“Amɛle Egbee”
“YEHOWA ji mi-Kwɛlɔ.” Enɛɛmɛi ji Lala 23 shishijee wiemɔi. Ŋmalɛi lɛ kɛ Yehowa Nyɔŋmɔ toɔ tookwɛlɔ he shikome ekoŋŋ yɛ Yesaia gbalɛ lɛ mli, ni ekɛɔ akɛ: “Eeelɛ etoikuu lɛ tamɔ tookwɛlɔ; eeehiɛ etoobii lɛ yɛ ekpɔkɔiaŋ, ni eeehole amɛ eshaka etsitsi, ni toonyɛmɛi lɛ hu, eeekpala amɛ blɛoo.”—Yesaia 40:11.
Nakai nɔŋŋ hu akɛ Yesu Kristo to tookwɛlɔ he. Ekɛɛ: “Miji tookwɛlɔ kpakpa lɛ. Tookwɛlɔ kpakpa lɛ ŋɔɔ esusuma eŋmɛɔ shi yɛ etooi lɛ anajiaŋ.” (Yohane 10:11) Yesu kɛɛ akɛ “tooi lɛ nuɔ [tookwɛlɔ lɛ] gbee, ni ekɛ lɛ diɛŋtsɛ etooi lɛ agbɛi tsɛɔ amɛ, ni ekɛ amɛ jeɔ kpo.” Ekɛfata he akɛ, “tooi lɛ nyiɛɔ [tookwɛlɔ lɛ] sɛɛ, ejaakɛ amɛle egbee. Shi mɔ kpɔŋ lɛ, amɛnyiɛŋ esɛɛ, shi moŋ amɛaajo foi yɛ eŋɔɔ, ejaakɛ amɛleee mɛi kpɔji agbee.”—Yohane 10:2-5.
Yehowa Nyɔŋmɔ kɛ e-Bi, Yesu Kristo fɛɛ ehi shi yɛ mfoniri ni afee yɛ ŋmalɛi ni tsɔ hiɛ lɛ amli lɛ anaa. Amɛkɛ amɛ mfoniri-feemɔ mli tooi lɛ yeɔ yɛ mlijɔlɛ kɛ suɔmɔ kwɛmɔ naa. Nɔ ni ejɛ mli eba ji akɛ, mɛi ni tamɔ tooi loo gwantɛŋi nuɔ he akɛ asumɔɔ amɛ, amɛyɛ shweshweeshwe, ni abuɔ amɛhe.
Akɛ nɛkɛ wekukpaa nɛɛ toɔ tooi diɛŋtsɛ kɛ amɛkwɛlɔ he yɛ gbɛ ni sa nɔ. Yɛ afi 1831 mli tɔ̃ɔ lɛ, John Hartley ŋma nɔ ni eyoo yɛ enɛ gbɛfaŋ lɛ he saji eshwie shi. Eyoo akɛ, nɔ ni tookwɛlɔi fɔɔ feemɔ yɛ Greece ji ni amɛwo amɛtooi lɛ agbɛi. Kɛ akɛ amɛ gbɛi tsɛ amɛ lɛ, tooi lɛ hereɔ tookwɛlɔ lɛ gbee lɛ nɔ. Aaafee afii 51 sɛɛ, yɛ 1882 lɛ, J. L. Porter na nɔ ko ni tamɔ nakai nɔŋŋ. Lɛ diɛŋtsɛ ekɛ ehiŋmɛi na tookwɛlɔi “ni kɛ gbee . . . ni naa wa ni yɔɔ ŋeleŋele miitsɛ” ni tooi lɛ kɛ toiboo boɔ toi ni amɛnyiɛɔ tookwɛlɔi lɛ asɛɛ. Yɛ nakai afi lɛ nɔŋŋ mli lɛ, William M. Thomson ŋma nibii ni aka akwɛ shii abɔ ni maa nɔ mi akɛ abaanyɛ atsɔɔ tooi ni amɛnyiɛ amɛkwɛlɔ lɛ sɛɛ ni amɛyoo egbee lɛ ahe sane.
Ani ana tsakpaa ni ekaaa ni ka tookwɛlɔi kɛ amɛtooi ateŋ lɛ nyɛsɛɛ afii nɛɛ amli? Hɛɛ. Yɛ September 1993 National Geographic, wolo lɛ mli lɛ, Australianyo gbɛfalɔ ni taoɔ saji amli, Robyn Davidson ŋma sane ni nyiɛ sɛɛ nɛɛ yɛ Rabaribii ni kwɛɔ tooi kɛ tsinai ni tamɔ mɛi ni hiɔ buui amli yɛ India kooyi-anaigbɛ lɛ ahe: “Tookwɛlɔ fɛɛ tookwɛlɔ yɛ bɔ ni etsɛɔ etooi lɛ yɛ gbɛ ni yɔɔ sɔrɔto fioo nɔ. Ayɛ leebi tsɛmɔi ni akɛjeɔ kpo, kɛ tsɛmɔ ni akɛkpalaa tooi lɛ kɛyaa nu he yɛ, kɛ ekrokomɛi. Gbɔmɔ fɛɛ gbɔmɔ le lɛ diɛŋtsɛ etooi ni nakai nɔŋŋ toi lɛ hu le amɛkwɛlɔ, ni etookuu pɔtɛɛ lɛ baajie amɛhe kɛjɛ tookuu ni da lɛ ateŋ ni amɛyanyiɛ esɛɛ yɛ leebi mli.”
Ŋwanejee ko bɛ he akɛ, Yesu na nɔ ni gbɛfalɔi ejwɛ ni atsĩ amɛ tã bianɛ lɛ etsɔɔ lɛ. Nɔ ni lɛ diɛŋtsɛ ena lɛ ha enɔkwɛmɔ nɔ ni kɔɔ tooi ni le amɛkwɛlɔ lɛ gbee lɛ he lɛ fee anɔkwale diɛŋtsɛ. Ani oji Yesu tooi lɛ ekome? Ani ole egbee ni oboɔ toi? Kɛ oyɔseɔ ni okpɛlɛɔ etsɔɔmɔi lɛ anɔ akɛ anɔkwale, ni oboɔ ekitai atoi ni onyiɛɔ esɛɛ yɛ Yehowa jamɔ mli lɛ, no lɛ onine baashɛ Yehowa Nyɔŋmɔ kɛ e-Bi, Yesu Kristo suɔmɔ kɛ mlijɔlɛ kwɛmɔ nɔ.—Yohane 15:10.