Nɔ ni Yesu tsɔɔ lɛ hewɔ lɛ, mɛi komɛi wie akɛ: “Gbalɔ lɛ nɛ lɛɛlɛŋ.” Ekã shi faŋŋ akɛ amɛmiiwie gbalɔ ni agba akɛ efe Mose lɛ he. Mɛi krokomɛi hu kɛɛ akɛ: “Kristo lɛ nɛ.” Shi mɛi komɛi hu kɛɛ akɛ: “Kristo lɛ, ani Galilea ebaajɛ? Ani ŋmalɛ lɛ ekɛɛɛ akɛ Kristo lɛ baajɛ David seshi lɛ mli, ni ebaajɛ Betlehem, akrowa ni David hi mli lɛ mli?”​—Yohane 7:40-42.

Ŋmalɛi lɛ ewieee tɛ̃ɛ akɛ gbalɔ ko baajɛ Galilea. Kɛ̃lɛ, Nyɔŋmɔ Wiemɔ lɛ tsɔɔ akɛ Kristo lɛ baajɛ jɛmɛ; egba akɛ abaana “la kpeteŋkpele” yɛ “jeŋmaji lɛ a-Galilea lɛ.” (Yesaia 8:23–9:1; Mateo 4:13-17) Kɛfata he lɛ, taakɛ agba lɛ, afɔ Yesu yɛ Betlehem, ni eji David seshinyo. Eyɛ mli akɛ ekolɛ Farisifoi lɛ le enɛ moŋ, shi amɛ titri ji mɛi ni gbɛɔ Yesu he amalei amɛshwaa lɛ.