YITSO NYƆŊMA KƐ ETƐ
Ekase Nii Kɛjɛ Etɔ̃mɔi Amli
1, 2. (a) Mɛni Yona kɛba lɛ diɛŋtsɛ kɛ amlakui ni yɔɔ lɛlɛ lɛ mli lɛ anɔ? (b) Mɛɛ gbɛ nɔ Yona sane lɛ baanyɛ aye abua wɔ?
EJI Yona baanyɛ kulɛ, ebaaha gbɛɛmɔi ni naa wala lɛ aŋmɛ dɛmm. Jeee ahum ni tswaa gbeyeigbeyei ni shimɔɔ meele lɛ kpãi lɛ; loo ŋshɔkei ni nɔ kwɔlɔ ni shimɔɔ meele lɛ hewɔ ni ha etsei lɛ wɔtsɔwɔtsɔi tamɔ ebaajwara lɛ ji naagba lɛ. Dabi kwraa, nɔ ni gbaa Yona naa tuuntu ji bɔ ni amlakui lɛ kɛ kudɔɔtsɛ lɛ bolɔɔ beni amɛbɔɔ mɔdɛŋ amɛkudɔ meele lɛ koni ekashiu lɛ. Yona nu he akɛ bɔ fɛɛ bɔ ni fee lɛ, amlakui lɛ baagboi—ni enɛ fɛɛ jɛ lɛ!
2 Mɛni kɛ Yona yawo amanehulu nɛɛ mli? Yɛ ekɛ Yehowa, e-Nyɔŋmɔ lɛ sharamɔ mli lɛ, etɔ̃ tɔ̃mɔ ko ni yɔɔ hiɛdɔɔ waa. Mɛni bɛŋ efee? Ani ekɛ Yehowa teŋ efite bɔ ni anyɛŋ he nɔ ko kwraa afee? Sanebimɔi nɛɛ ahetoi baatsɔɔ wɔ nibii babaoo. Ákɛ nɔkwɛmɔnɔ lɛ, Yona sane lɛ haa wɔnaa bɔ ni mɛi ni hemɔkɛyeli mli wa po lɛ baanyɛ aje amɛŋɛlɛ nɔ kwraa, kɛ bɔ ni amɛbaafee amɛjaje amɛgbɛi lɛ.
Gbalɔ ko ni Jɛ Galilea
3-5. (a) Bei pii lɛ, kɛ́ mɛi susu Yona he lɛ, mɛni nɔ amɛjwɛŋmɔ yaa? (b) Mɛni wɔle yɛ he ni Yona jɛ, kɛ eweku shihilɛ he? (Kwɛmɔ shishigbɛ niŋmaa lɛ hu.) (d) Mɛni hewɔ Yona naaa esɔɔmɔ akɛ gbalɔ lɛ mlɛo loo enáaa he miishɛɛ lɛ?
3 Kɛ́ mɛi susu Yona he lɛ, bei pii lɛ, etamɔ nɔ ni amɛkɛ amɛjwɛŋmɔ maa efãtɔi, tamɔ etoigbele loo eyitsoŋwalɛ lɛ anɔ. Shi Yona fee nibii kpakpai babaoo hu. Kaimɔ akɛ ahala Yona koni esɔmɔ akɛ Yehowa Nyɔŋmɔ gbalɔ. Eji Yona jeee anɔkwafo loo jalɔ kulɛ, Yehowa halaŋ lɛ kɛhaŋ sɔ̃ ni tsii nɛɛ.
Yona fee nibii kpakpai babaoo fe efãtɔi lɛ
4 Nibii fioo ko kɛkɛ Biblia lɛ haa wɔleɔ yɛ he ni Yona jɛ, kɛ eweku shihilɛ he. (Nyɛkanea 2 Maŋtsɛmɛi 14:25.) Ejɛ Gat-Hefer ni kɛ Nazaret jɛkɛmɔ aaafee kilomitai ejwɛ pɛ lɛ mli; Nazaret maŋ nɛɛ mli Yesu Kristo baada yɛ afii 800 komɛi asɛɛ lɛ.a Yona sɔmɔ akɛ gbalɔ beni Maŋtsɛ Yerobeam ni ji enyɔ nɔ lɛ yeɔ Israel akutsei nyɔŋma lɛ nɔ lɛ. No mli lɛ, Elia egbo jeeŋmɔ; Elia sɛɛyelɔ, Elisha hu gbo beni Yerobeam tsɛ yeɔ nɔ lɛ. Eyɛ mli akɛ Yehowa kɛ hii nɛɛ tsu nii kɛbule Baal jamɔ shishi moŋ, shi fɛɛ sɛɛ lɛ Israelbii lɛ eku amɛsɛɛ kɛmiiya amɛyɛlɛ ŋmɔ lɛ mli ekoŋŋ. Ni amrɔ nɛɛ maŋtsɛ ko ni ‘feɔ efɔŋ yɛ Yehowa hiɛ’ ji mɔ ni yeɔ Israel maŋ lɛ nɔ. (2 Maŋ. 14:24) Enɛ hewɔ lɛ, Yona náŋ esɔɔmɔ akɛ gbalɔ lɛ mlɛo, ni enáŋ he miishɛɛ hu. Kɛlɛ ekɛ anɔkwayeli tsu.
5 Shi gbi ko lɛ, Yona shihilɛ batsake kwraa. Yehowa ha Yona nitsumɔ ko, shi Yona nu he akɛ nitsumɔ lɛ wa kwraa tsɔ. Mɛɛ nitsumɔ Yehowa kɛha Yona?
“Tee Shi ní Oya Ninive”
6. Mɛɛ nitsumɔ Yehowa kɛha Yona, ni mɛni hewɔ Yona baanyɛ asusu akɛ nitsumɔ lɛ wa tsɔ lɛ?
6 Yehowa kɛɛ Yona akɛ: “Tee shi ní oya Ninive maŋ kpeteŋkpele lɛŋ, ní oyashiɛ oshi lɛ, ejaakɛ amɛnifɔjianii lɛ ebashɛ mihiɛ!” (Yona 1:2) Yiŋtoi babaoo ahewɔ Yona baanyɛ asusu akɛ nitsumɔ lɛ wa tsɔ lɛ. Ninive kã Israel bokagbɛ, ni ekɛ jɛmɛ jɛkɛmɔ aaafee kilomitai 800, ni eheɔ aaafee nyɔɔŋ kome gbɛnyiɛmɔ. Shi ekã shi faŋŋ akɛ jeee gbɛ lɛ jɛkɛmɔ kwraa ji Yona naagba lɛ, nɔ kroko kwraa ni. Kɛ́ Yona yashɛ Ninive lɛ, ebaabi ni ejaje Yehowa kojomɔ eshi Ashurbii ni ale amɛ akɛ yiwalɔi kpanakui lɛ. Kɛ́ Nyɔŋmɔ webii lɛ tete booo Yona toi lɛ, ani ebaanyɛ ekpa gbɛ akɛ nakai wɔŋjalɔi lɛ baabo lɛ toi? Mɛni kwraa po Yehowa tsulɔ kome too nɛɛ baanyɛ afee yɛ Ninive maŋ ni da, ni sɛɛ mli lɛ abaatsɛ lɛ akɛ “láshishwiemɔ maŋ” nɛɛ mli?—Nah. 3:1, 7.
7, 8. (a) Mɛni tsɔɔ akɛ Yona tswa efai shi akɛ bɔ fɛɛ bɔ ni fee lɛ, ebaajo nitsumɔ ni Yehowa kɛha lɛ lɛ naa foi? (b) Mɛni hewɔ esaaa akɛ wɔmuɔ sane naa akɛ Yona ji gbeyeilɔ lɛ?
7 Ekolɛ, Yona hu ná susumɔi nɛɛ. Wɔnyɛŋ wɔtsɔɔ. Nɔ ni wɔle ji akɛ ejo foi. Yehowa fã lɛ akɛ eya bokagbɛ; Yona wo anaigbɛ kwraa etere, etee shɔŋŋ diɛŋtsɛ. Etee ŋshɔnaa gbɛ maŋ ko ni ji Yopa lɛ mli, jɛmɛ eyana meele ko ni miiya Tarshish. Woloŋlelɔi komɛi kɛɔ akɛ no beaŋ lɛ, Tarshish yɛ Spain. Kɛ́ nakai eji lɛ, belɛ Yona miiya he ko ni kɛ Ninive jɛkɛmɔ aaafee kilomitai 3,500 sɔŋŋ. Gbɛfãa kɛmiiya he ko shɔŋŋ tamɔ nakai yɛ Ŋshɔ Wulu lɛ nɔ baanyɛ ahe aaafee afi kome. Bɔ ni Yona ekpɛ mli sɔŋŋ akɛ ebaajo nitsumɔ ni Yehowa kɛha lɛ lɛ naa foi lɛ hewɔ lɛ, eesumɔ koni efã gbɛ kakadaŋŋ ni baahe lɛ aaafee afi kome lɛ!—Nyɛkanea Yona 1:3.
8 Ani enɛ tsɔɔ akɛ wɔbaanyɛ wɔmu sane naa akɛ Yona ji gbeyeilɔ? Esaaa akɛ wɔkɛ oyaiyeli muɔ sane naa. Taakɛ wɔbaana lɛ, efee nibii komɛi ni tsɔɔ akɛ eyɛ ekãa waa. Taakɛ eji yɛ wɔ fɛɛ wɔgbɛfaŋ lɛ, Yona hu yeee emuu ni eyɛ fatɔi babaoo ni ehe bahia koni ewu eshi. (Lala 51:7) Wɔteŋ namɔ yɔɔ ni wuko eshiko gbeyeishemɔ pɛŋ?
9. Yɛ be kɛ beaŋ lɛ, te wɔbaanyɛ wɔna nitsumɔ ni Yehowa kɛhaa wɔ lɛ tɛŋŋ, ni kɛ́ ebalɛ nakai lɛ mɛɛ anɔkwa sane ko esa akɛ wɔkai?
9 Yɛ be kɛ beaŋ lɛ, ebaanyɛ eba yɛ wɔgbɛfaŋ akɛ wɔbaana nibii komɛi ni Nyɔŋmɔ biɔ yɛ wɔdɛŋ lɛ akɛ ewa tsɔ, loo anyɛŋ nɔ ko kwraa afee yɛ he. Ekolɛ, wɔbaashe gbeyei po akɛ wɔbaashiɛ Nyɔŋmɔ Maŋtsɛyeli lɛ he sanekpakpa lɛ, taakɛ akpaa gbɛ akɛ Kristofoi fɛɛ afee lɛ. (Mat. 24:14) Ewaŋ kwraa akɛ wɔhiɛ baakpa anɔkwa sane ni Yesu wie nɛɛ nɔ, ewie akɛ: “Nyɔŋmɔ gbɛfaŋ lɛ anyɛɔ nii fiaa afeɔ.” (Mar. 10:27) Kɛ́ bei komɛi lɛ, wɔhiɛ kpaa nakai anɔkwa sane lɛ nɔ lɛ, belɛ ewaŋ akɛ wɔbaanu shihilɛ ni Yona kɛkpe lɛ shishi. Shi beni Yona jo nitsumɔ lɛ naa foi lɛ, mɛɛ nibii jɛ mli kɛba?
Yehowa Tsɔse Egbalɔ ni Gbo Toi Lɛ
10, 11. (a) Beni meele lɛ fã ni eyisɛɛ muaa lɛ, mɛni ekolɛ Yona yasusu? (b) Mɛɛ oshara ba meele lɛ kɛ amlakui lɛ anɔ?
10 Wɔbaanyɛ wɔfee Yona he mfoniri ni eefee klalo kɛbote meele ko mli kɛha nakai gbɛfãa kakadaŋŋ lɛ, ekolɛ Foinikebii ameele ko ni woɔ jatsui. Ekwɛ kudɔɔtsɛ lɛ kɛ amlakui ni hiɛ edɔ kɛmiifee meele lɛ klalo koni amɛfã lɛ. Beni meele lɛ fã ni eyisɛɛ muaa lɛ, ekolɛ Yona yasusu akɛ ejo nakai oshara ni eshe he gbeyei waa lɛ naa foi eta. Shi trukaa lɛ, kɔɔyɔɔ lɛ mli tsake.
11 Ahum ni naa wa tswa yɛ ŋshɔ lɛ hiɛ bɔ ni ha ŋshɔ lɛ hiɛ nyiɛmɔ fee gbeyei waa, ni ŋshɔkei ni kumɔ lɛ anɔ kwɔlɔ waa bɔ ni baanyɛ ashiu ŋmɛnɛ beaŋ meelei komɛi po. Eyeee be ko kwraa ni ahum ni naa wa lɛ ha ŋshɔkei wuji kumɔ, ni eshimɔ meele lɛ bɔ ni ha ewɔtsɔ loo efee tamɔ ebaajwa. Beni ahum lɛ tswaa lɛ, ani Yona yɔse nɔ ni lɛ diɛŋtsɛ eŋma yɛ sɛɛ mli akɛ, “Yehowa ha kɔɔyɔɔ ní naa wa te shi yɛ ŋshɔ lɛ hiɛ” lɛ? Wɔnyɛŋ wɔma nɔ mi. Kɛlɛ, Yona na akɛ amlakui lɛ miibolɔ kɛmiitsɛ amɛnyɔŋmɔi srɔtoi lɛ, ni ele jogbaŋŋ akɛ amɛnyɔŋmɔi lɛ nyɛŋ aye abua amɛ. (3 Mose 19:4) Yona amaniɛbɔɔ lɛ kɛɛ: “Ni lɛlɛ [loo meele] lɛ fee tamɔ nɔ ni ebaajwa.” (Yona 1:4) Shi te Yona baafee tɛŋŋ asɔle kɛbi Nyɔŋmɔ ni ejoɔ enaa foi lɛ dɛŋ yelikɛbuamɔ?
12. (a) Eyɛ mli akɛ Yona yawɔ beni ahum lɛ tswaa lɛ moŋ, shi mɛni hewɔ esaaa akɛ wɔhe feɔ oya kɛwieɔ wɔshiɔ lɛ lɛ? (Kwɛmɔ shishigbɛ niŋmaa lɛ hu.) (b) Mɛɛ gbɛ nɔ Yehowa tsɔ eha ana mɔ ni naagba lɛ jɛ lɛ lɛ?
12 Akɛni Yona nu he akɛ enyɛŋ efee nɔ ko kɛye ebua hewɔ lɛ, ekpeleke shi kɛtee lɛlɛ lɛ shishi tɔ̃ɔ, ni ekã shi ewɔ. Ewɔ vii diɛŋtsɛ.b Kudɔɔtsɛ lɛ na Yona kã shi ni etsĩɛ lɛ; ekɛɛ Yona koni lɛ hu esɔle eha enyɔŋmɔ lɛ taakɛ mɔ fɛɛ mɔ feɔ lɛ. Akɛni amlakui lɛ le jogbaŋŋ akɛ ahum ni tswaa lɛ jeee nɔ ko flo ko kɛkɛ hewɔ lɛ, amɛfɔ̃ oshiki kɛtao mɔ tuuntu ni kɛ naagba lɛ eba amɛnɔ lɛ. Ŋwanejee ko bɛ he akɛ, beni oshikifɔ̃ɔ lɛ yaa nɔ, ni mɛi ni he bɛ sane lɛ jeɔ mli ekomekomei lɛ, Yona tsui baafã waa. Etsɛɛɛ kɛkɛ ni abana anɔkwale lɛ. No mli lɛ, Yehowa ji mɔ ni haa ahum lɛ tswaa lɛ, ni lɛ nɔŋŋ ekudɔɔ oshikifɔ̃ɔ lɛ kɛgbeɔ mɔ kome, ni ji Yona nɔ lɛ!—Nyɛkanea Yona 1:5-7.
13. (a) Mɛɛ anɔkwale Yona ha amlakui lɛ le? (b) Mɛni Yona kɛɛ amlakui lɛ akɛ amɛfee lɛ, ni mɛni hewɔ?
13 Yona gba amlakui lɛ anɔkwale lɛ fɛɛ. Egba amɛ akɛ, Yehowa, Nyɔŋmɔ ofe lɛ tsulɔ ji lɛ. Nyɔŋmɔ nɛɛ Yona joɔ enaa foi ni etɔ̃ enɔ, ni ekɛ amɛ fɛɛ ewo oshara wulu mli nɛɛ. Nɔ ni Yona kɛɛ lɛ ha amlakui lɛ atsui fã waa; Yona na yɛ amɛhiɛ akɛ gbeyei emɔmɔ amɛ. Amɛbi lɛ koni etsɔɔ amɛ nɔ ni esa akɛ amɛfee lɛ koni amɛkɛbaa meele lɛ kɛ amɛwala yi. Mɛni ekɛɛ amɛ? Ekolɛ, Yona fee ehe mfoniri ni aashɛ lɛ aafɔ̃ ŋshɔ ni mli ejɔ ŋanii ni efee hamahama lɛ mli, ni eshe gbeyei ni ekpokpo. Shi mɛni hewɔ ebaakwɛ koni mɛi nɛɛ fɛɛ agboi nakai beni ele jogbaŋŋ akɛ ebaanyɛ ebaa amɛyi lɛ? No hewɔ lɛ, ekɛɛ amɛ akɛ: “Nyɛwóa mi, ní nyɛshɛa mi nyɛfɔ̃a ŋshɔ lɛ mli, ni ŋshɔ lɛ aaaŋmɛ aha nyɛ; ejaakɛ mile akɛ mihewɔ ni nɛkɛ ahum kpeteŋkpele nɛɛ tswaa nyɛ nɛɛ!”—Yona 1:12.
14, 15. (a) Te wɔbaafee tɛŋŋ wɔkase Yona hemɔkɛyeli ni mli wa waa lɛ? (b) Te amlakui lɛ fee amɛnii amɛha tɛŋŋ yɛ nɔ ni Yona kɛɛ amɛfee lɛ lɛ he?
14 Jeee gbeyeilɔ naa wiemɔi kwraa nɛ, aloo okɛɛ? Ekolɛ, beni Yehowa na Yona ekãa lɛ, kɛ hekɛafɔleshãa mumɔ ni ejie lɛ kpo yɛ nakai jaramɔ shihilɛ lɛ mli lɛ, etsui nya waa. Wɔnaa yɛ biɛ akɛ Yona hemɔkɛyeli lɛ mli wa waa. Wɔbaanyɛ wɔkase nakai hemɔkɛyeli lɛ ŋmɛnɛ kɛtsɔ mɛi krokomɛi ahilɛkɛhamɔ ni wɔkɛbaaye klɛŋklɛŋ gbɛhe lɛ nɔ. (Yoh. 13:34, 35) Kɛ́ wɔna akɛ agbo yɛ mɔ ko nɔ, mɔ ko werɛ eho ehe, loo esa akɛ atsɔɔ mɔ ko anɔkwale lɛ, loo awo nyɛmi ko hewalɛ koni ehi Yehowa masɛi kpaakpa lɛ, ani wɔkɛ wɔhe haa kɛyeɔ wɔbuaa? Kɛ́ wɔye wɔbua mɛi ni tamɔ nɛkɛ lɛ, wɔhaa Yehowa mii shɛɔ ehe waa!
15 Eeenyɛ efee akɛ nɔ ni Yona kɛɛ lɛ dɔ amlakui lɛ waa, ejaakɛ shishijee lɛ amɛmiii nɔ! Moŋ lɛ, amɛmia amɛhiɛ akɛ amɛbaawiri meele lɛ kɛtsɔ ahum hamahama lɛ mli kɛba shikpɔŋ—shi amɛnyɛɛɛ. Ahum lɛ naa bawa kwraa fe tsutsu lɛ. Agbɛnɛ amɛna akɛ nɔ ko kwraa bɛ ni amɛbaanyɛ amɛfee dɔŋŋ. Amɛbolɔ kɛtsɛ Yehowa, Yona Nyɔŋmɔ lɛ koni ena amɛ mɔbɔ, no sɛɛ lɛ amɛwo Yona amɛshɛ lɛ amɛfɔ̃ ŋshɔ lɛ mli.—Yona 1:13-15.
Yona fã amlakui lɛ koni amɛwo lɛ amɛshɛ lɛ amɛfɔ̃ ŋshɔ lɛŋ, ni amɛfee nakai
Ana Yona Mɔbɔ Ni Ahere Eyiwala
16, 17. Tsɔɔmɔ nɔ ni ba Yona nɔ beni awo lɛ yɛ meele lɛ mli ashɛ afɔ̃ lɛ. (Kwɛmɔ mfonirii lɛ hu.)
16 Yona gbee ŋshɔke hamahama lɛ mli. Ekolɛ, beni eyɔɔ nu lɛ mli lɛ, epele koni etɔɔ nu lɛ hiɛ, ni ena akɛ afui ni yɔɔ nu lɛ hiɛ lɛ kɛ bɔ ni etswaa lɛ tsɔɔ akɛ meele lɛ hiɛ foi. Shi ŋshɔkei wuji lɛ kumɔ shwie enɔ ni enyɛ enɔ kɛwo nu lɛ shishi. Eshiu kɛtee shishi tɔ̃ɔ aahu akɛ enu he akɛ ehiɛnɔkamɔ fɛɛ etã.
17 Sɛɛ mli lɛ, Yona tsɔɔ bɔ ni enu he eha beni eyɔɔ nakai shihilɛ lɛ mli lɛ. Be fioo ni ená kɛsusu nibii ahe lɛ ha eshihilɛ mli nibii komɛi bayi ejwɛŋmɔŋ. Ekɛ awerɛhoyeli yasusu akɛ enaŋ sɔlemɔwe fɛfɛo ni yɔɔ Yerusalem lɛ dɔŋŋ. Eyanu he akɛ ekpeleke shi kɛtee ŋshɔ lɛ shishi tɔ̃ɔ kɛtee gɔji lɛ ashishi, he ni wosumai bala lɛ yɛ lɛ. Jɛmɛ bafee tamɔ egbonyobu.—Nyɛkanea Yona 2:3-7.
18, 19. Mɛni ba Yona nɔ beni eyɔɔ ŋshɔ lɛ shishi lɛ, mɛɛ bɔɔnɔ ko ekɛkpe, ni namɔ hɔ nifeemɔi nɛɛ asɛɛ? (Kwɛmɔ shishigbɛ niŋmaa lɛ hu.)
18 Shi ná tsui! Nɔ ko nyiɛ jɛmɛ niiaŋ—bɔɔnɔ diŋ wulu hiɛkãlɔ ko. Ebɔi lɛ bɛŋkɛmɔ, ni egba kɛbanina lɛ. Egbɛ edaaŋ hatoo ewo Yona, kɛkɛ ni emi lɛ ewo emli!
Yehowa ‘saa ŋshɔŋloo kpeteŋkpele ko eto ni emi Yona’
19 Ekolɛ, Yona yasusu akɛ egbo etã. Kɛlɛ, Yona yɔse nɔ ko ni yɔɔ naakpɛɛ waa. Ehiɛ kã lolo! Ŋshɔŋloo lɛ jwaraaa lɛ, eyeee lɛ, ni esaaa emumɔ naa po. Dabi kwraa, Yona yɛ wala mli lolo, tsɛ no mli lɛ eyɛ he ko ni baanyɛ afee egbonyobu mli. Fiofio lɛ, Yona naa bakpɛ ehe naakpa. Ŋwanejee ko kwraa bɛ he akɛ Yehowa, Yona Nyɔŋmɔ lɛ ji mɔ ni ‘saa ŋshɔŋloo kpeteŋkpele ko eto ni emi Yona lɛ.’c—Yona 2:1.
20. Mɛni sɔlemɔ ni Yona sɔle beni eyɔɔ ŋshɔŋloo wulu lɛ musuŋ lɛ haa wɔkaseɔ yɛ ehe?
20 Hiŋmɛitswai ho kwraa kɛbote ŋmɛlɛtswai amli. Beni Yona yɔɔ duŋ kabitii ni ekɛ eko ekpeko dã yɛ eshihilɛ mli lɛ mli lɛ, esaa ejwɛŋmɔ ni esɔle eha Yehowa Nyɔŋmɔ. Wɔbaanyɛ wɔkase Yona he nii babaoo yɛ esɔlemɔ ni yɔɔ ewolo lɛ yitso enyɔ lɛ mli lɛ mli. Nakai sɔlemɔ lɛ haa wɔnaa akɛ, Yona le Ŋmalɛi lɛ amli fitsofitso, ejaakɛ etsɛ Lalai awolo lɛ mli wiemɔi lɛ ayisɛɛ shii abɔ. Ehaa wɔnaa su ni sa kadimɔ waa yɛ Yona he: hiɛsɔɔ. Yona mu sane naa akɛ: “Shi mi lɛ, mala makafo bo, ni mashã afɔle maha bo; shi ni miwo lɛ, maye nɔ. Yiwalaheremɔ lɛ Yehowa dɛŋ ejɛɔ.”—Yona 2:9, Ga Biblia hee.
21. Mɛni Yona yɔse yɛ yiwalaheremɔ he, ni mɛɛ nikasemɔ kple enɛ baanyɛ aha wɔkai?
21 Yɛ nakai he ni Yona eyaje tɔ̃ɔ, yɛ “ŋshɔŋloo lɛ musuŋ” lɛ, eyɔse akɛ Yehowa baanyɛ abaa mɔ fɛɛ mɔ yi yɛ he fɛɛ he ni eyɔɔ kɛ be fɛɛ be ni esumɔɔ. Yɛ nakai ŋshɔŋloo lɛ musuŋ po lɛ, Yehowa na etsulɔ ni ehao lɛ, ni ebaa eyi. (Yona 2:1) Yehowa pɛ baanyɛ aha mɔ ko ahi ŋshɔŋloo ko musuŋ hiɛkalɔ shwaneshwane kɛ nyɔɔŋnyɔɔŋ gbii etɛ sɔŋŋ ni nɔ ko efeee lɛ. Ehi jogbaŋŋ akɛ obaakai ŋmɛnɛ akɛ Yehowa ji “Nyɔŋmɔ ní omumɔ yɔɔ edɛŋ” lɛ. (Dan. 5:23) Kɛ́ jeee lɛ kulɛ, wɔbɛ shihilɛ mli. Ani wɔhiɛ sɔɔ lɛ? Akɛni Nyɔŋmɔ ji mɔ ni bɔ wɔ hewɔ lɛ, esa akɛ wɔbo lɛ toi kɛtsɔɔ akɛ wɔhiɛ sɔɔ lɛ.
22, 23. (a) Mɛɛ gbɛ nɔ etsɛɛɛ kwraa ni aka Yona hiɛsɔɔ lɛ akwɛ? (b) Kɛ́ ebalɛ tɔ̃mɔi ni wɔtɔ̃ɔ lɛ gbɛfaŋ lɛ, mɛni wɔbaanyɛ wɔkase yɛ Yona he?
22 Ni Yona hu? Ani ebayɔse akɛ esa akɛ ebo Nyɔŋmɔ toi kɛtsɔɔ akɛ ehiɛ sɔɔ lɛ? Efee nakai. Shwaneshwane kɛ nyɔɔŋnyɔɔŋ gbii etɛ sɛɛ lɛ, ŋshɔŋloo lɛ ‘bashwe Yona eŋmɛ shikpɔŋ gbiŋ nɔ.’ (Yona 2:11) Bo lɛ kwɛmɔ nɔ ko—enɛ fɛɛ sɛɛ lɛ, ehe ebahiaaa akɛ Yona asere kɛba kpete po! Kɛlɛ, ekɔɔɔ he eko he ni ŋshɔŋloo lɛ bashwe lɛ efɔ̃ lɛ, ehe bahia ni Yona atao tsɔmɔhe. Etsɛɛɛ kwraa ni shihilɛ ko ka Yona ekwɛ akɛ ehiɛ sɔɔ nɔ ni Yehowa efee eha lɛ lɛ lo. Yona 3:1, 2 lɛ kɛɔ akɛ: “Ni Yehowa wiemɔ ba Yona ŋɔɔ nɔ ni ji shii enyɔ akɛ: ‘Tee shi ni oya Ninive maŋ kpeteŋkpele lɛŋ, ní oyashiɛ shiɛmɔ ní mafão lɛ otsɔɔ amɛ.’” Mɛni Yona baafee?
23 Yona shashaooo shi kwraa. Wɔkaneɔ akɛ: “Kɛkɛ ni Yona te shi, ni eyiŋ etee Ninive yɛ Yehowa wiemɔ lɛ naa.” (Yona 3:3) Hɛɛ, ebo toi. Ekã shi faŋŋ akɛ, ekase nii kɛjɛ etɔ̃mɔi lɛ amli. Esa akɛ wɔkase Yona yɛ enɛ hu gbɛfaŋ. Wɔ fɛɛ wɔfeɔ esha; wɔteŋ mɔ ko bɛ ni tɔ̃ɔɔ. (Rom. 3:23) Shi ani wɔkɛ wɔshigbeemɔhe feɔ wɔwɔɔhe, loo wɔkaseɔ nii kɛjɛɔ wɔtɔ̃mɔi lɛ amli, ni wɔkuɔ wɔsɛɛ wɔkɛ toiboo basɔmɔɔ Nyɔŋmɔ?
24, 25. (a) Sɛɛ mli lɛ, mɛɛ jɔɔmɔ Yona ná beni eyɔɔ wala mli lɛ? (b) Mɛɛ jɔɔmɔi mɛɔ lɛ wɔsɛɛ?
24 Ani Yehowa jɔɔ Yona yɛ etoiboo lɛ hewɔ? Hɛɛ ejɔɔ lɛ. Ejaakɛ eeenyɛ efee akɛ sɛɛ mli lɛ, Yona ná le akɛ amlakui lɛ ahiɛ kpãtaaa. Beni Yona ha ashɛ lɛ afɔ̃ ŋshɔ lɛŋ nɔŋŋ kɛkɛ ni ahum lɛ kpa tswaa, ni gbɔmɛi lɛ “she Yehowa gbeyei naakpa,” ni amɛshã afɔle amɛha Yehowa moŋ fe ni amɛbaashã amɛha amɛ apasa nyɔŋmɔi lɛ.—Yona 1:15, 16.
25 Sɛɛ mli lɛ, ená jɔɔmɔ ni fe nɛkɛ po. Yesu kɛ be ni Yona ye yɛ ŋshɔŋloo wulu lɛ musuŋ lɛ tsu nii akɛ gbalɛ kɛtsɔɔ be ni lɛ diɛŋtsɛ ebaaye yɛ gbonyobu mli loo Sheol lɛ mli. (Nyɛkanea Mateo 12:38-40.) Kwɛ miishɛɛ ni Yona baaná kɛ́ atee lɛ shi kɛba wala mli yɛ shikpɔŋ lɛ nɔ ni ebale sane nɛɛ! (Yoh. 5:28, 29) Yehowa sumɔɔ ni ejɔɔ bo hu. Ani obaakase nii kɛjɛ otɔ̃mɔi amli taakɛ Yona fee lɛ, koni obo Nyɔŋmɔ toi, ni ojie suɔmɔ kpo otsɔɔ mɛi krokomɛi?
a Esa kadimɔ waa akɛ Yona jɛ maŋ ko ni yɔɔ Galilea lɛ mli, ejaakɛ beni Farisifoi lɛ wieɔ Yesu he lɛ, amɛkɛ henɔwomɔ kɛɛ akɛ: “Taomɔ mli okwɛ, shi gbalɔ ko eteko shi kɛjɛko Galilea pɛŋ.” (Yoh. 7:52) Wiemɔ shishitsɔɔlɔi kɛ niiamlitaolɔi babaoo wieɔ akɛ, nɔ ni Farisifoi lɛ taoɔ atsɔɔ ji akɛ gbalɔ ko eteko shi pɛŋ yɛ Galilea, ni gbalɔ ko hu eteŋ shi yɛ Galilea maŋ ni baa shi lɛ mli kɔkɔɔkɔ. Kɛ́ nakai ji sane lɛ, belɛ Farisifoi nɛɛ ku amɛhiɛ amɛshwie yinɔsane kɛ gbalɛ hu nɔ.—Yes. 8:23; 9:1.
b Septuagint lɛ haa anaa bɔ ni Yona wɔ vii diɛŋtsɛ ha lɛ, ejaakɛ ekɛfata he akɛ Yona shi ŋkrɔŋ. Kɛlɛ, nɔ najiaŋ ni wɔbaamu sane naa akɛ, Yona susuuu mɛi lɛ ahe hewɔ ni ewɔ nakai lɛ, esa akɛ wɔkai akɛ bei komɛi lɛ kɛ́ mɛi werɛ ho amɛhe waa lɛ, wɔ nyɔɔ amɛnɔ. Beni Yesu ehao waa yɛ Getsemane abɔɔ lɛ mli lɛ, Petro, Yakobo, kɛ Yohane ‘werɛ ni ho amɛhe sɔŋŋ hewɔ lɛ amɛwɔ.’—Luka 22:45.
c Beni atsɔɔ Hebri wiemɔ kɛha “loo” lɛ shishi kɛtee Hela wiemɔ mli lɛ, akɛ “ŋshɔŋloo kpeteŋkple,” aloo “loo wulu” tsu nii. Eyɛ mli akɛ gbɛ ko bɛ ni abaanyɛ atsɔ nɔ ana ŋshɔŋloo pɔtɛɛ ni eji moŋ, shi ayɔse akɛ ogboolei loo tsaflɔbii wuji komɛi yɛ Ŋshɔ Wulu lɛ mli ni baanyɛ ami gbɔmɔ emuu. Ayɛ ogboolei loo tsaflɔbii wuji kwraa fe enɛɛmɛi yɛ hei krokomɛi; bonso baanyɛ ada aahu akɛ ekɛlɛ baanyɛ ashɛ mitai 15 aloo nɔ ni fe nakai po!