Lilɛii Sɔrɔtoi Awiemɔ Ŋmɛnɛ​—Ani Ejɛ Nyɔŋmɔ?

PENTECOSTE osɔfo Marvin A. Hicks kɛɛ akɛ, “Ŋmalɛi lɛ tsɔɔ akɛ mumɔ ni akɛbaptisiɔ mɔ, ni ehe odaseyeli ji lilɛi sɔrɔtoi awiemɔ lɛ yɛ kɛha anɔkwale sɔlemɔ lɛ ŋmɛnɛ.” Dr. W. A. Criswell ni ji First Baptist Church ni yɔɔ Dallas lɛ mlinyo lɛ kɛɛ akɛ, “Tsɔɔmɔi ni kɔɔ lilɛi sɔrɔtoi awiemɔ he lɛ bɛ Ŋmalɛ lɛ mli ni ejaaa hu.” Ni ekɛfata he akɛ: “Kɛji akɛ no ji Kristofoi ahemɔkɛyeli lɛ, belɛ jeee Kristofonyo ji mi.”

Yɛ naataamɔ ni kɔɔ lilɛi sɔrɔtoi awiemɔ he ni yɔɔ nɛɛ hewɔ lɛ, obaabi akɛ: ‘Mɛni ji nɔ ni Ŋmalɛi lɛ kɛɔ yɛ nikeenii ni ji lilɛi sɔrɔtoi lɛ he? Ani eji Kristojamɔ lɛ fa ŋmɛnɛ?’ Bɔni afee ni wɔna hetoo lɛ, ebaaye ebua akɛ wɔɔnu nɔ hewɔ ni akɛ nikeenii ni ji lilɛi sɔrɔtoi lɛ ha mra be mli Kristofoi lɛ shishi.

NƆ HEWƆ NI AKƐ NIKEENII LƐ HA

Klɛŋklɛŋ kwraa lɛ, bɔfo Paulo tsɔɔ mli yɛ Hebribii 2:​2-4 akɛ naakpɛɛ nikeenii lɛ ni nikeenii ni ji lilɛi sɔrɔtoi awiemɔi lɛ fata he lɛ ji nɔ ni akɛha klɛŋklɛŋ afii oha lɛ mli Kristofoi lɛ koni eye odase akɛ Nyɔŋmɔ duromɔ lɛ eshi blema Yudafoi ajamɔ gbɛjianɔtoo lɛ kɛba Kristofoi asafo hee ni ato ama shi lɛ nɔ. Nɛkɛ ŋwɛi duromɔ ni etsake nɛɛ bafee nɔ ni akɛma shi shiŋŋ kɛmiiya klɛŋklɛŋ afii oha lɛ naagbee mli, yɛ be mli ni Yesu Kristo bɔfoi lɛ ateŋ mɛi komɛi yɔɔ wala mli lolo lɛ.

Ákɛ nikeenii ni ji lilɛi sɔrɔtoi lɛ hu tsu yiŋtoo kroko he nii lɛ ji nɔ ni anaa yɛ Yesu wiemɔi ni ekɛha ekaselɔi lɛ no sɛɛ etsɛɛɛ ni ekwɔ kɛtee ŋwɛi yɛ afi 33 Ŋ.B. lɛ. Ekɛɛ akɛ: “Kɛ mumɔ krɔŋkrɔŋ lɛ na ba nyɛnɔ lɛ, nyɛaana hewalɛ ni nyɛaatsɔmɔ midasefoi yɛ Yerusalem kɛ Yudea kɛ Samaria fɛɛ, kɛyashi shikpɔŋ lɛ naagbeehei lɛ.” (Bɔf. 1:⁠8) Kaselɔi akuu fioo lɛ bɛ mɛi ni wieɔ shikpɔŋ lɛ nɔ wiemɔi fɛɛ yɛ amɛteŋ. Shi Yesu shiwoo lɛ ba mli anɔkwale, aaafee gbii nyɔŋma sɛɛ lɛ yɛ Pentekoste gbijurɔyeli lɛ nɔ lɛ, afɔse mumɔ krɔŋkrɔŋ ashwie ekaselɔi 120 ni amɛbua amɛhe naa yɛ ŋwɛitsu ko mli yɛ Yerusalem lɛ anɔ. Mɛni jɛ mli ba? “Ni amɛbɔi wiemɔi sɔrɔtoi sɔrɔtoi awiemɔ,” ni yɛ enɛ hewɔ lɛ amɛbaanyɛ amɛya amrɔ nɔŋŋ ni amɛyatsu odaseyeli nitsumɔ ni akɛwo amɛdɛŋ lɛ.​—Bɔf. 2:​1-4.

Beni nakai kaselɔi lɛ ye odase yɛ Yerusalem yɛ Pentekoste gbijurɔyeli lɛ nɔ lɛ, Yudafoi kɛ mɛi ni amɛtsake amɛhe amɛtsɔmɔ Yudafoi ni amɛjɛ hei ni yɔɔ shɔŋŋ amɛba gbijurɔyeli lɛ shishi lɛ, anu ni amɛmiikɛɛ akɛ: “Shi te tɛŋŋ ni wɔteŋ mɔ fɛɛ mɔ nuɔ lɛ diɛŋtsɛ emaŋ heni afɔ lɛ yɛ lɛ wiemɔ nɛɛ? . . . wɔmiinu akɛ amɛmiijaje Nyɔŋmɔ nii wuji lɛ yɛ wɔmaji anɔ wiemɔi lɛ amli.” (Bɔf. 2:​8-11) Eka shi faŋŋ akɛ lilɛi sɔrɔtoi ni atsi ta yɛ biɛ nɛɛ ji wiemɔi ni aIe shi jeee wiemɔi ni akpɔtɔɔ ni anuuu shishi. Ni kadimɔ hu ákɛ akɛ nikeenii lɛ tsu yiŋtoo hewɔ ni Yesu kɛɛ ákɛ akɛ mumɔ lɛ baaha lɛ he nii, ni ji akɛ, ni akɛye mɛi krokomɛi odase. Etsu nakai yiŋtoo lɛ he nii jogbaŋŋ, ejaakɛ “nakai gbi lɛ nɔ nɔŋŋ lɛ aŋɔ susumai aaafee akpei etɛ afata amɛhe.”​—Bɔf. 2:⁠41.

Nɔkwɛmɔ nɔ kroko ni kɔɔ beni afɔse mumɔ krɔŋkrɔŋ lɛ ashwie shi ni nikeenii ni ji lilɛi sɔrɔtoi hu fata he lɛ ji nɔ ni abɔ he amaniɛ yɛ Bɔfoi 10:​44-46 lɛ. Kɛji akɛ okane nakai sane lɛ obaana akɛ Nyɔŋmɔ mumɔ lɛ, ba Jeŋmaŋnyo Kornelio kɛ eshiabii lɛ anɔ, kɛkɛ ni amɛhu amɛbɔi “wiemɔi sɔrɔtoi” awiemɔ. Yɛ be mli ni ewieɔ nɔ ni eyoo yɛ nakai gbi lɛ nɔ lɛ he lɛ, bɔfo Petro kɛɛ akɛ: “Shi beni mibɔi wiemɔ lɛ, mumɔ krɔŋkrɔŋ lɛ bayimɔ amɛnɔ, tamɔ bɔ ni eyi wɔ hu wɔnɔ tsutsu lɛ.” No hewɔ lɛ taakɛ Petro tsɔɔ lɛ, nikeenii ni ji lilɛi sɔrɔtoi ni akɛha yɛ nakai be lɛ mli lɛ ji nakai nikeenii lɛ nɔŋŋ ni amɛnine shɛ enɔ yɛ Pentekoste yɛ afii pii ni eho lɛ​—nyɛ ni anyɛɔ awieɔ maŋsɛɛ wiemɔi yɛ naakpɛɛ gbɛ nɔ. Biblia lɛ tsɔɔ akɛ nikeenii ni ji lilɛi sɔrɔtoi ni akɛha Kornelio kɛ eshiabii lɛ ha Petro kɛ mɛi ni fata ehe lɛ he ye akɛ agbɛnɛ Nyɔŋmɔ miikpɛlɛ Jeŋmajiaŋbii ni afoko amɛ ketia lɛ anɔ kɛmiiba asafo lɛ mli. Nyɔŋmɔ kɛ Kristofoi asafo lɛ miitsu nii agbɛnɛ.​—Bɔf. 11:​15-18.

Shi mɛi komɛi baabi akɛ, ‘Te nyɛbaatsɔɔ Paulo wiemɔi ni yɔɔ 1 Korintobii 14:2 lɛ mli nyɛha tɛŋŋ? Ani Paulo ekɛɛɛ akɛ, “mɔ ni wieɔ kɛ lilɛi sɔrɔto ko lɛ, jeee gbɔmɛi ewieɔ etsɔɔ, shi Nyɔŋmɔ moŋ”?’

Klɛŋklɛŋ kwraa lɛ esa akɛ akadi yɛ biɛ akɛ jeee teemɔŋ sɔlemɔ ko he Paulo wieɔ lɛ,shi moŋ nikeenii ni ji lilɛi sɔrɔtoi lɛ ni akɛaatsu nii yɛ asafoŋ kpee shishi. (Kwɛmɔ 1 Korintobii 14:​23.) Agbɛnɛ, Paulo wiemɔi lɛ kɛ yiŋtoo hewɔ ni akɛ nikeenii ni ji lilɛi sɔrɔtoi lɛ ha kɛ bɔ ni atsɔɔ nikeenii lɛ mli aha yɛ Bɔfoi lɛ Asaji lɛ mli lɛ kpaa gbee kwraa. Kɛji akɛ okane 1 Korintobii yitso 14 lɛ fɛɛ lɛ obaakadi akɛ (1) lilɛi ni awieɔ he lɛ ji wiemɔi ni ale momo, jeee wiemɔi ni anuuu shishi, ni (2) akɛ nikeenii lɛ baatsu nii, jeee yɛ teemɔŋ, shi moŋ ni ehe aba sɛɛnamɔ aba mɛi ni heee yeee lɛ.

Nyɛhaa wɔkanea kuku enyɔ lɛ fɛɛ. Ekaneɔ akɛ: “Ejaakɛ mɔ ni wieɔ kɛ lilɛi sɔrɔto lɛ, jeee gbɔmɛi ewieɔ etsɔɔ, shi Nyɔŋmɔ moŋ; ejaakɛ mɔ ko mɔ ko nuuu, shi mumɔ mli ewieɔ teemɔŋ saji yɛ.” Hela wiemɔ ni atsɔɔ shishi akɛ “lilɛi” lɛ ji glōssa, ni no nɔŋŋ ji wiemɔ ni akɛtsu nii yɛ Bɔfoi lɛ Asaji 2:​4, 11, ni ŋwanejee ko kwraa bɛ he akɛ ekɔɔ wiemɔi ni ale he lɛ. Hela wiemɔ ni atsɔɔ shishi akɛ ‘nuɔ nii’ lɛ baanyɛ atsɔɔ ni aanu nɔ ko shi kɛlɛ anuuu nɔ ni awieɔ lɛ shishi. Abaanyɛ anu enɛ shishi jogbaŋŋ yɛ 1 Korintobii yitso 14, kuku 13, 16 kɛ 17, heni wɔkaneɔ yɛ akɛ: “No hewɔ lɛ mɔ ni wieɔ kɛ lilɛi sɔrɔto ko lɛ, ha ni esɔle koni etsɔɔ shishi hu, ejaakɛ kɛ okɛ mumɔ miijɔɔ lɛ, te aaafee tɛŋŋ ni mɔ ni ta mɛi ni leee mli eko lɛ agbɛhe [aloo, mɛi ni heee yeee; kwɛmɔ kuku 22-25.] lɛ aaakɛɛ Amen ashi oshidaa lɛ nɔ, akɛni eleee nɔ ni okɛɔ lɛ? Ejaakɛ bo lɛ, ooda shi jogbaŋŋ moŋ, shi kɛlɛ mɔkrokro lɛ nane mɔɔɔ shi.”

Kɛ aaatsɔɔ mli kuku lɛ, mɔ ni wieɔ kɛ lilɛi sɔrɔto lɛ wieɔ etsɔɔ Nyɔŋmɔ moŋ fe gbɔmɛi kɛji akɛ gbɔmɛi ni nuɔ nɔ ni ewieɔ lɛ nuuu nɔ ni ekɛɔ lɛ shishi. Jeee wiemɔi ni anuuu shishi ji nɔ ni yɔɔ Paulo jwɛŋmɔ mli lɛ, shi moŋ maŋsɛɛ wiemɔi ni mɛi krokomɛi baanyɛ anu shishi. Yɛ anɔkwale mli lɛ kɛji akɛ mɛi ni yɔɔ jɛmɛ lɛ nyɛɛɛ anu wiemɔ lɛ shishi ni shishitsɔɔlɔi ko hu bɛ lɛ, belɛ mɔ ni wieɔ lilɛi sɔrɔto lɛ asɔle koni enyɛ etsɔɔ shishi koni eha mɛi krokomɛi anane amɔ shi, titri lɛ mɛi ni heee yeee lɛ. Kɛji akɛ mɔ ko bɛ ni baatsɔɔ shishi lɛ, belɛ taakɛ Ŋmalɛ lɛ kɛɔ lɛ, ebaahi jogbaŋŋ moŋ akɛ eeefee dioo.​—1 Kor.14:⁠28.

Shi ŋmɛnɛ hu? Ani nikeenii ni tamɔ lilɛi he ehiaaa koni no atsɔɔ mumɔ krɔŋkrɔŋ ni eba mɔ ko nɔ?

ANI EJI KRISTOJAMƆ LƐ FÃ ŊMƐNƐ?

Ŋmalɛi lɛ tsɔɔ akɛ naakpɛɛ nikeenii ni akɛha klɛŋklɛŋ afii oha lɛ mli Kristofoi lɛ ji nɔ ni baahi shi be fioo ko pɛ. “Suɔmɔ sɛɛ efooo gbi ko gbi ko. Shi kɛji gbalɛi ni lɛ, amɛsɛɛ baafo; kɛji wiemɔi ni lɛ, abaafɔ̃ɔ; kɛji nilee ni lɛ, esɛɛ baafo.” (1 Kor. 13:⁠8) Biblia lɛ tsɔɔ be mli ni nikeenii nɛɛ baaba naagbee. Hɛɛ, etsɔɔ.

Bo diɛŋtsɛ kanemɔ amaniɛ ni abɔ be mli ni nikeenii ni ji lilɛi sɔrɔtoi lɛ fata mumɔ krɔŋkrɔŋ ni afɔse ashwie shi lɛ he ba lɛ: Bɔfoi lɛ Asaji 2:​1-4, 14; 10:​44-48; 19:⁠6. Obaana akɛ yɛ sane lɛ eko fɛɛ eko mli lɛ, Yesu Kristo bɔfoi lɛ ateŋ mɔ kome aloo mɛi ni fa fe nakai yɛ jɛmɛ. Taakɛ Bɔfoi 8:18 tsɔɔ lɛ, “bɔfoi lɛ aniji kɛ mɛi anɔ ŋmɛlɛmɔ lɛ haa anaa mumɔ krɔŋkrɔŋ lɛ.” No hewɔ lɛ shishinumɔ yɛ he akɛ beni bɔfoi lɛ gboi lɛ, mumɔ lɛ nikeenii, ni akɛhaa mɛi krokomɛi ni nikeenii ni ji lilɛi sɔrɔtoi lɛ fata he lɛ sɛɛ fo. Nikeenii ni ji lilɛi sɔrɔtoi lɛ etsu eyiŋtoo he nii. Ále yɛ faŋŋ mli akɛ Nyɔŋmɔ duromɔ kɛ esɛɛfimɔ yɛ Kristofoi asafo lɛ nɔ. Agbɛnɛ Kristofoi lɛ ayi efa ni agbɛ amɛ ashwa shikpɔji babaoo nɔ, ni amɛkɛ “sanekpakpa” lɛ fata amɛhe kɛtee jɛmɛ.​—Okɛto Kolosebii 1:23 he.

Mɛi komɛi baabi akɛ, ‘Shi kɛji akɛ nikeenii lɛ sɛɛ efo lɛ, belɛ nɔ ni anaa yɛ ŋmɛnɛŋmɛnɛ beaŋ lɛ hu?’

Fountain Trust kɛ Church of England Evangelical Council sɔlemɔi lɛ fee ekome ni amɛŋma wiemɔ ko amɛha akɛ, “Wɔle hu akɛ nɔ ko tamɔ nakai nɔŋŋ baanyɛ aba yɛ ashwaifeemɔ kɛ daimonioi ahewalɛ shishi.”

Ani eeeanyɛ eba lɛ akɛ ŋmɛnɛŋmɛnɛ beaŋ nikeenii ni ji lilɛi sɔrɔtoi lɛ jɛɛɛ Nyɔŋmɔ ŋɔɔ? Wɔbaanyɛ wɔna akɛ enɛ nɔ kpɛlɛmɔ baawa aha mɛi ni kɛɔ akɛ amɛyɔɔ nɛkɛ nikeenii nɛɛ. Onukpai ni yɔɔ Amerika ni amɛyibɔ ji 5,000,000 ni kɛɔ akɛ amɛwieɔ lilɛi sɔrɔtoi lɛ ateŋ oha mlijaa 33 heee yeee po akɛ Abonsam ji mɔ ko ni yɔɔ diɛŋtsɛ, ni akɛ ebaanyɛ ena mɛi krokomɛi anɔ hewalɛ. Ojogbaŋŋ, belɛ te aaafee tɛŋŋ ni ooole heni nɛkɛ nibii nɛɛ jɛɔ kɛbaa diɛŋtsɛ lɛ?

“KƐTSƆ AMƐYIBII ANƆ”

Yesu kɛ nɔ ni abaadamɔ nɔ ni ayoo anɔkwale Kristofoi lɛ ha heni ejaje akɛ: “Tso fɛɛ tso ni ji ekpakpa lɛ woɔ yibii kpakpai.” (Mat. 7:17) Hɛɛ esa akɛ odaseyeli loo yibii ko aje kpo akɛ Nyɔŋmɔ mumɔ krɔŋkrɔŋ lɛ miifi amɛsɛɛ. Kɛji akɛ wɔsusu Christianity Today lɛ mli saji lɛ ahe yɛ Ŋmalɛ lɛ naa lɛ, ejieɔ nibii babaoo kpo etsɔɔ wɔ​—Gallup poll, nɔ ni aŋma aha yɛ February 22, 1980, yɛ Christianity Today lɛ mli.

Nɔ ko kwraa bɛ Ŋmalɛi lɛ amli ni tsɔɔ ákɛ akɛ naakpɛɛ nikeenii lɛ ha mɔ ko ni feɔ esha aloo ekpɛlɛɔ eshafeemɔ nɔ. Mɛi ni fata klɛŋklɛŋ afii oha lɛ mli Kristofoi asafo lɛ he yɛ Korinto lɛ ji mɛi komɛi ni tsutsu lɛ amɛji gbɔmɛi ni bɛ jeŋba shi moŋ amɛtsake amɛbatsɔmɔ Kristofoi. Amɛkɛ amɛhe wooo ahoshwibɔɔ mli dɔŋŋ. (1 Kor. 6:​9-11) Shi kɛlɛ, taakɛ nibii amli taomɔ ni afee lɛ tsɔɔ lɛ, mɛi ni wieɔ lilɛi sɔrɔtoi ŋmɛnɛ lɛ ateŋ oha mlijaa 19 kpɛlɛɔ bɔlɛnamɔ ni tsɔɔ gbalashihilɛ hiɛ loo ajwamaŋbɔɔ nɔ.

Anɔkwale Kristofoi kɛ bulɛ baaha Biblia lɛ akɛ Nyɔŋmɔ Wiemɔ. Yesu Kristo tsɛ Ŋmalɛi ni ebu enɛ akɛ Nyɔŋmɔ Wiemɔ. (Yoh. 17:17) Shi taakɛ nibii amli taomɔ lɛ tee nɔ lɛ, mɛi ni wieɔ lilɛi sɔrɔtoi lɛ ateŋ oha mlijaa 44 ni yɔɔ wɔgbii nɛɛ amli lɛ ebuuu Biblia lɛ akɛ eji jamɔ wolo ni kɛ hewalɛ wieɔ ni he hiaa fe fɛɛ.

“No hewɔ lɛ nyɛyaa ni nyɛyafea jeŋmaji fɛɛ mikaselɔi,” ji famɔ ni Yesu kɛha. (Mat. 28:​19, 20) Ni egba efɔ shi akɛ abaashiɛ Nyɔŋmɔ maŋtsɛyeli lɛ he “sanekpakpa nɛɛ yɛ shikpɔŋ ni ayɔɔ nɔ lɛ fɛɛ nɔ ni akɛye . . . odase.” (Mat. 24:​14, NW) Esa akɛ anɔkwale Kristofoi kɛ ekaa atsu enɛ. Shi kɛlɛ, taakɛ nibii amli taomɔ lɛ tsɔɔ lɛ, mɛi ni wieɔ lilɛi sɔrɔtoi lɛ amli oha mlijaa 51 ewieee amɛ hemɔkɛyeli lɛ he amɛtsɔɔɔ mɔ ko, kɛ hoo kwraa lɛ daa otsi po, ni oha mlijaa 58 kɛ hehiamɔ yeee buaaa mɛi krokomɛi koni amɛnine ashɛ amɛnɔ amɛha Kristo.

Yesu wie esɛɛnyiɛlɔi lɛ ahe akɛ “amɛjɛɛɛ je lɛ mli.” (Yoh. 17:16) Mɛi ni wieɔ lilɛi sɔrɔtoi lɛ jeee mɛi ni “jɛɛɛ je lɛ mli,” ni amɛjeee mɛi ni “kɛ amɛhe wooo maŋkwramɔ saji amli, shi moŋ amɛfeɔ nɔ ni maŋbii lɛ feɔ lɛ fɛɛ eko,” taakɛ Christianity Today bɔ amaniɛ lɛ.

Yesu kɛɛ akɛ: “Kɛji nyɛsumɔɔ nyɛhe lɛ, no mɛi fɛɛ kɛaale akɛ mikaselɔi ji nyɛ.” (Yoh. 13:35) Bɔfo Yohane kɛfata he akɛ: “Wɔsumɔsumɔɔ wɔhe; jeee tamɔ bɔ ni Kain jɛ mɔ fɔŋ lɛ mli ni egbe enyɛmi lɛ.” (1 Yoh. 3:​11, 12) Anɔkwale Kristofoi jieɔ suɔmɔ krɔŋŋ kpo amɛtsɔɔ amɛhe. Weku, maŋ loo shihilɛ gbalaaa amɛmli ni amɛna mɔ ko he jwɛŋmɔ fɔŋ. Yɛ tawuu be mli po lɛ, amɛkpɛlɛɛɛ nɔ akɛ amɛaagbe amɛnanemɛi heyelilɔi ni yɔɔ maji krokomɛi anɔ. Ani nakai eji yɛ maŋbii lɛ fɛɛ he; Yɛ mɛi ni kɛɔ akɛ amɛwieɔ lilɛi sɔrɔtoi lɛ ahe?

Belɛ mɛni ji nɔ ni odaseyeli lɛ tsɔɔ? Ojogbaŋŋ, akɛni mɛi ni kɛɔ akɛ amɛwieɔ lilɛi sɔrɔtoi, akɛ kuu lɛ, wooo “yibii” ni haa ayooɔ amɛ akɛ anɔkwale Kristofoi hewɔ lɛ, eka shi faŋŋ akɛ mɛi ni kɛɔ akɛ amɛyɔɔ nikeenii ni ji lilɛi sɔrɔtoi lɛ anine shɛɛɛ nikeenii nɛɛ nɔ kɛjɛɛɛ heni mra be mli Kristofoi lɛ nine shɛ nɔ kɛjɛ lɛ.

Kɔkɔbɔɔi ni mli wawai yɛ Ŋmalɛi lɛ amli ni tsɔɔ jɛɛhe kroko. Yesu gba fɔ shi akɛ: “Mɛi pii aaakɛɛ mi yɛ no gbi lɛ nɔ akɛ: Nuŋtsɔ, Nuŋtsɔ! Ani jeee bo ogbɛi lɛ mli wɔgba yɛ, ni ogbɛi lɛ mli wɔfamɔ daimonioi yɛ, ni ogbɛi lɛ mli wɔfee hewalɛ nibii pii yɛ lo? Ni no lɛ magba mli makɛɛ amɛ akɛ: Mileee nyɛ kwraa!” (Mat. 7:​22, 23) Bɔfo Paulo bɔ kɔkɔ akɛ be baashɛ ni “Satan nitsumɔ” ni mli wa baaje kpo yɛ “amale hewalɛ kɛ okadii kɛ naakpɛɛ nii fɛɛ mli.”​—2 Tes 2:​9, 10.

Belɛ te ooofee tɛŋŋ oyoo Kristo sɛɛnyiɛlɔi anɔkwafoi lɛ kɛji akɛ jeee kɛtsɔ naakpɛɛ nikeenii ni ji lilɛi sɔrɔtoi anɔ? Kɛtsɔ “yibii,” odaseyeli ni jeɔ kpo yɛ Ŋmalɛi lɛ amli ni wɔsusu he lɛ anɔ.

Wɔmiifɔ bo nine ni otao Biblia lɛ mli ni okɛto Yehowa Odasefoi atsɔɔmɔi kɛ nifeemɔi ahe, Bo diɛŋtsɛ kwɛmɔ akɛ nɔ ni onaa lɛ baatsirɛ bo ni okɛɛ yɛ amɛhe akɛ, “Nyɔŋmɔ yɛ nyɛteŋ lɛlɛŋ” lo.​—1 Kor. 14:⁠25.