Yehowa Ji Miyelikɛbualɔ
“Nyɛnaa ekaa ni nyɛkɛa akɛ: ‘Yehowa ji miyelikɛbuamɔ; misheŋ gbeyei. Mɛni gbɔmɔ aanyɛ afee mi?’”—HEBRIBII 13:6, New World Translation
1, 2. (a) Mɛɛ hekɛnɔfɔɔ yɛ Yehowa mli Lalatsɛ lɛ kɛ bɔfo Paulo fɛɛ jie lɛ kpo? (b) Mɛɛ sanebimɔi teɔ shi?
YEHOWA NYƆŊMƆ ji yelikɛbuamɔ jɛɛhe ni haaa mɔ nine anyɛ shi. Lalatsɛ lɛ le enɛ kɛjɛ niiashikpamɔ mli ni ebaanyɛ ekɛɛ akɛ: “Yehowa yɛ misɛɛ, misheee gbeyei; mɛni gbɔmɔ aaanyɛ afee mi?” (Lala 118:6) Bɔfo Paulo kɛ henumɔi wie wiemɔi ni tamɔ nɛkɛ nɔŋŋ beni eŋma ewolo ni jɛ mumɔŋ lɛ eyaha Hebri Kristofoi lɛ.
2 Eka shi faŋŋ akɛ akɛni eetsɛ Lalatsɛ lɛ wiemɔi asɛɛ kɛmiijɛ Hela Septuagint lɛ mli hewɔ lɛ, Paulo kɛɛ Hebri nanemɛi jalɔi Iɛ akɛ: “Nyɛnaa ekaa ni nyɛkɛa akɛ: ‘Yehowa ji miyelikɛbualɔ; misheŋ gbeyei. Mɛni gbɔmɔ aaafee mi?’” (Hebribii 13:6, New World Translation) Mɛni hewɔ bɔfo lɛ ŋma yɛ nɛkɛ gbɛ nɔ? Ni mɛni wɔbaanyɛ wɔkase kɛjɛ emli sane lɛ mli?
Yehowa Yelikɛbuamɔ He Miihia
3. (a) Mɛɛ shihilɛi amli Yehowa jie ehe kpo akɛ eji Paulo Yelikɛbualɔ yɛ? (b) Mɛni hewɔ Yehowa he hiaa Hebri Kristofoi lɛ waa akɛ amɛ Yelikɛbualɔ lɛ?
3 Paulo ji Odasefonyo ni kɛ ehe shaa afɔle ni yɔɔ odaseyeli ni tsɔɔ akɛ Yehowa ji e-Yelikɛbualɔ. Nyɔŋmɔ ye bua bɔfo lɛ yɛ shihilɛi ni mli wawai amli. Awo Paulo tsuŋ, ayi lɛ, atswia lɛ tɛi. Ekɛ lɛlɛ sha shi ni ebote osharai babaoo mli yɛ egbɛfaa akɛ Kristofonyo sɔɔlɔ lɛ mli. Ele tɔlɛ, kpeshii, hɔmɔ, kumai, kɛ yayainyiɛmɔ po jogbaŋŋ. Ekɛɛ akɛ: “Soro nibii ni yɔɔ sɛɛ; ni asaŋ mihaomɔ ni minaa daa ji asafoi lɛ fɛɛ ahesusumɔ.” (2 Korintobii 11:24-29, New World Translation) Paulo yɛ nakai susumɔ lɛ kɛha Hebri Kristofoi lɛ. Akane Yerusalem gbii lɛ, ni bɔfo lɛ nyɛmimɛi hii kɛ yei Yudafoi ni yɔɔ Yudea lɛ kɛ amɛhemɔkɛyeli he kaa kpeteŋkpele baakpe. (Daniel 9:24-27; Luka 21:5-24) No hewɔ lɛ ehe bahia ni amɛna Yehowa akɛ amɛ-Yelikɛbualɔ.
4. Mɛɛ kɔkɔbɔɔ titri jeɔ kpo yɛ wolo ni aŋma ayaha Hebribii lɛ fɛɛ mli?
4 Yɛ be mli ni ejeɔ ewolo ni eŋma eyaha Hebri Kristofoi lɛ shishi lɛ, Paulo tsɔɔ akɛ kɛ amɛnine baashɛ ŋwɛi yelikɛbuamɔ nɔ lɛ, belɛ ja amɛbo Nyɔŋmɔ Bi, Yesu Kristo toi. (Hebribii 1:1, 2) Etee nɔ etsɔɔ sane nɛɛ mli yɛ ewolo lɛ mli. Akɛ nɔkwɛmɔ nɔ lɛ, bɔni afee ni ni efi eŋaawoo lɛ sɛɛ lɛ, bɔfo lɛ kai mɛi ni kaneɔ ewolo lɛ akɛ agbala Israelbii lɛ atoi yɛ toigbele ni amɛfee yɛ ŋa lɛ nɔ lɛ hewɔ. Te aaafee tɛŋŋ ni Hebri Kristofoi lɛ aaajo toigbalamɔ naa foi kɛji akɛ amɛkpoo nɔ ni Nyɔŋmɔ tsɔ Yesu nɔ ekɛɛ amɛ lɛ ni amɛbatsɔmɔ hemɔkɛyeli kwalɔi ni kɛ amɛhe kpɛtɛɔ Mose Mla ni Kristo afɔleshaa lɛ kɛma afa lɛ he lɛ!—Hebribii 12:24-27.
Nyɛmimɛi Asuɔmɔ Bɔi Nifeemɔ
5. (a) Mɛɛ ŋaawoo kroko wolo ni aŋma aya Hebribii lɛ mli? (b) Mɛni Paulo wie yɛ suɔmɔ he?
5 Wolo ni eŋma eyaha Hebribii lɛ kɛ ŋaawoo ha mɛi ni kpaa gbɛ akɛ amɛbaafee ŋwɛi Maŋtsɛyeli lɛ mli niyelɔi lɛ ni amɛnyiɛ amɛ Nɔkwɛmɔ nɔ, Yesu Kristo sɛɛ, ‘ni amɛkɛ sɔɔmɔ krɔŋkrɔŋ kɛ Nyɔŋmɔ gbeyeishemɔ kɛ woo’ aha ni amɛna Yehowa akɛ amɛ-Yelikɛbualɔ. (Hebribii 12:1-4, 28, 29) Paulo wo nanemɛi heyelilɔi lɛ hewalɛ ni amɛkpe daa ‘ni amɛyɔse amɛhe yɛ suɔmɔ kɛ nitsumɔi kpakpai amli.’ (Hebribii 10:24, 25) Agbɛnɛ ewo ŋaa akɛ: “Nyɛhaa nyɛmimɛi ahedɔɔ ahia shi daa!”—Hebribii 13:1.
6. Yesu kɛ “kita hee” ni kɔɔ suɔmɔ he ha esɛɛnyiɛlɔi lɛ yɛ mɛɛ shishinumɔ naa?
6 Yesu miitao suɔmɔ ni tamɔ nɛkɛ kɛmiijɛ esɛɛnyiɛlɔi lɛ adɛŋ, ejaakɛ ekɛɛ: “Kita hee miŋɔhaa nyɛ, akɛ nyɛsumɔ nyɛhe; taakɛ bɔ ni misumɔ nyɛ lɛ, nakai nyɛ hu nyɛsumɔa nyɛhe. Kɛji nyɛsumɔɔ nyɛhe lɛ, no mɛi fɛɛ kɛaale akɛ mikaselɔi ji nyɛ.” (Yohane 13: 34, 35) “Kita hee” nɛ, ejaakɛ ebiɔ babaoo fe Mose Mla ni kɛɛ: “Suɔmɔ onaanyo [aloo okutsoŋnyo] taakɛ bɔ ni osumɔɔ bo diɛŋtsɛ ohe” lɛ. (3 Mose 19:18) “Kita hee” lɛ fee babaoo fe ni aaabi akɛ mɔ ko asumɔ ekutsoŋnyo taakɛ bɔ ni esumɔɔ lɛ diɛŋtsɛ ehe. Enɛ biɔ suɔmɔ ni haa akɛ he shaa afɔle kɛyashiɔ he ni mɔ ko kɛ ewala haa mɔ kroko. Yesu shihilɛ kɛ egbele yeɔ suɔmɔ ni tamɔ nɛkɛ he odase. Tertullian gbala jwɛŋmɔ kɛtee nɛkɛ kadimɔ nii ni haa ayooɔ mɔ nɛɛ nɔ beni etsɛ je lɛŋ bii awiemɔ ni kɔɔ Kristofoi lɛ ahe lɛ sɛɛ ni ekɛɛ: “‘Naa,’ amɛkɛɛ, ‘kwɛ bɔ ni amɛsumɔɔ amɛhe . . . ni kwɛ bɔ ni amɛfee klalo akɛ amɛaagboi amɛha amɛhe’” lɛ.—Apology, yitso XXXIX, 7.
7. Nyɛmimɛi asuɔmɔ je kpo yɛ Pentekoste afi 33 Ŋ.B. sɛɛ yɛ mɛɛ gbɛ nɔ?
7 Nyɛmimɛi asuɔmɔ je kpo yɛ Yesu kaselɔi lɛ ateŋ yɛ Pentekoste afi 88 Ŋ.B. sɛɛ. Ni enɛ ha heyelilɔi ni abaptisi amɛ ehee lɛ ateŋ mɛi pii ni jɛ shɔŋŋ shikpɔji anɔ lɛ hi Yerusalem be babaoo amɛfata he ni amɛkase nii babaoo yɛ gbɛjianɔ ni Nyɔŋmɔ eto kɛha yiwalaheremɔ kɛtsɔ Kristo nɔ lɛ he, “ni mɛi ni heɔ yeɔ lɛ fɛɛ yɛ hekome, ni amɛfee amɛnii fɛɛ ekome; ni amɛshikpɔji kɛ amɛhe nii lɛ amɛhɔɔhɔɔi, ni amɛja mli amɛha mɛi lɛ fɛɛ bɔ ni he hiaa mɔ fɛɛ mɔ.”—Bɔfoi lɛ Asaji 2:43-47; 4:32-37.
8. Mɛɛ odaseyeli yɔɔ ni tsɔɔ akɛ nyɛmimɛi asuɔmɔ yɛ Yehowa Odasefoi ateŋ ŋmɛnɛ?
8 Nyɛmimɛi asuɔmɔ ni tamɔ nɛkɛ yɛ Yehowa Odasefoi ateŋ yɛ wɔbe nɛɛ mli. Akɛ nɔkwɛmɔ nɔ lɛ, yɛ Jeŋ Ta II sɛɛ lɛ, suɔmɔ ni tamɔ nɛkɛ tsirɛ Nyɔŋmɔ webii koni amɛtsu afii enyɔ kɛ fa yelikɛbuamɔ tafaa ko he nii. Odasefoi ni yɔɔ Canada, Sweden, Switzerland, U.S. Amerika kɛ maji krokomɛi anɔ lɛ kɛ atadei kɛ mama kɛ shika ha koni akɛhe niyenii aha nanemɛi heyelilɔi ni yɔɔ shikpɔji ni tawuu efite jɛmɛ tamɔ Austria, Belgium, Bulgaria, China, Czekoslovakia, Denmark, England, Finland, France, Germany, Greece, Hungary, Italy, the Netherlands, Norway, the Philippines, Poland kɛ Romania lɛ. Enɛ ji nɔkwɛmɔ nɔ kome pɛ, ejaakɛ nyɛsɛɛ nɛɛ nɔŋŋ po Nyɔŋmɔ webii jie suɔmɔ ni tamɔ nɛkɛ kpo amɛtsɔɔ amɛnyɛmimɛi Kristofoi ni shikpɔŋhosomɔ ni ba Peru kɛ Mexico kɛ ahum ni ba Jamaica kɛ osharai krokomɛi ni ba hei krokomɛi lɛ ye amɛ awui lɛ. Yehowa webii haa ‘amɛnyɛmimɛi asuɔmɔ lɛ yaa nɔ’ yɛ gbɛ nɛɛ kɛ gbɛi krokomɛi babaoo nɔ.
Feemɔ Gbɔfeelɔ
9. (a) Mɛɛ Nyɔŋmɔ gbeyeishemɔ su ko atsi ta Hebribii 13:2 lɛ? (b) Te fee tɛŋŋ ni mɛi komɛi ‘fee ŋwɛibɔfoi gbɔ’ ni amɛleee lɛ hu?
9 Yɛ enɛ sɛɛ lɛ, Paulo tsi su kroko ni mɛi ni nyiɛɔ Kristo sɛɛ lɛ jieɔ lɛ kpo lɛ ta, ‘amɛkɛ sɔɔmɔ krɔŋkrɔŋ kɛ Nyɔŋmɔ gbeyeishemɔ kɛ woo haa,’ ni amɛyɛ Yehowa akɛ amɛ-Yelikɛbualɔ. Ewo amɛ hewalɛ akɛ: “Gbɔfeemɔ hu, nyɛhiɛ akakpaa nɔ; ejaakɛ no nɔ mɛi komɛi tsɔ fee ŋwɛibɔfoi agbɔ, ni amɛleee.” (Hebribii 13:2) Namɛi leee ni amɛfee “ŋwɛibɔfoi agbɔ” lɛ? Ojogbaŋŋ, blematsɛ Abraham fee gbɔ kɛha ŋwɛibɔfoi etɛ. (1 Mose 18:1-22) Amɛteŋ mɛi enyɔ shi, ni ewɔfaase Lot fɔ nine etsɛ nɛkɛ gbɔi nɛɛ nɔŋŋ kɛba eshia yɛ Sodom. Shi dani amɛaakamɔ shi amɛwɔ lɛ, gbɔmɛi asafoi babaoo babɔle Lot shia lɛ, “obalahii kɛ hiimeji fɛɛ.” Amɛbi ni Lot kɛ egbɔi lɛ aha amɛ koni amɛkɛ amɛ afee yakayaka nii, shi ekpoo akɛ efeee nakai kɔkɔɔkɔ. Eyɛ mli akɛ kɛjɛ shishijee lɛ Lot leee moŋ, shi naa lɛ ni efee ŋwɛibɔfoi agbɔ, ni amɛ hu amɛye amɛbua lɛ kɛ ebiyei lɛ koni amɛjo gbele naa foi beni ‘Yehowa nɛ la kɛ swɔɔ kɛjɛ ŋwɛi eshwie Sodom kɛ Gomora nɔ lɛ.’—1 Mose 19:1-26.
10. Mɛɛ jɔɔmɔi Kristofoi ni sumɔɔ gbɔfeemɔ lɛ naa mli ŋɔɔmɔ?
10 Kristofoi ni sumɔɔ gbɔfeemɔ lɛ naa jɔɔmɔi babaoo mli ŋɔɔmɔ. Amɛnuɔ niiashikpamɔi ni ŋɔɔ ni amɛgbɔi lɛ gbaa amɛ lɛ ni amɛmumɔŋ naanyobɔɔ ni sɛɛnamɔ yɔɔ he lɛ he baa sɛɛnamɔ kɛhaa amɛ. Ajie Gaio yi akɛ efeɔ enanemɛi heyelilɔi lɛ gbɔ, “nyɛmimɛi ni ji gbɔi lɛ,” taakɛ bɔ ni Yehowa webii feɔ haa nɔkwɛlɔi gbɛfalɔi lɛ. (3 Yohane 1, 5-8) Gbɔfeemɔ fata hesaai kɛha halamɔ akɛ onukpa lɛ he. (1 Timoteo 3:2; Tito 1:7, 8) Nɔ ni sa kadimɔ hu ji akɛ Yesu wo shi akɛ ekɛ Maŋtsɛyeli lɛ mli jɔɔmɔi lɛ baajɔɔ aŋkroaŋkroi ni tamɔ gwantɛŋi ni feɔ Kristo “nyɛmimɛi” lɛ ekpakpa lɛ.—Mateo 25:34-40.
Nyɛkaia Mɛi Ni Awaa Amɛ Yi Lɛ
11. Mɛni hewɔ ŋaawoo ni yɔɔ Hebribii 13:3 lɛ sa jogbaŋŋ lɛ?
11 Mɛi ni sumɔɔ ni amɛna Yehowa yelikɛbuamɔ ni amɛkɛ ‘sɔɔmɔ krɔŋkrɔŋ kɛ Nyɔŋmɔ gbeyeishemɔ kɛ woo’ aha lɛ lɛ ahiɛ akakpa nanemɛi heyelilɔi ni naa amanehulu lɛ anɔ. Paulo nu haomɔi ni Kristofoi ni afeɔ amɛ nisenianii lɛ ŋmɛɔ amɛtsui shi yɛ mli lɛ shishi. Mra be ko mli lɛ, atsɔ yiwaa nɔ agbɛ kaselɔi lɛ ashwa, ni enaanyo nitsulɔ Timoteo hu bafee mɔ ni ajie lɛ kɛjɛ tsuŋwoo mli etsɛko. (Hebribii 13:23; Bɔfoi lɛ Asaji 11:19-21) Kristofoi maŋsɛɛ sanekpakpashiɛlɔi hu miifa gbɛ kɛmiito asafoi heei ashishi aloo kɛmiitswa nɔ ni yɔɔ momo lɛ kɛmiima shi yɛ mumɔŋ. Akɛni nyɛmimɛi hii kɛ yei ni agbɛ amɛ ashwa nɛɛ ateŋ mɛi pii ji Jeŋmajiaŋbii hewɔ lɛ, Hebri Kristofoi lɛ susuŋ amɛhe tsɔ ko. No hewɔ lɛ ŋaawoo ni Paulo kɛha nɛɛ sa jogbaŋŋ, akɛ: “Nyɛkaia mɛi ni awo amɛ gbokɛlɛi lɛ tamɔ akɛ nyɛkɛ amɛ kamɔ mli, kɛ mɛi ni afeɔ amɛ efɔŋ lɛ hu, akɛ nyɛ hu nyɛyɛ gbɔmɔtso kome mli.”—Hebribii 13:3.
12. Te wɔɔfee tɛŋŋ ni wɔkɛ ŋaawoo akɛ wɔha nanemɛi heyelilɔi ni afeɔ amɛ nisenianii lɛ ahe susumɔ ahi wɔjwɛŋmɔ mli lɛ aaatsu nii?
12 Hebribii lɛ ‘amusuŋ sha amɛ yɛ mɛi ni awo amɛ gbokɛlɛi lɛ ahewɔ,’ shi esaaa akɛ amɛhiɛ kpaa nɛkɛ nanemɛi jalɔi anɔkwafoi nɛɛ anɔ, kɛ amɛji Yudafoi loo Jeŋmajiaŋbii (Hebribii 10:34) Shi wɔ hu? Mɛɛ gbɛ nɔ wɔɔtsɔ wɔjie lɛ kpo akɛ wɔjwɛŋmɔ yɛ Kristofoi ni afeɔ amɛ nisenianii lɛ anɔ? Yɛ hei komɛi lɛ ebaafee nɔ ni sa jogbaŋŋ akɛ wɔɔŋmala woji wɔyaha nɔyeli lɛ mli onukpai lɛ koni wɔtsɔ no nɔ wɔkɛbo mɔdɛŋ ni wɔkɛye wɔbua wɔnanemɛi heyelilɔi ni awo amɛ tsuŋ yɛ amɛhemɔkɛyeli hewɔ yɛ shikpɔji ni agu Maŋtsɛyeli shiɛmɔ nitsumɔ lɛ yɛ nɔ lɛ. Esa akɛ wɔkai amɛ yɛ wɔsɔlemɔi amli titri, ni wɔtsi amɛteŋ mɛi komɛi agbɛi ata, kɛ aaahi. Yi ni awaa amɛ lɛ saa wɔhe diɛŋtsɛ, ni Yehowa boɔ wɔsɔlemɔ kɛ faikpamɔi yɛ amɛ gbɛfaŋ lɛ toi. (Lala 65:3; Efesobii 6:17-20) Yɛ be mli ni wɔkɛ amɛ bɛ gbokɛlɛfoi atsu kome mli lɛ, etamɔ nɔ ni wɔkɛ amɛ efee ekome ni wɔbaanyɛ wɔye wɔbua amɛ ni wɔwo amɛ hewalɛ. Eka shi faŋŋ akɛ Kristofoi ni akɛ mumɔ efɔ amɛ mu lɛ musuŋ shaa amɛ yɛ mɛi ni akɛ mumɔ efɔ amɛ mu lɛ ni afeɔ amɛ nisenianii lɛ ahe. (Okɛto 1 Korintobii 12:19-26 he.) Mɛnɛɛmɛi hu susuɔ amɛnanemɛi ni yɔɔ shikpɔŋ nɔ hiɛnɔkamɔ ni awaa amɛ yi, ni yiwalɔi lɛ feɔ amɛ nisenianii yɛ gbɛi sɔrɔtoi anɔ lɛ hu he. Nɛkɛ nu ni anuɔ nii ahe aha mɔ nɛɛ sa jogbaŋŋ, ejaakɛ wɔ fɛɛ wɔyɛ adesa gbɔmɔtso mli lolo ni wɔbaanyɛ wɔtsɔ amanehului kɛ yiwai ni tamɔ nɛkɛ mli akɛ Yehowa jalɔi.—1 Petro 5:6-11.
Esa Akɛ Awo Gbalashihilɛ Hiɛ Nyam
13. Mɛni ji sane titri ni yɔɔ nɔ ni paulo kɛɛ yɛ Hebribii 13:4 lɛ mli?
13 Esa akɛ Kristo nɔkwɛmɔ lɛ sɛɛnyiɛmɔ kɛ ‘sɔɔmɔ krɔŋkrɔŋ ni akɛhaa Yehowa kɛ Nyɔŋmɔ gbeyeishemɔ kɛ woo’ lɛ asa bɔ ni wɔsusuɔ mɛi krokomɛi ahe lɛ he yɛ gbɛi babaoo nɔ. Yɛ be mli ni ekɛɛ akɛ “nyɛ hu nyɛyɛ gbɔmɔtso mli lolo” lɛ, Paulo tsi wekukpaa ko ni kɔɔ gbɔmɔtso diɛŋtsɛ he ni haa anyɛɔ anaa hegbɛ ajieɔ bulɛ ni fa kpo atsɔɔ he lɛ ta. (Hebribii 13:3) Ekɛ ŋaawoo nɛɛ ha Hebri Kristofoi lɛ: “Awo gbala hiɛ nyam yɛ nyɛ fɛɛ nyɛteŋ, ni akabule gbala saa hu; shi ajwamaŋbɔlɔi kɛ gbalaŋkulɔi lɛ, Nyɔŋmɔ baakojo amɛ.” (Hebribii 13:4) Kwɛ bɔ ni nɛkɛ ŋaawoo nɛɛ sa jogbaŋŋ ha, ejaakɛ bɔlɛnamɔ mli jeŋba shara egbɛ eshwa Roma Maŋtsɛyeli lɛ mli fɛɛ! Ehe miihia ni ŋmɛnɛŋmɛnɛ beaŋ Kristofoi lɛ hu abo nɛkɛ wiemɔi nɛɛ atoi yɛ bɔ ni jeŋba he tɛi ni akɛmamɔ shi yɛ je lɛ mli lɛ eba shi kwraa lɛ hewɔ kɛ agbɛnɛ yɛ anɔkwale ni eji akɛ daa afi lɛ ashwieɔ gbɔmɛi akpei abɔ kɛjɛɔ asafoi lɛ amli yɛ bɔlɛnamɔ mli jeŋba shara hewɔ lɛ hu hewɔ.
14. Mɛni hewɔ obaanyɛ okɛɛ akɛ gbalashihilɛ ji nɔ ko ni yɔɔ nyam lɛ?
14 Mɛi ni ebuuu gbalashihilɛ akɛ nɔ ko ni nɔ kwɔ lɛ ateŋ mɛi komɛi ji Esenebii ni hi shi yɛ Paulo gbii lɛ amli lɛ. Amɛfee mla amɛha amɛhe akɛ amɛkɛ yoo boteee gbalashihilɛ mli, amɛtamɔ osɔfoi komɛi ni yɔɔ ŋmɛnɛ ni susuɔ yɛ gbɛ ni ejaaa nɔ akɛ oshijayeli yɛ krɔŋkrɔŋ fe gbalashihilɛ mli botemɔ lɛ. Shi Paulo tsɔ nɔ ni ekɛɛ Hebri Kristofoi lɛ nɔ efee lɛ faŋŋ akɛ gbalashihilɛ yɛ nyam. Bɔ ni abuɔ enɛ jogbaŋŋ ahaa lɛ jɛɔ kpo beni Naomi tsɔɔ bɔ ni esumɔɔ akɛ eshaayeimɛi okulafoi, Rut kɛ Orpa aaana gbalashihilɛ kpakpa lɛ: “Yehowa aha nyɛteŋ mɔ fɛɛ mɔ ana he ko ata yɛ ewu we.” (Rut 1:9) Paulo diɛŋtsɛ tsɔɔ yɛ he kroko akɛ ‘yɛ naagbee bei lɛ amli lɛ mɛi komɛi baakwa hemɔkɛyeli lɛ, ni amɛbaakɛɛ akɛ amɛboteee gbalashihilɛ mli.’—1 Timoteo 4:1-5.
15. Namɛi atsɔɔ akɛ amɛji ajwamaŋbɔlɔi kɛ gbalaŋkulɔi yɛ Hebribii 13:4 lɛ, ni mɛɛ gbɛ nɔ Nyɔŋmɔ baatsɔ akojo amɛ yɛ?
15 Hebribii ni be ko lɛ amɛyɔɔ Mla lɛ shishi shi akɛ amɛ ewo kpaŋmɔ hee lɛ mli lɛ le kita nɛɛ: “Kaabɔ ajwamaŋ,” aloo kaafite gbala. (2 Mose 20:14) Shi amɛyɛ jeŋba shara jeŋ ko mli ni kɔkɔbɔɔ nɛɛ he miihia amɛ: “Akabule gbala saa hu; shi ajwamaŋbɔlɔi kɛ gbalaŋkulɔi lɛ, Nyɔŋmɔ baakojo amɛ.” Mɛi ni fata ajwamaŋbɔlɔi ahe ji gbɔmɛi ni boteko gbalashihilɛ mli shi amɛkɛ amɛhe woɔ bɔlɛnamɔ mli. Gbalaŋkulɔi titri ji aŋkroaŋkroi ni amɛbote gbalashihilɛ mli shi amɛkɛ mɛi krokomɛi ni jeee amɛhefatalɔi naa bɔlɛ, ni amɛkɛ nakai feemɔ buleɔ amɛ diɛŋtsɛ amɛgbala saa lɛ. Akɛni ajwamaŋbɔlɔi kɛ gbalaŋkulɔi ni tsakeee amɛtsui lɛ sa Nyɔŋmɔ fɔbuu kojomɔ hewɔ lɛ, aŋmɛŋ amɛ gbɛ ni amɛbote Yerusalem Hee lɛ mli loo ni amɛna naanɔ wala mli ŋɔɔmɔ yɛ shikpɔŋ nɔ yɛ Maŋtsɛyeli nɔyeli lɛ shishi. (Kpojiemɔ 21:1, 2, 8; 1 Korintobii 6:9, 10) Esa akɛ nɛkɛ kɔkɔbɔɔ akɛ akabule gbala saa lɛ hu aha Kristofoi ni amɛbote gbalashihilɛ mli lɛ akwa bɔlɛnamɔ mli sui ni buleɔ amɛ kɛ amɛhefatalɔi lɛ, eyɛ mli akɛ nɔ ko bɛ ni he tseee yɛ gbɔmɔtsoŋ teemɔŋ nibii ni yaa nɔ yɛ gbalashihilɛ mli lɛ mli.—Kwɛmɔ The Watchtower, March 15, 1983, baafai 27-31.
Wɔmii Ashɛ Ŋmɛnɛŋmɛnɛ Nibii Lɛ Ahe
16, 17. Mɛni awiɛ yɛ Hebribii 13:5, ni mɛni hewɔ ŋaawoo nɛɛ he hiaa Hebribii lɛ?
16 Wɔtsui baanyɛ anyɔ wɔmli kɛji akɛ wɔnyiɛ wɔ Nɔkwɛlɔ lɛ sɛɛ ni ‘wɔkɛ sɔɔmɔ krɔŋkrɔŋ kɛ Nyɔŋmɔ gbeyeishemɔ kɛ woo ha,’ kɛ hekɛnɔfɔɔ akɛ Yehowa ji wɔ-Yelikɛbualɔ. Wɔhe ni wɔkɛaawo heloo gbɛfaŋ nibii asɛɛdii mli babaoo lɛ baanyɛ atsɔ kaa. Shi esaaa akɛ Kristofoi ŋmɛɛɔ amɛhe amɛhaa enɛ. Akɛɛ Hebribii lɛ akɛ: “Shika suɔmɔ akaba nyɛjeŋba mli, ni nyɛmii ashɛa nii ni nyɛyɔɔ lɛ he; ejaakɛ lɛ diɛŋtsɛ ekɛɛ: ‘Mishiŋo ni misaa mikwaŋo gbi ko gbi ko.’” (Hebribii 13:5) Mɛni hewɔ ŋaawoo nɛɛ he hiaa Hebribii lɛ?
17 Ekolɛ Hebribii lɛ miisusu shika he tsɔ ejaakɛ amɛkaiɔ “hɔmɔ kpeteŋkpele” ni ba yɛ Kaisare Klaudio nɔyeli be lɛ mli (41-54 Ŋ.B.) lɛ. Bɔ ni nakai hɔmɔ lɛ mli wa sɔŋŋ ha hewɔ lɛ ehe bahia ni Kristofoi ni yɔɔ hei krokomɛi lɛ kɛ nibii amaje amɛnyɛmimɛi ni yɔɔ Yudea lɛ. (Bɔfoi lɛ Asaji 11:28, 29) Taakɛ Yudanyo yinɔsaneŋmalɔ Josephus tsɔɔ lɛ, hɔmɔ lɛ ye afii etɛ loo nɔ ni fe nakai, ni ekɛ ohia ni mli wa diɛŋtsɛ ba Yudea kɛ Yerusalem.—Antiguities of the Jews, XX, 2, 5; 5, 2.
18. Mɛni wɔkaseɔ kɛjɛɔ ŋaawoo ni yɔɔ Hebribii 13:5 lɛ mli?
18 Ani nikasemɔ ko yɛ enɛ mli kɛha wɔ? Hɛɛ, ejaakɛ bɔ fɛɛ bɔ ni wɔji ohiafoi wɔha lɛ, esaaa akɛ wɔsumɔɔ shika loo wɔsusuɔ he fe nine. Ni wɔɔfee yeyeeye yɛ heloo gbɛfaŋ nibii ahe, ekolɛ ni wɔtsɔmɔ hiɛjoolɔi loo hiɛkɔlɔi lɛ, esa akɛ ‘wɔmii ashɛ nibii ni wɔyɔɔ lɛ he.’ Yesu kɛɛ: “Shi nyɛtaoa Nyɔŋmɔ maŋtsɛyeli lɛ kɛ ejalɛ lɛ tsutsu, ni akɛ nii nɛɛ fɛɛ aaafata he aha nyɛ.” (Mateo 6:25-34) Etsɔɔ hu akɛ esa akɛ wɔkɛ wɔjwɛŋmɔ ama “niiatsɛmɛi ni wɔɔtsɔmɔ yɛ Nyɔŋmɔ gbɛfaŋ” lɛ nɔ ejaakɛ ‘jeee heloo gbɛfaŋ nibii ni wɔyɔɔ lɛ mli wɔwala yɔɔ.’ (Luka 12:13-21) Kɛji akɛ shika suɔmɔ miitao afite wɔmumɔŋ shihilɛ lɛ, belɛ nyɛhaa wɔboa Paulo ŋaawoo ni ekɛha Hebribii lɛ toi ni agbɛnɛ wɔkai akɛ “ninamɔ kpeteŋkpele ji Nyɔŋmɔ jamɔ hetuu-kɛhamɔ kɛji mɔ ko mii shɛ enii ahe.”—1 Timoteo 6:6-8, New World Translation.
Okɛ Ohiɛ Afɔ Yehowa Nɔ
19. Mɛɛ nɔmimaa Nyɔŋmɔ kɛha Yoshua, ni te esa akɛ enɛ asa wɔhe aha tɛŋŋ?
19 Akɛ Yesu sɛɛnyiɛlɔi ni miitao ni wɔkɛ ‘sɔɔmɔ krɔŋkrɔŋ kɛ Nyɔŋmɔ gbeyeishemɔ kɛ woo aha’ lɛ, esa akɛ wɔkɛ wɔhiɛ afɔ wɔ ŋwɛi Tsɛ lɛ, ni eyelikɛbuamɔ he hiaa lɛ nɔ, shi jeee shika. Bɔ fɛɛ bɔ ni naagbai ni wɔkɛkpeɔ lɛ ji lɛ, esa akɛ wɔkai nɔmimaa wiemɔ ni ekɛha nɛɛ: “Mishiŋo ni misaa mikwaŋo gbi ko gbi ko.” (Hebribii 13:5) Paulo miigbala jwɛŋmɔ kɛmiiya Nyɔŋmɔ wiemɔi ni ejaje etsɔɔ Yoshua lɛ nɔ yɛ biɛ: “Mishiŋo ni mikwaŋo hu.” (Yoshua 1:5; okɛto 5 Mose 31: 6, 8 he.) Yehowa shiii Yoshua gbi ko gbi ko, ni E-kwaŋ wɔ kɛji akɛ wɔkɛ wɔhiɛ fɔ E-nɔ.
20. Mɛni ji afi 1990 afi ŋmalɛ lɛ? (b) Mɛni esa akɛ wɔya nɔ wɔfee ni gbeyeishemɔ bɛ mli?
20 Abaama Nyɔŋmɔ yelikɛbuamɔ ni efeee efolo kɔkɔɔkɔ lɛ nɔ mi yɛ Yehowa Odasefoi ateŋ yɛ nyɔji ni baa nɛɛ amli, ejaakɛ amɛ 1990 afi ŋmalɛ lɛ kaneɔ nɛkɛ: “Wɔɔna ekaa ni wɔkɛɛ: ‘Yehowa ji miyelikɛbualɔ.’” Anaa nɛkɛ wiemɔi nɛɛ yɛ Hebribii 13:6, he ni Paulo tsɛ wiemɔi kɛjɛ Lalatsɛ lɛ wiemɔi amli ni ekɛɛ Hebribii lɛ akɛ: “Yehowa yɛ misɛɛ, misheee gbeyei; mɛni gbɔmɔ aaanyɛ mi afee?” lɛ. (Lala 118:6) Eyɛ mli akɛ awaa wɔ yi moŋ, shi wɔsheee gbeyei, ejaakɛ adesai nyɛŋ afee wɔ efɔŋ fe bɔ ni Nyɔŋmɔ aaaŋmɛ gbɛ. (Lala 27:1) Kɛji akɛ wɔɔgboi po akɛ emuuyeli mlihiɛlɔi lɛ, wɔyɛ gbohiiashitee he hiɛnɔkamɔ lɛ. (Bɔfoi lɛ Asaji 24:15) No hewɔ lɛ nyɛhaa wɔyaa nɔ wɔnyiɛa wɔ Nɔkwɛlɔ lɛ sɛɛ yɛ ‘sɔɔmɔ krɔŋkrɔŋ kɛ Nyɔŋmɔ gbeyeishemɔ kɛ woo kɛhamɔ mli,’ kɛ hekɛnɔfɔɔ akɛ Yehowa ji wɔ Yelikɛbualɔ.
Te Obaaha Hetoo Oha Tɛŋŋ?
◻ Mɛni hewɔ Yehowa yelikɛbuamɔ he hiaa Hebri Kristofoi Iɛ waa lɛ?
◻ Yehowa webii ‘eha amɛ nyɛmimɛi asuɔmɔ Iɛ etee nɔ’ yɛ mɛɛ gbɛ nɔ?
◻ Mɛni hewɔ ni esa akɛ ofee mɔ ni sumɔɔ gbɔfeemɔ lɛ?
◻ Mɛni wɔbaanyɛ wɔfee ni wɔkɛtsɔɔ akɛ wɔkaiɔ wɔnanemɛi heyelilɔi ni afeɔ amɛ nisenianii lɛ?
◻ Mɛni hewɔ esa akɛ aha gbalashihilɛ afee nɔ ko ni hiɛ yɔɔ nyam lɛ?