Okɛ Ekaa Ajaje Yehowa Maŋtsɛyeli Lɛ!
‘Ni ehereɔ mɛi fɛɛ ni baa eŋɔɔ lɛ, ni eshiɛɔ Nyɔŋmɔ maŋtsɛyeli lɛ he sane lɛ etsɔɔ amɛ.’—BƆFOI LƐ ASAJI 28:30, 31.
1, 2. Mɛɛ ŋwɛi sɛɛfimɔ he odaseyeli Paulo yɔɔ, ni mɛɛ nɔkwɛmɔ nɔ efee kɛha wɔ?
YEHOWA fiɔ Maŋtsɛyeli jajelɔi lɛ asɛɛ yɛ be fɛɛ mli. Kwɛ bɔ ni enɛ ji anɔkwale yɛ Paulo gbɛfaŋ! Epue yɛ nɔyelɔi ahiɛ, eŋmɛ etsui shi yɛ asafoi ni teɔ shi woɔ lɛ lɛ ahiɛ, ni ekɛ ekaa jaje Yehowa Maŋtsɛyeli lɛ kɛ ŋwɛi sɛɛfimɔ.
2 Yɛ be mli ni eji gboklɛfonyo yɛ Roma po lɛ, Paulo “hereɔ mɛi fɛɛ ni baa eŋɔɔ lɛ, ni eshiɛɔ Nyɔŋmɔ maŋtsɛyeli lɛ he sane lɛ . . . etsɔɔ amɛ.” (Bɔfoi lɛ Asaji 28:30, 31) Mɛɛ nɔkwɛmɔ nɔ kpakpa po enɛ ji kɛha Yehowa Odasefoi ŋmɛnɛ nɛkɛ! Wɔbaanyɛ wɔkase babaoo kɛjɛ Paulo sɔɔmɔ nitsumɔ ni Luka bɔ he amaniɛ yɛ Biblia mli wolo ni ji Bɔfoi lɛ Asaji lɛ naagbee yitsei lɛ amli.—20:1–28:31.
Etswa Nanemɛi Heyelilɔi Ema Shi
3. Mɛni ba yɛ Troa, ni mɛni he wɔbaanyɛ wɔkɛ enɛ ato yɛ wɔgbii nɛɛ amli?
3 Beni basabasa-feemɔ lɛ ba shi yɛ Efeso lɛ, kɛkɛ ni Paulo tsa emaŋsɛɛ sanekpakpa shiɛmɔ gbɛfaa ni ji etɛ lɛ nɔ. (20:1-12) Shi beni ebaashi kɛya Siria lɛ, enu he akɛ Yudafoi lɛ ekpaŋ eyi nɔ. Akɛni ekolɛ amɛbaanyɛ amɛtara lɛlɛ ni Paulo kɛfaa gbɛ lɛ nɔŋŋ mli ni amɛgbe lɛ yɛ mli hewɔ lɛ, etsɔ Makedonia kɛtee. Ehi Troas otsi ni ekɛtswa nanemɛi heyelilɔi lɛ amumɔŋ hewalɛ ema shi, taakɛ nɔkwɛlɔi gbɛfalɔi feɔ ŋmɛnɛ yɛ Yehowa Odasefoi ateŋ lɛ. Yɛ gbɛkɛ ni enɔ jetsɛremɔ ebaashi lɛ, Paulo wie aahu kɛyashi nyɔɔŋ teŋ. No mli lɛ Eutiko ta samfɛlɛ lɛ naa, ni akɛni eka shi faŋŋ akɛ etɔ lɛ yɛ gbi lɛ mli nitsumɔi ahewɔ lɛ, ewɔ ni etsɔ mli egbee shi kɛjɛ nsɔɔdoi etɛ lɛ nɔ ni egbo, shi Paulo tee lɛ shi kɛba wala mli. Mɛɛ miishɛɛ enɛ kɛaaba nɛkɛ! Belɛ susumɔ miishɛɛ kpele ni aaaba yɛ be mli ni ateɔ mɛi akpekpei abɔ shi kɛjɛɔ gbohiiajeŋ yɛ jeŋ hee ni baa lɛ mli lɛ he okwɛ.—Yohane 5:28, 29.
4. Mɛni Paulo tsɔɔ Efeso onukpai lɛ yɛ sɔɔmɔ nitsumɔ lɛ he?
4 Beni eyaa Yerusalem lɛ, Paulo kɛ Efeso asafo lɛ mli onukpai lɛ kpe yɛ Mileto. (20:18-21) Ekai amɛ akɛ etsɔɔ amɛ nii “yɛ shia kɛ shia” ni akɛ eye “tsuitsakemɔ kɛ Nyɔŋmɔ hamɔ kɛ wɔ-Nuŋtsɔ Yesu Kristo nɔ hemɔkɛyeli lɛ he odase [e]tsɔɔ Yudafoi kɛ Helabii fɛɛ.” Mɛi ni jɛ mli amɛbatsɔmɔ onukpai lɛ etsake amɛtsui momo ni amɛyɛ hemɔkɛyeli. Bɔfo lɛ miitsɔse amɛ hu koni amɛjaje Maŋtsɛyeli lɛ yɛ ekaa naa amɛtsɔɔ mɛi ni heee yeee lɛ yɛ shia kɛ shia sɔɔmɔ lɛ mli taakɛ Yehowa Odasefoi feɔ ŋmɛnɛ lɛ.
5. (a) Paulo ji nɔkwɛmɔ nɔ kpakpa yɛ mumɔ krɔŋkrɔŋ lɛ gbɛtsɔɔmɔ shishi yɛ mɛɛ gbɛ nɔ? (b) Mɛni hewɔ ŋaawoo akɛ ‘onukpai lɛ akwɛ amɛhe nɔ kɛ tooiku lɛ nɔ jogbaŋŋ’ lɛ he hiaa lɛ?
5 Paulo fee nɔkwɛmɔ kpakpa yɛ Nyɔŋmɔ mumɔ krɔŋkrɔŋ lɛ kudɔmɔ-nɔkpɛlɛmɔ mli. (20:22-30) Paulo kɛɛ “efi mi yɛ mumɔ mli,” aloo gbɛnaa nii ka enɔ akɛ enyiɛ mumɔ lɛ kudɔmɔ sɛɛ hewɔ lɛ bɔfo lɛ baaya Yerusalem eyɛ mli akɛ kpai kɛ amanehului miimɛ lɛ yɛ jɛmɛ. Ebuɔ wala, shi emuuyeli mli ni eeehiɛ eha Nyɔŋmɔ lɛ ji nɔ ni he hiaa lɛ waa, taakɛ esa akɛ eji kɛha wɔ lɛ. Paulo wo onukpai lɛ hewalɛ ni ‘amɛhiɛ ahi amɛhe nɔ kɛ tooiku lɛ fɛɛ ni mumɔ krɔŋkrɔŋ lɛ ewo amɛ amɛnɔkwɛlɔi lɛ.’ Kɛ ‘ekpa ehe lɛ,’ (eka shi faŋŋ akɛ yɛ gbele mli lɛ), “klaji fulɔi” “ebaaŋ tooiku lɛ yi.” Hii ni tamɔ nɛkɛ baate shi yɛ onukpai lɛ ateŋ diɛŋtsɛ, ni kaselɔi ni leee nii lɛ baakpɛlɛ amɛtsɔɔmɔi ni etsɔmɔ ni jeee anɔkwale lɛ nɔ.—2 Tesalonikabii 2:6.
6. (a) Mɛni hewɔ Paulo baanyɛ ni ekɛ onukpai lɛ awo Nyɔŋmɔ dɛŋ yɛ hekɛnɔfɔɔ mli lɛ? (b) Paulo nyiɛ shishitoo mla ni yɔɔ Bofoi lɛ Asaji 20:35 lɛ sɛɛ yɛ mɛɛ gbɛ nɔ?
6 Bɔni afee ni onukpai lɛ atsi amɛhe kɛjɛ hemɔkɛyeli kwamɔ he lɛ, esa akɛ amɛhiɛ ahi amɛhe nɔ yɛ mumɔŋ. (20:31-38) Bɔfo lɛ etsɔɔ amɛ Hebri Ŋmalɛi lɛ kɛ Yesu tsɔɔmɔi lɛ, ni yɔɔ hewalɛ ni tsuuɔ mɔ he ni baanyɛ aye abua amɛ ni amɛnine ashɛ ŋwɛi Maŋtsɛyeli lɛ nɔ lɛ, nɔ ni ji “gboshiniyeli kɛha mɛi fɛɛ ni atsuu amɛhe lɛ.” Akɛni Paulo tsu nii ekɛkwɛ lɛ diɛŋtsɛ ehe kɛ mɛi ni fata ehe lɛ hu hewɔ lɛ, ewo onukpai lɛ hewalɛ ni amɛfee mɛi ni tsuɔ nii waa. (Bɔfoi lɛ Asaji 18:1-3; 1 Tesalonikabii 2:9) Kɛ wɔ hu wɔtsɔ gbɛ ni tamɔ nakai nɔ ni wɔye wɔbua mɛi koni amɛna naanɔ wala lɛ, wɔbaayoo Yesu wiemɔi nɛɛ: “Nɔ hamɔ mli yɛ jɔɔmɔ fe hemɔ.” Anuɔ wiemɔ nɛɛ shishi yɛ Sanekpakpai lɛ amli, shi Paulo pɛ ji mɔ ni wie he, ejaakɛ enine shɛ nɔ kɛtsɔ naabu kɛ wiemɔ loo kɛtsɔ mumɔ tsirɛmɔ nɔ. Wɔbaanyɛ wɔna jɔɔmɔ loo miishɛɛ babaoo kɛji akɛ wɔ hu wɔkɛ wɔhe sha afɔle tamɔ Paulo. Bɔ ni ekɛ ehe eha sɔŋŋ hewɔ lɛ, Efeso onukpai lɛ ye awerɛho babaoo akɛ eeshi amɛ!
Ha Yehowa Suɔmɔnaa Nii Aba Mli
7. Paulo to okadi yɛ Nyɔŋmɔ suɔmɔnaa nifeemɔ ni ebaa ehe shi ehaa lɛ mli yɛ mɛɛ gbɛ nɔ?
7 Beni Paulo maŋsɛɛ sanekpakpa shiɛmɔ gbɛfaa ni ji etɛ lɛ baa naagbee lɛ (aaafee afi 56 Ŋ.B.) lɛ, eto okadi kpakpa yɛ Nyɔŋmɔ suɔmɔnaa nii ni ebaa ehe shi ehaa lɛ mli. (21:1-14) Lɛ kɛ ehefatalɔi lɛ hi Filipo ni yɔɔ biyei ejwɛ ni amɛtsɔɔ mumɔ krɔŋkrɔŋ lɛ nɔ ‘amɛgbaa,’ ni amɛtsɔɔ nibii ni baaba lɛ ŋɔɔ yɛ Kaisarea. Jɛmɛ ni Kristofonyo gbalɔ Agabo kɛ Paulo diɛŋtsɛ mlifiinɔ lɛ fimɔ eniji kɛ enaji ni mumɔ lɛ tsirɛ lɛ ni ekɛɛ akɛ Yudafoi lɛ baafimɔ mlifiinɔ lɛ nɔtsɛ lɛ yɛ Yerusalem ni amɛkɛ lɛ awo Jeŋmajiaŋbii adɛŋ. Paulo kɛɛ: “Jeee fii kɛkɛ misaa mihe mito, shi moŋ gbele diɛŋtsɛ yɛ Nuŋtsɔ Yesu gbɛi lɛ ahewɔ yɛ Yerusalem.” Kaselɔi lɛ kpɛlɛ nɔ ni amɛkɛɛ: “Afee nɔ ni Nuŋtsɔ [Yehowa] sumɔɔ.”
8. Kɛ yɛ bei komɛi amli lɛ ewaa kɛhaa wɔ akɛ wɔɔkpɛlɛ ŋaawoo kpakpa nɔ lɛ, mɛni wɔbaanyɛ wɔkai?
8 Paulo gba onukpai ni yɔɔ Yerusalem lɛ nɔ ni Nyɔŋmɔ tsɔ esɔɔmɔ lɛ nɔ etsu yɛ Jeŋmajiaŋbii lɛ ateŋ. (21:15-26) Ni kɛji akɛ ewa kɛha wɔ akɛ wɔɔkpɛlɛ ŋaawoo kpakpa nɔ lɛ, wɔbaanyɛ wɔkai bɔ ni Paulo kpɛlɛ enɛ nɔ lɛ. Bɔni afee ni eye odase akɛ etsɔɔɔ Yudafoi ni yɔɔ Jeŋmajiaŋbii ashikpɔŋ nɔ akɛ “amɛkwa Mose” lɛ, ebo onukpai lɛ aŋaawoo akɛ eyatsuu ehe yɛ Mla lɛ naa ni ewo nɔ ni awoɔ lɛ eha hii ejwɛ lɛ kɛ lɛ diɛŋtsɛ ehe lɛ toi. Eyɛ mli akɛ Yesu gbele lɛ jie Mla lɛ kɛtee moŋ, shi Paulo tɔɔɔ yɛ emli nibii komɛi ni kɔɔ shiwoo he lɛ he nii ni etsuɔ lɛ mli.—Romabii 7:12-14.
Ekɛ Asafoi ni Feɔ Gidigidi Kpe Shi Esheee Gbeyei
9. Yɛ asafoi ni feɔ gidigidi lɛ gbɛfaŋ lɛ, mɛni yɔɔ ni je amɛhe ni ka Paulo kɛ Yehowa Odasefoi ateŋ ŋmɛnɛ?
9 Yehowa Odasefoi ehiɛ amɛ emuuyeli mli shii abɔ yɛ asafoi ni feɔ basabasa kɛ awuiyeli lɛ ateŋ. (Akɛ nɔkwɛmɔ nɔ lɛ, kwɛmɔ 1975 Yearbook of Jehovah’s Witnesses lɛ baafai 180-90.) Yudafoi ni jɛ Asia Bibioo lɛ hu tee gidigidi-feemɔ shi amɛshi Paulo. (21:27-40) Akɛni amɛna akɛ ekɛ Trofimo ni jɛ Efeso lɛ nyiɛ hewɔ lɛ, amɛkɛ amale folɔ bɔfo lɛ naa akɛ eebule sɔlemɔwe lɛ ejaakɛ ekɛ Helabii miiba mli. Ni shwɛ sharao kulɛ amɛgbe Paulo, shi Roma asafoiatsɛnukpa Klaudio Lisia kɛ esraafoi lɛ ba gidigidi-feemɔ lɛ shi! Taakɛ agba afɔ shi (ni Yudafoi lɛ ha eba lɛ nakai lɛ), Lisia ha awo Paulo kɔsɔŋkɔsɔ. (Bɔfoi lɛ Asaji 21:11) Beni aheɔ akɛ bɔfo lɛ aya asraafoi ashihilɛ he ni bɛŋkɛ sɔlemɔwe lɛ saneyeli he lɛ, kɛkɛ ni Lisia nu akɛ ejeee maŋjwalɔ shi Yudanyo ni aŋmɛ lɛ gbɛ akɛ ebote sɔlemɔwe lɛ. Akɛni aŋmɛ lɛ gbɛ koni ewie hewɔ lɛ, Paulo wie tsɔɔ gbɔmɛi lɛ yɛ Hebri wiemɔ mli.
10. Te Yudafoi ni yɔɔ Yerusalem lɛ here Paulo wiemɔ lɛ nɔ amɛha tɛŋŋ, ni mɛni hewɔ akɛ kplebii eyiii lɛ lɛ?
10 Paulo kɛ ekaa ye amɛ odase kpele. (22:1-30) Ejie ehe kpo akɛ Yudanyo ni mɔ ni tsɔse lɛ ji Gamaliel ni abuɔ lɛ waa lɛ. Bɔfo lɛ tsɔɔ mli akɛ beni enyiɛ gbɛ kɛyaa Damasko koni eyawa mɛi ni nyiɛ Gbɛ Lɛ nɔ lɛ ayi lɛ, eshwila yɛ be mli ni ena Nuŋtsɔ Yesu Kristo lɛ, shi Anania ha ena nii ekoŋŋ. Yɛ sɛɛ mli lɛ, Nuŋtsɔ lɛ kɛɛ Paulo akɛ: “Yaa, ejaakɛ mibatsuo jeŋmaji lɛ ni yɔɔ shɔŋŋ lɛ aŋɔɔ.” Kɛkɛ ni nakai wiemɔi lɛ tsɔ tamɔ la ni akpɛ awo koo mli. Amɛbolɔ akɛ esaaa akɛ Paulo hiɔ wala mli, kɛkɛ ni asafoi lɛ jie amɛ atadei ni amɛfɔmɔ, ni amɛgbɛ mlu amɛwo kɔɔyɔŋ kɛ mlifu. No hewɔ lɛ Lisia ha akɛ Paulo tee asraafoi ashihilɛ he lɛ koni ayayi lɛ kplebii ni akɛtao eyitsoŋ sane ni ale nɔ krɛdɛɛ hewɔ ni Yudafoi lɛ ete shi amɛwo lɛ lɛ. Paulo jo yi ni akɛ kplebii (ni akɛ kooloi ahewolɔ ni akɛ dadei loo wui ekpɛtɛkpɛtɛɛ he lɛ aaayi lɛ) lɛ naa foi beni ebi akɛ: ‘Ani mla ŋmɛɔ gbɛ akɛ ayi Romanyo ni abuko lɛ fɔ?’ Beni Lisia nu akɛ Paulo ji Romanyo lɛ, eshe gbeyei ni ekɛlɛ yadamɔ Akuashɔŋ lɛ hiɛ koni ele nɔ hewɔ ni Yudafoi lɛ folɔɔ enaa lɛ.
11. Paulo ji Farisifonyo yɛ mɛɛ shishinumɔ naa?
11 Beni Paulo je enaajiemɔ shishi yɛ Akuashɔŋ lɛ hiɛ akɛ, “henilee kpakpa sɔŋŋ mikɛba mijeŋ yɛ Nyɔŋmɔ hiɛ kɛbashi ŋmɛnɛ gbi nɛɛ,” kɛkɛ ni Osɔfonukpa Anania fa akɛ agba Paulo naabu ma. (23:1-10) Kɛkɛ ni Paulo kɛɛ, “Ma kɛ̃ Nyɔŋmɔ aaagbao, bo gbogbo ni asha he!” Kɛkɛ ni mɔ ko bi lɛ akɛ, “Ei, Nyɔŋmɔ osɔfonukpa lɛ ojɛɔ nɛɛ?” Ekolɛ Paulo yooo Anania yɛ ehiŋmɛii ni enaaa nii jogbaŋŋ lɛ hewɔ. Shi akɛni Paulo yoo akɛ Farisifoi kɛ Sadukifoi feɔ akuashɔŋ lɛ hewɔ lɛ, Paulo kɛɛ: ‘Farisifonyo ji mi, hiɛnɔkamɔ kɛ gbohiiashitee lɛ hewɔ akojoɔ mi nɛɛ.’ Enɛ ha Akuashɔŋ lɛ mli gba enyɔ, ejaakɛ Farisifoi heɔ gbohiiashitee lɛ amɛyeɔ ni Sadukifoi heee yeee. Enɛ ha bei te shi aaahu akɛ ehe bahia ni Lisia ajie bɔfo lɛ yɛ amɛteŋ.
12. Te fee tɛŋŋ ni Paulo je eyinɔ kpaŋmɔ koni agbe lɛ yɛ Yerusalem lɛ mli?
12 No sɛɛ lɛ Paulo jo eyi nɔ ni akpaŋ koni agbe lɛ lɛ naa foi. (23:11-35) Yudafoi nyɔŋmai ejwɛ eka kita akɛ amɛyeŋ nii ni amɛnuŋ nɔ ko hu ja amɛgbe Paulo da. Paulo wɔfaase ko yabɔ lɛ kɛ Lisia nɛkɛ sane nɛɛ he amaniɛ. Aha asraafoi bu ehe ni akɛlɛ tee Amralo Antonio Felike hiɛ yɛ Kaisarea, Roma nɔyeli maŋtiase ni yɔɔ Yudea lɛ. Beni ewo Paulo shi akɛ ebaabo lɛ toi lɛ, Felike ha abu ehe yɛ Herode Kpeteŋkpele lɛ, ni ji amralo lɛ mɔɔ lɛ mli.
Ekaa-Feemɔ yɛ Nɔyelɔi Ahiɛ
13. Paulo ye Felike odase yɛ mɛni he, ni mɛni jɛ mli ba?
13 Etsɛɛɛ ni bɔfo lɛ fa ehe yɛ apasa naafolɔmɔi lɛ ahe yɛ ekaa naa yɛ Felike hiɛ. (24:1-27) Etsɔɔ yɛ Yudafoi ni folɔɔ enaa lɛ ahiɛ akɛ ewoko maŋ lɛ mli hirihiri ko. Ekɛɛ akɛ eheɔ nibii ni aŋmala yɛ Mla lɛ kɛ Gbalɔi lɛ amli lɛ eyeɔ, ni eyɛ hiɛnɔkamɔ akɛ “gbohiiashitee baaba ni mɛi ni ja kɛ mɛi ni ejaaa lɛ baate shi.” Paulo tee Yerusalem koni ekɛ “nikee nii” (oniatsumɔ kɛha Yesu sɛɛnyiɛlɔi ni yiwaa hewɔ lɛ amɛtsɔmɔ ohiafoi lɛ ayaha) ni etsuu ehe hu yɛ Mla lɛ naa. Eyɛ mli akɛ Felike tsi kojomɔ lɛ eto sɛɛ moŋ, shi yɛ sɛɛ mli lɛ Paulo shiɛ Kristo, jalɛsaneyeli, henɔyeli, kɛ kojomɔ ni baa lɛ he sane etsɔɔ Felike kɛ eŋa Drusila (Herode Agripa I biyoo) lɛ. Akɛni wiemɔ nɛɛ wo Felike he gbeyei hewɔ lɛ, eha Paulo shi lɛ da. Yɛ sɛɛ mli lɛ ehaa atsɛɔ bɔfo lɛ kɛbaa eŋɔɔ shii abɔ, ni ehiɛ ka nɔ akɛ ekolɛ Paulo aaaha lɛ shika koni eŋmɛɛ ehe. Felike le akɛ Paulo yeee fɔ, shi eshi lɛ yɛ gboklɛfoi atsu lɛŋ kɛ hiɛnɔkamɔ akɛ ehiɛ aaaba nyam yɛ Yudafoi lɛ ahiɛ. Afii enyɔ sɛɛ lɛ, Porkio Festo baye Felike najiaŋ.
14. Mɛɛ mla naa gbɛjianɔtoo Paulo kɛto ehe yɛ be mli ni epue yɛ Festo hiɛ lɛ, ni mɛni ni tamɔ nakai onaa yɛ enɛ mli?
14 Paulo kɛ ekaa fa ehe ekoŋŋ yɛ Festo hiɛ. (26:1-12) Kɛji akɛ bɔfo lɛ sa gbele lɛ, ekpaŋ fai akɛ akagbe lɛ, shi gbɔmɔ ko gbɔmɔ ko nyɛŋ ni ekɛ lɛ awo Yudafoi lɛ adɛŋ ni ekɛtao amɛhiɛ nyam. Paulo kɛɛ: “Mikɛ misane lɛ miiha Kaisare yeli!” Belɛ eetsu hegbɛ ni eyɔɔ akɛ Romanyo ni esa akɛ aye esane yɛ Roma lɛ he nii (no mli lɛ yɛ Maŋtsɛ Nero hiɛ). Akpɛlɛ enibimɔ lɛ nɔ, ni Paulo ‘baaye odase yɛ Roma’ taakɛ agba afɔ shi lɛ. (Bɔfoi lɛ Asaji 23:11) Yehowa Odasefoi hu kɛ hegbɛ ni ‘amɛkɛfaa amɛhe yɛ mla naa koni ato sanekpakpa lɛ ama shi’ lɛ tsuɔ nii.—Filipibii 1:7.
15. (a) Mɛɛ gbalɛ ba mli beni Paulo pue yɛ Maŋtsɛ Agripa kɛ Kaisare hiɛ lɛ? (b) Saulo ‘fa ntia eshi kooloi akpalamɔ tso lɛ naa dade lɛ’ yɛ mɛɛ gbɛ nɔ?
15 Maŋtsɛ Herode Agripa II ni je Yudea kooyigbɛ lɛ kɛ enyɛmiyoo Bernike (ni eŋɔ lɛ efee eŋa) lɛ nu Paulo he beni amɛbasara Felike yɛ Kaisarea lɛ. (25:13–26:23) Kɛ Paulo shiɛ etsɔɔ Agripa kɛ Kaisare lɛ, belɛ eeha gbalɛ akɛ ebaaye Nuŋtsɔ lɛ gbɛi lɛ he odase yɛ maŋtsɛmɛi ahiɛ lɛ miiba mli. (Bɔfoi lɛ Asaji 9:15) Beni egbaa Agripa nɔ ni ba yɛ Damasko gbɛ lɛ nɔ lɛ, Paulo wie akɛ Yesu kɛɛ: “Ewa hao akɛ ooofa ntia oshi kooloi akpalamɔ tso lɛ naa dade lɛ.” Taakɛ tsina ni kuɛŋ ti yeɔ ehe awui kɛtsɔɔ shi ni eteɔ ewoɔ kpalamɔ tso lɛ naa dade lɛ nɔ lɛ, Saulo hu eye ehe awui kɛtsɔ Yesu sɛɛnyiɛlɔi ni yɔɔ Nyɔŋmɔ sɛɛfimɔ ni ewuɔ eshiɔ amɛ lɛ nɔ.
16. Te Festo kɛ Agripa fee amɛnii yɛ Paulo odaseyeli lɛ he amɛha tɛŋŋ?
16 Te Festo kɛ Agripa fee amɛnii yɛ sane nɛɛ he amɛha tɛŋŋ? (26:24-32) Akɛni Festo nyɛɛɛ anu gbohiiashitee lɛ shishi ni Paulo yiŋtsɔmɔ lɛ eha enaa ekpɛ ehe hewɔ lɛ, ekɛɛ Paulo akɛ: “Wolo kasemɔ sɔŋŋ eha oyeɔ sɛkɛ nɛɛ!” Nakai nɔŋŋ hu ŋmɛnɛ, mɛi komɛi folɔɔ Yehowa Odasefoi anaa akɛ amɛye sɛkɛ, eyɛ mli akɛ amɛtamɔ Paulo yɛ “anɔkwale kɛ hiɛshikamɔ wiemɔi” ni amɛwieɔ lɛ hewɔ. Agripa ni gbe sane lɛ naa shi ekpɛlɛ nɔ akɛ eji Paulo kɛ esane lɛ haaa Kaisare yeli kulɛ eeenyɛ eŋmɛɛ ehe lɛ kɛɛ: “Shwɛ fioo ni oha miyiŋ atsɔ ni matsɔ Kristofonyo.”
Oshara yɛ Ŋshɔ Hiɛ!
17. Te obaatsɔɔ ŋshɔ hiɛ osharai ni Paulo kɛkpe yɛ egbɛfaa ni kɛ lɛ tee Roma lɛ mli oha tɛŋŋ?
17 Gbɛfaa kɛmiiya Roma lɛ ha Paulo “na nɔ yɛ ŋshɔ hiɛ.” (2 Korintobii 11:24-27) Asafoiatsɛ ko ni atsɛɔ lɛ Yulio ji mɔ ni kwɛɔ gboklɛfoi ni akɛ amɛ ewo lɛlɛ mli kɛjɛ Kaisarea kɛyaa Roma lɛ anɔ. (27:1-26) Beni amɛlɛlɛ lɛ yashɛ Sidon lɛ, aŋmɛ Paulo gbɛ koni eyasara heyelilɔi lɛ ni amɛ hu amɛshɛje emii yɛ mumɔŋ. (Okɛto 3 Yohane 14 he.) Beni amɛshɛ Miria yɛ Asia Bibioo lɛ, Yulio ha gboklɛfoi lɛ yabote lɛlɛ ko ni kɛ niyenii miiya Italia lɛ mli. Yɛ kɔɔyɔɔ ni naa wa ni kpee amɛ lɛ fɛɛ sɛɛ lɛ amɛyashɛ Lɛjiatoohe Fɛfɛo ni bɛŋkɛ Kreta maŋ ni ji Lasea lɛ. Beni amɛshi jɛmɛ kɛyaa Foenike lɛ, lɛlɛ lɛ kɛ kooyi-boka ahum ko kpe. Akɛni amɛmiishe gbeyei akɛ amɛaagbee shia futufutu ni ji Sirti mli yɛ Afrika kooyigbɛ lɛ hewɔ lɛ, amlakui lɛ “kpa abalaa lɛ.” Yɛ sɛɛ mli lɛ amɛkɛ kpai fimɔ lɛlɛ lɛ koni lɛlɛ lɛ akakumɔ yɛ ŋshɔkei ni naa wa lɛ hewɔ. Akɛni kɔɔyɔɔ lɛ naa wa lolo yɛ enɔ jetsɛremɔ lɛ hewɔ lɛ, amɛjie emli jatsui lɛ eko amɛshɛrɛ amɛshwie koni lɛlɛ lɛ akatsii tsɔ. Yɛ enɔ gbii etɛ lɛ amɛkɛ amɛniji jie lɛlɛ lɛ he nibii lɛ amɛshwie (abalaa kɛ ehewɔ nibii krokomɛi lɛ). Shi yɛ be mli ni etamɔ nɔ ni hiɛnɔkamɔ ko bɛ kɛha amɛ lɛ pɛ kɛkɛ ni ŋwɛibɔfo ko jie ehe kpo etsɔɔ Paulo ni ekɛɛ lɛ akɛ ekashe gbeyei, ejaakɛ ebaaya ni eyadamɔ Kaisare hiɛ. Mɛɛ miishɛjemɔ enɛ ji beni bɔfo lɛ kɛɛ gbɛfalɔi lɛ fɛɛ akɛ abaahere amɛ fɛɛ amɛyiwala ni akɛ amɛ baaya ayashwie ŋshɔkpɔ ko nɔ lɛ!
18. Yɛ naagbee lɛ mɛni ba Paulo kɛ enanemɛi gbɛfalɔi lɛ anɔ?
18 Gbɛfalɔi lɛ ayi na wala. (27:27-44) Yɛ gbi ni ji gbi 14 lɛ nyɔɔŋ teŋ lɛ, amlakui lɛ na akɛ shikpɔŋ ebɛŋkɛ. Amɛfɔ susumɔkpaa, ni ema nɔ mi, ni amɛŋmɛ sɛkɛi koni lɛlɛ lɛ akajwara yɛ tesaai lɛ anɔ. Akɛni Paulo wo amɛ hewalɛ hewɔ lɛ, mɛi 276 lɛ fɛɛ ye nɔ ko. Agbɛnɛ amɛshɛrɛ abele loo ŋmaa ni yɔɔ lɛlɛ lɛ mli lɛ amɛshwie ŋshɔŋ. Beni jetsɛre lɛ, amlakui lɛ folɔ sɛkɛi lɛ, ni amɛfɛne kudɔɔ lɛ he kpaai lɛ, ni amɛshi tɛŋ-abalaa lɛ amɛkɛkpee kɔɔyɔɔ ni tswaa lɛ naa. Amɛkɛ lɛlɛ lɛ yasha shi ni esɛɛgbɛ bɔi jwaramɔ dukuduku. Shi amɛteŋ mɔ fɛɛ mɔ yashɛ shikpɔŋ shweshweeshwe
19. Mɛni ba Paulo nɔ yɛ Melita, ni mɛni efee kɛha mɛi krokomɛi ni yɔɔ jɛmɛ lɛ?
19 Lɛlɛ lɛ mlibii ni efɔ ni etɔ amɛ lɛ na amɛhe yɛ Melita ŋshɔkpɔ lɛ nɔ, ni ŋshɔkpɔ lɛ nɔ bii lɛ “fee amɛ ejurɔ pii.” (28:1-16) Shi beni Paulo bua la ŋmɛŋmlɛbii anaa koni ekɛtsɛ la lɛ, shinɔ ko ni yɔɔ lai lɛ ateŋ yakpɛtɛ enine he. (Amrɔ nɛɛ onufui ni ebɔɔ yɔɔ amɛdaaŋ bɛ Melita dɔŋŋ, shi nɛkɛ shinɔ nɛɛ “yɛ ebɔɔ ni naa wa.”) Melitabii lɛ susu akɛ awuiyelɔ ko ji Paulo, ni akɛ “oweletɔɔ” eŋmɛŋ lɛ gbɛ ni ehi wala mli, shi beni egbeee shi ni eeegbo loo eeefufui lɛ, amɛkɛɛ amɛhe akɛ eji nyɔŋmɔ ko. Yɛ sɛɛ mli lɛ Paulo tsa helai pii, ni Publio, ni ji ŋshɔkpɔ lɛ onukpa lɛ tsɛ fata mɛi ni etsa amɛ lɛ ahe. Yɛ no sɛɛ nyɔji etɛ lɛ, Paulo, Luka kɛ Aristako yabote lɛlɛ ko ni ekadimɔ ji “Dioskurioi” (Kasto kɛ Poluk nyɔŋmɔi ni akɛɛ amɛji haaji ni sumɔɔ amlakui asane) lɛ mli. Beni amɛyashɛ Puteoli lɛ, Yulio kɛ mɔ ni ebuɔ ehe nɛɛ tsa nɔ. Paulo da Nyɔŋmɔ shi ni ena ekaa babaoo yɛ be mli ni Kristofoi ni jɛ Roma maŋtiase lɛ mli lɛ kɛ amɛ bakpe yɛ Apiiforo kɛ Trateberna lɛ yɛ Apia Gbɛ lɛ nɔ lɛ. Yɛ naagbee beni eyashɛ Roma lɛ, aŋmɛ Paulo gbɛ koni ekome ehi shi, eyɛ mli akɛ asraafonyo ko buɔ ehe.
Yaa Nɔ Ojaje Yehowa Maŋtsɛyeli Lɛ!
20. Mɛni nitsumɔ Paulo kɛ ehe wo mli waa yɛ shia ni ehi mli yɛ Roma lɛ mli?
20 Paulo kɛ ekaa jaje Yehowa Maŋtsɛyeli lɛ he sane lɛ yɛ shia ni akɛha lɛ yɛ Roma lɛ mli. (28:17-31) Ekɛɛ Yudafoi onukpai lɛ akɛ: “Israel hiɛnɔkamɔ lɛ hewɔ ni awo mi nɛkɛ kɔsɔŋkɔsɔ nɛɛ.” Nakai “hiɛnɔkamɔ” lɛ kɔɔ Yesu ni aaakplɛ enɔ akɛ Mesia lɛ he, nɔ ko ni esa akɛ wɔsumɔ akɛ wɔ hu wɔɔna amanehulu yɛ he. (Filipibii 1:29) Eyɛ mli akɛ Yudafoi lɛ ateŋ mɛi pii heee ewiemɔ lɛ amɛyeee moŋ, shi Jeŋmajiaŋbii lɛ kɛ Yudafoi lɛ ateŋ mɛi fioo ko yɛ tsuijurɔ yɛ sane lɛ he. (Yesaia 6:9, 10) Paulo kɛ afii enyɔ (aaafee afi 59-61 Ŋ.B.) here mɛi fɛɛ ni baa eŋɔɔ lɛ, “ni eshiɛɔ Nyɔŋmɔ maŋtsɛyeli lɛ he sane lɛ, ni ekɛ ekaa fɛɛ jajeɔ Nuŋtsɔ Yesu Kristo he saji lɛ etsɔɔ amɛ, ni mɔ ko mɔ ko etsii lɛ gbɛ.”
21. Mɛɛ nɔkwɛmɔ nɔ Paulo to he okadi efɔ shi kɛyashi eshikpɔŋ nɔ shihilɛ lɛ naagbee?
21 Eka shi faŋŋ akɛ Nero na akɛ Paulo yeee fɔ ni eŋmɛɛ ehe. Kɛkɛ ni bɔfo lɛ kɛ Timoteo kɛ Tito je amɛ sɔɔmɔ nitsumɔ lɛ shishi ehee. Shi aku sɛɛ awo lɛ tsuŋ ekoŋŋ yɛ Roma (aaafee afi 65 Ŋ.B.) ni eka shi faŋŋ akɛ egbo akɛ la odasefonyo yɛ Nero dɛŋ. (2 Timoteo 4:6-8) Shi Paulo to okadi kpakpa efɔ shi akɛ Maŋtsɛyeli sane lɛ jajelɔ ekaalɔ kɛyashi naagbee. Eba akɛ mɛi fɛɛ ni ejɔɔ amɛhe nɔ amɛha Nyɔŋmɔ lɛ kɛ ekaa kɛ nakai mumɔ lɛ nɔŋŋ aaajaje Yehowa Maŋtsɛyeli lɛ yɛ naagbee gbii nɛɛ amli!
Te Obaaha Hetoo Oha Tɛŋŋ?
◻ Mɛɛ tsɔsemɔ yɛ sɔɔmɔ nitsumɔ lɛ mli Paulo kɛha Efeso onukpai Iɛ?
Paulo to heshibaa kɛha Nyɔŋmɔ suɔmɔnaa nifeemɔ he okadi efɔ shi yɛ mɛɛ gbɛ nɔ?
◻ Yɛ asafoi ni feɔ gidigidi Iɛ agbɛfaŋ Iɛ, mɛni onaa yɛ Paulo niiashikpamɔ Iɛ mli ni tamɔ Yehowa Odasefoi anɔ yɛ ŋmɛnɛ?
◻ Mɛɛ mla naa gbɛjianɔtoo Paulo kɛtsu nii eha ehe beni edamɔ Amralo Festo hiɛ Iɛ, ni mɛni yɔɔ ni tamɔ nakai yɛ ŋmɛnɛŋmɛnɛ beaŋ?
◻ Mɛɛ nitsumɔ Paulo kɛ ehe wo mli waa yɛ shia ni eyɔɔ mli yɛ Roma lɛ, ni mɛɛ okadi ekɛ enɛ to?