Yehowa Tooi ni Jara Wa lɛ ni Aaakwɛ Amɛ Blɛoo

ONUKPAI lɛ bo sane lɛ toi jogbaŋŋ. Amɛfa gbɛ aaafee shitooi 30 kɛjɛ Efeso kɛtee Mileto koni amɛyahe gbɛtsɔɔmɔ kɛjɛ bɔfo Paulo ŋɔɔ. Agbɛnɛ edɔ amɛ akɛ no baafee naagbee be ni amɛkɛaana lɛ. No hewɔ lɛ amɛle akɛ ewiemɔi ni baanyiɛ sɛɛ lɛ baafee nɔ ni he hiaa waa diɛŋtsɛ: “Nyɛlea nyɛhe nɔkwɛmɔ kɛ tooikuu lɛ fɛɛ ni mumɔ krɔŋkrɔŋ lɛ ewo nyɛ amɛnɔkwɛlɔi lɛ, koni nyɛlɛ Nyɔŋmɔ asafo lɛ ni ekɛ lɛ diɛŋtsɛ e-Bi lɛ la hé lɛ.”​—Bɔfoi lɛ Asaji 20:​25, 28, 38, New World Translation.

Tookwɛlɔi atã ni Paulo tsi kuku lɛ ha nakai Efeso onukpai lɛ nu nibii babaoo shishi. Amɛle bɔ ni tooi akwɛmɔ yɔɔ yɛ akrowai ni ebɔle amɛhe lɛ amli. Amɛle bɔ ni awie tookwɛlɔi ahe babaoo aha yɛ Hebri Ŋmalɛi lɛ amli lɛ hu. Ni amɛle akɛ Yehowa kɛ ehe to ewebii lɛ a-Kwɛlɔ he.​—Yesaia 40:​10, 11.

Paulo wie amɛhe akɛ “tooikuu” lɛ “[a]nɔkwɛlɔi,” kɛ “asafo lɛ” mli ‘tookwɛlɔi.’ Yɛ be mli ni wiemɔ “nɔkwɛlɔi” tsɔɔ nɔ ni amɛnitsumɔ lɛ ji lɛ, wiemɔ “tookwɛlɔ” lɛ tsɔɔ gbɛ ni amɛtsɔɔ nɔ amɛtsuɔ nakai nɔkwɛmɔ lɛ he nii amɛhaa. Hɛɛ, nɔkwɛlɔi lɛ baakwɛ asafo lɛ mlibii lɛ ateŋ mɔ fɛɛ mɔ yɛ suɔmɔ gbɛ ni tookwɛlɔ lɛ tsɔɔ nɔ ekwɛɔ etooikuu lɛ nɔŋŋ nɔ.

Ŋmɛnɛ, onukpai fioo ko pɛ le gbɛ ni atsɔɔ nɔ akwɛɔ tooi diɛŋtsɛ. Shi Biblia lɛ wieɔ tooi kɛ tookwɛlɔi ahe babaoo, titri lɛ yɛ okadi gbɛ nɔ akɛ, ehaa Paulo wiemɔi lɛ naa mɔ nɔ hewalɛ yɛ bei fɛɛ mli. Ni abaanyɛ akase babaoo yɛ saji ni kɔɔ tookwɛlɔi ni na Nyɔŋmɔ hiɛ duromɔ yɛ blema bei lɛ amli lɛ ahe lɛ mli. Amɛ nɔkwɛmɔ nii ni sa kadimɔ lɛ baanyɛ aye abua ŋmɛnɛŋmɛnɛ beaŋ onukpai lɛ ni amɛna nɔ̃ sui ni ehe hiaa ni amɛna bɔni afee ni amɛkwɛ Nyɔŋmɔ asafo lɛ nɔ.

Tookwɛlɔ David ni Sheee Gbeyei Lɛ

Kɛ wɔsusu Biblia bei amli tookwɛlɔi ahe lɛ, eka shi faŋŋ akɛ wɔbaakai David, ejaakɛ eje shishi akɛ mɔ ni kwɛɔ tooi. Klɛŋklɛŋ nii ni wɔkaseɔ kɛjɛɔ David shihilɛ mli ji akɛ tookwɛlɔ ni mɔ ko ji lɛ jeee gbɛhe ni haa mɔ ko naa gbɛi. Yɛ anɔkwale mli lɛ, beni gbalɔ Samuel ba koni ebafɔ Ishai binuu ko mu akɛ wɔsɛɛ be mli Israel maŋtsɛ lɛ, aku hiɛ ashwie obalanyo fioo David nɔ kwraa. Beni Yehowa ekpoo enyɛmimɛi hii onukpai kpawo lɛ sɛɛ dani atsi David, ni no mli lɛ eyɔɔ ŋa nɔ ni “eekwɛ tooi” lɛ ta. (1 Samuel 16:​10, 11) Yɛ fɛɛ sɛɛ lɛ, afii ni David kɛtsu nii akɛ tookwɛlɔ lɛ saa lɛ kɛha Israel maŋ lɛ kwɛmɔ ni wa lɛ. Lala 78:​70, 71 kɛɔ akɛ: “Ni [Yehowa] ehala etsulɔ David, ni efa lɛ kɛjɛ tooiatsuiaŋ . . . koni ebalɛ Yakob ni ji emaŋ lɛ.” No hewɔ lɛ David ŋma Lala 23 ni ŋɔɔ ni ale jogbaŋŋ lɛ yɛ gbɛ ni sa nɔ, ni ekɛ wiemɔi nɛɛ je shishi: “Yehowa ji mi-Kwɛlɔ.”

Taakɛ David ji lɛ, esa akɛ onukpai ni yɔɔ Kristofoi asafo lɛ mli lɛ asɔmɔ akɛ tookwɛlɔi bibii ni baa amɛhe shi, shi amɛkatao gbɛihemɔ ni esaaa. Taakɛ bɔfo Paulo ŋma eyaha Timoteo lɛ, mɛi ni taoɔ nɔkwɛmɔ nitsumɔ ni tamɔ nɛkɛ lɛ ‘miitao nitsumɔ kpakpa,’ jeee gbɛ́i.​—1 Timoteo 3:⁠1.

Eyɛ mli akɛ David nitsumɔ akɛ tookwɛlɔ diɛŋtsɛ lɛ baa shi moŋ, shi yɛ bei komɛi amli lɛ ebiɔ ekãafeemɔ babaoo diɛŋtsɛ. Akɛ nɔkwɛmɔ nɔ lɛ, beni jata ko bamɔ etsɛ tooi lɛ ateŋ eko kɛtee kɛ be kroko hu oshishibrishi lɛ, David kɛ kooloi lɛ kpe ni esheee gbeyei ni egbe amɛ. (1 Samuel 17:​34-36) Ekaafeemɔ ni ekaaa nɛ, yɛ be mli ni kɛ mɔ ko susu he lɛ enaa akɛ jata nyɛɔ egbeɔ kooloo ni da fe lɛ lɛ. Ni Siria oshishibrishi kɛ ehe asara su ni hiɔ Palestina, ni etsiimɔ shɛɔ nsɛni tɛi 310 lɛ, baanyɛ ekɛ enine ni mli tsii lɛ ma gbamɔ kome agbe oforote.

Bɔ ni David kɛ ekãa susuɔ etsɛ tooi lɛ ahe lɛ ji nɔkwɛmɔ nɔ kpakpa kɛha nɔkwɛlɔi ni yɔɔ Kristofoi asafo lɛ mli lɛ. Bɔfo Paulo bɔ Efeso onukpai lɛ kɔkɔ yɛ “klaji fulɔi” ni “amɛbaaŋ tooikuu lɛ yi” lɛ ahe. (Bɔfoi lɛ Asaji 20:29) Bei baashɛ yɛ ŋmɛnɛŋmɛnɛ beaŋ hu, ni ehe baahia ni nɔkwɛlɔi Kristofoi lɛ afee ekãa koni amɛkɛbu Yehowa tooi lɛ amumɔŋ hilɛ-kɛhamɔ he.

Yɛ be mli ni esa akɛ akɛ tsuisalɛ abu tooi lɛ ahe lɛ, esa akɛ akɛ amɛ aye yɛ mlijɔlɛ babaoo naa hu, ni akɛkase tookwɛlɔ ni yɔɔ suɔmɔ, David, kɛ Tookwɛlɔ Kpakpa, Yesu Kristo. (Yohane 10:11) Akɛni onukpai lɛ le akɛ tooi lɛ ji Yehowa nii hewɔ lɛ, esaaa akɛ akɛ amɛ yeɔ yɛ gbɛ ni yɔɔ keketee nɔ, “ni yeɔ asafoi lɛ anɔ nuŋtsɔmɛi-asane.”​—1 Petro 5: 2, 3; Mateo 11:​28-30; 20:​25-27.

Akɔntaa ni Abaabu

Blematsɛ Yakob ji tookwɛlɔ kroko ni ale lɛ jogbaŋŋ. Ebuɔ ehe akɛ lɛ ji mɔ ni baabu too fɛɛ too ni akɛwo edɛŋ lɛ he akɔntaa. Bɔ ni ekɛ anɔkwayeli kwɛ eshaanuu Laban tooi lɛ sɔŋŋ hewɔ lɛ, beni eye afii 20 yɛ esɔɔmɔ nɛɛ mli lɛ, Yakob baanyɛ akɛɛ akɛ: “Ogwantɛŋ yei kɛ obotia yei lɛ sharakeko, ni otooi lɛ ateŋ tooi agboi lɛ miyeko eko. Nɔ ni kooloi ye hu, mikɛbahaaa bo, mi mitoɔ najiaŋ, kɛ shwane aju eko jio, nyɔɔŋ aju eko jio, midɛŋ oheɔ yɛ.”​—1 Mose 31:​38, 39.

Nɔkwɛlɔi ni yɔɔ Kristofoi asafo lɛ mli lɛ susuɔ tooi ni wɔsusumai a-Kwɛlɔ, Yehowa Nyɔŋmɔ “kɛ lɛ diɛŋtsɛ e-Bi lɛ lá lɛ he lɛ” ahe jogbaŋŋ diɛŋtsɛ. (Bɔfoi lɛ Asaji 20:​28; 1 Petro 2:​25; 5:​4, NW) Paulo ma gbɛnaa nii ni tsii nɛɛ nɔ mi beni ekai Hebri Kristofoi lɛ akɛ hii ni nyiɛɔ hiɛ yɛ asafo lɛ mli lɛ “buɔ nyɛsusumai lɛ ahe akɛ mɛi ni baabu he akɔntaa” lɛ.—Hebribii 13:⁠17.

Yakob nɔkwɛmɔ nɔ lɛ hu tsɔɔ akɛ tookwɛlɔ nitsumɔ lɛ bɛ naagbee. Eji nitsumɔ ni atsuɔ yɛ be fɛɛ mli, ni yɛ bei babaoo mli lɛ ebiɔ he-kɛ-afɔleshaa. Ekɛɛ Laban akɛ: “Nɔ ni mina nɛ: latsaa tsaa mi shwane, ni fɛi yeɔ mi nyɔɔŋ, ni miwɔ hu tserɛɔ yɛ mihiɛ.”​—1 Mose 31:⁠40.

Enɛ ji anɔkwale diɛŋtsɛ yɛ Kristofoi onukpai pii ni yɔɔ suɔmɔ lɛ ahe ŋmɛnɛ, taakɛ niiashikpamɔ ni nyiɛ sɛɛ nɛɛ tsɔɔ lɛ. Akɛ nyɛmi nuu ko yafɔ helatsamɔ he lɛ fa ni kwɛɔ helatsɛmɛi ni oshara eba amɛwala he waa anɔ lɛ yɛ be mli ni ajie ansɔ he hela ko ni ha ehela lɛ mli bawo wu lɛ. Eweku lɛ to gbɛjianɔ koni amɛhi emasɛi yɛ helatsamɔ he lɛ shwane kɛ nyɔɔŋ. Bɔni afee ni akɛ sɛɛfimɔ kɛ hewalɛwoo aha lɛ, asafo ni eyɔɔ mli lɛ onukpai lɛ ateŋ mɔ kome tsake ebe he gbɛjianɔtoo ni deka bɛ mli kwraa lɛ mli koni enyɛ eyasara helatsɛ lɛ kɛ eweku lɛ daa gbi. Yɛ bɔ ni ekwɛmɔ yɛ helatsamɔ he lɛ yɔɔ shiŋŋ ha hewɔ lɛ, jeee be fɛɛ be enyɛɔ enaa lɛ shwane. Enɛ tsɔɔ akɛ esa akɛ onukpa lɛ aya helatsamɔ he lɛ beni jenamɔ yi ewa. Shi ekɛ miishɛɛ yaa jɛmɛ daa gbɛkɛ. Onukpa lɛ kɛɛ: “Miyoo akɛ esa akɛ maya jɛmɛ yɛ be ni hi kɛha helatsɛ lɛ mli, shi jeee be ni hi kɛha mi.” Beni nyɛmi nuu lɛ he ewa lɛ saŋŋ bɔ ni aaanyɛ ajie lɛ kɛya helatsamɔ he lɛ afa kroko po lɛ, onukpa lɛ tee nɔ yɛ ehewalɛwoo saramɔi nɛɛ mli daa gbi.

Nɔ ni Mose Kase akɛ Tookwɛlɔ

Biblia lɛ tsɔɔ bɔ ni Mose ji akɛ “ehe jɔ fe gbɔmɛi fɛɛ ni yɔɔ shikpɔŋ nɛɛ nɔ.” (4 Mose 12:⁠3) Shi nɔ ni aŋma afɔ shi lɛ tsɔɔ akɛ jeee be fɛɛ be ebaa lɛ nakai. Akɛ obalanyo lɛ, egbe Mizraimnyo ko akɛni etswa enaanyo Hebrinyo ko nɔ̃ hewɔ. (2 Mose 2:​11, 12) Eka shi faŋŋ akɛ enɛ jeee gbɔmɔ ni he jɔ nifeemɔ! Ni kɛlɛ, Nyɔŋmɔ kɛ Mose baatsu nii yɛ sɛɛ mli koni enyiɛ maŋ ni amɛyifalɛ shɛɔ akpekpei abɔ hiɛ kɛtsɔ ŋa lɛ nɔ kɛya Shiwoo Shikpɔŋ lɛ nɔ. Eka shi faŋŋ akɛ belɛ tsɔsemɔ lolo he miihia Mose.

Yɛ be mli ni Mose ena je nɛŋ tsɔsemɔ yɛ “Mizraim nilee fɛɛ” mli lɛ, kɛlɛ babaoo he miihia lɛ koni enyɛ elɛ ni ekwɛ Yehowa tooi lɛ. (Bɔfoi lɛ Asaji 7:22) Mɛni ji nɔ ni nɛkɛ tsɔsemɔ kroko nɛɛ baanyɛ aji? Ojogbaŋŋ, Nyɔŋmɔ ha Mose sɔmɔ akɛ tookwɛlɔ ni baa shi afi 40 yɛ Midian shikpɔŋ lɛ nɔ. Mose kase sui kpakpai ni ji tsuishitoo, mlijɔlɛ, heshibaa, tsuishiŋmɛɛ, mlijɔlɛ, kɛ henɔyeli yɛ be mli ni ekwɛɔ eshaanuu Yetro tooi lɛ. Ekase bɔ ni amɛɔ Yehowa hu. Hɛɛ, tooi diɛŋtsɛ akwɛmɔ ha Mose he basa akɛ Israel maŋ lɛ kwɛlɔ ni yɔɔ nyɛmɔ.​—2 Mose 2:​15–8:1; Bɔfoi lɛ Asaji 7:​29, 30.

Ani enɛɛmɛi jeee sui diɛŋtsɛ ni he hiaa onukpa koni enyɛ ekwɛ Nyɔŋmɔ webii anɔ ŋmɛnɛ? Hɛɛ, ejaakɛ Paulo kai Timoteo akɛ, “Nuŋtsɔ lɛ tsulɔ lɛ, . . . emli ajɔ aha mɛi fɛɛ, mɔ ni le nitsɔɔmɔ, mɔ ni toɔ etsui shi ehaa efɔŋ, mɔ ni kɛ mlijɔlɛ wieɔ tsɔɔ mɛi ni kuɔ enaa.”​—2 Timoteo 2:​24, 25.

Bei komɛi shɛɔ ni onukpa ko nuɔ he akɛ enijiaŋ eje wui ejaakɛ ewa kɛha lɛ akɛ eeena sui nɛɛ fɛɛ kɛmɔ shi. Kɛlɛ, enijiaŋ akaje wui. Taakɛ eji yɛ Mose gbɛfaŋ lɛ, ekolɛ ebaahe be kakadaŋŋ dani eeenyɛ ena sui ni he hiaa kɛha tookwɛlɔ kpakpa tsɔmɔ lɛ. Shi yɛ be ni sa mli lɛ, abaawo mɔdɛŋbɔɔ yɛ anɔkwayeli mli he nyɔmɔ.​—Okɛto 1 Petro 5:10 he.

Akɛ onukpa lɛ, ekolɛ akɛ bo tsuuu nii babaoo tamɔ mɛi krokomɛi. Ani eeenyɛ eba akɛ taakɛ eba yɛ Mose gbɛfaŋ lɛ, Yehowa miiŋmɛ bo gbɛ koni ona sui komɛi ni he hiaa lɛ babaoo kɛmɔ shi? Kaaha ohiɛ miikpa nɔ akɛ Yehowa ‘jwɛŋɔ ohe.’ Shi esa akɛ wɔha ahi wɔjwɛŋmɔ mli akɛ, ehe miihia ni ‘okɛ heshibaa jwɛŋmɔ aha ohe ni okɛ nakai bulɛ aha mɛi krokomɛi, ejaakɛ Nyɔŋmɔ kuɔ hewolɔi anaa shi heshibalɔi eduroɔ.’ (1 Petro 5:​5-7) Kɛ okɛ ohe ha ni okpɛlɛ tsɔsemɔ ni Yehowa ŋmɛɔ gbɛ lɛ nɔ lɛ, ohe baaba sɛɛnamɔ babaoo aha lɛ, taakɛ Mose ji be ko lɛ.

Yehowa Tooi lɛ Fɛɛ Jara Wa

Biblia bei amli tookwɛlɔi ni yɔɔ suɔmɔ ni anyɛɔ akɛ he fɔɔ amɛnɔ lɛ nuɔ he akɛ too fɛɛ too he gbɛnaa nii ka amɛnɔ. Nakai nɔŋŋ esa akɛ efee anɔkwale yɛ mumɔŋ tookwɛlɔi lɛ ahe. Anaa enɛ faŋŋ yɛ Paulo wiemɔi lɛ amli: ‘Nyɛlea tooiku lɛ fɛɛ nɔkwɛmɔ.’ (Bɔfoi lɛ Asaji 20:28) Namɛi baafata “tooiku lɛ fɛɛ” lɛ ahe?

Yesu kɛ nɔkwɛmɔ nɔ ko ni kɔɔ nuu ko ni yɔɔ tooi oha shi eyatao ekome ni laaje lɛ amrɔ nɔŋŋ koni ekɛ lɛ abafata kuu lɛ he lɛ he ha. (Mateo 18:​12-14; Luka 15:​3-7) Nakai nɔŋŋ esa akɛ nɔkwɛlɔ lɛ asusu asafo lɛ mli bii lɛ ateŋ mɔ fɛɛ mɔ he. Sɔɔmɔ nitsumɔ lɛ ni akɛ he wooo mli loo Kristofoi akpeei ni ayaaa lɛ etsɔɔɔ akɛ too lɛ fataaa tooikuu lɛ he dɔŋŋ. Eka he eji “tooikuu lɛ fɛɛ” ni esa akɛ onukpai lɛ ‘abu amɛhe akɔntaa’ amɛha Yehowa lɛ fa.

Onukpai akuu ko bahao waa akɛni mɛi komɛi ni tsutsu lɛ amɛkɛ amɛhe bɔɔ asafo lɛ he lɛ ekpalaŋ kɛtee sɛɛ ni amɛkɛ amɛhe wooo nɔ ko mli dɔŋŋ lɛ hewɔ. Amɛŋmala aŋkroaŋkroi nɛɛ agbɛi, ni abɔ mɔdɛŋ krɛdɛɛ koni ayasara amɛ ni aye abua amɛ koni amɛku amɛsɛɛ amɛba Yehowa asafoku lɛ mli ekoŋŋ. Kwɛ shi ni nɛkɛ onukpai nɛɛ daa Nyɔŋmɔ, akɛ yɛ nɔ ni fe afii enyɔ kɛ fã mli lɛ, amɛnyɛ amɛye amɛbua mɛi fe 30 ni amɛbafee mɛi ni yɔɔ ekãa yɛ Yehowa sɔɔmɔ mli ekoŋŋ. Mɛi ni aye abua amɛ nɛɛ ateŋ mɔ kome kpa shiɛmɔyaa afii 17 sɔŋŋ!

Ahaa bɔ ni nɛkɛ gbɛnaa nii nɛɛ he hiaa ha lɛ kaa onukpai lɛ ajwɛŋmɔŋ lolo kɛtsɔɔ anɔkwale ni eji ákɛ, “[Nyɔŋmɔ] kɛ lɛ diɛŋtsɛ e-Bi lɛ lá he” tooi lɛ nɔ. (Bɔfoi lɛ Asaji 20:​28, NW) Jara ko bɛ ni baanyɛ afee nɔ ni fa fe nɔ ni awo yɛ tooi ni jara wawai nɛɛ ahe lɛ. Ni susumɔ bei kɛ mɔdɛŋbɔɔi fɛɛ ni akɛwoɔ sɔɔmɔ lɛ mli koni akɛtao ni aye abua mɔ fɛɛ mɔ ni tamɔ too lɛ he okwɛ! Ani esaaa akɛ abɔɔ mɔdɛŋ ni tamɔ nakai nɔŋŋ koni aha amɛ fɛɛ amɛhi Nyɔŋmɔ tooiku lɛ mli? Eka shi faŋŋ akɛ, too fɛɛ too ni yɔɔ asafo lɛ mli lɛ jara wa.

Kɛ tooiku lɛ mli nyo ko kɛ ehe wo nɔ fɔŋ feemɔ ko ni hiɛdɔɔ yɔɔ mli po mli lɛ, onukpai lɛ agbɛnaa nii lɛ tsakeee. Amɛyaa nɔ amɛfeɔ tookwɛlɔi ni susuɔ mɔ he, amɛkɛ mlijɔlɛ bɔɔ mɔdɛŋ ni amɛhere efɔŋ feelɔ lɛ yiwala kɛ aaahi. (Galatabii 6:​1, 2) Dɔlɛ sane lɛ ji akɛ, ebafeɔ faŋŋ yɛ shihilɛi komɛi amli akɛ asafo lɛ mli nyo ko naaa dɔlɛ ni tsɔɔ Nyɔŋmɔ gbeyeishemɔ yɛ eshai ni hiɛdɔɔ yɔɔ mli ni efee lɛ ahe. Belɛ Ŋmalɛ naa gbɛnaa nii bakaa nɔkwɛlɔi ni yɔɔ suɔmɔ lɛ anɔ akɛ amɛbu asafoku lɛ mli bii ni eshwɛ lɛ ahe kɛjɛ hewalɛ ni fiteɔ nii nɛɛ he.​—1 Korintobii 5:​3-7, 11-13.

Fɛɛ sɛɛ lɛ, Yehowa Nyɔŋmɔ toɔ mɔbɔnalɛ ni akpaa mli ahaa too ni elaaje lɛ he nɔkwɛmɔ ni yeɔ emuu efɔɔ shi. Wɔ Tookwɛlɔ musuŋtsɔlɔ lɛ kɛɔ akɛ: “Nɔ ni elaaje lɛ, matao; ni nɔ ni edu gbɛ lɛ, mayakpala lɛ; ni nɔ ni epila lɛ, mafi maha lɛ; helatsɛ lɛ, mawaje lɛ.” (Ezekiel 34:​15, 16; Yeremia 31:10) Yɛ nɔkwɛmɔ nɔ ni nɔ bɛ nɛɛ kasemɔ mli lɛ, ato gbɛjianɔ ko ni suɔmɔ yɔɔ mli aha ŋmɛnɛŋmɛnɛ beaŋ mumɔŋ tookwɛlɔi lɛ koni amɛyasara mɛi ni ashwie amɛ kɛjɛ asafo lɛ mli, ni agbɛnɛ amɛbaakpɛlɛ ni aye abua amɛ lɛ. Nɛkɛ mɔdɛŋbɔi ni mɔbɔnalɛ yɔɔ mli koni nine ashɛ tooi ni elaaje lɛ anɔ ekoŋŋ lɛ ewo yibii kpakpai. Nyɛmi yoo ko ni aku sɛɛ ahe lɛ ekoŋŋ lɛ kɛɛ akɛ: “Onukpai lɛ ni ba miŋɔɔ lɛ ji hewalɛwoo ni he hiaa mi koni maba ekoŋŋ lɛ.”

Ŋwanejee ko bɛ he akɛ Paulo wiemɔi ni ekɛha Efeso onukpai lɛ yɛ Mileto lɛ eyi obɔ kɛ shishinumɔ​—kɛha amɛ kɛ nɔkwɛlɔi ni yɔɔ ŋmɛnɛ lɛ. Tookwɛlɔi ata ni etsi yɛ jɛmɛ lɛ kaiɔ mɔ yɛ sui kpakpai ni esa akɛ eje kpo yɛ nɔkwɛlɔi amli lɛ­​—sui kpakpai tamɔ heshibaa kɛ ekãafeemɔ, ni tookwɛlɔ kɛ maŋtsɛ, David fee he nɔkwɛmɔ nɔ lɛ; gbɛnaa nii kɛ nɔ̃ nɔkwɛmɔ henumɔ ni mɔ aaana diɛŋtsɛ, ni je kpo yɛ Yakob jetsɛremɔ kɛ jenamɔ sɔɔmɔ lɛ mli lɛ; kɛ bɔ ni asumɔɔ ákɛ akɛ tsuishiŋmɛɛ aaakpɛlɛ tsɔsemɔ nɔ lolo, taakɛ Mose jie lɛ kpo lɛ. Yɛ anɔkwale mli lɛ, nɛkɛ Biblia mli nɔkwɛmɔ nii nɛɛ baaye abua asafoŋ onukpai lɛ ni amɛna ni amɛjie sui kpakpai ni he hiaa lɛ akpo koni amɛnyɛ amɛkɛ mlijɔlɛ alɛ “Nyɔŋmɔ asafo lɛ ni ekɛ lɛ diɛŋtsɛ e-Bi lɛ la he lɛ.”