Yitso 65

Efa Gbɛ yɛ Teemɔŋ Kɛtee Yerusalem

GBO be mli yɛ afi 32 Ŋ.B., ni Asesei Agbijurɔ lɛ ebɛŋkɛ. Kɛjɛ be mli ni aye Hehoo lɛ yɛ afi 31 Ŋ.B., ni Yudafoi lɛ bɔ mɔdɛŋ ni amɛgbe lɛ lɛ, Yesu tsi esɔɔmɔ nitsumɔ lɛ naa ewo Galilea pɛ. Ekolɛ, kɛjɛ nakai be lɛ mli lɛ Yesu tee Yerusalem ni eyaye Yudafoi lɛ afi gbijuji etɛ lɛ.

Agbɛnɛ Yesu nyɛmimɛi lɛ wo lɛ hewalɛ akɛ: “Jee biɛ ni oya Yudea.” Yerusalem ji Yudea maŋtiase kɛ jamɔŋ maŋ wulu kɛha maŋ muu lɛ fɛɛ. Enyɛmimɛi lɛ susu akɛ: “Mɔ ni taoɔ ni ale lɛ lɛ, efeee nɔ ko yɛ fifiaŋ.”

Eyɛ mli akɛ Yakobo, Simon, Yosef, kɛ Yuda heee amɛyeee akɛ amɛnyɛminukpa Yesu ji Mesia lɛ lɛlɛŋ moŋ, shi kɛlɛ amɛmiitao ni ejie enaakpɛɛ hewalɛ lɛ kpo etsɔɔ mɛi fɛɛ ni ebabua amɛhe naa yɛ gbijurɔyeli lɛ shishi lɛ. Shi kɛlɛ, Yesu le oshara ni yɔɔ nakai feemɔ he. Ekɛɛ amɛ akɛ “je lɛ nyɛɛɛ anyɛ nyɛ; shi mi lɛ enyɛɔ mi, ejaakɛ miyeɔ ehe odase akɛ enitsumɔi lɛ nitsumɔi fɔji ni.” No hewɔ lɛ Yesu kɛɛ enyɛmimɛi lɛ akɛ: “Nyɛ lɛ nyɛyaa gbijurɔ nɛɛ yeli; shi mi lɛ, minako maya.”

Asesei Agbijurɔ lɛ ji gbii kpawo gbijurɔyeli. Akɛbaa naagbee yɛ gbi ni ji kpaanyɔ lɛ nɔ kɛ nibii ni tsɔɔ Nyɔŋmɔ gbeyeishemɔ. Gbijurɔyeli nɛɛ kadiɔ okwaayeli afi lɛ naagbee ni eji miishɛɛ kɛ shidaa kpele be. Gbii babaoo sɛɛ beni Yesu nyɛmimɛi lɛ kɛ mɛi krokomɛi ni yaa gbijurɔyeli lɛ etee sɛɛ lɛ, lɛ kɛ ekaselɔi lɛ tee yɛ teemɔŋ, koni mɛi akana lɛ. Amɛtsɔ Samaria gbɛ, moŋ fe ni amɛaatsɔ gbɛ ni mɛi fɛɛ tsɔɔ nɔ ni bɛŋkɛ Yordan Faa lɛ.

Akɛni wɔɔhe he baahia Yesu kɛ mɛi ni fata ehe lɛ yɛ Samaria akrowa lɛ mli hewɔ lɛ, etsu tsuji kɛtsɔ amɛhiɛ koni amɛto enɛɛmɛi ahe gbɛjianɔ. Shi beni gbɔmɛi lɛ na amɛle akɛ Yesu miiya Yerusalem lɛ, amɛkpoo akɛ amɛaafee nɔ ko amɛha lɛ. Ni Yakobo kɛ Yohane kɛ mlifu bi akɛ: “Nuŋtsɔ, oosumɔ akɛ wɔkɛɛ ni la ajɛ ŋwɛi eba ebasha amɛ?” Shi Yesu ka amɛhiɛ yɛ nakai ni amɛsusu lɛ hewɔ, ni amɛfa gbɛ kɛtee akrowa kroko mli.

Yɛ be mli ni amɛnyiɛ gbɛ lɛ nɔ lɛ, woloŋmalɔ ko kɛɛ Yesu akɛ: “Tsɔɔlɔ, manyiɛ osɛɛ kɛaatee he fɛɛ he ni oyaa.”

Yesu ha lɛ hetoo akɛ, “Osɔi yɛ bui, ni ŋwɛi loofɔji hu yɛ tsui; shi gbɔmɔ Bi lɛ bɛ he ni ekɛ eyitso fɔɔ.” Yesu miitsɔɔ mli akɛ kɛ woloŋmalɔ lɛ batsɔ E-sɛɛnyiɛlɔ lɛ, ekɛ piŋmɔi babaoo baakpe. Ni nɔ ni jɛ mli ba lɛ tsɔɔ akɛ etamɔ nɔ ni woloŋmalɔ lɛ woɔ ehe nɔ waa no hewɔ lɛ ekpɛlɛɛɛ shihilɛ ni tamɔ nɛkɛ nɔ.

Yesu kɛɛ mɔ kroko hu akɛ: “Nyiɛmɔ misɛɛ!”

Nuu lɛ ha hetoo akɛ: “Ŋmɛɛ mi gbɛ ni maya mayafu mitsɛ da.”

Yesu ha lɛ hetoo akɛ: “Ha ni gbohii afu amɛgbohii, shi bo lɛ, yaa ni oyashiɛ Nyɔŋmɔ maŋtsɛyeli lɛ.” Eka shi faŋŋ akɛ no mli lɛ, nuu nɛɛ tsɛ gboko, ejaakɛ kɛji egbo lɛ, eka shi faŋŋ akɛ ebinuu nɛɛ ehiŋ biɛ ni eebo Yesu toi. Etamɔ nɔ ni ebinuu lɛ miibi ni aha lɛ be kayashi etsɛ gbele sɛɛ. Efeko klalo akɛ ekɛ Nyɔŋmɔ Maŋtsɛyeli lɛ baaye klɛŋklɛŋ gbɛhe yɛ eshihilɛ mli.

Yɛ be mli ni amɛyaa lolo yɛ gbɛ lɛ nɔ kɛbɛŋkɛɔ Yerusalem lɛ, mɔ kroko hu bakɛɛ Yesu akɛ: “Manyiɛ osɛɛ, Nuŋtsɔ; shi ŋmɛɛ mi gbɛ ni maya mayashɛ mɛi ni yɔɔ miwe lɛ da.”

Yɛ hetoohamɔ mli lɛ Yesu kɛɛ lɛ akɛ: “Mɔ ni kɛ enine yamɔɔ tsina kɔi mli ni ekuɔ ekuɛ ekwɛɔ esɛɛ lɛ, esaaa Nyɔŋmɔ maŋtsɛyeli lɛ.” Esa akɛ mɛi ni baafee Yesu kaselɔi lɛ aha amɛhiŋmɛii ahi Maŋtsɛyeli sɔɔmɔ lɛ nɔ. Taakɛ bɔ ni nu jɔɔ baanyɛ atsɔ afa kɛji mɔ ni kɛ tsina kɔi tsaa shi lɛ kwɛɛɛ ehiɛ tɛɛ lɛ, nakai nɔŋŋ mɔ fɛɛ mɔ ni kuɔ ekuɛ ekwɛɔ nibii agbɛjianɔtoo momo nɛɛ baatɛ egbee shi yɛ gbɛ ni kɛ mɔ yaa naanɔ wala mli lɛ nɔ. Yohane 7:2-10; Luka 9:51-62; Mateo 8:19-22.

▪ Namɛi ji Yesu nyɛmimɛi lɛ, ni te amɛnuɔ he yɛ ehe amɛhaa tɛŋŋ?

▪ Mɛni hewɔ ni Samariabii lɛ akuɛŋ ti nakai lɛ, ni mɛni Yakobo kɛ Yohane tao ni kulɛ amɛfee?

▪ Mɛɛ sanegbaai etɛ Yesu kɛ mɛi komɛi na yɛ gbɛ lɛ nɔ, ni mɛɛ gbɛ nɔ ema bɔ ni ehe hiaa ni akɛ he asha afɔle aha sɔɔmɔ lɛ nɔ mi yɛ?