Ani Hiɛnɔkamɔ ko yɛ Kɛhã Gbohii Lɛ?

HETOO NI BIBLIA LƐ KƐHÃA: “Ŋmɛlɛtswaa lɛ miiba, be mli ni mɛi fɛɛ ni yɔɔ gbohii akaimɔ bui lɛ amli lɛ baanu [Yesu gbee] ni amɛbaaje kpo.”​—Yohane 5:28, 29.

Yesu kɛ nakai wiemɔi lɛ tsɔɔ akɛ, wɔsɛɛ yɛ e-Maŋtsɛyeli lɛ mli lɛ, Gbohii Abui amli baakamɔ efolo. Fernando ni atsi etã yɛ klɛŋklɛŋ sane lɛ mli lɛ kɛɛ akɛ: “Be klɛŋklɛŋ ni mikane Yohane 5:28, 29 lɛ, minaa kpɛ mihe waa. Ehã miná hiɛnɔkamɔ diɛŋtsɛ, ni mikɛ miishɛɛ bɔi wɔsɛɛ be gbɛkpamɔ.”

Nuu anɔkwafo Hiob ni hi shi yɛ blema lɛ kpa gbɛ akɛ Nyɔŋmɔ baatee lɛ shi yɛ egbele sɛɛ. Hiob bi akɛ: “Kɛji gbɔmɔ gbo lɛ, ani ehiɛ aaakã ekoŋŋ?” Kɛkɛ ni ekɛ nɔmimaa hã hetoo akɛ: “Kulɛ mitawuu gbii lɛ amli fɛɛ [be ni miyɔɔ Gbonyo Bu lɛ mli] lɛ makwɛ gbɛ kɛyashi beyinɔ ní mitsakemɔ lɛ aaaba! Kulɛ oootsɛ́, ni mahereo nɔ.”​—Hiob 14:14, 15.

Gbohiiashitee lɛ jeee nɔ ko hee kɛhã Lazaro nyɛmi yoo Marta. Be ni Lazaro gbo sɛɛ lɛ, Yesu kɛɛ Marta akɛ: “Onyɛmi nuu lɛ baate shi.” Marta hã hetoo akɛ: “Mile akɛ ebaate shi yɛ gbohiiashitee lɛ mli yɛ naagbee gbi lɛ nɔ.” Yesu kɛɛ lɛ akɛ: “Miji gbohiiashitee lɛ kɛ wala lɛ. Mɔ ni jieɔ hemɔkɛyeli kpo yɛ mimli lɛ, kɛ́ egbo po lɛ, ebaaba wala mli.” (Yohane 11:23-25) Kɛkɛ ni amrɔ nɔŋŋ lɛ, Yesu tee Lazaro shi kɛba wala mli ekoŋŋ! Nakai sane ni yɔɔ miishɛɛ lɛ hãa wɔnaa nibii kpakpai ni baaba wɔsɛɛ. Bo lɛ feemɔ he mfoniri ni aatee gbohii ashi yɛ jeŋ fɛɛ!

HETOO NI BIBLIA LƐ KƐHÃA: Nyɔŋmɔ Wiemɔ lɛ tsɔɔ akɛ, esoro Yesu shitee lɛ yɛ gbohiiashitee kpaanyɔ krokomɛi ni Biblia lɛ bɔ he amaniɛ lɛ he. Atee nakai mɛi lɛ ashi kɛba shikpɔŋ lɛ nɔ. Shi wɔkaneɔ yɛ Yesu shitee lɛ he akɛ: ‘Yesu Kristo tee ŋwɛi, ni eyɛ Nyɔŋmɔ ninejurɔ nɔ.’ (1 Petro 3:21, 22) Ani Yesu baafee mɔ pɛ ni abaatee lɛ shi kɛya ŋwɛi? Mra mli lɛ, Yesu kɛɛ ebɔfoi lɛ akɛ: “Kɛ́ mitee ni miyasaa he ko mito nyɛ lɛ, maba ekoŋŋ ni mabaŋɔ nyɛ kɛya mishĩa, koni he ni miyɔɔ lɛ, nyɛ hu nyɛhi jɛmɛ.”​—Yohane 14:3.

Kristo tee ŋwɛi ni eyasaa he ko eto ekaselɔi lɛ ekomɛi. Mɛi ni abaatee amɛ shi kɛya ŋwɛi lɛ ayibɔ baafee 144,000. (Kpojiemɔ 14:1, 3) Shi mɛni Yesu sɛɛnyiɛlɔi nɛɛ baayafee yɛ ŋwɛi?

Amɛbaatsu nii waa! Ŋmalɛ lɛ kɛɔ akɛ: “Mɔ fɛɛ mɔ ní náa gbɛfaŋnɔ yɛ klɛŋklɛŋ gbohiiashitee lɛ mli lɛ yɛ miishɛɛ ni eyɛ krɔŋkrɔŋ; gbele ni ji enyɔ lɛ bɛ hewalɛ ko yɛ nɛkɛ mɛi nɛɛ anɔ, shi moŋ, amɛbaatsɔmɔ Nyɔŋmɔ osɔfoi kɛ Kristo lɛ osɔfoi, ni amɛkɛ lɛ baaye nɔ akɛ maŋtsɛmɛi afii akpe lɛ fɛɛ.” (Kpojiemɔ 20:6) Hɛɛ, mɛi ni abaatee amɛ shi kɛya ŋwɛi lɛ kɛ Kristo baaye shikpɔŋ lɛ nɔ akɛ maŋtsɛmɛi kɛ osɔfoi.

HETOO NI BIBLIA LƐ KƐHÃA: Ŋmalɛi ni ajɛ mumɔŋ aŋma lɛ bɔ sane ko ni bɔfo Paulo wie lɛ he amaniɛ akɛ: “Ni miyɛ hiɛnɔkamɔ yɛ Nyɔŋmɔ mli, hiɛnɔkamɔ ni mɛnɛɛmɛi hu kwɛɔ gbɛ lɛ, akɛ abaatee jalɔi kɛ mɛi ni ejaaa fɛɛ shi.”​—Bɔfoi 24:15.

Namɛi ji mɛi ni Paulo tsɛ amɛ “jalɔi” lɛ? Susumɔ nɔkwɛmɔnɔ ko he. Be ni eshwɛ fioo ni nuu anɔkwafo Daniel baagbo lɛ, akɛɛ lɛ akɛ: “Yaa kɛyashi naagbee lɛ aaashɛ, ni ooojɔɔ ohe, ni ooote shi oyaná ogbɛfaŋnɔ yɛ gbii lɛ anaagbee lɛ mli.” (Daniel 12:13) Nɛgbɛ Daniel baate shi kɛjɛ gbele ni tamɔ wɔ lɛ mli yɛ? Biblia lɛ kɛɔ akɛ: “Jalɔi lɛ, shikpɔŋ lɛ aaatsɔ amɛnɔ̃ ni amɛaahi nɔ daa.” (Lala 37:29) Ni Yesu gba akɛ: “Ajɔɔ mɛi ni he jɔ lɛ; shi amɛaaye shikpɔŋ lɛ nɔ.” (Mateo 5:5) Abaatee Daniel kɛ hii kɛ yei anɔkwafoi krokomɛi shi kɛba shikpɔŋ lɛ nɔ ekoŋŋ, ni amɛbaahi shi kɛya naanɔ.

Namɛi ji mɛi ni Paulo tsɛ amɛ “mɛi ni ejaaa” lɛ? Amɛji mɛi akpekpe toi akpei abɔ ni gboi ni amɛnáaa hegbɛ kɛkase Biblia mli anɔkwalei bɔ ni afee ni amɛkɛtsu nii yɛ amɛshihilɛ mli lɛ. Kɛ́ atee amɛ shi lɛ, amɛbaaná hegbɛ amɛle Yehowaa kɛ Yesu, ni amɛjie hiɛsɔɔ kpo yɛ nibii ni amɛfee amɛhã amɛ lɛ he. (Yohane 17:3) Bei abɔ ni Yehowa hiɛ kã nɛɛ lɛ, mɛi fɛɛ ni sɔmɔɔ lɛ lɛ baaná hegbɛ lɛ akɛ amɛbaahi shi kɛya naanɔ.

HETOO NI BIBLIA LƐ KƐHÃA: Nyɔŋmɔ “baatsumɔ amɛhiŋmɛiiaŋ yaafonui fɛɛ, ni gbele bɛ dɔŋŋ, asaŋ awerɛhoyeli ko loo yarawoo ko loo hejaramɔ ko hu bɛ dɔŋŋ.” (Kpojiemɔ 21:4) “Amɛaamamɔ tsũi, ni amɛaahi mli, ni amɛaafee weintromi, ni amɛaaye mli yibii!”​—Yesaia 65:21.

Bo lɛ feemɔ he mfoniri ni okɛ osuɔlɔi ni atee amɛ shi lɛ yɛ shihilɛ ni tamɔ nakai mli! Shi sanebimɔ lɛ ji, Te wɔɔfee tɛŋŋ wɔná nɔmimaa akɛ gbohiiashitee lɛ baaba lɛɛlɛŋ lɛ?