Tsɔɔmɔ Nii Yɛ Faŋŋ Kɛ Shia Kɛ Shia
“Migbalaaa mihe shi kɛjɛɛɛ . . . nii ni matsɔɔ nyɛ yɛ faŋŋ kɛ shia kɛ shia lɛ he.”—BƆFOI LƐ ASAJI 20:20, “Byington.”
1. Mɛni Katolek osɔfo ko wie yɛ bɔ ni Yehowa Odasefoi ashia kɛ shia sɔɔmɔ lɛ mɔɔ shi ehaa lɛ he?
“KATOLEKBII kɛ Sanekpakpa lɛ Miiya Shia kɛ Shia.” Nɛkɛ ji bɔ ni The Providence Sunday Journal ni aŋma yɛ October 4, 1987 lɛ mli saneyitso lɛ kaneɔ. Adafitswaa wolo lɛ bɔ amaniɛ akɛ yiŋtoo titri ni yɔɔ nitsumɔ nɛɛ sɛɛ ji ni “amɛsɔlemɔ lɛ mlibii ni ekpa sɔlemɔyaa lɛ aku sɛɛ amɛkɛ amɛhe awo sɔlemɔyaa mli ekoŋŋ.” Akɛɛ Osɔfo John Allard, onukpa ni kwɛɔ Sanekpakpa Shiɛmɔ yɛ sɔlemɔ lɛ nɔyeli he ni ji Providence nɔ lɛ wie akɛ: “Hɛɛ, eka shi faŋŋ akɛ yiŋkɔshikɔshi-feemɔ pii baate shi. Gbɔmɛi baakɛɛ akɛ, ‘Amɛ amɛyaa lɛ, tamɔ Yehowa Odasefoi.’ Shi Yehowa Odasefoi anitsumɔ lɛ mɔɔ shi, aloo jeee nakai? Ha wɔta abasa ni oya Maŋtsɛyeli Asa fɛɛ Asa ni yɔɔ maŋ lɛ [Rhode Island, U.S. Amerika] mli ni obaana asafoi ni tsutsu Katolekbii eyi mli obɔ.”
2. Mɛɛ sane abiɔ yɛ gbɛ ni ja nɔ?
2 Hɛɛ, ale Yehowa Odasefoi jogbaŋŋ yɛ amɛ shia kɛ shia sɔɔmɔ nitsumɔ ni mɔɔ shi lɛ hewɔ. Shi mɛni hewɔ amɛyaa shia kɛ shia lɛ?
Bɔfoi lɛ Anɔkwɛmɔ nɔ Lɛ
3. (a) Mɛɛ nitsumɔ Yesu Kristo kɛwo ekaselɔi lɛ adɛŋ? (b) Mɛɛ gbɛ titri mra be mli Kristo sɛɛnyiɛlɔi lɛ tsɔ nɔ amɛtsu nitsumɔ ni ka amɛnɔ lɛ he nii yɛ.
3 Yesu Kristo kɛ nitsumɔ ni tsɔɔ nɔ ko pɔtɛɛ ni he hiaa nɛɛ ha esɛɛnyiɛlɔi lɛ: “No hewɔ lɛ nyɛyaa ni nyɛyafea jeŋmaji fɛɛ mikaselɔi, nyɛbaptisia amɛ nyɛwoa Tsɛ lɛ kɛ Bi lɛ kɛ Mumɔ Krɔŋkrɔŋ lɛ gbɛi amli, ni nyɛtsɔɔ amɛ ni amɛye nii fiaa ni mikɛɛ nyɛ lɛ nɔ. Ni naa, mi lɛ mikɛ nyɛ yɛ daa kɛyashi jeŋ naagbee lɛ.” (Mateo 28:19, 20) Gbɛ titri ni abaatsɔ nɔ atsu nitsumɔ ni tamɔ nɛkɛ lɛ baje kpo faŋŋ yɛ Pentekoste gbi, yɛ afi 33 Ŋ.B. lɛ sɛɛ nɔŋŋ. “Ni amɛfɔɔɔ nitsɔɔmɔ kɛ Yesu Kristo shiɛmɔ yɛ sɔlemɔ we lɛ kɛ shiai be fɛɛ be.” (Bɔfoi lɛ Asaji 5:42) Aaafee afii 20 sɛɛ lɛ, no mli lɛ bɔfo Paulo kɛ ehe ewo shia kɛ shia sɔɔmɔ lɛ mli, ejaakɛ ekai Kristofoi onukpai ni jɛ Efeso maŋ lɛ mli lɛ akɛ: “Mishiuuu nii ni he yɔɔ sɛɛnamɔ ha nyɛ lɛ eko nɔ, ni mijaje mitsɔɔ nyɛ yɛ faŋŋ kɛ shia fɛɛ shia hu.”—Bɔfoi lɛ Asaji 20:20.
4. Mɛni hewɔ wɔbaanyɛ wɔkɛɛ akɛ Bɔfoi lɛ Asaji 5:42 kɛ Bɔfoi lɛ Asaji 20:20 tsɔɔ akɛ Yesu sɛɛnyiɛlɔi lɛ ashiɛmɔ lɛ tee nɔ yɛ shia kɛ shia loo aja sane lɛ yɛ shia kɛ shia?
4 Atsɔɔ wiemɔ “shiai” ni yɔɔ Bɔfoi lɛ Asaji 5:42 lɛ shishi kɛjɛ kat’ oiʹkon mli. Akɛ ka·taʹ tsu nii yɛ biɛ yɛ “nijaa” shishinumɔ naa. No hewɔ lɛ aja kaselɔi lɛ ashiɛmɔ lɛ kɛjɛ shia kome mli kɛtee ekroko mli. Yɛ be mli ni ewieɔ Bɔfoi lɛ Asaji 20:20 he lɛ, Randolph O. Yeager ŋma akɛ Paulo tsɔɔ nii “yɛ maŋ kpeei [de·mo·siʹa] ashishi kɛ shia kɛ shia (nijaa [ka·taʹ] kɛ mɔ ni nine shɛɔ nɔ). Paulo ye afii etɛ yɛ Efeso. Etee shia fɛɛ shia, aloo kɛ hoo lɛ, eshiɛ eha gbɔmɛi lɛ fɛɛ (Bɔf 20 kuku 26). Naa ŋmalɛ naa famɔ wolo kɛha sanekpakpa shiɛmɔ yɛ shia kɛ shia kɛ agbɛnɛ nɔ ni afeɔ yɛ maŋ kpeei ashishi lɛ.”
5. Mɛni hewɔ jeee onukpai loo mɛi krokomɛi asaramɔi kɛ naanyobɔɔ pɛ he Paulo wieɔ yɛ Bɔfɔi lɛ Asaji 20:20 lɛ?
5 Ka·taʹ nɛɛ kɛ nitsumɔ yɛ nakai gbɛ nɔ nɔŋŋ jeɔ kpo yɛ Luka 8:1, ni wieɔ akɛ Yesu “yakpa maji kɛ akrowai amli eshiɛ” lɛ. Paulo kɛ babaoo-feemɔ wiemɔ kat’ oiʹkous tsu nii yɛ Bɔfoi lɛ Asaji 20:20. Biblia shishitsɔɔmɔi komɛi kaneɔ yɛ biɛ akɛ “yɛ nyɛ shiai amli.” Shi jeee naanyobɔɔ saramɔ ni asaraa onukpai aloo saramɔ ni asaraa nanemɛi heyelilɔi yɛ amɛshiai amli pɛ he bɔfo lɛ wieɔ lɛ. Ewiemɔi ni nyiɛ sɛɛ lɛ tsɔɔ akɛ eewie shia kɛ shia sɔɔmɔ yɛ mɛi ni heee yeee lɛ ateŋ lɛ he, ejaakɛ ekɛɛ: “Ni miye tsuitsakemɔ kɛ Nyɔŋmɔ hamɔ kɛ wɔ-Nuŋtsɔ Yesu Kristo nɔ hemɔkɛyeli lɛ he odase mitsɔɔ Yudafoi kɛ Helabii fɛɛ.” (Bɔfoi lɛ Asaji 20:21) Nanemɛi heyelilɔi lɛ etsake amɛtsui momo ni amɛhe Yesu nɔ amɛye. No hewɔ lɛ Bɔfoi lɛ Asaji 5:42 kɛ Bɔfoi lɛ Asaji 20:20 fɛɛ kɔɔ mɛi ni heee yeee lɛ ni ashiɛɔ atsɔɔ amɛ “yɛ shia kɛ shia,” aloo yɛ shinaai anaa lɛ he.
Nɔ Ko Bɛ ni Akɛtoɔ Enɛ Najiaŋ
6. Mɛni awie yɛ bɔ ni Paulo tsu eshiɛmɔ nitsumɔ lɛ he nii eha yɛ Efeso lɛ he?
6 Yɛ be mli ni ewieɔ Paulo wiemɔi ni yɔɔ Bɔfoi lɛ Asaji 20:20 lɛ he lɛ, Abiel Abbot Livermore ŋma yɛ 1844 akɛ: “Etsui enyɔɔɔ emli akɛ eeeha maŋshiɛmɔi yɛ maŋ kpee hei pɛ kɛkɛ, ni eŋmɛɛ nibii krokomɛi ni ekɛtsuɔ nii lɛ ahe, shi moŋ ekɛ ekãa tsu enitsumɔ kpele lɛ he nii yɛ teemɔŋ, kɛjɛ shia kɛtee shia, ni etere ŋwɛi anɔkwale lɛ kɛtee Efesobii lɛ alatɛshi kɛ amɛtsuii amli yɛ shia diɛŋtsɛ.” Ayɔse yɛ nyɛsɛɛ nɛɛ nɔŋŋ akɛ: “Sanekpakpa lɛ jaa yɛ shia kɛ shia ji nitsumɔ ko ni ale yɛ klɛŋklɛŋ afii oha lɛ mli Kristofoi lɛ ahe kɛjɛ shishijee (cf. Bɔfoi lɛ Asaji 2:46; 5:42). . . [Paulo] tsu gbɛnaa nii ni ka enɔ yɛ Yudafoi kɛ Jeŋmajiaŋbii ni yɔɔ Efeso lɛ ahe nii kɛmɔ shi, ni ashi amɛ akɛ mɛi ni bɛ naajiemɔ ko kɛ amɛgboi yɛ amɛhe eshai amli.”—The Wesleyan Bible Commentary, Kpo 4, baafai 642-8.
7. Mɛni hewɔ abaanyɛ akɛɛ akɛ Nyɔŋmɔ kpɛlɛɔ Yehowa Odasefoi ashia kɛ shia sɔɔmɔ lɛ nɔ?
7 Eyɛ mli akɛ maŋshiɛmɔ yɛ egbɛhe yɛ sanekpakpa lɛ jajemɔ mli moŋ, shi ejeee nɔ ni abaanyɛ akɛto mɛi ni ayaa amɛŋɔɔ yɛ amɛshinaai anaa lɛ najiaŋ. Woloŋlelɔ Joseph Addison Alexander wie yɛ enɛ he akɛ: “Sɔlemɔ lɛ kɛ nɔ ko bako lolo ni ebaanyɛ etamɔ sɔlemɔ lɛ mli shiɛmɔ kɛ shiɛmɔ yɛ shiai amli loo anyɛ akɛto najiaŋ.” Taakɛ woloŋlelɔ O. A. Hills wie he lɛ: “Esa akɛ maŋ nitsɔɔmɔ kɛ shia kɛ shia nitsɔɔmɔ anyiɛ yɛ ekomefeemɔ mli.” Yehowa Odasefoi kɛ nitsɔɔmɔ haa kɛtsɔɔ amɛ daa otsi Maŋ Shiɛmɔi lɛ anɔ. Shi amɛyɛ odaseyeli ni mli ka shi faŋŋ akɛ bɔfoi lɛ agbɛ ni amɛtsɔɔ nɔ amɛgbɛɔ Biblia mli anɔkwale lɛ amɛshwaa yɛ shia kɛ shia lɛ mɔɔ shi. Ni yɛ anɔkwale mli lɛ Yehowa kpɛlɛɔ enɛ nɔ, ejaakɛ yɛ sɔɔmɔ nitsumɔ nɛɛ hewɔ lɛ, eeha akpei abɔ miiho yuu kɛmiiba ejamɔ ni awo nɔ lɛ he daa afi.—Yesaia 2:1-4; 60:8, 22.
8. (a) Mɛni awie yɛ yiŋtoo hewɔ ni shia kɛ shia sɔɔmɔ lɛ mɔɔ shi loo ehe yɔɔ sɛɛnamɔ lɛ he? (b) Abaanyɛ ni akɛ Yehowa Odasefoi ato Paulo he yɛ shinaai anaa shiɛmɔ kɛ odaseyelii krokomɛi ahe yɛ mɛɛ gbɛ nɔ?
8 Wolo kroko ewie akɛ: “Gbɔmɛi naa akɛ eyɛ mlɛo kɛha amɛ akɛ amɛaakai nii ni atsɔɔ amɛ yɛ amɛshinaai anaa lɛ fe sɔlemɔ lɛ kpoku nɔ.” Ojogbaŋŋ, Paulo tee mɛi ashinaai anaa be fɛɛ be, ni ekɛto okadi kpakpa akɛ sɔɔlɔ. Biblia he nilelɔ Edwin W. Rice ŋma akɛ: “Etsui enyɔɔɔ emli akɛ eeetsɔɔ nii ni eshiɛ yɛ kpee he lɛ kɛ jara nɔ pɛ. Ekɛ hiɛdɔɔ ‘miitsɔɔ nii’ ‘kɛjɛ shia kɛmiiya shia’ be fɛɛ be. Eji shia-kɛ-shia, nine-kɛ-nine, hiɛ-kɛ-hiɛ mple ni ekɛ efɔŋ shi yɛ Efeso, koni enine ashɛ gbɔmɛi anɔ eha Kristo.” Yehowa Odasefoi yɔseɔ akɛ mɔ-kɛ-mɔ sanegbaa yɛ shinaa naa lɛ mɔɔ shi. Agbɛnɛ amɛyaa sɛɛsaramɔi, ni amɛyɛ he miishɛɛ po akɛ amɛkɛ mɛi ni teɔ shi woɔ amɛ lɛ aaawie kɛ aŋkroaŋkroi nɛɛ baaŋmɛ gbɛ ni sanegbaa ni shishinumɔ yɔɔ mli aya nɔ. Kwɛ bɔ ni amɛtamɔ Paulo ha! F. N. Peloubet ŋma yɛ ehe akɛ: “Paulo tsuuu enitsumɔ lɛ fɛɛ yɛ kpeei ashishi pɛ. Ŋwanejee ko bɛ he akɛ eyasara mɛi babaoo diɛŋtsɛ yɛ teemɔŋ yɛ amɛshiai amli yɛ he fɛɛ he ni eeenu akɛ mɔ ko miibi nibii amli, aloo ena miishɛɛ waa aloo po akɛ eteɔ shi ewoɔ shi eesumɔ ni egba jamɔ he sane.”
Onukpai Baanyiɛ Hiɛ
9. Mɛɛ nɔkwɛmɔ nɔ Paulo fee kɛha nanemɛi onukpai?
9 Mɛɛ nɔkwɛmɔ nɔ Paulo fee kɛha nanemɛi onukpai lɛ? Etsɔɔ akɛ esa akɛ amɛfee sanekpakpa lɛ shiɛlɔi yɛ shia kɛ shia ni yɔɔ ekãa ni etɔɔɔ amɛ. J. Glentworth Butler ŋma yɛ 1879 mli akɛ: “[Efeso onukpai lɛ] le akɛ yɛ [Paulo] shiɛmɔ mli lɛ, oshara ni aaaba enɔ aloo gbɛi ni eeena lɛ he susumɔ gbaaa enaa kwraa; akɛ etsiii anɔkwale ko ni he hiaa lɛ naa; ákɛ ekɛ hiɛaŋkwɛmɔ ewieko anɔkwale lɛ he nɔ ko ni yɔɔ naakpɛɛ loo nɔ ko ni aŋma ni aleee he nɔ ko babaoo, shi moŋ nɔ pɛ ni he yɔɔ sɛɛnamɔ ni ‘ekɛ nitsumɔ kɛ nɔyaa baa,’ loo etswaa mɔ emaa shi pɛ ekɛwo mɛi fɛɛ hewalɛ: Nyɔŋmɔ ŋaawoo muu lɛ fɛɛ yɛ ekrɔŋŋfeemɔ kɛ obɔyimɔ mli! Ni nɛkɛ Kristofoi anɔkwale nɛɛ ‘gbɛtsɔɔmɔ’ yɛ anɔkwayeli mli, ‘nitsɔɔmɔ’ kɛ henumɔ kɛ hiɛdɔɔ nɛɛ efee nɔ ni etsuɔ, ni jeee yɛ Tirano nikasemɔ he lɛ kɛ hei krokomɛi ni kaselɔi lɛ buaa amɛhe naa yɛ lɛ pɛ, shi yɛ shia fɛɛ shia ni eeenyɛ ebote mli lɛ hu mli. Ekɛ su ni tamɔ Kristofoi ataomɔ nii kɛ nii ni amɛshweɔ tsu sanekpakpa lɛ he nii kɛjɛ shia kɛtee shia, ni kɛjɛ susuma kome ŋɔɔ kɛtee susuma kroko ŋɔɔ daa gbi. Esaneyitso kome kɛha kui kɛ wekui fɛɛ, kɛha Yudafoi ni kɛ lɛ yeee lɛ kɛ Helabii ni yeɔ ehe fɛo—ni kɛ atsɔɔ mli jogbaŋŋ lɛ efata anɔkwalei krokomɛi fɛɛ ni he hiaa ni hereɔ mɔ yiwala lɛ ahe lɛ—ji tsuitsakemɔ kɛ Nyɔŋmɔ hamɔ, kɛ wɔ-Nuŋtsɔ Yesu Kristo nɔ hemɔkɛyeli.”
10, 11. (a) Mɛni Paulo kpaa gbɛ yɛ Efeso onukpai lɛ adɛŋ yɛ Kristofoi asɔɔmɔ nitsumɔ lɛ he? (b) Taakɛ Paulo fee lɛ, mɛɛ shiɛmɔ nɛkɛ Yehowa Odasefoi kɛ amɛhe woɔ mli, ni onukpai lɛ hu fata he.
10 Kɛ aaamua fɛɛ naa lɛ, belɛ mɛni Paulo kpaa gbɛ kɛjɛɔ Efeso onukpai lɛ adɛŋ? Woloŋlelɔ E. S. Young fo bɔfo lɛ wiemɔi lɛ kuku yɛ nɛkɛ gbɛ nɔ: “Jeee gbɔmɛi ahenaabuamɔi ahiɛ pɛ mishiɛ yɛ, shi migbo deŋme yɛ shia kɛ shia, kɛ kui fɛɛ, Yudafoi kɛ Jeŋmajiaŋbii fɛɛ. Misɔɔmɔ lɛ saneyitso kɛha kui fɛɛ ji ‘tsuitsakemɔ kɛ Nyɔŋmɔ hamɔ kɛ wɔ-Nuŋtsɔ Yesu Kristo nɔ hemɔkɛyeli.’” Beni etsɔɔ Paulo wiemɔi lɛ ashishi yɛ gbɛ kroko nɔ lɛ, W. B. Riley ŋma akɛ: “Eshishinumɔ ni yɔɔ faŋŋ ji: ‘Miikpa gbɛ akɛ nyɛbaatsa nɔ ni mije shishi lɛ nɔ, nyɛfea ni nyɛtsɔɔa nii hu ni nyɛdamɔa naa taakɛ midamɔ naa lɛ; akɛ nyɛtsɔɔa nii yɛ teemɔŋ kɛ faŋŋ taakɛ mifee yɛ gbɛjegbɛi anɔ kɛ shia kɛ shia lɛ, ni nyɛyea tsuitsakemɔ kɛ Nyɔŋmɔ hamɔ kɛ wɔ-Nuŋtsɔ Yesu Kristo nɔ hemɔkɛyeli he odase nyɛhaa Yudafoi kɛ Helabii fɛɛ, ejaakɛ enɛɛmɛi ji shishitoo nibii lɛ!’”
11 Eka shi faŋŋ akɛ Paulo miitsɔɔ enanemɛi onukpai lɛ akɛ aakpa amɛ gbɛ akɛ amɛbaaye Yehowa he odase yɛ shia kɛ shia yɛ Bɔfoi lɛ Asaji yitso 20. Yɛ enɛ mli lɛ, esa akɛ klɛŋklɛŋ afii oha lɛ mli onukpai lɛ anyiɛ hiɛ, ni amɛto okadi kpakpa amɛfɔ shi amɛha asafo lɛ mlibii krokomɛi lɛ. (Okɛto Hebribii 13:17 he.) No hewɔ lɛ taakɛ Paulo ji lɛ, Yehowa Odasefoi shiɛɔ yɛ shia kɛ shia, amɛgbaa Nyɔŋmɔ Maŋtsɛyeli lɛ he sane lɛ amɛtsɔɔ gbɔmɛi ni jɛ jeŋmaji fɛɛ mli, akɛ amɛtsake amɛtsui yɛ E-he ni amɛna Yesu Kristo mli hemɔkɛyeli. (Marko 13:10; Luka 24:45-48) Ni shia kɛ shia nitsumɔ ni tamɔ nɛkɛ mli akpaa onukpai ni ahala amɛ yɛ ŋmɛnɛŋmɛnɛ beaŋ Odasefoi lɛ ateŋ lɛ gbɛ akɛ amɛ amɛbaanyiɛ hiɛ lɛ.—Bɔfoi lɛ Asaji 20:28.
12. Mɛni tsutsu onukpai komɛi kɛɛ amɛfeee, shi onukpai lɛ nyiɛɔ hiɛ yɛ mɛni mli ŋmɛnɛ?
12 Afi 1879 mli ni Charles Taze Russell je Zion’s Watch Tower and Herald of Christ’s Presence, ni amrɔ nɛɛ atsɛɔ lɛ Buu-Mɔɔ Eetswa Yehowa Maŋtsɛyeli He Adafi lɛ kalamɔ shishi. Russell kɛ Biblia Kaselɔi krokomɛi jaje Maŋtsɛyeli lɛ he sane lɛ yɛ bɔfoi lɛ agbɛ lɛ nɔ. Shi yɛ sɛɛ mli afii lɛ amli lɛ, asafoŋ onukpai komɛi ehiii shi yɛ amɛ odaseyeli he gbɛnaa nii ni ka amɛnɔ lɛ naa. Akɛ nɔkwɛmɔ nɔ lɛ, Odasefonyo ko ŋma akɛ: “Nɔ fɛɛ nɔ tee nɔ jogbaŋŋ kɛyashi be mli ni adafitswaa lɛ ba akɛ mɔ fɛɛ mɔ kɛ ehe awo shia kɛ shia odaseyeli nitsumɔ lɛ mli kɛ woji ni titri lɛ Hɔgbaa shia kɛ shia nitsumɔ lɛ—afi 1927 mli nɛ. Wɔ onukpai ni ahala amɛ lɛ te shi wo enɛ ni amɛbɔ mɔdɛŋ ni amɛje kuu muu lɛ fɛɛ nijiaŋ wui koni amɛkɛ amɛhe akawo nitsumɔ ko kwraa ni tamɔ nɛkɛ mli.” Yɛ be ni sa mli lɛ, hii ni kɛ amɛhe wooo shia kɛ shia shiɛmɔ mli lɛ bafee mɛi ni naaa hegbɛ akɛ amɛaasɔmɔ akɛ onukpai dɔŋŋ. Ŋmɛnɛ hu, aakpa gbɛ akɛ mɛi ni sɔmɔɔ akɛ onukpai kɛ asafoŋ sɔɔlɔi Iɛ baanyiɛ shia kɛ shia odaseyeli lɛ kɛ Kristofoi asɔɔmɔ nitsumɔi krokomɛi lɛ ahiɛ.
Mɔ Fɛɛ Mɔ Ji Odasefonyo
13. (a) Mɛni esa akɛ wɔfee kɛji akɛ gbɔmɛi booo Maŋtsɛyeli sane lɛ toi po? (b) Akɛ Paulo eto Ezekiel he yɛ mɛɛ gbɛ nɔ?
13 Yɛ Yehowa yelikɛbuamɔ naa lɛ, esa akɛ Kristofoi ajaje Maŋtsɛyeli lɛ he sane lɛ yɛ shia kɛ shia, kɛ mɛi kɛ hiɛsɔɔ ekpɛlɛɛɛ nɔ po. Ezekiel baabɔ gbɔmɛi kɔkɔ akɛ Nyɔŋmɔ bulɔ, amɛbo toi jio, amɛbooo toi jio. (Ezekiel 2:5-7; 3:11, 27; 33:1-6) Yɛ be mli ni ekɛ bɔ ni Ezekiel je Paulo ha lɛ toɔ he lɛ, E. M. Blaiklock ŋma akɛ: “Nɔ ni jeɔ kpo kɛjɛɔ [Paulo wiemɔ ni yɔɔ Bɔfoi lɛ Asaji yitso 20 lɛ] mli ji Efeso sɔɔmɔ nitsumɔ lɛ he mfoniri ni mli ka shi faŋŋ. Kadimɔ nɔ ni nyiɛ sɛɛ nɛɛ: Klɛŋklɛŋ lɛ, Paulo anɔkwayeli ni he hiaa lɛ. Etaooo hiɛnyam aloo ni ena nɔkpɛlɛmɔ kɛjɛ gbɔmɛi adɛŋ. Taakɛ Ezekiel ni akɛ bulɔ nitsumɔ wo edɛŋ lɛ ji lɛ, ekɛ ekaafeemɔ yɛ anɔkwayeli kɛ subaŋ mli fi ewiemɔ lɛ sɛɛ. Nɔ ni ji enyɔ lɛ, esuɔmɔ ni henumɔ yɔɔ mli lɛ. Ejeee nuu ni kɛ hiɛkpatamɔ wiemɔ woɔ edaaŋ ni henumɔ bɛ mli. Nɔ ni ji etɛ lɛ, esanekpakpa shiɛmɔ ni etɔɔɔ lɛ yɛ mli lɛ. Eshiɛ sanekpakpa lɛ yɛ faŋŋ kɛ shia kɛ shia, yɛ maŋtiase lɛ mli kɛ kpokpaa lɛ fɛɛ nɔ.”
14. Mɛni hewɔ odaseyeli ji gbɛnaa nii ni ka mɔ fɛɛ mɔ ni jɔɔ ehe nɔ ehaa Yehowa Nyɔŋmɔ yɛ sɔlemɔ mli kɛtsɔɔ Yesu Kristo nɔ lɛ nɔ?
14 Nyɔŋmɔ jɔɔmɔi babaoo ni yɔɔ eŋmɛnɛŋmɛnɛ beaŋ tsuji lɛ anɔ lɛ shiii yiŋkɔshikɔshi-feemɔ ko yɛ ehiɛ ni sɔɔ akɛ ena amɛ ni amɛhiɛ gbɛi Yehowa Odasefoi lɛ he. (Yesaia 43:10-12) Kɛfata he lɛ, amɛji Kristo odasefoi hu, ejaakɛ Yesu kɛɛ esɛɛnyiɛlɔi lɛ akɛ: “Kɛ mumɔ krɔŋkrɔŋ lɛ na ba nyɛnɔ lɛ, nyɛaana hewalɛ, ni nyɛaatsɔmɔ midasefoi yɛ Yerusalem kɛ Yudea kɛ Samaria fɛɛ, kɛyashi shikpɔŋ lɛ naagbee hei lɛ.” (Bɔfoi lɛ Asaji 1:8) No hewɔ lɛ odaseyeli ji gbɛnaa nii ni ka mɔ fɛɛ mɔ ni jɔɔ ehe nɔ ehaa Yehowa Nyɔŋmɔ yɛ sɔlemɔ mli kɛtsɔɔ Yesu Kristo nɔ lɛ nɔ.
15. Mɛni awie yɛ mra be mli Kristofoi lɛ odaseyeli nitsumɔ lɛ he?
15 Awie yɛ odaseyeli he akɛ: “Ekɔɔ sɔlemɔ muu lɛ fɛɛ he. Mra be mli asafo lɛ maŋsɛɛ sanekpakpa shiɛmɔ nitsumɔ lɛ jeee Yei a-Maŋsɛɛ Sanekpakpa Shiɛmɔ Asafo loo Maŋsɛɛ Nitsumɔ Kuu lɛ gbɛnaa nii. Ni asaŋ ashiii odaseyeli nitsumɔ lɛ ahaaa mɛi ni kɛ enɛ efee amɛnitsumɔ, tamɔ onukpai, osɔfoi bibii, aloo bɔfoi lɛ po. . . . Sɔlemɔ lɛ ji shiɛmɔ nitsumɔ yɛ nakai mra bei lɛ amli. Mra be mli asafo lɛ maŋsɛɛ sanekpakpa shiɛmɔ gbɛjianɔtoo lɛ damɔ nɔ ni akpɛlɛɔ nɔ akɛ anɔkwalei enyɔ nɔ: (1) Sɔlemɔ lɛ nitsumɔ titri ji sanekpakpa shiɛmɔ yɛ jeŋ fɛɛ. (2) Nɛkɛ nitsumɔ nɛɛ he gbɛnaa nii lɛ ka Kristofoi asafo muu lɛ fɛɛ nɔ.”—J. Herbert Kane.
16. Niŋmalɔi ni yɔɔ Kristendom lɛ po kpɛlɛɔ mɛni nɔ yɛ Kristofoi kɛ odaseyeli he?
16 Eyɛ mli akɛ ŋmɛnɛŋmɛnɛ beaŋ Kristendom niŋmalalɔi kɛ Maŋtsɛyeli lɛ he sane lɛ kpaaa gbee moŋ, shi amɛteŋ mɛi komɛi kpɛlɛɔ nɔ akɛ gbɛnaa nii ka Kristofoi anɔ akɛ amɛye odase. Akɛ nɔkwɛmɔ nɔ lɛ, Oscar E. Feucht ŋma yɛ wolo, Everyone a Minister lɛ mli akɛ: “Osɔfo ko bɛ ni baanyɛ atsu sɔɔmɔ ni Nyɔŋmɔ kɛha heyelilɔ fɛɛ heyelilɔ lɛ he nii aha lɛ. Nɔ ni fite sane lɛ ji akɛ, afii ohai abɔ susumɔ ni ejaaa ni etee nɔ yɛ sɔlemɔ lɛ mli lɛ eha sɔlemɔ lɛ mlibii 500 lɛ anitsumɔi ebatsɔ jatsu ni ka osɔfo kome nɔ. Jeee nakai eji yɛ mra be mli sɔlemɔ lɛ mli. Mɛi fɛɛ ni heɔ yeɔ lɛ yaa he fɛɛ he amɛyashiɛɔ Wiemɔ lɛ.”
17. Mɛni abaanyɛ awie yɛ gbɛhe mli ni odaseyeli nitsumɔ lɛ yɔɔ yɛ mra be mli Kristofoi lɛ ashihilɛi amli lɛ he?
17 Odaseyeli ji nɔ titri yɛ mra be mli Kristofoi lɛ ashihilɛ mli, taakɛ bɔ ni eji yɛ Yehowa webii ateŋ ŋmɛnɛ lɛ. Edward Caldwell Moore ni jɛ Harvard University lɛ ŋma akɛ: “Kɛ aaawie yɛ gbɛ ni da nɔ lɛ, nɔ ni kadi klɛŋklɛŋ afii ohai etɛ lɛ mli Kristofoi akuu lɛ ji miishɛɛ babaoo ni amɛyɔɔ yɛ hemɔkɛyeli lɛ gbɛɛ-kɛ-shwamɔ mli lɛ he lɛ. Akɔnɔ ni Kristofoi na ji sanekpakpa shiɛmɔ, yiwalaheremɔ he sane lɛ ni aaagba mɛi krokomɛi. . . . Shi hewalɛ ni Yesu tsɔɔmɔi lɛ na ni akɛgbɛ ashwa, yɛ mra bei lɛ amli lɛ jɛ gbɛfaŋnɔ fioo ko ni gbɔmɛi ni esa akɛ wɔtsɛ amɛ akɛ maŋsɛɛ sanekpakpa shiɛlɔi lɛ na yɛ mli lɛ. Nɔ ni atsu lɛ jɛ gbɔmɛi ni jɛ nitsumɔi sɔrɔtoi fɛɛ mli kɛ gbɛhei fɛɛ mli. [Amɛkɛ] nakai mligbɛ wala lɛ mli teemɔŋ sane lɛ, nakai su hee kɛha je lɛ, ni yɛ amɛniiashikpamɔ mli lɛ eji yiwalaheremɔ lɛ tee [Roma] maŋtsɛyeli lɛ naagbee husui anaa tɔɔ. . . [Mra be mli Kristofoi] lɛ heɔ ŋmɛnɛŋmɛnɛ jeŋ gbɛjianɔtoo nɛɛ naagbee ni bɛŋkɛɔ lɛ amɛyeɔ diɛŋtsɛ. Ehe jeŋ gbɛjianɔtoo hee ni baaba trukaa kɛ agbɛnɛ yɛ naakpɛɛ gbɛ nɔ lɛ eye.”
18. Mɛɛ hiɛnɔkamɔ ko ni yɔɔ nyam tekeɔ maŋkwramɔŋ hiɛnyiɛlɔi Iɛ alamɔi lɛ kwraa?
18 Yehowa Odasefoi kɛ miishɛɛ kudɔɔ amɛ toibolɔi lɛ kɛyaa jeŋ hee ni Nyɔŋmɔ ewo shi yɛ he lɛ he, yɛ amɛ shia kɛ shia odaseyeli lɛ kɛ amɛsɔɔmɔi krokomɛi lɛ mli. Naanɔ wala jɔɔmɔi ni agba afɔ shi lɛ fe lamɔi ni ŋmɛnɛŋmɛnɛ beaŋ mɛi ni kɛɛ amɛmiitswa jeŋ gbɛjianɔtoo hee amɛma shi lɛ shweɔ fe fɛɛ lɛ kwraa. (2 Petro 3:13; Kpojiemɔ 21:1-4) Eyɛ mli akɛ etamɔ nɔ ni mɔ fɛɛ mɔ baasumɔ ni ehi Nyɔŋmɔ jeŋ hee ni yɔɔ naakpɛɛ lɛ mli moŋ, shi jeee nakai sane lɛ ji. Shi, nyɛhaa wɔsusua gbɛi komɛi ni mɔɔ shi jogbaŋŋ ni Yehowa tsuji baanyɛ atsɔ nɔ atsɔɔ mɛi ni taoɔ naanɔ wala lɛ anii lɛ ahe.
Te Obaaha Hetoo Oha Tɛŋŋ?
◻ Mɛni hewɔ wɔbaanyɛ wɔkɛɛ akɛ Bɔfoi lɛ Asaji 5:42 kɛ Bɔfoi lɛ Asaji 20:20 tsɔɔ akɛ esa akɛ Yesu sɛɛnyiɛlɔi lɛ ashiɛ yɛ shia kɛ shia?
◻ Te wɔfeɔ tɛŋŋ wɔleɔ akɛ Nyɔŋmɔ kpɛlɛɔ Yehowa Odasefoi ashia kɛ shia sɔɔmɔ lɛ nɔ?
◻ Yɛ sɔɔmɔ lɛ he lɛ, mɛni ataoo yɛ onukpai kɛ asafoŋ sɔɔlɔi adɛŋ?
◻ Mɛɛ gbɛhe esa akɛ odaseyeli ana yɛ Kristofoi lɛ ashihilɛ mli?
[Mfoniri ni yɔɔ baafa 10]
Yɛ afi 33 Ŋ.B. lɛ, Yesu kaselɔi lɛ ye odase yɛ shia kɛ shia ni amɛkpaaa
[Mfoniri ni yɔɔ baafa 13]
Paulo tsɔɔ nii yɛ “shia kɛ shia.” Yehowa Odasefoi tsuɔ nɛkɛ sɔɔmɔ nitsumɔ nɛɛ he nii ŋmɛnɛ