Mɔ̃ Hegbɛ ni Ekaaa Nɛɛ Mli!

BENI Biblia mli yiwalaheremɔ he shɛɛ sane lɛ tee Peter miishɛɛ shi waa lɛ, no mli lɛ etee hiɛ waa yɛ tsofafeemɔ nitsumɔ he nii ni ekaseɔ lɛ mli. Beni egbe nikasemɔ naa ni ebɔi nitsumɔ akɛ datrɛfonyo yɛ helatsamɔ he ko lɛ, enitsumɔ mli onukpai lɛ tee nɔ amɛwo lɛ hewalɛ koni ekase wolo jogbaŋŋ kɛya hiɛ ní ebatsɔ henumɔŋ fãji ahe opireshɛn-feelɔ. Naa hegbɛ ko ni mɛi ni batsɔmɔɔ datrɛfoi heei lɛ baamɔ̃ mli oya.

Ni kɛlɛ, Petera kpɛ eyiŋ akɛ ebaaŋmɛɛ hegbɛ nɛɛ he. Mɛni hewɔ? Ani oti ni akɛmaa hiɛ kɛ nii ni he hiaa ni kanyaa mɔ lɛ eko kɛkɛ ni ebɛ hewɔ? Dabi, ejaakɛ Peter susu nii ni akɛhaa lɛ nɛɛ he jogbaŋŋ diɛŋtsɛ. Beni ebatsɔ Yehowa Odasefonyo ni ejɔɔ ehe nɔ ní ábaptisi lɛ lɛ, ebasumɔ akɛ ekɛ be babaoo diɛŋtsɛ ni eeenyɛ baatsu Kristofoi asɔɔmɔ nitsumɔ lɛ fãi sɔrɔtoi lɛ ahe nii. Esusu akɛ, kɛ́ ena egbe nikasemɔ naa ni ebatsɔ henumɔŋ fãji ahe opireshɛn-feelɔ lɛ, enitsumɔ lɛ baahe ebe kɛ ehewalɛ babaoo diɛŋtsɛ. Ani efee ehe buulu akɛni eŋmɛɛ nii krɛdɛɛ ni ekɛma ehiɛ nɛɛ he, aloo eji nilelɔ?

Kɛha mɛi komɛi lɛ, Peter yiŋkpɛɛ lɛ tamɔ buulu-feemɔ. Shi kɛlɛ, esusu Biblia mli ŋmalɛi tamɔ Efesobii 5:15, 16 he. Bɔfo Paulo wo nanemɛi Kristofoi ahewalɛ yɛ jɛmɛ akɛ: “Nyɛkwɛa bɔ ni nyɛaafee ni nyɛkɛ hiɛtɛjemɔ anyiɛ, jeee tamɔ mɛi ni leee nii, shi moŋ tamɔ nilelɔi, mɛi ni tsuɔ amɛdekã [be ni sa jogbaŋŋ lɛ, NW] he nii, ejaakɛ gbii nɛɛ gbii fɔji ni.”

Ofainɛ ni okadi wiemɔ ‘dekã’ loo “be ni sa jogbaŋŋ” lɛ. Atsɔɔ shishi kɛjɛ Hela wiemɔ ni bei pii lɛ akɛtsuɔ nii yɛ Biblia lɛ mli akɛwieɔ be loo be kakadaŋŋ ni sui komɛi kadiɔ lɛ loo ni hi kɛha nitsumɔ pɔtɛɛ ko lɛ he. Paulo ma nɔ mi yɛ biɛ akɛ esa akɛ Kristofoi ato be kɛha nii ni he hiaa. Yɛ anɔkwale mli lɛ, ehe miihia ni ‘amɛyoo nii ni hi titri lɛ.’ (Filipibii 1:10) Eji nii ni akɛyeɔ klɛŋklɛŋ gbɛhe.

No hewɔ lɛ, belɛ, mɛni ji ŋwɛi yiŋtoo kɛha wɔbe nɛɛ? Mɛni ji Nyɔŋmɔ suɔmɔnaa nii kɛha mɛi ni sumɔɔ lɛ lɛ? Biblia mli gbalɛi yɔseɔ wɔgbii lɛ yɛ faŋŋ mli akɛ “naagbee be lɛ,” loo “naagbee gbii lɛ.” (Daniel 12:4; 2 Timoteo 3:1) Kristo Yesu haaa ana yiŋkɔshikɔshi-feemɔ ko yɛ nɔ ni baafee nɔ ni he hiaa fe fɛɛ yɛ wɔgbii nɛɛ amli lɛ he. Ewie faŋŋ akɛ, dani ŋmɛnɛŋmɛnɛ nibii agbɛjianɔtoo fɔŋ lɛ aaaba naagbee lɛ, “aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase.” Ni no dani naagbee lɛ aaaba.—Mateo 24:3, 14.

No hewɔ lɛ, ehe miihia ni wɔmɔ̃ hegbɛ fɛɛ hegbɛ ni wɔkɛaashiɛ Maŋtsɛyeli lɛ he sanekpakpa lɛ mli ni wɔfee kaselɔi. (Mateo 28:19, 20) Akɛni nitsumɔi nɛɛ ji nɔ ni atsuŋ-eko-dɔŋŋ hewɔ lɛ, naagbee hegbɛ ni wɔná akɛ wɔkɛ nɔ fɛɛ nɔ ni wɔyɔɔ lɛ aaatsu nii yɛ yiwalaheremɔ nitsumɔ nɛɛ mli lɛ nɛ. “Be ni sa jogbaŋŋ nɛ.” Yɛ anɔkwale mli lɛ, “walaheremɔ gbi nɛ.”—2 Korintobii 6:2.

Ní Aaakpɛ Yiŋ yɛ Nilee Mli

Peter—obalanyo ni atsĩ etã kɛtsɔ hiɛ lɛ—susu eyiŋkpɛɛ lɛ he jogbaŋŋ ni epɛi nibii amli ni ehalaa lɛ mli ekwɛ. Eyoo akɛ ebafeŋ tɔmɔ akɛ eeekase nii kɛ yiŋtoo akɛ ebaatsɔ henumɔŋ fãji ahe opireshɛn-feelɔ. Shi mɛni he hiaa lɛ fe fɛɛ? No ji nii ni etsuɔ yɛ Kristofoi asɔɔmɔ nitsumɔ lɛ mli lɛ, ni esusu bɔ ni hiamɔ eba nitsumɔ nɛɛ he lɛ he. Yɛ nakai beaŋ nɔŋŋ lɛ, eyɛ gbɛnaa nii ni esa akɛ etsu he nii. Ébote gbalashihilɛ mli ni esa akɛ eye ebua eŋa ni kɛ ebe fɛɛ woɔ shiɛmɔ nitsumɔ lɛ mli lɛ. (1 Timoteo 5:8) Esa akɛ Peter awo nyɔji ni ehiɛ yɛ eskul nikasemɔ hewɔ lɛ. Belɛ, mɛni ekoŋŋ ekpɛ eyiŋ akɛ ebaafee?

Peter kpɛ eyiŋ akɛ ebaakase la-kpɛmɔ hewalɛ ni akɛtsaa hela lɛ he nii, koni ekase gbɛɛmɔ-hewalɛ ni akɛnaa gbɔmɔtso mli hela lɛ he nii. Enɛ ji nitsumɔ ni baafee edaa gbi nitsumɔ. Agbɛnɛ hu, ebaakase nitsumɔ lɛ yɛ ŋmɛlɛtswai ni akɛtsuɔ nii lɛ mli. Hɛɛ, mɛi komɛi baabu enɛ akɛ nitsumɔ ni bulɛ bɛ mli tsɔ̃, shi ebaaha ena be babaoo koni ekɛdi mumɔŋ nibii asɛɛ.

Sane hesusumɔ kroko hu kanya Peter yiŋkpɛɛ. Yɛ be mli ni ekojooo mɛi krokomɛi ni ekolɛ amɛkpɛ yiŋ kroko lɛ, ele akɛ ni akɛ he aaawo heloonaa nitsumɔi amli vii lɛ kɛ oshara baa Kristofonyo nɔ. Ebaanyɛ eha eku ehiɛ eshwie mumɔŋ gbɛnaa nii anɔ. Akɛ nɔkwɛmɔ nɔ kroko ni kɔɔ nitsumɔ he fee he mfoniri.

Atsɔse Maŋtsɛyeli be-fɛɛ shiɛlɔ ko akɛ nitɛŋlɔ. Enyɛ etsu nii kɛkwɛ ehe yɛ nibii ni etɛŋɔ ni ehɔɔ lɛ hewɔ. Beni ekɛ ebe lɛ babaoo tsuɔ Kristofoi asɔɔmɔ nitsumɔ ni he hiaa fe fɛɛ lɛ, enyɛɔ etsuɔ nii ekɛkwɛɔ ehe jogbaŋŋ. Shi kɛlɛ, bɔ ni esumɔɔ ni eha enitɛŋmɔ nitsumɔ lɛ aya hiɛ lɛ bada. Ekɛ ehe bawo nitɛŋmɔ kɛ nibii fɛfɛji afeemɔ nitsumɔ lɛ mli vii, eshi be-fɛɛ sɔɔmɔ lɛ, ni yɛ sɛɛ mli lɛ ekɛ ehe wooo Maŋtsɛyeli-shiɛmɔ nitsumɔ lɛ mli kwraa dɔŋŋ. Beni shɛ be ko lɛ, ekɛ ehe bawo jeŋba ni teɔ shi woɔ ŋmalɛ lɛ mli, ni nɔ ni jɛ mli ba ji akɛ ejeee Kristofoi asafo lɛ mli nyo dɔŋŋ.—1 Korintobii 5:11-13.

Be ni Wɔyɔɔ Mli lɛ Yɛ Sɔrɔto Kwraa

Ákɛ mɛi ni sɔmɔɔ Yehowa bianɛ lɛ, eka shi faŋŋ akɛ wɔmiisumɔ ni wɔya nɔ wɔye lɛ anɔkwa. Wɔle akɛ wɔyɛ be ni yɔɔ sɔrɔto kwraa mli yɛ adesa yinɔsane mli. Bɔni afee ni wɔya nɔ wɔsɔmɔ Nyɔŋmɔ ni wɔdamɔ ŋmɛnɛŋmɛnɛ shihilɛi lɛ anaa kɛmɔ shi lɛ, ekolɛ ehe baahia ni wɔfee tsakemɔi sɔrɔtoi. Wɔbaanyɛ wɔkɛ enɛ ato okwaafonyo nikpamɔ be he. No ji be kɛha nitsumɔ krɛdɛɛ ko, beni akpaa ŋmɔ mli nitsulɔi agbɛ akɛ amɛmia amɛhiɛ babaoo fe bɔ ni eji daa, ni amɛkɛ gbii babaoo atsu nii. Mɛni hewɔ? Ejaakɛ esa akɛ abua nikpamɔ lɛ naa yɛ be kuku mli.

Be fioo pɛ eshwɛ kɛha ŋmɛnɛŋmɛnɛ nibii agbɛjianɔtoo fɔŋ nɛɛ. Amrɔ nɛɛ, ehe miihia ni anɔkwa Kristofonyo amia ehiɛ koni enyiɛ Yesu nɔkwɛmɔ nɔ lɛ sɛɛ, ni enyiɛ enajifaamɔi asɛɛ fe be fɛɛ ni eho. Eshihilɛ yɛ shikpɔŋ nɔ lɛ tsɔɔ nɔ ni he hiaa lɛ fe fɛɛ lɛ yɛ faŋŋ mli. Ekɛɛ: “Wɔ lɛ, ni je etsɛre nɛɛ, ja wɔtsu mɔ ni tsu wɔ lɛ nitsumɔi lɛ; je baana, beni mɔ ko nyɛŋ nii atsu.” (Yohane 9:4) Beni Yesu wieɔ akɛ je miina lɛ, no mli lɛ eewie be ni abaaka lɛ, esɛŋmɔ, kɛ egbele lɛ he, beni eshikpɔŋ nɔ sɔɔmɔ lɛ baaba naagbee ni enyɛŋ ekɛ ehe awo eŋwɛi Tsɛ lɛ nitsumɔi amli lɛ he.

Eji anɔkwale akɛ, yɛ Yesu sɔɔmɔ ni he afii etɛkɛfã lɛ mli lɛ, ekɛ ebe lɛ eko tsu nii ekɛfee naakpɛɛ nibii, ni etsa mɛi ni he yeɔ lɛ ahelai. Yɛ fɛɛ sɛɛ lɛ, ekɛ ebe lɛ titri tsu nii ekɛshiɛ Maŋtsɛyeli he shɛɛ sane lɛ koni “eshiɛ jiemɔ eha mɛi ni” apasa jamɔ “eŋɔ amɛ nom lɛ.” (Luka 4:18, NW; Mateo 4:17) Yesu mia ehiɛ waa yɛ esɔɔmɔ nitsumɔ lɛ mli, ni eto be ema shi hu ni ekɛtsɔse ekaselɔi lɛ koni amɛnyɛ amɛtswa nitsumɔ lɛ amɛma shishitoo nii ni ekɛha lɛ nɔ, koni amɛya nɔ amɛtsu shiɛmɔ nitsumɔ lɛ kɛmɔ shi. Yesu mɔ̃ hegbɛ fɛɛ hegbɛ ni ekɛaaha Maŋtsɛyeli nibii lɛ aya hiɛ lɛ mli, ni eesumɔ ni ekaselɔi lɛ afee nakai nɔŋŋ.—Mateo 5:14-16; Yohane 8:12.

Taakɛ Yesu ji lɛ, ehe miihia ni wɔ mɛi ni wɔji esɛɛnyiɛlɔi ni yɔɔ ŋmɛnɛŋmɛnɛ beaŋ lɛ ana bɔ ni adesai ashihilɛ efee eha taakɛ Yehowa Nyɔŋmɔ naa lɛ lɛ. Be ni yɔɔ kɛha nibii agbɛjianɔtoo nɛɛ miitã, ni Nyɔŋmɔ ejɛ mɔbɔnalɛ mli eesumɔ ni mɔ fɛɛ mɔ ana hegbɛ kɛha yiwalaheremɔ. (2 Petro 3:9) No hewɔ lɛ, ani ebafeŋ nilee gbɛ akɛ wɔkɛ nibii krokomɛi fɛɛ ni atiuɔ sɛɛ lɛ aaaye Yehowa suɔmɔnaa nifeemɔ sɛɛ? (Mateo 6:25-33) Titri lɛ, yɛ be krɛdɛɛ ni tamɔ nɛkɛ mli lɛ, nɔ ko ni kulɛ abaanyɛ abu lɛ akɛ ehe hiaa lɛ baanyɛ afee nɔ ni he ehiaaa tsɔ yɛ wɔ shihilɛi amli akɛ Kristofoi.

Ani wɔteŋ mɔ ko baashwa ehe gbi ko akɛ ekɛ Nyɔŋmɔ suɔmɔnaa nii ye klɛŋklɛŋ yɛ eshihilɛ mli? Dabi kwraa, ejaakɛ Kristofonyo he-kɛ-afɔleshaa gbɛ lɛ kɛ nyɔmɔwoo ni yɔɔ naakpɛɛ baa. Akɛ nɔkwɛmɔ nɔ lɛ, Yesu kɛɛ ekaselɔi lɛ akɛ: “Lɛlɛŋ, miikɛɛ nyɛ akɛ: Mɔ ko bɛ ni eshi shia loo nyɛmimɛi hii loo nyɛmimɛi yei loo tsɛ loo nyɛ loo ŋa loo bii loo abɔɔi yɛ mi kɛ sanekpakpa lɛ hewɔ, ni enaŋ shiai kɛ nyɛmimɛi hii kɛ nyɛmimɛi yei kɛ nyɛmɛi kɛ bii kɛ abɔɔi toi oha yɛ benɛ be nɛɛ mli beebe, kɛ yiwalɛ hu, ni jeŋ ni baaba lɛŋ hu eeena naanɔ wala.”—Marko 10:29, 30.

Mɔ ko kwraa nyɛŋ ekɛ shika jara atsɔɔ nyɔmɔwoi ni mɛi ni kɛ amɛbe tsuɔ nii kɛjieɔ Yehowa yi ni amɛkɛjajeɔ Maŋtsɛyeli shɛɛ sane lɛ naa mli ŋɔɔmɔ lɛ naa. Amɛnaa jɔɔmɔi babaoo mli ŋɔɔmɔ! Nɔ ni fata enɛɛmɛi ahe ji nanemɛi kpakpai, tsui ni nyɔɔ mɔ mli yɛ Nyɔŋmɔ suɔmɔnaa nifeemɔ mli, Nyɔŋmɔ nɔkpɛlɛmɔ ŋmɔlɔ, kɛ gbɛkpamɔ akɛ aaana wala ni baŋ naagbee. (Kpojiemɔ 21:3, 4) Ni mɛɛ jɔɔmɔ eji akɛ aaaye abua mɛi yɛ mumɔŋ, ni awo Yehowa gbɛi krɔŋkrɔŋ lɛ hiɛ nyam akɛ e-Dasefoi! Sane ko kwraa bɛ he akɛ, ‘be ni hi jogbaŋŋ ni aaahe’ lɛ ji gbɛ ni nilee kɛ nyɔmɔwoo yɔɔ mli lɛlɛŋ. Amrɔ nɛɛ ji be ni akɛ he aaawo Nyɔŋmɔ Maŋtsɛyeli lɛ sanekpakpa lɛ jajemɔ mli fe be fɛɛ ni eho. Ani obaamɔ hegbɛ ni esoro no kwraa nɛɛ mli ni otsu he nii?

[Shishigbɛ niŋmaa]