Yitso 81

Mɔdɛŋ ni Abɔ Shii Abɔ ni Agbe Yesu

AKƐNI eji fɛi be hewɔ lɛ, Yesu nyiɛ he ni aha yiteŋ ni atsɛɔ jɛmɛ akɛ Salomo ablanaa lɛ nɔ. Eyɛ sɔlemɔ tsu lɛ masɛi. Kɛkɛ ni Yudafoi lɛ babɔle ehe kɛkpe ni amɛbɔi lɛ kɛɛmɔ akɛ: “Mɛɛ beyinɔ nɔŋŋ oooha wɔyiŋ afee wɔ kɔshikɔshi kɛyashi? Kɛ bo ji Kristo lɛ, kɛɛmɔ wɔ faŋŋ.”

Yesu here amɛnɔ akɛ: “Mikɛɛ nyɛ ni nyɛheee nyɛyeee.” Yesu ekɛɛɛ amɛ yɛ faŋŋ mli akɛ lɛ ji Kristo lɛ, tamɔ bɔ ni ekɛɛ Samariayoo lɛ yɛ nu bu lɛ he lɛ. Shi kɛlɛ, ejie ehe kpo etsɔɔ amɛ yɛ be mli ni egbala mli etsɔɔ amɛ akɛ lɛ lɛ ŋwɛi ji he ni ejɛ eba ni akɛ eyɛ shihilɛ mli dani Abraham ba lɛ.

Shi kɛlɛ, Yesu miitao ni gbɔmɛi lɛ diɛŋtsɛ amu sane naa aha amɛhe akɛ lɛ ji Kristo lɛ kɛtsɔ enitsumɔi lɛ ni amɛkɛaato nɔ ni Biblia lɛ gba efɔ shi akɛ Kristo lɛ baatsu lɛ he lɛ nɔ. Enɛ hewɔ ni mra mli lɛ ekɛɛ ekaselɔi lɛ akɛ amɛkakɛɛ mɔ ko mɔ ko akɛ lɛ ji Kristo lɛ. Ni enɛ hewɔ ni etee nɔ ni ekɛɛ Yudafoi ni yitsoŋ wa lɛ akɛ: “Nitsumɔi ni mitsuɔ yɛ mi-Tsɛ gbɛi anɔ lɛ, nomɛi miiye mihe odase; shi moŋ nyɛheee nyɛyeee.”

Mɛni hewɔ ni amɛheee amɛyeee lɛ? Ani akɛni amɛnaaa odaseyeli akɛ Yesu ji Kristo lɛ hewɔ? Dabi, shi moŋ yɛ yiŋtoo ni Yesu kɛha beni ekɛɛ amɛ nɛkɛ lɛ hewɔ: “Nyɛjeee mitooi lɛ eko, taakɛ bɔ ni mikɛɛ nyɛ lɛ. Mitooi lɛ nuɔ migbee, ni mile amɛ, ni amɛnyiɛɔ misɛɛ, ni mi nɔŋŋ mihaa amɛ naanɔ wala, ni amɛhiɛ kpataŋ kɛaatee naanɔ, ni asaŋ mɔ ko shɔŋ amɛ yɛ midɛŋ. Mi-Tsɛ ni ŋɔ amɛ eha mi lɛ fe mɛi fɛɛ, ni mɔ ko nyɛŋ ashɔ amɛ yɛ mi-Tsɛ dɛŋ.”

Kɛkɛ ni Yesu tee nɔ etsɔɔ wekukpaa ni ka ekɛ e-Tsɛ lɛ teŋ lɛ mli, ni etsɔɔ mli akɛ: “Mi kɛ Tsɛ lɛ fɛɛ lɛ, ekomeŋ.” Akɛni Yesu yɛ shikpɔŋ nɔ, ni e-Tsɛ lɛ hu yɛ ŋwɛi hewɔ lɛ, eyɛ faŋŋ akɛ etsɔɔɔ akɛ ekɛ Tsɛ lɛ fɛɛ lɛ, gbɔmɔ kome, loo heloo kome. Shi moŋ, eetsɔɔ akɛ amɛfeɔ ekome yɛ yiŋtoo mli, ni akɛ amɛyɛ ekomefeemɔ mli.

Akɛni Yesu wiemɔi nɛɛ ha Yudafoi lɛ amli wo la hewɔ lɛ, amɛkɔlɔ tɛi akɛ amɛkɛbaagbe lɛ, taakɛ amɛfee be ko ni eho, yɛ Asesei Agbijurɔ lɛ shishi lɛ. Shi Yesu kɛ mɛi ni baagbe lɛ nɛɛ kpe kɛ ekaa ni ekɛɛ: “Nitsumɔi kpakpai pii mitsɔɔ nyɛ kɛjɛ mi-Tsɛ ŋɔɔ; te nakai nitsumɔi lɛ ateŋ nɔ hewɔ ni nyɛtswiaa mi tɛi nɛɛ?”

Amɛha lɛ hetoo akɛ: “Jeee nitsumɔ kpakpa ko hewɔ wɔbaatswiao tɛi lɛ, shi moŋ musubɔɔ hewɔŋ, ejaakɛ bo ni gbɔmɔ jio lɛ otsɛɔ ohe akɛ Nyɔŋmɔ jio.” Akɛni Yesu ekɛko da akɛ Nyɔŋmɔ ji lɛ hewɔ lɛ, mɛni hewɔ ni Yudafoi lɛ kɛɔ enɛ lɛ?

Eka shi faŋŋ akɛ ejɛ wiemɔ ni Yesu wie akɛ eyɛ hewalɛi komɛi ni amɛsusuɔ akɛ Nyɔŋmɔ pɛ yɔɔ nakai hewalɛ lɛ hewɔ. Akɛ nɔkwɛmɔ nɔ lɛ, ewie yɛ “tooi” lɛ ahe akɛ, “mi nɔŋŋ mihaa amɛ naanɔ wala,” ni ji nɔ ko ni adesa ko nyɛŋ afee lɛ. Shi kɛlɛ, Yudafoi lɛ ku amɛhiɛ amɛfɔ anɔkwale ni eji akɛ Yesu kpɛlɛɔ nɔ akɛ enaa ehewalɛ lɛ kɛjɛɔ e-Tsɛ lɛ ŋɔɔ lɛ nɔ.

No sɛɛ lɛ, Yesu tsɔɔ akɛ ebaa shi fe Nyɔŋmɔ kɛtsɔ nii ni ebi amɛ nɛɛ nɔ, akɛ: “Ani aŋmako yɛ nyɛ Mla lɛ mli [yɛ Lala 82:6] akɛ: ‘Mikɛɛ, nyɔŋmɔi ji nyɛ?’ Kɛji mɛi aŋɔɔ ni Nyɔŋmɔ wiemɔ lɛ ba lɛ tete lɛ etsɛ amɛ ‘nyɔŋmɔi’ lɛ, . . . nyɛmiikɛɛ yɛ mɔ ni Tsɛ lɛ efee lɛ krɔŋkrɔŋ ni etsu lɛ kɛba je lɛ mli lɛ hewɔ akɛ: ‘Obɔ musu,’ akɛni mikɛɛ akɛ: Nyɔŋmɔ Bi ji mi lɛ?”

Akɛni Ŋmalɛi lɛ tsɛɔ adesai kojolɔi ni ejaaa lɛ po akɛ “nyɔŋmɔi” hewɔ lɛ, mɛɛ tɔmɔ Yudafoi nɛɛ baanyɛ ana yɛ Yesu he yɛ nɔ ni ewie akɛ “Nyɔŋmɔ Bi ji mi” lɛ he? Yesu kɛfata he akɛ: “Kɛ mitsuuu mi-Tsɛ nitsumɔi lɛ, no lɛ nyɛkahea mi nyɛyea; shi kɛji mitsuɔ, ni kɛlɛ nyɛheee mi nyɛyeee lɛ, nyɛhea nitsumɔi lɛ nyɛyea mɔ, koni nyɛle ni nyɛhe nyɛye akɛ Tsɛ lɛ yɛ mimli, ni mi hu miyɛ Tsɛ lɛ mli.”

Beni Yesu wie enɛ lɛ, Yudafoi lɛ bɔ mɔdɛŋ ni amɛmɔ lɛ. Shi eje amɛdɛŋ, taakɛ efee be ko ni eho yɛ Asesei Agbijurɔ lɛ shishi lɛ. Kɛkɛ ni eshi Yerusalem ni efa gbɛ kɛfo Yordan Faa lɛ kɛtee he ni Yohane je shishi ebɔi baptisimɔ yɛ aaafee afii ejwɛ ni tsɔ hiɛ lɛ. Etamɔ nɔ ni biɛ kɛ Galilea Ŋshɔ lɛ wuoyigbɛ naabu lɛ jɛkɛɛɛ, ni eheɔ gbii enyɔ loo nɔ gbɛfaa kɛjɛɔ Yerusalem.

Mɛi pii ba Yesu ŋɔɔ yɛ biɛ ni amɛbɔi kɛɛmɔ akɛ: “Yohane efeee okadi ko moŋ, shi nii fiaa ni Yohane wie yɛ nuu nɛɛ he lɛ, anɔkwaŋ.” No hewɔ lɛ mɛi pii na hemɔkɛyeli yɛ Yesu mli yɛ biɛ. Yohane 10:22-42; 4:26; 8:23, 58; Mateo 16:20.

▪ Mɛɛ gbɛ Yesu taoɔ ni mɛi lɛ atsɔ nɔ ayoo akɛ lɛ ji Mesia lɛ?

▪ Mɛɛ gbɛ nɔ Yesu kɛ e-Tsɛ lɛ ji ekome yɛ?

▪ Eka shi faŋŋ akɛ, mɛni hewɔ ni Yudafoi lɛ kɛɔ akɛ Yesu miifee ehe nyɔŋmɔ lɛ?

▪ Mɛɛ gbɛ nɔ wiemɔ ni Yesu tsɛ sɛɛ kɛjɛ Lala lɛ mli lɛ tsɔɔ akɛ ekɛɛɛ akɛ ekɛ Nyɔŋmɔ yeɔ egbɔ?