Yitso 55

Kaselɔi Pii Kpa Yesu Sɛɛ Nyiɛmɔ

YESU miitsɔɔ nii yɛ kpeehe lɛ yɛ Kapernaum yɛ egbɛfaŋnɔ ni ji anɔkwa aboloo ni jɛ ŋwɛi lɛ he. Eka shi faŋŋ akɛ ewiemɔ lɛ tsaa sanegbaa ni ekɛ gbɔmɛi lɛ je shishi yɛ be mli ni amɛna lɛ beni amɛku amɛsɛɛ kɛjɛ Galilea Ŋshɔ lɛ bokagbɛ lɛ nɔ, yɛ he ni amɛye abolooi kɛ looi ni ekɛha yɛ naakpɛɛ gbɛ nɔ lɛ.

Yesu tee nɔ yɛ ewiemɔ lɛ mli ni ekɛɛ: “Shi aboloo ni mikɛbaaha lɛ ji miheloo ni mikɛbaaha yɛ je lɛ wala hewɔ lɛ.” Afii enyɔ pɛ ni etsɔ hiɛ lɛ mli, yɛ afi 30 Ŋ.B. agbiɛnaa be mli lɛ, Yesu kɛɛ Nikodemo akɛ Nyɔŋmɔ sumɔɔ je lɛ aahu akɛ ekɛ e-Bi lɛ ha akɛ Yiwalaherelɔ. Enɛ hewɔ lɛ, Yesu miitsɔɔ agbɛnɛ akɛ adesai aje lɛŋ mɔ fɛɛ mɔ ni yeɔ eheloo lɛ yɛ mfonirfeemɔ mli, kɛtsɔ hemɔkɛyeli ni eeena yɛ afɔleshaa ni etsɛŋ ni ekabaaha lɛ mli lɛ baana naanɔ wala.

Shi kɛlɛ, gbɔmɛi lɛ anaji tɔtɔ yɛ Yesu wiemɔi lɛ ahewɔ. Amɛbi akɛ: “Te mɔ nɛ baafee tɛŋŋ ni enyɛ eŋɔ eheloo eha wɔ ni wɔyeŋ?” Yesu miitao ni etoibolɔi lɛ anu shishi akɛ eheloo yeli lɛ ji nɔ ko ni amɛbaafee yɛ okadi gbɛ nɔ. No hewɔ lɛ, ewie nɔ kroko hu ni amɛsumɔŋ kwraa kɛji eeeba akɛ aaafee lɛ pɔtɛɛ lɛ, bɔni afee ni ekɛma nɔ mi.

Yesu jaje akɛ: “Kɛji nyɛyeee gbɔmɔ Bi lɛ heloo ni nyɛnuuu ela lɛ, nyɛbɛ wala yɛ nyɛmli. Mɔ ni yeɔ miheloo ni enuɔ mila lɛ, eyɛ naanɔ wala, ni mi lɛ matee lɛ shi yɛ naagbee gbi lɛ nɔ. Ejaakɛ miheloo lɛ anɔkwa ŋmaa ni, ni mila lɛ anɔkwa numɔnɔ ni. Mɔ ni yeɔ miheloo ni enuɔ mila lɛ, ehiɔ mimli, ni mi hu mihiɔ emli.”

Eji anɔkwale, kulɛ Yesu tsɔɔmɔ lɛ baafee nɔ ni ahiɔ kwraa kɛji eeewo hewalɛ ni aye gbɔmɔ loo. Shi, yɛ anɔkwale mli lɛ, jeee heloo diɛŋtsɛ yeli kɛ la diɛŋtsɛ numɔ ji nɔ ni Yesu woɔ he hewala lɛ. Eema nɔ mi kɛkɛ akɛ esa akɛ mɛi fɛɛ ni baana naanɔ wala lɛ ana hemɔkɛyeli yɛ afɔleshaa ni ekɛaaha yɛ be mli ni ekɛ egbɔmɔtso akɛ adesa lɛ haa ni efɔseɔ ela hu eshwieɔ shi lɛ mli. Ni kɛlɛ, ekaselɔi lɛ ateŋ mɛi pii po ebɔɔɔ mɔdɛŋ akɛ amɛaanu etsɔɔmɔ lɛ shishi ni no hewɔ lɛ amɛte shi amɛwo lɛ akɛ: “Wiemɔ ni wa nɛ; namɔ aaanyɛ toi abo?”

Ni Yesu na le akɛ ekaselɔi lɛ ateŋ mɛi pii miiwie huhuuhu lɛ, ekɛɛ: “Ani enɛ tɔtɔɔ nyɛnane nɛɛ? Shi kɛji nyɛna gbɔmɔ Bi lɛ miiya ŋwɛi he ni eyɔɔ sa lɛ, no hu? . . . Wiemɔi ni mikɛ nyɛ wie lɛ, mumɔ ni, ni wala ni. Shi nyɛteŋ mɛi komɛi yɛ ni heee yeee.”

Yesu tee nɔ akɛ: “Enɛ hewɔ mikɛɛ nyɛ akɛ: Mɔ ko nyɛŋ miŋɔɔ aba, ja Tsɛ lɛ eha lɛ hegbɛ lɛ.” Enɛ hewɔ lɛ, kaselɔi lɛ ateŋ mɛi pii shi lɛ ni amɛnyiɛɛɛ esɛɛ dɔŋŋ. No hewɔ lɛ Yesu tsɔ ehe ni ebi bɔfoi 12 lɛ akɛ: “Ani nyɛ hu nyɛmiisumɔ akɛ nyɛaatee?”

Petro here nɔ akɛ: “Nuŋtsɔ, namɔ ŋɔɔ wɔɔtee? Bo oyɔɔ naanɔ wala wiemɔi lɛ; ni wɔ lɛ wɔhe wɔye ni asaŋ wɔna wɔle akɛ Bo ji Kristo, Nyɔŋmɔ hiɛkalɔ lɛ Bi lɛ.” Eyɛ mli akɛ ekolɛ Petro kɛ bɔfoi krokomɛi lɛ nuuu nɔ ni Yesu tsɔɔ yɛ sane nɛɛ he lɛ shishi jogbaŋŋ moŋ, shi mɛɛ anɔkwayeli amɛjie kpo amɛtsɔɔ nɛkɛ!

Eyɛ mli akɛ Yesu na Petro hetoo lɛ he miishɛɛ moŋ, shi ekɛɛ: “Ani jeee nyɛyi nyɔŋma kɛ enyɔ mihala? Shi nyɛteŋ mɔ kome lɛ abonsam ni.” Eewie Yuda Iskariot he. Ekolɛ kɛbashi amrɔ nɛɛ, Yesu ena gbɛ fɔŋ ko “shishijee” aloo ebɔimɔ yɛ Yuda mli.

Etsɛko tsɔ ni Yesu ha gbɔmɛi lɛ anine nyɛ shi yɛ shi ni ete ewo mɔdɛŋ ni amɛbɔɔ ni amɛwo lɛ maŋtsɛ lɛ, ni ekolɛ amɛbaasusu akɛ, ‘Te aaafee tɛŋŋ ni mɔ nɛ aaafee Mesia lɛ kɛ eŋɔŋ Mesia lɛ gbɛhe ni sa lɛ lɛ?’ Enɛ hu baafee sane hee ko yɛ gbɔmɛi lɛ ajwɛŋmɔi amli. Yohane 6:51-71; 3:16.

▪ Namɛi ahewɔ ni Yesu ŋɔɔ eheloo ehaa lɛ, ni mɛɛ gbɛ nɔ mɛnɛɛmɛi ‘yeɔ eheloo’ lɛ yɛ?

▪ Mɛɛ Yesu wiemɔi krokomɛi ha gbɔmɛi lɛ anaa kpɛ amɛhe, shi kɛlɛ mɛni nɔ mi emaa?

▪ Beni mɛi pii kpa Yesu sɛɛ nyiɛmɔ lɛ, mɛni hetoo Petro ha?