Yehowa kɛ Bii Babaoo Baa Anunyam Mli
“Esa lɛ [Nyɔŋmɔ], . . . mɔ ni ŋɔɔ bii babaoo kɛbaa anunyam mli lɛ, akɛ eha amɛyiwalaheremɔ tatsɛnukpa lɛ atsɔ amanehului amli ahi kɛwula shi.”—HEBRIBII 2:10.
1. Mɛni hewɔ wɔbaanyɛ wɔna nɔmimaa akɛ Yehowa yiŋtoo kɛha adesai baaba mli lɛ?
YEHOWA bɔ shikpɔŋ lɛ koni ebafee adesa weku ni yeɔ emuu ni miiná naanɔ wala mli ŋɔɔmɔ lɛ anaanɔ shia. (Jajelɔ 1:4; Yesaia 45:12, 18) Eji anɔkwale akɛ wɔ blematsɛ Adam fee esha, ni yɛ enɛ hewɔ lɛ ekɛ esha kɛ gbele fɔ eshwiei. Shi Nyɔŋmɔ yiŋtoo kɛha adesai lɛ baaba mli kɛtsɔ e-Shiwoo Seshi, Yesu Kristo nɔ. (1 Mose 3:15; 22:18; Romabii 5:12-21; Galatabii 3:16) Suɔmɔ kɛha adesai aje lɛ kanya Yehowa koni “eŋɔ ebi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ena naanɔ wala.” (Yohane 3:16) Ni suɔmɔ tsirɛ Yesu koni “eŋɔ esusuma lɛ eha yɛ mɛi pii akpɔmɔ hewɔ.” (Mateo 20:28) Nɛkɛ “kpɔmɔnɔ̃ ni yeɔ egbɔ” (NW) nɛɛ héɔ hegbɛi kɛ gbɛkpamɔi ni Adam laaje lɛ lɛ ekoŋŋ, ni ehaa naanɔ wala feɔ nɔ ni baanyɛ aba.—1 Timoteo 2:5, 6; Yohane 17:3.
2. Yɛ mɛɛ gbɛ nɔ afee Yesu kpɔmɔ afɔleshãa lɛ kɛ nitsumɔ he mfoniri yɛ Israel daa afi Kpatamɔ Gbi lɛ nɔ?
2 Akɛ daa afi Kpatamɔ Gbi lɛ fee Yesu kpɔmɔ afɔleshaa lɛ kɛ nitsumɔ he mfoniri. Yɛ nakai gbi lɛ nɔ lɛ, klɛŋklɛŋ lɛ, Israel osɔfonukpa lɛ gbeɔ tsinanuu akɛ esha afɔleshãa, ni ekɛ elá lɛ yaa Kpatamɔ Sɛi lɛ ni yɔɔ kpee buu lɛ He Krɔŋkrɔŋ Fe Fɛɛ lɛ mli lɛ hiɛ, kɛ sɛɛ mli lɛ yɛ sɔlemɔtsu lɛ mli. Efeɔ enɛ kɛhaa lɛ diɛŋtsɛ ehe, ewe lɛ, kɛ Levi akutso lɛ. Nakai nɔŋŋ Yesu Kristo kɛ elá lɛ jara yaha Nyɔŋmɔ, klɛŋklɛŋ lɛ koni akɛhà emumɔŋ “nyɛmimɛi” lɛ ahe eshai anɔ. (Hebribii 2:12; 10:19-22; 3 Mose 16:6, 11-14) Yɛ Kpatamɔ Gbi lɛ nɔ lɛ, osɔfonukpa lɛ gbeɔ tookpakpo akɛ esha afɔle, ni ekɛ elá lɛ yaa He Krɔŋkrɔŋ Fe Fɛɛ lɛ, ni ekɛkpataa kɛhaa Israel akutsei 12 ni jeee osɔfoi lɛ. Nakai nɔŋŋ hu, Osɔfonukpa Yesu Kristo kɛ elá ni ji ewala lɛ baatsu adesai ni jieɔ hemɔkɛyeli kpo lɛ ahe nii, ni efoɔ amɛhe eshai lɛ amli.—3 Mose 16:15.
Akɛ Amɛ Ba Anunyam Mli
3. Taakɛ Hebribii 2:9, 10 tsɔɔ lɛ, mɛni Nyɔŋmɔ etee nɔ efee yɛ afii 1,900 lɛ mli?
3 Nyɔŋmɔ kɛ afii 1,900 miifee nɔ ko ni yɔɔ naakpɛɛ yɛ Yesu “nyɛmimɛi” lɛ ahe. Bɔfo Paulo ŋma yɛ enɛ he akɛ: “Shi mɔ ni ahã shwɛ fioo kɛkɛ ni ekɛ ŋwɛibɔfoi aye egbɔ lɛ, wɔna akɛ Yesu ni, mɔ ni gbele mli amanehulu lɛ hewɔ ni akɛ anunyam kɛ woo fi lɛ akekre lɛ, bɔni afee ni Nyɔŋmɔ duromɔ naa lɛ esa enaa gbele eha mɔ fɛɛ mɔ. Ejaakɛ esa lɛ [Yehowa Nyɔŋmɔ], mɔ hewɔ ni nii fiaa yɔɔ, kɛ mɔ nɔ ni atsɔ ni nii fiaa yɔɔ lɛ, mɔ ni ŋɔɔ bii babaoo kɛbaa anunyam mli lɛ, akɛ eha amɛyiwalaheremɔ tatsɛnukpa lɛ atsɔ amanehului amli ahi kɛwula shi.” (Hebribii 2:9, 10) Yiwalaheremɔ Tatsɛnukpa lɛ ji Yesu Kristo, ni tsɔ nibii ni ena mli amanehulu beni eyɔɔ wala mli yɛ shikpɔŋ nɔ akɛ gbɔmɔ lɛ nɔ ekase toiboo ni yeɔ emuu lɛ. (Hebribii 5:7-10) Yesu ji klɛŋklɛŋ mɔ ni afɔ́ lɛ akɛ Nyɔŋmɔ mumɔŋ bi.
4. Mɛɛ be ni yɛ mɛɛ gbɛ nɔ afɔ́ Yesu akɛ Nyɔŋmɔ mumɔŋ Bi?
4 Yehowa kɛ emumɔ krɔŋkrɔŋ loo nifeemɔ hewalɛ lɛ tsu nii ni ekɛfɔ́ Yesu akɛ emumɔŋ Bi, bɔni afee ni akɛ lɛ aba ŋwɛi anunyam mli. Beni Yesu kɛ Yohane Baptisilɔ lɛ pɛ yɔɔ lɛ, etsɔ numiimɔ kwraa nɔ ekɛfee ehe ni ekɛhaa Nyɔŋmɔ lɛ he okadi. Luka Sanekpakpa lɛ mli saji lɛ kɛɔ akɛ: “Beni abaptisi mɛi lɛ fɛɛ lɛ, abaptisi Yesu hu; ni beni esɔleɔ lɛ, ŋwɛi gbele, ni Mumɔ krɔŋkrɔŋ lɛ kpeleke shi kɛ su ni tamɔ okpo su kɛba enɔ; ni gbee ko jɛ ŋwɛi kɛɛ: ‘Bo ji misuɔmɔ bi lɛ, bo ohe tsuijurɔ minaa!’ ” (Luka 3:21, 22) Yohane na ni mumɔ krɔŋkrɔŋ lɛ ba Yesu nɔ, ni enu ni Yehowa wie ni ekɛmiikpɛlɛ E-suɔmɔ Bi lɛ nɔ yɛ faŋŋ mli. Nakai be lɛ mli, Yehowa tsɔ mumɔ krɔŋkrɔŋ lɛ nɔ efɔ́ Yesu akɛ ‘bii babaoo ni akɛ amɛ baaba anunyam mli’ lɛ ateŋ klɛŋklɛŋ mɔ.
5. Namɛi bafee mɛi ni ná Yesu afɔleshãa lɛ he sɛɛ klɛŋklɛŋ, ni amɛyibɔ enyiɛ?
5 Yesu “nyɛmimɛi” lɛ efee klɛŋklɛŋ bii ni efɔleshãa lɛ he ba sɛɛnamɔ kɛha amɛ. (Hebribii 2:12-18) Bɔfo Yohane na amɛ yɛ ninaa mli ni amɛbote anunyam mli momo yɛ ŋwɛi Zion Gɔŋ lɛ nɔ kɛ Toobi lɛ, ni ji Nuntsɔ Yesu Kristo ni atee lɛ shi lɛ. Yohane tsɔɔ amɛyifalɛ hu, akɛ: “Ni mikwɛ, ni naa, toobi lɛ damɔ Zion gɔŋ lɛ nɔ, ni mɛi akpei oha kɛ-nyɔŋmai-ejwɛ-kɛ-ejwɛ ni aŋma egbɛi kɛ etsɛ gbɛi yɛ amɛhiɛŋtsei anɔ fata ehe. . . . Mɛnɛɛmɛi ji mɛi ni ahe kɛjɛ gbɔmɛi ateŋ ni amɛtsɔmɔ klɛŋklɛŋ yibii amɛha Nyɔŋmɔ kɛ toobi lɛ; ni anaaa amale ko yɛ amɛdaaŋ, ejaakɛ kpa ko bɛ amɛhe.” (Kpojiemɔ 14:1-5) No hewɔ lɛ ‘bii babaoo ni akɛ amɛ ba anunyam mli’ yɛ ŋwɛi lɛ ayibɔ ji 144,001 pɛ—Yesu kɛ emumɔŋ nyɛmimɛi lɛ.
“Ajɛ Nyɔŋmɔ Mli Afɔ́ Lɛ”
6, 7. Namɛi “ajɛ Nyɔŋmɔ mli afɔ́” amɛ lɛ, ni mɛni enɛ tsɔɔ kɛha amɛ?
6 “Ajɛ Nyɔŋmɔ mli afɔ́” mɛi ni Yehowa ŋɔɔ amɛ akɛ bii lɛ. Beni bɔfo Yohane wieɔ etsɔɔ nɛkɛ aŋkroaŋkroi nɛɛ lɛ eŋma akɛ: “Mɔ fɛɛ mɔ ni ajɛ Nyɔŋmɔ mli afɔ́ lɛ lɛ, efeee esha, ejaakɛ [Yehowa] ewui hiɔ emli, ni enyɛŋ esha efee, ejaakɛ Nyɔŋmɔ mli ajɛ afɔ́ lɛ.” (1 Yohane 3:9) Nɛkɛ ‘wui’ nɛɛ ji Nyɔŋmɔ mumɔ krɔŋkrɔŋ lɛ. Yɛ ewiemɔ lɛ kɛ nitsumɔ naa lɛ, eha mɛi 144,000 lɛ ateŋ mɔ fɛɛ mɔ ‘fɔmɔ hee’ ni kɛ mɔ yaa ŋwɛi hiɛnɔkamɔ mli.—1 Petro 1:3-5, 23.
7 Yesu ji Nyɔŋmɔ Bi kɛjɛ efɔmɔ akɛ adesa lɛ mli, taakɛ gbɔmɔ ni yeɔ emuu Adam ji “Nyɔŋmɔ bi” lɛ. (Luka 1:35; 3:38) Shi yɛ Yesu baptisimɔ lɛ sɛɛ lɛ, nɔ ni Yehowa jaje akɛ: “Bo ji misuɔmɔ bi lɛ, bo ohe tsui minaa!” lɛ bafee nɔ ni tsɔɔ nɔ ko. (Marko 1:11) Yɛ sane jajemɔ nɛɛ ni mumɔ krɔŋkrɔŋ lɛ fata he lɛ hewɔ lɛ, ebafee faŋŋ akɛ Nyɔŋmɔ fɔ́ Yesu yɛ nakai be lɛ mli akɛ E-mumɔŋ Bi. Taakɛ eji lɛ, aha Yesu ‘fɔmɔ hee’ yɛ nakai be lɛ mli kɛ hegbɛ ni ekɛaana wala ekoŋŋ akɛ Nyɔŋmɔ mumɔŋ Bi yɛ ŋwɛi. Taakɛ lɛ hu eji lɛ, ‘afɔɔ’ emumɔŋ nyɛmimɛi 144,000 lɛ ‘ekoŋŋ.’ (Yohane 3:1-8; kwɛmɔ Buu-Mɔɔ, November 15, 1992, baafai 3-6.) Agbɛnɛ hu, taakɛ Yesu ji lɛ, Nyɔŋmɔ fɔɔ amɛ mu ni akɛ nitsumɔ woɔ amɛdɛŋ koni amɛjaje sanekpakpa lɛ.—Yesaia 61:1, 2; Luka 4:16-21; 1 Yohane 2:20.
Bitsɔmɔ He Odaseyeli
8. Mɛɛ mumɔŋ biiatsɔmɔ he odaseyeli yɔɔ yɛ (a) Yesu sane lɛ mli, kɛ (b) emra be mli kaselɔi lɛ asane lɛ mli?
8 Odaseyeli yɛ ni tsɔɔ akɛ, ájɛ mumɔ mli áfɔ Yesu. Yohane Baptisilɔ lɛ na ni mumɔ lɛ kpeleke shi kɛba Yesu nɔ, ni enu ni Nyɔŋmɔ miijaje Mesia lɛ mumɔŋ bitsɔmɔ mufɔɔ hee lɛ eetsɔɔ. Shi te Yesu kaselɔi lɛ aaafee tɛŋŋ ale akɛ, ájɛ mumɔ mli áfɔ amɛ? Ojogbaŋŋ, Yesu wie yɛ gbi ni eyaa ŋwɛi lɛ akɛ: “Yohane lɛ, nu ekɛbaptisi, shi nyɛ lɛ, eyeŋ gbii pii ko ni akɛ Mumɔ krɔŋkrɔŋ aaabaptisi nyɛ.” (Bɔfoi lɛ Asaji 1:5) Akɛ ‘mumɔ krɔŋkrɔŋ baptisi’ Yesu kaselɔi lɛ yɛ afi 33 Ŋ.B., yɛ Pentekoste gbi lɛ nɔ. Nɔ ni fata mumɔ lɛ ni afɔse ashwie shi lɛ he ji ‘gbɛɛmɔ ko ni tamɔ ahum ni tswaa waa’ kɛ “lilɛii . . . ni tamɔ lalilɛii” ni batara kaselɔi lɛ ateŋ mɔ fɛɛ mɔ yiteŋ. Nɔ ni sa kadimɔ waa ji bɔ ni kaselɔi lɛ nyɛ “amɛbɔi wiemɔi srɔtoi srɔtoi awiemɔ, taakɛ bɔ ni Mumɔ lɛ ŋɔwo amɛnaa lɛ.” No hewɔ lɛ, odaseyeli ni ana ni anu hu yɛ akɛ ágbele gbɛ ni kɛ mɔ yaa ŋwɛi anunyam mli akɛ Nyɔŋmɔ bii lɛ naa aha Kristo sɛɛnyiɛlɔi lɛ.—Bɔfoi lɛ Asaji 2:1-4, 14-21; Yoel 3:1, 2.
9. Mɛɛ odaseyeli yɔɔ ni tsɔɔ akɛ ajɛ mumɔ mli afɔ́ Samariabii lɛ, Kornelio, kɛ mɛi krokomɛi ni hi shi yɛ klɛŋklɛŋ afii oha lɛ mli lɛ?
9 Yɛ no sɛɛ be ko lɛ, Filipo sanekpakpa shiɛlɔ lɛ yashiɛ yɛ Samaria. Eyɛ mli akɛ Samariabii lɛ kpɛlɛ eshɛɛ sane lɛ nɔ ni abaptisi amɛ moŋ, shi amɛbɛ odaseyeli ko ni tsɔɔ akɛ Nyɔŋmɔ efɔ́ amɛ akɛ ebii. Beni bɔfoi ni ji Petro kɛ Yohane sɔle ni amɛkɛ amɛniji shwie nakai heyelilɔi lɛ anɔ lɛ, “amɛná Mumɔ krɔŋkrɔŋ lɛ” yɛ gbɛ ko ni ha mɛi ni kwɛɔ lɛ na lɛ nɔ. (Bɔfoi lɛ Asaji 8:4-25) Enɛ ji odaseyeli ni tsɔɔ akɛ, akɛ mumɔ efɔ Samariabii ni heɔ yeɔ lɛ akɛ Nyɔŋmɔ bii. Nakai nɔŋŋ yɛ afi 36 Ŋ.B. lɛ, Kornelio kɛ Jeŋmajiaŋbii krokomɛi kpɛlɛ Nyɔŋmɔ anɔkwale lɛ nɔ. Petro kɛ Yudafoi ni ji heyelilɔi ni fata ehe lɛ “anaa kpɛ amɛhe akɛ afɔse Mumɔ krɔŋkrɔŋ nɔkeenɔ lɛ ashwie jeŋmajiaŋbii hu anɔ; ejaakɛ amɛnu akɛ amɛmiiwie maŋsɛɛ wiemɔi sɔrɔtoi ni amɛmiijie Nyɔŋmɔ yi.” (Bɔfoi lɛ Asaji 10:44-48) Klɛŋklɛŋ afii oha lɛ mli Kristofoi pii anine shɛ ‘mumɔ lɛ nikeenii’ tamɔ lilɛii sɔrɔtoi awiemɔ nɔ. (1 Korintobii 14:12, 32) No hewɔ lɛ, nɛkɛ aŋkroaŋkroi nɛɛ na odaseyeli ni yɔɔ faŋŋ akɛ ájɛ mumɔ mli áfɔ amɛ. Shi te aaafee tɛŋŋ ni sɛɛ mli Kristofoi aaale kɛji akɛ ájɛ mumɔ mli áfɔ amɛ loo afɔko amɛ?
Mumɔ lɛ Odaseyeli
10, 11. Yɛ Romabii 8:15-17 hewɔ lɛ, te ooofee tɛŋŋ otsɔɔ mli akɛ mumɔ lɛ yeɔ mɛi ni ji Kristo nanemɛi niyelɔi lɛ ahe odase?
10 Kristofoi 144,000 lɛ ni afɔ amɛ mu lɛ fɛɛ yɛ odaseyeli ni yeɔ emuu akɛ amɛyɛ Nyɔŋmɔ mumɔ lɛ. Paulo ŋma yɛ enɛ he akɛ: “Nyɛná biiatsɔmɔ mumɔ, mɔ mli ni wɔbolɔɔ yɛ akɛ: Aba, ataa! lɛ. Lɛ Mumɔ lɛ diɛŋtsɛ kɛ wɔmumɔ lɛ yeɔ odase akɛ Nyɔŋmɔ bii ji wɔ. Ni kɛ bii ji wɔ lɛ, belɛ niyelɔi hu ji wɔ, Nyɔŋmɔ niyelɔi kɛ Kristo nanemɛi niyelɔi, kɛji eyɛ mli, akɛ wɔkɛ lɛ naa amanehulu lɛ, koni awo wɔkɛ lɛ hiɛ nyam hu.” (Romabii 8:15-17; wɔma efã ko nɔ mi.) Kristofoi ni afɔ amɛ mu lɛ yɛ biiatsɔmɔ mumɔ yɛ amɛŋwɛi Tsɛ lɛ he, eji biiatsɔmɔ henumɔ ni jeɔ kpo waa. (Galatabii 4:6, 7) Amɛyɛ nɔmimaa ni ma shi shiŋŋ akɛ Nyɔŋmɔ efɔ́ amɛ kɛtee mumɔŋ biiatsɔmɔ mli akɛ Kristo nanemɛi niyelɔi yɛ ŋwɛi Maŋtsɛyeli lɛ mli. Ni Yehowa mumɔ krɔŋkrɔŋ lɛ tsuɔ nɔ̃ ko pɔtɛɛ yɛ enɛ mli.
11 Yɛ Nyɔŋmɔ mumɔ krɔŋkrɔŋ lɛ hewalɛ ni kudɔɔ amɛ lɛ shishi ni amɛyɔɔ hewɔ lɛ, mɛi ni afɔ amɛ mu lɛ amumɔ loo su ni jeɔ kpo waa lɛ tsirɛɔ amɛ koni amɛkpɛlɛ nɔ ni Nyɔŋmɔ Wiemɔ lɛ kɛɔ yɛ ŋwɛi hiɛnɔkamɔ lɛ he lɛ nɔ yɛ gbɛ kpakpa nɔ. Akɛ nɔkwɛmɔnɔ lɛ, kɛ amɛkane nɔ ni Ŋmalɛi lɛ kɛɔ yɛ Yehowa mumɔŋ bii lɛ ahe lɛ, amɛjɛɔ amɛsuɔmɔ mli amɛkpɛlɛɔ nɔ amrɔ nɔŋŋ akɛ wiemɔi nɛɛ kɔɔ amɛhe. (1 Yohane 3:2) Amɛle akɛ ‘abaptisi amɛ awo Yesu Kristo mli’ kɛ egbele lɛ mli. (Romabii 6:3) Nɔ ni amɛheɔ amɛyeɔ ni ma shi shiŋŋ ji akɛ amɛji Nyɔŋmɔ mumɔŋ bii, ni amɛbaagboi koni atee amɛ shi kɛya ŋwɛi anunyam mli, taakɛ afee Yesu lɛ.
12. Mɛni Nyɔŋmɔ mumɔ lɛ ekanya yɛ Kristofoi ni afɔ amɛ mu lɛ amli?
12 Ní aaafɔ mɔ ko awo mumɔŋ bitsɔmɔ mli lɛ jeee nɔ ko ni ashweɔ ni aná. Jeee akɛ mɛi ni ájɛ mumɔ mli áfɔ amɛ lɛ miisumɔ ni amɛya ŋwɛi yɛ bɔ ni amɛhaoɔ yɛ ŋmɛnɛŋmɛnɛ nibii ni mli ewa yɛ shikpɔŋ nɔ lɛ he lɛ hewɔ. (Hiob 14:1) Shi moŋ, Yehowa mumɔ lɛ ekanya hiɛnɔkamɔ kɛ akɔnɔ ni adesai nuuu he ewo mɛi ni afɔ amɛ mu diɛŋtsɛ lɛ amli. Mɛi ni áfɔ amɛ nɛkɛ lɛ le akɛ naanɔ wala yɛ adesa emuuyeli mli yɛ paradeiso shikpɔŋ nɔ ni weku kɛ nanemɛi ni yɔɔ miishɛɛ ebɔle mɔ he lɛ baafee nɔ ko ni yɔɔ miishɛɛ diɛŋtsɛ. Shi kɛlɛ, shihilɛ ni tamɔ nɛkɛ lɛ jeee nɔ titri ni amɛshweɔ yɛ amɛtsuii amli. Mɛi ni áfɔ amɛ mu lɛ yɛ ŋwɛi hiɛnɔkamɔ ni mli wa waa akɛ amɛjɛɔ amɛsuɔmɔ mli amɛkɛ shikpɔŋ nɔ gbɛkpamɔi kɛ nibii ni fata he lɛ fɛɛ shãa afɔle.—2 Petro 1:13, 14.
13. Taakɛ 2 Korintobii 5:1-5 tsɔɔ lɛ, mɛni ji nɔ ni Paulo ‘shweɔ waa,’ ni mɛni enɛ tsɔɔ yɛ mɛi ni ajɛ mumɔ mli afɔ́ amɛ lɛ agbɛfaŋ?
13 Ŋwɛi shihilɛ he hiɛnɔkamɔ ni Nyɔŋmɔ kɛha lɛ mli wa aahu yɛ nɛkɛ gbɔmɛi nɛɛ amli akɛ amɛhenumɔi tamɔ Paulo ni ŋmã nɛkɛ lɛ nɔ̃: “Wɔle akɛ, kɛ akumɔ wɔ shikpɔŋ nɛɛ nɔ buu shia nɛɛ jiŋŋ, wɔyɛ tsũ ko ni jɛ Nyɔŋmɔ ŋɔɔ, shia ko ni jeee niji akɛfee, ni hiɔ shi kɛyaa naanɔ, yɛ ŋwɛi. Ejaakɛ wɔdɔmɔɔ ŋtsɔi tete yɛ enɛ mli, ni wɔshweɔ akɛ aŋɔ wɔtsu ni jɛ ŋwɛi lɛ awo wɔ, ni kɛ akɛwo wɔ nɛkɛ lɛ, no lɛ anaŋ wɔ akɛ mɛi ni nyiɛ yayai. Ejaakɛ wɔ ni wɔyɔɔ buu lɛŋ lɛ hu, akɛni wɔhe jaraa wɔ hewɔ lɛ, wɔdɔmɔɔ ŋtsɔi, ejaakɛ wɔsumɔɔɔ akɛ ajie wɔhe nii, shi moŋ wɔsumɔɔ akɛ awo wɔ nii ashwie nɔ, koni wala lɛ ami nɔ ni gboɔ lɛ. Shi mɔ ni saa wɔ ha enɛ nɔŋŋ ji Nyɔŋmɔ, mɔ hu ni ha wɔ Mumɔ lɛ klɛŋklɛŋ nɔ̃ lɛ.” (2 Korintobii 5:1-5) Nɔ ni Paulo ‘shweɔ waa’ ji ni atee lɛ shi kɛya ŋwɛi akɛ mumɔŋ bɔɔ nɔ̃ ni gbooo. Yɛ be mli ni ewieɔ adesa gbɔmɔtso lɛ he lɛ, ekɛ okadi-feemɔ wiemɔ ni kɔɔ buu ni baanyɛ akumɔ, shihilɛhe ko ni waaa ni ahiɔ mli be fioo ko tsu nii ni ekɛto shia he. Eyɛ mli akɛ amɛhiɔ shikpɔŋ nɛɛ nɔ yɛ helooŋ gbɔmɔtso ni baanyɛ agbo mli moŋ, shi Kristofoi ni yɔɔ mumɔ lɛ ákɛ ŋwɛi shihilɛ ni baa lɛ he okadi lɛ miikpa “tsu ko ni jɛ Nyɔŋmɔ ŋɔɔ” gbɛ, mumɔŋ gbɔmɔtso ni gbooo, ni fiteee. (1 Korintobii 15:50-53) Taakɛ Paulo ji lɛ, amɛbaanyɛ ni amɛkɛ anɔkwayeli akɛɛ akɛ: “Wɔyɛ tsui, ni esa wɔhiɛ moŋ akɛ wɔɔdom kɛjɛ [adesa] gbɔmɔtso nɛɛ mli, ni wɔyahi shia [yɛ ŋwɛi] yɛ Nuntsɔ lɛ ŋɔɔ.”—2 Korintobii 5:8.
Aŋɔ Amɛ Awo Kpaŋmɔi Krɛdɛɛi Amli
14. Beni etoɔ Kaimɔ lɛ yeli he gbɛjianɔ lɛ, mɛɛ kpaŋmɔ Yesu tsĩ tã klɛŋklɛŋ, ni mɛni enɛ tsuɔ yɛ mumɔŋ Israelbii lɛ ahe?
14 Kristofoi ni akɛ mumɔ éfɔ amɛ lɛ yɛ nɔmimaa akɛ áŋɔ amɛ awo kpaŋmɔi krɛdɛɛi sɔrɔtoi enyɔ mli. Yesu tsĩ enɛɛmɛi ateŋ ekome tã beni ekɛ aboloo akpiti kɛ wein to egbele ni baa lɛ he Kaimɔ lɛ shishi, ni ekɛɛ yɛ kpulu ni wein yɔɔ mli lɛ he akɛ: “Nɛkɛ kpulu nɛɛ ji kpaŋmɔ hee lɛ yɛ milá ni aŋɔ-shwie shi aha nyɛ lɛ mli” lɛ. (Luka 22:20; 1 Korintobii 11:25) Namɛi yɔɔ kpaŋmɔ hee nɛɛ mli? Yehowa Nyɔŋmɔ kɛ mumɔŋ Israel lɛ mli bii—mɛi ni Yehowa eto eyiŋ yɛ amɛhe akɛ ekɛ amɛ baaya ŋwɛi anunyam mli lɛ. (Yeremia 31:31-34; Galatabii 6:15, 16; Hebribii 12:22-24) Akɛni Yesu lá ni efɔse eshwie shi lɛ ha ebɔi nitsumɔ hewɔ lɛ, kpaŋmɔ hee lɛ ŋɔɔ gbɔmɛi kɛjɛɔ jeŋmaji lɛ ateŋ kɛhaa Yehowa gbɛ́i lɛ, ni efeɔ nɛkɛ Kristofoi ni ajɛ mumɔ mli afɔ́ amɛ nɛɛ Abraham “seshi” lɛ fã. (Galatabii 3:26-29; Bɔfoi lɛ Asaji 15:14) Kpaŋmɔ hee lɛ toɔ gbɛjianɔ koni akɛ mumɔŋ Israelbii lɛ fɛɛ aba anunyam mli kɛtsɔ amɛshitee kɛmiiya ŋwɛi shihilɛ ni gbele bɛ mli nɔ. Akɛni eji “naanɔ kpaŋmɔ” hewɔ lɛ, emli sɛɛnamɔi lɛ baahi shi kɛya naanɔ. Kɛji akɛ kpaŋmɔ hee nɛɛ baatsu nii yɛ gbɛi krokomɛi anɔ yɛ Afii Akpe lɛ mli kɛ no sɛɛ lɛ, wɔsɛɛ be baatsɔɔ.—Hebribii 13:20.
15. Yɛ Luka 22:28-30 kɛ gbeekpamɔ naa lɛ, mɛɛ kpaŋmɔ kroko aje shishi akɛ aaaŋɔ Yesu sɛɛnyiɛlɔi ni afɔ amɛ mu lɛ awo mli lɛ, ni yɛ mɛɛ be?
15 Áŋɔ “bii babaoo” ni Yehowa to eyiŋ akɛ ‘ekɛ amɛ baaba anunyam mli’ lɛ hu akɛ aŋkroaŋkroi kɛba kpaŋmɔ kɛha ŋwɛi Maŋtsɛyeli lɛ mli. Yesu wie nɛkɛ kpaŋmɔ nɛɛ ni kã lɛ kɛ enanemaahei asɛɛnyiɛlɔi lɛ ateŋ lɛ he akɛ: “Nyɛ ji mɛi ni kɛ mi ehi shi yɛ mikaai lɛ amli; ni mi hu miito maŋtsɛyeli maha nyɛ taakɛ bɔ ni mitsɛ eto eha mi lɛ, koni nyɛye nii ni nyɛnu yɛ mikpɔlɔ lɛ he yɛ mimaŋtsɛyeli lɛ mli, ni nyɛtara sɛii anɔ ni nyɛkojo Israel akutsei nyɔŋma kɛ enyɔ lɛ.” (Luka 22:28-30) Maŋtsɛyeli kpaŋmɔ lɛ bɔi nitsumɔ beni akɛ mumɔ krɔŋkrɔŋ fɔ Yesu kaselɔi lɛ mu yɛ Pentekoste afi 33 Ŋ.B. lɛ. Nakai kpaŋmɔ lɛ yaa nɔ etsuɔ nii yɛ Kristo kɛ ehefatalɔi maŋtsɛmɛi lɛ ateŋ kɛyaa naanɔ. (Kpojiemɔ 22:5) No hewɔ lɛ, Kristofoi ni ajɛ mumɔ mli afɔ amɛ lɛ yɛ nɔmimaa akɛ amɛyɛ kpaŋmɔ hee lɛ mli ni amɛyɛ kpaŋmɔ kɛha Maŋtsɛyeli lɛ mli. No hewɔ lɛ, yɛ Nuntsɔ lɛ Gbɛkɛnaashi Niyenii ni ayeɔ lɛ shishi lɛ, kɛ akɛto he lɛ, mɛi fioo ni afɔ amɛ mu lɛ ni amɛshwɛ ni yɔɔ shikpɔŋ nɔ lolo lɛ pɛ yeɔ aboloo lɛ, ni damɔ shi kɛha Yesu gbɔmɔtso ni esha bɛ mli lɛ eko, ni amɛnuɔ wein lɛ ni damɔ shi kɛha elá ni yeɔ emuu ni afɔse ashwie shi yɛ gbele mli ni akɛwo kpaŋmɔ hee lɛ mli hewalɛ lɛ eko.—1 Korintobii 11:23-26; kwɛmɔ Buu-Mɔɔ, February 1, 1989, baafai 17-20.
Mɛi ni Atsɛ, Mɛi ni Ahala, kɛ Mɛi ni Heɔ Yeɔ
16, 17. (a) Kɛ akɛ amɛ aaaba anunyam mli lɛ, mɛni esa akɛ efee anɔkwale yɛ mɛi 144,000 lɛ fɛɛ he? (b) Namɛi ji “maŋtsɛmɛi nyɔŋma” lɛ, ni te amɛkɛ shwɛɛnii ni ji Kristo “nyɛmimɛi” ni yɔɔ shikpɔŋ nɔ lɛ yeɔ amɛhaa tɛŋŋ?
16 Nii ni akɛ Yesu kpɔmɔ afɔleshãa lɛ tsu klɛŋklɛŋ lɛ ŋmɛ gbɛ ni anyɛ atsɛ́ mɛi 144,000 kɛtee ŋwɛi shihilɛ mli ni ahala amɛ kɛtsɔ Nyɔŋmɔ ni kɛ emumɔ lɛ fɔ́ amɛ lɛ nɔ. Shi, kɛ akɛ amɛ aaaba anunyam mli lɛ, esa akɛ ‘amɛbɔ mɔdɛŋ fɛɛ ni amɛaanyɛ ni amɛkɛwaje amɛtsɛmɔ kɛ halamɔ lɛ,’ ni esa akɛ amɛfee anɔkwafoi kɛyashi gbele mli. (2 Petro 1:10; Efesobii 1:3-7; Kpojiemɔ 2:10) Shwɛɛnii ni afɔ amɛ mu lɛ ateŋ mɛi fioo ni yɔɔ shikpɔŋ nɔ lolo lɛ hiɛ amɛ emuuyeli mli, eyɛ mli akɛ “maŋtsɛmɛi nyɔŋma” ni feɔ maŋkwramɔŋ hewalɛi lɛ fɛɛ ahe mfoniri lɛ teɔ shi woɔ amɛ. Ŋwɛibɔfo ko kɛɛ akɛ: “Mɛnɛɛmɛi kɛ toobi lɛ baawuu, ni toobi lɛ baaye amɛnɔ kunim, ejaakɛ lɛ ji nuntsɔmɛi anuntsɔ kɛ maŋtsɛmɛi amaŋtsɛ, ni mɛi ni kɛ lɛ yɔɔ lɛ ji mɛi atsɛ kɛ mɛi ni ahala kɛ mɛi ni heɔ yeɔ lɛ.”—Kpojiemɔ 17:12-14.
17 Adesai nɔyelɔi nyɛŋ afee nɔ ko nɔ ko amɛshi Yesu, “maŋtsɛmɛi amaŋtsɛ” lɛ, ejaakɛ eyɛ ŋwɛi. Shi amɛjieɔ amɛhe kpo akɛ mɛi ni wuɔ shiɔ ‘enyɛmimɛi’ lɛ ateŋ shwɛɛnii ni yɔɔ shikpɔŋ nɔ lolo lɛ. (Kpojiemɔ 12:17) Nakai shitee-kɛ-woo lɛ baaba naagbee yɛ Nyɔŋmɔ ta ni ji Harmagedon lɛ mli, beni kunimyeli aaafee “maŋtsɛmɛi amaŋtsɛ” lɛ kɛ ‘enyɛmimɛi’—“mɛi ni atsɛ kɛ mɛi ni ahala kɛ mɛi ni heɔ yeɔ lɛ” anɔ̃ lɛ. (Kpojiemɔ 16:14, 16) Dani enɛ aaaba lɛ, Kristofoi ni ajɛ mumɔ mli afɔ́ amɛ lɛ bɛ dekã kwraa. Mɛni amɛfeɔ bianɛ, dani Yehowa kɛ amɛ aba anunyam mli?
Mɛɛ Hetoo Obaaha?
◻ Namɛi Nyɔŋmɔ kɛ amɛ ‘baa ŋwɛi anunyam mli’ lɛ?
◻ Akɛ ‘ájɛ Nyɔŋmɔ mli áfɔ mɔ’ lɛ tsɔɔ mɛni?
◻ Yɛ mɛɛ gbɛ nɔ ‘mumɔ lɛ yeɔ’ Kristofoi komɛi ahe “odase” yɛ?
◻ Mɛɛ kpaŋmɔi amli aŋɔ mɛi ni ajɛ mumɔ mli afɔ amɛ lɛ awo?
[Mfoniri ni yɔɔ baafa 15]
Akɛ odaseyeli hã yɛ Pentekoste afi 33 Ŋ.B.akɛ, agbele gbɛ ni kɛ mɔ yaa ŋwɛi anunyam mli lɛ naa