Yitso 69
Sane ni Kɔɔ Mɔ ni ji Amɛtsɛ He Lɛ
YƐ BE mli ni ayeɔ gbijurɔ lɛ, sane ni Yesu kɛ Yudafoi ahiɛnyiɛlɔi lɛ susuɔ he lɛ mli bawa. Yesu kpɛlɛ nɔ akɛ: “Mile akɛ Abraham seshibii ji nyɛ; shi kɛlɛ nyɛmiitao mi nyɛgbe, ejaakɛ miwiemɔi lɛ hooo nyɛmli. Mi lɛ, nii ni mina yɛ mi-Tsɛ he lɛ, no miwieɔ; ni nyɛ hu, nii ni nyɛnu yɛ nyɛtsɛ naa lɛ, no nyɛfeɔ.”
Eyɛ mli akɛ etsɔɔɔ mɔ ni amɛtsɛ ji moŋ, shi Yesu fee lɛ faŋŋ akɛ esoro amɛtsɛ yɛ etsɛ he. Akɛni amɛleee mɔ ni yɔɔ Yesu jwɛŋmɔ mli hewɔ lɛ, Yudafoi ahiɛnyiɛlɔi lɛ here nɔ akɛ: “Wɔtsɛ ji Abraham.” Amɛsusuɔ akɛ amɛyɛ hemɔkɛyeli ni Abraham, ni ji Nyɔŋmɔ shieŋtsɛ lɛ na lɛ nɔŋŋ eko.
Shi kɛlɛ, Yesu hetoo lɛ ha amɛnaa kpɛ amɛhe: “Abraham bii ji nyɛ jikulɛ, nyɛaatsu Abraham nitsumɔi.” Yɛ anɔkwale mli lɛ, bi ni ji bi diɛŋtsɛ lɛ kaseɔ etsɛ. “Shi agbɛnɛ nyɛmiitao mi nyɛgbe,” Yesu kɛɛ, “mi gbɔmɔ ko ni mikɛɛ nyɛ anɔkwale ni minu yɛ Nyɔŋmɔ naa lɛ. Abraham efeee enɛ.” No hewɔ lɛ Yesu kɛɛ amɛ ekoŋŋ akɛ: “Nyɛ lɛ, nyɛtsɛ nitsumɔi nyɛtsuɔ lɛ.”
Ni kɛlɛ amɛnaaa mɔ ni Yesu wieɔ ehe lɛ. Amɛtee nɔ amɛtsɔɔ akɛ amɛji Abraham bii yɛ mla naa ni amɛkɛɛ akɛ: “Wɔ lɛ, afɔɔɔ wɔ yɛ ajwamaŋbɔɔ mli.” No hewɔ lɛ, akɛni amɛkɛɔ akɛ amɛji anɔkwa jalɔi tamɔ Abraham hewɔ lɛ, amɛwie akɛ: “Tsɛ kome wɔyɔɔ; lɛ ji Nyɔŋmɔ.”
Shi ani Nyɔŋmɔ ji amɛ-Tsɛ lɛlɛŋ? Yesu ha hetoo akɛ: “Nyɔŋmɔ ji nyɛ-Tsɛ kulɛ, nyɛaasumɔ mi; ejaakɛ mi lɛ Nyɔŋmɔ ŋɔɔ mijɛ miba; shi asaŋ mitooo mi diɛŋtsɛ miyiŋ mibaaa, shi moŋ lɛ etsu mi. Shi mɛɛ hewɔ nyɛnaaa miwiemɔ naa lɛ?”
Yesu ebɔ mɔdɛŋ aahu akɛ eeetsɔɔ nɛkɛ jamɔ mli hiɛnyiɛlɔi nɛɛ nɔ ni baajɛ kpoomɔ ni amɛkpoo lɛ lɛ mli aba. Shi agbɛnɛ ekɛɛ amɛ yɛ faŋŋ mli akɛ: “Nyɛ lɛ nyɛtsɛ ni nyɛjɛ emli ji Abonsam, ni nyɛtsɛ lɛ tsinebaa nii nyɛsumɔɔ akɛ nyɛfee.” Ni mɛɛ tsɛ Abonsam ji? Yesu tsɛ lɛ akɛ gbɔmɔgbelɔ ni ekɛɛ hu akɛ: “Amalelɔ kɛ malemɔtsɛ ji lɛ.” No hewɔ lɛ, Yesu mu sane lɛ naa akɛ: “Mɔ ni jɛ Nyɔŋmɔ mli lɛ, enuɔ Nyɔŋmɔ wiemɔi; no hewɔ ni nyɛ lɛ nyɛnuuu lɛ, ejaakɛ nyɛjɛɛɛ Nyɔŋmɔ mli.”
Akɛni bɔ ni Yesu bu amɛ fɔ nɛɛ wo amɛ mlila waa hewɔ lɛ, Yudafoi lɛ ha lɛ hetoo akɛ: “Ani jeee egbɛnaa wɔkɛɛ akɛ Samarianyo jio, ni daimonio hu yɛ omli?” Amɛkɛ wiemɔ “Samarianyo” lɛ tsuɔ nii ni amɛkɛtsɔɔ mɔ ko ni abuuu lɛ loo agbeɔ ehe guɔ, ejaakɛ Samariabii lɛ ji mɛi komɛi ni Yudafoi lɛ nyɛɔ amɛ.
Yesu ku ehiɛ efɔ jɛmɔ ni amɛjɛ lɛ akɛ etamɔ Samarianyo nɛɛ nɔ ni eha amɛ hetoo akɛ: “Daimonio bɛ mimli, shi miiwo mi-Tsɛ, ni nyɛ lɛ nyɛmiigbe mihe guɔ moŋ.” Kɛkɛ ni Yesu tee nɔ ekɛ shiwoo ni yɔɔ naakpɛɛ nɛɛ ha akɛ: “Kɛji mɔ ko ye miwiemɔi lɛ anɔ lɛ, enaŋ gbele kɛaatee naanɔ.” Yɛ anɔkwale mli lɛ, Yesu etsɔɔɔ akɛ mɛi ni nyiɛɔ esɛɛ lɛ enaŋ gbele kɔkɔɔkɔ yɛ heloo mli. Shi moŋ, eetsɔɔ akɛ amɛnaŋ naanɔ hiɛkpatamɔ, aloo “gbele ni ji enyɔ,” ni gbohiiashitee ko bɛ mli lɛ.
Shi kɛlɛ, Yudafoi lɛ miisusu Yesu wiemɔi ni ewie lɛ ahe yɛ hiɛaŋhiɛaŋ kɛkɛ. No hewɔ lɛ, amɛkɛɛ akɛ: “Kpaako wɔna wɔle akɛ daimonio yɛ omli. Abraham gbo, ni gbalɔi lɛ hu gboi, ni bo lɛ okɛɔ akɛ: Kɛji mɔ ko ye miwiemɔi lɛ nɔ lɛ, esaŋ enaa gbele kwraa kɛaatee naanɔ. Ani ofe wɔtsɛ Abraham ni gbo lɛ? Ni gbalɔi lɛ hu gboi. Te otsɛɔ ohe tɛŋŋ nɛɛ?”
Anaa faŋŋ yɛ sanegbaa muu nɛɛ fɛɛ mli akɛ Yesu miitsɔɔ gbɔmɛi nɛɛ gbɛ kɛmiiya anɔkwale ni eji akɛ lɛ ji Mesia ni awo shi yɛ ehe lɛ he. Shi yɛ nɔ najiaŋ ni eeeha amɛsanebimɔ yɛ mɔ ni eji lɛ hetoo tɛɛ lɛ, Yesu kɛɛ akɛ: “Kɛji miwo mi diɛŋtsɛ mihiɛ nyam lɛ, minunyam lɛ jeee nɔ ko; mi-Tsɛ ji mɔ ni woɔ mihiɛ nyam, mɔ ni nyɛkɛɔ akɛ nyɛ-Nyɔŋmɔ ji lɛ lɛ; ni nyɛyooko lɛ, shi mi lɛ mile lɛ; ni kɛji mikɛɛ akɛ mileee lɛ lɛ, matsɔ amalelɔ tamɔ nyɛ.”
Yesu tee nɔ ekoŋŋ ni ewie Abraham anɔkwafo lɛ he ni ekɛɛ akɛ: “Nyɛtsɛ Abraham mli fili lɛ akɛ eeena migbii lɛ, ni ena ni emii shɛ.” Hɛɛ, Abraham kɛ hemɔkɛyeli hiŋmɛii kwɛ Mesia ni awo shi yɛ ehe lɛ baa lɛ gbɛ. Yudafoi lɛ heee enɛ amɛyeee, no hewɔ lɛ amɛkɛɛ: “Onako oye afii nyɔŋmai enumɔ, ni ona Abraham lo?”
Yesu ha amɛ hetoo akɛ: “Lɛlɛŋ, lɛlɛŋ, miikɛɛ nyɛ akɛ: Miyɛ dani Abraham yɔɔ.” Yɛ anɔkwale mli lɛ, Yesu miiwie eshihilɛ akɛ mumɔŋ gbɔmɔ ni yɔɔ hewalɛ waa yɛ ŋwɛi dani ebatsɔ adesa lɛ he.
Akɛni Yesu wiemɔi akɛ eyɛ dani Abraham yɔɔ lɛ wo amɛmlila waa hewɔ lɛ, Yudafoi lɛ kɔlɔ tɛi akɛ amɛkɛbaatswia lɛ. Shi etee ehe ni eje kpo kɛjɛ sɔlemɔ tsu lɛ mli ni amɛyeko lɛ awui ko. Yohane 8:37-59; Kpojiemɔ 3:14; 21:8.
▪ Mɛɛ gbɛ nɔ Yesu tsɔɔ yɛ akɛ lɛ kɛ ehenyɛlɔi lɛ yɛ tsɛmɛi sɔrɔtoi?
▪ Mɛni ji shishinumɔ ni yɔɔ tsɛ ni Yudafoi lɛ tsɛ Yesu akɛ Samarianyo lɛ he?
▪ Mɛɛ shishinumɔ naa Yesu tsɔɔ yɛ akɛ esɛɛnyiɛlɔi lɛ enaŋ gbele kɔkɔɔkɔ lɛ?