Yitso 103

Sɔlemɔ We lɛ Mliyaa Ekoŋŋ

YESU kɛ ekaselɔi lɛ ewɔ Betania nɔ ni ji shii etɛ nɔ kɛjɛ be mli ni amɛjɛ Yeriko amɛba lɛ. Agbɛnɛ beni hulu jeɔ yɛ Ju, Nisan 10 lɛ, no mli lɛ amɛnyiɛ gbɛ nɔ kɛmiiya Yerusalem. Hɔmɔ miiye Yesu. No hewɔ lɛ beni ena agbami tso ko ni efu bai lɛ, egba kɛtee koni eyakwɛ akɛ agbamii yɛ nɔ lo.

Tso lɛ efu bai mra fe be ni esa akɛ efu bai, ejaakɛ ja Otukwajaŋ mli dani eshɛɔ agbami be, ni Otsokrikri naagbee gbɛ nɛ. Shi kɛlɛ, Yesu susu akɛ akɛni efu bai mra hewɔ lɛ, ewo agbamii hu mra. Shi enine nyɛ shi. Bai lɛ eha tso lɛ miilaka mɔ waa. No hewɔ lɛ Yesu lomɔ tso lɛ ni ekɛɛ: “Agbɛnɛ mɔ ko yeŋ onɔ yibii dɔŋŋ kɛaatee naanɔ!” Amɛna amɛle nɔ ni jɛ Yesu nifeemɔ lɛ mli ba kɛ bɔ ni ehe hiaa ha lɛ enɔ jetsɛremɔ.

Ni Yesu kɛ ekaselɔi lɛ tsa amɛgbɛfaa lɛ nɔ, ni etsɛɛɛ ni amɛyashɛ Yerusalem. Etee sɔlemɔ we lɛ, he ni eyakwɛ momo gbi ni tsɔ hiɛ lɛ shwane mli lɛ. Shi kɛlɛ, ŋmɛnɛ lɛ, efee nɔ ko taakɛ efee afii etɛ ni eho beni eba Hehoo lɛ yeli yɛ afi 30 Ŋ.B. lɛ. Yesu loo mɛi ni hɔ̃ɔ nii kɛ mɛi ni heɔ nii yɛ sɔlemɔ we lɛ anibii lɛ eshɛrɛ eshwie ni etsɔmɔ mɛi ni tsakeɔ shika lɛ okpɔlɔi lɛ kɛ mɛi ni hɔɔ okpoi lɛ asɛii lɛ hu. Ekpɛlɛɛɛ ni mɔ ko kɛ tsɛŋsi po tsɔɔ sɔlemɔ we lɛ mli kɛhoɔ.

Yɛ be mli ni ebuɔ mɛi ni tsakeɔ shika lɛ kɛ mɛi ni hɔɔ kooloi lɛ fɔ lɛ, ekɛɛ: “Ani aŋmako akɛ: ‘Aaatsɛ miwe lɛ jeŋmaji fɛɛ asɔlemɔ we’? Shi nyɛ lɛ nyɛkɛfee ojotswalɔi abuu!” Ojotswalɔi ji amɛ ejaakɛ amɛheɔ jara ni wa waa kɛjɛɔ mɛi ni bɛ nɔ ko ni amɛaanyɛ amɛfee akɛ ja amɛhe kooloi ni amɛhɔɔ lɛ ni amɛkɛsha afɔlei lɛ adɛŋ. No hewɔ lɛ Yesu bu nɛkɛ nitsumɔ nɛɛ akɛ etamɔ juu loo ojotswaa pɛpɛɛpɛ.

Beni osɔfonukpai lɛ, woloŋmalɔi lɛ, kɛ maŋbii lɛ ateŋ onukpai lɛ nu nɔ ni Yesu yafee lɛ, amɛtao gbɛ nɔ ni amɛaatsɔ ekoŋŋ koni amɛgbe lɛ. No hewɔ lɛ amɛma nɔ mi akɛ anyɛŋ atsake amɛ. Ni kɛlɛ, amɛleee bɔ ni amɛaafee ni amɛkpata Yesu hiɛ, ejaakɛ gbɔmɛi lɛ fɛɛ kã he amɛnyiɛ esɛɛ ni amɛmiibo lɛ toi.

Yɛ heloonaa Yudafoi lɛ asɛɛ lɛ, Jeŋmajiaŋbii hu eba Hehoo lɛ yeli. Mɛnɛɛmɛi ji mɛi ni atsake amɛ, ni tsɔɔ akɛ amɛtsake kɛba Yudafoi ajamɔ lɛ mli. Helabii komɛi, ni eka shi faŋŋ akɛ atsake amɛ lɛ ba Filipo ŋɔɔ ni amɛbi akɛ amɛbaana Yesu. Ni Filipo tee Andrea ŋɔɔ, ekolɛ koni eyabi lɛ kɛji kpee ni tamɔ nɛkɛ ja gbɛ lo. Etamɔ nɔ ni Yesu kã he eyɛ sɔlemɔ we lɛ lolo, yɛ he ni Helabii lɛ nyɛ amɛyana lɛ yɛ lɛ.

Yesu le akɛ eshwɛ lɛ gbii fioo ko pɛ ni ebaahi wala mli, no hewɔ lɛ efee eshihilɛ lɛ he mfoniri fɛfɛo akɛ: “Ŋmɛlɛtswaa ni akɛbaawo gbɔmɔ Bi lɛ hiɛ nyam lɛ eshɛ. Lɛlɛŋ, lɛlɛŋ, miikɛɛ nyɛ akɛ: Kɛ ŋmaa kuli enyɔɔɔ shikpɔŋ ni egbo lɛ, no lɛ bɔ ni eyɔɔ lɛ nɔŋŋ eyɔɔ; shi kɛji egbo lɛ, ewoɔ yibii pii.”

Ŋmaa kuli kome jara waaa. Shi kɛlɛ, mɛni baa kɛji akɛyawo shikpɔŋ ni “egbo,” ni ewala akɛ dumɔ wu lɛ ba naagbee lɛ? No lɛ ekwɛ̃ɔ ni be ni sa mli lɛ edaa ni etsɔɔ tso ni ewoɔ yibii ni ji ŋmaa babaoo. Nakai nɔŋŋ hu, Yesu ji mɔ kome pɛ ni eye emuu. Shi kɛji egbo akɛ mɔ ni yeɔ anɔkwa ehaa Nyɔŋmɔ lɛ, ebatsɔɔ mɔ ni atsɔɔ enɔ akɛ naanɔ wala haa mɛi ni yeɔ anɔkwa, ni amɛyɔɔ nakai mumɔ ni haa akɛ he shaa afɔle lɛ nɔŋŋ eko tamɔ bɔ ni lɛ hu eyɔɔ lɛ. No hewɔ lɛ Yesu kɛɛ: “Mɔ ni dɔɔ ewala he lɛ, elaajeɔ lɛ, shi mɔ ni nyɛɔ ewala yɛ je nɛɛ mli lɛ, eeeto lɛ kɛaatee naanɔ wala mli.”

Eka shi faŋŋ akɛ Yesu jwɛŋŋ ekome pɛ ehe, ejaakɛ etsa nɔ ni etsɔɔ mli akɛ: “Kɛji mɔ ko miisɔmɔ mi lɛ, ha ni enyiɛ misɛɛ, ni he ni miyɔɔ lɛ, jɛi misɔɔlɔ lɛ hu aaahi; kɛji mɔ ko miisɔmɔ mi lɛ, mi-Tsɛ aaawo lɛ.” Mɛɛ nyɔmɔwoo kpele ni anaa kɛjɛɔ Yesu sɛɛnyiɛmɔ kɛ esɔɔmɔ mli enɛ ji nɛkɛ! No ji nyɔmɔwoo ni anaa akɛ Tsɛ lɛ aaawo mɔ lɛ hiɛ nyam koni efata Kristo he yɛ Maŋtsɛyeli lɛ mli.

Beni Yesu susuɔ piŋmɔ kpele kɛ amanehulu gbele ni ka ehiɛ lɛ he lɛ, etee nɔ ni ekɛɛ: “Agbɛnɛ misusuma miihao, ni mɛni makɛɛ? Ataa, heremɔ mi yɛ ŋmɛlɛtswaa nɛɛ mli.” Ja abaanyɛ atsi nɔ ni ka ehiɛ ni baa lɛ naa pɛ kɛkɛ! Shi, dabi, taakɛ ekɛɛ lɛ: “Tsɛbelɛ enɛ hewɔ nɔŋŋ miba yɛ ŋmɛlɛtswaa nɛɛ mli.” Yesu kɛ Nyɔŋmɔ gbɛjianɔtoo muu lɛ fɛɛ kpaa gbee, kɛ lɛ diɛŋtsɛ efɔleshaa gbele lɛ hu. Mateo 21:12, 13, 18, 19; Marko 11:12-18; Luka 19:45-48; Yohane 12:20-27.

▪ Eyɛ mli akɛ eshɛko agbamii abe moŋ, shi mɛni hewɔ ni Yesu kpaa gbɛ akɛ ebaana agbamii lɛ eko lɛ?

▪ Mɛni hewɔ ni Yesu tsɛ mɛi ni hɔɔ nii yɛ sɔlemɔ we lɛ akɛ “ojotswalɔi” lɛ?

▪ Yɛ mɛɛ gbɛ nɔ Yesu tamɔ ŋmaa kuli kome ni gboɔ?

▪ Te Yesu nu amanehulu kɛ gbele ni ka ehiɛ lɛ he eha tɛŋŋ?