Nyɔŋmɔ Kɛ E-Bi Lɛ He Anɔkwale Nilee Kɛ Mɔ Yaa Wala Mli
“Enɛ ji naanɔ wala lɛ, akɛ amɛaana bo anɔkwale Nyɔŋmɔ koome pɛ Iɛ kɛ Yesu Kristo, mɔ ni otsu Iɛ Iɛ he nilee.”—YOHANE 17:3, NEW WORLD TRANSLATION.
1. Mɛni hewɔ Nyɔŋmɔ kɛ Yesu Kristo he anɔkwale nilee he hiaa lɛ?
NYƆŊMƆ kɛ e-Bi Yesu Kristo he anɔkwale nilee he mihia mɛi ni taoɔ ni amɛna naanɔ wala lɛ. “[Nyɔŋmɔ] sumɔ akɛ ehere gbɔmɛi fɛɛ yiwala, koni amɛshɛ anɔkwale lɛ lee mli.” (1 Timoteo 2:4) Nilee ni tamɔ nɛkɛ ni jɛ Nyɔŋmɔ mumɔ naa Wiemɔ ni ji Biblia lɛ mli lɛ baawula wɔ ni wɔle mɔ ni Nyɔŋmɔ ji kɛ gbɛnaa nii ni jwere wɔ nɔ yɛ ehiɛ. (2 Timoteo 3:16, 17; 1 Yohane 2:17) Ebaaye ebua wɔ hu ni wɔyoo Yesu Kristo kɛ wekukpaa ni ka wɔkɛ lɛ teŋ lɛ jogbaŋŋ.—Lala 2:12; Filipibii 2:5-11.
2. Mɛni baanyɛ aba kɛ anɔkwale nilee bɛ?
2 Kɛ anɔkwale nilee bɛ lɛ, apasa tsɔɔmɔi ni Nyɔŋmɔ henyɛlɔ Satan Abonsam, ni eji “amalelɔ kɛ malemɔtsɛ” lɛ kɛbaa lɛ baanyɛ atsɔ wɔ tsɔne. (Yohane 8:44) No hewɔ lɛ, kɛji akɛ tsɔɔmɔ ko teɔ shi woɔ Nyɔŋmɔ Wiemɔ lɛ, kɛ eji amale lɛ, belɛ he ni aaahe enɛ aye ni atsɔɔ enɛ lɛ gbeɔ Yehowa he guɔ ni ehaa wɔbafeɔ mɛi ni wɔte shi wɔwo lɛ. No hewɔ lɛ ehe miihia ni wɔpɛi Ŋmalɛi lɛ amli jogbaŋŋ ni wɔnyɛ wɔjie anɔkwale lɛ kɛjɛ amale lɛ mli. (Bɔfoi lɛ Asaji 17:11) Wɔsumɔɔɔ ni wɔtamɔ mɛi ni “kaseɔ nii daa, shi kɛlɛ amɛnyɛɛɛ amɛshɛ anɔkwale lɛ lee he” lɛ.—2 Timoteo 3:1, 7.
3. Mɛni ji Biblia lɛ mlitsɔɔmɔ ni mli ka shi faŋŋ ni kɔɔ Nyɔŋmɔ, Yesu Kristo kɛ Mumɔ Krɔŋkrɔŋ lɛ he?
3 Taakɛ wɔtsɔ hiɛ wɔna yɛ nikasemɔ ni tsɔ enɛ hiɛ lɛ mli lɛ, Triniti lɛ he tsɔɔmɔ lɛ jeee Biblia mli tsɔɔmɔ. Nyɔŋmɔ kɛɔ wɔ yɛ lɛ diɛŋtsɛ e-Wiemɔ lɛ mli faŋŋ akɛ lɛ ji nibii fɛɛ Bɔlɔ ni akɛ eklɛŋklɛŋ bɔɔ nɔ yɛ ŋwɛi ji e-Bi lɛ. (Kpojiemɔ 4:11; Kolosebii 1:15, 16) Nyɔŋmɔ tsu e-Bi lɛ kɛba shikpɔŋ nɔ akɛ adesa koni ekɛ kpɔmɔ afɔle abaha, ni enɛ ji nɔ ni akɛtsu nii akɛ no nɔ abaadamɔ ni akɛ adesai ahe eshai ake amɛ, koni etsɔɔ gbɔmɛi anɔkwafoi lɛ gbɛ lolo yɛ nibii ni kɔɔ Nyɔŋmɔ kɛ eyiŋtoi lɛ ahe. (Mateo 20:28; Yohane 6:38) Kɛlɛ, tsɔɔmɔ ni waaa ni mli ka shi faŋŋ akɛ Nyɔŋmɔ kɛ Kristo ji gbɔmɛi sɔrɔtoi enyɔ, ni akɛ mumɔ krɔŋkrɔŋ lɛ jeee gbɔmɔ shi moŋ Nyɔŋmɔ nifeemɔ hewalɛ lɛ ji nɔ ko ni atsɔmɔ lɛ kɛtsɔ afii ohai abɔ lɛ amli. No hewɔ lɛ, Triniti tsɔɔmɔ lɛ ebatsɔ Kristendom shishitoo tsɔɔmɔ.
“Mi kɛ Tsɛ lɛ Fɛɛ lɛ, Ekomeŋ”
4. Mɛni hewɔ nɔ ni sɔlemɔi lɛ kɛɔ yɛ Yohane 10:30 he lɛ jeee anɔkwale lɛ?
4 Sɔlemɔi lɛ fɔɔ Yohane 10:30 he wiemɔ ni amɛbɔɔ mɔdɛŋ ni amɛkɛfi Triniti lɛ sɛɛ, eyɛ mli akɛ atsiii mɔ ni gbeɔ yi feɔ etɛ ko ta yɛ kuku lɛ mli. Yesu kɛɛ yɛ jɛmɛ akɛ: “Mi kɛ mi-Tsɛ lɛ fɛɛ lɛ, ekomeŋ.” Shi ani Yesu miitsɔɔ akɛ lɛ ji Nyɔŋmɔ Ofe lɛ diɛŋtsɛ, shi yɛ su kroko mli kɛkɛ? Dabi, enyɛŋ eba lɛ nakai, ejaakɛ Yesu wieɔ yɛ be fɛɛ mli akɛ Nyɔŋmɔ Bi ji lɛ, eshɛɛɛ Nyɔŋmɔ ni ebaa ehe shi E-haa lɛ. Belɛ mɛni ji nɔ ni Yesu tsɔɔ yɛ Yohane 10:30 lɛ?
5, 6. (a) Kɛ Yesu kɛɛ ekɛ e-Tsɛ lɛ ekomeŋ lɛ, belɛ te etsɔɔ tɛŋŋ? (b) Te afee enɛ he mfoniri yɛ Yesu kaselɔi lɛ ahe aha tɛŋŋ?
5 Yesu miitsɔɔ akɛ ekɛ Tsɛ lɛ hiɛ jwɛŋmɔ kome kɛ yiŋtoo kome. Abaanyɛ ana enɛ yɛ Yohane 17:21, 22 heni Yesu sɔle eha Nyɔŋmɔ akɛ ekaselɔi lɛ “fɛɛ amɛfee ekome, taakɛ bɔ ni bo, Ataa, oyɔɔ mimli, ni mi hu miyɔɔ omli lɛ, koni amɛ hu amɛfee ekome yɛ wɔmli.” Ani Yesu miisɔle ni ekaselɔi lɛ fɛɛ afee gbɔmɔ kome? Dabi, eesɔle ni amɛfee ekome, ni amɛhiɛ jwɛŋmɔ kɛ yiŋtoo kome, taakɛ bɔ ni Yesu kɛ Nyɔŋmɔ ji lɛ.
6 Atsɔɔ jwɛŋmɔ ni tamɔ nɛkɛ lɛ nɔŋŋ mli yɛ 1 Korintobii 1:10, he ni Paulo tsɔɔ akɛ Kristofoi ‘awiemɔ fɛɛ afee ekome, ni akɛ mligbalamɔi akaba amɛteŋ, shi moŋ amɛjwɛŋmɔ kɛ amɛsusumɔ fɛɛ afee ekome lɛ.’ No hewɔ lɛ beni Yesu kɛɛ akɛ lɛ kɛ e-Tsɛ lɛ ekomeŋ lɛ, etsɔɔɔ akɛ amɛji gbɔmɔ kome, taakɛ bɔ ni beni ekɛɛ esa akɛ kaselɔi lɛ afee ekome lɛ etsɔɔɔ akɛ amɛbaafee gbɔmɔ kome loo gbɔmɔtso kome lɛ.
Namɔ Ji “Wiemɔ Lɛ”?
7. (a) Mɛni Kristendom kɛɔ yɛ Yohane 1:1 he? (b) Mɛni yɔɔ Yohane 1:1 ni tsɔɔ amrɔ nɔŋŋ akɛ jeee Triniti he awieɔ lɛ?
7 Shi, Yohane 1:1 ni kɛɔ yɛ King James Version aloo Ga Biblia lɛ mli akɛ: “Shishijee lɛŋ lɛ Wiemɔ lɛ yɛ, ni Wiemɔ lɛ kɛ Nyɔŋmɔ yɔɔ, ni Wiemɔ lɛ Nyɔŋmɔ ni” lɛ hu? Yohane 1:14 kɛɔ wɔ akɛ “Ni Wiemɔ lɛ tsɔ heloo, ni ebashi buu yɛ wɔteŋ.” Kristendom kɛɔ akɛ nɛkɛ “Wiemɔ” lɛ, (Hela, lo’gos) ni ba shikpɔŋ nɔ akɛ Yesu Kristo lɛ ji Nyɔŋmɔ Ofe lɛ diɛŋtsɛ. Ni kɛlɛ, kadimɔ akɛ yɛ King James Version loo Ga Biblia lɛ mli po lɛ, Yohane 1:1 kɛɔ akɛ “Wiemɔ lɛ kɛ Nyɔŋmɔ yɔɔ.” Mɔ ko ni kɛ mɔ kroko yɔɔ lɛ jeee mɔ ni ekɛ lɛ yɔɔ lɛ nɔŋŋ. No hewɔ lɛ, anaa akɛ gbɔmɛi sɔrɔtoi enyɔ he awieɔ yɛ nɛkɛ shishitsɔɔmɔ nɛɛ mli lɛ. Agbɛnɛ hu, atsiii mɔ ni gbeɔ yi feɔ etɛ yɛ Triniti ko mli lɛ ta kwraa.
8. Te Biblia mli shishitsɔɔmɔi komɛi tsɔɔ Yohane 1:1 naagbee fa lɛ mli ehaa tɛŋŋ?
8 Yɛ King James Version lɛ ni kɛɔ yɛ Yohane 1:1 lɛ naagbee fa lɛ mli akɛ “Wiemɔ lɛ Nyɔŋmɔ ni” lɛ, shishitsɔɔmɔi krokomɛi tsɔɔ nɔ kroko yɛ jɛmɛ. Ekomɛi nɛ:
1808: “ni wiemɔ lɛ ji nyɔŋmɔ ko.” The New Testament, in an Improved Version, Upon the Basis of Archbishop Newcome’s New Translation: With a Corrected Text, London.
1864: “ni nyɔŋmɔ ko ji Wiemɔ lɛ.” The Emphatic Diaglott ni Benjamin Wilson, New York kɛ London fee.
1935: “ni Wiemɔ lɛ yɛ krɔŋkrɔŋ.” The Bible—An American Translation, ni J. M. P. Smith kɛ E. J. Goodspeed, Chicago fee.
1935: “ni Logos lɛ yɛ krɔŋkrɔŋ.” A New Translation of the Bible, ni James Moffatt, New York fee.
1975: “ni nyɔŋmɔ ko (aloo, ni yɔɔ krɔŋkrɔŋ) ji Wiemɔ lɛ.” Yohannes, ni Siegfried Schulz, Göttingen, Germany fee.
1978: “ni Logos lɛ tamɔ nyɔŋmɔ ko.” Das Evangelium nach Johannes ni Schonelder, Berlin fee.
1979: “ni nyɔŋmɔ ko ji Logos lɛ.” Das Evangelium nach Johannes ni Jurgen Berker, Würzburg, Germany fee.
Agbɛnɛ, yɛ 1950 mli ni New World Translation of the Christian Greek Scriptures ni Watchtower Bible and Tract Society of New York, Inc., fee lɛ tsɔɔ wiemɔ nɛɛ shishi akɛ “ni Wiemɔ lɛ ji nyɔŋmɔ ko.”
9. Mɛni tsɔɔ gbɛi the·osʹ (nyɔŋmɔ) lɛ hiɛ yɛ Yohane 1:1, yɛ Hela ŋmalɛ lɛ mli, ni tsɔɔ akɛ Nyɔŋmɔ ofe lɛ he awieɔ lɛ?
9 Ani nɛkɛ shishitsɔɔmɔi nɛɛ kɛ wiemɔ he mla ni yɔɔ Yohane 1:1 yɛ Hela wiemɔ mli lɛ kpaa gbee? Hɛɛ, amɛkpaa gbee. Hela gbɛi the·osʹ (nyɔŋmɔ) lɛ jeɔ kpo shii enyɔ yɛ Yohane 1:1. Klɛŋklɛŋ nɔ lɛ kɔɔ Nyɔŋmɔ ofe lɛ he ni lɛ ji mɔ ni Wiemɔ lɛ kɛ lɛ yɔɔ lɛ—“ni Wiemɔ [lo’gos] lɛ kɛ Nyɔŋmɔ [the·osʹ ko] yɔɔ.” Nɔ ni tsɔɔ klɛŋklɛŋ the·osʹ nɛɛ hiɛ ji Hela nɔmimaa wiemɔ ho. Gbɛi the·osʹ ni nɔmimaa wiemɔ ho yɔɔ hiɛ lɛ tsɔɔ mɔ ko pɔtɛɛ diɛŋtsɛ, ni yɛ enɛ mli lɛ Nyɔŋmɔ ofe lɛ—“ni Wiemɔ lɛ kɛ [lɛ] Nyɔŋmɔ yɔɔ (yɛ Ga mli lɛ: “Nyɔŋmɔ [lɛ].”)
10. Yɛ the·osʹ lɛ ni pueɔ nɔ ni ji shii enyɔ yɛ Yohane 1:1 lɛ mli lɛ, mɛni ji nɔ ni wiemɔ ho (lɛ) ni bɛ mli lɛ tsɔɔ.
10 Shi yɛ Yohane 1:1 naagbee fa lɛ mli lɛ, shishitsɔɔmɔi ni ato naa yɛ kuku 8 lɛ tsɔɔ the·osʹ ni ji enyɔ lɛ shishi (akɛ sutsɔɔlɔ gbɛi) akɛ “krɔŋkrɔŋ” aloo “nyɔŋmɔ ko” fe “Nyɔŋmɔ.” Mɛni hewɔ? Ejaakɛ the·osʹ ni ji enyɔ lɛ ji mɔ kome mlitsɔɔmɔ gbɛi ni baa dani feemɔ wiemɔ lɛ baa ni nɔmimaa gbɛi ho ni yɔɔ Hela mli lɛ fataaa he. Yɛ kuku nɛɛ mli lɛ, bɔ ni aŋma wiemɔ lɛ aha lɛ tsɔɔ nɔ ni awieɔ he lɛ su loo subaŋ ko. Etsɔɔ bɔ ni Wiemɔ lɛ ji diɛŋtsɛ lɛ mli, akɛ eyɛ “krɔŋkrɔŋ,” nyɔŋmɔ ko, shi jeee Nyɔŋmɔ ofe. Enɛ kɛ ŋmalɛi ni tsɔɔ akɛ “Wiemɔ” lɛ ji Nyɔŋmɔ naawielɔ, ni Nyɔŋmɔ tsu lɛ kɛba shikpɔŋ nɔ lɛ kpaa gbee. Taakɛ Yohane 1:18 (New World Translation) tsɔɔ mli lɛ: “Nyɔŋmɔ lɛ, mɔ ko enako lɛ pɛŋ; nyɔŋmɔ koome ni afɔ lɛ [Bi ni Nyɔŋmɔ ofe ni yɔɔ ŋwɛi lɛ bɔ lɛ] ni yɔɔ Tsɛ lɛ mlishi lɛ, lɛ ji mɔ ni [ba shikpɔŋ nɔ akɛ gbɔmɔ Yesu] ebatsɔɔ bɔ ni [Nyɔŋmɔ ofe] lɛ ji lɛ mli faŋŋ.”
11. Mɛɛ Biblia mli nɔkwɛmɔ nɔ yɔɔ ni tsɔɔ bɔ ni shishitsɔɔlɔ lɛ kɛ wiemɔ “ko” hɔ mli yɛ he ni eko bɛ Hela mli lɛ, ni mɛni hewɔ afee enɛ?
11 Biblia mli kukuji babaoo yɛ ni mɛi ni tsɔɔ shishi kɛjɛɔ Hela mli kɛyaa wiemɔ kroko mli lɛ kɛ wiemɔ “ko” yeɔ sutsɔɔmɔ gbɛi lɛ hiɛ eyɛ mli akɛ nɔmimaa wiemɔ ko bɛ Hela Ŋmalɛ lɛ mli. Nɔ ni akɛhɔ shishitsɔɔmɔ nɛɛ mli lɛ jieɔ sui ni gbɛi lɛ hiɛ lɛ kpo. Akɛ nɔkwɛmɔ nɔ lɛ, yɛ Marko 6:49 lɛ, beni kaselɔi lɛ na ni Yesu nyiɛ ŋshɔ lɛ hiɛ lɛ, King James Version Blɔfo lɛ kɛɔ akɛ, “amɛsusu akɛ amɛna mumɔ ko” (Hela phanʹta·sma) . The New World Translation lɛ tsɔɔ shishi yɛ gbɛ ni ja jogbaŋŋ nɔ akɛ, “Amɛsusu akɛ: ‘Eji ninaa!’” aloo mumɔ ko. Yɛ nakai gbɛ nɔ nɔŋŋ lɛ, Yohane 1:1 shishitsɔɔmɔ ni ja lɛ tsɔɔ akɛ Wiemɔ lɛ jeee “Nyɔŋmɔ,” shi “nyɔŋmɔ ko.”
12. Mɛɛ gbɛ ni tamɔ nakai nɔŋŋ atsɔ nɔ akɛ wiemɔ ni bɛ faŋŋ “ko” ni anaa yɛ Yohane 8:44 lɛ tsu nii?
12 Anaa nɔkwɛmɔ nii enyɔ ni tamɔ nakai nɔŋŋ yɛ Yohane yitso 8, kuku 44 (New World Translation) . Beni Yesu wieɔ Abonsam he yɛ jɛmɛ lɛ, ekɛɛ: “Nakai mɔ lɛ ji gbɔmɔgbelɔ ko beni eje shishi . . . Ama- lelɔ ko kɛ amale lɛ tsɛ.” Taakɛ Yohane 1:1 ji lɛ, yɛ shishijee Hela lɛ mli lɛ, hewiemɔ gbɛi ni yɔɔ wiemɔi enyɔ nɛɛ fɛɛ mli (“gbɔmɔgbelɔ,” “amalelɔ”) lɛ tsɔɔ feemɔ wiemɔ lɛ hiɛ ni ebɛ wiemɔ ko ni ama nɔ mi. Yɛ fɛɛ mli lɛ, Abonsam su loo subaŋ ko ji nɔ ni atsɔɔ mli lɛ, ni ehe bahiaa yɛ ŋmɛnɛŋmɛnɛ beaŋ wiemɔi ashishitsɔɔmɔi amli akɛ akɛ wiemɔ ni nɔmimaa bɛ he (“ko”) ahɔ mli bɔni afee ni shishinumɔ nɛɛ aje kpo. No hewɔ lɛ, King James Version Biblia lɛ tsɔɔ shishi akɛ, “gbɔmɔgbelɔ ko ji lɛ . . . amalelɔ kɛ malemɔtsɛ ko ji lɛ.”—Kwɛmɔ Marko 11:32; Yohane 4:19; 6:10; 9:17; 10:1, 13, 21; 12:6.
“Mi-Nuŋtsɔ Kɛ Mi-Nyɔŋmɔ”
13, 14. Mɛni hewɔ Toma baanyɛ atsɛ Yesu akɛ “minyɔŋmɔ” ni etsɔɔɔ akɛ Yesu ji Yehowa lɛ?
13 Mɛi ni diɔ Triniti lɛ sɛɛ lɛ hu tsɛɔ Yohane 20:28 ni amɛkɛfiɔ nɔ ni amɛkɛɔ lɛ sɛɛ. Jɛmɛ Toma kɛɛ Yesu yɛ akɛ: “Minuŋtsɔ kɛ Mi-Nyɔŋmɔ!” Taakɛ atsɔɔ mli yɛ yiteŋgbɛ lɛ, shitee-kɛ-woo ko bɛ Toma ni aaatsɛ Yesu akɛ nyɔŋmɔ ko lɛ mli. Enɛ kɛ anɔkwalei ni eji akɛ dani Yesu aaaba shikpɔŋ nɔ lɛ, no mli lɛ eji nyɔŋmɔ ko ni ji akɛ, ŋwɛi bɔɔ nɔ ko ni yɔɔ hewalɛ lɛ kpaa gbee. Ni nakai efee kɛjɛ egbele kɛ eshitee kɛmiiya ŋwɛi wala mli lɛ sɛɛ. Yesu po tsɛ ŋmalɛi kɛjɛ Lalai lɛ amli koni ekɛtsɔɔ akɛ awieɔ adesai ni yɔɔ nyɛmɔ loo hewalɛ waa lɛ ahe akɛ “nyɔŋmɔi.” (Lala 82:1-6; Yohane 10:34, 35) Bɔfo Paulo hu kadi akɛ “asɛɛɛ ‘nyɔŋmɔi’ ahe ni asɛɛɛ ‘nuŋtsɔmɛi’ ahe.” (1 Korintobii 8:6, New World Translation) Atsɛɔ Satan po akɛ “je nɛŋ nyɔŋmɔ.”—2 Korintobii 4:4.
14 Kristo yɛ gbɛhe ko ni nɔ kwɔ kwraa fe adesai ni yeee emuu lɛ loo Satan nɔ mli. Kɛji akɛ anyɛɔ awieɔ mɛnɛɛmɛi ahe akɛ “nyɔŋmɔi” lɛ, eka shi faŋŋ akɛ Yesu baanyɛ afee nakai, ni anyɛ awie ehe akɛ nyɔŋmɔ ko. Yɛ gbɛhe ni ekaaa mli ni eyɔɔ kɛ akɛto Yehowa he lɛ hewɔ lɛ, Yesu ji “nyɔŋmɔ koome ni ji bi ni afɔ lɛ lɛ” (Yohane 1:18) , “Nyɔŋmɔ Hewalɔ” (Yesaia 9:5) , kɛ “nyɔŋmɔ ko” (Yohane 1:1, New World Translation) . No hewɔ lɛ, nɔ ko bɛ ni ehiii yɛ bɔ ni Toma wie Yesu he nɛɛ mli. Toma miikɛɛ akɛ Yesu ji nyɔŋmɔ ko kɛha lɛ, mɔ krɔŋkrɔŋ ko, mɔ ni yɔɔ hewalɛ. Shi ekɛɛɛ akɛ Yesu ji Yehowa, ni no hewɔ ni Toma kɛɛ, “mi” Nyɔŋmɔ shi jeee Nyɔŋmɔ “lɛ.”
15. Yɛ mɛɛ gbɛ nɔ Yohane yitso 20 lɛ kuku 31 haa aleɔ mɔ ni Yesu ji yɛ faŋŋ mli?
15 Yɛ kukuji etɛ pɛ sɛɛ, yɛ Yohane 20:31 lɛ, Biblia lɛ kɛɔ akɛ: “Shi enɛɛmɛi lɛ aŋma, koni nyɛhe nyɛye akɛ Yesu ji Kristo, Nyɔŋmɔ bi lɛ.” Ajie yiŋkɔshikɔshifeemɔi fɛɛ ni kɔɔ nɔ ni Toma kɛɛ lɛ he lɛ kɛjɛ jɛmɛ. Biblia ŋmalɔ Yohane wie yɛ faŋŋ mli akɛ Yesu ji Nyɔŋmɔ Bi lɛ, shi jee Nyɔŋmɔ ofe lɛ diɛŋtsɛ.
Ekɛ Nyɔŋmɔ Yeee Egbo
16. Mɛni Yudafoi lɛ kɛɛ, ni Yesu ha amɛsane lɛ hetoo akɛ ebɛ mli yɛ mɛɛ gbɛ nɔ?
16 Ŋmalɛ kroko ni sɔlemɔi lɛ kɛtsuɔ nii ji Yohane 5:18. Ekɛɔ akɛ Yudafoi lɛ miisumɔ ni amɛgbe Yesu ejaakɛ “etsɛ Nyɔŋmɔ akɛ lɛ diɛŋtsɛ e-Tsɛ, ekɛ ehe miito Nyɔŋmɔ he.” Namɛi kɛɔ akɛ Yesu kɛ ehe miito Nyɔŋmɔ he lɛ? Jeee Yesu ni. Etsɔɔ enɛ mli faŋŋ yɛ kuku ni nyiɛ sɛɛ (19) lɛ mli ni ekɛɛ: “Bi lɛ diɛŋtsɛ nyɛŋ eto eyiŋ efee nɔ ko, ja nɔ ni enaa akɛ Tsɛ lɛ feɔ lɛ.” No hewɔ Yesu ekɛɛɛ akɛ lɛ ji Nyɔŋmɔ ofe aloo ekɛ Lɛ yeɔ egbɔ loo ekɛ ehe toɔ ehe. Eetsɔɔ Yudafoi lɛ akɛ amɛtɔ kwraa, akɛ jeee Nyɔŋmɔ ji lɛ, shi moŋ, Nyɔŋmɔ Bi ji lɛ, ni akɛ Nyɔŋmɔ naawielɔ lɛ, enyɛŋ ejɛ esuɔmɔ mli efee nɔ ko. Ani obaanyɛ osusu jeŋ muu fɛɛ Nyɔŋmɔ ofe lɛ he akɛ eeekɛɛ akɛ enyɛŋ ejɛ lɛ diɛŋtsɛ esuɔmɔ mli efee nɔ ko? No hewɔ lɛ Yudafoi lɛ folɔ enaa, shi ejie enaa hu akɛ amɛnaafolɔmɔ lɛ bɛ mli.
17. (a) Mɛni ji odaseyeli ni mli ka shi faŋŋ ni jɛ Nyɔŋmɔ diɛŋtsɛ mumɔ naa Wiemɔ lɛ mli ni kɔɔ Yehowa, Yesu Kristo kɛ mumɔ krɔŋkrɔŋ lɛ he? (b) Mɛni esa akɛ afee ŋmalɛ fɛɛ ŋmalɛ ni Trinitibii lɛ baanyɛ amɛkɛ amɛnine atsɔɔ ni amɛkɛbɔ mɔdɛŋ akɛ amɛkɛaabu amɛhemɔkɛyeli lɛ bem lɛ!
17 No hewɔ lɛ, yɛ odaseyeli ni jɛ Nyɔŋmɔ ŋɔɔ, kɛ lɛ diɛŋtsɛ e-Wiemɔ ni jɛ mumɔŋ lɛ mli, kɛ odaseyeli ni jɛ Yesu ŋɔɔ, kɛ Yesu kaselɔi lɛ odaseyeli lɛ mli hu lɛ kɛ odaseyeli ni mli ka shi faŋŋ haa akɛ Nyɔŋmɔ ofe lɛ kɛ Yesu Kristo ji gbɔmɛi sɔrɔtoi enyɔ, Tsɛ kɛ Bi. Nakai odaseyeli lɛ hu tsɔɔ yɛ faŋŋ mli akɛ mumɔ krɔŋkrɔŋ lɛ jeee Triniti lɛ mli mɔ ni gbeɔ yi feɔ etɛ, shi moŋ, eji Nyɔŋmɔ nifeemɔ hewalɛ. Sɛɛnamɔ bɛ he akɛ aaatsɔɔ ŋmalɛi lɛ ashishi yɛ gbɛ ni kɛ eshishinumɔ kpaaa gbee naa aloo ni aaabɔ mɔdɛŋ atsɔmɔ amɛ ni akɛfi Triniti lɛ sɛɛ. Esa akɛ ŋmalɛi ni tamɔ nɛkɛ lɛ kɛ Biblia mli odaseyelii ni mli ka shi faŋŋ lɛ fɛɛ akpa gbee.
Mɛni Hewɔ Triniti Tsɔɔmɔ lɛ Tee Nɔ Eshwere Lɛ?
18. Nɛgbɛ Triniti tsɔɔmɔ lɛ ba kɛjɛ?
18 Kɛ okwɛ baafa 18, “Yinɔsane mli nifeemɔ ni ha Trinity lɛ shwere” lɛ, ebaana akɛ Triniti lɛ shishifaa jɛ wɔŋjamɔ mli. Ejeee Biblia mli tsɔɔmɔ, shi Kristendom ŋɔ enɛ yɛ afii ohai ejwɛ lɛ mli. Shi jeeŋmɔ dani be nɛɛ aaashɛ lɛ, trinitii sɔrɔtoi yɛ blema Babilon, Mizraim kɛ hei krokomɛi. No hewɔ lɛ Kristendom kɛ wɔŋjalɔi asusumɔ wo etsɔɔmɔi amli. Mɔ ni kanya nifeemɔ nɛɛ ji Roma maŋtsɛ Konstantino, ni bɛ anɔkwale ni kɔɔ enɛ he lɛ he miishɛɛ ko, shi moŋ eesumɔ ni ewaje emaŋtsɛyeli lɛ ni wɔŋjalɔi kɛ Kristofoi ni amɛkwa hemɔkɛyeli lɛ yɔɔ mli lɛ. Ejeee Kristofoi atsɔɔmɔ ni shwere yɛ gbɛ ko gbɛ ko kwraa nɔ, shi moŋ Triniti lɛ ji odaseyeli ni tsɔɔ akɛ Kristendom ekwa Kristojamɔ lɛ ni ekpɛlɛ wɔŋjalɔi atsɔɔmɔ nɔ moŋ.
19. Mɛni hewɔ Triniti tsɔɔmɔ lɛ tee nɔ eshwere lɛ?
19 Mɛni hewɔ esa akɛ tsɔɔmɔ ni tamɔ nɛkɛ ashwere? Eka shi faŋŋ akɛ eyeee ebuaaa Nyɔŋmɔ akɛ aaaha Lɛ kɛ E-Bi lɛ kɛ E-Mumɔ krɔŋkrɔŋ lɛ aaafee nibii ni futuɔ mɔ yiŋ ni yɔɔ naakpɛɛ. Ni eyeee ebuaaa hu akɛ aaafutu gbɔmɛi ayiŋ. Shi moŋ, babaoo ni gbɔmɛi ayiŋ futuɔ yɛ Nyɔŋmɔ kɛ eyiŋtoi ahe lɛ, babaoo moŋ ehiɔ haa Satan Abonsam, mɔ ni teɔ shi woɔ Nyɔŋmɔ lɛ, ‘je nɛŋ nyɔŋmɔ lɛ’ ni tsuɔ nii koni ‘eshwila mɛi ni heee yeee lɛ ajwɛŋmɔi lɛ.’ (2 Korintobii 4:4) Akɛni tsɔɔmɔ ni tamɔ nɛkɛ haa efeɔ tamɔ nɔ ni nyɔŋmɔjamɔ he nilelɔi pɛ baanyɛ anu Biblia tsɔɔmɔi ashishi hewɔ lɛ, eŋɔɔ Kristendom jamɔ mli hiɛnyiɛlɔi lɛ anaa. Enɛ yeɔ ebuaa amɛ koni amɛhiɛ amɛgbɛhe akɛ mɛi ni yeɔ gbɔmɛi foji lɛ anɔ lɛ mli.
20. (a) Mɛni ji anɔkwale ni mli ka shi faŋŋ ni kɔɔ Triniti lɛ he? (b) Mɛni ji nɔ ni anɔkwalei ni haa mɔ yeɔ ehe lɛ he anɔkwale nilee ni wɔɔna lɛ baafee aha wɔ?
20 Ni kɛlɛ, anɔkwale ni kɔɔ nɛkɛ sane nɛɛ he lɛ mli ka shi faŋŋ akɛ gbekɛ po baanyɛ anu shishi. Gbekɛ bibioo le akɛ esoro lɛ yɛ etsɛ he ni akɛ gbɔmɛi sɔrɔtoi enyɔ ji amɛ. Nakai nɔŋŋ beni Biblia lɛ kɛɔ akɛ Yesu Kristo ji Nyɔŋmɔ Bi lɛ, nakai pɛpɛɛpɛ etsɔɔ. Enɛ ji anɔkwale ni ka shi faŋŋ lɛ, yɛ beni Triniti tsɔɔmɔ lɛ bɛ mli nakai. Eji amale. No hewɔ lɛ, ejɛ “mɔ ni atsɛɔ lɛ Abonsam kɛ Satan, ni shishiuɔ jeŋ muu lɛ fɛɛ lɛ” ŋɔɔ. (Kpojiemɔ 12:9) Shi anɔkwale ni mli ka shi faŋŋ ni haa mɔ he jɔɔ lɛ ni kɔɔ Nyɔŋmɔ, e-Bi Yesu Kristo kɛ Nyɔŋmɔ mumɔ krɔŋkrɔŋ lɛ ni he wa lɛ he lɛ haa gbɔmɛi yeɔ amɛhe kɛjɛɔ nyɔji ni amɛtsɔmɔ amɛha apasa tsɔɔmɔi ni jɛ wɔŋjamɔ mli ni Satan kɛba lɛ mli. Taakɛ Yesu kɛɛ mɛi ni taoɔ anɔkwale lɛ lɛlɛŋ lɛ: “Nyɛaale anɔkwale lɛ, ni anɔkwale lɛ aaaha nyɛye nyɛhe.” (Yohane 8:32) Anɔkwalei ni haa mɔ yeɔ ehe lɛ he anɔkwale nilee ni aaana, kɛ agbɛnɛ amɛhe nitsumɔ lɛ “ji naanɔ wala.”—Yohane 17:3.a
[Shishigbɛ niŋmai]
a Ajie kɛjɛ June 1, 1988 Watchtower lɛ mli.
Te Obaaha Hetoo Oha Tɛŋŋ?
◻ Mɛni hewɔ Nyɔŋmɔ kɛ e-Bi lɛ he anɔkwale nilee he hiaa lɛ?
◻ Mɛni Yesu tsɔɔ beni ekɛɛ akɛ, “Mikɛ mitsɛ Iɛ fɛɛ ekomeŋ” lɛ?
◻ Yohane 1:1 haa sɔrɔtofeemɔ baa Wiemɔ lɛ kɛ Nyɔŋmɔ teŋ yɛ mɛɛ gbɛ nɔ?
◻ Mɛni hewɔ Toma baanyɛ atsɛ Yesu akɛ “Mi-Nyɔŋmɔ” yɛ gbɛ ni ja nɔ lɛ?
◻ Te fee tɛŋŋ ni Triniti tsɔɔmɔ lɛ ba, ni namɔ kɛba?
[Akrabatsa ni yɔɔ baafa 26]
Yinɔsane Mli Nifeemɔ ni Ha Triniti Iɛ Shwere
The New Encyclopaedia Britannica, 1985, Micropaedia, Kpo 11, baafa 928, kɛɔ yɛ wiemɔ Triniti shishi akɛ: “Wiemɔ Triniti Iɛ loo tsɔɔmɔ nɛɛ mli tsɔɔmɔ ni yɔɔ faŋŋ bɛ Kpaŋmɔ Hee Iɛ mli, ni asaŋ Yesu kɛ esɛɛnyiɛlɔi Iɛ hu ebɔɔɔ mɔdɛŋ akɛ amɛaawie wiemɔ ko ni teɔ shi woɔ Hemɔkɛyeli Jajemɔ ni yɔɔ Kpaŋmɔ Momo lɛ mli akɛ: ‘Bo toi, O Israel: Nuŋtsɔ wɔ-Nyɔŋmɔ lɛ ji Nuŋtsɔ kome Iɛ.’ (5 Mose 6:4) ” Nɛkɛ ensaeklopedia nɛɛ hu kɛɔ akɛ: “Tsɔɔmɔ nɛɛ tee nɔ eshwere fiofio yɛ afii ohai babaoo mli kɛtsɔ naataamɔi kɛ bei babaoo mli. . . . Nicaea gwabɔɔ ni afee yɛ 325 Iɛ jaje bɔ ni ato tsɔɔmɔ nɛɛ he gbɛjianɔ aha Iɛ ni yɛ nɔ ni ejaje etsɔɔ akɛ Bi Iɛ ‘kɛ Tsɛ Iɛ hiɛ . . . gbɔmɔtso kome’ Iɛ mli, eyɛ mli akɛ nɔ ko bibioo ko pɛ ewie yɛ Mumɔ Krɔŋkrɔŋ lɛ he. . . . Beni shɛɔ afii ohai 4 Iɛ naagbee Iɛ . . . no mli Iɛ Triniti tsɔɔmɔ lɛ eje kpo ni etee nɔ ehi shi nakai kɛbashi bianɛ.”
New Catholic Encyclopedia 1967, Kpo 14, baafa 299 Iɛ kpɛlɛɔ nɔ akɛ: “Gbɛjianɔ ni ato akɛ ‘Nyɔŋmɔ kome yɛ Gbɔmɛi etɛ mli’ Iɛ jeee nɔ ni ma shi shiŋŋ, eka shi faŋŋ akɛ aŋɔɔɔ awooo Kristofoi ashihilɛ mli kɛ hemɔkɛyeli jajemɔ mli, dani afii ohai 4 Iɛ ba naagbee. . . . Nɔ ko bibioo ko po ni baatsɔɔ akɛ enɛ ji Blematsɛmɛi lɛ ajwɛŋmɔ loo susumɔ po bɛ.”
No hewɔ Iɛ Triniti tsɔɔmɔ Iɛ bɛ Ŋmalɛ Iɛ mli, shi moŋ akpɛlɛ nɔ yɛ Nicaea Gwabɔɔ Iɛ mli yɛ afi 325 Ŋ.B. Tsɔɔmɔ lɛ hiɛ wɔŋjalɔi ajwɛŋmɔ ni etee nɔ ehi shi kɛjɛ be kakadaŋŋ mli yɛ blema Babilon kɛ Mizraim ni akɛtsu nii hu yɛ blema shikpɔji anɔ. Yinɔsane ŋmalɔ Will Durant wie yɛ The Story of Civilization: Part lll baafa 595 Iɛ mli akɛ: “Kristojamɔ kpataaa wɔŋjamɔ hiɛ; ekpɛlɛ nɔ moŋ. . . . Mizraim ji he ni triniti krɔŋkrɔŋ Iɛ he jwɛŋmɔ lɛ jɛ.”
An Encyclopedia of Religion ni Vergilius Ferm ŋma yɛ 1964, Iɛ baafai 793 kɛ 794 yɛ wiemɔ “triad”(etɛ) shishi lɛ ji heni anaa trinitii sɔrɔtoi ni ato naa kakadaŋŋ ni ji Babilonbii anɔ, Budabii, Hindubii, Norsebii, Taobii kɛ jamɔi krokomɛi kɛ agbɛnɛ Kristendom. Akɛ nɔkwɛmɔ nɔ lɛ, etsɔɔ akɛ yɛ India lɛ, “Triad wuji etɛ Iɛ ji Brahma, Bɔlɔ lɛ, Vishnu, Yibaalɔ Iɛ kɛ Shiva, Hiɛkpatalɔ Iɛ. Mɛnɛɛmɛi damɔ shi kɛha shihilɛ fɛɛ, taakɛ Babilon Triad ni ji Anu, Enlil kɛ Ea damɔ shi kɛha shihilɛ mli nibii ni yɔɔ ni ji kɔɔyɔɔ, nu kɛ shikpɔŋ lɛ.”
Nɔ ni yɔɔ London Ŋleshi Blema Nibii Atoo He lɛ ji nibii ni gbɔmɛi kɛ amɛniji efee ni tsɔɔ blema trinitii sɔrɔtoi, tamɔ Mizraim, lsis, Harpokrates, kɛ Nephthys Iɛ. Wolo ko ni aŋma ni kɔɔ nibii atoo he Iɛ Teŋgbɛ Afii kɛ Blema nibii ahe lɛ haa aleɔ nibii ni aŋmala ni akadi yɛ blema jwetri ko he akɛ: “Kwɛmɔ [ekoŋ nɔ], Mizraim nyɔŋmɔi Horus-Bait (akroma aloo laalɔ yitso) , Buto-Akori (onufu) , kɛ Hathor (kɔkɔdene-yitso) Iɛ. Esɛɛgbɛ [koŋ nɔ] lɛ, Hela ‘Bait kome, Hathor kome, Akori kome; mɛnɛɛmɛi ahewalɛ Iɛ ekomeŋ. Nyɛjiea je Iɛ tsɛ Iɛ yi, nyɛjiea nyɔŋmɔi etɛ ni afee amɛ ekome nɛɛ ayi!’ No hewɔ Iɛ ayɔseɔ nyɔŋmɔi etɛ nɛɛ akɛ hewalɛ kome ko kpojiemɔ, ekolɛ hulu-nyɔŋmɔ lɛ.”
Yinɔsane maa nɔ mi akɛ ayama Triniti Iɛ kɛjɛ wɔŋjalɔi aŋɔɔ ni triniti Iɛ yɛ shihilɛ mli afii ohai abɔ dani Yesu ba shikpɔŋ nɔ. Yɛ egbele sɛɛ hu lɛ, mɛi ni wɔŋjalɔi ajeŋ nilee ena amɛnɔ hewalɛ Iɛ ni amɛkwa kɛjɛ Nyɔŋmɔ anɔkwale jamɔ ni Yesu kɛ ebɔfoi Iɛ tsɔɔ lɛ he Iɛ ha tsɔɔmɔ nɛɛ shwere.
[Mfoniri ni yɔɔ baafa 24]
Yesu sɔle koni ekaselɔi lɛ afee ekome yɛ jwɛŋmɔ kɛ yiŋtoo mli taakɛ bɔ ni lɛ kɛ etsɛ lɛ feɔ ekome Iɛ