Etsɔɔ Nii Be ni Efãa Gbɛ Kɛyaa Yerusalem Lɛ

Yɛ bei nɛɛ mli fɛɛ lɛ, Yesu tsu esɔɔmɔ nitsumɔ lɛ titri yɛ Galilea ejaakɛ mɛi bo lɛ toi jogbaŋŋ yɛ jɛmɛ fe Yudea. Kɛfata he lɛ, be ni eyɔɔ Yerusalem ni etsa nuu ko yɛ Hejɔɔmɔ Gbi lɛ nɔ lɛ, “Yudafoi lɛ je shishi amɛtao lɛ amɛgbe fe tsutsu lɛ.”​—Yohane 5:18; 7:1.

Amrɔ nɛɛ be ni akɛbaaye afi 32 Ŋ.B. Agbai (loo Asesei) Agbi Jurɔ lɛ ebɛŋkɛ. Akɛ gbii kpawo yeɔ gbi jurɔ nɛɛ, ni yɛ gbi ni ji kpaanyɔ lɛ nɔ lɛ afeɔ kpee krɔŋkrɔŋ. Ayeɔ gbi jurɔ nɛɛ kɛmuɔ nii ni akpaa yɛ Israelbii lɛ akwaayeli afi lɛ naagbee lɛ naa, ni eji be ni anáa miishɛɛ waa kɛ be ni adaa Yehowa shi.

Yesu nyɛ bihii lɛ​—Yakobo, Simon, Yosef, kɛ Yuda​—kɛɛ lɛ akɛ: “Jee biɛ ni oya Yudea.” Yerusalem ji he titri ni Yudafoi lɛ jáa Nyɔŋmɔ yɛ. Kɛ́ aaye gbii juji etɛ ni ayeɔ lɛ daa afi lɛ, maŋ lɛ mli tsiɔ kɛ gbɔmɛi. Yesu nyɛmimɛi hii lɛ wie amɛtsɔɔ lɛ akɛ: “Mɔ ko mɔ ko bɛ ni miitao ni ale lɛ yɛ maŋ, ní efeɔ nɔ ko yɛ teemɔŋ. Akɛni oofee nibii nɛɛ hewɔ lɛ, jiemɔ ohe shi otsɔɔ je lɛ.”​—Yohane 7:3, 4.

Anɔkwa, no mli lɛ Yesu nyɛmimɛi hii ejwɛ nɛɛ “ejieee hemɔkɛyeli kpo yɛ emli” akɛ Mesia lɛ. Fɛɛ sɛɛ lɛ, amɛmiitao ni mɛi ni baaba gbi jurɔ lɛ ana Yesu ni eefee hewalɛ nitsumɔi komɛi. Akɛni Yesu le oshara ni yɔɔ he hewɔ lɛ, ekɛɛ amɛ akɛ: “Je lɛ bɛ yiŋtoo ko ni ebaadamɔ nɔ enyɛ nyɛ, shi mi lɛ, enyɛɔ mi, ejaakɛ miyeɔ ehe odase akɛ enitsumɔi lɛ nitsumɔi fɔji ni. Nyɛ lɛ, nyɛkwɔa kɛyaa gbi jurɔ lɛ; mi lɛ, mikwɔŋ kɛyaŋ gbi jurɔ nɛɛ bianɛ, ejaakɛ mibe lɛ shɛko.”​—Yohane 7:5-8.

Gbii komɛi asɛɛ be ni Yesu nyɛmimɛi hii lɛ efata gbɛfalɔi akuu lɛ he kɛtee Yerusalem lɛ, Yesu kɛ ekaselɔi lɛ hu tee jɛmɛ, shi jeee yɛ faŋŋ, moŋ lɛ yɛ teemɔŋ. Amɛtsɔ Samaria ni yaa Yerusalem tɛɛ lɛ moŋ fe ni amɛbaatsɔ he ni mɛi fɔɔ tsɔmɔ yɛ Yordan Faa lɛ masɛi gbɛ lɛ. Ehe baahia ni Yesu kɛ ekaselɔi lɛ aná he ko amɛto yɛ Samaria, no hewɔ lɛ, etsu bɔfoi komɛi koni amɛyasaa nibii amɛto amɛ. Mɛi ni yɔɔ akrowa ko mli lɛ hereee amɛ loo amɛfeee amɛ gbɔ akɛni amɛmiiya Yerusalem koni amɛyaye Yudafoi lɛ agbi jurɔ lɛ hewɔ. Yakobo kɛ Yohane kɛ mlifu bi akɛ: “Nuŋtsɔ, ani oosumɔ ni wɔkɛɛ ni la ajɛ ŋwɛi abakpãtã amɛhiɛ?” (Luka 9:54) Yesu kã amɛhiɛ yɛ jwɛŋmɔ nɛɛ ni amɛna lɛ hewɔ, ni amɛtsa amɛgbɛnyiɛmɔ lɛ nɔ.

Be ni amɛyaa lɛ, woloŋmalɔ ko kɛɛ Yesu akɛ: “Tsɔɔlɔ, he fɛɛ he ni oyaa lɛ, manyiɛ osɛɛ.” Shi Yesu kɛɛ lɛ akɛ: “Osɔi yɛ bui, ni ŋwɛi loofɔji hu yɛ tsũi, shi gbɔmɔ Bi lɛ bɛ he ko ni ekɛ eyitso ŋmɛɔ.” (Mateo 8:19, 20) Yesu miitsɔɔ akɛ kɛ́ woloŋmalɔ lɛ batsɔ esɛɛnyiɛlɔ lɛ, ekɛ shihilɛ ni mli wa baakpe. Ni etamɔ nɔ ni woloŋmalɔ lɛ sumɔɔɔ ni ekɔ gbɛ ni tamɔ nakai ejaakɛ enaa ehe tsɔ. No hewɔ lɛ, ehi akɛ wɔteŋ mɔ fɛɛ mɔ baabi ehe akɛ, ‘Ani miisumɔ ni manyiɛ Yesu sɛɛ?’

Yesu kɛɛ nuu kroko akɛ: “Baatsɔ misɛɛnyiɛlɔ.” Nuu lɛ hã hetoo akɛ: “Nuŋtsɔ, ŋmɛɛ mi gbɛ ni maya mayafu mitsɛ dã.” Akɛni Yesu le shihilɛ mli ni nuu lɛ yɔɔ hewɔ lɛ, ekɛɛ lɛ akɛ: “Hã gbohii lɛ afu amɛgbohii, shi bo lɛ yaa ni oyashiɛ Nyɔŋmɔ Maŋtsɛyeli lɛ yɛ he fɛɛ he.” (Luka 9:59, 60) Ekã shi faŋŋ akɛ etsɛ gboko. Eji etsɛ egbo kulɛ, ehiŋ jɛmɛ nakai beaŋ ni ekɛ Yesu agba sane. Nuu lɛ efeko ejwɛŋmɔ akɛ ekɛ Nyɔŋmɔ Maŋtsɛyeli lɛ baaye klɛŋklɛŋ gbɛhe yɛ eshihilɛ mli.

Be ni amɛnyiɛ gbɛ lolo kɛmiiya Yerusalem lɛ, nuu kroko kɛɛ Yesu akɛ: “Nuŋtsɔ, manyiɛ osɛɛ, shi ŋmɛɛ mi gbɛ ni maya ni mikɛ mɛi ni yɔɔ miwe lɛ ayaye shɛɛ dã.” Yesu hã lɛ hetoo akɛ: “Mɔ ni kɛ enine mɔɔ tsina kɔi mli ni ekuɔ ekuɛ ekwɛɔ nibii ni yɔɔ sɛɛ lɛ, esaaa Nyɔŋmɔ Maŋtsɛyeli lɛ.”​—Luka 9:61, 62.

Esa akɛ mɛi ni miitao atsɔmɔ Yesu anɔkwa kaselɔi lɛ kɛ amɛjwɛŋmɔ ama Maŋtsɛyeli nitsumɔ lɛ nɔ. Kɛ́ mɔ ko mɔ tsina kɔi mli ni ekwɛɛɛ ehiɛ tɛɛ lɛ, bu ni etsaa lɛ baakɔdɔ. Kɛ́ eŋmɛɛ tsina kɔi lɛ he ni eku ekuɛ ekwɛ esɛɛ lɛ, ŋmɔ lɛ mli nitsumɔ lɛ sɛɛ baagbala shi. Nakai nɔŋŋ, mɔ fɛɛ mɔ ni kuɔ ekuɛ ekwɛɔ shihilɛ gbɛjianɔtoo momo nɛɛ nane baanyɛ atɔ̃tɔ yɛ gbɛ ni kɛ mɔ yaa naanɔ wala mli lɛ nɔ.