Amɛfee Yehowa Suɔmɔnaa Nii

Gbɔmɔ ni Fe Fɛɛ lɛ Tsu Sɔɔmɔ ko ni Baa Shi He Nii

YESU le akɛ enaagbee ŋmɛlɛtswai ni ekɛ ebɔfoi lɛ baaye lɛ baafee nɔ̃ ko ní jara baawa waa. Etsɛŋ ni abaamɔ lɛ, ni abaaka ehemɔkɛyeli lɛ yɛ gbɛ ni afeko nakai dã nɔ. Yesu le hu akɛ jɔɔmɔi wuji jwere ehiɛ. Etsɛŋ ni abaawo enɔ kɛya Nyɔŋmɔ ninejurɔ nɔ ni abaaha lɛ “gbɛi ni ta gbɛi fɛɛ gbɛi nɔ, koni mɛi ni yɔɔ ŋwɛi kɛ mɛi ni yɔɔ shikpɔŋ lɛ nɔ kɛ mɛi ni yɔɔ shikpɔŋ lɛ shishi lɛ anakutso fɛɛ nakutso akula shi yɛ Yesu gbɛi lɛ amli.”—Filipibii 2:9, 10.

Kɛlɛ, Yesu gbele ni ebɛŋkɛ lɛ he yeyeeyefeemɔ loo enyɔmɔwoo ní awo lɛ shi yɛ he lɛ he gbɛkpamɔ gbalaaa ejwɛŋmɔ kɛjɛɛɛ ebɔfoi lɛ ahiamɔ nii lɛ ahe. Yohane ŋma efɔ̃ shi yɛ sɛɛ mli yɛ e-Sanekpakpa lɛ mli akɛ, “esumɔ amɛ kɛwula shi.” (Yohane 13:1) Ni yɛ nɛkɛ naagbee ŋmɛlɛtswai ni he hiaa nɛɛ mli yɛ eshihilɛ akɛ adesa ni yeɔ emuu lɛ mli lɛ, Yesu tsɔɔ ebɔfoi lɛ nikasemɔ ko ni he hiaa.

Heshibaa He Nikasemɔ Ko

Bɔfoi lɛ kɛ Yesu yɛ ŋwɛitsu ko nɔ yɛ Yerusalem koni amɛye Hehoo lɛ. Bei ní etsɔ hiɛ lɛ mli lɛ, Yesu enu ni amɛmiitaa naa yɛ mɔ ni fe fɛɛ yɛ amɛteŋ lɛ he. (Mateo 18:1; Marko 9:33,34) Ekɛ amɛ esusu sane nɛɛ he, ni ebɔ mɔdɛŋ koni ejaje amɛsusumɔ lɛ. (Luka 9:46) Shi kɛlɛ, yɛ nɛkɛ be nɛɛ mli lɛ, Yesu kɛ gbɛ kroko tsu nii ni ekɛma nakai nikasemɔi lɛ anɔ mi. Jeee akɛ ehala akɛ ekɛ amɛ aaawie heshibaa he kɛkɛ, shi moŋ efee he nɔkwɛmɔnɔ.

Yohane ŋma kɛ, Yesu ‘te shi yɛ niyenii lɛ ashi, ni ejie etadei lɛ eshwie shi.’ “Ekɔ papaŋ ni eŋɔŋmɔ ehɛ. No sɛɛ lɛ efɔse nu ewo kulo mli, ni ebɔi ekaselɔi lɛ anaji ahe fɔmɔ, ni ekɛ papaŋ ni ŋmɔ ehɛ lɛ tsumɔɔ.”—Yohane 13:4, 5.

Yɛ blema Boka Teŋgbɛ ni edɔ lɛ nɔ lɛ, gbɔmɛi fɔɔ tokotai woo yɛ be mli ni amɛnyiɛɔ gbɛi ni mulu yɔɔ nɔ lɛ nɔ. Kɛ amɛbote mɔfolo ko shia lɛ, shiatsɛ lɛ baaŋa amɛ, ni ebaayɛ nu ewo gbɛ́ mli eha amɛ koni amɛkɛfɔ́ amɛnaji ahe. Yɛ shikatsɛmɛi ashiai amli lɛ, nyɔŋ baatsu nanehefɔmɔ nitsumɔ lɛ.—Kojolɔi 19:21; 1 Samuel 25:40-42.

Yesu kɛ ekaselɔi lɛ jeee mɔ ko gbɔi yɛ ŋwɛitsu lɛ nɔ. Gbɔfeelɔ ko bɛ ni baaha nugbɛ lɛ, ni nyɔŋ ko hu bɛ ni baafɔ naji lɛ ahe. Beni Yesu bɔi amɛnaji ahe fɔmɔ lɛ, eha bɔfoi lɛ ahiɛ gboi. Naa amɛ ní Mɔ ni fe fɛɛ yɛ amɛteŋ lɛ miitsu nitsumɔ ni baa shi fe fɛɛ!

Klɛŋklɛŋ lɛ, Petro kpoo akɛ eeeha Yesu afɔ enaji ahe. Shi Yesu kɛɛ lɛ akɛ: “Kɛji mifɔɔɔ ohe lɛ, obɛ gbɛfaŋ nɔ ko yɛ miŋɔɔ.” Beni Yesu egbe bɔfoi lɛ fɛɛ anaji ahe fɔmɔ naa lɛ, ekɛɛ akɛ: “Nyɛle nɔ ni mifee nyɛ nɛɛ lo? Nyɛ lɛ nyɛtsɛɔ mi tsɔɔlɔ kɛ Nuntsɔ; ni nyɛtɔ̃ɔɔ naa, ejaakɛ nakai ji mi. Agbɛnɛ, kɛji mi, tsɔɔlɔ kɛ Nuntsɔ lɛ, mifɔ nyɛnaji ahe lɛ, esa akɛ nyɛ hu nyɛfɔfɔɔ nyɛnanemɛi anaji ahe. Shi okadi mito miha nyɛ, koni bɔ ni mifee nyɛ nɛɛ, nyɛ hu nyɛfee nakai.”—Yohane 13:6-15.

Yesu etooo naji ahefɔmɔ he kusum ko shishi. Shi moŋ, eeye eebua ebɔfoi lɛ ni amɛná jwɛŋmɔ hee ko—nɔ ni ji heshibaa nɔ kɛ suɔmɔ mli ni amɛaajɛ amɛtsu nitsumɔi ni baa shi kɛha amɛnyɛmimɛi krokomɛi. Eka shi faŋŋ akɛ, amɛnu oti lɛ shishi. Susumɔ nɔ ni ba yɛ afii komɛi asɛɛ beni ketiafoo he sane lɛ te shi lɛ he. Eyɛ mli akɛ “aje ŋwane aahu” moŋ, shi mɛi ni ba lɛ jie gbɛjianɔtoo kpakpa kpo ni amɛkɛ bulɛ bo mɛi krokomɛi asusumɔi atoi. Kɛfata he lɛ, etamɔ nɔ ni mɔ ni kwɛ nakai kpee lɛ nɔ lɛ ji kaselɔ Yakobo—jeee bɔfoi lɛ ateŋ mɔ ko taakɛ bɔ ni ekolɛ wɔbaakpa gbɛ akɛni amɛyɔɔ jɛmɛ lɛ hewɔ. Nɛkɛ amaniɛbɔɔ ni yɔɔ fitsofitso ni yɔɔ Bɔfoi lɛ Asaji lɛ amli lɛ tsɔɔ akɛ bɔfoi lɛ ená hiɛyaa diɛŋtsɛ yɛ heshibaa kpojiemɔ mli.—Bɔfoi lɛ Asaji 15:6-29.

Nikasemɔ Kɛha Wɔ

Yesu tsɔ amɛnaji ahe ni efɔ lɛ nɔ ekɛ heshibaa he nikasemɔ ni hewalɛ yɔɔ mli ha ekaselɔi lɛ. Eji anɔkwale akɛ, esaaa akɛ Kristofoi susuɔ akɛ amɛhe miihia aahu akɛ esa akɛ mɛi krokomɛi asɔmɔ amɛ be fɛɛ be, ni esaaa akɛ amɛpeleɔ woo kɛ hiɛnyam gbɛhei ahe. Yɛ no najiaŋ lɛ, esa akɛ amɛnyiɛ nɔkwɛmɔnɔ ni Yesu fee efɔ̃ shi lɛ sɛɛ, mɔ ni “baaa ni asɔmɔ lɛ, shi eba sɔɔmɔ moŋ, ni eŋɔ esusuma lɛ eha yɛ mɛi pii akpɔmɔ hewɔ lɛ.” (Mateo 20:28) Hɛɛ, esa akɛ Yesu sɛɛnyiɛlɔi lɛ asumɔ akɛ amɛbaatsu sɔɔmɔ ni baa shi fe fɛɛ lɛ he nii amɛha mɛi krokomɛi.

Yiŋtoo kpakpa hewɔ ni Petro ŋma akɛ: “Nyɛbumɔa heshibaa jwɛŋmɔ lɛ, ejaakɛ Nyɔŋmɔ kuɔ hewolɔi anaa, shi heshibalɔi eduroɔ.” (1 Petro 5:5) Ajie Hela wiemɔ kɛha “bu” lɛ kɛjɛ wiemɔ ni shishi ji “nyɔŋ atade nɔhaanɔ,” ní afĩɔ afɔ̃ɔ shishigbɛ atade ni yɔɔ wuyaa nɔ lɛ mli. Ani Petro miigbala jwɛŋmɔ kɛmiiya papaŋ ni Yesu kɛfi ehɛ kɛ ebɔfoi lɛ anaji ahe ni efɔ lɛ he nifeemɔ lɛ nɔ? Anyɛŋ akɛɛ nakai kɛ nɔmimaa. Shi fɛɛ sɛɛ lɛ, Yesu sɔɔmɔ ni baa shi lɛ ná hewalɛ ko ni hiɛ kpaŋ nɔ kɔkɔɔkɔ yɛ Petro tsui mli, taakɛ esa akɛ eji yɛ mɛi fɛɛ ni baafee Kristo sɛɛnyiɛlɔi lɛ atsuii amli lɛ.—Kolosebii 3:12-14.