‘Hejɔɔmɔ Ni Nyɛaana Nyɛha Nyɛsusumai’
“Nyɛbaa miŋɔɔ, nyɛ mɛi fɛɛ ni etɔ nyɛ ni nyɛjatsui fɛ nyɛ lɛ,. . . ni nyɛaana hejɔɔmɔ nyɛha nyɛsusumai lɛ. Ejaakɛ mipa lɛ teremɔ waaa, ni mijatsu lɛ etsiii.”—MATEO 11:28-30.
1, 2. Mɛɛ shihilɛ mli adesa weku lɛ yɔɔ afii ohai babaoo nɛ, ni esoro enɛ yɛ bɔ ni Nyɔŋmɔ to eyiŋ kɛjɛ shishijee lɛ he yɛ mɛɛ gbɛ nɔ?
“EJAAKƐ wɔle akɛ bɔɔ nii lɛ fɛɛ kɛ wɔ dɔmɔɔ ŋtsɔi ni amɛkɛ wɔ kɔmɔɔ kɛbashi ŋmɛnɛŋmɛnɛ.” Enɛ ji sane ko ni nuu ko ŋma eyaha enanemɛi yɛ Roma afi ohai abɔ ni eho nɛ. (Romabii 8:22) Kɛjɛ nakai afi lɛ mli kɛbaa nɛɛ, adesa weku lɛ ŋtsɔidɔɔmɔ kɛ kɔɔmɔ lɛ etee hiɛ yɛ be fɛɛ mli. Gbɔmɛi ahe jwɛŋmɔ fɔŋ ni anaa, ohia, efɔŋfeemɔ kɛ hɔmɔ eye gbɔmɛi awui yɛ he fɛɛ he. Shika he lɛtemɔ gbɛjianɔtoo ni ejaaa lɛ enyɛ akpekpei anɔ ni eha amɛfee mɛi ni bɛ nitsumɔ ni amɛbɛ shiai, ni hewalɛ ni Satan naa lɛ hu miifite mɔdɛŋ ni abɔɔ koni atsɔse gbekɛbii yɛ gbɛ ni sa akɛ amɛtsɔ nɔ lɛ.
2 Shi ekolɛ, oshara ni fe fɛɛ lɛ baa beni hela, loo gbɔlɛ haa gbɔmɛi lɛ ahewalɛ taa ni efeɔ amɛ shwɛm yɛ bulɛ ni amɛyɔɔ amɛhaa amɛhe yɛ be mli ni amɛgbɔmɔtso fiteɔ kwraa ni amɛtsɔmɔɔ wuiwui lɛ. Piŋmɔ kɛ nɔnaa ni naa wa lɛ yaa nɔ ehiɔ shi otsii babaoo, nyɔji babaoo ni yɛ be babaoo mli afii babaoo, ni enɛ kɛ tsuiŋdɔlɛ baa ni ehaa yaafonui hoɔ tamɔ faa. Mɛɛ shihilɛ he saji ni atsara babaoo ni yɔɔ mɔbɔ po ji enɛ! Maŋtsɛ nilelɔ ko wie yɛ blema beebe yɛ adesai amanehulu he akɛ: “Ejaakɛ egbii lɛ fɛɛ lɛ awerɛho sɔŋŋ ni, ni ehe naagbamɔ lɛ ŋkɔmɔyeli ni.” (Jajelɔ 2:23; 4:1) Eka shi faŋŋ akɛ shihilɛ ni yɔɔ ŋmɛnɛ lɛ jeee bɔ ni Nyɔŋmɔ to eyiŋ kɛjɛ shishijee akɛ eba lɛ lɛ!—1 Mose 2:8, 9.
3. Nyɔŋmɔ bɔ gbɔmɔ kɛ hiɛnɔkamɔ kɛha mɛni, ni aayoo enɛ bianɛ yɛ gbɛ ni yeee emuu nɔ yɛ mɛɛ gbɛ nɔ?
3 Yehowa Nyɔŋmɔ bɔ gbɔmɔ akɛ mɔ ni yeɔ emuu, kɛ hiɛnɔkamɔ akɛ ebaana shihilɛ mli ŋɔɔmɔ. (5 Mose 32:4, 5) Belɛ kwɛmɔ miishɛɛ ni onaa beni oye niyenii ko ni ŋɔɔ, ni omuɔ kɔɔyɔɔ ni mli tse kɛ miishɛɛ, aloo ni okwɛɔ bɔ ni hulu nyɔɔ shi fɛfɛo lɛ! Nɛkɛ maŋtsɛ nilelɔ nɛɛ wie yɛ blema akɛ: “Mina nitsumɔ ni Nyɔŋmɔ kɛha adesai abii akɛ amɛtsu lɛ. Efee nɔ fɛɛ nɔ fɛfɛo yɛ ebe naa. . . . Miyoo akɛ nɔ ko nɔ ko bɛ ni hi ha amɛ fe akɛ amɛmli aaafili amɛ ni amɛfee ekpakpa yɛ amɛshihilɛ be mli; ni akɛ nuu fɛɛ nuu aaaye ni enu, ni ena nii kpakpai amli ŋɔɔmɔ yɛ edeŋmegbomɔ lɛ fɛɛ mli. Eji Nyɔŋmɔ nikeenii.”—Jajelɔ 3:10-13, New World Translation.
4. (a) Taakɛ Yesu niiashikpamɔi lɛ fee he nɔkwɛmɔ nɔ lɛ, mɛɛ shihilɛ ni yɔɔ mɔbɔ mɛi pii yɔɔ mli? (b) Mɛɛ ninefɔɔ ko ni haa mɔ tsui nyaa Yesu kpa mli eha mɛi, ni enɛ teɔ mɛɛ sanebimɔi ashi?
4 Ni kɛlɛ, kwɛ bɔ ni mɛi fioo pɛ nyɛɔ amɛnaa nibii kpakpai ni Nyɔŋmɔ eto eyiŋ yɛ he kɛha wɔ lɛ mli ŋɔɔmɔi! Yesu Kristo le shihilɛ ni ehiii ni yɔɔ mɔbɔ ni adesai yɔɔ mli lɛ. Biblia lɛ kɛɔ akɛ: “Ni asafoi pii ba eŋɔɔ amɛhiɛ obubuafoi kɛ shwilafoi kɛ mumuii kɛ kpajelɔi kɛ mɛi krokomɛi pii; ni amɛkɛ amɛ bashwie Yesu naji anaa.” Kwɛ bɔ ni gbɔmɛi aŋkroaŋkroi nɛɛ anii fee Yesu mɔbɔ ha! (Mateo 9:36; 15:30) Gbi ko lɛ ekɛ miishɛɛ fɔ nine etsɛ amɛ akɛ: “Nyɛbaa miŋɔɔ, nyɛ mɛi fɛɛ ni etɔ nyɛ ni nyɛjatsui fe nyɛ lɛ, ni maha nyɛ hejɔɔmɔ. Nyɛwoa mipa lɛ nyɛfɔa nyɛnɔ, ni nyɛkasea mi; shi mihe jɔ, mibaa mihe shi kɛjɛ mitsui mli; ni nyɛaana hejɔɔmɔ nyɛaaha nyɛsusumai lɛ.” (Mateo 11:28, 29) Yɛ anɔkwale mli lɛ, enɛɛmɛi ji wiemɔi ni haa mɔ hiɛnɔkamɔ! Shi mɛɛ hejɔɔmɔ Yesu wieɔ he lɛ? Ni te wɔɔfee tɛŋŋ ni wɔna enɛ?
Anɔkwale Ni Haa Mɔ He Jɔɔ Lɛ Lɛ
5. Yesu tsɔɔ gbɛ ni kɛ mɔ yaa anɔkwa heyeli kɛ hejɔɔmɔ mli kɛha wɔsusumai lɛ yɛ mɛɛ gbɛ nɔ?
5 Beni Yesu tee Asesei Agbijurɔ lɛ shishi aaafee nyɔji ekpaa dani egbo lɛ, etsɔɔ gbɛ ni aaatsɔ nɔ aye he ni ana anɔkwa hejɔɔmɔ. Yɛ be mli ni ewieɔ etsɔɔ mɛi ni amɛhe lɛ amɛyɛ lɛ, ekɛɛ: “Kɛji nyɛhi shi yɛ miwiemɔ lɛ mli lɛ, minɔkwa kaselɔi ji nyɛ, ni nyɛaale anɔkwale lɛ, ni anɔkwale lɛ aaaha nyɛye nyɛhe.” (Yohane 8:31, 32) Mɛɛ anɔkwale Yesu wieɔ he lɛ? Ebaaha wɔye wɔhe kɛjɛ mɛni mli? Etoibolɔi lɛ ji nyɔji yɛ mɛɛ gbɛ nɔ?
6. (a) Jamɔ mli shitee-kɛ-wolɔi lɛ te shi wo mɛni, ni mɛni hewɔ? (b) Wɔ fɛɛ wɔji nyɔji yɛ mɛɛ gbɛ nɔ?
6 Kɛkɛ ni jamɔ mli shitee-kɛ-wolɔi lɛ folɔ Yesu wiemɔi lɛ amli ni amɛkɛɛ: “Abraham seshibii ji wɔ, ni wɔtsɔmɔko mɔ ko nyɔji pɛŋ; te tɛŋŋ ni bo okɛɔ akɛ: Nyɛaaye nyɛhe hu?” Nakai Yudafoi shitee-kɛ-wolɔi lɛ woɔ amɛhe nɔ yɛ amɛfɔmɔ hewɔ. Eyɛ mli akɛ maŋ lɛ bajeɔ maŋsɛɛbii anɔyeli shishi yɛ be kɛ bei amli moŋ, shi Yudafoi lɛ kpooɔ akɛ aaatsɛ amɛ nyɔji. Shi Yesu tsɔɔ amɛ nɔ mli ni amɛji nyɔji lɛ, akɛ: “Lɛlɛŋ, lɛlɛŋ, miikɛɛ nyɛ akɛ: Mɔ fɛɛ mɔ ni feɔ esha lɛ, esha lɛ nyɔŋ ji lɛ.” Hɛɛ, etoibolɔi lɛ fɛɛ ji ‘mɛi ni feɔ esha,’ taakɛ bɔ ni wɔ fɛɛ wɔji ŋmɛnɛ lɛ. Enɛɛmɛi fɛɛ jɛ esha ni wɔna kɛjɛ wɔshishijee fɔlɔi lɛ adɛŋ lɛ hewɔ. Shi Yesu wo shi akɛ: “Kɛji Bi lɛ ha nyɛye nyɛhe lɛ, no nyɛaaye nyɛhe lɛlɛŋ.”—Yohane 8:33-36, New World Translation; Romabii 5:12.
7. Te aaafee tɛŋŋ ni anɔkwa heyeli aaaba hu, ni mɛni ji anɔkwale ni haa wɔyeɔ wɔhe lɛ?
7 No hewɔ lɛ abaanyɛ ana anɔkwa heyeli lɛ kɛtsɔ Nyɔŋmɔ Bi, Yesu Kristo, ni kɛ ewala akɛ adesa ni yeɔ emuu lɛ ha akɛ afɔleshaa kpɔmɔ nɔ lɛ pɛ nɔ. Nɛkɛ afɔleshaa nɛɛ ji nɔ ni haa wɔyeɔ wɔhe kɛjɛɔ esha ni kɛ gbele baa lɛ mli, ni no haa wɔnyɛɔ wɔnaa naanɔ wala yɛ gbɔmɔtsoŋ emuuyeli mli ŋɔɔmɔ kɛ miishɛɛ hu yɛ Nyɔŋmɔ jalɛ jeŋ hee lɛ mli. (Yohane 3:16; 1 Yohane 4:10) No hewɔ lɛ, anɔkwale ni haa wɔyeɔ wɔhe lɛ ji anɔkwale ni kɔɔ Yesu Kristo kɛ enitsumɔ yɛ Nyɔŋmɔ yiŋtoi amlibaa lɛ he lɛ. Maŋtsɛyeli lɛ, ni Kristo ji Maŋtsɛ lɛ ji nɔ ni baatsu Nyɔŋmɔ suɔmɔnaa nii kɛha shikpɔŋ lɛ he nii, ni Yesu tee nɔ eye anɔkwale nɛɛ he odase yɛ be fɛɛ mli.—Yohane 18:37.
Bɔ Ni Anɔkwale Lɛ Haa Mɔ He Jɔɔ Lɛ
8. Mɛɛ gbɛ nɔ aaatsɔ afee gbɛ ni anɔkwale lɛ kɛ hejɔɔmɔ baa lɛ he nɔkwɛmɔ nɔ yɛ?
8 Abaanya akɛ gbɛ ni anɔkwale lɛ kɛ hejɔɔmɔ haa mɔ lɛ ato yoo ko ni akɛɛ lɛ akɛ eeye hela ko ni ji heloo mli fala ni gbooo ni miigbɛ kɛmiishwa lɛ eko lɛ he. Nɔ ni ena ele nɛɛ kumɔ lɛ kwraa yɛ be mli ni esusuɔ nɔ ni baajɛ mli aba ni yɔɔ dɔlɛ diɛŋtsɛ lɛ he lɛ. Shi yɛ be ni sa mli lɛ, eyana datrɛfonyo kroko ni eku sɛɛ ekwɛ lɛ jogbaŋŋ ni eka egbɔmɔtsoŋ nibii ekwɛ. Beni nɔ ni aka akwɛ lɛ jie lɛ kpo akɛ nɔ ni aka akwɛ ni ana yɛ egbɔmɔtsoŋ lɛ baanyɛ afee tɔmɔ loo egbɔmɔtso ebɔi hilɛ ni ebɔi hewalɛnamɔ oyayaayai lɛ, obaanyɛ osusu hejɔlɛ henumɔ ni ebaana lɛ he okwɛ. Kwɛ hejɔɔmɔ ni enɛ ji kɛha esusuma!
9. Yesu kɛ hejɔɔmɔ ha kɛtsɔ gbɔmɛi lɛ ni etsɔɔ amɛ anɔkwale lɛ nɔ yɛ mɛɛ gbɛ nɔ?
9 Nakai nɔŋŋ hu beni Yesu ba shikpɔŋ nɛɛ nɔ lɛ, no mli lɛ jatsu ni gbɔmɛi lɛ tere ji blema saji agbɛjianɔtoo ni yɔɔ egbii lɛ amli lɛ. Yesu wie woloŋmalɔi lɛ kɛ Farisifoi lɛ ni yɔɔ egbii lɛ amli ni ha ebalɛ nakai lɛ ahe akɛ: “Amɛfimɔɔ jatsui kɛ tsiimɔ ni teremɔ jaraa amɛkɛshwieɔ mɛi akɔɔji anɔ; shi amɛ diɛŋtsɛ lɛ, amɛsumɔɔɔ akɛ amɛkɛ amɛwao kome tsiɔ.” (Mateo 23:4; Marko 7:2-5) Mɛɛ hejɔlɛ nɛ yɛ be mli ni Yesu kɛ anɔkwale ni haa mɔ yeɔ ehe kɛjɛɔ blema saji anyɔŋyeli nɛɛ shishi lɛ ha gbɔmɛi lɛ! (Mateo 15:1-9) Nakai nɔŋŋ eji yɛ ŋmɛnɛ.
10. Mɛɛ jatsui ni haaa mɛi ana miishɛɛ mɛi pii tere, ni te mɔ ko aaanu he eha tɛŋŋ yɛ be mli ni ajie nɛkɛ jatsui nɛɛ kɛtee yɛ anɔkwale lɛ ni ekase lɛ hewɔ lɛ?
10 Ekolɛ oji mɔ ni, yɛ apasa jamɔ mli tsɔɔmɔi ahe jatsu ni tsii lɛ hewɔ lɛ, osheɔ gbeyei waa akɛ ekolɛ ooopiŋ yɛ hɛl la mli aloo yɛ hetsuumɔ he ko yɛ gbele sɛɛ. Aloo beni osuɔlɔ ko gbo lɛ, opiŋ waa beni osɔfo ko kɛɛ bo akɛ Nyɔŋmɔ ebaŋɔ obi bibioo ni osumɔɔ lɛ lɛ akɛni ŋwɛibɔfo kroko he hiaa Lɛ—tamɔ nɔ ni obi lɛ he miihia Nyɔŋmɔ babaoo fe bo lɛ hewɔ. Yɛ bei komɛi amli lɛ osɔfoi kɛɔ gbɔmɛi ni helai komɛi gbaa amɛnaa lɛ akɛ eji loomɔ ni jɛ Nyɔŋmɔ ŋɔɔ. Ani ejeee nɔ ni haa mɔ he jɔɔ lɛ diɛŋtsɛ akɛ oookase Biblia mli anɔkwalei ni haa mɔ ko yeɔ ehe kɛjɛɔ nɛkɛ jamɔ mli apasai ni tamɔ jatsui nɛɛ ashishi lɛ he lɛ? Mɛɛ hejɔlɛ loo hejɔɔmɔ po enɛ kɛbaaha bo nɛkɛ!—Jajelɔ 9:5, 10; Ezekiel 18:4; Yohane 9:2, 3.
11. (a) Mɛni ji jatsui ni tsii fe fɛɛ lɛ ateŋ ekome, ni te aaafee tɛŋŋ ajie enɛ kɛya? (b) Mɛɛ hejɔɔmɔ Yesu kɛbaha eshafeelɔi beni eyɔɔ shikpɔŋ nɔ lɛ?
11 Jatsui ni tsii fe fɛɛ lɛ ateŋ ekome ni aaatere ji fɔ ni wɔye yɛ eshai ni wɔfee lɛ hewɔ. Eji miishɛɛ kɛ hejɔɔmɔ diɛŋtsɛ akɛ aaale akɛ yɛ Yesu kpɔmɔ afɔleshaa lɛ jara lɛ hewɔ lɛ, abaanyɛ ajie nɛkɛ eshai nɛɛ kɛya. Biblia lɛ maa nɔ mi kɛhaa wɔ akɛ, ‘Yesu la lɛ tsuɔ wɔhe kɛjɛɔ wɔhe eshai fɛɛ mli.’ (1 Yohane 1:7) Yɛ nibii gbohii ni ehiii kwraa ni ekolɛ wɔfee lɛ fɛɛ sɛɛ lɛ, kɛ wɔtsake wɔtsui lɛlɛŋ ni wɔtsake wɔgbɛi lɛ, wɔbaanyɛ wɔna hejɔɔmɔ ni jɛɔ henilee ni mli tse mli baa lɛ mli ŋɔɔmɔ kɛ nɔmimaa akɛ Nyɔŋmɔ kaiŋ wɔhe eshai lɛ dɔŋŋ. (Lala 103:8-14; 1 Korintobii 6:9-11; Hebribii 10:21, 22) Mɛɛ hejɔɔmɔ po Kristo kɛbaha mɛi ni esha etsɔ jatsu ni tere amɛ lɛ nɛkɛ, tamɔ ajwamaŋbɔlɔi kɛ toohelɔi tamɔ Zakeo! Yesu kɛ Biblia mli anɔkwalei shɛje amɛmii yɛ be mli ni ekɛ amɛ yeɔ nii lɛ.—Luka 5:27-32; 7:36-50; 19:1-10.
12. (a) Mɛɛ gbɔmɛi ni yɔɔ haomɔ shihilɛi amli nɛkɛ Yesu kɛ hejɔɔmɔ baha amɛ lɛ? (b) Namɛi Yesu jie lɛ kpo yɛ gbɛ ni ekaaa nɔ etsɔɔ amɛ yɛ klɛŋklɛŋ afii oha Iɛ mli akɛ lɛ ji “gbɛ lɛ kɛ anɔkwale lɛ kɛ wala lɛ”?
12 Mɛi komɛi hu tere jatsu ni tsii ni ji hela kɛ nɔnyɛɛ babaoo kɛ awerɛho babaoo ni jɛɔ suɔlɔ ko gbele mli baa lɛ. Shi Yesu kɛ hejɔɔmɔ baha mɛi fɛɛ ‘ni etɔ amɛ ni amɛjatsui fe amɛ lɛ.’ (Mateo 4:24; 11:28, 29) Etsa yoo ko ni ebɔ mɔdɛŋ etee helatsalɔi aŋɔɔ aahu afii 18 shi eyeee omanye lɛ hela lɛ eha lɛ. Yesu tsa nuu ko hu ni ehe eye aahu afii 38, kɛ mɔ kroko hu ni afɔ lɛ shwilafo kɛjɛ enyɛ musuŋ. Ani obaanyɛ osusu amɛ heyeli kɛ hejɔɔmɔ lɛ he yɛ be mli ni Yesu tsa amɛ lɛ? (Luka 13:10-17; Yohane 5:5-9; 9:1-7) Anɔkwale lɛ ji akɛ, mɛi fɛɛ ni ba Yesu ŋɔɔ yɛ hemɔkɛyeli mli lɛ ba anɔkwale hejɔɔmɔ diɛŋtsɛ kɛ wala jɛɛhe lɛ ŋɔɔ. Kɛha okulafo lɛ ni nine shɛ ebinuu lɛ nɔ ekoŋŋ kɛjɛ gbele mli kɛ fɔlɔi ni amɛbiyoo ni eye afii 12 ni gbo ni ku sɛɛ ba wala mli ekoŋŋ lɛ, Yesu jie ehe kpo diɛŋtsɛ yɛ gbɛ ni ekaaa nɔ akɛ lɛ ji “gbɛ lɛ kɛ anɔkwale lɛ kɛ wala lɛ.”—Yohane 14:6; 17:3; Luka 7:11-17; 8:49-56.
13. Namɔ Yesu tsɔɔ wɔ akɛ wɔtsɔ wɔhe kɛya eŋɔɔ kɛha yelikɛbuamɔ, ni mɛɛ hejɔɔmɔ wɔnine shɛɔ nɔ kɛ wɔfee nakai?
13 Ŋwanejee ko bɛ he akɛ be shɛɔ ni okɛ naagbai ni dara fe bɔ ni ooonyɛ otsu he nii bo diɛŋtsɛ kpeɔ. Yesu tsɔɔ wɔ akɛ wɔtsɔ wɔhe wɔya Yehowa ŋɔɔ kɛha yelikɛbuamɔ, taakɛ bɔ ni lɛ diɛŋtsɛ po efee lɛ. (Luka 22:41-44; Hebribii 5:7) Kɛ wɔtsɔ wɔhe kɛtee Nyɔŋmɔ ŋɔɔ yɛ sɔlemɔ mli yɛ be fɛɛ mli lɛ, wɔnaa henumɔi ni Lalatsɛ ni ŋma nɛkɛ wiemɔi nɛɛ na lɛ nɔŋŋ eko: “Ajie Nuŋtsɔ [Yehowa] lɛ yi! Daa nɛɛ etereɔ wɔjatsui lɛ ehaa wɔ; Mawu lɛ nɔŋŋ ji wɔyiwalaheremɔ.” (Lala 55:23; 68:20) Hɛɛ, anɔkwale lɛ lee kɛ hejɔɔmɔ diɛŋtsɛ baa. Egbalaa wɔ kɛbɛŋkɛɔ Yehowa he ni eyeɔ ebuaa wɔ koni wɔyoo akɛ kɛ eyelikɛbuamɔ yɛ mli lɛ, wɔbaanyɛ wɔtsu shihilɛi ni mli wawai lɛ fɛɛ ahe nii yɛ omanyeyeli mli.
Maŋtsɛyeli Hiɛnɔkamɔ Lɛ Kɛ Hejɔɔmɔ Baa
14. Mɛni waje Yesu yɛ ekaai lɛ amli, ni mɛni he hiaa kɛ wɔɔna hejɔɔmɔ wɔha wɔsusumai lɛ?
14 Kɛ wɔɔna anɔkwa hejɔɔmɔ wɔba wɔsusumai lɛ, esa akɛ wɔna hiɛnɔkamɔ ni mli wa. Hiɛnɔkamɔ ji nɔ ni waje Yesu. Biblia lɛ kɛɔ akɛ: “Nyamɔ ni ka ehiɛ lɛ hewɔ lɛ emia ehiɛ yɛ sɛŋmɔtso lɛ nɔ amanehulu lɛ mli, ni ebuuu hiɛgbele lɛ, ni ekɛyata shi yɛ Nyɔŋmɔ maŋtsɛsɛi lɛ ninejurɔ nɔ.” (Hebribii 12:2) Hiɛnɔkamɔ kɛ nyamɔ ni waje Yesu lɛ jɛ ye ni eeeye ebua e-Tsɛ lɛ gbɛi lɛ hetsemɔ kɛtsɔ emuuyeli mli ni ehiɛ, kɛ agbɛnɛ bɔ ni ejie ehe kpo akɛ Nyɔŋmɔ Maŋtsɛyeli lɛ nɔ Maŋtsɛ ni sa lɛ hewɔ. Wɔ hiɛnɔkamɔ lɛ he ninaa ni wɔɔha emli aka shi faŋŋ, akɛ Kristo hefatalɔi nɔyelɔi yɛ ŋwɛi aloo eshishibii ni baahi shikpɔŋ nɔ Paradeiso lɛ mli lɛ ateŋ mɔ ko lɛ hu baawaje wɔ yɛ Nyɔŋmɔ sɔɔmɔ mli. Yɛ anɔkwale mli lɛ, nakai hiɛnɔkamɔ lɛ he miihia kɛha hejɔɔmɔ ni wɔɔna wɔha wɔsusumai lɛ.—Romabii 12:12.
15. Mɛni ji wɔhiɛnɔkamɔ kɛ gbɛkpamɔi kɛ́ Maŋtsɛyeli hiɛnɔkamɔ lɛ bɛ mli?
15 Susumɔ wɔshihilɛ he hiɛnɔkamɔ ni kulɛ Maŋtsɛyeli hiɛnɔkamɔ lɛ bɛ mli lɛ he okwɛ. Wɔwala shihilɛ be heɔ afii 70 loo 80 pɛ. Ni nakai gbii lɛ hoɔ oyayaayai, taakɛ bɔ ni mɔ fɛɛ mɔ ni daa kɛyaa hiɛ lɛ baakɛɛ bo lɛ! Hɛɛ, Biblia lɛ kɛɔ yɛ shihilɛ he yɛ anɔkwayeli mli akɛ: “Ehoɔ oya, ni wɔfilikiɔ kɛyaa.” (Lala 90:10) Ni kɛlɛ, wɔmiisumɔ ni wɔgbii lɛ aya nɔ. Wɔmiisumɔ ni wɔhi shi. Babaoo yɛ ni wɔbaanyɛ wɔfee ni wɔna mli ŋɔɔmɔ.
16. Bɔni afee ni wɔna hejɔɔmɔ wɔha wɔsusumai lɛ, mɛni he hiaa ni wɔfee?
16 Belɛ kwɛ bɔ ni ehe hiaa akɛ wɔkɛ hemɔkɛyeli aba “Nuŋtsɔ Yesu Kristo, wɔhiɛnɔkamɔ lɛ” ŋɔɔ! (1 Timoteo 1:1) Taakɛ ekɛɛ lɛ: “Ejaakɛ enɛ ji mi-Tsɛ suɔmɔnaa nii lɛ, akɛ mɔ fɛɛ mɔ ni kwɛɔ Bi lɛ ni eheɔ enɔ eyeɔ lɛ ana naanɔ wala.” (Yohane 6:40, 51) Ani wɔheɔ enɛ wɔyeɔ? Kɛ wɔɔna hejɔɔmɔ wɔha wɔsusumai lɛ, belɛ ehe miihia ni wɔfee nakai. Wɔnyɛŋ wɔshi enɛ yɛ sɛɛ ni wɔfee nɔ ko. Yɛ anɔkwale mli lɛ, esa akɛ “wɔbumɔ dade fai ni ji yiwalaheremɔ nɔ hiɛkamɔ lɛ.” (1 Tesalonikabii 5:8; okɛto Hebribii 6:19 he.) Esa akɛ nakai hiɛnɔkamɔ lɛ abu wɔjwɛŋmɔ he, wɔsusumɔ he. Kɛ jeee nakai lɛ, haomɔi kɛ naagbai baatsii yɛ wɔnɔ aahu akɛ wɔbaaŋmɛɛ he ni naanɔ wala baaje wɔdɛŋ. Bɔni afee ni ona hejɔɔmɔ mli ŋɔɔmɔ kɛha osusuma lɛ, ha o-Maŋtsɛyeli hiɛnɔkamɔ lɛ mli awa.
Hejɔɔmɔ Ni Jɛɔ Nyɔŋmɔ Nitsumɔ Lɛ Tsumɔ Mli Baa
17. (a) Bɔni afee ni wɔna hejɔɔmɔ lɛ, mɛni ataoɔ, ni mɛni hewɔ enɛ jeee nɔ ko babaoo tsɔ kɛha wɔ lɛ? (b) Kristo pa lɛ ni wɔɔkpɛlɛ nɔ lɛ kɔɔ mɛni he?
17 Shi dani ooona hejɔɔmɔ lɛ, babaoo he miihia fe ni oooba Yesu ŋɔɔ kɛkɛ. Ekɛfata he akɛ: “Nyɛwoa mipa lɛ nyɛfɔa nyɛnɔ [aloo, “Nyɛkɛ mi abahɔa mipa lɛ shishi”] ni nyɛkasea mi; shi mihe jɔ, ni mibaa mihe shi kɛjɛ mitsui mli; ni nyɛaana hejɔɔmɔ nyɛaaha nyɛsusumai lɛ. Ejaakɛ mipa lɛ teremɔ waaa, ni mijatsu lɛ etsiii.” (Mateo 11:29, 30) Ni wɔɔŋɔ pa ko wɔtere lɛ tsɔɔ nitsumɔ. Shi kadimɔ akɛ Yesu biii ni wɔ pɛ wɔtere pa lɛ wɔ diɛŋtsɛ ni wɔtsu nitsumɔ lɛ fɛɛ. Wɔkɛ lɛ fɛɛ baatere pa lɛ. Yɛ enɛ mli lɛ, ni wɔɔkpɛlɛ pa ni Kristo kɛhaa lɛ nɔ lɛ tsɔɔ akɛ wɔjɔɔ wɔhe nɔ wɔha Nyɔŋmɔ ni wɔkɛ nu mli baptisimɔ afee enɛ he okadi, ni wɔtere gbɛnaa nii ni ji Kristo kaselɔ ni wɔɔtsɔ lɛ. Shi te aaafee tɛŋŋ ni nɛkɛ pa ni ji kaselɔ tsɔmɔ nɛɛ kɛ hejɔɔmɔ aaabaha wɔ hu?
18. (a) Mɛni hewɔ Kristo pa lɛ ni wɔɔkpɛlɛ nɔ lɛ kɛ hejɔɔmɔ bahaa wɔ lɛ? (b) Shiɛmɔ nitsumɔ lɛ kɛ miishɛɛ kɛ hejɔɔmɔ bahaa wɔ yɛ mɛɛ gbɛ nɔ?
18 Kristo pa lɛ ni wɔɔkpɛlɛ nɔ lɛ kɛ hejɔɔmɔ bahaa wɔ ejaakɛ Yesu he jɔ ni ebaa ehe shi kɛjɛɔ etsui mli. Akɛni ejeee mɔ ni nuuu sane shishi hewɔ lɛ, ekɛ nitsumɔ yɛ pa kome shishi lɛ kɛ hejɔɔmɔ baa. Esusuɔ wɔfatɔɔi kɛ wɔgbɔjɔmɔi ahe. Taakɛ ekɛɛ lɛ, “Mipa lɛ teremɔ waaa.” Lɛlɛŋ, kaselɔfeemɔ pa lɛ kɛ nitsumɔ baa, nakai shiɛmɔ kɛ nitsumɔ ni Yesu tsu ni etsɔse eklɛŋklɛŋ kaselɔi lɛ ni amɛtsu lɛ nɔŋŋ. (Mateo 28:19, 20; Bɔfoi lɛ Asaji 1:8) Ni kɛlɛ, mɛɛ hejɔɔmɔ nitsumɔ enɛ ji akɛ wɔɔgba mɛi krokomɛi wɔ-Nyɔŋmɔ ni yɔɔ suɔmɔ lɛ kɛ e-Bi lɛ kɛ Maŋtsɛyeli lɛ he sane! Kwɛ hejɔɔmɔ ni enɛ ji akɛ wɔɔtsɔɔ gbɔmɛi lɛ bɔ ni amɛaafee ni amɛhi shi kɛya naanɔ yɛ Paradeiso! Ni kɛ amɛhere Maŋtsɛyeli lɛ he sane ni haa wala nɛɛ nɔ ni amɛfata wɔhe yɛ Yehowa sɔɔmɔ mli lɛ, kwɛ bɔ ni wɔmiishɛɛ lɛ daa babaoo ehaa!—1 Timoteo 4:16.
19. Mɛni hewɔ Mose shaanuu lɛ ŋaawoo lɛ sa kadimɔ kɛha asafoŋ onukpai ni yɔɔ ŋmɛnɛ lɛ?
19 Gbɔmɛi akpekpei abɔ ni yelikɛbuamɔ he hiaa amɛ koni amɛkpɛlɛ Kristo pa lɛ nɔ lɛ kɛ amɛhe ebabɔ Yehowa asafo lɛ he yɛ nyɛsɛɛ afii nɛɛ amli, ni enɛ haa Maŋtsɛyeli jajelɔi kɛ mɛi ni kwɛɔ amɛnɔ lɛ anitsumɔ lɛ bafaa babaoo. Kɛha nɛkɛ mumɔŋ tookwɛlɔi nɛɛ lɛ, ŋaawoo ni Mose nine shɛ nɔ kɛjɛ eshaanuu lɛ dɛŋ lɛ sa kadimɔ. Ewo Mose ŋaa akɛ: “Nɔ ni ofeɔ nɛɛ ehiii. Ebaatɔo, bo kɛ maŋ ni fata ohe nɛɛ; shi nii nɛɛ tsii tsɔ hao, okome toɔ onyɛŋ ofee.” No hewɔ lɛ ewo Mose ŋaa ni ehala hii ni sa ni amɛna gbɔmɛi lɛ akwɛmɔ nitsumɔ lɛ mli gbɛfaŋnɔ. Akɛni etsu ŋaawoo nɛɛ he nii hewɔ lɛ, eye omanye. (2 Mose 18:17-27) Ŋmɛnɛ, tsɔsemɔ ni ayaa nɔ akɛhaa lɛ baaha ana hii ni sa, “nikeenii yɛ gbɔmɛi ateŋ,” ni baanyɛ ana toi lɛ akwɛmɔ mli gbɛfaŋnɔ bɔni afee ni ekatɔ asafoŋ onukpai lɛ tsɔ.—Efesobii 4:8, 16.
20. Mɛni Yesu Kristo kɛ e-Tsɛ lɛ biɔ yɛ wɔdɛŋ?
20 Eyɛ mli akɛ Kristo wo esɛɛnyiɛlɔi lɛ hewalɛ akɛ amɛmia amɛhiɛ waa moŋ, shi lɛ loo e-Tsɛ lɛ biii ni wɔfee fe bɔ ni wɔɔnyɛ. Be ko, beni mɛi komɛi ka Maria ni ji Lazaro nyɛmiyoo lɛ hiɛ yɛ mɔdɛŋ ni ebɔɔ yɛ Yesu he lɛ hewɔ lɛ, Yesu ka amɛhiɛ, akɛ: “Nyɛŋmɛa ehe. . . . Etsu nɔ ni ebaanyɛ.” (Marko 14:6-8, New World Translation; Luka 13:24) Ni no pɛ ji nɔ ni ataoɔ yɛ wɔdɛŋ—ni wɔfee nɔ ni wɔbaanyɛ. Kristofoi anitsumɔ ni tamɔ nɛkɛ jeee jatsu shi moŋ eji hejɔɔmɔ. Mɛni hewɔ? Ejaakɛ ekɛ tsui ni nyɔɔ mɔ mli diɛŋtsɛ baa bianɛ kɛ naanɔ sɛɛnamɔi ni ma shi shiŋŋ he hiɛnɔkamɔ yɛ wɔsɛɛ be mli.
21. (a) Mɛni ji Kristo jatsu ni etsiii lɛ, ni mɛni haa shiɛmɔ nitsumɔ lɛ feɔ nɔ ni wa yɛ bei komɛi amli lɛ? (b) Mɛni esa akɛ efee wɔfaishitswaa ni ma shi shiŋŋ, kɛ mɛɛ gbɛkpamɔ ni ma shi shiŋŋ?
21 Lɛlɛŋ, Satan baakwɛ koni awa wɔ yi, taakɛ bɔ ni afee wɔnaanyo ni wɔkɛ lɛ tereɔ pa, ni ji Yesu Kristo lɛ. (Yohane 15:20; 2 Timoteo 3:12) Shi kaimɔ akɛ jeee Kristo jatsu lɛ ji nɔ ni tsii lɛ. Shi moŋ, Satan kɛ enajiaŋdamɔlɔi lɛ ashitee-kɛ-woo lɛ ji nɔ ni haa wɔnitsumɔ lɛ feɔ nɔ ni wa yɛ bei babaoo mli lɛ. Nɔ ni ji Kristo jatsu lɛ pɛ ji ni wɔhi shi yɛ Nyɔŋmɔ taomɔ nii anaa, ni enɛɛmɛi hu etsiii. (1 Yohane 5:3) Belɛ eba akɛ wɔɔya nɔ ni wɔkɛ Yesu Kristo ahi epa lɛ shishi, ni wɔwaje wɔhe yɛ shiɛmɔ kɛ nitsɔɔmɔ nitsumɔ lɛ mli, taakɛ bɔ ni efee lɛ. Kɛ wɔfee nakai lɛ, taakɛ ewo shi lɛ, ‘wɔbaana hejɔɔmɔ wɔha wɔsusumai lɛ.’
Te Obaaha Hetoo Oha Tɛŋŋ?
◻ Taakɛ Romabii 8:22 tsɔɔ Iɛ, mɛni efee shihilɛ ni adesai yɔɔ mli?
◻ Yɛ mɛɛ gbɛi anɔ nɛkɛ anɔkwale lɛ lee kɛ hejɔɔmɔ baa yɛ?
◻ Mɛni hewɔ Maŋtsɛyeli hiɛnɔkamɔ lɛ haa mɔ he jɔɔ Iɛ nakai lɛ?
◻ Mɛni ji Yesu pa lɛ, ni mɛni hewɔ etsiii Iɛ?
◻ Mɛɛ jatsu ni wɔɔtere kɛ hejɔɔmɔ baaba abaha wɔ?