Aristarko—Naanyo Anɔkwafo
ARISTARKO fata bɔfo Paulo nanemɛi nitsulɔi babaoo ni ekɛ ehe fɔɔ amɛnɔ lɛ ahe. Mɛni baa ojwɛŋmɔ mli kɛ onu egbɛi lɛ? Ani nɔ ko baa ojwɛŋmɔ mli? Ani obaanyɛ otsɔɔ nɔ ni etsu yɛ mra be mli Kristofoi lɛ ayinɔsane mli? Eyɛ mli akɛ ekolɛ Aristarko jeee Biblia mli gbɔmɛi ni wɔle waa lɛ ateŋ mɔ ko moŋ, shi kɛlɛ saji kukuji ni agba yɛ Kristofoi a-Hela Ŋmalɛi lɛ amli lɛ ekomɛi kɔɔ ehe.
No hewɔ lɛ, namɔ ji Aristarko? Mɛɛ wekukpaa kã ekɛ Paulo teŋ? Mɛni hewɔ abaanyɛ akɛɛ akɛ Aristarko ji naanyo anɔkwafo lɛ? Ni mɛni wɔbaanyɛ wɔkase kɛjɛ enɔkwɛmɔnɔ lɛ ni wɔɔpɛi mli lɛ mli?
Shihilɛ ni sa kadimɔ ni Aristarko kɛbaje saji ni yɔɔ Bɔfoi lɛ Asaji awolo lɛ mli lɛ mli lɛ ba yɛ asafo ko ni miifee basabasa ni amɛyiŋ efutu amɛ kɛ bolɔmɔ lɛ ateŋ yɛ Efeso maŋ lɛ mli. (Bɔfoi lɛ Asaji 19:23-41) Artemi apasa nyɔŋmɔ lɛ gbatsui ni akɛ jwiɛtɛi feɔ lɛ ji nitsumɔ ko ni shika yɔɔ mli waa kɛha Demetrio kɛ jwiɛtɛi ŋaalɔi krokomɛi ni yɔɔ Efeso lɛ. Enɛ hewɔ lɛ, beni shiɛmɔ ni Paulo shiɛ yɛ maŋ nɛɛ mli lɛ ha mɛi babaoo kwa nyɔŋmɔyoo nɛɛ jamɔ ni he tseee lɛ, Demetrio hɛle ŋaalɔi krokomɛi lɛ ashi. Ekɛɛ amɛ akɛ, jeee akɛ Paulo shiɛmɔ lɛ haŋ amɛná nii pɛ kɛkɛ, shi moŋ ehaŋ akɛ Artemi jamɔ lɛ afee nɔ ko dɔŋŋ.
Akɛni asafo ni egri lɛ enaaa Paulo hewɔ lɛ, amɛkɛ hewalɛ gbala Aristarko kɛ Gaio ni ji enanemɛi lɛ kɛtee nikwɛmɔhe lɛ. Akɛni mɛi enyɔ lɛ yɛ oshara mli waa hewɔ lɛ, Paulo nanemɛi lɛ kpa lɛ fai akɛ, “ekakwɛ ni ekɛɛ eeeya nikwɛmɔhe lɛ.”
Kwɛmɔ ni oyɛ shihilɛ ni tamɔ nɛkɛ mli. Asafo ni miifee basabasa lɛ kɛ aaafee ŋmɛlɛtswai enyɔ miibolɔ akɛ, “Efesobii Artemi lɛ kekenam ni!” Amɛhe ni amɛnaa yɛ mɛi pii ni amɛje ekãa babaoo lɛ ahewalɛ shishi ni amɛnyɛɛɛ amɛwie kɛfã amɛhe po lɛ tsɔɔ akɛ eji shihilɛ ni yɔɔ gbeyei waa kɛha Aristarko kɛ Gaio. Amɛbaasusu enɛ mli ni amɛbaaje shweshweeshwe lɛ he. Miishɛɛ sane ji akɛ, amɛfee nakai. Lɛɛlɛŋ, bɔ ni Luka saji lɛ yɔɔ faŋŋ ha lɛ haa woloŋlelɔi komɛi susuɔ akɛ enine shɛ saji lɛ anɔ kɛjɛ mɔ ko ni na nɔ ni tee nɔ lɛ odaseyeli mli, ekolɛ Aristarko kɛ Gaio diɛŋtsɛ dɛŋ.
Yɛ naagbee lɛ, maŋ woloŋmalɔ lɛ kpãtã hoofeemɔ lɛ. Ekolɛ Aristarko kɛ Gaio he baajɔ amɛ waa beni amɛnu ni ekɛ sane he susumɔ kɛɛ akɛ amɛyeɔ bem, ní amɛna akɛ basabasafeemɔ ni ebɔle amɛhe kɛkpe lɛ naa eba shi lɛ.
Kɛ oná niiashikpamɔ ni tamɔ enɛ lɛ, te obaanu he oha tɛŋŋ? Ani obaamu sane naa akɛ esaaa akɛ ahalaa akɛ aaafee Paulo naanyo ni kɛ lɛ shiɛɔ yɛ maŋsɛɛ, ni eyɛ oshara tsɔ̃, ni akɛ ebaahi akɛ oootao shihilɛ ni hejɔlɛ yɔɔ mli moŋ? Aristarko susuuu he nakai! Akɛni ejɛ Tesalonika hewɔ lɛ, etamɔ nɔ ni ele osharai ni yɔɔ sanekpakpa lɛ jajemɔ mli lɛ jogbaŋŋ momo. Nakai nɔŋŋ basabasafeemɔ te shi beni Paulo shiɛ yɛ emaŋ lɛ mli yɛ afii komɛi ni eho lɛ mli lɛ. (Bɔfoi lɛ Asaji 17:1-9; 20:4) Aristarko kpɛtɛ Paulo he yɛ anɔkwayeli mli.
Kɛjɛ Hela Kɛtee Yerusalem
Beni jwiɛtɛi ŋaalɔi lɛ efee basabasa lɛ sɛɛ nyɔji komɛi lɛ, Paulo yɛ Hela ni ebaafã gbɛ kɛya Siria koni etsa nɔ kɛya Yerusalem nɔŋŋ ni ‘Yudafoi lɛ wo lɛ ká.’ (Bɔfoi lɛ Asaji 20:2, 3) Namɔ wɔnaa ni efata Paulo he yɛ shihilɛi ni oshara yɔɔ mli nɛɛ mli? Aristarko!
Nɛkɛ hegbeyeiwoo hee nɛɛ ha Paulo, Aristarko, kɛ amɛnanemɛi lɛ tsake amɛ gbɛjianɔtoi, klɛŋklɛŋ lɛ, amɛfã gbɛ kɛtsɔ Makedonia, ni amɛfã gbɛ kpitiokpitio yɛ Asia Bibioo lɛ ŋshɔnaagbɛ dani yɛ naagbee lɛ amɛbote lɛlɛ mli kɛtee Foinike yɛ Patara. (Bɔfoi lɛ Asaji 20:4, 5, 13-15; 21:1-3) Yɛ anɔkwale mli lɛ, yiŋtoo ni akɛfãa gbɛ lɛ ji koni akɛ onia ni Kristofoi ni yɔɔ Makedonia kɛ Akaia etsu lɛ ayaha amɛnyɛmimɛi ni ehia amɛ ni yɔɔ Yerusalem lɛ. (Bɔfoi lɛ Asaji 24:17; Romabii 15:25, 26) Gbɔmɛi pii fata he kɛfã gbɛ lɛ kutuu, ekolɛ akɛni asafoi sɔrɔtoi lɛ etu gbɛnaa nii nɛɛ amɛwo amɛdɛŋ lɛ hewɔ. Ŋwanejee ko bɛ he akɛ gbɔmɛi babaoo ni tamɔ nɛkɛ hu baaha nibii afee shweshweeshwe diɛŋtsɛ.
Aristarko na hegbɛ kpele akɛ eeefata Paulo he kɛjɛ Hela kɛya Yerusalem. Shi, amɛgbɛfaa ni nyiɛ sɛɛ lɛ kɛ amɛ baajɛ Yudea kɛya Roma tɔ̃ɔ.
Gbɛfãa Kɛmiiya Roma Lɛ
Shihilɛi lɛ yɛ sɔrɔto kwraa yɛ nɛkɛ be nɛɛ mli. Akɛ afii enyɔ ewo Paulo tsuŋ yɛ Kaisarea, ni ekɛ esane lɛ eha Kaisare yeli, ni esa akɛ akɛ lɛ aya Roma yɛ kɔsɔŋkɔsɔi amli. (Bɔfoi lɛ Asaji 24:27; 25:11, 12) Bɔɔ mɔdɛŋ ni osusu bɔ ni Paulo nanemɛi lɛ nu he amɛha lɛ he okwɛ. Gbɛfaa kɛjɛ Kaisarea kɛmiiya Roma lɛ baafee nɔ ni jɛkɛ kɛ henumɔŋ nɔnyɛɛ, ni aleee nɔ ni baajɛ mli aba. Namɔ baafata ehe kɛya koni efi esɛɛ ni eye ebua lɛ? Ahala hii enyɔ loo amɛ diɛŋtsɛ amɛkɛ amɛhe hã. Amɛji Aristarko kɛ Luka, mɔ ni ŋmala Bɔfoi lɛ Asaji lɛ.—Bɔfoi lɛ Asaji 27:1, 2.
Te fee tɛŋŋ ni Luka kɛ Aristarko nyɛ amɛbote lɛlɛ kome too lɛ nɔŋŋ mli yɛ klɛŋklɛŋ gbɛfãa lɛ mli kɛtee Roma lɛ? Yinɔsaneŋmalɔ Giuseppe Ricciotti susu akɛ: “Mɛi enyɔ nɛɛ bote lɛlɛ lɛ mli akɛ gbɛfalɔi ni hiɛ amɛhe . . . aloo, etamɔ nɔ ni asraafoi-ohaiatsɛ ni kwa efee amɛ tamɔ Paulo nyɔji lɛ jɛ mlihilɛ mli eha amɛbote mli, akɛni mla lɛ ŋmɛɔ gbɛ koni akɛ nyɔji komɛi afata Roma maŋnyo he lɛ hewɔ.” Kwɛ bɔ ni jɛmɛ ni amɛyɔɔ lɛ baaha Paulo tsui anyɔ emli ni ewo lɛ hewalɛ aha!
Luka kɛ Aristarko tsɔɔ bɔ ni amɛsumɔɔ Paulo amɛha kɛtsɔ shika ni amɛfite kɛ oshara mli ni amɛkɛ amɛhe wo lɛ nɔ. Yɛ anɔkwale mli lɛ, amɛkɛ shihilɛ ko ni wo amɛ wala he gbeyei kpe beni amɛkɛ amɛnaanyo gbokɛlɛfonyo lɛ kɛ lɛlɛ lɛ yasha shi yɛ Malta ŋshɔkpɔ lɛ nɔ lɛ.—Bɔfoi lɛ Asaji 27:13–28:1.
Paulo ‘Naanyo Gbokɛlɛfonyo’
Beni Paulo ŋma ewoji lɛ ekɛyaha Kolosebii lɛ kɛ Filemon yɛ afi 60-61 Ŋ.B. lɛ, no mli lɛ Aristarko kɛ Luka fata ehe lolo yɛ Roma. Atsɛɔ Aristarko kɛ Epafra akɛ Paulo ‘nanemɛi gbokɛlɛfoi.’ (Kolosebii 4:10, 14; Filemon 23, 24) Eyɛ faŋŋ akɛ, Aristarko kɛ Paulo hi gbokɛlɛfoi atsuŋ kɛyashi be ko.
Eyɛ mli akɛ kɛ hoo lɛ Paulo hi shi akɛ gbokɛlɛfonyo yɛ Roma afii enyɔ moŋ, shi aŋmɛ gbɛ ni ehi shia ni ehai ni asraafoi buɔ ehe lɛ mli, he ni ebaanyɛ ejaje sanekpakpa lɛ etsɔɔ saralɔi yɛ lɛ. (Bɔfoi lɛ Asaji 28:16, 30) No hewɔ lɛ, Aristarko, Epafra, Luka kɛ mɛi krokomɛi sɔmɔ Paulo, ni amɛye amɛbua lɛ ni amɛwaje lɛ.
“Tsuiwoo” Nɔ̃ Ko
Yɛ be mli ni wɔsusu saji sɔrɔtoi ni Aristarko pueɔ yɛ mli ni yɔɔ Biblia ni jɛ mumɔŋ lɛ he lɛ sɛɛ lɛ, mɛɛ nuu nɛkɛ obaakɛɛ akɛ Aristarko ji? Taakɛ niŋmalɔ W. D. Thomas tsɔɔ lɛ, Aristarko “ji nuu ni yɔɔ sɔrɔto ni nyɛɔ ekpeɔ shitee-kɛ-woo naa, ni ekɛ hemɔkɛyeli ni yɔɔ shiŋŋ, kɛ faishitswaa akɛ ebaasɔmɔ ni ekpaaa lɛ jeɔ mli. Eji nuu ni sumɔɔ Nyɔŋmɔ, jeee yɛ gbii kpakpai pɛ mli beni jeŋ etse, shi moŋ yɛ ahorabɔɔ kɛ basabasafeemɔ mli hu.”
Paulo kɛɔ akɛ Aristarko kɛ mɛi krokomɛi lɛ ji “tsuiwoo” (Hela, pa·re·go·riʹa) nɔ̃ kɛha lɛ, no ji akɛ amɛshɛjeɔ emii. (Kolosebii 4:10, 11) No hewɔ lɛ, kɛtsɔ Paulo mii ni eshɛjeɔ kɛ etsuiwoo nɔ lɛ, Aristarko ji naanyo diɛŋtsɛ yɛ hiamɔ bei amli. Afii babaoo ni ekɛfata bɔfo lɛ he, ni ekɛ lɛ fee naanyo lɛ baafee niiashikpamɔ ni haa mɔ tsui nyɔɔ emli kɛ nɔ ni woɔ mɔ mumɔŋ shidaamɔ mli hewalɛ waa.
Ekolɛ, wɔnaŋ wɔhe yɛ shihilɛi ni tamɔ Aristarko nɔ̃ lɛ mli. Shi kɛlɛ, anɔkwayeli ni tamɔ nakai kɛha Kristo mumɔŋ nyɛmimɛi lɛ kɛ Yehowa gbɛjianɔtoo lɛ he miihia mɛi fɛɛ ni yɔɔ Kristofoi asafo lɛ mli lɛ ŋmɛnɛ. (Okɛto Mateo 25:34-40 he.) Eeenyɛ eba akɛ etsɛŋ ni nanemɛi jálɔi ni wɔle amɛ lɛ baana nɔ̃ aloo amɛbaaba nɔnyɛɛ shishi, ekolɛ yɛ awerɛhoyeli, hela, loo kaai krokomɛi ahewɔ. Kɛtsɔ amɛhe ni wɔɔkpɛtɛ ni wɔye wɔbua amɛ, ni wɔshɛje amɛmii, ni wɔwo amɛ hewalɛ lɛ nɔ lɛ, wɔbaanyɛ wɔna miishɛɛ, ni wɔtsɔɔ akɛ wɔji nanemɛi anɔkwafoi.—Okɛto Abɛi 17:17; Bɔfoi lɛ Asaji 20:35 he.