Gbeekpamɔ ni Aaaha Ehi Onukpai kɛ Asafoŋ Sɔɔlɔi Ateŋ
YƐ PENTEKOSTE afi 33 Ŋ.B. lɛ sɛɛ nɔŋŋ lɛ, hiamɔ sane ko te shi trukaa yɛ Kristofoi asafo ni ato lɛ ehee lɛ mli. Áto gbɛjianɔ koni akwɛ yei okulafoi ni ehia amɛ lɛ. Shi yɛ be ko sɛɛ lɛ, “huhuuhu wiemɔ ko bate shi yɛ Helenibii lɛ ateŋ yɛ Hebribii lɛ ahewɔ, ejaakɛ hiɛ kpaa amɛkulafo yei lɛ anɔ yɛ daa kwɛmɔ lɛ gbɛfaŋ.”—Bɔfoi lɛ Asaji 6:1.
Bɔfoi lɛ nu huhuuhu wiemɔi nɛɛ. “Shi mɛi nyɔŋma kɛ enyɔ lɛ tsɛ kaselɔi asafo lɛ kɛba, ni amɛkɛɛ: ‘Esaaa akɛ wɔshiɔ Nyɔŋmɔ wiemɔ lɛ ni wɔyasɔmɔɔ yɛ okpɔlɔi ahe. No hewɔ lɛ, anyɛmimɛi, nyɛtaoa nyɛteŋ hii kpawo ni yɔɔ gbɛi kpakpa ni mumɔ krɔŋkrɔŋ kɛ nilee eyi amɛ obɔ, koni wɔŋɔ amɛ wɔto nɛkɛ nitsumɔ ni he hiaa nɛɛ nɔ.’ ”—Bɔfoi lɛ Asaji 6:2, 3.
Enɛ feɔ gbɛjianɔtoo ni yɔɔ Kristofoi asafo lɛ mli lɛ he shishitoo mla ni he hiaa jogbaŋŋ lɛ he mfoniri. Akɛ hii ni akɛ gbɛnaa nii ewo amɛdɛŋ tsuɔ nii koni amɛkwɛ daa gbi saji anɔ, yɛ be mli ni mɛi krokomɛi tsuɔ mumɔŋ saji ni tsii lɛ ahe nii. Enɛ jeee nɔ ko ni afeko eko da. Ahala Aaron kɛ eseshibii lɛ ni amɛsɔmɔ akɛ osɔfoi koni amɛsha afɔlei amɛha Nyɔŋmɔ yɛ blema Israel. Shi kɛlɛ, Yehowa tsɔɔ akɛ Levibii lɛ ‘abu kpee-buu lɛ mli nibii fɛɛ he’ koni amɛkɛye amɛbua amɛ. (4 Mose 3:5-10) Nakai nɔŋŋ hu asafoŋ sɔɔlɔi yeɔ amɛbuaa nɔkwɛlɔi ŋmɛnɛ.
Onukpai kɛ Asafoŋ Sɔɔlɔi Anitsumɔ
Ŋmalɛi lɛ toɔ hesaai ni nɔ kwɔlɔ naa eshwieɔ shi kɛhaa onukpai kɛ asafoŋ sɔɔlɔi fɛɛ. (1 Timoteo 3:1-10, 12, 13; Tito 1:6-9) Amɛjeee mɛi ni kɛ amɛhe shiɔ akaŋ shi amɛtsuɔ oti kome lɛ nɔŋŋ he nii—asafo lɛ ni atswaa amaa shi lɛ. (Okɛto Efesobii 4:11-13 he.) Shi kɛlɛ, sɔrɔto-feemɔi komɛi yɛ nitsumɔi ni amɛtsuɔ yɛ asafo lɛ mli lɛ amli. Akɛɛ nɔkwɛlɔi yɛ 1 Petro 5:2 lɛ akɛ: “Nyɛlɛa Nyɔŋmɔ asafoku ni yɔɔ nyɛteŋ lɛ, nyɛkwɛa nɔ, jeee nɔnyɛɛ naa, shi moŋ yɛ suɔmɔ naa; asaŋ jeee sɛɛnamɔ ni yɔɔ hiɛgbele hewɔ, shi moŋ tsuijurɔ naa.” Amɛbuɔ bɔ ni amɛtsuɔ nitsumɔ krɔŋkrɔŋ nɛɛ he nii amɛhaa lɛ he akɔntaa amɛhaa Nyɔŋmɔ.—Hebribii 13:17.
Ni asafoŋ sɔɔlɔi hu? Ŋmalɛi lɛ kpaaa gbɛ akɛ amɛfee mɛi ni he esa yɛ amɛ mɔdɛŋbɔɔ kɛha nitsɔɔmɔ lɛ mli. Esoro amɛnitsumɔ lɛ fioo yɛ onukpai anɔ̃ lɛ he. Ŋwanejee ko bɛ he akɛ yɛ Ŋ.B. klɛŋklɛŋ afii oha lɛ mli lɛ, heloonaa nibii pii yɛ, loo nitsumɔ ko ni esa akɛ agbala jwɛŋmɔ kɛya nɔ loo atsu he nii jogbaŋŋ, ekolɛ nɔ ni fata he ji nibii ni abaaŋmala Ŋmalɛi lɛ awo nɔ lɛ ahemɔ, loo nibii lɛ aŋmalamɔ diɛŋtsɛ.
Asafoŋ sɔɔlɔi yaa nɔ amɛtsuɔ nitsumɔi sɔrɔtoi ni he hiaa lɛ ahe nii yɛ asafo lɛ mli ŋmɛnɛ hu, tamɔ asafo lɛ shika kɛ shikpɔŋkukuji lɛ anɔkwɛmɔ, woji tɛtrɛbii kɛ woji wuji lɛ ni amɛkɛhaa, kɛ Maŋtsɛyeli Asa lɛ nɔ kwɛmɔ. Abaanyɛ akɛ asafoŋ sɔɔlɔi komɛi ni he esa lɛ atsu nii po yɛ nitsɔɔmɔ mli, ni yɛ bei komɛi amli lɛ Asafo Woloŋ Nikasemɔ lɛ nɔkwɛmɔ, yɛ Sɔɔmɔ Kpeei lɛ fai komɛi ahe nitsumɔ, kɛ maŋshiɛmɔ-hamɔ mli.
Kɛ onukpai kɛ asafoŋ sɔɔlɔi fee ekome kɛtsu nii lɛ, atsuɔ asafo lɛ hiamɔ nii ahe nii—yɛ mumɔŋ kɛ gbɛjianɔtoo fɛɛ hu mli—yɛ gbɛ ni ŋmɛɔ pɛpɛɛpɛ nɔ. Kɛkɛ lɛ asafo lɛ mlibii lɛ ena miishɛɛ, amɛhe waa, ni amɛwoɔ yibii yɛ mumɔŋ. Kaimɔ nɔ ni Paulo ŋma kɛyaha mɛi ni afɔ amɛ mu yɛ Efeso lɛ akɛ: “[E]mɔmɔɔ ehe shimɔshimɔɔ ehe nɔ ni etsɔɔ nɔ ni jɛɔ talɔ fɛɛ talɔ mli lɛ nɔ etsaratsaraa ehe nɔ yɛ henɔ fɛɛ henɔ nitsumɔ susumɔ lɛ naa, ni ehaa gbɔmɔtso lɛ daa, ni emaa ehe yɛ suɔmɔ mli.”—Efesobii 4:16.
Esa akɛ onukpai kɛ asafoŋ sɔɔlɔi abɔ mɔdɛŋ koni amɛjie ekomefeemɔ, ni ji, gbeekpamɔ ni tamɔ nakai nɔŋŋ kpo. Shi kɛlɛ, gbeekpamɔ ni tamɔ nakai lɛ baaa trukaa. Esa akɛ atsu he nii ni nine ashɛ nɔ ni abu he jogbaŋŋ.
Nɔ ni Onukpai Baanyɛ Afee
Nɔ ko ni he hiaa waa ni esa akɛ nyɛyoo ji akɛ wekukpaa ni ka onukpa kɛ asafoŋ sɔɔlɔ teŋ lɛ jeee nɔ ni ka nuŋtsɔ ko kɛ tsulɔ ko teŋ loo nɔ ni ka nitsumɔ-tsɛ ko kɛ nitsulɔ ko teŋ. He ni ekomefeemɔ kpakpa yɔɔ lɛ, onukpai buɔ asafoŋ sɔɔlɔi akɛ nanemɛi Nyɔŋmɔ sɔɔlɔi. (Okɛto 1 Korintobii 3:6-9 he.) Romabii 12:10 kɛɔ akɛ: “Mɔ fɛɛ mɔ kɛ woo aha enaanyo tsutsu.” No hewɔ lɛ onukpai kpooɔ akɛ amɛkɛ asafoŋ sɔɔlɔi aaaye yɛ gbɛ ni baafee tamɔ nɔ ni amɛbaa shi loo ni bulɛ bɛ amɛhe lɛ nɔ. Amɛwoɔ nibii kpakpai afeemɔ he hewalɛ fe ni amɛaatsi naa. Asafoŋ sɔɔlɔi ni akɛ amɛ aaaye yɛ bulɛ naa lɛ haa amɛbɔɔ mɔdɛŋ jogbaŋŋ ni eyeɔ ebuaa amɛ koni amɛná amɛ nitsumɔ lɛ he miishɛɛ yɛ asafo lɛ mli.
Esa akɛ onukpai aha ahi amɛjwɛŋmɔ mli akɛ famɔ ni akɛha amɛ akɛ amɛkwɛ Nyɔŋmɔ asafoku lɛ nɔ lɛ kɔɔ nyɛmimɛi hii ni sɔmɔɔ akɛ asafoŋ sɔɔlɔi lɛ ahe. Lɛlɛŋ, akpaa nyɛmimɛi hii ni tamɔ nɛkɛ ni gbɛnaa nii ka amɛnɔ nɛɛ agbɛ akɛ amɛfee Kristofoi ni edara yɛ mumɔŋ. Shi kɛlɛ, taakɛ eji yɛ asafoku lɛ mlibii krokomɛi ni eshwɛ lɛ ahe lɛ, ehe miihia ni asusu amɛhe yɛ be kɛ beaŋ. Esa akɛ onukpai asusu amɛmumɔŋ nɔyaa lɛ he jogbaŋŋ diɛŋtsɛ.
Akɛ nɔkwɛmɔ nɔ lɛ beni bɔfo Paulo kɛ obalanyo Timoteo kpe lɛ, oya nɔŋŋ kɛkɛ ni enu bɔ ni Timoteo nyɛmɔ ji ha lɛ shishi ni ‘etao akɛ ekɛ lɛ aaaya.’ (Bɔfoi lɛ Asaji 16:3) Timoteo sɔmɔ akɛ Paulo hefatalɔ gbɛfalɔ, ni kɛtsɔ enɛ nɔ lɛ enine shɛ tsɔsemɔ ni he baa sɛɛnamɔ waa lɛ nɔ. Ojogbaŋŋ, afii komɛi asɛɛ lɛ Paulo nyɛ eŋma Kristofoi ni yɔɔ Korinto lɛ akɛ: “Miitsu Timoteo ni ji misuɔmɔ bi kɛ anɔkwafo yɛ Nuŋtsɔ lɛ mli lɛ nyɛŋɔɔ, ni ebakai nyɛ migbɛ̀i ni yɔɔ Kristo [Yesu] mli lɛ”!—1 Korintobii 4:17.
Onukpai, ani nyɛkɛ asafoŋ sɔɔlɔi lɛ anyɛmɔi lɛ fɛɛ miitsu nii yɛ nyɛ asafo lɛ mli? Ani nyɛtsɔseɔ amɛ aŋkroaŋkro yɛ bɔ ni afeɔ awieɔ yɛ mɛi ahiɛ kɛ bɔ ni afeɔ apɛiɔ Biblia mli saji amli, bɔni afee ni nyɛkɛye nyɛbua amɛ? Ani nyɛfɔ nine nyɛtsɛ amɛteŋ mɛi ni he esa lɛ koni amɛfata nyɛhe kɛha asafoŋbii lɛ asaramɔ? Ani nyɛkɛ amɛ tsuɔ nii yɛ shiɛmɔ nitsumɔ lɛ mli? Nuŋtsɔ lɛ kɛɛ esɔɔlɔi anɔkwafoi lɛ yɛ Yesu abɛbua ni kɔɔ talentai lɛ ahe lɛ mli akɛ: “Ahekoo, tsulɔ kpakpa kɛ anɔkwafo!” (Mateo 25:23) Ani nyɛ hu nyɛjieɔ asafoŋ sɔɔlɔi ni tsuɔ amɛnitsumɔ he nii jogbaŋŋ fɛfɛo lɛ ayi babaoo? (Okɛto Abɛi 3:27 he.) Kɛ jeee nakai lɛ, ani amɛbaanu he akɛ hiɛ esɔɔɔ amɛ nitsumɔ lɛ?
Ehe miihia hu ni sanegbaa aya nɔ yɛ nitsumɔ ni akɛ ekomefeemɔ tsuɔ lɛ mli. (Okɛto Abɛi 15:22 he.) Esaaa ni akɛ nitsumɔ woɔ mɔ dɛŋ trukaa, ni esaaa akɛ aheɔ yɛ mɔ lɛ dɛŋ yɛ nakai gbɛ nɔ hu. Esa akɛ onukpai lɛ kɛ sɔlemɔ asusu bɔ ni aaafee ni akɛ nyɛminuu ko nyɛmɔ atsu nii jogbaŋŋ yɛ asafo lɛ mli lɛ he. (Okɛto Mateo 25:15 he.) Kɛ ato nitsumɔ ko he gbɛjianɔ lɛ, esa akɛ atsɔɔ mli fitsofitso aha nyɛminuu lɛ koni enu nɔ ni akpaa gbɛ kɛjɛɔ edɛŋ lɛ shishi. Abɛi 11:14 bɔɔ kɔkɔ akɛ: “He ni maŋ kudɔmɔ bɛ lɛ, maŋ gbeeɔ shi.”
Ehiii tsɔ akɛ aaakɛɛ nyɛminuu ko kɛkɛ akɛ ehe shika he akɔntaabuu, woji tɛtrɛbii, loo woji ahe nitsumɔ lɛ kɛjɛ asafoŋ sɔɔlɔ kroko dɛŋ. Bei komɛi lɛ asafoŋ sɔɔlɔ ni akɛ nitsumɔ hee ko ewo edɛŋ lɛ naa akɛ tɔmɔi pii yɛ woji kɛ nibii ni aŋmala ashwie shi lɛ amli. Mɛɛ nijiaŋwujee sane! Klɛŋklɛŋ Korintobii 14:40 tsɔɔ akɛ: “Afee nii fɛɛ bɔ ni yɔɔ fɛo kɛ gbɛnaa-gbɛnaa.” Esa akɛ onukpai lɛ aŋɔ hegbɛ lɛ ni amɛkɛtsɔse nyɛmimɛi hii lɛ kɛtsɔ hiɛ, koni aha amɛle asafo lɛŋ nitsumɔi jogbaŋŋ koni amɛ diɛŋtsɛ lɛ amɛto okadi yɛ nitsumɔi ni tamɔ enɛɛmɛi atsumɔ mli. Akɛ nɔkwɛmɔ nɔ lɛ, esa akɛ onukpai lɛ ato gbɛjianɔ kɛha asafo shika gbɛjianɔtoo lɛ mli kwɛmɔ daa nyɔji etɛ. Kɛ aku hiɛ ashwie gbɛjianɔtoo ni he hiaa tamɔ nɛkɛ nɔ lɛ, ebaanyɛ ekɛ naagbai aba ni ebaaha bulɛ ni asafoŋ sɔɔlɔi yɔɔ kɛha ŋaawoi ni akɛhaa yɛ gbɛjianɔtoo he lɛ aba shi.
Shi kɛ etamɔ nɔ ni nyɛminuu ko miiku ehiɛ kɛmiishwie nitsumɔ pɔtɛɛ ko nɔ hu? Ni akɛ oyaiyeli aaajie lɛ kɛjɛ enitsumɔ lɛ nɔ moŋ lɛ, esa akɛ onukpai lɛ kɛ lɛ asusu saji ahe. Ekolɛ naagba lɛ jɛ ehe tsɔsemɔ ni enaaa. Kɛ nyɛminuu lɛ yaa nɔ ekɛ naagbai kpeɔ yɛ enitsumɔ mli lolo lɛ, no lɛ ekolɛ ebaabɔ mɔdɛŋ yɛ nitsumɔ kroko mli.
Onukpai baanyɛ aha ekomefeemɔ aya nɔ kɛtsɔ heshibaa kpojiemɔ nɔ. Filipibii 2:3 woɔ Kristofoi ahewalɛ akɛ “nyɛkaŋmɛa mligbalamɔi loo yaka anunyam taomɔ gbɛ, shi moŋ nyɛkɛ heshibaa jwɛŋmɔ abubua nyɛnanemɛi fe nyɛ diɛŋtsɛ nyɛhe.” No hewɔ lɛ esa akɛ onukpa lɛ abɔ mɔdɛŋ koni ekɛ mɔ ni kwɛɔ shitaramɔ nɔ lɛ afee ekome kɛ́ etsɔɔ lɛ akɛ eyata sɛi pɔtɛɛ ko nɔ yɛ asa lɛ nɔ lɛ, ni ekasusu akɛ akɛni eji onukpa hewɔ lɛ ehe ehiaaa akɛ eboɔ toi. Ekolɛ mɔ ni kwɛɔ shitaramɔ nɔ lɛ miinyiɛ ŋaa ni awo akɛ atara hei sɔrɔtoi yɛ asa lɛ nɔ lɛ sɛɛ kɛkɛ, eyɛ mli akɛ esa akɛ ekai akɛ ejeee mla ni ka shi akɛ esa ni mɔ fɛɛ mɔ afee nakai.a Onukpa lɛ ekuŋ ehiɛ eshwieŋ yiŋkpɛi ni afee kɛ saji ni akɛwo asafoŋ sɔɔlɔ ko dɛŋ koni etsu he nii lɛ nɔ yɛ gbɛ ni ejaaa nɔ.
Asafoŋ Sɔɔlɔi ni Miitsu Nii Kɛha Ekomefeemɔ
Bɔfo Paulo ŋma akɛ: “Asafo mli sɔɔlɔi lɛ hu esa akɛ amɛfee gbɔmɛi ni hiɛ tsii.” (1 Timoteo 3:8) Hiɛdɔɔ ni amɛkɛaatsu amɛnitsumɔi ahe nii—akɛ amɛ sɔɔmɔ krɔŋŋ lɛ fã lɛ—yeɔ ebuaa babaoo koni béi akate shi. Kɛ asafoŋ sɔɔlɔ ji bo lɛ, ani okɛ miishɛɛ tsuɔ onitsumɔi lɛ? (Romabii 12:7, 8) Ani okɛ ohe woɔ nitsumɔ lɛ mli waa bɔni afee ni ohe asa yɛ onitsumɔi sɔrɔtoi lɛ amli? Ani oji mɔ ni anyɛɔ akɛ he fɔɔ enɔ? Ani ojieɔ mumɔ ni sumɔɔ nitsumɔ kpo kɛ́ shɛ nitsumɔ be? Asafoŋ sɔɔlɔ ko ni yɔɔ Afrika shikpɔji lɛ eko nɔ lɛ tsuɔ nitsumɔi sɔrɔtoi etɛ he nii yɛ asafo lɛ mli. Te efeɔ enii yɛ he ehaa tɛŋŋ? Ekɛɛ akɛ: “Ojogbaŋŋ, eji nitsumɔ babaoo ni wa kɛkɛ, ni nitsumɔ ni wa egbeee mɔ.” Yɛ anɔkwale mli lɛ, mɛi ni kɛ amɛhe haa nɔ ko tsumɔ lɛ naa miishɛɛ babaoo mli ŋɔɔmɔ.—Bɔfoi lɛ Asaji 20:35.
Nyɛ hu nyɛbaanyɛ nyɛfee babaoo koni nyɛkɛha gbeekpamɔ aya nɔ kɛtsɔ onukpai ni nyɛkɛ amɛ aaafee ekome kwraa lɛ nɔ. Hebribii 13:17 kɛɔ akɛ: “Nyɛboa nyɛtsɔɔlɔi lɛ atoi ni nyɛbaa nyɛhe shi nyɛhaa amɛ; ejaakɛ amɛ amɛbuɔ nyɛsusumai lɛ ahe akɛ mɛi ni baabu he akɔntaa, koni amɛkɛ miishɛɛ afee nii nɛɛ, shi jeee ntsɔidɔɔmɔ; ejaakɛ no ehiii haaa nyɛ.” Lɛlɛŋ, onukpai lɛ yeee emuu, ni eeefee nɔ ni waaa akɛ aaana tɔmɔi yɛ amɛhe. Ni kɛlɛ, su ni tsɔɔ akɛ aafee keketee lɛ haa nɔmimaa ni anaaa yɛ mɔ mli lɛ faa. Ebaanyɛ efite omiishɛɛ ni esa mɛi krokomɛi ahe yɛ gbɛ fɔŋ nɔ yɛ asafo lɛ mli. No hewɔ lɛ bɔfo Petro kɛ ŋaawoo nɛɛ ha akɛ: “Nyɛ gbekɛbii, nyɛbaa nyɛhe shi nyɛhaa onukpai lɛ. Ni nyɛ fɛɛ nyɛbaa nyɛhe shi nyɛhaa nyɛhe . . . Hewɔ lɛ nyɛbaa nyɛhe shi yɛ Nyɔŋmɔ nine ni wa lɛ shishi, koni ewo nyɛnɔ yɛ be ni sa mli.”—1 Petro 5:5, 6.
Ŋaawoo ni tamɔ nɛkɛ he miihia titri lɛ kɛ onuɔ he akɛ aku hiɛ ashwie onɔ yɛ sɔɔmɔ hegbɛi agbɛfaŋ. Ekolɛ “[oo]tao nɔkwɛmɔ nitsumɔ lɛ,” shi ajieko oyi ahako enɛ. (1 Timoteo 3:1) Heshibaa jwɛŋmɔ baanyɛ aye abua bo koni oya nɔ “omɛ akɛ subaŋ” ni ojieɔ lɛ kpo. (Yaafo 3:24, NW) Ni omli aaafu onukpai lɛ—ni bɔ fɛɛ bɔ ni ji lɛ no baafite nyɛ wekukpaa kpakpa moŋ lɛ—bi ni amɛtsɔɔ bo kɛji hei yɛ ni ebaahia ni oya hiɛ yɛ mli. Ŋwanejee ko kwraa bɛ he akɛ anɔkwa suɔmɔ ni oyɔɔ akɛ oookpɛlɛ ŋaawoo nɔ ni okɛtsu nii lɛ baaje kpo faŋŋ akɛ nɔ ni yeɔ mumɔŋ dalɛ he odase.
Nyɔŋmɔ-jamɔŋ heshibaa kɛ hiɛshikamɔ baanyɛ aye abua asafoŋ sɔɔlɔ lɛ koni eŋmɛ pɛpɛɛpɛ kɛ eyɛ sui ni tsɔɔ akɛ ebɔɔ mɔdɛŋ fe nine loo eyɛ woloŋlee mli tsɔsemɔ kɛ nitsumɔ mli gbɛnaa waa lɛ. Kwɛ bɔ ni eeefee kaa kɛha lɛ diɛŋtsɛ akɛ eeebɔ mɔdɛŋ ewo ehe nɔ yɛ onukpai lɛ anɔ loo egbala jwɛŋmɔ kɛba lɛ diɛŋtsɛ enyɛmɔi loo emɔdɛŋbɔi anɔ! Abɛi 11:2 kaiɔ wɔ akɛ “heshibalɔi moŋ yɔɔ nilee.” Nyɛminuu ni baa ehe shi lɛ le he ni esa akɛ efee enii kɛyashɛ. Eesumɔ ni etsu nii kɛ dioo-feemɔ yɛ he ni baa shi koni ekɛ emɔdɛŋbɔi atsu nii ni ekɛfi onukpai lɛ asɛɛ. Heshibaa baanyɛ aye abua lɛ hu koni eyoo akɛ yɛ be mli ni ekolɛ eeenyɛ ená je lɛŋ nilee babaoo lɛ, kɛlɛ eeenyɛ etɔ fã yɛ mumɔŋ nilee kɛ sanesɛɛkɔmɔ mli nibii ni he hiaa lɛ amli—sui ni ekolɛ onukpai lɛ yaa hiɛ waa diɛŋtsɛ yɛ mli lɛ.—1 Korintobii 1:26–2:13; Filipibii 1:9.
Eka shi faŋŋ akɛ, onukpai kɛ asafoŋ sɔɔlɔi tsuɔ gbɛnaa nii ni he hiaa ahe nii. Amɛbaanyɛ amɛfee babaoo koni amɛtswa mɛi fɛɛ ni yɔɔ asafo lɛ mli lɛ amɛma shi kutuu. Shi kɛ amɛaafee nakai lɛ, esa akɛ amɛtsu nii yɛ ekomefeemɔ mli kutuu, “yɛ heshibaa jwɛŋmɔ kɛ humifeemɔ fɛɛ mli, ni nyɛkɛ tsuishitoo ahiɛhiɛ nyɛhe yɛ suɔmɔ mli, ni nyɛbɔ mɔdɛŋ ni nyɛto mumɔ ekomefeemɔ lɛ yɛ hejɔlɛ kpãa lɛ mli.”—Efesobii 4:2, 3.
[Shishigbɛ niŋmai]
[Mfoniri ni yɔɔ baafa 27]
Onukpai ebuuu asafoŋ sɔɔlɔi akɛ mɛi ni yɔɔ amɛshishi ni amɛkwɛɔ amɛnɔ, shi moŋ akɛ nanemɛi Nyɔŋmɔ sɔɔlɔi