Yitso 66

Yɛ Asesei Agbijurɔyeli lɛ Shishi

YESU ebahe gbɛi waa yɛ nɔ ni miihe ashɛ afii etɛ kɛjɛ be mli ni abaptisi lɛ nɛɛ mli. Mɛi babaoo ena enaakpɛɛ nifeemɔi lɛ, ni enifeemɔi lɛ ahe amaniɛbɔɔ egbɛ eshwa shikpɔŋ lɛ nɔ he fɛɛ he. Agbɛnɛ, yɛ be mli ni gbɔmɛi lɛ bua amɛhe naa kɛha Asesei Agbjijurɔ lɛ yeli yɛ Yerusalem lɛ, amɛbɔi lɛ taomɔ yɛ jɛmɛ. Ni amɛkɛɛ, “nɛgbɛ eyɔɔ?”

Yesu ebatsɔ mɔ ko ni naataomɔ teɔ shi yɛ ehewɔ. Mɛi komɛi miikɛɛ akɛ “Gbɔmɔ kpakpa ji lɛ.” Mɛi krokomɛi hu miikɛɛ akɛ “Dabi, gbɛ moŋ ehaa asafo lɛ duduɔ.” Huhuuhu-wiemɔ tamɔ nɛkɛ babaoo te shi yɛ be mli ni ajeɔ gbijurɔyeli lɛ shishi lɛ. Ni kɛlɛ mɔ ko mɔ ko naaa ekaa ni ekɛaawie yɛ faŋŋ eha Yesu. Nɔ hewɔ ji akɛ gbɔmɛi lɛ miishe gbeyei akɛ Yudafoi ahiɛnyiɛlɔi lɛ baawa amɛ yi kɛto najiaŋ.

Yesu bapue yɛ be mli ni ashɛ gbijurɔyeli lɛ teŋgbɛ. Etee sɔlemɔ we lɛ, ni gbɔmɛi lɛ anaa kpɛ amɛhe waa yɛ naakpɛɛ gbɛ ni etsɔ nɔ etsɔɔ nii lɛ he. Akɛni Yesu eyako rabifoi askul lɛ eko da hewɔ lɛ, Yudafoi lɛ anaa kpɛ amɛhe ni amɛkɛɛ: “Te mɔ nɛ ni ekaseko nii lɛ fee tɛŋŋ ni ele woji amli nii nɛɛ?”

Yesu tsɔɔ mli akɛ: “Minitsɔɔmɔ lɛ, jeee minɔŋ, shi moŋ mɔ ni tsu mi lɛ nɔŋ. Kɛji mɔ ko miisumɔ akɛ efee esuɔmɔnaa nii lɛ, lɛ ebaayoo yɛ tsɔɔmɔ lɛ he akɛ Nyɔŋmɔ dɛŋ jɛ aloo mi diɛŋtsɛ miyiŋ mitoɔ miwieɔ.” Yesu tsɔɔmɔi lɛ baa Nyɔŋmɔ mla lɛ he kpaakpa. No hewɔ lɛ, esa akɛ efee faŋŋ akɛ eetao anunyam eha Nyɔŋmɔ, jeee lɛ diɛŋtsɛ enɔ. Yesu bi amɛ akɛ: “Ani jeee Mose ha nyɛ mla lɛ?” No hewɔ lɛ eka amɛhiɛ ni ekɛɛ amɛ akɛ: “Ni nyɛteŋ mɔ ko mɔ ko yeee mla lɛ nɔ.”

Kɛkɛ ni Yesu bi amɛ akɛ: “Mɛni hewɔ nyɛtaoɔ mi nyɛgbe lɛ?”

Mɛi ni ebua amɛhe naa lɛ, ni ekolɛ amɛji gbɔi ni eba gbijurɔyeli lɛ leee nɛkɛ mɔdɛŋ ni abɔɔ nɛɛ he nɔ ko. Amɛbuɔ yiŋ ni mɔ ko aaato akɛ eeegbe nɛkɛ tsɔɔlɔ ni he yɔɔ naakpɛɛ nɛɛ akɛ nɔ ko ni anyɛŋ afee. No hewɔ lɛ amɛheɔ amɛyeɔ akɛ nɔ ko miigba Yesu naa yɛ enɛ ni esusuɔ lɛ hewɔ. Amɛkɛɛ akɛ: “Daimonioi yɛ omli; namɔ taoɔo agbe?”

Yudafoi ahiɛnyiɛlɔi lɛ miitao ni agbe Yesu, eyɛ mli akɛ mɛi ni ebabua amɛhe naa lɛ yooo enɛ. Beni Yesu tsa nuu ko yɛ Hejɔɔmɔ Gbi lɛ nɔ yɛ afi kɛ fa ni tsɔ hiɛ lɛ mli lɛ, hiɛnyiɛlɔi lɛ bɔ mɔdɛŋ ni amɛgbe lɛ. No hewɔ lɛ Yesu tsɔɔ akɛ amɛbɛ yitsoŋ, ni ebi amɛ akɛ: “Kɛji hejɔɔmɔ gbi lɛ nɔ lɛ afoɔ mɔ ketia bɔni afee ni akatɔ̃ Mose mla lɛ nɔ lɛ, mɛɛba nyɛmli fuɔ mi akɛ mitsa gbɔmɔ muu lɛ yɛ hejɔɔmɔ gbi lɛ nɔ lɛ? Nyɛkakwɛa hiɛaŋ nyɛkojoa, shi moŋ nyɛkojoa jalɛ kojomɔ.”

Agbɛnɛ, mɛi ni yɔɔ Yerusalem maŋ lɛ mli, ni leee nɔ ni eba lɛ kɛɛ akɛ: “Ani jeee mɔ ni amɛtao lɛ amɛgbe lɛ nɛ? Ni naa, faŋŋ ewieɔ yɛ nɛɛ, ni amɛkɛɛɛ lɛ nɔ ko. Ekolɛ benɛ onukpai lɛ ena ele akɛ Kristo lɛ ji mɔ nɛ lɛlɛŋ.” Nɛkɛ Yerusalem maŋbii nɛɛ tsɔɔ nɔ hewɔ ni amɛheee amɛyeee akɛ Yesu ji Kristo lɛ: “Shi mɔ nɛ lɛ, wɔle he ni ejɛ; shi Kristo lɛ beni eeeba lɛ, mɔ ko leŋ he ni ejɛ.”

Yesu ha amɛ hetoo akɛ: “Nyɛle mi, ni asaŋ nyɛle he ni mijɛ; ni mitooo mi diɛŋtsɛ miyiŋ mibaaa, shi moŋ anɔkwafo ji mɔ ni tsu mi, ni nyɛleee lɛ lɛ. Shi mi lɛ mile lɛ, eŋɔɔ mijɛ ni lɛ etsu mi.” Yɛ enɛ hewɔ lɛ amɛbɔ mɔdɛŋ ni amɛmɔ lɛ, ekolɛ ni amɛkɛ lɛ awo tsuŋ aloo ni amɛha agbe lɛ. Shi kɛlɛ amɛyeee omanye ejaakɛ be shɛko ni esa akɛ Yesu agbo.

Shi kɛlɛ, mɛi babaoo na hemɔkɛyeli yɛ Yesu mli, taakɛ bɔ ni esa akɛ amɛfee lɛ. Ejaakɛ ekɛ enaji enyiɛ nui ahiɛ, eha kɔɔyɔɔ ekpa tswaa, eha ŋshɔkei eŋmɛ diŋŋ, ekɛ aboloo kɛ loo fioo elɛ mɛi akpei abɔ yɛ naakpɛɛ gbɛ nɔ, etsa helatsɛmɛi, eha obubuafoi miinyiɛ, egbele shwilafoi ahiŋmɛii, etsa kpitiyelɔi, ni etee gbohii tete po shi. No hewɔ lɛ amɛbi akɛ: “Beni Kristo aaaba lɛ, ani eeefee okadii pii fe nii ni mɔ nɛ feɔ nɛɛ?”

Beni Farisifoi lɛ nu ni mɛi ni ebabua amɛhe naa lɛ miiwie enɛ lɛ, amɛkɛ osɔfonukpai lɛ tsu asraafoi ni amɛyamɔ Yesu. Yohane 7:11-32.

▪ Mɛɛ be Yesu yashɛ gbijurɔyeli lɛ shishi, ni mɛni gbɔmɛi lɛ wieɔ yɛ ehe?

▪ Eeenyɛ eba akɛ mɛni hewɔ ni mɛi komɛi kɛɔ akɛ Yesu yɛ daimonio lɛ?

▪ Mɛɛ jwɛŋmɔ mɛi ni yɔɔ Yerusalem maŋ lɛ mli lɛ hiɛ yɛ Yesu he?

▪ Mɛni hewɔ ni mɛi pii na hemɔkɛyeli yɛ Yesu mli lɛ?