Yitso 113

Heshibaa yɛ Naagbee Hehoo lɛ Shishi

PETRO kɛ Yohane eyashɛ Yerusalem momo, koni amɛsaa he ko kɛha Hehoo lɛ, yɛ Yesu famɔi anaa. Eka shi faŋŋ akɛ Yesu kɛ bɔfoi krokomɛi nyɔŋma lɛ bashɛ jɛmɛ yɛ sɛɛ mli yɛ shwane mli. Hulu lɛ miinyɔ shi yɛ atatui lɛ asɛɛ yɛ be mli ni Yesu kɛ ehefatalɔi lɛ kpelekeɔ shi kɛjɛɔ Mu Gɔŋ lɛ nɔ. Enɛ ji naagbee be mli ni Yesu kɛnaa maŋtiase lɛ yɛ shwane mli kɛjɛ nɛkɛ gɔŋ nɛɛ nɔ, ni ja eshitee lɛ sɛɛ dani eeena lɛ nakai ekoŋŋ.

Etsɛɛɛ kɛkɛ ni Yesu kɛ ehefatalɔi lɛ bashɛ maŋtiase lɛ mli ni amɛnyiɛ kɛtee shia ni amɛbaaye Hehoo lɛ yɛ mli lɛ. Ni amɛkwɔ atrakpoi lɛ kɛtee ŋwɛi tsu agbo lɛ nɔ, yɛ he ni amɛyana akɛ asaa nibii fɛɛ ni he hiaa lɛ ato amɛ kɛha Hehoo lɛ yeli yɛ he ko banee lɛ. Yesu ekpa nɛkɛ be nɛɛ gbɛ aahu, taakɛ ekɛɛ lɛ: “Taomɔ mitaoɔ akɛ mikɛ nyɛ aye nɛkɛ Hehoo nɛɛ dani mana amanehulu lɛ.”

Bɔ ni afɔɔ feemɔ ji, mɛi ni yeɔ Hehoo lɛ nuɔ wein kpuji ejwɛ. Beni amɛkpɛlɛ nɔ ni eka shi faŋŋ akɛ no ji etɛ nɔ lɛ nɔ lɛ, Yesu da shi ni ekɛɛ amɛ akɛ: “Nyɛhea ni nyɛjaa; ejaakɛ miikɛɛ nyɛ akɛ: Minuŋ weintso yibii nɛɛ eko dɔŋŋ kɛyashi beyinɔ ni Nyɔŋmɔ maŋtsɛyeli lɛ aaaba.”

Yɛ be ko mli beni amɛyeɔ niyenii lɛ, Yesu te shi, ni ejie enɔhaanɔ lɛ eshwie shi, ni ekɔ papam, ni eyɛ nu ewo kɛlɛmpɛ mli. Bɔ ni afeɔ daa ji, shiatsɛ lɛ kwɛɔ koni afɔ gbɔ ni ebato lɛ lɛ naji ahe. Shi akɛni yɛ nɛkɛ be nɛɛ mli lɛ, shiatsɛ ko bɛ jɛmɛ hewɔ lɛ, Yesu diɛŋtsɛ tsu nɛkɛ sɔɔmɔ gbɛnaa nii nɛɛ he nii. Kulɛ bɔfoi lɛ ateŋ mɔ fɛɛ mɔ baanyɛ aŋɔ hegbɛ lɛ ni ekɛtsu he nii; shi kɛlɛ, akɛni etamɔ nɔ ni bei fioo yɛ amɛteŋ hewɔ lɛ, amɛteŋ mɔ ko mɔ ko efeee. Agbɛnɛ amɛ fɛɛ amɛhiɛ fee amɛ yaa beni Yesu bɔi amɛnaji ahe fɔmɔ lɛ.

Beni Yesu shɛ Petro nɔ lɛ, etsi enaa ni ekɛɛ: “Kaafɔ minaji ahe kɔkɔɔkɔ.”

Ni Yesu kɛɛ lɛ akɛ: “Kɛji mifɔɔɔ ohe lɛ, obɛ gbɛfaŋnɔ ko yɛ miŋɔɔ.”

Ni Petro here nɔ akɛ: “Nuŋtsɔ, jeee minaji ahe kɛkɛ, shi moŋ miniji kɛ miyitso hu.”

Yesu ha lɛ hetoo akɛ: “Mɔ ni eju ehe lɛ, ehiaaa lɛ hefɔfɔlɔmɔ, ja enaji ahe kɛkɛ, shi ehe eje kɛmɔ shi; ni nyɛ lɛ nyɛhe eje moŋ, shi jeee nyɛ fɛɛ ni.” Ekɛɛ amɛ enɛ ejaakɛ ele akɛ Yuda Iskariot miito gbɛjianɔ ni etsɔɔ esɛɛ gbɛ.

Beni Yesu fɔ mɛi 12 lɛ fɛɛ anaji ahe egbe naa, kɛ esɛɛgbɛtsɔɔlɔ Yuda hu naji ahe lɛ, kɛkɛ ni ewo enɔhaanɔ lɛ ni ebata okpɔlɔ lɛ he ekoŋŋ. Kɛkɛ ni ebi amɛ akɛ: “Nyɛle nɔ ni mifee nɛɛ lo? Nyɛ lɛ nyɛtsɛɔ mi, ‘Tsɔɔlɔ’ kɛ ‘Nuŋtsɔ,’ ni nyɛtɔ̃ɔɔ naa, ejaakɛ nakai ji mi. Agbɛnɛ, kɛji mi, Tsɔɔlɔ kɛ Nuŋtsɔ lɛ, mifɔ nyɛnaji ahe lɛ, esa akɛ nyɛ hu nyɛfɔfɔɔ nyɛnanemɛi anaji ahe. Shi okadi mito miha nyɛ, koni bɔ ni mifee nɛɛ, nyɛ hu nyɛfee nakai. Lɛlɛŋ, lɛlɛŋ miikɛɛ nyɛ akɛ: Nyɔŋ efeee enuŋtsɔ, ni asaŋ bɔfo efeee mɔ ni tsu lɛ lɛ. Kɛji nyɛle nii nɛɛ ni nyɛye nɔ lɛ, ajɔɔ nyɛ.”

Mɛɛ heshibaa sɔɔmɔ he nɔkwɛmɔ kpakpa enɛ ji nɛkɛ! Esaaa ni bɔfoi lɛ taoɔ klɛŋklɛŋ gbɛhe, ni amɛmiisusu akɛ amɛhe hiaa waa ni no hewɔ lɛ esa akɛ mɛi krokomɛi asɔmɔ amɛ. Ehe miihia ni amɛnyiɛ nɔkwɛmɔ nɔ ni Yesu efee efɔ shi lɛ sɛɛ. Enɛ jeee kusum naa naji ahe fɔmɔ nifeemɔ ko. Dabi, shi moŋ eji shwe ni ashweɔ akɛ aaasɔmɔ ni hiɛaŋkwɛmɔ bɛ mli, ni bɔ ni nitsumɔ lɛ ji nɔ ni baa shi aloo nɔ ni eŋɔɔɔ ha lɛ kɔɔɔ he eko. Mateo 26:20, 21; Marko 14:17, 18; Luka 22:14-18; 7:44; Yohane 13:1-17.

▪ Mɛni sa kadimɔ yɛ bɔ ni Yesu na Yerusalem lɛ he yɛ be mli ni eboteɔ maŋtiase lɛ mli koni eyaye Hehoo lɛ?

▪ Beni ayeɔ Hehoo lɛ, eka shi faŋŋ akɛ mɛɛ kpulu Yesu kɛha bɔfoi 12 lɛ yɛ be mli ni ejɔɔ nɔ sɛɛ lɛ?

▪ Beni Yesu yɔɔ shikpɔŋ nɔ lɛ, mɛɛ sɔɔmɔ ko afeɔ ahaa gbɔi ni batoɔ mɛi krokomɛi lɛ, ni mɛni hewɔ ni afeee ahaaa Yesu kɛ ebɔfoi lɛ yɛ Hehoo gbijurɔyeli lɛ shishi lɛ?

▪ Mɛni ji Yesu yiŋtoo ni ekɛtsu nɛkɛ sɔɔmɔ ni baa shi ni ji ekaselɔi lɛ anaji ahe ni efɔ nɛɛ?