Na Yehowa Mli Hekɛnɔfɔɔ—Kɛtsɔ Mɔdɛŋbɔɔ ni Okɛaakase E-Wiemɔ lɛ Nɔ
“Nyɛŋɔa nyɛtsuii nyɛfɔa wiemɔi nɛɛ fɛɛ ni mibɔɔ nyɛ kɔkɔ yɛ he ŋmɛnɛ gbi nɛɛ Iɛ nɔ . . . Ejaakɛ jeee wiemɔ folo eji kɛha nyɛ, shi moŋ nyɛyiwala ni.”—5 MOSE 32:46, 47, New World Translation.
1, 2. (a) Mɛɛ gbɛkpamɔ ka Israel hiɛ yɛ be mli ni amɛbɔ ŋsara yɛ Moab ŋa lɛ nɔ lɛ? (b) Mɛɛ ŋaa Mose wo maŋ lɛ?
BE kakadaŋŋ ni amɛkɛhi ŋa lɛ nɔ lɛ naagbee ebɛŋkɛ. Yordan ni lɔgɔɔ shi lɛ pɛ egbala maŋ lɛ kɛ Shiwoo Shikpɔŋ ni amɛmɛ yɛ he yɛ be kakadaŋŋ mli lɛ teŋ. Shi kɛha maŋ lɛ hiɛnyiɛlɔ, Mose lɛ, Israel gbɛkpamɔ akɛ amɛaabote nakai shikpɔŋ lɛ nɔ lɛ tee saji ahe susumɔ ni hiɛdɔɔ yɔɔ mli shi yɛ emli. Enyɛ ekai bɔni be ko lɛ maŋ lɛ tɔ̃ akɛni amɛbɛ Yehowa mli hekɛnɔfɔɔ ni yɛ enɛ hewɔ lɛ aŋmɛɛɛ lɛ gbɛ ni ebote Kaanan shikpɔŋ lɛ nɔ lɛ.—4 Mose 13:26–14:30.
2 No hewɔ lɛ Mose bua maŋ lɛ fɛɛ naa yɛ hekome yɛ Moab ŋa lɛ nɔ. Yɛ be mli ni eti maŋ lɛ yinɔsane kɛ Nyɔŋmɔ Mla lɛ mli lɛ, Mose kɛ nɔ ni atsɛɔ lɛ akɛ ewiemɔi ni eto naa ni ŋɔɔ fe fɛɛ lɛ ha. Etsɔ lalafoo wiemɔi ni nɔ bɛ mli ewo Israel hewalɛ ni amɛkɛ amɛhe afɔ Yehowa nɔ ni amɛbo lɛ toi, akɛ “anɔkwa Mawu ji Lɛ, nɔsha bɛ Lɛ; jalɔ ji lɛ ni esa pɛ.” Yɛ ewiemɔ lɛ naamuu mli lɛ, Mose wo amɛ hewalɛ akɛ: “Nyɛŋɔa nyɛtsuii nyɛfɔa wiemɔi nɛɛ fɛɛ ni miye he odase mitsɔɔ nyɛ ŋmɛnɛ gbi nɛɛ lɛ nɔ, ni nyɛwo nyɛbii lɛ akita ni amɛjwɛŋ nɛkɛ mla nɛɛ mli wiemɔi lɛ fɛɛ nɔ ni amɛye nɔ. Ejaakɛ jeee wiemɔ folo eji ha nyɛ shi moŋ nyɛyiwala ni.”—5 Mose 32:4, 46, 47.
‘Amɛtsuii ni Amɛaaŋɔ Fɔ’ Nyɔŋmɔ Wiemɔ lɛ Nɔ
3, 4. (a) Mɛni ji nɔ ni Israelbii lɛ ‘baaŋɔ amɛtsuii amɛfɔ nɔ’ lɛ, ni enɛ kɔɔ mɛni he? (b) Sɛɛ mli yinɔ lɛ kɛ Mose ŋaawoo lɛ tsu nii yɛ mɛɛ gbɛ nɔ?
3 Mose bɔ Israelbii lɛ kɔkɔ ni ‘amɛŋɔ amɛtsuii’ amɛfɔ niŋmaai krɔŋkrɔŋ lɛ fɛɛ nɔ shi jeee lala ni kanyaa mɔ lɛ pɛ. Esa akɛ “amɛbo toi jogbaŋŋ” (Knox) , “amɛkwɛ ni amɛbo toi” (Today’s English Version) aloo “amɛjwɛŋ nɔ” (The Living Bible) ni ji Nyɔŋmɔ Mla lɛ. Kɛ amɛkase enɛ jogbaŋŋ diɛŋtsɛ lɛ, no dani amɛaanyɛ ‘amɛfa amɛbii lɛ ni amɛfee nɔ ni mla lɛ mli wiemɔi lɛ fɛɛ kɛɔ lɛ.’ Mose ŋma yɛ 5 Mose 6:6-8 akɛ: “Ni nɛkɛ wiemɔi nɛɛ ni miwoɔo he kita ŋmɛnɛ gbi nɛɛ aka otsui nɔ, ni ojwɛŋ nɔ otsɔɔ obii . . . ni oŋɔfee kaimɔ nɔ ofi onineshi, ni amɛtsɔmɔ hiɛnaa taramɔnii yɛ ohiŋmɛii ateŋ.”
4 Biblia mli saji ahe wielɔ W. H. Darvey tsɔɔ bɔ ni yɛ sɛɛ mli lɛ “Yudafoi lɛ tsɔɔ wiemɔi nɛɛ ashishi amɛha, ni amɛha gbɛtsɔɔmɔ ni yɔɔ mli lɛ tsɔmɔ tamɔ apasa hemɔkɛyeli loo gbeyeishemɔ nɔ ko ni akɛmiitsu nii. Aŋmala kukuji komɛi . . . yɛ wolo nɔ, ni akɛfiɔ nineshi ni akɛtaraa hiɛnaa yɛ sɔlemɔ be mli.” Amɛwoɔ kaimɔ woji lɛkɛtɛlɛkɛtɛɛ yɛ Yesu be lɛ mli ni Yudafoi ajamɔ kui komɛi feɔ nakai lolo ŋmɛnɛ. (Mateo 23:5) Shi Darvey kɛfata he akɛ: “Gbɔmɛi tsɔ amɛbuulufeemɔ nɔ amɛtereɔ nɛkɛ mla nɛɛ mli woji nɛɛ kɛkɛ ni amɛtsuii enyɔ amɛmli moŋ fe ni amɛaajie kitai ni aŋmala yɛ mli lɛ anɔyeli diɛŋtsɛ kpo yɛ amɛshihilɛi amli.”
5. Mɛni ji Mose wiemɔi ni yɔɔ 5 Mose 6:6-8 le kɛ nitsumɔ yɛ gbɛ ni ja nɔ?
5 Dabi, jeee amɛniji diɛŋtsɛ loo amɛhiɛnai diɛŋtsɛ ji he ni esa akɛ Nyɔŋmɔ Mla lɛ ahi, shi moŋ ‘yɛ amɛtsuii amli.’ Jeee ehe nilee pɛ kɛkɛ ni amɛaana shi moŋ hiɛsɔɔ ni mli kwɔ ni amɛaana amɛha enɛ lɛ baaha Mlai lɛ ahi amɛhiɛ yɛ be fɛɛ mli tamɔ nɔ ni aŋmala yɛ tao nɔ yɛ amɛhiɛ loo afimɔ akpɛtɛ amɛniji ahe.
Gbɛjianɔ ni Atoɔ Ahaa Nyɔŋmɔ Mla lɛ Kasemɔ
6, 7. (a) Mɛɛ gbɛjianɔ Yehowa to koni eha Israelbii lɛ ale Mose Mla lɛ? (b) Mɛɛ gbɛ nɔ eeenyɛ efee akɛ no nɔ atsɔ ni akɛtsɔɔ Nyɔŋmɔ webii ni hi shi yɛ blema bei amli lɛ Nyɔŋmɔ Wiemɔ lɛ?
6 Shi te aaafee tɛŋŋ ni Israelbii lɛ aaanyɛ akase Mla lɛ ni akpɔi loo famɔi komekomei 600 yɔɔ mli lɛ? Eka shi faŋŋ akɛ kɛjɛ shishijee lɛ ekomɛi anámɔ baawa. Esa akɛ Israel maŋtsɛ ni baaba yɛ wɔsɛɛ be mli lɛ “ekwɛ nɛkɛ Mla nɛɛ nɔ eŋma eko kɛjɛ wolo . . . lɛ mli eha ehe; ni ahi edɛŋ, ni ekane mli ewala gbii abɔ fɛɛ, koni ekase Yehowa, e-Nyɔŋmɔ lɛ gbeyeishemɔ kɛ nɛkɛ Mla nɛɛ mli wiemɔi fɛɛ kɛ akpɔi fɛɛ nɔ yeli ni efee nakai.” (5 Mose 17:18, 19) Nyɔŋmɔ to gbɛjianɔ koni akane Mla lɛ yɛ daa afii kpawo nɔ yɛ Asesei Agbijurɔ lɛ nɔ. (5 Mose 31:10-13) Yɛ be mli ni ŋwanejee ko bɛ he akɛ nɛkɛ be nɛɛ bafeɔ be ni gbɔmɛi lɛ naa nɔyaa yɛ mumɔŋ lɛ, ejeee nɔ ni haa amɛnaa nilee ni mli kwɔ akɛni ekanemɔ lɛ baaa kpitiokpitio lɛ hewɔ.
7 Yehowa to gbɛjianɔ hu koni Levi akutso lɛ ‘atsɔɔ Yakob Nyɔŋmɔ kojomɔ yiŋkpɛi kɛ Israel Nyɔŋmɔ mla.’ (5 Mose 33:8, 10; okɛto Maleaki 2:7 he.) Yɛ bei komɛi amli lɛ, Levibii lɛ faa nitsɔɔmɔ he tafai ni amɛkɛtsɔɔ maŋ muu lɛ fɛɛ nii. (2 Kronika 17:7-9; Nehemia 8:7-9) Etamɔ nɔ ni yɛ be ni sa mli lɛ, Nyɔŋmɔ Wiemɔ lɛ mli fai komɛi baje gbɔmɛi lɛ adɛŋ. No hewɔ lɛ, Lalatsɛ lɛ baanyɛ aŋma akɛ: “Miishɛɛ ji gbɔmɔ ni . . . Yehowa mla lɛ he emii shɛɔ yɛ, ni emla lɛ he nɔŋŋ ejwɛŋɔ shwane kɛ nyɔɔŋ!” (Lala 1:1, 2) Mose ŋaawoo akɛ ‘amɛkɛ amɛtsuii afɔ Nyɔŋmɔ Wiemɔ lɛ nɔ’ lɛ ji famɔ akɛ amɛje gbɛ amɛkɛ mɔdɛŋbɔɔ akase Biblia lɛ.
‘Wɔtsuii ni Wɔkɛaafɔ’ Nyɔŋmɔ Wiemɔ lɛ nɔ Ŋmɛnɛ
8. Israel bo Mose ŋaawoo lɛ toi kɛyashɛ nɛgbɛ, ni mɛni jɛ mli ba?
8 Israel booo Mose kɔkɔbɔɔ lɛ toi. Be mli ni yɛ naagbee lɛ maŋ lɛ na emaŋtsɛ lɛ, eka shi faŋŋ akɛ emaŋtsɛmɛi lɛ ateŋ mɛi pii eŋmaaa ‘mla lɛ mli wiemɔi lɛ eko amɛhaaa amɛhe ni amɛkaneee yɛ amɛwala gbii abɔ fɛɛ mli.’ Beni shɛɔ afii ohai kpawo D.Ŋ.B., yɛ Maŋtsɛ Yosia gbii lɛ amli lɛ, no mli lɛ “mla wolo” lɛ elaaje. (2 Maŋtsɛmɛi 22:8-13) Ŋwanejee ko bɛ he akɛ maŋ lɛ hiɛnyiɛlɔi lɛ anɔkwɛmɔ nɔ gbonyo lɛ ha maŋ lɛ bote hemɔkɛyeli kwamɔ mli. Mose kɔkɔbɔɔ lɛ bafee anɔkwale, oshara ba maŋ lɛ nɔ yɛ afi 607 D.Ŋ.B.—5 Mose 28:15-37; 32:23-35.
9. Shihilɛ ni Kristofoi yɔɔ mli ŋmɛnɛ lɛ tamɔ blema Israel nɔ lɛ yɛ mɛɛ gbɛ nɔ?
9 Taakɛ blema Israelbii lɛ ji lɛ, Kristofoi ni yɔɔ ŋmɛnɛ lɛ damɔ shiwoo shikpɔŋ lɛ—Nyɔŋmɔ jalɛ jeŋ hee lɛ, husui anaa. (2 Petro 3:13) Saji ni kanyaa mɔ tsotsoro shi yɛ ŋwɛi: “Hejɔlɛ yɛ ni wɔyɛ shweshweeshwe,” “Babilon Kpeteŋkpele” lɛ shigbeemɔ, ‘Gog ni jɛ Magog’ lɛ tutuamɔ. Nɛkɛ nibii nɛɛ baaka hekɛnɔfɔɔ ni wɔyɔɔ yɛ Yehowa mli lɛ akwɛ. Ehe miihia waa mɔ, akɛ ‘wɔkɛ wɔtsuii afɔ Nyɔŋmɔ Wiemɔ lɛ nɔ’ bianɛ!—1 Tesalonikabii 5:3; Kpojiemɔ, yitso 18; Ezekiel, yitso 38.
10. Mɛni hewɔ mɛi komɛi ekaseee nii yɛ teemɔŋ lɛ?
10 Shi, nakai feemɔ baaha wɔkɛ sane ni mli wa akpe yɛ “jaramɔ bei” nɛɛ amli. (2 Timoteo 3:1) Heloo gbɛfaŋ nitsumɔ, bii atsɔsemɔ, skul kɛ asafoŋ gbɛnaa nii fɛɛ baanyɛ abi wɔbe ni fa. Nɔ ni baanyɛ ajɛ mli aba ji akɛ, wɔbaanyɛ wɔtsi wɔhe ni wɔjie wɔnaa ni wɔba Biblia lɛ kasemɔ shi, ni wɔsusu akɛ ‘miibɔ mɔdɛŋ bɔ ni sa.’ Ni kɛlɛ, Biblia lɛ woɔ Kristofoi lɛ aŋaa akɛ: “Bɔɔ nii nɛɛ ahe mɔdɛŋ; okɛ ohe awo mli kwraa.” (1 Timoteo 4:15, 16) Nyɛhaa wɔsusua yiŋtoi titrii komɛi ahewɔ ni’esa akɛ wɔfee nakai bianɛ lɛ ahe.
Wekukpaa ni ka Wɔ kɛ Yehowa Teŋ lɛ Mli Hewalɛwoo
11, 12. (a) Nyɔŋmɔ ni Hiob le lɛ jogbaŋŋ yɛ teemɔŋ lɛ sa ehe yɛ mɛɛ gbɛ nɔ? (b) Mɛni hewɔ bɔ ni Nyɔŋmɔ he ninaa ni wɔyɔɔ lɛ mli baanyɛ afee faŋŋ bianɛ fe bɔ ni eji yɛ Hiob gbii lɛ amli lɛ?
11 Hiob ji nuu ko “ni sheɔ Nyɔŋmɔ gbeyei ni esɔleɔ ehe kɛjɛɔ efɔŋ he.” Shi yɛ sɛɛ mli beni Yehowa jie ehe kpo ekoŋŋ etsɔɔ lɛ yɛ ahum ko mli lɛ, Hiob baanyɛ akɛɛ akɛ: “Mitoi kɛkɛ mikɛnu ohe; shi agbɛnɛ mihiŋmɛii enao.” (Hiob 1:1; 42:5) Ani wɔbaanyɛ ‘wɔna’ Nyɔŋmɔ ŋmɛnɛ, ni ji akɛ wɔya nɔ kɛteke le ni wɔle lɛ kɛkɛ lɛ nɔ, koni wɔle esu kɛ baŋ lɛ mli nɔ fɛɛ nɔ? Yɛ anɔkwale mli lɛ wɔbaanyɛ! Yehowa ejie ehe kpo babaoo etsɔɔ wɔ kɛtsɔ Biblia lɛ baafai amli fe bɔ ni Hiob po le.
12 Wɔnuɔ bɔni Nyɔŋmɔ suɔmɔ lɛ mli kwɔ ha lɛ shishi yɛ faŋŋ mli agbɛnɛ, ejaakɛ wɔle akɛ “esumɔɔ je lɛ aahu akɛ eŋɔ ebi koome lɛ eha.” (Yohane 3:16) Wɔyɛ Nyɔŋmɔ nitsumɔi lɛ ahe gbɛjianɔtoo kɛtsɔ Biblia gbalɛi amli—aahu kɛyashi Afii Akpe lɛ naagbee! (Kpojiemɔ, yitsei 18-22) Wɔyɛ bɔni Nyɔŋmɔ kɛ Kristofoi asafo lɛ ye lɛ he yinɔsane ni aŋmala ashwie shi: bɔni ekɛ Jeŋmajiaŋbii ba mli, bɔni ehala “tsulɔ anɔkwafo kɛ nilelɔ” lɛ koni elɛ ewebii lɛ, bɔni etsɛ “asafo babaoo” lɛ ni yɔɔ hiɛnɔkamɔ akɛ amɛbaahi shi daa yɛ shikpɔŋ nɔ Paradeiso lɛ mli lɛ. (Mateo 24:45; Kpojiemɔ 7:9, 14-17; Efesobii 3:3-6) Yɛ be mli ni wɔma wɔyi shi ni wɔkwɛ Nyɔŋmɔ nibii ni mli kwɔlɔ lɛ amli ni wɔsusu enaakpɛɛ nitsumɔi ni etsuɔ ehaa wɔ lɛ ahe lɛ, wɔnyɛŋ wɔfee nɔ ko akɛ ja wɔbo akɛ: “Oo, bɔ ni Nyɔŋmɔ nifalɛ kɛ ŋaa kɛ nilee mli kwɔ ha nɛ!”—Romabii 11:33.
13. Te wɔɔfee tɛŋŋ ‘wɔtao Nyɔŋmɔ sɛɛ gbɛ,’ ni mɛɛ sɛɛnamɔi jɛɔ mli baa yɛ nakai feemɔ mli?
13 Lalatsɛ lɛ kɛɛ: “Bo osɛɛ gbɛ mi kɛ mitsui muu lɛ fɛɛ taoɔ.” Wɔbaanyɛ wɔfee nakai nɔŋŋ kɛtsɔ Ŋmalɛ mli saji ahe susumɔ nɔ daa gbi; efeɔ babaoo yɛ ekomefeemɔ ni ka wɔkɛ Yehowa teŋ lɛ mli hewalɛ ni ewoɔ lɛ mli. Nikasemɔ kɛ hiɛdɔɔ hu yeɔ buaa wɔ ni ehaa wɔ gbɛhe lɛ ‘maa shi shiŋŋ koni wɔye Nyɔŋmɔ gbɛnai lɛ anɔ.’—Lala 119:5, 10.
Nikasemɔ Yeɔ Buaa wɔ ni Wɔfaa Wɔhemɔkɛyeli lɛ He
14. Feemɔ sɛɛnamɔ ni jɛɔ ‘hetoo ni wɔɔna wɔha mɔ fɛɛ mɔ’ yɛ wɔ Kristofoi ahiɛnɔkamɔ lɛ he lɛ he nɔkwɛmɔ nɔ.
14 Ghananyo ko kɛɛ mɛi enyɔ ni ba eshia lɛ akɛ: “Mitaooo nyɛ Odasefoi lɛ yɛ mishia!” Etee nɔ ejɛ Odasefoi lɛ eko akɛ “nyɛheee la ni nyɛŋaaa maŋ aflaŋaa lɛ.” Wɔkɛ shitee-kɛ-woi ni tamɔ nakai kpeɔ yɛ sɔɔmɔ nitsumɔ lɛ mli. Mɛɛ ahorabɔɔ—kɛ hiɛshishwiemɔ—enɛ aaaji kɛji akɛ wɔnyɛɛɛ ‘wɔna hetoo wɔha mɔ fɛɛ mɔ ni biɔ wɔ hiɛnɔkamɔ ni yɔɔ wɔmli lɛ shishi lɛ’! (1 Petro 3:15) Duromɔ naa lɛ, nɛkɛ Odasefoi nɛɛ nyɛ amɛkɛ Biblia lɛ tsu nii jogbaŋŋ ni amɛkɛtsɔɔ bɔ ni esa akɛ asusu la he yɛ gbɛ ni ja nɔ kɛ bɔ ni esa akɛ Kristofonyo aŋmɛ pɛpɛɛpɛ yɛ bulɛ kɛha maŋ okadii koni ekwa wɔŋ jamɔ lɛ mli. Mɛni jɛ mli ba? Nuu lɛ na miishɛɛ ni enaa kpɛ ehe yɛ hetoo ni yaa tɛɛ ni amɛkɛ ha lɛ lɛ hewɔ. Ŋmɛnɛ, nuu nɛɛ kɛ eŋa fɛɛ etsɔmɔ Odasefoi ni abaptisi amɛ.
15. Teemɔŋ nikasemɔ wulaa wɔ kɛhaa wɔsɔɔmɔ nitsumɔ lɛ yɛ mɛɛ gbɛ nɔ?
15 Paulo wo hewalɛ akɛ: “Bɔɔ mɔdɛŋ ni okɛ ohe adamɔ Nyɔŋmɔ hiɛ akɛ mɔ ko ni sa, nitsulɔ ni hiɛ gbooo, ni jaa anɔkwale wiemɔ lɛ mli pɛpɛɛpɛ.” Jeee akɛ teemɔŋ nikasemɔ baaye abua wɔ ni wɔhi wala gbɛ lɛ nɔ kɛkɛ, shi moŋ “ebaaha wɔye emuu, ni asaa wɔ pɛpɛɛpɛ” koni wɔye wɔbua mɛi krokomɛi ni amɛfee nakai.—2 Timoteo 2:15; 3:17.
Satan Ŋaatsɔi lɛ ni Wɔɔte Shi Wɔwo
16. Mɛni ji Satan ŋaatsɔi komɛi ni Yehowa webii kɛkpeɔ lɛ ekomɛi?
16 Ŋmɛnɛ, adafitswai teɔ wɔ akɔnɔ shi kɛyaa “heloo lɛ sɛɛdii nii lɛ kɛ hiŋmɛii lɛ asɛɛdii nii lɛ kɛ shihilɛ lɛ mli hewoo” lɛ anɔ. (1 Yohane 2:16) Adafitswaa woji kɛ radio woɔ bɔlɛnamɔ mli jeŋba shara hiɛ nyam ni nanemɛi nitsulɔi kɛ skulbii wieɔ he babaoo. Akɛ hemɔkɛyeli kwamɔ he woji ni kanyaa mɔ baaba wɔshiai ni jeee bi wɔbi akɛ akɛba. Nyɛmimɛi komɛi kɛ henɔwomɔ ekane woji ni gbeɔ mɔ he guɔ yɛ nɛkɛ gbɛ nɔ lɛ—ni nɔ ni ejɛ mli eba ji amɛ hemɔkɛyeli lɛ fitemɔ. Agbɛnɛ pɛsɛmkunya, heloo mli “mumɔ ni tsuɔ nii ŋmɛnɛŋmɛnɛ yɛ toigbelebii amli” lɛ hu yɛ. Ewaaa kwraa akɛ enɛ aaana mɔ ko nɔ hewalɛ ni eeeje shishi ni ena efɔŋ su ni haa awieɔ ashiɔ nii!—Efesobii 2:2.
17, 18. Teemɔŋ nikasemɔ baatsi ‘kpalaŋmɔ ni wɔɔkpalaŋ kɛaaya’ lɛ gbɛ yɛ mɛɛ gbɛ nɔ?
17 Shi mɛi fioo ko pɛ Satan tsɔne lɛ duɔ amɛ. Kɛ amɛkpoo teemɔŋ nikasemɔ lɛ, amɛtsɔmɔɔ tamɔ lɛlɛ ni miikpalaŋ kɛmiijɛ edaamɔ he, kɛkɛ lɛ fiofio lɛ “amɛkpalaŋ” kɛtee ni etsɛɛɛ ni amɛbatsɔmɔɔ nibii ni Satan tutuaa. (Hebribii 2:1) Akɛ nɔkwɛmɔ nɔ lɛ, nyɛminuu obalanyo fioo ko kɛ gbekɛ yoo fioo ko ni miiya skul bɔ ajwamaŋ. Ekɛɛ akɛ: “Mibayoo akɛ nɔ ni ha enɛ ba lɛ nakai lɛ ji anɔkwale ni eji akɛ mumɔŋ hɔmɔ miiye mi. Mikaseee nii yɛ teemɔŋ. No hewɔ ni minyɛɛɛ madamɔ kaa lɛ naa lɛ.” Shi ato teemɔŋ nikasemɔ he gbɛjianɔ aha lɛ ni no ye ebua nyɛminuu lɛ koni ehe awa yɛ mumɔŋ ekoŋŋ.
18 Satan etswa efai shi akɛ ebaakpata Nyɔŋmɔ webii lɛ ateŋ mɛi ni fa babaoo hiɛ bɔ ni eeenyɛ. Kɛ wɔkɛ nibii kpakpai ni jɛ Nyɔŋmɔ Wiemɔ lɛ kɛ tsulɔ anɔkwafo lɛ ŋɔɔ lɛ lɛ wɔjwɛŋmɔ yɛ be fɛɛ mli lɛ, wɔbaanyɛ wɔkwa tsɔne ni aaatsɔ wɔ lɛ. (Filipibii 4:8) Kaimɔi koni wɔkwa heloo gbɛfaŋ nibii asɛɛdii, bɔlɛnamɔ mli jeŋba shara, hemɔkɛyeli kwamɔ he susumɔ, kɛ nibii ni ejaaa gbɛ lɛ ahe susumɔ lɛ babaoo yɛ Biblia lɛ mli kɛ agbɛnɛ yɛ Buu-Mɔɔ Asafo lɛ woji sɔrɔtoi amli. Kɛ wɔjwɛŋ nibii nɛɛ anɔ babaoo kɛteke nɔ lɛ, wɔkpalaŋ kɛyaŋ kɔkɔɔkɔ.
Gbɛjianɔtoo ni jɛ Yehowa Asafo lɛ Ŋɔɔ ni Baaye Abua Wɔ
19. Etiopia piafonyo lɛ feɔ bɔ ni mumɔŋ gbɛtsɔɔmɔ he hiaa wɔ lɛ he mfoniri yɛ mɛɛ gbɛ nɔ?
19 Nikasemɔ ji nitsumɔ ko ni wa. No hewɔ lɛ wɔbaanyɛ wɔda shi akɛ Yehowa asafo lɛ yeɔ buaa wɔ babaoo yɛ enɛ mli. Mɛi komɛi ewie yɛ nyɛsɛɛ afii nɛɛ amli akɛ aŋmɛ aŋkroaŋkroi agbɛ ni amɛtsɔɔ Biblia lɛ shishi amɛ diɛŋtsɛ. Shi Etiopia piafonyo lɛ kpɛlɛ nɔ yɛ faŋŋ mli akɛ mumɔŋ gbɛtsɔɔmɔ he miihia lɛ. Akɛ mɔ ni etsake ehe etsɔ Yudanyo ni afolɛ ketia lɛ, ŋwanejee ko bɛ he akɛ eyɛ Biblia lɛ he nilee babaoo bɔ ni sa. Anɔkwale ni eji akɛ ebaabɔ mɔdɛŋ ni ekase nɔ ko ni mlikwɔ tamɔ gbalɛ ni yɔɔ Yesaia 53 lɛ tsɔɔ enɛ. Ni kɛlɛ, beni abi lɛ akɛ ani enuɔ nɔ ni ekaneɔ lɛ shishi lo lɛ, ekpɛlɛ nɔ akɛ: “Te mafee tɛŋŋ ni manyɛ hu akɛ ja mɔ ko tsɔɔ mi?”—Bɔfoi lɛ Asaji 8:26-33.
20. (a) Mɛni ji gbɛjianɔ ni Yehowa asafo lɛ eto koni ekɛye ebua wɔ yɛ Biblia lɛ ni wɔkaseɔ yɛ teemɔŋ lɛ ekomɛi? (b) Te onuɔ nɛkɛ gbɛjianɔtoi nɛɛ ahe ohaa tɛŋŋ?
20 Mumɔŋ gbɛtsɔɔmɔ he miihia Yehowa webii ni yɔɔ ŋmɛnɛ lɛ nakai nɔŋŋ. Akɛni amɛmiisumɔ ni “amɛnaabu afee ekome” kɛ amɛmiiwie mumɔŋ saji ahe hewɔ lɛ, amɛkpɛlɛɔ yelikɛbuamɔ ni Yehowa asafo lɛ kɛhaa amɛ lɛ nɔ—ni mɛɛ yelikɛbuamɔ kpele po enɛ ji nɛkɛ! (1 Korintobii 1:10) Wɔyɛ saji babaoo ni baa daa kɛtsɔɔ Buu-Mɔɔ lɛ kɛ Awake! woji tɛtrɛbii lɛ amli. Wɔyɛ woji wuji kɛ woji bibii sɔrɔtoi babaoo ni wieɔ Biblia mli saji otii sɔrɔtoi ahe. Ajɔɔ mɛi ni kaneɔ Ŋleshi wiemɔ lɛ babaoo titri lɛ akɛni amɛyɔɔ Watch Tower Publications Index 1930-1985 lɛ, ejaakɛ eji dɛŋdade ni baanyɛ aye abua mɔ ko ni ‘etao nilee tamɔ jwiɛtɛi kɛ jwetri ni aŋɔtee.’—Abɛi 2:2-4.
21. (a) Bɔfo Paulo jie miishɛɛ kpo yɛ teemɔŋ nikasemɔ mli yɛ mɛɛ gbɛ nɔ? (b) Mɛɛ ŋaa awoɔ koni wɔteemɔŋ nikasemɔ afee nɔ ni hi?
21 Ani okɛ hegbɛ ni Asafo lɛ woji lɛ kɛhaa lɛ fɛɛ miitsu nii kɛmiiha nikasemɔ kɛ nibii amlipɛimɔ? Aloo nɛkɛ woji nɛɛ tamɔ wulamɔ nibii ni okɛsaa owojiatoo he? Nɔ ni yɔɔ miishɛɛ lɛ, bɔfo Paulo wo Timoteo ŋaa be ko akɛ “kotoku lɛ ni mishi . . . lɛ, okɛba, kɛ woji lɛ hu, shi titri lɛ kooloi ahe woji ni aŋmalaa nii yɛ nɔ lɛ,” akɛ ekɛbaha lɛ yɛ Roma; eka shi faŋŋ akɛ Paulo miiwie Hebri Ŋmalɛi lɛ fai komɛi ahe. (2 Timoteo 4:13) Eka shi faŋŋ akɛ eetao ni enine ashɛ nɔ koni ekɛkase nii ni ekɛtao nibii amli. Kɛji akɛ ofeko nakai momo lɛ, mɛni hewɔ ojeee shishi bianɛ ni otao bo diɛŋtsɛ oteokrase wojiatoo he bɔni afee ni bo hu onyɛ otao saji ni opɛi saji amli? Ha woji nɛɛ afee nɔ ni onine baanyɛ ashɛ nɔ oya, oto he gbɛjianɔ fɛfɛo, amɛhe tse, kɛ nɔ ni sa. Too he ko kɛha nikasemɔ, ni ji akɛ he ko ni yɔɔ dioo ni kane kpɛɔ jogbaŋŋ yɛ jɛmɛ. Too be he gbɛjianɔ oha oteemɔŋ nikasemɔ daa.
22. Mɛni hewɔ ‘wɔtsuii ni wɔkɛaafɔ Nyɔŋmɔ Wiemɔ lɛ nɔ’ lɛ he hiaa ŋmɛnɛ fe be fɛɛ lɛ?
22 Wɔdamɔ jeŋ hee lɛ husui anaa tuŋtu, taakɛ Israelbii lɛ ni bɔ ŋsara yɛ Moab ŋa kplanaa lɛ nɔ lɛ ji lɛ. Ehe miihia ni wɔkase Nyɔŋmɔ Wiemɔ lɛ jogbaŋŋ bianɛ fe be fɛɛ, ‘ni wɔhe be lɛ’ kɛba nikasemɔ, ekolɛ ni wɔkɛ nibii krokomɛi ni wɔsumɔɔ asha afɔle, tamɔ televishin kwɛmɔ. (Efesobii 5:16) Petro wo ŋaa akɛ: “Nyɛshwea wiemɔ lɛ mli fufɔ krɔŋŋ lɛ tamɔ fufɔbii ni afɔ bianɛ, koni nyɛdara yɛ mli kɛna yiwalaheremɔ.” (1 Petro 2:2; okɛto Hebribii 5:12-14 he.) Ekɔɔ wɔwala he. No hewɔ lɛ tee shi owo su ni baaha oŋmɛɛ teemɔŋ nikasemɔ he lɛ. Okɛtsu nii akɛ nɔ ni obaatsɔ nɔ ni oha suɔmɔ ni oyɔɔ kɛha Nyɔŋmɔ lɛ kɛ ohe ni okɛfɔɔ enɔ lɛ mli awa; eji gbɛ hu ni oootsɔ nɔ oha hiɛsɔɔ ni oyɔɔ kɛha gbɛjianɔtoo ni ekɛtsuɔ nii ni ekɛye ebua wɔ lɛ aya hiɛ. Hɛɛ, ‘okɛ otsui afɔ’ Nyɔŋmɔ Wiemɔ lɛ nɔ, yɛ mɔdɛŋbɔɔ mli, daa. “Ejaakɛ ejeee wiemɔ folo kɛha nyɛ, shi moŋ nyɛyiwala ni.
[Shishigbɛ niŋmai]
Akɛ shɔɔnii tamɔ gbɛ ni ejwara lɛ kukuji komɛi tsu nii yɛ Biblia bei amli akɛ nɔ ni jara waaa ni aŋmaa nii yɛ nɔ. The International Standard Bible Encyclopedia (1986) lɛ kɛɛ: “Ohiafoi ni bɛ nɔ ko lɛ po baanyɛ ni amɛkɛ gbɛ ni ejwara ni ji ostraca lɛ fa ko atsu nii akɛ nɔ ni amɛŋmaa nii yɛ nɔ.” Bɔ ni blema Israelbii nɛɛ kɛ ostraca nɛɛ tsu nii amɛkɛ ŋmala Biblia mli ŋmalɛi lɛ kɛyashɛ lɛ wɔleee. Shi nɔ ni yɔɔ miishɛɛ ji akɛ, anaa afii ohai nyɔŋmai kpawo Ŋ.B. lɛ mli ostraca ni Biblia mli ŋmalɛi yɔɔ nɔ yɛ Mizraim, ni miitsɔɔ nɔ kome ni ohiafoi lɛ tsɔɔ nɔ amɛnine shɛɔ Biblia lɛ fai komɛi anɔ.
Ajie kɛjɛ August 15, 1988 Watchtower lɛ mli.
Saji Otii ni Akɛtiɔ Mli
◻ Mɛni hewɔ Mose wo Israebii Iɛ aŋaa ni ‘amɛŋɔ amɛtsuii amɛfɔ Nyɔŋmɔ Wiemɔ’ lɛ nɔ lɛ, ni mɛɛ gbɛ nɔ amɛaatsɔ amɛfee enɛ yɛ?
◻ Teemɔŋ nikasemɔ wajeɔ wekukpaa ni ka wɔkɛ Nyɔŋmɔ teŋ lɛ ni eyeɔ buaa wɔ ni wɔfeɔ wɔhemɔkɛyeli lɛ he yɛ mɛɛ gbɛ nɔ?
◻ Mɛni teemɔŋ nikasemɔ tsuɔ yɛ shi ni wɔteɔ wɔwoɔ Satan ŋaatsɔi Iɛ mli?
◻ Yehowa asafo lɛ eto mɛni nibii ahe gbɛjianɔ yɛ Nyɔŋmɔ Wiemɔ lɛ ni wɔkaseɔ lɛ mli?
[Mfoniri ni yɔɔ baafa 9]
Ni amɛaaŋmala Nyɔŋmɔ Mla lɛ yɛ amɛtsuii anɔ lɛ, Yudafoi Iɛ fimɔ woji ni aŋmala ŋmalɛi moŋ yɛ mli yɛ amɛhe