsɛyeli hegbɛ lɛ kɛ nitsumɔ, ni mɛni enyiɛ sɛɛ eba shikpɔŋ nɔ yɛ biɛ?
13 Beni ekwɔ kɛtee ŋwɛi yɛ afi 33 Ŋ.B. lɛ, Yesu kɛ ehegbɛ nɛɛ tsuuu nii kɛmɔɔɔ shi amrɔ nɔŋŋ. Eyɛ mli akɛ lɛ ji Kristofoi asafo lɛ Yitso moŋ, shi emɛ kɛyashi be ni sa ni ekɛ hegbɛ lɛ aaatsu nii kwraa kɛmɔ shi yɛ adesai fɛɛ anɔ. (Lala 110:1; Bɔfoi lɛ Asaji 2:33-35) Nakai be lɛ ba yɛ 1914, beni ato Yesu akɛ Nyɔŋmɔ Maŋtsɛyeli lɛ nɔ Maŋtsɛ ni je nɛɛ “naagbee gbii” lɛ je shishi lɛ. (2 Timoteo 3:1) Kɛjɛ 1919 kɛbaa nɛɛ, mɛi ni afɔ amɛ mu lɛ ateŋ shwɛɛnii lɛ anaabuamɔ etee nɔ kɛmiishɛ enaagbee he. Kɛjɛ 1935 titri kɛbaa lɛ, Yesu miigbala adesai amli akɛ “gwantɛŋi,” ni amɛnine baashɛ “maŋtsɛyeli ni asaa ato [amɛ]” lɛ nɔ lɛ, kɛ “abotiai,” ni “amɛaatee naanɔ hejaramɔ mli” lɛ teŋ.—Mateo 25:31-34, 41, 46.
14. Mɛɛ gbɛ nɔ asafo babaoo lɛ ejie suɔmɔ kpo yɛ la lɛ he yɛ, ni mɛni baajɛ mli aba aha amɛ?
14 Miishɛɛ sane ji akɛ, gwantɛŋi lɛ etee nɔ amɛyi efa babaoo yɛ nɛkɛ naagbee gbii nɛɛ amli. Amɛteŋ asafo babaoo ni amɛyifalɛ shɛɔ akpekpei abɔ “ni jɛ jeŋmaŋ fɛɛ jeŋmaŋ kɛ akutsei kɛ maji kɛ maji anɔ wiemɔi amli” epue yɛ shikpɔŋ lɛ nɔ. Nɛkɛ gbɔmɛi ni tamɔ gwantɛŋi nɛɛ sumɔɔ la lɛ, taakɛ amɛnanemɛi, mɛi ni afɔ amɛ mu lɛ hu feɔ lɛ. “Amɛfɔ amɛtadei lɛ ahe, ni amɛha eyɛ futaa yɛ Toobi lɛ la lɛ mli,” ni amɛbolɔɔ kɛ gbee ni wa amɛkɛɔ akɛ: “Yiwalaheremɔ lɛ ji wɔnyɔŋmɔ ni ta maŋtsɛsɛi lɛ nɔ lɛ kɛ Toobi lɛ nɔ!” Yɛ enɛ hewɔ lɛ, asafo babaoo lɛ baana kojomɔ kpakpa akɛ kuu kome. Emlibii lɛ “jɛ amanehulu kpeteŋkpele lɛ mli,” ni amɛna yibaamɔ kɛjɛ mɛi ni sumɔɔ duŋ lɛ ahiɛkpatamɔ yɛ Harmagedon lɛ mli.—Kpojiemɔ 7:9, 10, 14.
“La Bii”
15. Mɛɛ gbɛ nɔ wɔnifeemɔi tsɔɔ bɔ ni wɔbaa wɔhe shi wɔhaa Maŋtsɛ, Yesu Kristo yɛ?
15 Shi kɛlɛ, mɛɛ gbɛ pɔtɛɛ nɔ mɛi ni sumɔɔ la lɛ, kɛji amɛji mɛi ni afɔ amɛ mu loo tooi krokomɛi lɛ, baa amɛhe shi amɛhaa Yesu akɛ mɔ ni Nyɔŋmɔ kɛ lɛ eta sɛi nɔ akɛ Maŋtsɛ kɛ mɔ ni miitsu nii akɛ Kojolɔ yɛ? Gbɛ kome ji mɔdɛŋ ni amɛbɔɔ akɛ amɛaahi shi akɛ gbɔmɛi ni Yesu kpɛlɛɔ amɛnɔ lɛ. Beni Yesu yɔɔ shikpɔŋ nɔ lɛ, ejie hiɛsɔɔ kpo yɛ sui tamɔ anɔkwayeli, tsui muu fɛɛ, kɛ ekaa ni ayɔɔ kɛha anɔkwale lɛ he, ni efee nakai sui lɛ ahe mfoniri lɛ diɛŋtsɛ. (Marko 12:28-34, 41-44; Luka 10:17, 21) Kɛji wɔmiitao ni wɔna kojomɔ kpakpa lɛ, no lɛ esa akɛ wɔna sui ni tamɔ nɛkɛ.
16. Mɛni hewɔ ni ehe hiaa ni wɔjie duŋ mli nitsumɔ lɛ fɛɛ wɔshɛrɛ wɔshwie lɛ?
16 Enɛ ji anɔkwale, titri lɛ akɛni Satan je lɛ mli duŋ lɛ mli miiti waa yɛ be mli ni naagbee lɛ bɛŋkɛɔ lɛ hewɔ. (Kpojiemɔ 16:10) No hewɔ lɛ wiemɔi ni Paulo ŋma eyaha Romabii lɛ sa jogbaŋŋ diɛŋtsɛ: “Nyɔɔŋ lɛ eho eta, ni jetsɛremɔ ebɛŋkɛ; no hewɔ lɛ nyɛhaa wɔjiea duŋ mli nitsumɔi lɛ wɔshwiea, ni wɔwo la tawuu nii lɛ. Nyɛhaa wɔbaa wɔjeŋ fɛfɛo bɔ ni sa shwane, jeee yɛ yakayaka shwɛmɔ kɛ daatɔɔ mli, jeee ajwamaŋbɔɔ kɛ nyenyeŋtswibɔɔ mli, jeee bei kɛ awuŋayeli mli.” (Romabii 13:12, 13) Eyɛ mli akɛ naanɔ wala ji nikeenii ni jɛ Nyɔŋmɔ ŋɔɔ moŋ, shi wɔ nifeemɔi yeɔ bɔ ni wɔhemɔkɛyeli lɛ ji anɔkwale nɔ kɛ bɔ ni wɔyɔɔ suɔmɔ wɔhaa la lɛ he odase. (Yakobo 2:26) No hewɔ lɛ, kojomɔ ni wɔnine baashɛ nɔ lɛ baadamɔ bɔ ni wɔnyɛɔ wɔtsuɔ nitsumɔi kpakpai ni wɔtsiɔ wɔhe kwraa kɛjɛɔ nitsumɔi fɔji ahe lɛ nɔ babaoo.
17. Mɛni ji wiemɔ “nyɛwoa Nuŋtsɔ Yesu Kristo” lɛ shishinumɔ?
17 Yɛ be mli ni ekɛ eŋaawoo lɛ eha yɛ Romabii 13:12, 13 sɛɛ lɛ, bɔfo Paulo kɛɛ nɛkɛ ni ekɛmu naa akɛ: “Shi moŋ nyɛwoa Nuŋtsɔ Yesu Kristo, ni nyɛkahaa heloo lɛ nɔ jwɛŋmɔ lɛ miitsɔ heloo lɛ sɛɛdii.” (Romabii 13:14) Mɛni ji wiemɔ “nyɛwoa Nuŋtsɔ Yesu Kristo” lɛ shishinumɔ? Etsɔɔ akɛ esa akɛ Kristofoi anyiɛ Yesu sɛɛ kpaakpa, ni kɛ wɔɔkɛɛ lɛ, amɛwo enɔkwɛmɔ nɔ kɛ ejwɛŋmɔ lɛ tamɔ atade, ni amɛbɔ mɔdɛŋ waa ni amɛtamɔ Kristo. Petro kɛɛ: “Ejaakɛ enɛ hewɔ nɔŋŋ atsɛ nyɛ, ejaakɛ Kristo hu na amanehulu eha nyɛ ni ekɛto okadi efɔ shi eha nyɛ, koni nyɛnyiɛ enanemaa hei lɛ asɛɛ.”—1 Petro 2:21.
18. Kɛji wɔmiisumɔ ni wɔnine ashɛ kojomɔ kpakpa nɔ lɛ mɛɛ tsakemɔi wuji ehe baahia ni wɔfee?
18 Yɛ bei babaoo mli lɛ nɔ ni ebiɔ ji tsakemɔi wuji yɛ Kristofonyo lɛ shihilɛ mli. Paulo kɛɛ: “Ejaakɛ sa lɛ duŋ ji nyɛ, shi agbɛnɛ lɛ nyɛtsɔmɔ la yɛ Nuŋtsɔ lɛ mli. Belɛ nyɛnyiɛa tamɔ la bii. Ejaakɛ la lɛ yibii ji mlihilɛ kɛ jalɛ kɛ anɔkwale fɛɛ.” (Efesobii 5:8, 9) Mɛi fɛɛ ni kɛ amɛhe woɔ duŋ mli nitsumɔi amli lɛ jeee mɛi ni sumɔɔ la lɛ ni amɛnine shɛŋ kojomɔ kpakpa nɔ kɔkɔɔkɔ, ja amɛtsake.
“Nyɛ Ji Jɛ Lɛŋ La Lɛ”
19. Mɛɛ gbɛi sɔrɔtoi Kristofonyo aaanyɛ atsɔ nɔ ejie la lɛ kpɛmɔ kpo yɛ?
19 Yɛ naagbee lɛ, suɔmɔ ni aaana aha la lɛ tsɔɔ akɛ aaajie la lɛ kpɛmɔ kpo koni mɛi krokomɛi hu ana ni egbala amɛ kɛba he. Yesu kɛɛ: “Nyɛ ji je lɛŋ la lɛ.” Ni ekɛfata he akɛ: “Nyɛhaa nyɛla atsoa yɛ gbɔmɛi ahiɛ, koni amɛna nyɛ nifeemɔ nii kpakpai lɛ, ni amɛwo nyɛ-Tsɛ ni yɔɔ ŋwɛi lɛ hiɛ nyam.” (Mateo 5:14, 16) Nɔ ni fata Kristofonyo lɛ nitsumɔi kpakpai ahe hu ji jiemɔ ni eeejie mlihilɛ kɛ jalɛ kɛ anɔkwalei sɔrɔtoi fɛɛ kpo, ejaakɛ jeŋba kpakpa ni tamɔ nɛkɛ kɛ odaseyeli ni mli wa haa yɛ anɔkwale lɛ he. (Galatabii 6:10; 1 Petro 3:1) Nɔ titri ni fata enɛ he ji mɛi krokomɛi ni akɛ amɛ aaawie anɔkwale lɛ he. Ŋmɛnɛ, enɛ tsɔɔ he ni akɛaawo jeŋ muu fɛɛ “maŋtsɛyeli lɛ he sanekpakpa nɛɛ” shiɛmɔ he tafaa yɛ “je nɛɛŋ fɛɛ, ni akɛye jeŋmaji lɛ fɛɛ odase” lɛ mli. Agbɛnɛ hu, etsɔɔ tsuishitoo ni akɛaaku sɛɛ aya mɛi ni yɔɔ wiemɔ lɛ he miishɛɛ lɛ aŋɔɔ, ni akɛ amɛ akase Biblia lɛ, ni aye abua amɛ, ni amɛ hu amɛwo yibii ni ji nitsumɔi ni sa la lɛ.—Mateo 24:14; 28:19, 20.
20. (a) Te la lɛ kpɛɔ waa ehaa tɛŋŋ ŋmɛnɛ? (b) Mɛɛ jɔɔmɔi babaoo mɛi ni kpɛlɛɔ la lɛ nɔ lɛ naa mli ŋɔɔmɔ?
20 Yɛ wɔgbii nɛɛ amli lɛ, shidaa aha Kristofoi anɔkwafoi lɛ ashiɛmɔ nitsumɔ ni ekaa yɔɔ mli lɛ, akɛ aanu sanekpakpa lɛ yɛ shikpɔji fe 200 nɔ, ni la lɛ miikpɛ waa fe bei fɛɛ ni eho. Yesu kɛɛ: “Mi ji je lɛ mli la lɛ. Mɔ ni nyiɛɔ misɛɛ lɛ, enyiɛŋ duŋ mli gbi ko gbi ko, shi moŋ eeena wala la lɛ.” (Yohane 8:12) Mɛɛ mlifilimɔ eji nɛkɛ akɛ aaana nɛkɛ shiwoo nɛɛ mlibaa mli gbɛfaŋnɔ! Akɛni agbɛnɛ wɔtswiaaa shi yɛ Satan je lɛ mli duŋ lɛ mli dɔŋŋ hewɔ lɛ, wɔshihilɛ efee miishɛɛ nɔ babaoo diɛŋtsɛ. Ni wɔgbɛkpamɔi lɛ hu yɛ nyam lɛlɛŋ yɛ be mli ni wɔkwɛɔ kojomɔ kpakpa ni baajɛ Kojolɔ ni Yehowa ehala lɛ lɛ ŋɔɔ lɛ gbɛ lɛ. (2 Timoteo 4:8) Mɛɛ oshara eeefee nɛkɛ kɛji, yɛ be mli ni wɔba la lɛ he sɛɛ lɛ, wɔkpalaŋ kɛku wɔsɛɛ kɛtee duŋ lɛ mli ekoŋŋ ni wɔnine shɛ fɔbuu kojomɔ nɔ lɛ! Wɔbaasusu bɔ ni wɔɔfee wɔdamɔ shi shiŋŋ yɛ hemɔkɛyeli lɛ mli lɛ he, yɛ nikasemɔ ni nyiɛ sɛɛ lɛ mli.
Ani Obaanyɛ Otsɔɔ Mli?
◻ Mɛni ji nɔdaamɔ nɔ kɛha Nyɔŋmɔ kojomɔ lɛ?
◻ Mɛɛ gbɛhe titri ko Yesu yɔɔ yɛ Nyɔŋmɔ yiŋtoi amli?
◻ Mɛɛ gbɔ nɔ wɔtsɔɔ akɛ wɔbaa wɔhe shi wɔhaa Yesu akɛ mɔ ni Yehowa ehala lɛ akɛ Mantsɛ lɛ yɛ?
◻ Mɛɛ gbɛ nɔ wɔɔtsɔɔ akɛ wɔji “Ia bii” yɛ?
◻ Mɛɛ gbɛ nɔ la lɛ kpɛɔ waa fe bei fɛɛ, yɛ nɛkɛ jeŋ ni mli ewo duŋ nɛɛ mli yɛ?
[Mfoniri ni yɔɔ baafa 10]
Yɛ naagbee lɛ, abaaha adesai fɛɛ akpɛlɛ Yesu hegbɛ ni nɔ kwɔ Iɛ nɔ
[Mfoniri ni yɔɔ baafa 12]
Wɔtsɔɔ akɛ wɔsumɔɔ Ia Iɛ kɛji wɔhaa ekpɛɔ ehaa mɛi krokomɛi