Barnaba “Miishɛjemɔ Bi” Lɛ

MƐƐ be nɛ ni onaanyo ko shɛje omii? Ani okaiɔ be ni oshɛje mɔ ko mii? Hewalɛwoo he hiaa wɔteŋ mɔ fɛɛ mɔ yɛ be kɛ bei amli, ni kwɛ bɔ ni wɔnáa mɛi ni jɛɔ suɔmɔ mli amɛkɛhaa lɛ ahe miishɛ wɔhaa! Ni aaashɛje mɔ ko mii lɛ tsɔɔ akɛ, aaahe be ni akɛbo lɛ toi, anu lɛ shishi, ni aye abua lɛ. Ani ofee klalo akɛ obaafee nakai?

Gbɔmɔ ko ni jie suɔmɔ ni tamɔ nɛkɛ kpo yɛ gbɛ ni ekaaa nɔ lɛ ji Barnaba, mɔ ni ji ‘gbɔmɔ kpakpa ni eyi obɔ kɛ mumɔ krɔŋkrɔŋ kɛ hemɔkɛyeli’ lɛ. (Bɔfoi lɛ Asaji 11:24) Mɛni hewɔ abaanyɛ akɛɛ nakai yɛ Barnaba he? Mɛni efee hewɔ ni sanemlitsɔɔmɔ nɛɛ sa lɛ lɛ?

Mɔ Ko ni Yeɔ Ebuaa Babaoo

Egbɛi diɛŋtsɛ ji Yosef, shi bɔfoi lɛ kɛ sabãlã gbɛi ni kɛ esubaŋ kpãa gbee lɛ wo lɛ—Barnaba, ni eshishi ji “Miishɛjelɔ Bi.”a (Bɔfoi lɛ Asaji 4:36) Etsɛko tsɔ ni ato Kristofoi asafo lɛ shishi. Mɛi komɛi susu akɛ ekolɛ Barnaba ji Yesu kaselɔi lɛ ateŋ mɔ ko momo. (Luka 10:1, 2) Kɛji nakai eji loo jeee nakai jio, nɛkɛ nuu nɛɛ efee nii yɛ gbɛ ni ja nɔ.

Yɛ Pentekoste afi 33 Ŋ. B. sɛɛ lɛ, Barnaba, ni ji Levinyo ni jɛ Kipro lɛ jɛ esuɔmɔ mli ehɔɔ shikpɔŋ ko, ni ekɛ shika lɛ yaha bɔfoi lɛ. Mɛni hewɔ efee nakai? Sane ni yɔɔ Bɔfoi lɛ Asaji lɛ kɛɔ wɔ akɛ, yɛ nakai be lɛ mli, yɛ Kristofoi ni yɔɔ Yerusalem lɛ ateŋ lɛ “ajaa ahaa mɔ fɛɛ mɔ bɔ ni he hiaa lɛ.” Eka shi faŋŋ akɛ, Barnaba ena akɛ hiamɔ yɛ, ni ejɛ etsuiŋ kɛ miishɛɛ mli efee he nɔ ko. (Bɔfoi lɛ Asaji 4:34-37) Ekolɛ eji nuu ni nɔ ko he ehiaaa lɛ tsɔ, shi eshashaooo shi akɛ ekɛ eheloonaa nibii ni eyɔɔ, kɛ lɛ diɛŋtsɛ ehe ni ekɛaaha kɛha Maŋtsɛyeli lɛ he nibii lɛ shweremɔ.b Taakɛ nilelɔ F. F. Bruce tsɔɔ lɛ, “Barnaba kɛ hewalɛwoo fɛɛ ni ebaanyɛ ekɛha lɛ haa gbɔmɛi yɛ he fɛɛ he ni enaa amɛ yɛ, loo shihilɛ ni ebiɔ ni akɛ hewalɛwoo aha lɛ mli.” Enɛ ji anɔkwale yɛ sane ni ji enyɔ ni epue yɛ mli lɛ mli.

Aaafee afi 36 Ŋ.B. lɛ, Saulo ni jɛ Tarso (sɛɛ mli Bɔfo Paulo lɛ), ni amrɔ nɛɛ etsɔ Kristofonyo lɛ miibɔ mɔdɛŋ koni ekɛ Yerusalem asafo lɛ abɔ, “shi amɛ fɛɛ amɛmiishe lɛ gbeyei, amɛheee amɛyeee akɛ kaselɔ ji lɛ.” Te eeefee tɛŋŋ etsɔ asafo lɛ yiŋ koni amɛle akɛ etsakemɔ lɛ jeee ŋaatsɔɔ kɛha asafo lɛ butumɔ lolo, shi moŋ eji anɔkwale lɛ? “Barnaba ŋɔ lɛ kɛtee bɔfoi lɛ aŋɔɔ.”—Bɔfoi lɛ Asaji 9:26, 27; Galatabii 1:13, 18, 19.

Atsɔɔɔ nɔ hewɔ ni Barnaba he Saulo eye lɛ mli. Shi yɛ fɛɛ mli lɛ, “Miishɛjemɔ Bi” lɛ hi shi yɛ esabãlã gbɛi lɛ naa, kɛtsɔ Saulo toi ni ebo, ni eye ebua lɛ kɛje naagba ni etamɔ nɔ ni hiɛnɔkamɔ ko bɛ mli lɛ mli lɛ nɔ. Eyɛ mli akɛ no sɛɛ lɛ Saulo ku esɛɛ kɛtee emaŋ ni ji Tarso lɛ mli moŋ, shi naanyobɔɔ ko ebakã hii enyɔ lɛ ateŋ. Nɔ ni baajɛ mli aba yɛ afii ni baanyiɛ sɛɛ lɛ amli lɛ baafee nɔ ni he yɔɔ sɛɛnamɔ.—Bɔfoi lɛ Asaji 9:30.

Yɛ Antiokia

Yɛ aaafee afi 45 Ŋ.B. lɛ, shweremɔ ni yaa nɔ yɛ Antiokia yɛ Siria lɛ ahe amaniɛbɔi yashɛ Yerusalem—gbɔmɛi ni wieɔ Hela ni yɔɔ maŋtiase lɛ mli lɛ ateŋ mɛi babaoo miitsɔmɔ heyelilɔi. Asafo lɛ wo Barnaba gbɛ koni eyatao mli ekwɛ, koni eto jɛmɛ nitsumɔ lɛ he gbɛjianɔ. Nihalamɔ ni nilee yɔɔ mli nɛ. Luka wieɔ akɛ: “Ni beni eshɛ jɛi ni ebana Nyɔŋmɔ duromɔ lɛ, emii shɛ ehe, ni ewie etsɔɔ amɛ fɛɛ akɛ amɛkɛ tsui ni fĩ shi akpɛtɛ Nuntsɔ lɛ he. Shi gbɔmɔ kpakpa ji lɛ ni eyi obɔ kɛ Mumɔ krɔŋkrɔŋ kɛ hemɔkɛyeli. Ni aŋɔ mɛi babaoo afata Nuntsɔ lɛ he.”—Bɔfoi lɛ Asaji 11:22-24.

Jeee no pɛ efee. Taakɛ nilelɔ Giuseppe Ricciotti tsɔɔ lɛ, “Barnaba ji nuu ni yeɔ ewiemɔ nɔ, ni enuɔ bɔ ni ehe hiaa ni ato gbɛjianɔ koni atsu nibii ahe nii oya bɔni afee ni nikpamɔ babaoo ajɛ afofro ni egba lɛ mli aba. No hewɔ lɛ, nɔ ni he hiaa titri ji nikpamɔ nitsulɔi.” Akɛni ejɛ Kipro hewɔ lɛ, ekolɛ Barnaba le bɔ ni akɛ Jeŋmajiaŋbii hiɔ shi haa. Ekolɛ enuɔ he akɛ ehe esa bɔ ni ebaanyɛ eshiɛ etsɔɔ wɔŋjalɔi. Shi efee klalo akɛ ekɛ mɛi krokomɛi baafata nitsumɔ ni yɔɔ miishɛɛ ni woɔ mɔ hewalɛ nɛɛ he.

Barnaba yasusu Saulo he. Eeenyɛ efee akɛ, Barnaba le gbalɛ naa kpojiemɔ ni akɛha Anania yɛ be mli ni atsake Saulo lɛ, akɛ tsutsu yiwalɔ lɛ ji ‘Yesu dɛŋdade ni ahala aha lɛ, koni ehiɛ egbɛi lɛ kɛya jeŋmajiaŋbii lɛ aŋɔɔ’ lɛ. (Bɔfoi lɛ Asaji 9:15) No hewɔ lɛ Barnaba yiŋ etee Tarso—gbi kome gbɛfaa ni jɛkɛ fe kilomitai 200—koni eyatao Saulo. Mɛi enyɔ lɛ fee ekome akɛ hefatalɔi kɛtsu nii afi muu, ni “Antiokia klɛŋklɛŋ” yɛ nɛkɛ be nɛɛ mli “akɛ ŋwɛi nɔkpɛlɛmɔ wo kaselɔi lɛ agbɛi akɛ Kristofoi yɛ.”—Bɔfoi lɛ Asaji 11:25, 26, NW.

Beni Klaudio yeɔ nɔ lɛ, hɔmɔ ni naa wa ba Roma Nɔyeli Kpokpai lɛ sɔrɔtoi pii anɔ. Yudafoi ayinɔsane ŋmalɔ Josephus tsɔɔ mli akɛ, yɛ Yerusalem lɛ “gbɔmɛi pii gboi yɛ nibii ni he hiaa ni akɛaaná niyenii lɛ ahewɔ.” Enɛ hewɔ lɛ kaselɔi ni yɔɔ Antiokia lɛ, “kpɛ mli akɛ amɛaatsu nɔ ko amɛmaje nyɛmimɛi ni yɔɔ Yudea lɛ ni amɛkɛyafɛ̃ne amɛ, mɔ fɛɛ mɔ bɔ ni ooonyɛ. Ni amɛfee nakai, ni amɛŋɔmaje onukpai lɛ kɛtsɔ Barnaba kɛ Saulo nine nɔ.” Beni amɛtsu nakai nitsumɔ lɛ kɛmɔ shi sɛɛ lɛ, mɛi enyɔ lɛ ku amɛsɛɛ amɛkɛ Yohane Marko tee Antiokia, he ni akane amɛ afata asafo lɛŋ gbalɔi kɛ tsɔɔlɔi lɛ ahe yɛ lɛ.—Bɔfoi lɛ Asaji 11:29, 30; 12:25; 13:1.

Maŋsɛɛ Shiɛmɔ Nitsumɔ Krɛdɛɛ Ko

Kɛkɛ ni nifeemɔ ko ni yɔɔ naakpɛɛ ba. “Shi beni amɛjáa Nuntsɔ lɛ ni amɛhiɔ ŋmaa lɛ, Mumɔ krɔŋkrɔŋ lɛ kɛɛ: Nyɛfãa Barnaba kɛ Saulo nyɛhaa mi kɛya nitsumɔ ni mitsɛ amɛ yɛ hewɔ lɛ.” Bo lɛ susumɔ he okwɛ! Yehowa mumɔ lɛ fã koni atuu nitsumɔ krɛdɛɛ ko awo gbɔmɛi enyɔ lɛ adɛŋ. “Agbɛnɛ mɛnɛɛmɛi lɛ, nɔ ni Mumɔ krɔŋkrɔŋ lɛ etsu amɛ akɛ amɛya lɛ, amɛyiŋ amɛtee Seleukia, ni amɛbote lɛlɛ mli yɛ jɛi ni amɛfã kɛtee Kipro.” Abaanyɛ atsɛ Barnaba hu yɛ gbɛ ni ja nɔ akɛ bɔfo, aloo mɔ ni atsu.—Bɔfoi lɛ Asaji 13:2, 4; 14:14.

Beni amɛfã gbɛ kɛtsɔ Kipro ni amɛtsake Sergio Paulo, ni ji ŋshɔkpɔ maji ni yɔɔ Roma maŋtiase lɛ nɔyelɔ lɛ sɛɛ lɛ, amɛtsa nɔ kɛtee Perge ni yɔɔ Asia Bibioo lɛ wuoyigbɛ lɛ, he ni Yohane Marko kpale kɛjɛ amɛsɛɛ ni eku esɛɛ etee Yerusalem lɛ. (Bɔfoi lɛ Asaji 13:13) Etamɔ nɔ ni kɛbashi no beaŋ lɛ Barnaba miitsu nii akɛ hiɛnyiɛlɔ, ekolɛ akɛ hefatalɔ ni yɔɔ niiashikpamɔ babaoo. Kɛjɛ biɛ kɛyaa lɛ, Saulo (ni amrɔ nɛɛ atsɛɔ lɛ Paulo) lɛ ji mɔ ni nyiɛɔ hiɛ. (Okɛto Bɔfoi lɛ Asaji 13:7, 13, 16; 15:2 he.) Ani nifeemɔ nɛɛ gba Barnaba naa? Dabi, eji Kristofonyo ni eda yɛ mumɔŋ ni baa ehe shi ni kpɛlɛ nɔ akɛ Yehowa kɛ ehefatalɔ lɛ hu miitsu nii waa diɛŋtsɛ. Yehowa miisumɔ ni etsɔ amɛnɔ koni shikpɔji krokomɛi anu sanekpakpa lɛ he lolo.

Yɛ anɔkwale mli lɛ, dani aaashwie amɛ kɛaajɛ Antiokia yɛ Pisidia lɛ, no mli lɛ jɛi bii fɛɛ enu Nyɔŋmɔ wiemɔ ni jɛ Paulo kɛ Barnaba naa lɛ, ni gbɔmɛi babaoo kpɛlɛ shɛɛ sane lɛ nɔ. (Bɔfoi lɛ Asaji 13:43, 48-52) Yɛ Ikoniom lɛ, “Yudafoi lɛ kɛ Helabii lɛ ateŋ mɛi babaoo he ye.” Enɛ tsirɛ Paulo kɛ Barnaba koni amɛtsɛ yɛ jɛi, ni “amɛkɛ ekãa wie Nuntsɔ lɛ he, ni lɛ hu eye eduromɔ wiemɔ lɛ he odase ni eha atsɔ amɛnine nɔ afee okadii kɛ naakpɛɛ nii pii.” Beni amɛná amɛle akɛ atee amɛyinɔ apã koni atswia amɛ tɛi lɛ, gbɔmɛi nɛɛ kɛ nilee jo foi, ni amɛtsa amɛ nitsumɔ lɛ nɔ yɛ Likaonia, Listra kɛ Derbe. Yɛ wala he gbeyeiwoo mli niiashikpamɔi ni amɛná yɛ Listra lɛ fɛɛ sɛɛ lɛ, Barnaba kɛ Paulo fɛɛ tee nɔ “amɛwo kaselɔi lɛ amumɔŋ wala lɛ hewalɛ, ni amɛwie amɛtsɔɔ amɛ, akɛ amɛhiɛ hemɔkɛyeli lɛ mli, ni asaŋ esa akɛ wɔtsɔɔ amanehului pii amli kɛboteɔ Nyɔŋmɔ Maŋtsɛyeli lɛ mli.”—Bɔfoi lɛ Asaji 14:1-7, 19-22.

Nɛkɛ shiɛlɔi enyɔ ni yɔɔ ekãa babaoo nɛɛ eŋmɛɛɛ gbɛ ni awoɔ amɛhe gbeyei. Nɔ ni tamɔɔɔ nakai lɛ, amɛku amɛsɛɛ amɛyatswa Kristofoi heei ni yɔɔ hei ni amɛkɛ shitee-kɛ-woo ni yɔɔ gbeyei ekpe yɛ momo lɛ amɛma shi, ni eka shi faŋŋ akɛ amɛye amɛbua hii ni he esa lɛ koni amɛnyiɛ hiɛ yɛ asafoi heei lɛ amli.

Ketiafoo He Sane Lɛ

Aaafee afii 16 yɛ Pentekoste afi 33 Ŋ.B. sɛɛ lɛ, Barnaba fata sane ni he gbɛi ni kɔɔ ketiafoo he sane lɛ he. “Mɛi komɛi jɛ Yudea ba [Antiokia, yɛ Ashur] ni amɛbatsɔɔ nyɛmimɛi lɛ akɛ: Kɛji afolɔɔɔ nyɛ ketia yɛ Mose gbɛnaa lɛ naa lɛ, anyɛŋ nyɛyiwala ahere.” Barnaba kɛ Paulo le kɛjɛ niiashikpamɔ mli akɛ jeee nakai enɛ ji, ni amɛtaa sane lɛ naa. Yɛ nɔ najiaŋ ni amɛkɛ amɛ hewalɛ aaajaje sane lɛ, amɛyɔse akɛ enɛ ji sane ko ni esa akɛ atsuɔ he nii kɛha nyɛmimɛi lɛ fɛɛ asɛɛnamɔ. No hewɔ lɛ amɛkɛ sane lɛ yafɔ nɔyeli kuu ni yɔɔ Yerusalem lɛ hiɛ, he ni amɛ amaniɛbɔɔ lɛ ye ebua ni atsu sane lɛ he nii yɛ lɛ. Yɛ no sɛɛ lɛ, Paulo kɛ Barnaba ni atsɛ amɛ akɛ ‘mɛi ni asumɔɔ ni amɛ shɛ amɛhe amɛfɔ yɛ wɔ-Nuntsɔ Yesu Kristo gbɛi ahewɔ’ lɛ fata mɛi ni atsu koni amɛkɛ nyɛmimɛi ni yɔɔ Antiokia lɛ agba yiŋkpɛɛ ni afee lɛ he sane lɛ ahe. Beni ákane wolo ni jɛ nɔyeli kuu lɛ dɛŋ, ni aha wiemɔi sɛɛ lɛ, asafo lɛ ‘miishɛ amɛhe yɛ miishɛjemɔ lɛ hewɔ,’ ni ‘ewo amɛ hewalɛ.’—Bɔfoi lɛ Asaji 15:1, 2, 4, 25-32.

“Efee Bei”

Yɛ saji kpakpai pii ni awie yɛ Barnaba he lɛ sɛɛ lɛ, ekolɛ wɔbaasusu akɛ wɔnyɛŋ wɔhi shi tamɔ lɛ yɛ enɔkwɛmɔnɔ lɛ mli kɔkɔɔkɔ. Shi kɛlɛ, “Miishɛjemɔ Bi” lɛ yeee emuu taakɛ wɔ hu wɔyeee emuu lɛ nɔŋŋ. Yɛ be mli ni ekɛ Paulo toɔ maŋsɛɛ sanekpakpa gbɛfaa ni ji enyɔ he gbɛjianɔ koni amɛyasara asafoi lɛ, naataamɔ ko te shi. Barnaba etswa efai shi akɛ ekɛ enyɛmi bi Yohane Marko baaya, shi akɛni Yohane Marko kpale kɛjɛ amɛsɛɛ yɛ klɛŋklɛŋ gbɛfaa lɛ mli hewɔ lɛ, Paulo susu akɛ ejaaa. “Efee bei aahu po ni eha amɛgbala amɛmli, ni Barnaba ŋɔ Marko efata ehe ni amɛtsɔ lɛlɛ mli kɛtee Kipro,” ni “Paulo lɛ, efã Sila efata ehe” ni amɛtsɔ he kroko.—Bɔfoi lɛ Asaji 15:36-40.

Mɛɛ dɔlɛ sane po nɛ! No po sɛɛ lɛ, nɔ ni tee nɔ lɛ gbaa wɔ nɔ kroko ni kɔɔ mɔ ni Barnaba ji lɛ he. Nilelɔ ko kɛɛ akɛ: “Etsɔɔ bɔ ni Barnaba esaa ehe akɛ ekɛ ehe baawo oshara mli koni ekɛ ehe afɔ̃ Marko nɔ, nɔ ni ji shii enyɔ nɔ ekwɛ.” Taakɛ nakai niŋmalɔ lɛ susu lɛ, eeenyɛ efee akɛ “hekɛnɔfɔɔ ni Barnaba na yɛ Marko mli lɛ ye ebua lɛ ni lɛ diɛŋtsɛ hu ená hekɛnɔfɔɔ, ni etsu nii akɛ hewalɛwoo nɔ̃ hee.” Beni nibii yaa nɔ lɛ, nakai hekɛnɔfɔɔ lɛ fee faŋŋ diɛŋtsɛ, ejaakɛ be shɛ ni Paulo po kpɛlɛ bɔ ni Marko he hiaa yɛ Kristofoi asɔɔmɔ nitsumɔ lɛ mli lɛ nɔ.—2 Timoteo 4:11; okɛto Kolosebii 4:10 he.

Barnaba nɔkwɛmɔnɔ lɛ baanyɛ atsirɛ wɔ koni wɔŋmɛ wɔtsui shi, wɔbo toi, wɔnu sane shishi, ni wɔwo mɛi ni nijiaŋ eje wui lɛ hewalɛ, ni wɔkɛ yelikɛbuamɔ ni he hiaa lɛ aha be fɛɛ be ni wɔɔna akɛ ehe miihia. Ehe saji ni aŋmala ni tsɔɔ bɔ ni esumɔɔ koni esɔmɔ enyɛmimɛi lɛ yɛ mlijɔlɛ mli, ni ewo amɛ hewalɛ, kɛ agbɛnɛ hu nibii ni nɔ bɛ, ni enɛ kɛba lɛ ji hewalɛwoo diɛŋtsɛ. Kwɛ jɔɔmɔ ni enɛ ji akɛ wɔyɛ gbɔmɛi ni tamɔ Barnaba yɛ wɔ asafoi lɛ amli ŋmɛnɛ!

[Shishigbɛ niŋmai]

[Mfoniri ni yɔɔ baafa 23]

Barnaba ji ‘gbɔmɔ kpakpa ni eyi obɔ kɛ mumɔ krɔŋkrɔŋ kɛ hemɔkɛyeli.’