Ewu Eshi Gbeyeishemɔ kɛ Yiŋkɔshikɔshifeemɔ

1-3. Mɛɛ nibii ni tee nɔ yɛ gbi lɛ mli Petro na, ni mɛɛ shihilɛ ekɛkpe yɛ nyɔɔŋ lɛŋ?

PETRO hiɛ tabɔ̃lɔ lɛ mli kpɛŋŋ ni ekɛ ehewalɛ fɛɛ miiwiri, ni egbɛ ehiŋmɛiaŋ waa yɛ duŋ lɛ mli. Ani no mli lɛ, nɔ ko sulii ni ena yɛ bokagbɛ lɛ tsɔɔ akɛ je etsɛre etã? Akɛni ewiri ŋmɛlɛtswai babaoo hewɔ lɛ, ekotosɛɛ kɛ ekɔ̃ji amli fɛɛ miiwa ehe naakpa. Kɔɔyɔɔ ni tswaa eyitsɔi lɛ nɔŋŋ eha Galilea Ŋshɔ lɛ hiɛ efee hamahama lɛ. Ŋshɔkei ni kumɔɔ eshimɔɔ lɛlɛ lɛ hiɛgbɛ lɛ ha nu ni mli ejɔ ŋanii lɛ shwie Petro he fɛɛ. Kɛlɛ, etee nɔ ewiri.

² Petro kɛ enanemɛi lɛ eshi Yesu kome too yɛ nakai ŋshɔ lɛ nɔŋŋ naa gbɛ he ko. Nakai gbi lɛ mli lɛ, amɛna akɛ Yesu kɛ aboloi kɛ loi fioo ko kɛkɛ elɛ mɛi akpei abɔ ni hɔmɔ miiye amɛ lɛ. Nɔ ni Yesu fee lɛ ha gbɔmɛi lɛ tao akɛ amɛwo lɛ maŋtsɛ, shi Yesu sumɔɔɔ akɛ ekɛ ehe awo maŋkwramɔŋ saji amli. Kɛfata he lɛ, no mli lɛ eesumɔ ni etsɔɔ ekaselɔi lɛ akɛ esaaa akɛ amɛkɛ amɛhe woɔ maŋkwramɔŋ saji amli. Ewii ehe kɛjɛ asafo lɛ he, kɛkɛ ni efã ekaselɔi lɛ koni amɛkwɔ lɛlɛ lɛ koni amɛshi kɛya ŋshɔ lɛ naa he kroko, ni ekome too eshi kɛtee gɔŋ lɛ nɔ koni eyasɔle.—Mar. 6:35-45; nyɛkanea Yohane 6:14-17.

³ Beni kaselɔi lɛ shi lɛ, no mli lɛ nyɔɔŋtsere ni miihe aye emuu lɛ eje; shi amrɔ nɛɛ lɛ, eenyɔ shi blɛoo kɛmiiho anaigbɛ. Kɛlɛ, amɛnyɛ amɛwiri kilomitai fioo ko. Bɔ ni etɔɔ amɛ kɛwirimɔ, kɛ ŋshɔkei agbɛɛmɔ kɛ ahum ni tswaa lɛ haaa amɛnyɛ amɛgba sane. Ni ekolɛ, Petro kome too miishwie eyiŋ.

 4. Mɛni hewɔ Petro ji mɔ ko ni sa akɛ wɔkase lɛ lɛ?

⁴ Kwɛ nibii abɔ ni ebaasusu he! Beni Petro kɛ Yesu ni jɛ Nazaret lɛ kpe klɛŋklɛŋ kwraa lɛ, nɔ ni fe afii enyɔ eho, ni nibii babaoo etee nɔ. Ekase nibii babaoo momo, shi pii yɛ lolo ni ebaakase. Eshwelɛ akɛ ebaafee nakai—koni enyɛ eye gbɛtsiinii tamɔ gbeyeishemɔ kɛ yiŋ enyɔɔnyɔ nɔ—lɛ haa ebafeɔ mɔ ko ni sa akɛ wɔkase enɔkwɛmɔnɔ ni sa kadimɔ waa lɛ. Ha wɔkwɛ nɔ hewɔ.

5, 6. Tsɔɔmɔ bɔ ni Petro shihilɛ ji.

⁵ Petro hiɛ kpaŋ gbi ni ekɛ Yesu kpe lɛ nɔ kɔkɔɔkɔ. Enyɛmi nuu Andrea ji mɔ ni tsɔ hiɛ eha ele miishɛɛ sane nɛɛ akɛ: “Wɔna Mesia lɛ.” Nakai wiemɔi lɛ ha Petro shihilɛ bɔi tsakemɔ. Eshihilɛ efeŋ tamɔ tsutsu lɛ dɔŋŋ.—Yoh. 1:41.

⁶ Kapernaum ji he ni Petro hi, eji maŋ ko ni yɔɔ Galilea Ŋshɔ lɛ kooyigbɛ. Ekɛ enyɛmi Andrea kɛ Zebedeo bihii, ni ji Yakobo kɛ Yohane fee ekome kɛtsu nii yɛ wuoyaa nitsumɔ lɛ mli. Petro kɛ eŋa, eshaayoo, kɛ enyɛminuu Andrea fɛɛ hi shĩa kome mli. Ákɛ akɛ wuoyaa nitsumɔ baakwɛ weku tamɔ nɛkɛ lɛ biɔ ni aná ŋaalee kɛ hewalɛ, ni atsu nii dɛŋdɛŋ hu. Kwɛ bɔ ni ebaabi ni hii nɛɛ atsu nii nyɔɔŋnyɔɔŋ fɛɛ shii abɔ—amɛbaatara lɛji enyɔ mli koni amɛfɔ̃ yai lɛ amɛwo ŋshɔ lɛ mli, amɛbaagbala yai lɛ kɛba lɛlɛ lɛ mli kɛkwɛ looi ni amɛdu lɛ. Kwɛ bɔ ni ebaatɔ amɛ yɛ gbi lɛ mli eha; amɛbaahala looi lɛ amli koni amɛhɔ̃ɔ, amɛbaakpɛ yai lɛ ni amɛbaafɔ he.

 7. Mɛni Petro nu yɛ Yesu he, ni mɛni hewɔ eji miishɛɛ sane lɛ?

⁷ Biblia lɛ haa wɔleɔ akɛ no mli lɛ, Andrea ji Yohane Baptisilɔ lɛ kaselɔ. Eyɛ faŋŋ akɛ, Petro bo Yohane Baptisilɔ lɛ he saji ni enyɛmi nuu lɛ bɔ lɛ lɛ toi jogbaŋŋ. Gbi ko lɛ, Andrea na ni Yohane Baptisilɔ lɛ kɛ enine tsɔɔ Yesu ni jɛ Nazaret, lɛ ni ekɛɛ: “Naa, Nyɔŋmɔ toobi lɛ!” Nɔŋŋ kɛkɛ ni Andrea batsɔ Yesu sɛɛnyiɛlɔ, ni ekɛ oyaiyeli yabɔ Petro nɛkɛ miishɛɛ sane nɛɛ akɛ: Mesia lɛ eshɛ shi! (Yoh. 1:35-40) Aaafee afii 4,000 komɛi ni tsɔ nakai be lɛ hiɛ, beni atse atua yɛ Eden lɛ, Yehowa Nyɔŋmɔ gba efɔ̃ shi akɛ mɔ aŋkro krɛdɛɛ ko baaba koni ekɛ hiɛnɔkamɔ diɛŋtsɛ abaha adesai. (1 Mose 3:15) Andrea kɛ Kpɔ̃lɔ nɛɛ, ni ji Mesia lɛ diɛŋtsɛ kpe! Petro hu sha foi koni eyana Yesu.

 8. Mɛni ji gbɛ́i ni Yesu kɛwo Petro lɛ shishi, ni mɛni hewɔ mɛi komɛi ayiŋ etɛɛɛ amɛ yɛ gbɛ́i ni akɛwo lɛ lɛ he lɛ?

⁸ Dani Petro baaba abana Yesu lɛ, no mli lɛ gbɛ́i ni akɛ le lɛ ji Simon. Shi Yesu kwɛ lɛ, ni ekɛɛ: “Bo ji Simon, Yona bi lɛ, aaatsɛo Kefa (eshishi ji: Petro loo tɛsaa).” (Yoh. 1:42) Ekã shi faŋŋ akɛ nɔ ni Yesu wie nɛɛ ji gbalɛ. Ena akɛ Petro baatsɔ tamɔ tɛ—Kristo sɛɛnyiɛlɔi lɛ ateŋ mɔ ni yɔɔ shiŋŋ, ni he wa ni abaanyɛ akɛ he afɔ̃ enɔ. Ani Petro na ehe nakai? Ekolɛ, eyiŋ fee lɛ enyɔɔnyɔ yɛ he. Mɛi po ni kaneɔ Sanekpakpai lɛ yɛ wɔbe nɛɛ amli lɛ enaaa nɔ ko yɛ Petro he ni tsɔɔ akɛ etamɔ tɛsaa. Mɛi komɛi po ewie akɛ, bɔ ni anaa Petro su yɛ Biblia lɛ mli lɛ haa ebafeɔ tamɔ mɔ ko ni bɛ shiŋŋ ni yiŋ feɔ lɛ enyɔɔnyɔ, ni nyɛɛɛ akpɛ eyiŋ.

 9. Mɛni nɔ Yehowa kɛ ebi lɛ kɛ amɛjwɛŋmɔ yaa, ni mɛni hewɔ osusuɔ akɛ esa akɛ wɔná hekɛnɔfɔ̃ɔ yɛ bɔ ni amɛkwɛɔ nii amɛhaa lɛ mli lɛ?

⁹ Petro yɛ etɔ̃mɔi. Jeee akɛ Yesu leee Petro tɔ̃mɔi lɛ. Shi taakɛ Yesu Tsɛ Yehowa ji lɛ, Yesu kɛ ejwɛŋmɔ yaa nibii kpakpai ni mɛi feɔ lɛ anɔ. Yesu na akɛ Petro yɛ sui kpakpai babaoo, no hewɔ lɛ, esumɔ ni eye ebua Petro koni ejie sui nɛɛ akpo yɛ gbɛ ni hi fe fɛɛ nɔ. Nakai nɔŋŋ ŋmɛnɛ lɛ, Yehowa kɛ ebi lɛ kɛ amɛjwɛŋmɔ yaa sui kpakpai ni wɔjieɔ lɛ kpo lɛ anɔ. Ekolɛ, wɔheŋ wɔyeŋ akɛ amɛbaana sui kpakpai babaoo komɛi yɛ wɔhe. Kɛlɛ, esa akɛ wɔná hekɛnɔfɔ̃ɔ yɛ bɔ ni amɛkwɛɔ nii amɛhaa lɛ mli, koni wɔkɛ wɔnifeemɔi atsɔɔ akɛ wɔmiisumɔ ni amɛtsɔse wɔ, ni amɛshɔ̃ wɔ taakɛ eba lɛ yɛ Petro gbɛfaŋ lɛ.—Nyɛkanea 1 Yohane 3:19, 20.

10. Mɛni ekolɛ Petro kɛ ehiŋmɛi na, ni kɛlɛ mɛni eku esɛɛ eyafee?

¹⁰ Ekolɛ, Petro fata Yesu he yɛ shiɛmɔ nitsumɔ ni nyiɛ sɛɛ lɛ mli. No hewɔ lɛ, ekolɛ ena klɛŋklɛŋ naakpɛɛ nii ni Yesu fee, ni ji nu ni eha etsɔ wein yɛ yookpeemɔ ko ni tee nɔ yɛ Kana lɛ shishi lɛ. Nɔ ni he hiaa titri lɛ ji, enu naakpɛɛ saji ni Yesu wie ni haa anáa hiɛnɔkamɔ ni kɔɔ Nyɔŋmɔ Maŋtsɛyeli lɛ he lɛ. Fɛɛ sɛɛ lɛ, Petro shi Yesu ni eku esɛɛ eyatsa ewuoyaa nitsumɔ lɛ nɔ. Shi nyɔji komɛi asɛɛ lɛ, Petro kɛ Yesu kpe hiɛ kɛ hiɛ ekoŋŋ—shi nɛkɛ be nɛɛ mli lɛ, Yesu kɛɛ Petro koni ekɛ ebe fɛɛ anyiɛ esɛɛ kɛtsu shiɛmɔ nitsumɔ lɛ.

11, 12. (a) Mɛɛ shihilɛ Petro kɛkpe nyɔɔŋnyɔɔŋ fɛɛ yɛ enitsumɔ lɛ mli? (b) Beni Petro bo Yesu toi lɛ, mɛɛ sanebimɔi ekolɛ eba ejwɛŋmɔŋ?

¹¹ Etsɛko tsɔ ni Petro kɛ shihilɛ ko ni jeɔ mɔ nijiaŋ wui kpe nakai nyɔɔŋ lɛŋ. Wolɛi lɛ efɔ̃ amɛyai lɛ kɛwo kpaakpo lɛ mli shii abɔ, shi fɛɛ lɛ yɔɔ mia, no ji amɛgbeee loo ko kwraa. Ekã shi faŋŋ akɛ, Petro kɛ hesai kɛ ŋaa fɛɛ ni ele yɛ wuoyaa mli lɛ tsu nii, ni efɔ̃ yaa lɛ ewo kpaakpo lɛ mli hei srɔtoi akɛ aleenɔ enine baagbe looi komɛi ni miiye nii lo. Ŋwanejee ko bɛ he akɛ, ekolɛ yɛ shihilɛi lɛ ekomɛi amli po lɛ, Petro nu he taakɛ wolɛi komɛi lɛ nuɔ he lɛ, ákɛ ená ni kulɛ ekɛ ehiŋmɛi baana faa lɛ mli he tuuntu ni looi lɛ ebua amɛhenaa yɛ lɛ, koni efɔ̃ yaa lɛ ewo jɛmɛ, aloo ákɛ lɛ diɛŋtsɛ ebaaya faa lɛ mli koni eyashwie looi lɛ ebawo yai lɛ amli. Anɔkwa, nakai susumɔ lɛ baaha Petro ahao kwraa fe tsutsu lɛ. Petro baaa ni ebahɛ looi kɛjie ehiɛtserɛ; no ji nitsumɔ ni etsuɔ kɛlɛɔ eweku lɛ. Naagbee mli aahu lɛ, ekpleke kɛ edɛŋ flo. Esa akɛ efɔfɔɔ yai lɛ ahe. No hewɔ lɛ, beni Yesu ba jɛmɛ lɛ, no mli lɛ Petro hiɛ edɔ eefɔ yai lɛ ahe.

¹² Asafo babaoo babua Yesu he, ni amɛmiibo nɔ fɛɛ nɔ ni ewieɔ lɛ toi jogbaŋŋ. Akɛni mɛi lɛ ayi fa hewɔ lɛ, Yesu bote Petro lɛlɛ lɛ mli, ni ekpa lɛ fai akɛ etsi kɛya nu lɛ hiɛ fioo. He ni Yesu ta yɛ nu lɛ hiɛ lɛ ha amɛnu egbee jogbaŋŋ, ni etsɔɔ amɛ nii. Petro bo lɛ toi jogbaŋŋ taakɛ mɛi ni yɔɔ jɛmɛ lɛ hu fee lɛ. Beni Yesu wieɔ Nyɔŋmɔ Maŋtsɛyeli lɛ, ni ji eshiɛmɔ lɛ saneyitso titri lɛ he lɛ, etɔɔɔ Petro kɛtoiboo. Kwɛ hegbɛ kple ni ebaaji kɛha Petro akɛ ebaaye ebua Kristo lɛ kɛgbɛ hiɛnɔkamɔ sane nɛɛ eshwã shikpɔŋ lɛ nɔ fɛɛ! Ani ebaahi nakai feemɔ? Te Petro baafee tɛŋŋ akwɛ eweku lɛ? Ekolɛ, Petro susu yaka deŋme ni egbo nyɔɔŋnyɔɔŋ fɛɛ lɛ he ekoŋŋ.—Luka 5:1-3.

13, 14. Mɛɛ naakpɛɛ nɔ ko Yesu fee eha Petro, ni te Petro fee enii eha tɛŋŋ?

¹³ Beni Yesu gbe ewiemɔ lɛ naa lɛ, ekɛɛ Petro akɛ: “Nyɛtsia nyɛyaa bu lɛŋ ní nyɛyafɔ̃a nyɛyaa lɛ, koni nyɛgbe loo.” Petro yiŋ fee lɛ enyɔɔnyɔ. Ewie akɛ: “Onukpa [loo Tsɔɔlɔ], nyɔɔŋ nɛŋ fɛɛ wɔtsu nii dɛŋdɛɛŋdɛŋ ni wɔnáaa nɔ ko; shi kɛlɛ owiemɔ naa lɛ mafɔ̃ yaa lɛ.” Petro fɔ eyai lɛ ahe etsɛko kwraa. Ekã shi faŋŋ akɛ, ákɛ ebaafɔ̃ yaa lɛ ewo nu lɛ mli ekoŋŋ lɛ ji nɔ ko ni esumɔŋ ni efee—titri lɛ akɛni ejeee be ni looi lɛ kɛyeɔ nii lɛ hewɔ! Kɛlɛ, ekpɛlɛ nɔ ni Yesu wie lɛ nɔ, ni ekolɛ ekɛ ewebii ni yɔɔ lɛlɛ kroko lɛ mli lɛ wie koni amɛba ni aya.—Luka 5:4, 5.

¹⁴ Beni Petro bɔi yaa lɛ gbalamɔ lɛ, eyɔse akɛ emli etsii fe nine. Petro naa ni kpɛ ehe sɔŋŋ hewɔ lɛ, etɛje ehe kɛgbala yaa lɛ, ni oona kɛ onaaa nɔŋŋ lɛ looi babaoo diɛŋtsɛ miipele yɛ yaa lɛ mli. Ekɛ heshitswaa fɔ̃ enanemɛi ni yɔɔ lɛlɛ kroko lɛ mli lɛ nine akɛ amɛba ni amɛbawa amɛ. Beni amɛba lɛ, etsɛɛɛ ni ebafee faŋŋ akɛ looi lɛ afalɛ lɛ hoŋ lɛlɛ kome mli. Amɛwo lɛji enyɔ lɛ fɛɛ mli looi obɔbɔ, shi babaoo shwɛ lolo—looi lɛ atsiimɔ sɔŋŋ hewɔ lɛ, lɛji lɛ bɔi shiumɔ. Petro naa kpɛ ehe ni ehiii lɛ nɔ ko feemɔ. Ena ni Kristo kɛ ehewalɛ lɛ etsu nii daŋ, shi yɛ shihilɛ nɛɛ mli lɛ, Petro diɛŋtsɛ ená he sɛɛ. Naa nuu ni baanyɛ aha looi tete abote yai amli! Enɛ ha Petro bɔi gbeyeishemɔ. Eho ekula shi, ni ekɛɛ: “Nuŋtsɔ, jee mimasɛi; ejaakɛ gbɔmɔ eshafeelɔ ji mi!” Te ebaafee tɛŋŋ ekɛ Mɔ ko ni kɛ Nyɔŋmɔ hewalɛ diɛŋtsɛ tsuɔ nii yɛ gbɛi ni tamɔ nɛkɛ nɔ lɛ abɔ lɛ?—Nyɛkanea Luka 5:6-9.

15. Mɛni Yesu fee kɛtsɔɔ akɛ Petro bɛ nɔ ko ni ebaadamɔ nɔ eshe gbeyei loo eyiŋ afee lɛ enyɔɔnyɔ?

¹⁵ Yesu kɛ mlihilɛ wie akɛ: “Kpa gbeyeishemɔ. Kɛjɛ be nɛɛ nɔ kɛyaa nɛɛ obaasha gbɔmɛi hiɛkalɔi.” (Luka 5:10, 11, NW) Jeee be ni esa akɛ mɔ yiŋ afee lɛ enyɔɔnyɔ loo eshe gbeyei nɛ. Petro bɛ nɔ ko ni ebaadamɔ nɔ eyiŋ afee lɛ enyɔɔnyɔ yɛ ewuoyaa nitsumɔ lɛ he; ni ebɛ nɔ ko hu ni ebaadamɔ nɔ eshe gbeyei yɛ etɔ̃mɔi lɛ ahewɔ loo enu he akɛ enyɛŋ eshiɛ. Yesu yɛ nitsumɔ kple ko ni ebaatsu, nitsumɔ ko ni baatsake adesai awɔsɛɛ. Esɔmɔɔ Nyɔŋmɔ ni kɛ ‘eshai baafa aahu lɛ.’ (Yes. 55:7) Yehowa baatsu Petro hiamɔ nii ahe nii eha lɛ, heloonaa nɔ̃ kɛ mumɔŋ nɔ̃ fɛɛ.—Mat. 6:33.

16. Te Petro, Yakobo, kɛ Yohane fee amɛnii yɛ Yesu ninefɔ̃ɔ lɛ he amɛha tɛŋŋ, ni mɛni hewɔ eji yiŋ ni hi fe fɛɛ ni amɛkpɛ lɛ?

¹⁶ Oya nɔŋŋ ni Petro kɛ Yesu wiemɔ lɛ tsu nii taakɛ Yakobo kɛ Yohane fee lɛ. “Amɛkɛ amɛlɛji lɛ bakpeleke, ni amɛshi fɛɛ ni amɛnyiɛ esɛɛ.” (Luka 5:11) Petro kɛ nɔ ni efee nɛɛ tsɔɔ akɛ eyɛ hemɔkɛyeli yɛ Yesu kɛ Yehowa, mɔ ni tsu lɛ lɛ mli. Eji yiŋ ni hi fe fɛɛ ni ekpɛ. Nakai nɔŋŋ Kristofoi ni yɔɔ ŋmɛnɛ ni yeɔ amɛyiŋ ni feɔ amɛ enyɔɔnyɔ lɛ, kɛ gbeyei ni amɛsheɔ lɛ anɔ koni amɛsɔmɔ Nyɔŋmɔ lɛ hu kɛ amɛnifeemɔi tsɔɔ akɛ amɛyɛ hemɔkɛyeli. Nakai hekɛnɔfɔ̃ɔ ni anáa yɛ Yehowa mli lɛ efeŋ yaka kɔkɔɔkɔ.—Lala 22:4, 5, Ga Biblia hee.

17. Mɛɛ nibii komɛi yɔɔ Petro jwɛŋmɔŋ yɛ afii enyɔ ni ekɛ Yesu kpe lɛ mli?

¹⁷ Aaafee afii enyɔ ni ho ni Petro kɛ Yesu kpe lɛ sɛɛ lɛ, Petro wiri lɛlɛ yɛ Galilea Ŋshɔ lɛ hiɛ nyɔɔŋ ko beni ahum ni naa wa tswaa lɛ, taakɛ wɔtsĩ tã yɛ sane nɛɛ shishijee mli lɛ. Anɔkwa, wɔnyɛŋ wɔle nibii ni no mli lɛ Petro susuɔ he. Nibii babaoo yɛ ni ebaasusu he! Yesu etsa Petro shaayoo lɛ. Eha e-Gɔŋ nɔ Shiɛmɔ lɛ. Etsɔ enitsɔɔmɔ kɛ naakpɛɛ nibii ni efee lɛ anɔ eha efee faŋŋ akɛ lɛ ji Mɔ ni Yehowa Ehala, Mesia lɛ. Beni nyɔji lɛ shwieɔ mli lɛ, ekã shi faŋŋ akɛ Petro tɔ̃mɔi, tamɔ bɔ ni etsɛɛɛ kɛkɛ lɛ eshe gbeyei loo eyiŋ efee lɛ enyɔɔnyɔ lɛ, eba shi bɔ ni sa. Yesu ehala Petro akɛ ebɔfoi 12 lɛ ateŋ mɔ kome po! Fɛɛ sɛɛ lɛ, Petro kpako gbeyeishemɔ kɛ eyiŋ ni feɔ lɛ enyɔɔnyɔ lɛ, etsɛŋ ni enɛ baafee faŋŋ aha lɛ.

18, 19. (a) Tsɔɔmɔ nɔ ni Petro na yɛ Galilea Ŋshɔ lɛ hiɛ lɛ. (b) Te Yesu here Petro nibimɔ lɛ nɔ eha tɛŋŋ?

¹⁸ Nyɔɔŋ saramɔ be ni ji ejwɛ lɛ nɔ loo aaafee maŋkɛ ŋmɛji etɛ kɛmiimɔ hulu shitee mli lɛ, trukaa lɛ Petro kpa lɛlɛ lɛ wirimɔ ni esaa ehe eta shi jogbaŋŋ. Naa nɔ ko miitsi ehe yɛ ŋshɔkei lɛ asɛɛ! Ani nyɔŋtsere lɛ ji nɔ ni kpɛɔ ŋshɔkei lɛ anɔ lɛ? Dabi, nɔ ni ji lɛ ma he kome, edamɔ shi jaŋŋ. Gbɔmɔ ko! Hɛɛ, gbɔmɔ ni, enyiɛ ŋshɔ lɛ hiɛ! Beni ebɛŋkɛɔ lɛ, efee tamɔ eetsɔ amɛmasɛi tuuntu. Kaselɔi lɛ atsui fã, ni amɛsusu akɛ amɛna ninaa ko. Gbɔmɔ lɛ kɛɛ akɛ: “Nyɛnáa tsui, miŋ; nyɛkashea gbeyei.” Yesu ji mɔ ni amɛna lɛ.—Mat. 14:25-28, NW.

¹⁹ Petro here nɔ akɛ: “Nuŋtsɔ, kɛji boŋ lɛ, fã mi koni matsɔ̃ nu lɛ hiɛ kɛba oŋɔɔ.” Nɔ ni efee klɛŋklɛŋ lɛ tsɔɔ akɛ eyɛ ekãa. Beni Petro na naakpɛɛ nii krɛdɛɛ nɛɛ, emii shɛ ehe waa ni eshwe akɛ ebaafee eko kɛtsɔɔ akɛ eyɛ hemɔkɛyeli. Petro sumɔ ni efee eko kɛwaje ehemɔkɛyeli lɛ. Yesu kɛ naajɔlɛ kɛɛ lɛ akɛ, ba. Petro yi shi kɛjɛ lɛlɛ lɛ mli, ni edamɔ ŋshɔ lɛ hiɛ. Feemɔ bɔ ni Petro nu he eha beni ená he ko yɛ nu lɛ hiɛ ekɛ enaji mamɔ, ni eshiuuu lɛ he mfoniri okwɛ. Ekolɛ, beni enyiɛ nu lɛ hiɛ kɛyaa Yesu ŋɔɔ lɛ, enaa kpɛ ehe waa. Shi etsɛɛɛ ni nɔ kroko hu bayi emli.—Nyɛkanea Mateo 14:29.

20. (a) Mɛni ha Petro jie ejwɛŋmɔ yɛ Yesu nɔ lɛ, ni mɛni jɛ mli kɛba? (b) Mɛɛ nikasemɔ Yesu ma nɔ mi eha Petro?

²⁰ Kulɛ, esa akɛ Petro kɛ ejwɛŋmɔ ama Yesu nɔ. Yesu ji mɔ ni no mli lɛ, ekɛ Yehowa hewalɛ lɛ miitsu nii koni Petro anyɛ anyiɛ ŋshɔkei lɛ anɔ lɛ. Kɛfata he lɛ, akɛni Petro tsɔɔ akɛ eyɛ hemɔkɛyeli yɛ Yesu mli lɛ hewɔ ni Yesu fee nakai lɛ. Shi Petro ha nɔ ko gbala ejwɛŋmɔ kɛjɛ Yesu nɔ. Wɔkaneɔ akɛ: “Beni ena akɛ kɔɔyɔɔ lɛ miitswa huu lɛ, eshe gbeyei.” Petro bɔi nakai ŋshɔkei ni kumɔɔ eshwieɔ lɛlɛ lɛ he, ni tswaa afui woɔ kɔɔyɔɔ lɛ mli lɛ akwɛmɔ, ni eshe gbeyei. Ekolɛ, enu he tamɔ nɔ ni eeshiu yɛ nakai kpaakpo lɛ mli yɛ jɛmɛ nɔŋŋ. Beni eshe gbeyei lɛ, ehemɔkɛyeli lɛ naa ba shi kwraa. Naa nuu ni asusu akɛ ebaanyɛ edamɔ shi shiŋŋ, ni no hewɔ lɛ atsɛ lɛ akɛ Tɛsaa lɛ, ni eeshiu tamɔ tɛ yɛ ehemɔkɛyeli ni naa ba shi lɛ hewɔ. Petro he esa waa kɛseremɔ moŋ, shi yɛ shihilɛ nɛɛ mli lɛ, emuuu efɔ̃ɔɔ nakai nyɛmɔ lɛ nɔ. Ebo ekɛɛ: “Nuŋtsɔ, heremɔ mi!” Yesu kpã enine mli esɔo lɛ ni egbala lɛ. Ni be ni Petro kã he eyɔɔ nu lɛ mli lolo lɛ, Yesu ma nikasemɔ ni he hiaa waa nɛɛ nɔ mi eha Petro ekɛɛ: “Bo ni ohemɔkɛyeli faaa, mɛni hewɔ oha oyiŋ fee bo kɔshikɔshi?”—Mat. 14:30, 31, NW.

21. Mɛni hewɔ yiŋkɔshikɔshifeemɔ yɔɔ oshara waa lɛ, ni te wɔbaafee tɛŋŋ wɔwu wɔshi su nɛɛ?

²¹ Yesu kɛɛ Petro akɛ, “Oha oyiŋ fee bo kɔshikɔshi”—mɛɛ wiemɔ ni sa jogbaŋŋ po ekɛtsu nii nɛkɛ! Yiŋkɔshikɔshifeemɔ ji nɔ ko ni yɔɔ hewalɛ waa ni fiteɔ nii. Kɛ́ wɔŋmɛɛ wɔhe wɔha lɛ lɛ, ebaanyɛ eha wɔhemɔkɛyeli lɛ nɔ agbɔ kwraa, ni ebaaha wɔshiu yɛ mumɔŋ. Esa akɛ wɔwu wɔshi yiŋkɔshikɔshifeemɔ! Yɛ mɛɛ gbɛ nɔ? Esa akɛ wɔkɛ wɔjwɛŋmɔ ama nibii kpakpai anɔ. Kɛ́ wɔkɛ wɔjwɛŋmɔ ma nibii ni woɔ wɔhe gbeyei, nibii ni jeɔ wɔnijiaŋ wui, nibii ni gbalaa wɔjwɛŋmɔ kɛjɛɔ Yehowa kɛ e-Bi lɛ anɔ lɛ anɔ lɛ, wɔyiŋ ni feɔ wɔ kɔshikɔshi lɛ mli baawo wu. Shi, kɛ́ wɔkɛ wɔjwɛŋmɔ ma Yehowa kɛ e-Bi lɛ, nibii ni amɛfee, nɔ ni amɛmiifee, kɛ nɔ ni amɛbaafee amɛha mɛi ni sumɔɔ amɛ lɛ anɔ lɛ, wɔbaanyɛ wɔye nibii ni haa wɔyiŋ feɔ wɔ kɔshikɔshi lɛ anɔ.

22. Mɛni hewɔ esa akɛ okase Petro hemɔkɛyeli lɛ?

²² Beni Petro nyiɛ Yesu sɛɛ kɛyaa lɛlɛ lɛ mli lɛ, ena akɛ ahum ni tswaa lɛ naa eba shi. Galilea Ŋshɔ lɛ ŋmɛ dɛmm. Petro fata kaselɔi krokomɛi lɛ ahe kɛwie akɛ: “Lɛɛlɛŋ, Nyɔŋmɔ bi jio!” (Mat. 14:33) Ekolɛ, beni je tsereɔ lɛ Petro tsuiŋ eyi obɔ kɛhiɛsɔɔ. Ebaná ele akɛ, esaaa akɛ ehaa gbeyeishemɔ haa eyiŋ feɔ lɛ kɔshikɔshi yɛ Yehowa kɛ Yesu he. Anɔkwa, dani Petro baanyɛ ebatsɔ Kristofonyo ni yɔɔ shiŋŋ tamɔ tɛsaa ni Yesu tsɔ hiɛ ewie yɛ ehe lɛ, tsakemɔi babaoo yɛ ni esa akɛ Petro afee. Shi etswa efãi shi akɛ eŋmɛɛɛ nibii ahe kɛsaaa, ebaaya nɔ ebɔ ehe mɔdɛŋ. Ani bo hu otswa ofai shi nakai? Kɛ́ ofee nakai lɛ, obaana akɛ, Petro hemɔkɛyeli lɛ sa kasemɔ waa.