Ani Mra Be Mli Sɔlemɔ Lɛ Tsɔɔ Akɛ Nyɔŋmɔ Lɛ Triniti Ni?
Fa2—Ani Bɔfoi lɛ Abeiaŋ Tsɛmɛi lɛ Tsɔɔ Triniti Tsɔɔmɔ Lɛ?
Nɛkɛ sane ni tsara nɔ nɛɛ mli Fa 1, ni je kpo yɛ November 1, 1991 Buu-Mɔɔ lɛ mli lɛ susu he kɛji Yesu kɛ ekaselɔi lɛ tsɔɔ Triniti tsɔɔmɔ lɛ—jwɛŋmɔ ni ayɔɔ akɛ Tsɛ lɛ, Bi lɛ, kɛ mumɔ krɔŋkrɔŋ lɛ ji mɛi etɛ ni yeɔ egbɔ, shi Nyɔŋmɔ kome lɛ. Odaseyeli ni mli ka shi faŋŋ ni jɛ Biblia mli, kɛjɛ yinɔsane ŋmalalɔi aŋɔɔ, kɛ nɔ ni jɛ Nyɔŋmɔ jamɔ he nilelɔi po aŋɔɔ lɛ tsɔɔ akɛ amɛfeee nakai. Shi sɔlemɔ hiɛnyiɛlɔi ni ba yɛ amɛsɛɛ nɔŋŋ lɛ hu—ani amɛtsɔɔ Triniti ko?
“BƆFOI LƐ ABEIAŊ TSƐMƐI” ji gbɛi ni akɛtsuɔ nii ahaa sɔlemɔ lɛ mli bii ni ŋmala Kristojamɔ he saji yɛ wɔ Ŋmɛnɛŋmɛnɛ Beaŋ klɛŋklɛŋ afii oha lɛ naagbee kɛ afii ohai enyɔ lɛ shishijee mli gbɛ lɛ. Amɛteŋ mɛi komɛi ji Clement ni jɛ Roma lɛ, Ignatius, Polycarp, Hermas, kɛ Papias.
Awieɔ amɛhe akɛ amɛkɛ bɔfoi lɛ hi shi yɛ be kome mli. No hewɔ lɛ, esa akɛ amɛle bɔfoi lɛ atsɔɔmɔi jogbaŋŋ diɛŋtsɛ. The New Encyclopædia Britannica lɛ kɛɔ yɛ nɔ ni nɛkɛ hii nɛɛ ŋmala lɛ ahe akɛ:
“Kɛji abua fɛɛ naa lɛ, Bɔfoi lɛ Abeiaŋ Tsɛmɛi lɛ aniŋmaai lɛ ahe yɛ sɛɛnamɔ waa yɛ yinɔsane mli fe Kristofoi awolo fɛɛ wolo ni aŋma yɛ Kpaŋmɔ Hee lɛ sɛɛ.”1
Kɛji bɔfoi lɛ tsɔɔ Triniti tsɔɔmɔ lɛ, no lɛ esa akɛ nakai Bɔfoi lɛ Abeiaŋ Tsɛmɛi lɛ hu atsɔɔ. Kulɛ esa akɛ eje kpo jogbaŋŋ yɛ amɛtsɔɔmɔ lɛ mli, ejaakɛ nɔ ko kwraa bɛ ni he hiaa fe ni amɛaakɛɛ gbɔmɛi mɔ ni Nyɔŋmɔ ji. No hewɔ lɛ ani amɛtsɔɔ Triniti tsɔɔmɔ lɛ?
Mra Be Mli Wiemɔ ni Tsɔɔ Hemɔkɛyeli
Anaa Kristofoi ahemɔkɛyeli lɛ he shishijee wiemɔi ni jeee Biblia mli wiemɔi lɛ ateŋ ekome yɛ wolo ko ni hiɛ yitsei kukuji 16 ni atsɛɔ lɛ The Didache, loo Teaching of the Twelve Apostles lɛ mli. Yinɔsaneŋmalɔi komɛi kɛɔ akɛ aŋma aaafee afi 100 Ŋ.B. lɛ mli aloo dani nakai afi lɛ po shɛ. Aleee mɔ ni ŋma. 2
The Didache lɛ wieɔ nibii ni ehe baahia ni gbɔmɛi ale dani amɛtsɔmɔ Kristofoi lɛ ahe. Yɛ eyitso ni ji 7 lɛ mli lɛ, ewieɔ baptisimɔ “yɛ Tsɛ lɛ kɛ Bi lɛ kɛ Mumɔ Krɔŋkrɔŋ lɛ gbɛi amli” lɛ he akɛ mla, yɛ wiemɔ koome ni Yesu kɛtsu nii yɛ Mateo 28:19 lɛ nɔŋŋ mli. 3 Shi ewieee nɔ ko yɛ mɛi etɛ lɛ egbɔyeli yɛ naanɔ shihilɛ, hewalɛ, gbɛhe, kɛ nilee mli lɛ he. Yɛ eyitso ni ji 10 lɛ mli lɛ, The Didache lɛ kɛ hemɔkɛyeli jajemɔ ni nyiɛ sɛɛ nɛɛ ni tamɔ sɔlemɔ lɛ fataa he akɛ:
“Wɔmiida bo shi, Tsɛ Krɔŋkrɔŋ, yɛ o-Gbɛi krɔŋkrɔŋ lɛ ni oha ehi wɔtsuii amli lɛ hewɔ; kɛ agbɛnɛ yɛ nilee kɛ hemɔkɛyeli kɛ shihilɛ ni gbele bɛ mli ni oha wɔle kɛtsɔ o-Tsulɔ Yesu nɔ lɛ hewɔ. Anunyam aha bo kɛya naanɔ! Bo, Nuŋtsɔ Ofe, bo obɔ nibii fɛɛ yɛ o-Gbɛi lɛ hewɔ . . . Ni ojɛ mlihilɛ mli okɛ mumɔŋ niyenii kɛ numɔ nɔ eha wɔ, kɛ naanɔ wala hu kɛtsɔ o-Tsulɔ Yesu nɔ.” 4
Triniti ko kwraa bɛ enɛ mli. Edwin Hatch tsɛ wiemɔ kuku ni yɔɔ yiteŋgbɛ nɛɛ sɛɛ yɛ The Influence of Greek Ideas on Christianity lɛ mli kɛkɛ ni ekɛɛ:
“Etamɔ nɔ ni hiɛyaa kpele ko baaa yɛ nɛkɛ susumɔi ni mli ka shi faŋŋ nɛɛ amli yɛ hei ni Kristojamɔ na hewalɛ yɛ, kɛjɛ shishijee mli lɛ. Tsɔɔmɔ ni ama nɔ mi waa ji akɛ, Nyɔŋmɔ yɛ, ni akɛ Mɔ kome ni, ni akɛ ofe ji Lɛ ni eyɛ kɛmiiya naanɔ, akɛ Lɛ efee je lɛ, ni akɛ E-mɔbɔnalɛ hiɔ E-nitsumɔi lɛ fɛɛ nɔ. Amɛkɛ amɛjwɛŋmɔ eyaaa jeŋ nilee mli niiahesusumɔ ko ni anuuu shishi nɔ.”5
Clement ni Jɛ Roma Lɛ
Clement ni jɛ Roma, ni asusu akɛ lɛ ji “osɔfonukpa” yɛ nakai maŋtiase lɛ mli lɛ ji niŋmaai ni kɔɔ Kristojamɔ he lɛ ashishijee jɛɛhe kroko. Aheɔ ayeɔ akɛ egbo aaafee afi 100 Ŋ.B. Etsiii Triniti ko kwraa ta yɛ nii ni akɛɔ akɛ lɛ eŋma lɛ mli, yɛ wiemɔi ni je shi faŋŋ aloo nɔ ni ejeee shi faŋŋ mli. Ewie yɛ First Epistle of Clement to the Corinthians lɛ mli akɛ:
“Duromɔ aha nyɛ, ni toiŋjɔlɛ ni jɛ Nyɔŋmɔ Ofe lɛ ŋɔɔ kɛtsɔ Yesu Kristo nɔ aku abɔ he aha nyɛ.”
“Bɔfoi lɛ eshiɛ Sanekpakpa lɛ amɛha wɔ kɛjɛ Nuŋtsɔ Yesu Kristo ŋɔɔ; Yesu Kristo hu efee nakai kɛjɛ Nyɔŋmɔ ŋɔɔ. No hewɔ lɛ Nyɔŋmɔ ji mɔ ni tsu Kristo kɛba, ni Kristo hu tsu bɔfoi lɛ.”
“Eba akɛ Nyɔŋmɔ, mɔ ni naa nibii fɛɛ, ni eji mumɔi fɛɛ a-Nɔyelɔ kɛ heloo fɛɛ nɔ Nuŋtsɔ lɛ—mɔ ni hala wɔ-Nuŋtsɔ Yesu Kristo, kɛ wɔ hu kɛtsɔ E-nɔ koni wɔtsɔmɔ maŋ krɛdɛɛ lɛ—aha susuma fɛɛ susuma ni tsɛɔ E-Gbɛi ni yɔɔ nyam kɛ krɔŋkrɔŋ lɛ, hemɔkɛyeli, gbeyeishemɔ, toiŋjɔlɛ, tsuishitoo, tsuishiŋmɛɛ.”6
Clement ekɛɛɛ akɛ Yesu aloo mumɔ krɔŋkrɔŋ lɛ kɛ Nyɔŋmɔ yeɔ egbɔ. Ewieɔ Nyɔŋmɔ Ofe lɛ he (jeee akɛ “Tsɛ” kɛkɛ, shi) akɛ esoro lɛ kwraa yɛ Bi lɛ he. Awieɔ Nyɔŋmɔ he akɛ enɔ kwɔ, ejaakɛ Nyɔŋmɔ ji “mɔ ni tsu” Kristo kɛba, ni Nyɔŋmɔ “hala” Kristo. Beni etsɔɔ akɛ Nyɔŋmɔ kɛ Kristo ji gbɔmɛi sɔrɔtoi ni yeee egbɔ hu lɛ, Clement kɛɛ:
“Wɔkɛ sɔlemɔ kɛ faikpamɔ ni mli wa baakpa fai koni jeŋ muu fɛɛ Bɔlɔ lɛ aha emɛi ni ahala yɛ jeŋ muu lɛ mli fɛɛ lɛ ayibɔ lɛ ahi shi nakai pɛpɛɛpɛ, kɛtsɔ e-Bi Yesu Kristo ni esumɔɔ lɛ lɛ nɔ. . . . Wɔyooɔ akɛ bo [Nyɔŋmɔ] okome pɛ ‘onɔ kwɔ fe fɛɛ yɛ mɛi ni nɔ kwɔ lɛ ateŋ’ . . . Bo okome pɛ ji mumɔi lɛ ahebulɔ kɛ heloo fɛɛ Nyɔŋmɔ.”
“Ha jeŋmaji lɛ fɛɛ ayoo akɛ bo okome pɛ ji Nyɔŋmɔ, ni akɛ Yesu Kristo ji o-Bi.”7
Clement tsɛɔ Nyɔŋmɔ (jeee akɛ “Tsɛ” kɛkɛ, shi) akɛ “[e]nɔ kwɔ fe fɛɛ,” ni etsɛɔ Yesu akɛ Nyɔŋmɔ “Bi.” Ewieɔ yɛ Yesu he hu akɛ: “Akɛni ejieɔ Nyɔŋmɔ anunyam lɛ kpo hewɔ lɛ, enɔ kwɔ fe ŋwɛibɔfoi lɛ tamɔ bɔ ni esabala lɛ haa esoroɔ lɛ kwraa fe amɛnɔ lɛ.”8 Yesu jieɔ Nyɔŋmɔ anunyam kpo, shi ekɛ no yeee egbɔ, tamɔ bɔ ni nyɔŋtsere jieɔ hulu lɛ kpɛmɔ kpo, shi ekɛ nakai la lɛ jɛɛhe, ni ji hulu lɛ yeee egbɔ lɛ nɔŋŋ pɛpɛɛpɛ.
Eji Nyɔŋmɔ Bi lɛ kɛ Nyɔŋmɔ, ni ji ŋwɛi Tsɛ lɛ yeɔ egbɔ kulɛ, ehe ebahiaŋ ni Clement akɛɛ akɛ Yesu nɔ kwɔ fe ŋwɛibɔfoi lɛ, ejaakɛ enɛ baafee nɔ ko ni anaa faŋŋ. Ni bɔ ni ewie lɛ tsɔɔ bɔ ni ekpɛlɛɔ nɔ ehaa, akɛ eyɛ mli akɛ Bi lɛ nɔ kwɔ fe ŋwɛibɔfoi lɛ moŋ, shi ebaa shi fe Nyɔŋmɔ Ofe lɛ.
Jwɛŋmɔ ni Clement hiɛ lɛ mli ka shi faŋŋ: Bi lɛ baa shi fe Tsɛ lɛ, ni ebaa yɛ esɛɛ. Clement susuuu Yesu he akɛ efata Tsɛ lɛ he yɛ nyɔŋmɔ-su ko mli. Etsɔɔ akɛ Bi lɛ kɛ ehe fɔɔ Tsɛ lɛ, ni ji Nyɔŋmɔ nɔ, ni ekɛɔ yɛ wiemɔ faŋŋ mli akɛ Tsɛ lɛ ‘pɛ ji Nyɔŋmɔ,’ ni ekɛ mɔ ko ejaaa E-gbɛhe lɛ. Ni he ko he ko bɛ ni Clement haa mumɔ krɔŋkrɔŋ lɛ kɛ Nyɔŋmɔ yeɔ egbɔ yɛ. Enɛ hewɔ lɛ, Triniti ko kwraa bɛ nibii ni Clement ŋmala lɛ eko mli.
Ignatius
Ignatius, ni ji osɔfonukpa ni jɛ Antiokia lɛ hi shi kɛjɛ aaafee Ŋ.B. klɛŋklɛŋ afii oha lɛ teŋ gbɛ kɛyashi afii ohai enyɔ lɛ shishijee mli gbɛ. Kɛji wɔɔŋɔ lɛ akɛ nibii ni akɛɛ lɛ eŋmala lɛ fɛɛ ji anɔkwale po lɛ, eko kwraa bɛ ni Tsɛ, Bi, kɛ mumɔ krɔŋkrɔŋ yeɔ egbɔ yɛ mli.
Ni kɛji Ignatius wie akɛ Bi lɛ kɛ Tsɛ lɛ yeɔ egbɔ yɛ naanɔ shihilɛ, hewalɛ, gbɛhe, kɛ nilee mli kwraa po lɛ, no efeŋ Triniti kɔkɔɔkɔ, ejaakɛ he ko kwraa bɛ ni ewie yɛ akɛ mumɔ krɔŋkrɔŋ lɛ kɛ Nyɔŋmɔ yeɔ egbɔ yɛ nakai gbɛi anɔ. Shi Ignatius ewieee akɛ Bi lɛ kɛ Nyɔŋmɔ ni ji Tsɛ lɛ yeɔ egbɔ yɛ nakai gbɛi anɔ aloo yɛ gbɛ kroko nɔ. Shi moŋ, etsɔɔ akɛ Bi lɛ baa ehe shi ehaa Mɔ ni nɔ kwɔ fe lɛ lɛ, Nyɔŋmɔ Ofe lɛ.
Ignatius tsɛɔ Nyɔŋmɔ Ofe lɛ “anɔkwa Nyɔŋmɔ kome lɛ, mɔ ni abɔɔɔ lɛ ni anyɛɛɛ abɛŋkɛ lɛ lɛ, mɛi fɛɛ a-Nuŋtsɔ, Tsɛ kɛ Bi koome lɛ Bɔlɔ lɛ,” ni ekɛtsɔɔ sɔrɔto-feemɔ ni yɔɔ Nyɔŋmɔ kɛ E-Bi lɛ teŋ.9 Ewieɔ “Nyɔŋmɔ ni ji Tsɛ lɛ, kɛ Nuŋtsɔ Yesu Kristo”10 he. Ni ejajeɔ akɛ: “Nyɔŋmɔ kome pɛ yɔɔ, Ofe lɛ, mɔ ni ejie E-he kpo kɛtsɔ E-Bi Yesu Kristo nɔ lɛ.”11
Ignatius tsɔɔ akɛ Bi lɛ jeee mɔ ko ni ehi shi kɛjɛ naanɔ shi moŋ abɔ lɛ, ejaakɛ taakɛ etsɔɔ lɛ, Bi lɛ kɛɛ akɛ: “Nuŋtsɔ [Nyɔŋmɔ Ofe] lɛ bɔ Mi, ni ji E-gbɛ̃i lɛ shishijee lɛ.”12 Nakai nɔŋŋ hu, Ignatius wie akɛ: “Jeŋ muu fɛɛ Nyɔŋmɔ kome pɛ yɔɔ, Kristo Tsɛ lɛ, ‘mɔ mli ni nibii fɛɛ jɛ lɛ;’ kɛ Nuŋtsɔ Yesu Kristo kome, wɔ-Nuŋtsɔ lɛ, ‘mɔ ni nibii fɛɛ tsɔ enɔ kɛba lɛ.’”13 Eŋma hu akɛ:
“Mumɔ Krɔŋkrɔŋ lɛ ewieee lɛ diɛŋtsɛ ewiemɔi, shi moŋ Kristo wiemɔi, . . . taakɛ bɔ ni Nuŋtsɔ lɛ hu tswa nibii ni E-nine shɛ nɔ kɛjɛ Tsɛ lɛ dɛŋ lɛ ahe adafi etsɔɔ wɔ lɛ. Ejaakɛ, Lɛ [Bi lɛ] kɛɔ akɛ, ‘wiemɔ ni nyɛnu lɛ jeee Mi-wiemɔi, shi moŋ Tsɛ lɛ, mɔ ni tsu Mi lɛ nɔ.”14
“Nyɔŋmɔ kome pɛ yɔɔ, mɔ ni jie ehe kpo kɛtsɔ e-Bi Yesu Kristo, mɔ ni ji e-Wiemɔ lɛ ni ba kɛjɛ dioo-feemɔ mli, ni esa [Nyɔŋmɔ] mɔ ni tsu lɛ lɛ hiɛ yɛ nibii fɛɛ mli lɛ nɔ. . . . Yesu Kristo baa ehe shi ehaa Tsɛ lɛ.”15
Lɛlɛŋ, Ignatius tsɛɔ Bi lɛ “Nyɔŋmɔ ni ji Wiemɔ lɛ.” Shi wiemɔ “Nyɔŋmɔ” ni ekɛtsu nii eha Bi lɛ etsɔɔɔ doo akɛ ekɛ Nyɔŋmɔ Ofe lɛ yeɔ egbɔ. Biblia lɛ hu tsɛɔ Bi lɛ yɛ Yesaia 9:6 akɛ “Nyɔŋmɔ.” Yohane 1:18 (NW) tsɛɔ Bi lɛ akɛ “nyɔŋmɔ koome lɛ.” Akɛni akɛ hewalɛ kɛ hegbɛ ni jɛ Yehowa Nyɔŋmɔ, ni ji Tsɛ lɛ dɛŋ eha lɛ hewɔ lɛ, abaanyɛ atsɛ Bi lɛ yɛ gbɛ ni ja nɔ akɛ “hewalɔ,” ni ji wiemɔ “nyɔŋmɔ” lɛ klɛŋklɛŋ shishinumɔ lɛ.—Mateo 28:18; 1 Korintobii 8:6; Hebribii 1:2.
Shi, ani akpɛlɛɔ woji 15 ni akɛɛ Ignatius ŋmala lɛ anɔ akɛ anɔkwale? Woloŋmalɔi Alexander Roberts kɛ James Donaldson wie yɛ The Ante-Nicene Fathers, Kpo I lɛ mli akɛ:
“Jwɛŋmɔ ni mɛi ni wieɔ shiɔ lɛ fɛɛ hiɛ amrɔ nɛɛ ji akɛ, nɛkɛ woji ni akɛɛ Ignatius ŋmala nɛɛ amli klɛŋklɛŋ kpaanyɔ lɛ ji amale. Odaseyeli yɛ mli ni anyɛŋ aje he ŋwane, ni tsɔɔ akɛ amɛji sɛɛ mli yinɔ ko nitsumɔ . . . ni amrɔ nɛɛ akɛfɔɔ afa kɛ mɛi pii anɔkpɛlɛmɔ akɛ nibii ni aŋmala yɛ mɔ kroko gbɛi amli.”
“Yɛ Woji kpawo ni aŋma amaje ni Eusebius kpɛlɛɔ nɔ lɛ agbɛfaŋ lɛ . . . , wɔyɛ eheei enyɔ ni aŋmala yɛ Hela mli, kuku kɛ kakadaŋŋ. . . . Eyɛ mli akɛ nɔ ni yɔɔ kuku lɛ ji . . . nɔ ni afɔɔ nɔkpɛlɛmɔ yɛ kakadaŋŋ lɛ najiaŋ moŋ, shi kɛlɛ, woloŋlelɔi yaa nɔ amɛsusuɔ lolo akɛ, anyɛŋ abu lɛ akɛ nɔ ni akɛ mɛi krokomɛi awiemɔi fatako he, aloo nɔ ni ajeee anɔkwale ni eji lɛ he ŋwane.”16
Kɛji wɔkpɛlɛ eniŋmaai lɛ amli kuku lɛ nɔ akɛ anɔkwale lɛ, ejieɔ wiemɔi kukuji komɛi (ni yɔɔ niŋmaa kakadaŋŋ lɛ mli) ni tsɔɔ akɛ Kristo baa shi fe Nyɔŋmɔ lɛ kɛjɛɔ mli, shi nɔ ni shwɛɔ yɛ niŋmaa kuku lɛ mli lɛ etsɔɔɔ Triniti ko. Ni eniŋmaai lɛ amli nɔ ni ji anɔkwale lɛ fɛɛ sɛɛ po lɛ, kɛ akwɛ mli jogbaŋŋ lɛ, nɔ ni amɛtsɔɔ ji akɛ Ignatius he eye akɛ Nyɔŋmɔ kɛ e-Bi lɛ ji mɛi enyɔ ni efee ekome. Eka shi faŋŋ akɛ enɛ jeee enyɔ ni efee ekome yɛ egbɔyeli mli, ejaakɛ awieɔ Bi lɛ he be fɛɛ be akɛ ebaa shi fe Nyɔŋmɔ ni ebaa ehe shi ehaa lɛ. No hewɔ lɛ, bɔ fɛɛ bɔ ni mɔ ko baasusu Ignatius niŋmaai lɛ ahe aha lɛ, anaaa Triniti tsɔɔmɔ ko kwraa yɛ mli,
Polycarp
Afɔ Polycarp ni jɛ Smirna lɛ yɛ klɛŋklɛŋ afii oha lɛ mli naagbee mlijaa etɛ lɛ mli ni egbo yɛ afii ohai enyɔ lɛ teŋ gbɛ. Awieɔ akɛ ekɛ bɔfo Yohane na sharamɔ, ni awieɔ akɛ lɛ ji mɔ ni ŋma wolo ni ji Epistle of Polycarp to the Philippians lɛ.
Ani nɔ ko yɛ Polycarp niŋmaai lɛ amli ni baatsɔɔ Triniti ko? Dabi, atsiii ta kwraa yɛ mli. Yɛ anɔkwale mli lɛ, nɔ ni ewie lɛ kɛ nɔ ni Yesu kɛ ekaselɔi lɛ kɛ bɔfoi lɛ tsɔɔ lɛ kpaa gbee. Akɛ nɔkwɛmɔ nɔ lɛ, Polycarp wie yɛ Epistle, loo ewolo lɛ mli akɛ:
“Eba akɛ wɔ-Nuŋtsɔ Yesu Kristo Nyɔŋmɔ kɛ Tsɛ lɛ, kɛ Yesu Kristo Diɛŋtsɛ, ni ji Nyɔŋmɔ Bi lɛ, . . . atswa nyɛ ama shi yɛ hemɔkɛyeli kɛ anɔkwale mli.”17
Kadimɔ akɛ, taakɛ Clement ji lɛ, Polycarp ewieee Triniti “Tsɛ” kɛ “Bi” wekukpaa ko ni amɛyeɔ egbɔ yɛ nyɔŋmɔ-su mli lɛ he. Shi moŋ, ewieɔ Yesu “Nyɔŋmɔ kɛ Tsɛ lɛ” he, ni jeee akɛ ‘Yesu Tsɛ’ kɛkɛ. No hewɔ lɛ egbalaa Yesu mli kɛjɛɔ Nyɔŋmɔ he, taakɛ bɔ ni Biblia ŋmalalɔi lɛ feɔ be fɛɛ be lɛ. Paulo kɛɔ yɛ 2 Korintobii 1:3 akɛ: “Ajɔɔ Nyɔŋmɔ kɛ wɔ-Nuŋtsɔ Yesu Kristo Tsɛ lɛ.” Ekɛɛɛ kɛkɛ akɛ, ‘Ajɔɔ Yesu Tsɛ lɛ’ shi moŋ, ‘Ajɔɔ Nyɔŋmɔ kɛ Yesu Tsɛ lɛ.’
Agbɛnɛ hu, Polycarp wie akɛ: “Toiŋjɔlɛ ni jɛ Nyɔŋmɔ Ofe lɛ, kɛ Nuŋtsɔ Yesu Kristo, wɔ-Yiwalaherelɔ lɛ ŋɔɔ aha nyɛ.”18 Yɛ biɛ hu lɛ, esoro Yesu kwraa yɛ Nyɔŋmɔ Ofe lɛ he, ni ejeee mɛi etɛ ni efee ekome yɛ Nyɔŋmɔ-su mli lɛ ateŋ mɔ kome.
Hermas kɛ Papias
Bɔfoi lɛ Abeiaŋ Tsɛ kroko hu ji Hermas, ni ŋma nii yɛ afii ohai enyɔ lɛ klɛŋklɛŋ fa lɛ mli lɛ. Ani ewie nɔ ko yɛ ewoji ni ji Shepherd, aloo Pastor lɛ amli ni baanyiɛ mɔ ko hiɛ ni ehe eye akɛ enu shishi akɛ Nyɔŋmɔ lɛ Triniti ni? Kadimɔ nibii ni ewie lɛ amli nɔkwɛmɔ nii komɛi:
“Jeee kɛji gbɔmɔ miitao ni mumɔ lɛ awie ni Mumɔ Krɔŋkrɔŋ lɛ wieɔ, shi ewieɔ kɛji Nyɔŋmɔ pɛ miitao ni ewie. . . . Nyɔŋmɔ fee weintrom lɛ, aloo kɛ wɔɔkɛɛ lɛ, Lɛ ebɔ gbɔmɛi lɛ, ni ekɛ amɛ ha E-Bi lɛ; ni Bi lɛ hala E-ŋwɛibɔfoi lɛ eto amɛnɔ koni amɛbu amɛhe.”19
“Nyɔŋmɔ Bi lɛ eye afii babaoo fe enibɔɔ nii lɛ fɛɛ.”20
Hermas miiwie yɛ biɛ akɛ kɛji Nyɔŋmɔ (jeee Tsɛ lɛ kɛkɛ) miitao ni mumɔ lɛ awie lɛ, ewieɔ, ni tsɔɔ akɛ Nyɔŋmɔ nɔ kwɔ fe mumɔ lɛ. Ni ewie akɛ Nyɔŋmɔ kɛ weintrom lɛ ha e-Bi lɛ, ni tsɔɔ akɛ Nyɔŋmɔ nɔ kwɔ fe Bi lɛ. Ewie hu akɛ Nyɔŋmɔ Bi lɛ eye afii babaoo fe lɛ, Bi lɛ bɔɔ nibii, ni ji mɛi ni Nyɔŋmɔ Bi lɛ bɔ akɛ Nyɔŋmɔ Ŋaalɔ Nukpa lɛ, “ejaakɛ lɛ emli abɔ nii fiaa yɛ, nii ni yɔɔ ŋwɛi kɛ nii ni yɔɔ shikpɔŋ lɛ nɔ.” (Kolosebii 1:15, 16) Anɔkwale lɛ ji akɛ Bi lɛ bɛ kɛjɛ naanɔ. Abɔ lɛ akɛ mumɔŋ bɔɔ nɔ ni nɔ kwɔ waa, dani abɔ mumɔŋ bɔɔ nii krokomɛi, tamɔ ŋwɛibɔfoi, ni atsɔ lɛ enɔ abɔ amɛ lɛ.
J. N. D. Kelly ŋma shishinumɔ ni Hermas yɔɔ yɛ Nyɔŋmɔ Bi lɛ he lɛ he saji yɛ ewolo Early Christian Doctrines lɛ mli akɛ:
“Wɔkaneɔ ŋwɛibɔfo ko ni nɔ kwɔ yɛ ŋwɛibɔfoi ekpaa ni feɔ Nyɔŋmɔ gwabɔɔ lɛ mli onukpai lɛ ateŋ, ni awieɔ ehe be fɛɛ be akɛ ‘mɔ ni abuɔ lɛ fe fɛɛ’, ‘mɔ krɔŋkrɔŋ,’ kɛ ‘mɔ ni hiɛ yɔɔ nyam’ lɛ he sane yɛ niŋmaai kukuji babaoo mli. Aha nɛkɛ ŋwɛibɔfo nɛɛ gbɛi akɛ Mikael, ni ewa waa akɛ wɔɔjo sane naamuu nɛɛ naa foi, akɛ Hermas susu ehe akɛ lɛ ji Nyɔŋmɔ Bi lɛ, ni ekɛ lɛ to bɔfonukpa Mikael he akɛ ekɛ lɛ yeɔ egbɔ.”
“Odaseyeli hu yɛ ni tsɔɔ . . . bɔ ni abɔ mɔdɛŋ ni awie Kristo he akɛ ŋwɛibɔfo ko ni nɔ kwɔ . . . Shi yɛ Triniti tsɔɔmɔ ko he yɛ eshishinumɔ diɛŋtsɛ naa lɛ, yɛ anɔkwale mli lɛ ehe okadi ko kwraa bɛ.”21
Awieɔ akɛ Papias hu le bɔfo Yohane jogbaŋŋ. Ekolɛ eŋmala ewoji lɛ yɛ afii ohai enyɔ lɛ shishijee mli gbɛ, shi eniŋmaai lɛ amli kukuji fioo komɛi pɛ yɔɔ ŋmɛnɛ. Ewieee Triniti ko he yɛ emli eko kwraa mli.
Tsɔɔmɔ ni kɛ Ehe Kpaa Gbee
Yɛ sane ni kɔɔ bɔ ni Nyɔŋmɔ nɔ kwɔ fe fɛɛ kɛ wekukpaa ni ka ekɛ Yesu teŋ lɛ he lɛ, Bɔfoi lɛ Abeiaŋ Tsɛmɛi lɛ atsɔɔmɔi lɛ kɛ Yesu tsɔɔmɔi, kɛ ekaselɔi lɛ, kɛ bɔfoi lɛ anɔ, taakɛ aŋmala yɛ Biblia lɛ mli lɛ kpaa gbee jogbaŋŋ diɛŋtsɛ. Amɛ fɛɛ amɛwieɔ Nyɔŋmɔ he, jeee akɛ Triniti, shi moŋ akɛ Mɔ ko ni esoro lɛ kwraa, eyɛ kɛmiiya naanɔ, ofe, ni ele nibii fɛɛ. Ni amɛwieɔ Nyɔŋmɔ Bi lɛ he akɛ mɔ ko ni hiɛ ehe, ni ebaa shi, mumɔŋ bɔɔ nɔ ni baa ehe shi ni Nyɔŋmɔ bɔ lɛ koni esɔmɔ Lɛ kɛtsu E-suɔmɔnaa nii ahe nii kɛgbe naa. Ni he ko bɛ ni akɛ mumɔ krɔŋkrɔŋ lɛ fataa Nyɔŋmɔ he yɛ akɛ ekɛ lɛ yeɔ egbɔ.
Enɛ hewɔ lɛ, nɔ ko kwraa bɛ nibii ni Bɔfoi lɛ Abeiaŋ Tsɛmɛi lɛ ŋmala yɛ nakai klɛŋklɛŋ afii oha lɛ naagbee gbɛ kɛ afii ohai enyɔ lɛ shishijee lɛ amli ni fiɔ Kristendom Triniti lɛ sɛɛ. Amɛwie Nyɔŋmɔ, kɛ Yesu, kɛ mumɔ krɔŋkrɔŋ lɛ he tamɔ Biblia lɛ wieɔ amɛhe lɛ nɔŋŋ. Akɛ nɔkwɛmɔ nɔ lɛ, kwɛmɔ Bɔfoi lɛ Asaji 7:55, 56:
“Ni Stefano, ni Mumɔ Krɔŋkrɔŋ eyi lɛ obɔ lɛ, kwɛ ŋwɛi gaa ni ena Nyɔŋmɔ anunyam lɛ, kɛ Yesu ni edamɔ Nyɔŋmɔ ninejurɔ nɔ. Ni ekɛɛ: ‘Miina ŋwɛi naa ni egbele, kɛ Gbɔmɔ Bi lɛ ni edamɔ Nyɔŋmɔ ninejurɔ nɔ.’”—Katolek Jerusalem Bible.
Stefano na Nyɔŋmɔ he ninaa yɛ ŋwɛi ni Yesu damɔ emasɛi kpaakpa Bi lɛ damɔ Mɔ ni jeee “Tsɛ” kɛkɛ atsɛɔ lɛ, shi moŋ “Nyɔŋmɔ” hu, mɔ ni esoro lɛ kwraa yɛ Yesu he lɛ masɛi kpaakpa. Ni mɔ ni ji etɛ ko fataaa he yɛ nɔ ni Stefano na nɛɛ mli. Enaaa mumɔ krɔŋkrɔŋ lɛ yɛ ŋwɛi ni efata Yesu kɛ e-Tsɛ he.
Enɛ tamɔ Kpojiemɔ 1:1 hu nɔŋŋ, he ni kɛɔ akɛ: “Enɛ ji kpojiemɔ ni Nyɔŋmɔ kɛha Yesu Kristo lɛ.” (The Jerusalem Bible) Shikome ekoŋŋ lɛ, awieɔ Kristo ni atee lɛ shi ni eyɔɔ ŋwɛi lɛ he akɛ esoro lɛ kwraa yɛ Nyɔŋmɔ he, ni atsiii mumɔ krɔŋkrɔŋ lɛ ta kwraa. Eji Yesu ji mɔ ni ji enyɔ yɛ Triniti ko mli, ni ele nibii fɛɛ kulɛ, te aaafee tɛŋŋ ni akɛ kpojiemɔ ‘aha lɛ’ lɛ?
Ŋmalɛi tamɔ enɛɛmɛi tsɔɔ faŋŋ akɛ Triniti ko bɛ. Ni ŋmalɛ ko kwraa bɛ Biblia muu lɛ fɛɛ mli ni wieɔ Nyɔŋmɔ he akɛ eji Triniti. Nibii ni Bɔfoi lɛ Abeiaŋ Tsɛmɛi lɛ ŋmala lɛ jie enɛ kpo faŋŋ. Eka shi faŋŋ akɛ amɛtsɔɔɔ Kristendom Triniti tsɔɔmɔ lɛ kwraa.
Kuu ni nyiɛ sɛɛ ni he hiaa ni ji Kristojamɔ he niŋmaai lɛ je kpo yɛ afii ohai enyɔ lɛ naagbee gbɛ. Enɛɛmɛi ji sɔlemɔyalɔi komɛi ni atsɛɔ amɛ akɛ hemɔkɛyeli hefalɔi lɛ anitsumɔi. Ani amɛtsɔɔ Triniti ko? Nɛkɛ saji ni tsara nɔ nɛɛ Fa 3 baawie amɛtsɔɔmɔi lɛ ahe, yɛ nɔ ni baaba yɛ sɛɛ mli lɛ amli.
Woji ni akwɛ mli:
1. The New Encyclopaedia Britannica, 15th Edition, 1985, Micropaedia, Volume 1, baafa 488.
2. A Dictionary of Christian Theology, ni Alan Richardson ŋma lɛ, 1969, baafa 95; The New Encyclopædia Britannica, 15th Edition, 1985, Micropaedia, Volume 4, baafa 79.
3. The Apostolic Fathers, Volume 3, ni Robert A. Kraft ŋma lɛ, 1965, baafa 163.
4. Ibid., 1965, baafai 166-7.
5. The Influence of Greek Ideas on Christianity, ni Edwin Hatch ŋma lɛ, 1957, baafa 252.
6. The Ante-Nicene Fathers, Alexander Roberts kɛ James Donaldson, mɛi ni ŋmala, American Re-print of the Edinburgh Edition, 1885, Volume I, baafai 5, 16, 21.
7. The Library of Christian Classics, Volume l, Early Christian Fathers, ni Cyril C. Richardson tsɔɔ shishi ni ekwɛ mli lɛ, 1953, baafai 70-1.
8. Ibid., baafa 60.
9. The Ante-Nicene Fathers, Volume l, baafa 52.
10. Ibid., baafa 58.
11. Ibid., baafa 62.
12. Ibid., baafa 108.
13. Ibid., baafa 116.
14. Ibid.. baafa 53.
15. The Apostolic Fathers, Volume 4, ni Robert M. Grant ŋma lɛ, 1966, baafa 63.
16. The Ante-Nicene Fathers, Volume I, baafai 46-7; Cyclopedia of Biblical, Theological, and Ecclesiastical Literature, by John McClintock and James Strong, Reprinted by Baker Book House Co., 1981, Volume IV, baafai 490-3; The Catholic Encyclopedia, 1910, Volume VII, baafai 644-7.
17. The Ante-Nicene Fathers, Volume I, baafa 35.
18. Ibid., baafa 33.
19. The Ante-Nicene Fathers, Volume II, baafai 27, 35.
20. The Apostolic Fathers (Loeb’s classical Library) with an English Translation by Kirsopp Lake, 1976, baafa 249.
21. Early Christian Doctrines, by J. N. D. Kelly, Second Edition, 1960, baafai 94-5.