Wekukpaa ni Yɔɔ Yesu kɛ Etsɛ Teŋ

Be ni Yudafoi komɛi kɛ sane fɔ̃ Yesu nɔ akɛ ebule Hejɔɔmɔ Gbi lɛ akɛni etsa nuu ko lɛ hewɔ lɛ, Yesu kɛɛ amɛ akɛ: “Mi-Tsɛ kã he eetsu nii kɛbashi amrɔ nɛɛ, ni mi hu mikã he miitsu nii.”​—Yohane 5:17.

Nɔ ni Yesu feɔ lɛ eteee shi ewooo Nyɔŋmɔ mla ni kɔɔ Hejɔɔmɔ Gbi lɛ he lɛ kwraa. Shiɛmɔ ni eshiɛ kɛ mɛi ni etsa lɛ tsɔɔ akɛ eekase Nyɔŋmɔ nitsumɔi kpakpai lɛ. No hewɔ lɛ, Yesu tee nɔ efee nibii kpakpai gbi fɛɛ gbi. Shi hetoo ni Yesu hã mɛi ni kɛ sane lɛ fɔ̃ enɔ lɛ wo amɛmli la fe tsutsu lɛ, ni amɛtao akɛ amɛgbe lɛ. Mɛni hewɔ amɛfee nakai?

Amɛhiɛ susumɔ ni ejaaa akɛ Yesu miibule Hejɔɔmɔ Gbi lɛ akɛni etsaa mɛi yɛ Hejɔɔmɔ Gbi lɛ nɔ lɛ hewɔ, ni amɛmli fu waa hu ejaakɛ ekɛɛ Nyɔŋmɔ Bi ji lɛ. Amɛsusuɔ akɛ Yesu miibɔ musu akɛni etsɛ Nyɔŋmɔ akɛ e-Tsɛ lɛ hewɔ, oookɛɛ tsɛ ni Yesu tsɛ Yehowa akɛ e-Tsɛ lɛ tsɔɔ akɛ ekɛ Nyɔŋmɔ yeɔ egbɔ. Shi Yesu sheee gbeyei, ni etee nɔ ehã amɛ hetoo kɛkɔ wekukpaa krɛdɛɛ ni yɔɔ ekɛ Nyɔŋmɔ teŋ lɛ he. Ekɛɛ akɛ: “Tsɛ lɛ dɔɔ Bi lɛ he ni etsɔɔ lɛ nibii fɛɛ ni lɛ diɛŋtsɛ efeɔ lɛ.”​—Yohane 5:20.

Tsɛ lɛ ji Wala Halɔ lɛ, ni ehã ana enɛ faŋŋ yɛ bei ni eho lɛ amli kɛtsɔ hewalɛ ni ehã hii komɛi ni amɛkɛtee mɛi ashi lɛ nɔ. Yesu tsa nɔ akɛ: “Bɔ ni Tsɛ lɛ teɔ gbohii ashi ni ehãa amɛ wala lɛ, nakai nɔŋŋ Bi lɛ hu ŋɔɔ wala ehãa mɔ fɛɛ mɔ ni esumɔɔ akɛ ehã lɛ lɛ.” (Yohane 5:21) Shishinumɔ yɛ wiemɔ nɛɛ mli waa, ni ehãa wɔnáa hiɛnɔkamɔ kɛhã wɔsɛɛ. Amrɔ nɛɛ po lɛ, Bi lɛ miitee gbohii ashi yɛ mumɔŋ shishinumɔ naa. Enɛ hewɔ lɛ, Yesu wie akɛ: “Mɔ fɛɛ mɔ ni nuɔ miwiemɔ ni eheɔ mɔ ni tsu mi lɛ eyeɔ lɛ yɛ naanɔ wala, ni ebaŋ kojomɔ mli, shi moŋ efo mli kɛjɛ gbele mli kɛtee wala mli.”​—Yohane 5:24.

Kɛbashi nakai be lɛ mli lɛ, amaniɛbɔɔ ko bɛ ni tsɔɔ akɛ Yesu etee mɔ ko ni egbo shi, shi ekɛɛ mɛi ni kɛ sane fɔ̃ɔ enɔ lɛ akɛ, abaatee mɛi ni egboi lɛ ashi. Ewie akɛ: “Ŋmɛlɛtswaa lɛ miiba, be mli ni mɛi fɛɛ ni yɔɔ gbohii akaimɔ bui lɛ amli lɛ baanu egbee ni amɛbaaje kpo.”​—Yohane 5:28, 29.

Eyɛ mli akɛ Yesu tsuɔ gbɛfaŋnɔ krɛdɛɛ ko yɛ Nyɔŋmɔ yiŋtoo mli moŋ, shi ehã efee faŋŋ akɛ Nyɔŋmɔ nɔ kwɔ fe lɛ, ni ewie akɛ: “Mi diɛŋtsɛ minyɛŋ miyiŋ mato mafee nɔ ko. . . . Mitaooo nɔ ni mi diɛŋtsɛ misumɔɔ, shi moŋ nɔ ni mɔ ni tsu mi lɛ sumɔɔ.” (Yohane 5:30) Kɛ̃lɛ, Yesu tsɔɔ gbɛfaŋnɔ ni he hiaa ni etsuɔ yɛ Nyɔŋmɔ yiŋtoo mli, nɔ ko ni kɛbashi be nɛɛ ehãko mɛi babaoo ale. Shi yɛ nibii nɛɛ ahe odase ni Yesu ye lɛ sɛɛ lɛ, mɛi ni kɛ sane fɔ̃ɔ enɔ lɛ yɛ odaseyeli kroko hu. Yesu kai amɛ akɛ: “Nyɛtsu mɛi kɛtee Yohane [Baptisilɔ lɛ] ŋɔɔ, ni eye anɔkwale lɛ he odase.”​—Yohane 5:33.

Aaafee afii enyɔ ni tsɔ be nɛɛ hiɛ lɛ, Yohane wie mɔ ni baa yɛ esɛɛ, ní atsɛɔ lɛ “Gbalɔ lɛ” kɛ “Kristo lɛ,” he sane etsɔɔ Yudafoi lɛ ajamɔŋ hiɛnyiɛlɔi lɛ, ni eeenyɛ efee akɛ mɛi ni kɛ sane fɔ̃ɔ Yesu nɔ nɛɛ nu odase ni Yohane ye lɛ. (Yohane 1:20-25) Yesu kai mɛi ni wieɔ shiɔ lɛ nɛɛ akɛ, tsutsu ko lɛ amɛyɛ bulɛ ni mli kwɔ kɛhã Yohane, mɔ ni amrɔ nɛɛ awo lɛ tsuŋ lɛ, ni ekɛɛ amɛ akɛ: “Nyɛsumɔɔ akɛ nyɛmii ashɛ nyɛhe babaoo yɛ ela lɛ mli be kukuoo ko.” (Yohane 5:35) Kɛ̃lɛ, ekɛ odaseyeli ni fe Yohane Baptisilɔ lɛ nɔ lɛ hã amɛ.

Yesu kɛɛ akɛ: “Nitsumɔi lɛ ni mitsuɔ lɛ [ní helatsɛ lɛ ni etsa lɛ etsɛko lɛ fata he lɛ] yeɔ mihe odase akɛ Tsɛ lɛ tsu mi.” No sɛɛ lɛ, etsa nɔ akɛ: “Tsɛ lɛ ni tsu mi lɛ diɛŋtsɛ eye mihe odase.” (Yohane 5:36, 37) Akɛ nɔkwɛmɔnɔ lɛ, Nyɔŋmɔ ye Yesu he odase be ni abaptisi lɛ lɛ.​—Mateo 3:17.

Anɔkwa, mɛi ni kɛ sane fɔ̃ɔ Yesu nɔ lɛ bɛ yiŋtoo kpakpa ko hewɔ ni esa akɛ amɛkpoo lɛ. Ŋmalɛi lɛ ni amɛkɛɛ amɛpɛiɔ mli lɛ yeɔ ehe odase. Yesu mu naa akɛ: “Eji nyɛhe Mose nyɛye kulɛ, nyɛbaahe mi nyɛye, ejaakɛ nakai mɔ lɛ ŋma mihe sane. Shi kɛ́ nyɛheee nakai mɔ lɛ niŋmai lɛ nyɛyeee lɛ, te nyɛaafee tɛŋŋ nyɛhe miwiemɔi lɛ nyɛye lɛ?”​—Yohane 5:46, 47.