Yehowa Wiemɔ Lɛ Jajemɔ Kɛ Ekaa
Ni agbɛnɛ hu, Nuntsɔ [Yehowa], kwɛmɔ . . . ni oha otsuji lɛ kɛ ekaa pii ajaje owiemɔ lɛ.—Bɔf. 4:29
1, 2. (a) Yɛ Kristo shitee sɛɛ lɛ, mɛni he esusu yɛ ekaselɔi lɛ ahewɔ; ni nohewɔ lɛ mɛɛ kitãi ewo amɛ? (b) Nɛgbɛ abaaye odase lɛ kɛyashɛ?
1 GBELE eha Yesu kɛ ekaselɔi ateŋ egbala moŋ, shi amɛhiɛ kpaaa nine ni efɔ̃ amɛ akɛ amɛbatsɔmɔ “gbɔmɛi ahe wolɛi” lɛ nɔ. Amɛle akɛ no biɔ ni amɛshiɛ Nyɔŋmɔ wiemɔ yɛ mɛi lɛ ateŋ. Shi te amɛ aaafee tɛɛŋ amɛtsu enɛ? Ebi kudɔmɔ kɛ gbɛtsɔɔmɔ.
2 Yesu ni ateelɛ shi lɛ jie ohe kpo etsɔɔɔ ekaselɔi lɛ shii abɔ dani ekwɔ kɛtee e-Tsɛ ŋɔɔ, ni enɛ ha kaselɔi lɛ na miishɛɛ naakpa. (1 Kor. 15:3-8; Yoh. 20:20) Kɛtsɔ nɛkɛ gbɛ nɔ lɛ, enyɛ́ ewo amɛ ŋaa lolo yɛ nii ni amɛbaatsu wɔsɛɛ lɛ he. Ekɛɛ yɛ Galilea akɛ:
“Aŋɔ hegbɛ fɛɛ aha mi yɛ ŋwɛi kɛ shikpɔŋ nɔ. Nohewɔ lɛ nyɛyaa ni nyɛyafea jeŋmaji fɛɛ mikaselɔi, nyɛbaptisia amɛ nyɛwoa Tsɛ lɛ kɛ Bi lɛ kɛ mumɔ krɔŋkrɔŋ lɛ gbɛi amli, ni nyɛtsɔɔa amɛ ni amɛye nii fiaa ni mikɛɛ nyɛ lɛ nɔ. Ni naa, mi lɛ mikɛ nyɛ yɛ daa kɛyashi jeŋ naagbee lɛ.” (Mat. 28:18-20)
Esani Kristofoi anitsumɔ ni ji kaselɔi afeemɔ kɛ amɛbaptisimɔ kɛ amɛnitsɔɔmɔ lɛ akpe le jeŋmaji lɛ amlibii fɛɛ. Kwɛ bɔni ewoɔ ekaa waa ehaa akɛ aaale akɛ Nyɔŋmɔ Bi ni ateelɛ shi lɛ kɛ Kristofoi aaahi shi yɛ amɛmaŋtsɛyeli nitsumɔ lɛ mli daa kɛyaashi nibii agbɛjianɔtoo lɛ naagbee tɔ̃ɔ!
3. Kɛjɛ Pentekoste kɛyaa lɛ mɛni mumɔ krɔŋkrɔŋ tsu yɛ enɛ mli?
3 Yesu ewo ekaselɔi lɛ ashi akɛ walɔ ni ji mumɔ krɔŋkrɔŋ lɛ baaba. (Yoh. 14:16, 26) Mɛni enɛ aaaji ni mɛɛ gbɛ nɔ eeetsu nii yɛ? Beni eshwɛ fioo ebaakwɔ kɛya e-Tsɛ ŋɔɔ lɛ, Yesu kɛɛ ekaselɔi lɛ akɛ:
“Kɛ́ mumɔ krɔŋkrɔŋ Iɛ ná ba nyɛnɔ lɛ, nyɛ aaana hewalɛ ni nyɛ aaatsɔmɔ midasefoi yɛ Yerusalem kɛ Yudea kɛ Samaria fɛɛ, kɛyashi shikpɔŋ lɛ naagbeehei lɛ.” (Bɔf. 1:8)
Mɛɛ hegbɛ kpele po nɛ kɛha odaseyeli ni shɛɔ shɔŋŋ? Kaselɔi lɛ ku amɛsɛɛ kɛba Yerusalem ni amɛbahiɛ sɔlemɔ mli yɛ jɛi. Yesu shitee lɛ sɛɛ gbi ni ji 50 nɔ lɛ, Pentekoste gbi lɛ ni, ni kaselɔi lɛ fɛɛ bua amɛhe naa yɛ hekome. Trukaa lɛ anu gbɛɛmɔ ko “tamɔ ahum ni tswaa waa,” kɛ naakpɛɛ okadii krokomɛi. Yehowa miifɔse mumɔ krɔŋkrɔŋ ni awo shi yɛ he ni ji ehewalɛ ni tsuɔ nii lɛ, eeshwie mɛi anɔ. Ni mɛni nakai mumɔ lɛ tsirɛ amɛ ni amɛfee? Eha “amɛbɔi wiemɔi . . . awiemɔ.”—Bɔf. 2:1-4.
4. Te ahere “sanekpakpa” lɛ aha tɛɛŋ nakai gbi lɛ?
4 Be eshɛ ni sa akɛ ‘ahɛ gbɔmɛi’ babaoo. Yɛ mumɔ krɔŋkrɔŋ lɛ yelikɛbuamɔ naa lɛ, nakai kaselɔi lɛ baanyɛ amɛwie Nyɔŋmɔ wiemɔ lɛ yɛ wiemɔi sɔrɔtoi babaoo amli agbɛnɛ. Yɛ nɛkɛ gbɛ nɔ lɛ, mɛi ni jɛ je lɛ hei sɔrɔtoi kɛba Pentekoste gbijurɔ lɛ yeli lɛ nyɛ́ amɛnu “Nyɔŋmɔ niwuji” lɛ ahe shiɛmɔ yɛ amɛdiɛŋtsɛ amɛmaji lɛ anɔ wiemɔi amli. Mɛi ni na nɔni yaa nɔ lɛ ahe jɔ̃ amɛhe. Kɛkɛ ni Petro te shi edamɔ shi ni ekɛ ekaa tsɔɔ nɔni yaa nɔ lɛ shishi. Eye Yesu Kristo shitee lɛ he odase kɛwula shi, ni etsirɛ mɛi ni yɔɔ jɛi lɛ akɛ amɛtsake amɛtsui koni abaptisi amɛ ni ahere amɛyiwala kɛjɛ nakai yinɔ kɔɔdɔŋ lɛ mli. Mɛni jɛ enɛ mli ba? Mɛi aaafee 3,000 kpɛlɛ wiemɔ lɛ nɔ. Abaptisi mɛnɛɛmɛi ni akɛ amɛ fata Kristofoi asafo lɛ he. Aná miishɛɛ babaoo ejaakɛ Yehowa “ŋɔɔ mɛi ni ahere amɛyiwala lɛ efataa asafo lɛ he gbi fɛɛ gbi.”—Bɔf. 2:5-47.
5. (a) Mɛɛ yiŋtoo hewɔ ebaalɛ akɛ Kristofoi yajeɔ lumɛi ahiɛ yɛ bei amli ni aate shi aawo amɛ lɛ? (b) Mɛɛ hewalɛwoo yɔɔ enɛ mli kɛha wɔ?
5 Nɛkɛ odase ni atsɔ mumɔ krɔŋkrɔŋ hewalɛ nɔ aye nɛɛ eha ana Yehowa yijielɔi heei. Mɛnɛɛmɛi hu na miishɛɛ akɛ amɛ aaaya ni amɛyaye odase daagbi, ni no ha “sanekpakpa” lɛ yí Yerusalem fɛɛ tɔ. Petro kɛ Yohane nyiɛ nitsumɔ nɛɛ hiɛ, ni amɛtsirɛ mɛi lɛ akɛ amɛkpala ni amɛtsake amɛtsui koni agbe amɛhe eshai lɛ beni afee ni amɛna mumɔŋ tsuiwoo kɛjɛ Yehowa dɛŋ. Mɛnɛɛmɛi ateaŋ mɛi babaoo kɛ miishɛɛ bo “sanekpakpa” lɛ toi—shi osɔfonukpa Iɛ, sɔlemɔwe lɛ asafoiatsɛ lɛ kɛ Sadukifoi lɛ efeee nakai. Amɛmɔ Petro kɛ Yohane ni amɛkɛ amɛ wo tsuŋ. Kɛtsa nɛkɛ gbɛ nɔ lɛ kaselɔi lɛ bɔi hetsɛ ni Yesu bɔ amɛ kɔkɔ yɛ he eto lɛ he numɔ, ejaakɛ ekɛɛ:
“Naa, miitsu nyɛ tamɔ toogwantɛŋi yɛ klaji ateŋ; nohewɔ lɛ nyɛhiɛ atɛ̃a tamɔ onufui, ni nyɛfea kpoo tamɔ okpoi. Shi nyɛhiɛ ahia nyɛhe nɔ yɛ gbɔmɛi ahewɔ: ejaakɛ amɛ aaaŋɔ nyɛ kɛaatee gwabɔi amli, ni amɛ aaayi nyɛ yɛ amɛkpeehei lɛ; ni lumɛi kɛ maŋtsɛmɛi ahiɛ tete po akɛ nyɛ aaatee yɛ mihewɔ, koni aŋɔye amɛ kɛ jeŋmaji lɛ odase. Shi kɛ́ amɛŋɔ nyɛ kɛtee lɛ, nyɛkahaoa nyɛhe yɛ bɔni aloo nɔni nyɛ aaakɛɛ hewɔ; shi aaaŋɔ nɔni nyɛ aaawie aha nyɛ yɛ nakai ŋmlɛtswaa lɛ mli nɔŋŋ. Ejaakɛ jeee nyɛ ji mɛi ni wieɔ lɛ, shi moŋ nyɛ-Tsɛ lɛ mumɔ lɛ wieɔ yɛ nyɛmli.” (Mat. 10:16-20)
Shi heni ashɛ nɛɛ, nakai “gbɔmɛi ahe wolɛi” lɛ baanyɛ amɛnya ejaakɛ amɛhɛ̀ heyelilɔi heei aaafee 5,000 sɔŋŋ. Benɛ ayakwɛ bɔni amɛda Yehowa shi amɛha kɛha nakai nɔyaa lɛ! Amaniɛ ni abɔ yɛ amɛsɔɔmɔ lɛ he lɛ woɔ wɔ hu ekaa.—Bɔf. 4:1-4.
WIEMƆ YƐ LUMƐI AHIƐ
6. (a) Mɛni Petro kɛ Yohane fee beni akɛ amɛ ba lumɛi lɛ ahiɛ lɛ? (b) Meni hewɔ amɛji mɛi ni sa kɛha no tsumɔ lɛ?
6 Enɔ jetsɛremɔ lɛ, lumɛi lɛ bua amɛhe naa ni amɛbi Petro kɛ Yohane sane yɛ amɛnitsumɔ kɛ nuu obubuafo ko ni amɛtsalɛ lɛ ahe. Naa hegbɛ kpakpa ko ni akɛbaaye odase lolo yɛ mɛi ahiɛ. Taakɛ Yesu etsɔɔ momo akɛ ebaaba lɛ, mumɔ krɔŋkrɔŋ lɛ wo Petro hewalɛ agbɛnɛ, ni ekɛɛɛ:
“Nyɛ maŋ lɛ mli lumɛi kɛ Israel onukpai! Kɛji akɛ wɔ miiye sane ŋmɛnɛgbi nɛɛ yɛ ejurɔ ni afee nɛkɛ helatsɛ nɛɛ hewɔ akɛ namɔ nɔ atsɔ atsalɛ lɛ, no lɛ nyɛ fɛɛ kɛ Israel maŋ muu lɛ fɛɛ ana ale akɛ, Yesu Kristo, Nazarenyo lɛ, ni nyɛsɛŋ, ni Nyɔŋmɔ teelɛ shi kɛjɛ gbohii ateŋ lɛ, lɛ nɔŋŋ egbɛi amli mɔnɛ damɔ nyɛhiɛ ni ehe etã nɛɛ. Lɛ nɔŋŋ ji tɛ lɛ ni nyɛ ni nyɛji tsutswalɔi lɛ gbe ehe guɔ, ni ebatsɔ koŋtɛ nɛɛ. Ejaakɛ yiwalaheremɔ bɛ mɔkomɔko mli; ni asaŋ gbɛi kroko hu bɛ ŋwɛi shishi ni aŋɔha gbɔmɛi ni sa akɛ atsɔ nɔ ahere wɔyiwala.” (Bɔf. 4:8-12)
Esa akɛ ashiɛ nɛkɛ anɔkwalei ni he hiaa nɛɛ. Nohewɔ lɛ bɔfoi lɛ wie kɛ ekaa. Amɛshasooo shi kwraa. Wolɛmɛi kɛkɛ ji Petro kɛ Yohane, shi Yesu etsɔɔ amɛ bɔni amɛ aaafee amɛwie yɛ hewalɛ gbɛ ko ni kanyaa mɔ nɔ, kɛ hekɛnɔfɔɔ kɛ nɔmimaa. Amɛ, akɛ Yehowa Odasefoi lɛ, amɛwie, ejaakɛ amɛmiisumɔ akɛ amɛshiɛ Nyɔŋmɔ wiemɔ lɛ.—Kɛto Yohane 7:15-18, 45 kɛ 46 he okwɛ.
7. Mɛni wɔleɔ kɛjɛɔ Bɔfoi Asaji yitso 4 yɛ shiteekɛwolɔi lɛ ajwɛŋmɔ kɛ yiŋtoi ahe?
7 Esa akɛ wɔda Yehowa shi lɛɛlɛŋ akɛ aŋma nɔni yɔɔ Bɔfoi Asaji yitso 4 lɛ afɔ̃ shi! Ejaakɛ no tsɔɔ faŋŋ bɔni esa akɛ Kristofoi kpakpai lɛ wieɔ kɛ ekaa amɛhaa, dani agbɛnɛ ehaa anaa jwɛŋmɔ kɔɔdɔŋ ni je lɛ mli lumɛi ni teɔ shi amɛwoɔ Nyɔŋmɔ nitsumɔ lɛ hiɛ. Beni bɔfoi lɛ eye nakai odase ni ekaa yɔɔ mli lɛ sɛɛ lɛ, lumɛi lɛ ha amɛje amɛhiɛ yɛ Akuashɔŋ asa lɛ nɔ amɛtee ni lumɛi lɛ tee ajina yɛ amɛteŋ. Mɛni ji yiŋtoo ni amɛhiɛ lɛ? Amɛnyɛɛɛ amɛje ŋwane akɛ afeko naakpɛɛnɔ ko yɛ Yesu Kristo gbɛi amli. Shi amɛjwɛŋmɔ ji amɛbaatsĩ anɔkwa jamɔ naa koni ekagbɛ eshwã. Amɛsusu akɛ amɛbaanyɛ amɛwo bɔfoi lɛ ahe gbeyei kɛtsɔ hegbeyeiwoi anɔ koni no aha amɛfɔ̃ɔ shiɛmɔ yɛ Yesu gbɛi amli.—Bɔf. 4:16, 17.
8. Mɛni tsɔɔ akɛ kaselɔi lɛ sheee gbeyei?
8 Shi ani hegbeyeiwoi kɛkɛ baaha Yehowa Odasefoi Kristofoi nɛɛ afɔ̃ɔ nɔni amɛtsuɔ lɛ? Anɔkwa Kristofoi ni yɔɔ ŋmɛnɛ lɛ akase amɛnɔkwɛmɔnɔ ni gbeyeishemɔ bɛ mli lɛ:
Ni [lumɛi lɛ tsɛ́] amɛ kɛba, ni amɛwo amɛ kitã akɛ amɛkatsĩ tã ni amɛkatsɔɔ nii yɛ Yesu gbɛi amli kwraa dɔŋŋ. Shi Petro kɛ Yohane here nɔ ni amɛkɛɛ amɛ akɛ: Kɛ́ eja gbɛ yɛ Nyɔŋmɔ hiɛ akɛ abo nyɛ moŋ toi fe Nyɔŋmɔ lɛ, nyɛkojoa. Ejaakɛ wɔ lɛ wɔnyɛŋ akɛ ja wɔwie nii ni wɔna kɛ nii ni wɔnu lɛ.” (Bɔf. 4:18-20)
Akɛni lumɛi lɛ she nɔni maŋbii lɛ aaafee lɛ gbeyei hewɔ lɛ, amɛŋmɛɛ bɔfoi lɛ ahe beni amɛwo amɛhe gbeyei sɛɛ. Yɛ Nyɔŋmɔ mumɔ lɛ yelikɛbuamɔ naa lɛ, nakai Kristofoi lɛ eye yiwaa lɛ nɔ kunim.
YEHOWA TEE NƆ EYE EBUA AMƐ
9, 10. (a) Mɛɛ gbɛ nɔ Yehowa tsuji lɛ fee amɛnii yɛ; ni mɛni amɛshwɛ yɛ amɛtsuiiaŋ akɛ amɛ aaafee? (b) Mɛni amɛsɔle amɛbi; ni mɛɛ gbɛ nɔ aha hetoo yɛ?
9 Beni aŋmɛɛ bɔfoi lɛ ahe lɛ, amɛku amɛsɛɛ kɛtee asafo lɛ ŋɔɔ. Amɛyabɔ nɔni eba lɛ he amaniɛ amɛtsɔɔ nyɛmimɛi lɛ, ni asafo lɛ fee nɔni sa akɛ Kristofoi feɔ befɛɛbe yɛ shihilɛi ni tamɔ nakai amli lɛ. Amɛkɛ Yehowa wie yɛ sɔlemɔ mli. Amɛnɔ̃ lɛ ji hemɔkɛyeli sɔlemɔ ni tsɔɔ suɔmɔ ni mli wa ni amɛyɔɔ akɛ amɛsɔmɔ Nyɔŋmɔ lɛ. Amɛkɛɛ:
“Nuntsɔ, bo ni oji Nyɔŋmɔ ni fee ŋwɛi kɛ shikpɔŋ kɛ ŋshɔ kɛ nii fiaa ni yɔɔ amɛmli; bo mɔni otsɔ wɔtsɛ David, otsulɔ lɛ, naa okɛɛ:
‘Mɛɛba jeŋmaji lɛ feɔ hoo, ni maji lɛ hu jwɛŋɔ yakanii? Shikpɔŋ nɔ maŋtsɛmɛi lɛ ete shi edamɔ shi, ni lumɛi lɛ hu anaa ebakpe shi ewo Nuntsɔ lɛ kɛ mɔni efɔlɛ mu lɛ: Lɛɛlɛŋ, Herode kɛ Pontio Pilato kɛ jeŋmaji lɛ kɛ Israel maji lɛ hu ebabua amɛhe naa yɛ ma nɛŋ amɛwo otsulɔ krɔŋkrɔŋ Yesu, mɔni ofɔlɛ mu lɛ, koni amɛfee nii fɛɛ ni onine kɛ eyiŋtoo lɛ eto efɔ̃ shi akɛ afee lɛ. Ni agbɛnɛ hu, Nuntsɔ, kwɛmɔ amɛhe gbeyei ni amɛwoɔ lɛ, ni oha otsuji lɛ kɛ ekaa pii ajaje owiemɔ lɛ, ni okpã onine mli ni oha atsatsaa mɛi, ni atsɔ otsulɔ krɔŋkrɔŋ Yesu lɛ gbɛi anɔ afee okadii kɛ naakpɛɛnii.”—Bɔf. 4:24-30.
10 Kaselɔi lɛ biii ni ajie amɛ kɛjɛ nitsumɔ lɛ mli aloo kɛjɛ amɛhe gbeyei ni anɔkwale lɛ henyɛlɔi woɔ lɛ naa. Amɛle akɛ Yehowa ji mɔni ewo amɛ nitsumɔ akɛ amɛfee odasefoi. Nɔni amɛtsuii shweɔ ji akɛ amɛya nɔ amɛwie Nyɔŋmɔ wiemɔ lɛ kɛ ekaa babaoo, ni amɛbi yelikɛbuamɔ yɛ enɛ mli. Amɛŋmɛŋ gbɛ ni aye amɛnɔ yɛ gbeyeishemɔ hewɔ, kɔkɔɔkɔ. Ani Yehowa ná amɛsubaŋ nɛɛ he miishɛɛ? Nɔni aŋma lɛ kɛɔ wɔ akɛ:
“Beni amɛsɔle lɛ, heni amɛnaa ebakpe shi yɛ lɛ hoso, ni mumɔ krɔŋkrɔŋ yimɔ amɛ fɛɛ amɛmli obɔbɔ, ni amɛkɛ ekaa jaje Nyɔŋmɔ wiemɔ lɛ.”—Bɔf. 4:31.
11. (a) Mɛni jɛ ekaa ni amɛkɛwie Iɛ mli kɛba? (b) Mɛni hewɔ tsuŋ ni awo amɛ lɛ haaa amɛfɔ̃ɔ nitsumɔ lɛ?
11 Nakai Maŋtsɛyeli lɛ he odasefoi lɛ kɛ ekaa hee tsá amɛnitsumɔ lɛ nɔ, ni Yehowa kɛ amɛ hi shi. “Akɛ mɛi ni heɔ Nuntsɔ lɛ nɔ yeɔ, hii kɛ yei babaoo, bafata amɛhe.” (Bɔf. 5:14) Yɛ enɛ hewɔ lɛ Nyɔŋmɔjamɔŋ hiɛnyiɛlɔi lɛ amli fu ekoŋŋ ni amɛwo bɔfoi lɛ atsuŋ. Shi Yehowa suɔmɔnaanii ji akɛ amɛdaseyeli lɛ akã he yɛ Yerusalem. Nohewɔ lɛ etsu eŋwɛi bɔfo ni eyajie bɔfoi lɛ ni ekɛɛ amɛ akɛ:
“Nyɛyaa sɔlemɔwe lɛ nyɛyadamɔa shi nyɛjajea nɛkɛ wala nɛɛ wiemɔi lɛ fɛɛ nyɛtsɔɔɔ maŋ lɛ!” (Bɔf. 5:20)
Tsuŋ ni awo amɛ lɛ wooo bɔfoi lɛ ahe gbeyei koni amɛfee dioo, tamɔ bɔ nɔŋŋ ni osɔfoi kɛ lumɛi lɛ ahegbeyeiwoi nyɛɛɛ afee lɛ.
12. Te fee tɛɛŋ ni bɔfoi, Iɛ yaye odase ekoŋŋ yɛ Akuashɔŋ lɛ hiɛ; ni ani anyɛ́ aha ŋmiŋmi mɔmɔ amɛ?
12 Shi blafoi lɛ mɔmɔ bɔfoi lɛ ekoŋŋ ni amɛkpala amɛ kɛba Akuashɔŋ lɛ hiɛ ni osɔfonukpa ni mli efu waa lɛ kɛɛ amɛ akɛ:
“Ani jeee kitã wɔwo nyɛ dikadika akɛ nyɛkatsɔɔ nii yɛ nɛkɛ gbɛi nɛɛ anɔ lɛ? Ni naa, nyɛha Yerusalem eyi obɔ kɛ nyɛtsɔɔmɔ lɛ, ni nyɛmiitao akɛ nyɛkɛ nɛkɛ nuu nɛɛ lá lɛ baa wɔnɔ.” (Bɔf. 5:28)
Amrɔ nɛɛ ni akɛ bɔfoi lɛ eba saneyelihe ko ni asumɔɔɔ amɛsane yɛ jɛi kwraa ni blafoi miibu amɛhe ni osɔfonukpa lɛ tsirɛɔ wiemɔi ayisɛɛ ehaa amɛ waawaa nɛɛ, ani bɔfoi lɛ baaha aye amɛnɔ? Kɔkɔɔkɔ.
“Petro kɛ bɔfoi [krokomɛi] lɛ here nɔ ni amɛkɛɛ: ‘Esa akɛ wɔbo Nyɔŋmɔ moŋ toi akɛ nɔyelɔ, fe gbɔmɛi. Wɔtsɛmɛi a-Nyɔŋmɔ lɛ teé Yesu, mɔni nyɛsɛŋlɛ yɛ tso nɔ ni nyɛgbɛlɛ lɛ shi. Nyɔŋmɔ wó mɔnɛ nɔ kɛtee eninejurɔ nɔ akɛ Nitsulɔ Nukpa kɛ Walaherelɔ, koni eŋɔ tsuitsakemɔ kɛ eshaifaa eha Israel. Ni wɔ ji saji nɛɛ ahe odasefoi, ni nakai nɔŋŋ mumɔ krɔŋkrɔŋ ni Nyɔŋmɔ enɔ eha mɛi ni boɔlɛ toi akɛ nɔyelɔ lɛ hu ji.’”—Bɔf. 5:29-32, NW.
13. Mɛɛ ŋaa Gamaliel wo; ni te Akuashɔŋ lɛ bu no amɛha tɛɛŋ?
13 Biɛnɛɛ hu, nɔni aŋma afɔ̃ shi yɛ Ŋmalɛi lɛ amli ni tsɔɔ mɛi ni teɔ shi woɔ Nyɔŋmɔ nitsumɔ lɛ ajwɛŋmɔ kɔɔdɔŋ lɛ he baa sɛɛnamɔ ehaa wɔ. Eyɛ mli akɛ gbɔmɛi kpakpai ji bɔfoi lɛ moŋ, kɛlɛ gwabɔɔ lɛ to amɛyiŋ akɛ amɛ aaakpata amɛhiɛ. Shi mlatsɔɔlɔ ko ni abuɔlɛ waa ni egbɛi ji Gamaliel lɛ te shi ni ewo Nyɔŋmɔjamɔŋ hiɛnyiɛlɔi lɛ ŋaa ko ni sa jogbaŋŋ yɛ nakai be lɛ mli. Ekɛɛ:
“Ataamɛi Israelbii, nyɛhumia shi yɛ nɛkɛ gbɔmɛi nɛɛ ahewɔ, bɔni nyɛkɛ amɛ aaaye aha. Ejaakɛ nyɛsɛɛ nɛɛ Teuda te shi ni ekɛɛ akɛ mɔko jilɛ, ni hii aaafee ohai-ejwɛ kɛ amɛhe yakpɛtɛ ehe; shi agbelɛ, ni mɛi abɔ ni bolɛ toi lɛ fɛɛ gbɛ shwã ni amɛyi hɛ shi. Mɔnɛ sɛɛ lɛ Yuda, Galileanyo lɛ, te shi yɛ mɛi-akanemɔ gbii lɛ amli, ni egbala asafo babaoo eshwie esɛɛ; lɛ hu ehiɛ kpata, ni mɛi ni bolɛ toi lɛ fɛɛ hu gbɛ shwã. Nohewɔ lɛ miikɛɛ nyɛ akɛ: Nyɛŋmɛa nɛkɛ gbɔmɛi nɛɛ ahe ni nyɛkadia amɛsɛɛ; ejaakɛ kɛ́ gbɔmɛi adɛŋ nɛkɛ yiŋtoo nɛɛ loo nɛkɛ nitsumɔ nɛɛ jɛ lɛ, ebaafite; shi kɛ́ Nyɔŋmɔ dɛŋ ejɛ lɛ, nyɛnyɛŋ nyɛfite; koni nyɛkabafee nyɛhe tamɔ mɛi ni kɛ Nyɔŋmɔ wuɔ.” (Bɔf. 5:34-39)
Amɛŋɔɔɔ Gamaliel ŋaawoo lɛ kɛwulaaa shi. Amɛkpataaa bɔfoi lɛ ahiɛ moŋ, shi amɛkã he amɛwuu amɛshi Nyɔŋmɔ. Amɛgwao bɔfoi lɛ, ni amɛwo amɛ kitã akɛ amɛkawie Yesu he dɔŋŋ, kɛkɛ ni amɛŋmɛɛ amɛhe.—Bɔf. 5:40.
EKAAFEEMƆ YƐ KAA NAA
14. Te Kristofoi lɛ fee amɛnii kɛ ekaa amɛha tɛɛŋ; ni mɛni jɛ mli ba?
14 Ani enɛɛmɛi fɛɛ je bɔfoi lɛ anijiaŋ wui koni amɛkɛ ekaa akawie Nyɔŋmɔ wiemɔ lɛ dɔŋŋ? Nɔni aŋma afɔ̃ shi lɛ haa hetoo akɛ:
“Kɛkɛ ni amɛje Akuashɔŋ lɛ hiɛ amɛtee kɛ miishɛɛ, akɛ egbɛi lɛ ahewɔ lɛ abu amɛ mɛi ni sa akɛ abɔɔ amɛ ahora. Ni amɛfɔ̃ɔɔ nitsɔɔmɔ kɛ Yesu Kristo shiɛmɔ yɛ sɔlemɔwe lɛ kɛ shiai befɛɛbe.” (Bɔf. 5:41, 42)
Bɔfoi lɛ kɛ Kristofoi krokomɛi tee nɔ amɛtsu Nyɔŋmɔ wiemɔ lɛ he nii ni amɛkɛ ekaa shiɛ, ni Yehowa jɔɔ amɛnitsumɔ lɛ nɔ.
“Ni Nyɔŋmɔ wiemɔ lɛ shwere, ni kaselɔi lɛ ayi bafá babaoo diɛŋtsɛ yɛ Yerusalem; ni osɔfoi lɛ tete ateŋ mɛi pii boɔ hemɔkɛyeli lɛ toi.”—Bɔf. 6:7.
15. Mɛni ji nii ni Stefano wie kɛ ekaa lɛ ateŋ ekomɛi; ni te Nyɔmɔjamɔŋ gbɔmɛi nɛɛ fee amɛnii amɛha tɛɛŋ?
15 Agbɛnɛ ni osɔfoi hu miitsake amɛtsui ni amɛmiitsɔmɔ Kristofoi nɛɛ, Nyɔŋmɔjamɔŋ hiɛnyiɛlɔi kuɛŋtilɔi lɛ ekpɛlɛɛɛ kwraa yɛ amɛshiteekɛwoo lɛ mli. Etsɛɛɛ kwraa ni akɛ odasefonyo Stefano ni yɔɔ ekaa babaoo lɛ yadamɔ Akuashɔŋ lɛ hiɛ. Eye odase ko ni hewalɛ babaoo yɔɔ mli, nɔ̃ mli ni ewie bɔni Yehowa yiŋtoi etsu nii amɛha yɛ be ni eho mli lɛ he yɛ. Shi eshiteekɛwolɔi lɛ ké kɛbashwie enɔ ni amɛtswialɛ tɛi ni egbo. Ebalɛ yɛ Stefano gbɛfaŋ taakɛ Yesu egba eto lɛ pɛpɛɛpɛ, akɛ: “Be baaba tete, ni mɔfɛɛmɔ ni gbeɔ nyɛ lɛ aaasusu akɛ ekɛmiija Nyɔŋmɔ.”—Yoh. 16:2; Bɔf. 6:8–7:60.
16. (a) Mɛni ba Kristofoi asafo lɛ fɛɛ nɔ agbɛnɛ? (b) Mɛɛ jwɛŋmɔ amɛná yɛ heloonaa nibii ni amɛyɔɔ lɛ ahe?
16 Stefano lá-odasefonyo gbele lɛ ji okadi ni je yiwaa ko ni naa wa lɛ shishi.
“Ni nakai gbi lɛ nɔ nɔŋŋ lɛ yiwalɛ kpele te shi wo asafo ni yɔɔ Yerusalem lɛ; ni amɛ fɛɛ amɛgbɛ amɛshwã Yudea kɛ Samaria niiaŋ, ja bɔfoi lɛ kɛkɛ shwɛ.” (Bɔf. 8:1)
Shi ani enɛ aaaha nakai be lɛ mli Yehowa odasefoi lɛ afee dioo? Naa mɔdɛŋ kroko hu ni Satan bɔ akɛ efite Nyɔŋmɔ tsuji lɛ anitsumɔ lɛɛlɛŋ. Ebabi ni amɛshi amɛshiai kɛ nibii ni amɛyɔɔ, ni amɛjo foi. Shi amɛyɛ heloonaa, nibii ahe jwɛŋmɔ ni ja. Yɛ enɛ mli lɛ, amɛtamɔ Kristofoi ni fee sɛɛ lɛ bɔfo Paulo ŋma amɛ akɛ “Nyɛmusuŋ shã nyɛ yɛ mɛi ni awo amɛ gboklɛi lɛ ahewɔ, ni nyɛnii ni ahã lɛ hu nyɛkɛ miishɛɛ kpɛlɛ, akɛni nyɛle akɛ nyɛyɛ jwetri ni hi fe no aahu ni hiɔ shi daa yɛ ŋwɛi,” lɛ nɔŋŋ.—Heb. 10:34.
17, 18. (a) Mɛɛ gbɛ nɔ nɔni Filipo kɛ Kristofoi krokomɛi ni agbɛ amɛ ashwã lɛ fee lɛ tsɔɔ wɔ bɔni wɔɔɔfee wɔye Satan ŋaatsɔi anɔ wɔha lɛ yɛ? (b) Mɛɛ jɔɔmɔi amɛná kɛjɛ Yehowa dɛŋ?
17 Kaselɔi lɛ le krɛdɛɛ akɛ esani amɛya nɔ amɛfee Nyɔŋmɔ kɛ Kristo odasefoi anɔkwafoi. Nohewɔ lɛ “mɛi ni egbɛ eshwã lɛ yakpa shi, ni amɛjaje sanekpakpa lɛ.” (Bɔf. 8:4) Filipo tee Samaria ni ekɛ ekaa babaoo shiɛ wiemɔ lɛ, ni eha mɛi lɛ na miishɛɛ babaoo. Etsɛɛɛ kwraa ni heyelilɔi krokomɛi bafata ehe ni akɛ shɛɛ tee Yerusalem ayakɛɛ bɔfoi lɛ akɛ Samaria eŋɔ Nyɔŋmɔ wiemɔ lɛ. Petro kɛ Yohane tee jɛi, mumɔ krɔŋkrɔŋ ba Samariabii anɔ, ni ato Kristofoi asafo yɛ jɛi.—Bɔf. 8:5-8, 14-17, 25; 9:31.
18 Nakai klɛŋklɛŋ afii oha lɛ mli Kristofoi lɛ hiɛ jwɛŋmɔ ni ja. Amɛsɔle amɛkpa fai akɛ Yehowa aha amɛkã he amɛshiɛ Nyɔŋmɔ Wiemɔ lɛ kɛ ekaa. Nakai ji bɔni amɛfee yɛ emumɔ lɛ yelikɛbuamɔ naa, ni ojɔɔ amɛ. Taakɛ nɔni aŋma lɛ kɛɔ lɛ, Yehowa “nine fata amɛhe”!—Bɔf. 11:19-21.
WIEMƆ LƐ JAJEMƆ KƐ EKAA AMRƆ NƐƐ
19. Mɛɛ odaseyeli wɔyɔɔ akɛ Yehowa Nyɔŋmɔ kɛ Kristo kɛ odasefoi Kristofoi lɛ ehi shi yɛ ŋmɛnɛbeaŋ?
19 Yɛ afii ohai abɔ ni eho nɛɛ fɛɛ amli lɛ, Yesu eye shi ni ewo akɛ “mikɛ nyɛ yɛ daa kɛyashi jeŋ naagbee” lɛ nɔ. (Mat. 28:20) Amrɔ nɛɛ ni wɔbashɛ nakai be lɛ mli nɛɛ, kwɛ bɔni eŋɔɔ wɔnaa akɛ odasefoi ni fa fe 2,000,000 ‘miijaje Yehowa-wiemɔ lɛ kɛ ekaa’! Ni wɔnyɔŋmɔ lɛ ejɔɔ nɛkɛ “gbɔmɛi ahe wolɛi” nɛɛ anitsumɔ lɛ nɔ ni nohewɔ lɛ anu “maŋtsɛyeli lɛ he sanekpakpa lɛ yɛ shikpɔji fɛɛ anɔ aahu kɛyashi Antaatika snoo shikpɔŋwulu lɛ po nɔ. Sanekpakpa lɛ egbu kɛtee gɔji anɔ hei ni yɔɔ banee kɛ ŋshɔkpɔi bibii ni egbɛ eshwã ŋshɔi wuji kpawo lɛ amli hu anɔ. (Mat. 24: 14) Hɛɛ, odaseyeli nitsumɔ lɛ eshɛ jeŋmaji fɛɛ amli “kɛyashi shikpɔŋ lɛ naagbeehei lɛ,” ni atsu enɛ fɛɛ yɛ Yehowa mumɔ lɛ yelikɛbuamɔ naa.—Bɔf. 1:8; Zak. 4:6.
20. Mɛɛ gbɛ nɔ Abonsam etsɔɔ shi ni eteɔ ewoɔ mɛi ni shiɛɔ Nyɔŋmɔ wiemɔ lɛ yɛ; ni ani enajiaŋdamɔlɔi Iɛ aaanyɛ aha nitsumɔ lɛ sɛɛ afo?
20 Taakɛ Nyɔŋmɔ Wiemɔ lɛ gba eto lɛ, Abonsam mli efu ejaakɛ ele akɛ ebe faaa. Eyaa nɔ eteɔ shi ewoɔ odaseyeli nitsumɔ lɛ. (Kpoj. 12:12, 17) Abonsam kɛ mɛi ni elaka amɛ lɛ nyɛ̃ɔ Yehowa Odasefoi ejaakɛ nɛkɛ Kristofoi nɛɛ ‘jeee je lɛ fã.’ Yiwaa egbɛ amɛteaŋ mɛi pii eshwã kɛjɛ amɛshiai. Amɛteaŋ ohai abɔ egboi kpatu gbele, taakɛ eba Stefano nɔ yɛ wɔŋmɛnɛbeaŋ klɛŋklɛŋ afii oha lɛ mli lɛ. (Kpoj. 17:6; 20:4) Shi éje kpo faŋŋ akɛ Nyɔŋmɔ nii atsuɔ lɛ. Gbɔmɛi nyɛko amɛwo amɛshɛ amɛfɔ̃ ejaakɛ Nyɔŋmɔ anɔkwa tsuji lɛ kãa he amɛkɛ ekaa jajeɔ wiemɔ lɛ. Yɛ nɛkɛ gbɛ nɔ lɛ, amɛ́ye Abonsam ŋaai fɔji lɛ anɔ kunim.—Kɛto Efesobii Awolo 6:11, 12, Yakobo Wolo 4:7, kɛ 1 Petro Wolo 5:8, kɛ 9 ahe okwɛ.
21. (a) Mɛɛ nitsumɔ Yehowa sumɔɔ akɛ atsu amrɔ nɛɛ? (b) Mɛni hewɔ esa akɛ wɔgbe nɔni aha wɔ akɛ wɔtsu lɛ naa lɛ; ni te wɔɔɔfee tɛɛŋ wɔkã he wɔkɛ ekaa ajaje wiemɔ lɛ?
21 Ŋmɛnɛ, Maŋtsɛyeli lɛ he ‘gbɔmɛi ahɛɛ’ lɛ miiya hiɛ lolo, yɛ shiteekɛwoo ni faà lɛ fɛɛ sɛɛ. Ni aaya nɔ aana Yehowa jɔɔmɔ yɛ nɔ. Yɛ nyɛsɛɛ sɔɔmɔ afi lɛ mli pɛ lɛ, Yehowa Odasefoi na miishɛɛ akɛ abaptisi mɛi heei 113,672. Kwɛ bɔni mɛnɛɛmɛi ena miishɛɛ waa akɛ amɛ aaafata he ni ajaje Yehowa wiemɔ lɛ! Nɔni Nyɔŋmɔ taoɔ ni wɔtsu ŋmɛnɛ lɛ nɛ, ni esa akɛ ehiɔ mɛi fɛɛ ni ejɔɔ amɛhe nɔ amɛha Yehowa lɛ atsui mli akɛ amɛteke nɔ yɛ etsumɔ mli, ejaakɛ no ji amɛnitsumɔ. (1 Kor. 9:16) Ani otsui tsirɛɔ bo akɛ okɛ ekaa ajaje Yehowa wiemɔ lɛ? Be mli ni je lɛ mli saji yaa nɔ fiteɔ lɛ, esa akɛ wɔtswa wɔfai shi akɛ wɔɔɔkã he wɔshiɛ Maŋtsɛyeli lɛ he sanekpakpa lɛ kɛyaashi aaagbe nitsumɔ lɛ naa. Kɛji yiwaa ba lɛ, wɔhiɛ efeee wɔ yaa. Wɔkaiɔ akɛ jeee nitsumɔ ni Yehowa kɛha Yesu akɛ etsu lɛ shishi kɛkɛ eje, shi egbe naa hu. (Yoh. 17:4) Esaa wɔ eto je lɛ nyɛ̀ɛ lɛ naadaamɔ. Nyɛhaa wɔfea tamɔlɛ daa, taakɛ bɔfoi kɛ klɛŋklɛŋ afii oha lɛ mli Kristofoi krokomɛi fee lɛ, ni wɔkɛ hemɔkɛyeli abi Yehowa yelikɛbuamɔ yɛ nɔni esumɔɔ akɛ wɔfee lɛ tsumɔ mli. Nyɛhaa wɔ fɛɛ wɔsɔlea wɔkpaa fai yɛ ekomefeemɔ mli akɛ: “Ni agbɛnɛ hu . . . [Yehowa], kwɛmɔ . . . ni oha otsuji lɛ kɛ ekaa pii ajaje owiemɔ lɛ.”—Bɔf. 4:2.9.a
[Shishigbɛ niŋmai]
a Ajie kɛjɛ December 15, 1979 Blɔfo Buu-Mɔɔ lɛ mli.
[Mfoniri ni yɔɔ baafa 20]
Yehowa Nyɔŋmɔ jɔɔ̀ ŋmɛnɛbeaŋ “gbɔmɛi ahe wolɛi” lɛ anitsumɔ nɔ