“Wɔwo La Tawuu Nii Lɛ”
“Nyɔɔŋ lɛ eho eta, ni jetsɛremɔ ebɛŋkɛ. No hewɔ lɛ nyɛhaa wɔjiea duŋ mli nitsumɔi lɛ wɔshwiea, ni wɔwo la tawuu nii lɛ.”—ROMABII 13:12.
1, 2. Te Yudafoi ni hi shi yɛ klɛŋklɛŋ afii oha lɛ mli lɛ ateŋ mɛi pii here “anɔkwa la lɛ” nɔ amɛha tɛŋŋ, ni amɛfee enɛ yɛ mɛɛ hegbɛi kpakpai ni amɛna lɛ fɛɛ sɛɛ?
YESU KRISTO ji “anɔkwa la lɛ ni tɛjeɔ mɔ fɛɛ mɔ nɔ lɛ.” (Yohane 1:9) Beni eba akɛ Mesia yɛ afi 29 Ŋ.B. lɛ, eba maŋ ko ni Nyɔŋmɔ ehala koni amɛfee E-dasefoi, ni kɛ hooo kwraa lɛ amɛjɔɔ amɛhe nɔ amɛha Yehowa lɛ aŋɔɔ. (Yesaia 43:10) Israelbii lɛ ateŋ mɛi pii miikpa Mesia lɛ gbɛ, ni amɛteŋ mɛi saŋŋ le gbalɛi ni baaha amɛyoo lɛ lɛ ekomɛi. Kɛfata he lɛ, Yesu shiɛ yɛ Palestina hei sɔrɔtoi fɛɛ, ni efee okadii yɛ gbɔmɛi asafoi babaoo hiɛ yɛ faŋŋ mli. Gbɔmɛi babaoo baa koni amɛbabo lɛ toi ni amɛhiɛ sɔ nɔ ni amɛna kɛ nɔ ni amɛnu lɛ waa diɛŋtsɛ.—Mateo 4:23-25; 7:28, 29; 9:32-36; Yohane 7:31.
2 Shi kɛlɛ, yɛ naagbee lɛ, Yudafoi lɛ ateŋ mɛi pii kpoo Yesu. Yohane Sanekpakpa lɛ kɛɔ akɛ: “Lɛ diɛŋtsɛ emɛi aŋɔɔ eba, ni mɛi ni ji lɛ diɛŋtsɛ emɛi lɛ hereee lɛ.” (Yohane 1:11) Mɛni hewɔ ebalɛ nakai? Nakai sanebimɔ lɛ hetoo baaye ebua wɔ ni wɔtsi wɔhe kɛjɛ amɛtɔmɔ lɛ he. Ebaaye ebua wɔ ni ‘wɔjie duŋ mli nitsumɔi lɛ wɔshwie, ni wɔwo la tawuu nii lɛ,’ koni wɔtsɔ nakai feemɔ nɔ wɔtsi wɔhe kɛjɛ fɔbuu kojomɔ ni tamɔ nɔ ni ba klɛŋklɛŋ afii oha lɛ mli Israel nɔ lɛ he.—Romabii 13:12; Luka 19:43, 44.
Shitee-kɛ-Woo ni Jɛ Jamɔ Mli Hegbɛi lɛ Aŋɔɔ
3. Mɛɛ gbɛ nɔ Yudafoi ajamɔ mli hiɛnyiɛlɔi fee amɛhe “shwilafoi ni miitsɔɔ shwilafoi agbɛ” yɛ?
3 Jamɔ mli hiɛnyiɛlɔi lɛ ji mɛi ni nyiɛ hiɛ ni akɛkpoo la lɛ yɛ Israel. Eyɛ mli akɛ amɛji “Mla tsɔɔlɔi” ni le nii jogbaŋŋ moŋ, shi amɛkɛ mla naa gbɛjianɔtoo ni ji famɔi ni yɛ bei babaoo mli lɛ eteɔ shi ewoɔ Nyɔŋmɔ Mla lɛ efɔ gbɔmɛi lɛ anɔ. (Luka 11:45, 46) No hewɔ lɛ, ‘amɛgu Nyɔŋmɔ wiemɔ lɛ yɛ amɛblema sane ni amɛkɛba jeŋ lɛ hewɔ.’ (Marko 7:13; Mateo 23:16, 23, 24) “Shwilafoi ni tsɔɔ shwilafoi agbɛ” ji amɛ, ni amɛtsiɔ la lɛ naa ni ekakpɛ kɛmiiha mɛi.—Mateo 15:14.
4, 6. (a) Beni Yudafoi lɛ ateŋ mɛi pii bɔi susumɔ akɛ ani Yesu ji Mesia lɛ lo lɛ, te Farisifoi lɛ fee amɛnii yɛ he amɛha tɛŋŋ? (b) Mɛɛ tsuiŋ henumɔ gbonyo Farisifoi lɛ jie lɛ kpo?
4 Gbi ko beni Israelbii lɛ ateŋ mɛi pii miisusu akɛ ani ekolɛ Yesu ji Kristo lɛ lo lɛ, Farisifoi ni enɛ hɛle amɛ shi lɛ tsu asraafoi kɛtee ni amɛyamɔ lɛ. Ni asraafoi lɛ ku amɛsɛɛ kɛ amɛdɛŋ foji, ni amɛbakɛɛ: “Bɔ ni gbɔmɔ nɛɛ wieɔ lɛ, mɔ ko ewieko nakai da.” Enɛ tsirɛɛɛ Farisifoi lɛ kwraa, shi moŋ amɛbi asraafoi lɛ akɛ: “Ani nyɛ hu alaka nyɛ? Ani onukpai lɛ loo Farisifoi lɛ ateŋ mɔ ko ehe enɔ eye? Shi asafo ni leee Mla nɛɛ, alomɔ amɛ.” Ni Nikodemo, Kojomɔ He Wulu loo Sanhedrin lɛ mlibii lɛ ateŋ mɔ kome lɛ wie eshi akɛ mla eŋmɛɛɛ gbɛ akɛ akojo mɔ ko ni anuko edaaŋ wiemɔ. Kɛkɛ ni Farisifoi lɛ kɛ yiŋ sha tsɔ amɛhiɛ amɛwo lɛ ni amɛkɛɛ: “Ani bo hu Galilea ojɛ? Taomɔ mli okwɛ, shi gbalɔ ko eteko shi kɛjɛko Galilea pɛŋ.”—Yohane 7:46-52.
5 Mɛni hewɔ ni jamɔ mli hiɛnyiɛlɔi ni yɔɔ maŋ ni ejɔɔ amɛhe nɔ amɛha Nyɔŋmɔ lɛ mli lɛ fee amɛnii yɛ nɛkɛ gbɛ nɔ lɛ? Ejaakɛ amɛna tsui fɔŋ. (Mateo 12:34) Bɔ ni amɛbuɔ gbɔmɛi foji lɛ yɛ gbɛ fɔŋ nɔ lɛ eha ale amɛhenɔwo su lɛ faŋŋ. Wiemɔ ni amɛwieɔ akɛ “ani onukpai lɛ loo Farisifoi lɛ ateŋ mɔ ko ehe enɔ eye?” lo lɛ ha amɛkɛ henɔwomɔ susu akɛ ja amɛkpɛlɛ enɔ dani eeenyɛ efee anɔkwa Mesia lɛ diɛŋtsɛ. Kɛfata he lɛ, amɛyeee anɔkwa, ni amɛmiibɔ mɔdɛŋ ni amɛgbe Yesu he guɔ ejaakɛ ejɛ Galilea, yɛ be mli ni kulɛ niiamlitaomɔ fioo ni amɛaafee lɛ baafee lɛ faŋŋ eha amɛ akɛ afɔ lɛ yɛ Betlehem diɛŋtsɛ, he ni agba afɔ shi akɛ abaafɔ Mesia lɛ yɛ lɛ.—Mika 5:2; Mateo 2:1.
6 Ana bɔ ni nɛkɛ jamɔ mli hiɛnyiɛlɔi nɛɛ teɔ shi amɛwoɔ la lɛ ni amɛkpaaa kwraa lɛ faŋŋ beni Yesu tee Lazaro shi lɛ. Kɛha mɔ ko ni sheɔ Nyɔŋmɔ gbeyei lɛ, nifeemɔ ni tamɔ nɛkɛ baafee odaseyeli ni tsɔɔ akɛ Yesu yɛ Yehowa sɛɛfimɔ. Shi, jamɔ mli hiɛnyiɛlɔi lɛ na enɛ akɛ eeenyɛ efee amɛgbɛhe ni woo yɔɔ mli lɛ fitemɔ. Amɛkɛɛ: “Te wɔfeɔ tɛŋŋ? Shi nuu nɛɛ miifee okadii sɔrɔtoi pii. Kɛji wɔŋmɛ lɛ gbɛ nɛkɛ lɛ, mɛi fɛɛ aaahe enɔ aye; ni Romabii lɛ aaaba ni amɛbashɔ̃ wɔmaŋ kɛ wɔshikpɔŋ lɛ fɛɛ.” (Yohane 11:44, 47, 48) No hewɔ lɛ amɛtee ajina akɛ amɛbaagbe Yesu kɛ Lazaro fɛɛ, ekolɛ amɛhiɛ ka nɔ akɛ amɛbaanyɛ amɛtsɔ nɛkɛ gbɛ nɔ amɛgbe la lɛ.—Yohane 11:53, 54; 12:9, 10.
7 No hewɔ lɛ, hewoo, henɔwomɔ, woloŋlee ni amɛkɛshishiuɔ mɛi, kɛ hewalɛ ni amɛhe ni amɛsusuɔ waa lɛ ena yɛ amɛnɔ lɛ shwie nakai Nyɔŋmɔ maŋ lɛ mli jamɔ mli hiɛnyiɛlɔi lɛ kɛjɛ la lɛ he. Beni Yesu bɛŋkɛɔ esɔɔmɔ nitsumɔ lɛ naagbee gbɛ lɛ, ekpa amɛfɔyeli lɛ he mama, ni ekɛɛ: “Kpoo ha nyɛ, woloŋmalɔi kɛ Farisifoi, osatofoi! akɛni nyɛŋaa ŋwɛi maŋtsɛyeli lɛ naa yɛ gbɔmɛi lɛ ahiɛ lɛ; ejaakɛ nyɛ diɛŋtsɛ lɛ nyɛboteee mli, ni mɛi ni taoɔ mli abote lɛ hu, nyɛhaaa amɛ mlibotemɔ gbɛ.”—Mateo 23:13.
Hiɛjoomɔ kɛ Henɔwomɔ
8. Mɛɛ nibii komɛi ba yɛ Nazaret ni kpa mɛi komɛi ni yɔɔ jɛmɛ lɛ atsuiaŋ susumɔi fɔji lɛ ahe mama?
8 Yɛ fɛɛ mli lɛ, Yudafoi ni hi shi yɛ klɛŋklɛŋ afii oha lɛ mli lɛ fee amɛnii tamɔ amɛjamɔ mli hiɛnyiɛlɔi lɛ nɔŋŋ ni amɛkpoo la lɛ yɛ amɛtsuiaŋ susumɔi gbohii lɛ hewɔ. Akɛ nɔkwɛmɔ nɔ lɛ, gbi ko lɛ afɔ̃ Yesu nine ni ebawie yɛ kpee he ko mli yɛ Nazaret. Ekane sane ko kɛjɛ Yesaia wolo lɛ mli ni egbala mli etsɔɔ amɛ, ni klɛŋklɛŋ kwraa lɛ, asafo lɛ bo lɛ toi. Shi beni ekɛto yinɔsane mli nibii ni ekɔɔ he lɛ ahe ni ekpa amɛhiɛjoomɔ kɛ hemɔkɛyeli ni amɛbɛ lɛ he mama lɛ, amɛmli fu waa ni amɛbɔ mɔdɛŋ ni amɛgbe lɛ. (Luka 4:16-30) Henɔwomɔ, kɛ sui gbohii krokomɛi ni amɛyɔɔ lɛ tsĩ amɛnaa ni amɛkakpɛlɛ la lɛ nɔ yɛ gbɛ kpakpa nɔ.
9. Mɛɛ gbɛ nɔ akpa Galileabii babaoo ko ajwɛŋmɔ fɔŋ ni amɛhiɛ lɛ he mama yɛ?
9 Yɛ be kroko mli lɛ, Yesu tsɔ naakpɛɛ gbɛ nɔ elɛ gbɔmɛi babaoo ko yɛ Galilea Ŋshɔ lɛ masɛi. Mɛi ni ye nɛkɛ naakpɛɛ nii nɛɛ he odase lɛ kɛɛ: “Anɔkwa, mɔ nɛɛ ji gbalɔ lɛ ni baa je lɛŋ lɛ.” (Yohane 6:10-14) Beni Yesu ho eta lɛlɛ mli kɛtee he kroko lɛ, gbɔmɛi babaoo lɛ nyiɛ esɛɛ. Shi kɛlɛ, Yesu le akɛ, yɛ amɛteŋ mɛi pii agbɛfaŋ lɛ, jeee suɔmɔ ni amɛyɔɔ kɛha la lɛ ji yiŋtoo ni amɛhiɛ. Ekɛɛ amɛ akɛ: “Jeee okadii ni nyɛna lɛ hewɔ nyɛtaoɔ mi nɛɛ, shi moŋ akɛni nyɛye aboloo lɛ eko ni nyɛtɔrɔ lɛ hewɔŋ.” (Yohane 6:26) Etsɛɛɛ ni amɛha ewiemɔ nɛɛ fee anɔkwale beni mɛi ni nyiɛ esɛɛ lɛ ateŋ mɛi babaoo ku amɛsɛɛ kɛtee je lɛŋ ekoŋŋ lɛ. (Yohane 6:66) Nakai hiɛjoomɔ su, “mɛni mana yɛ mli?” lɛ tsĩ la lɛ naa yɛ amɛhiɛ.
10. Te Jeŋmajiaŋbii lɛ ateŋ mɛi pii fee amɛnii yɛ la lɛ he amɛha tɛŋŋ?
10 Yɛ Yesu gbele kɛ eshitee lɛ sɛɛ lɛ, Yudafoi heyelilɔi lɛ tee nɔ amɛkɛ la lɛ tee Yudafoi krokomɛi lɛ aŋɔɔ, shi mɛi fioo pɛ here nɔ. No hewɔ lɛ, bɔfo Paulo kɛ mɛi krokomɛi, ni amɛmiisɔmɔ akɛ “jeŋmaji lɛ ala” lɛ gbɛ sanekpakpa lɛ amɛshwã kɛtee shikpɔji krokomɛi anɔ. (Bɔfoi lɛ Asaji 13:44-47) Mɛi ni jeee Yudafoi lɛ ateŋ mɛi pii here nɔ, shi bɔ ni amɛfee amɛnii lɛ bafee tamɔ bɔ ni Paulo tsɔɔ mli lɛ pɛpɛɛpɛ: “Shi wɔ lɛ, Kristo ni asɛŋ lɛlɛ wɔshiɛɔ, . . . [shɛɛ sane ni ji] kwashiai asane kɛha jeŋmaji lɛ.” (1 Korintobii 1:22, 23) Mɛi ni jeee Yudafoi lɛ ateŋ mɛi pii kpoo la lɛ ejaakɛ wɔŋjalɔi ahemɔkɛyelii gbohii lɛ aloo jeŋ nilee eshwila amɛhiŋmɛii—Bɔfoi lɛ Asaji 14:8-13; 17:32; 19:23-28.
‘Atsɛ Amɛ Kɛjɛ Duŋ Mli’
11, 12. Namɛi here la lɛ nɔ yɛ klɛŋklɛŋ afii oha lɛ mli, ni namɛi ehere nɔ ŋmɛnɛ?
11 Yɛ klɛŋklɛŋ afii oha lɛ mli lɛ, yɛ bɔ ni mɛi pii hereee nɔ lɛ fɛɛ sɛɛ lɛ, atsɛ mɛi ni hiɛ tsui krɔŋŋ lɛ babaoo ‘kɛjɛ duŋ lɛ mli kɛba Nyɔŋmɔ naakpɛɛ la lɛ he.’ (1 Petro 2:9) Bɔfo Yohane ŋma yɛ mɛnɛɛmɛi ahe akɛ: “Shi mɛi abɔ ni here lɛ [Kristo] lɛ, eha amɛ hegbɛ akɛ amɛtsɔmɔ Nyɔŋmɔ bii, mɛi ni heɔ egbɛi lɛ nɔ yeɔ lɛ.” (Yohane 1:12) Kɛjɛ Pentekoste afi 33 Ŋ.B. kɛyaa lɛ, akɛ mumɔ krɔŋkrɔŋ baptisi nɛkɛ gbɔmɛi ni sumɔɔ la nɛɛ ni amɛbatsɔmɔ Nyɔŋmɔ bii kɛ hiɛnɔkamɔ akɛ amɛkɛ Yesu baaye maŋtsɛ yɛ eŋwɛi Maŋtsɛyeli lɛ mli.
12 Yɛ wɔgbii nɛɛ amli lɛ, abua nakai Nyɔŋmɔ bii ni afɔ amɛ mu lɛ ateŋ naagbee bii lɛ anaa, ni “amɛmiikpɛ tamɔ atatu kpɛmɔ . ., ni amɛkɛ mɛi pii miiba jalɛ he,” kɛmiiwo Daniel gbalɛ lɛ obɔ. (Daniel 12:3, New World Translation) Amɛha amɛla lɛ ekpɛ kɛtee shɔŋŋ aahu akɛ egbala “tooi krokomɛi” ni amɛyi fa fe akpekpei ejwɛ kɛba anɔkwale lɛ he ni amɛnaa jalɛ shidaamɔ ni amɛyɔɔ yɛ Nyɔŋmɔ hiɛ lɛ mli ŋɔɔmɔ. (Yohane 10:16) Mɛnɛɛmɛi hu eha la lɛ ekpɛ yɛ je lɛŋ fɛɛ, ni amrɔ nɛɛ, la lɛ miikpɛ waa fe bɔ ni ekpɛ yɛ bei fɛɛ ni eho lɛ mli. Ni ŋmɛnɛ, “duŋ lɛ enaaa naa [yɛ la lɛ hiɛ],” taakɛ eji yɛ klɛŋklɛŋ afii oha lɛ mli lɛ.—Yohane 1:5.
‘Duŋ ko Kwraa Bɛ Nyɔŋmɔ Mli’
13. Mɛɛ kɔkɔbɔɔ bɔfo Yohane kɛhaa wɔ?
13 Shi kɛlɛ, esaaa akɛ wɔhiɛ kpaa bɔfo Yohane kɔkɔbɔɔ lɛ nɔ kɔkɔɔkɔ: “Nyɔŋmɔ lɛ, la ji lɛ, ni duŋ ko kwraa bɛ emli. Kɛji wɔkɛɛ akɛ: ‘Wɔkɛ lɛ miibɔ naanyo,’ ni wɔnyiɛɔ duŋ lɛ mli lɛ, wɔmiimale ni wɔyeee anɔkwa.” (1 Yohane 1:5, 6) Belɛ eyɛ faŋŋ akɛ, eeenyɛ ebalɛ akɛ Kristofoi baanyɛ amɛgbee tsɔne ni dũ Yudafoi lɛ nɔŋŋ mli, ni amɛwo duŋ lɛ yibii, yɛ be mli ni gbɛi Nyɔŋmɔ Odasefoi lɛ ka amɛnɔ efolo.
14, 16. Mɛɛ duŋ mli nitsumɔi komɛi jie amɛhe kpo yɛ klɛŋklɛŋ afii oha lɛ mli Kristofoi asafo lɛ mli, ni mɛni wɔkaseɔ kɛjɛɔ enɛ mli?
14 Yɛ anɔkwale mli lɛ, enɛ ba mli yɛ klɛŋklɛŋ afii oha lɛ mli. Wɔkaneɔ mligbalamɔi ni hiɛdɔɔ yɔɔ mli ni ba yɛ Korinto lɛ he sane. (1 Korintobii 1:10-17) Ehe bahia ni bɔfo Yohane abɔ Kristofoi ni afɔ amɛ mu lɛ kɔkɔ ni amɛhe akatsɛ̃ amɛhe, ni ehe bahia hu ni Yakobo awo mɛi komɛi aŋaa ni amɛkakwɛ niiatsɛmɛi ahiɛ ni amɛshi ohiafoi lɛ. (Yakobo 2:2-4; 1 Yohane 2:9, 10; 3 Yohane 11, 12) Kɛfata he lɛ, beni Yesu yasara asafoi kpawo ni yɔɔ Asia Bibioo lɛ, taakɛ atsɔɔ mli yɛ Kpojiemɔ wolo lɛ mli lɛ, ebɔ bɔ ni duŋ lɛ mli nitsumɔi, tamɔ hemɔkɛyeli kwamɔ, wɔŋjamɔ, jeŋba shara, kɛ heloonaa ninamɔ egbu shi kɛbote amɛmli lɛ he amaniɛ. (Kpojiemɔ 2:4, 14, 15, 20-23; 3:1, 15-17) Yɛ nakai Kristofoi asafo lɛ shishijee afii lɛ amli lɛ, mɛi pii tsɔ nakai gbɛi anɔ amɛshi la lɛ, ni ashwie amɛteŋ mɛi komɛi kɛjɛ asafo lɛ mli ni mɛi krokomɛi hu kpalaŋ kɛtee “gbɛ sɛɛ duŋ lɛ mli.”—Mateo 25:30; Filipibii 3:18; Hebribii 2:1; 2 Yohane 8-11.
15 Nɛkɛ amaniɛbɔi ni jɛ klɛŋklɛŋ afii oha lɛ mli nɛɛ fɛɛ tsɔɔ gbɛi sɔrɔtoi ni Satan je lɛ mli duŋ lɛ baanyɛ atsɔ nɔ agbu shi kɛbote Kristofoi aŋkroaŋkroi asusumɔi amli aloo asafoi muji fɛɛ po mli. Esa akɛ wɔhiɛ ahi wɔhe nɔ bɔni afee ni nɔ ko ni tamɔ nakai akaba wɔnɔ. Mɛɛ gbɛ nɔ wɔɔtsɔ wɔfee enɛ?
Gbɔmɔtso Hee Lɛ
16 Paulo wo Efesobii lɛ hewalɛ ni amɛkaya nɔ akɛ mɛi ni “amɛjwɛŋmɔ mli ewo duŋ, ni mɛi kpɔji ji amɛ yɛ Nyɔŋmɔ wala gbɛfaŋ.” Esa akɛ amɛna tsuiŋ henumɔi ni ji la lɛ nɔ, bɔni afee ni amɛkashane kɛmiiku amɛsɛɛ kɛmiiya nakai duŋ lɛ mli ekoŋŋ. Paulo kɛɛ: “Nyɛshɛ nyɛsa jeŋba lɛ naa gbɔmɔ momo ni efite yɛ shishiumɔ sɛɛdii lɛ anaa lɛ nyɛfɔ̃, ni nyɛtsɔmɔ mɛi heei yɛ nyɛjwɛŋmɔ mumɔ lɛ mli, ni nyɛwo gbɔmɔ hee ni abɔ yɛ Nyɔŋmɔ subaŋ nɔ yɛ anɔkwa jalɛ kɛ hetsemɔ mli lɛ.”—Efesobii 4:18, 22-24.
17. Te wɔɔfee tɛŋŋ ni wɔ mɛi ni wɔyɔɔ ŋmɛnɛ lɛ wɔɔkwa shanemɔ ni wɔɔshane kɛyabote duŋ lɛ mli ekoŋŋ lɛ?
17 Kɛ wɔɔkɛɛ lɛ, Paulo miiwo ŋaa ni wɔfolɔ gbɔmɔtso lɛ he nibii lɛ ekomɛi—ni wɔfolɔ nɔ ni tsutsu ko lɛ eji wɔgbɔmɔtso lɛ fa, wɔgbɔmɔtso momo lɛ, ni wɔŋmɛ mumɔ hee kwraa gbɛ ni ehe shi yɛ wɔmli koni ‘ena wɔjwɛŋmɔi anɔ hewalɛ.’ Ni jeee mɛi heei ni yɔɔ wiemɔ lɛ he miishɛɛ lɛ pɛ kɛkɛ ekɛwieɔ, shi moŋ ekɛɛ Kristofoi ni abaptisi amɛ lɛ hu. Wɔgbɔmɔtso lɛ tsakemɔ lɛ baaa naagbee yɛ baptisimɔ be lɛ mli. Eji nifeemɔ ko ni yaa nɔ. Kɛji wɔkpa gbɔmɔtso hee lɛ woo lɛ, no lɛ emomo lɛ baanyɛ aje kpo ekoŋŋ, kɛ ehenɔwomɔ, hewoo, kɛ hiɛjoomɔ lɛ. (1 Mose 8:21; Romabii 7:21-25) Enɛ baanyɛ eha mɔ lɛ aku esɛɛ kɛya duŋ mli nitsumɔi lɛ ahe ekoŋŋ.
“Ola lɛ Mli Wɔnaa La Yɛ”
18, 19. Te Yesu kɛ Paulo tsɔɔ gbɛ ni wɔɔtsɔ nɔ wɔyoo “la bii” lɛ mli amɛha tɛŋŋ?
18 Kaimɔ akɛ naanɔ wala ni wɔɔna lɛ damɔ kojomɔ kpakpa ni wɔɔna kɛjɛ Nyɔŋmɔ dɛŋ lɛ nɔ, ni nakai kojomɔ lɛ damɔ bɔ ni wɔsumɔɔ la lɛ wɔhaa lɛ nɔ. Yɛ be mli ni Yesu ewie nɛkɛ sɛɛkpee anɔkwale nɛɛ he sɛɛ lɛ, ekɛɛ: “Ejaakɛ mɔ fɛɛ mɔ ni tsuɔ nifɔjianii lɛ nyɛɔ la lɛ, ni ebaaa la lɛ he, koni akakã enitsumɔi lɛ. Shi mɔ ni feɔ anɔkwale nii lɛ baa la lɛ he, koni enitsumɔi lɛ aje kpo, ejaakɛ Nyɔŋmɔ mli atsu amɛ yɛ.”—Yohane 3:19-21.
19 Paulo fi nɛkɛ susumɔ nɛɛ sɛɛ beni eŋma wolo eyaha Efesobii lɛ ni ekɛɛ amɛ akɛ: “Nyɛnyiɛa tamɔ la bii. Ejaakɛ la lɛ yibii ji mlihilɛ kɛ jalɛ kɛ anɔkwale fɛɛ.” (Efesobii 5:8, 9) No hewɔ lɛ wɔnitsumɔi ji nɔ ni tsɔɔ kɛji wɔji la bii aloo duŋ bii. Shi nitsumɔi kpakpai lɛ jɛɔ tsui kpakpa pɛ mli. Enɛ hewɔ ni ehe hiaa ni wɔkwɛ wɔtsui jogbaŋŋ, ni wɔhiɛ ahi wɔhe nɔ yɛ bɔ ni ehe hiaa ni wɔya nɔ wɔwo gbɔmɔtso hee lɛ, ni wɔkwɛ wɔhe nɔ hu jogbaŋŋ yɛ mumɔ ni naa wɔjwɛŋmɔ nɔ hewalɛ lɛ he lɛ.—Abɛi 4:23.
20, 21. (a) Mɛɛ kaa krɛdɛɛ ko gbekɛbii ni afɔɔ amɛ yɛ Kristofoi awekui amli lɛ kɛkpeɔ? (b) Mɛɛ kaa ka fɔlɔi ni ji Kristofoi lɛ abii fɛɛ ahiɛ?
20 Yɛ shihilɛi komɛi amli lɛ, enɛ ebafee kaa krɛdɛɛ ko kɛha Yehowa Odasefoi ni ejɔɔ amɛhe nɔ lɛ abii. Mɛni hewɔ? Ojogbaŋŋ, yɛ gbɛ ko nɔ lɛ, gbekɛbii nɛɛ naa jɔɔmɔ ko ni yɔɔ naakpɛɛ mli ŋɔɔmɔ. Yɛ enɛ mli lɛ, anɔkwale ni amɛle kɛjɛ amɛgbekɛbiiashi tɔɔ lɛ tsɔɔ akɛ ehe ehiaaa ni amɛna bɔ ni Satan je lɛ mli duŋ lɛ mli shihilɛ ji lɛ mli niiashikpamɔ amɛ diɛŋtsɛ. (2 Timoteo 3:14, 15) Yɛ gbɛ kroko nɔ lɛ, gbekɛbii ni yɔɔ shihilɛ nɛɛ mli lɛ ateŋ mɛi komɛi buɔ anɔkwale lɛ akɛ nɔ ko ni yɔɔ flɛflɛ ni no hewɔ lɛ amɛkaseee bɔ ni amɛaafee amɛsumɔ la lɛ diɛŋtsɛ. Nɛkɛ ji bɔ ni shihilɛ lɛ ji yɛ Yudafoi ni hi shi yɛ klɛŋklɛŋ afii oha lɛ mli lɛ ateŋ mɛi pii agbɛfaŋ. Amɛdara yɛ maŋ ni amɛjɔɔ amɛhe nɔ amɛha Yehowa lɛ mli, ni amɛyɛ anɔkwale lɛ he nilee fioo ko. Shi ebɛ amɛtsuii amli.—Mateo 15:8, 9.
21 Gbɛnaa nii ka Kristofoi ni ji fɔlɔi lɛ anɔ yɛ Nyɔŋmɔ hiɛ akɛ amɛtsɔse amɛbii lɛ yɛ la lɛ mli. (5 Mose 6:4-9; Efesobii 6:4) Shi kɛlɛ, yɛ naagbee lɛ, esa akɛ gbekɛ lɛ ada ni ebasumɔ la lɛ fe duŋ lɛ. Esa akɛ eha anɔkwale lɛ la lɛ afee lɛ diɛŋtsɛ enɔ. Yɛ be mli ni edaa lɛ, Satan je lɛ mli nibii lɛ ekomɛi baafee lɛ fɛo. Etipɛŋfoi ashihilɛ ni jeee amɛhe sane ji nɔ ko ni ehaa amɛfeɔ nɔ ni amɛsumɔɔ lɛ baafee tamɔ nɔ ni ŋɔɔ. Anɔkwale lɛ he ŋwanejee wiemɔi ni atsɔɔ yɛ skul lɛ baalaka lɛ. Shi esaaa ni ehiɛ kpaa nɔ kɔkɔɔkɔ akɛ yɛ la lɛ sɛɛ lɛ, ‘duŋ eha shikpɔŋ lɛ nɔ fɛɛ.’ (Yesaia 60:2) Yɛ naagbee lɛ, nɛkɛ jeŋ ni mli ewo duŋ kpii nɛɛ bɛ nɔ kpakpa ko ni ekɛaaha.—Yohane 2:15-17.
22. Mɛɛ gbɛ nɔ Yehowa jɔɔ mɛi ni baa la lɛ he lɛ amrɔ nɛɛ, ni mɛɛ gbɛ nɔ eeejɔɔ amɛ yɛ wɔsɛɛ?
22 Maŋtsɛ David ŋma akɛ: “Ejaakɛ bo [Yehowa] oŋɔɔ wala nu bu yɔɔ; ola lɛ mli wɔnaa la yɛ. Ha omlihilɛ lɛ sɛɛ atsɛ aha mɛi ni leo lɛ.” (Lala 36:10, 11) Mɛi ni sumɔɔ la lɛ baleɔ Yehowa, ni enɛ baanyɛ atsɔ wala kɛha amɛ. (Yohane 17:3) Yehowa wajeɔ amɛ amrɔ nɛɛ po, yɛ esuɔmɔ kɛ emlihilɛ lɛ naa, ni kɛji amanehulu kpeteŋkpele lɛ fɛ lɛ, ebaahiɛ amɛmli kɛfo mli kɛyabote jeŋ hee ko mli. Kɛji wɔkpoo Satan je lɛ mli duŋ lɛ amrɔ nɛɛ lɛ, no lɛ enɛ baanyɛ afee wɔniiashikpamɔ. Abaasaa akɛ adesai aba wala ni eye emuu mli ekoŋŋ yɛ Paradeiso yɛ jeŋ hee lɛ mli. (Kpojiemɔ 21:3-5) Mɛi ni baana kojomɔ kpakpa yɛ nakai beaŋ lɛ baana gbɛkpamɔ akɛ amɛaawere Yehowa la lɛ kɛya bei fɛɛ ni baaba lɛ mli. Mɛɛ gbɛkpamɔ ni yɔɔ nyam nɛ! Ni mɛɛ kanyamɔ ni hewalɛ yɔɔ mli wɔnaa amrɔ nɛɛ nɛkɛ koni “wɔjie duŋ mli nitsumɔi lɛ wɔshwie, ni wɔwo la tawuu nii lɛ”!—Romabii 13:12.
Ani Okaiɔ?
◻ Mɛni hewɔ ni Yudafoi ni hi shi yɛ Yesu gbii amli lɛ ateŋ mɛi pii kpoo la lɛ?
◻ Nɛgbɛ la lɛ etee nɔ ekpɛ kɛyashɛ yɛ ŋmɛnɛŋmɛnɛ bei amli?
◻ Mɛɛ kɔkɔbɔi ni kɔɔ hiɛjoomɔ kɛ henɔwomɔ he klɛŋklɛŋ afii oha lɛ mli nɔkwɛmɔ nii lɛ kɛhaa?
◻ Mɛni he hiaa kɛji wɔɔya nɔ wɔhi la lɛ mli?
◻ Mɛɛ jɔɔmɔi asaa ato aha mɛi ni sumɔɔ la lɛ?
[Mfoniri ni yɔɔ baafa 14]
Yudafoi ni hi shi yɛ Yesu gbii amli Iɛ ateŋ mɛi pii hereee Ia lɛ nɔ
[Mfonirii ni yɔɔ baafa 17]
Akɛ gbɛi sɔrɔtoi babaoo etsu nii yɛ afii nyɔŋmai abɔ ni eho Iɛ amli koni akɛha Ia Iɛ akpɛ yɛ kaselɔi afeemɔ mli
[Mfoniri ni yɔɔ baafa 18]
“Akɛ nyɛshɛ . . . gbomɔ momo . . . Iɛ nyɛfɔ, . . . ni nyɛwo gbɔmɔ hee”?