Natanael—Nuu Ko Ni Apasa Bɛ Emli Lɛ
EEEFEE hiɛnyam kpele lɛɛlɛŋ akɛ aaatsɛ mɔko anɔkwa Israelnyo ni apasa bɛ emli. Ni eeefee hiɛnyam ni fe nakai po kɛji yijiemɔ nɛɛ aaajɛ mɔko ni abuɔ nɔni oookɛɛ lɛ waa fe nɔni adesai krokomɛi fɛɛ aaakɛɛ, lɛ naa. Natanael ni alelɛ hu akɛ Bartolomeo ji mɔko ni awo ohiɛ nyam waa nakai. Nyɔŋmɔ Bi lɛ diɛŋtsɛ kɛɛ yɛ ehe akɛ: “Naa, anɔkwa Israelnyo, mɔ mli ni apasa bɛ.”—Yoh. 1:47.
Yesu Kristo wie wiemɔi nɛɛ dani Natanael batsɔ bɔfoi 12 lɛ ateŋ mokome. Taakɛ nɔni bɔfo Yohane ŋma lɛ tsɔɔ lɛ, Yesu tsɛ Filipo akɛ ebanyiɛ esɛɛ. Filipo hu tee ni eyatao enaanyo Natanael ni ekɛɛ lɛ miishɛɛsane lɛ akɛ: “Wɔna mɔni Mose ŋma ehe sane yɛ mla lɛ mli, kɛ gbalɔi lɛ hu lɛ, Yesu, Yosef bi ni jɛ Nazaret lɛ.”—Yoh. 1:45.
Natanael heee eyeee. Eha hetoo akɛ: “Ani nɔko kpakpa ko aaanyɛ ajɛ Nazaret?” (Yoh. 1:46a) Ŋwanejee ko bɛ he akɛ ele Mika gbalɛ lɛ mli wiemɔi nɛɛ, akɛ: “Ni bo, Betlehem Efrata, ni odaaa beni aaabuo ashi Yuda wekui lɛ anɔ, bo kɛ̃ omli mɔko aaajɛ aba aha mi, ni ebatsɔ Israel nɔyelɔ, mɔni ekpojei je blema beebe kɛjɛ naanɔ gbii lɛ amli lɛ.” (Mika 5:1) Nohewɔ lɛ ebafeŋ mɛlɛɔ ehaŋlɛ akɛ eeekpɛlɛ nɔ oya nɔŋŋ akɛ Mesia lɛ aaajɛ Nazaret ni yɔɔ Galilea ni bɛŋkɛ Betlehem, lɛ mli. Natanael sanebimɔ lɛ miitao atsɔɔ akɛ nɔko kwraa bɛ Nazaret he ni aaaha efee heko ni aaanyɛ akpa nɔkpakpa ko gbɛ kɛjɛ. Belɛ ekã shi faŋŋ akɛ Nazaret nyɛŋ afee maŋ nɔ ni mɔni agba ehe sane ato yɛ Mla lɛ kɛ Gbalɔi lɛ amli Iɛ aaajɛ kɛaaba.
Filipo kɛ Natanael etaaa naa yɛ enɛ he shi moŋ efɔ̃lɛ nine akɛ ‘eba ni ebakwɛ.’ Esa yijiemɔ akɛ Natanael haaa ni atɛŋ ni etsɔ hiɛ ebu lɛ atsilɛ gbɛ ni ekɛ jwɛŋmɔ kpakpa akabote sane lɛ mli, shi moŋ etsu enaanyo lɛ ninefɔɔ lɛ he nii. Beni Yesu na Natanael Iɛ, ekɛɛ: “Naa, anɔkwa lsraelnyo, mɔ mli ni apasa bɛ.” (Yoh. 1:46b, 47) Atsɛɔ Yakob shwiei lɛ fɛɛ akɛ lsraelbii moŋ, shi jeee amɛ fɛɛ amɛji Israelbii yɛ nakai gbɛi lɛ Shishitsɔɔmɔ naa. Gbɛi “Israel” lɛ shishi ji “mɔni kɛ Nyɔŋmɔ peleɔ nii ahe [mɔni fĩɔ shi yɛ ekɛ Nyɔŋmɔ teŋ sane mli],” ni akɛ nakai gbɛi lɛ wo Yakob beni ekɛ ŋwɛi bɔfo ko shi mpele beni alee ni ajɔɔlɛ lɛ. Yakob efeee enii tamɔ enyɛminuu Esau, shi moŋ ehiɛ sɔ krɔŋkrɔŋnii, ni ena he suɔmɔ akɛ egbo deŋme beni afee ni ena Nyɔŋmɔ tsuijurɔ. (1 Mose 32:22-28; Heb. 12:16) Akɛ anɔkwa Israelnyo lɛ, belɛ Natanael yɛ hemɔkɛyeli yɛ Nyɔŋmɔ shiwoi amli ni ehiɛ sɔ nomɛi. Ejeee Israelnyo yɛ fɔmɔ naa kɛkɛ, shi yɛ nifeemɔ kɛ anɔkwale mli diɛŋtsɛ lɛ, ni etsɔɔ akɛ eyeɔ Nyɔŋmɔ suɔmɔnaanii nɔ tamɔ bɔni eblematsɛ Yakob fee lɛ. Apasa, osatofeemɔ aloo dujiaŋ nɔko kwraa bɛ Natanael he. Yɛ Yesu Kristo jwɛŋmɔ naa lɛ, eji jalɔ.
Te Natanael fee enii eha tɛɛŋ? Ebi sane akɛ: “Nɛgbɛ ole mi yɛ?” Hɛɛ eetao ebi nɔni Yesu damɔ nɔ ni ekɛwie nakai wiemɔ lɛ. Kɛkɛ ni Nyɔŋmɔ Bi lɛ ha hetoo akɛ: “Minao fɛɛ dã ni Filipo tsɛo, bo mli ni oyɔɔ agbamitso lɛ shishi lɛ.” (Yoh. 1:48) Amrɔnɔŋŋ ni Natanael nu shishi. Nɔko yɛ ni kɔɔ agbamitso lɛ shishi ni eyɔɔ lɛ he ni yeɔ odase akɛ eji anɔkwa Israelnyo ni apasa bɛ emli. Nohewɔ lɛ Yesu wiemɔi lɛ ye Natanael he odase ni ema nɔ mi akɛ Yesu ni wie nakai wiemɔ lɛ yɛ naakpɛɛ hewalɛ ko ni ekɛleɔ saji. Wɔleee akɛ Natanael yɛ nakai tso lɛ shishi ni ekometoo eejwɛŋ aloo eesɔle. Shi nɔni ba yɛ nakai agbamitso lɛ he lɛ ji nɔko ni Natanael susuɔ akɛ eji nɔkpakpa ko ni Nyɔŋmɔ Bi lɛ baanya adamɔ nɔ akɛɛ nɔni ewie yɛ Natanael he lɛ.
Nɔni Yesu wiemɔi lɛ tsɔɔ lɛ haaa ŋwanejee ko kwraa aba Natanael jwɛŋmɔ kɛ etsui mli. Eje hemɔkɛyeli krɔŋŋ mli ejaje akɛ: “Rabi, bo ji Nyɔŋmɔ Bi lɛ, bo ji Israel maŋtsɛ lɛ.”—Yoh. 1:49.
Kɛjɛ no nɔ kɛyaa lɛ, Natanael na ni Yesu Kristo wiemɔi nɛɛ ba mli akɛ: “Ní mikɛɛo akɛ mihao yɛ agbamitso lɛ shishi lɛ hewɔ oheɔ oyeɔ nɛɛ. Ooona nii wuji ni fe enɛ.” (Yoh. 1:50) Natanael na Yesu klɛŋklɛŋ naakpɛɛ nii ni ji nu ni eha etsɔ wein ni nɔ bɛ lɛ, yɛ yookpeemɔ ko shishi yɛ emaŋ Kana ni yɔɔ Galilea lɛ. (Yoh. 2:1-11; 21:2) Natanael fata bɔfoi krokomɛi 11 ni ahala amɛ fee sɛɛ lɛ ahe ni amɛna ni Yesu tsa helatsɛmɛi, efamɔ daimonioi ni eteé gbohii ashi po. Taakɛ bɔfoi krokomɛi hu ná hegbɛ lɛ, aha Natanael hewalɛ ni efee naakpɛɛnii, ni efata he ni ashiɛ miishɛɛsane nɛɛ akɛ: “ŋwɛi maŋtsɛyeli lɛ eshɛ shi etã.” (Mat10:1-8) Agbɛnɛ hu Natanael ná Yesu nitsɔɔmɔ kɛ tsɔsemɔ ni ekɛha yɛ eshikpɔŋnɔ sɔɔmɔ mli lɛ he sɛɛ.
Tamɔ bɔni Nyɔŋmɔ Bi lɛ le mɔni Natanael ji yɛ etsui mli lɛ, nakai nɔŋŋ ele jwɛŋmɔ krɛdɛɛ ni yɔɔ mɛi fɛɛ ni kɛɔ ŋmɛnɛ akɛ ekaselɔi ji amɛ lɛ ayisɛɛ. (Kpoj. 2:23) Belɛ nyɛhaa, wɔmiaa wɔhiɛ ni wɔfea wɔhe mɛi ni apasa bɛ amɛmli koni, taakɛ ebalɛ yɛ Natanael gbɛfaŋ lɛ, wɔ hu wɔna nii wuji ni fe nɔni wɔna beni wɔjaje hemɔkɛyeli ni wɔyɔɔ yɛ Yehowa Nyɔŋmɔ kɛ e-Bi lɛ amli klɛŋklɛŋ lɛ.
July Daa Gbi Ŋmalɛ
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)