Nyɔŋmɔ Jeee Mɛi Ahiɛaŋkwɛlɔ

“Nyɔŋmɔ jeee mɛi ahiɛaŋkwɛlɔ; shi moŋ maŋ fɛɛ maŋ mli Iɛ, mɔ ni sheɔ Iɛ gbeyei ni etsuɔ jalɛ ni Iɛ, Iɛ ji mɔ ni saa ehiɛ.”​—BƆFOI LƐ ASAJI 10:​34, 35.

 1. Mɛɛ sane ko ni he hiaa waa Paulo jaje ni kɔɔ wekui ahe yɛ blema Ateene?

“NYƆŊMƆ ni fee je lɛ kɛ emli nibii fɛɛ, ni ji Ŋwɛi kɛ shikpɔŋ Nuŋtsɔ lɛ, ehiii sɔlemɔtsui ni akɛ niji efee mli, . . . ni la kome eŋɔfee gbɔmɛi adesai fɛɛ, ni amɛhi shikpɔŋ lɛ fɛɛ hiɛ.” (Bɔfoi lɛ Asaji 17:​24-26) Namɔ wie wiemɔi nɛɛ? Kristofonyo bɔfo Paul ni, yɛ be mli ni eha wiemɔ ko ni he gbɛi yɛ Mar Gɔŋ lɛ nɔ aloo Areopago, yɛ Ateene, Hela lɛ.

 2. Mɛni yeɔ ebuaa ni ehaa shihilɛ feɔ nɔ ni ŋɔɔ ni yɔɔ fɛo, ni mɛni fee Japannyo ko ni basara South Africa lɛ fɛo?

² Ekolɛ Paulo wiemɔi lɛ baaha wɔsusu naakpɛɛ nibii sɔrɔtoi ni yɔɔ adebɔɔ mli lɛ he. Yehowa Nyɔŋmɔ bɔ adesai, kooloi, loofɔji, filikilɔi, kɛ kwɛɛ nii sɔrɔtoi babaoo. Kwɛ bɔ ni shihilɛ baafee nɔ ni eŋɔɔɔ kwraa kɛ nibii fɛɛ je amɛhe! Amɛsɔrɔtofeemɔ lɛ yeɔ ebuaa ni ehaa shihilɛ feɔ nɔ ni yɔɔ fɛo kɛ nɔ ni ŋɔɔ. Akɛ nɔkwɛmɔ nɔ lɛ, sralɔ ko ni jɛ Japan etee Yehowa Odasefoi akpee ko shishi yɛ South Africa lɛ naa kpɛ ehe yɛ gbɔmɛi sɔrɔtoi kɛ amɛhewolo nɔ sui sɔrɔtoi ni ena yɛ jɛmɛ lɛ hewɔ. Etsɔɔ bɔ ni enɛ yɔɔ sɔrɔto yɛ nɔ ni yaa nɔ yɛ Japan he ni gbɔmɛi lɛ ateŋ mɛi ni fa je amɛhe hewɔ lɛ he.

 3. Te mɛi komɛi susuɔ hewolo nɔ su ni esoro lɛ lɛ he amɛhaa tɛŋŋ, ni mɛni jɛɔ mli baa?

³ Shi sɔrɔtofeemɔ ni yɔɔ hewolo nɔ su mli yɛ wekui sɔrɔtoi amli lɛ kɛ naagbai ni hiɛdɔɔ yɔɔ mli baa yɛ be babaoo mli. Mɛi pii susuɔ mɛi ni esoro amɛhewolo nɔ su lɛ ahe akɛ amɛbaa shi. Enɛ kɛ mlifu baa, ni yɛ bei komɛi amli po lɛ, enɛ jɛ hetsɛ kɛ maŋ nɔ ni mɔ ko jɛ he jwɛŋmɔ fɔŋ ni anaa lɛ. Ani wɔ Bɔlɔ lɛ to eyiŋ akɛ ebalɛ nɛkɛ? Ani wekui komɛi anɔ kwɔlɔ yɛ ehiŋmɛiaŋ? Ani Yehowa kwɛɔ hiɛaŋ?

Wɔ Bɔlɔ Lɛ​—Ani Ekwɛɔ Hiɛaŋ?

4-6. (a) Mɛni ji nɔ ni Maŋtsɛ Yehoshafat wie yɛ hiɛaŋkwɛmɔ he? (b) Mose kɛ Paulo fɛɛ ma Yehoshafat wiemɔ lɛ nɔ mi yɛ mɛɛ gbɛ nɔ? (d) Mɛɛ saji mɛi komɛi baanyɛ abi?

⁴ Wɔbaanyɛ wɔna bɔ ni wɔ Bɔlɔ lɛ susuɔ adesai fɛɛ he lɛ he jwɛŋmɔ ko kɛtsɔ wɔsɛɛ ni wɔɔku kɛya yinɔsane mli lɛ nɔ. Maŋtsɛ Yehoshafat, ni ye Yuda nɔ kɛjɛ afi 936 kɛbashi 911 D.Ŋ.B. lɛ saa nibii babaoo ni eto gbɛjianɔ koni saneyeli he gbɛjianɔtoo ni damɔ ŋwɛi mla nɔ atsu nii jogbaŋŋ. Ekɛ ŋaawoo kpakpa nɛɛ ha kojolɔi lɛ akɛ: “Nyɛkwɛa jogbaŋŋ yɛ nɔ ni nyɛaafee lɛ hewɔ! Ejaakɛ jeee gbɔmɛi nyɛkojoɔ nyɛhaa, shi moŋ, Yehowa ni . . . Nyɛkwɛa jogbaŋŋ ni nyɛfea; ejaakɛ Yehowa, wɔ-Nyɔŋmɔ lɛ, kutumpɔo kɛ hiɛaŋkwɛmɔ kɛ nyɔɔŋnihemɔ bɛ ehe!”​—2 Kronika 19:​6, 7.

⁵ No mli lɛ gbalɔ Mose etsɔ hiɛ ekɛɛ Israel akutsei lɛ afii ohai abɔ momo akɛ: “Yehowa, o-Nyɔŋmɔ lɛ, lɛ ji . . . mɔ ni kwɛɛɛ mɛi ahiɛaŋ.” (5 Mose 10:17) Ni Paulo wo ŋaa yɛ wolo ni eŋma eyaha Romabii lɛ mli akɛ: “Amanehulu kɛ hejaramɔ aaaba gbɔmɔ fɛɛ gbɔmɔ ni tsuɔ nifɔjianii lɛ susuma nɔ, Yudanyo nɔ lɛ nɔ tsutsu kɛ Helanyo nɔ hu . . . Ejaakɛ Nyɔŋmɔ kpaaa gbɔmɛi amli.”​—Romabii 2:​9-11.

⁶ Shi mɛi komɛi baabi akɛ: ‘Ni Israelbii lɛ hu? Ani amɛjeee gbɔmɛi ni Nyɔŋmɔ ehala amɛ? Ani jeee hiɛaŋ ekwɛɔ yɛ nakai feemɔ mli? Ani Mose ekɛɛɛ Israel fɛɛ akɛ: “Bo lɛ Yehowa, o-Nyɔŋmɔ lɛ ehalao, koni otsɔ lɛ diɛŋtsɛ emaŋ yɛ maji fɛɛ ni yɔɔ shikpɔŋ lɛ nɔ lɛ ateŋ”?​—5 Mose 7:⁠6.

 7. (a) Mɛni ba beni Yudafoi lɛ kpoo Mesia lɛ? (b) Namɛi baanyɛ ana naakpɛɛ jɔɔmɔi ni jɛ Nyɔŋmɔ ŋɔɔ lɛ mli ŋɔɔmɔ ŋmɛnɛ, ni yɛ mɛɛ gbɛ nɔ?

⁷ Dabi, Nyɔŋmɔ kwɛɛɛ hiɛaŋ yɛ Israelbii lɛ ni ekɛ amɛ tsu nii kɛha yiŋtoo krɛdɛɛ ko lɛ hewɔ. Yɛ be mli ni ehalaa gbɔmɛi ni ebaatsɔ amɛnɔ ni eha Mesia lɛ aba lɛ, Yehowa hala Hebri blematsɛmɛi anɔkwafoi lɛ aseshibii lɛ. Shi beni Yudafoi lɛ kpoo Mesia, Yesu Kristo, ni amɛgbe lɛ lɛ, amɛlaaje Nyɔŋmɔ hiɛ duromɔ lɛ. Shi, ŋmɛnɛ, mɛi ni jɛ weku fɛɛ weku loo maŋ fɛɛ maŋ mli ni baana Yesu mli hemɔkɛyeli lɛ baanyɛ ana naakpɛɛ jɔɔmɔi amli ŋɔɔmɔ kɛ gbɛkpamɔ akɛ ebaahi shi kɛya naanɔ. (Yohane 3:​16; 17:⁠3) Yɛ anɔkwale mli lɛ, enɛ tsɔɔ akɛ hiɛaŋkwɛmɔ ko bɛ Nyɔŋmɔ gbɛfaŋ. Agbɛnɛ, Yehowa fa Israelbii lɛ akɛ “Nyɛdɔa gbɔ he” ni “nyɛkawaa lɛ yi,” yɛ eweku loo maŋ nɔ ni ejɛ hewɔ. (5 Mose 10:​19; 3 Mose 19:​33, 34) No hewɔ lɛ, wɔ-Tsɛ ni yɔɔ suɔmɔ ni yɔɔ ŋwɛi lɛ kwɛɛɛ mɛi ahiɛaŋ.

 8. (a) Mɛni yeɔ odase akɛ Yehowa hu kwɛɛɛ Israel hiɛaŋ? (b) Yehowa kɛ Israel tsu nii yɛ mɛɛ gbɛ nɔ?

⁸ Eji anɔkwale akɛ Israelbii lɛ na hegbɛi krɛdɛɛi amli ŋɔɔmɔ. Shi gbɛnaa nii ni tsii hu jwere amɛnɔ. Gbɛnaa nii ka amɛnɔ akɛ amɛye Yehowa mlai anɔ, ni mɛi ni booo toi lɛ baa loomɔ shishi. (5 Mose 27:26) Yɛ anɔkwale mli lɛ, ehe bahia ni agbala Israelbii lɛ atoi shiiabɔ yɛ Nyɔŋmɔ Mlai lɛ toi ni amɛbooo hewɔ. No hewɔ lɛ, Yehowa kɛ suɔmɔ sɔrɔto ko haaa amɛ. Shi moŋ, ekɛ amɛ tsu nii ni amɛfee gbalɛ mfonirii ni amɛtsɔmɔ kɔkɔbɔɔ he nɔkwɛmɔ nii. Yɛ miishɛɛ mli lɛ, Israel nɔ Nyɔŋmɔ tsɔ ni ekɛ Kpɔlɔ, Yesu Kristo ba kɛha adesai fɛɛ ajɔɔmɔ.​—Galatabii 3:​14; okɛto 1 Mose 22:​15-18 he.

Ani Yesu Kwɛɔ Hiɛaŋ?

 9. (a) Yehowa tamɔ Yesu nɔŋŋ yɛ mɛɛ gbɛ nɔ? (b) Mɛɛ sanebimɔi teɔ shi yɛ Yesu he?

⁹ Akɛni Yehowa jeee hiɛaŋkwɛlɔ hewɔ lɛ, ani Yesu baanyɛ afee mɔ ni kwɛɔ hiɛaŋ? Ojogbaŋŋ, susumɔ enɛ he: Yesu kɛɛ be ko akɛ: “Mitaooo nɔ ni mi diɛŋtsɛ misumɔɔ, shi moŋ, nɔ ni tsɛ lɛ ni tsu mi lɛ sumɔɔ.” (Yohane 5:30) Ekomefeemɔ ni yeɔ emuu ka Yehowa kɛ esuɔmɔ Bi lɛ teŋ, ni Yesu feɔ e-Tsɛ lɛ osuɔmɔnaa nii yɛ nɔ fɛɛ nɔ mli. Yɛ anɔkwale mli lɛ, amɛyeɔ egbɔ yɛ jwɛŋmɔ kɛ yiŋtoo mli aahu akɛ Yesu baanyɛ akɛɛ akɛ: “Mɔ ni ena mi lɛ, ena Tsɛ lɛ.” (Yohane 14:⁠9) Yesu na hegbɛ ehi shi yɛ shikpɔŋ nɔ akɛ gbɔmɔ fe afii 33, ni Biblia lɛ jieɔ bɔ ni efee enanemɛi adesai lɛ kpo. Mɛni ji esu yɛ wekui krokomɛi ahe? Ani eyɛ amɛhe jwɛŋmɔ fɔŋ aloo ekwɛɔ hiɛaŋ? Ani Yesu buɔ ehe akɛ maŋ nɔ ni ejɛ lɛ nɔ kwɔ fe maji krokomɛi?

10. (a) Te Yesu ha Foenikia yoo ko nibimɔ akɛ eye ebua lɛ lɛ hetoo eha tɛŋŋ? (b) Akɛni ewie Jeŋmajiaŋbii lɛ ahe akɛ “shifɔji abii hewɔ lɛ, ani Yesu miijie mɛi ahe jwɛŋmɔ fɔŋ ni eyɔɔ lɛ kpo? (d) Yoo lɛ ye shitee-kɛ-woo nɛɛ nɔ kunim yɛ mɛɛ gbɛ nɔ, ni mɛni jɛ mli ba?

¹⁰ Yesu kɛ Yudafoi hi shi titri yɛ eshikpɔŋ nɔ shihilɛ be lɛ mli. Shi gbi ko lɛ, Foenikia yoo ko, Jeŋmaŋnyo, tee Yesu ŋɔɔ ni ekpa lɛ fai koni etsa ebiyoo hela eha lɛ. Yesu ha lɛ hetoo akɛ: “Israel we toi ni elaaje lɛ aŋɔɔ kɛkɛ atsu mi.” Shi yoo lɛ tee nɔ ekpa fai akɛ: “Nuŋtsɔ, feemɔ he eko oha mi!” Kɛkɛ ni Yesu kɛfata he akɛ: “Ejaaa akɛ aŋɔɔ bii abooloi lɛ asherɛɔ ashwieɔ shifɔji abii.” Shifɔji loo gbeei ji kooloi komɛi ni amɛhe tseee kɛha Yudafoi lɛ. No hewɔ lɛ, ani Jeŋmajiaŋbii lɛ ni Yesu kɛ amɛ to “shifɔji abii” lɛ ahe lɛ tsɔɔ akɛ ehiɛ jwɛŋmɔ fɔŋ yɛ mɛi ahe? Dabi, ejaakɛ etsɔ hiɛ etsi nitsumɔ krɛdɛɛ ni akɛwo edɛŋ kɛjɛ Nyɔŋmɔ ŋɔɔ akɛ ‘ebatao Israel we toi ni elaaje’ lɛ ta. Agbɛnɛ, mɛi ni jeee Yudafoi lɛ ni Yesu kɛ amɛ to “shifɔji abii” lɛ ahe shi jeee gbeei ni hiɛ wa ahe lɛ jɔɔ sane ni Yesu kɛto he lɛ he. Shi, nɔ ni ewie yɛ jɛmɛ lɛ ka yoo lɛ ekwɛ. Eba ehe shi, ni etswa efai shi akɛ ebaaye nɛkɛ shitee-kɛ-woo nɛɛ nɔ kunim, no hewɔ lɛ, ekɛ ŋaa ha hetoo akɛ: “Nuŋtsɔ, eyɛ mli moŋ; shi bɛ shifɔji abii lɛ hu yeɔ fufuji ni shwieɔ amɛnuŋtsɔmɛi akpɔlɔi lɛ ashishi lɛ eko!” Yoo nɛɛ hemɔkɛyeli lɛ ha Yesu naa kpɛ ehe, ni etsa ebiyoo lɛ amrɔ nɔŋŋ.​—Mateo 15:​22-28.

11. Taakɛ sane ko ni kɔɔ Yesu he lɛ tsɔɔ lɛ, mɛɛ su Yudafoi kɛ Samariabii hiɛ yɛ amɛhe?

¹¹ Agbɛnɛ susumɔ bɔ ni Yesu kɛ Samariabii komɛi kpe lɛ he. Nyɛɛ loo hetsɛ ni mli wa ka Yudafoi kɛ Samariabii ateŋ. Gbi ko lɛ, Yesu tsu kɛtee Samariabii akrowa ko koni amɛyasaa he ko amɛha lɛ. “Shi amɛhereee lɛ, ejaakɛ amɛna yɛ ehiɛ akɛ Yerusalem eyaa.” Enɛ wo Yakobo kɛ Yohane mli la aahu akɛ amɛmiisumɔ ni amɛtsɛ la kɛjɛ ŋwɛi ni ebakpata amɛhiɛ. Shi Yesu ka ekaselɔi enyɔ lɛ ahiɛ, ni amɛ fɛɛ amɛtee akrowa kroko.​—Luka 9:​51-56.

12. Mɛni hewɔ Samaria yoo ko naa kpɛ ehe yɛ Yesu nibimɔ lɛ hewɔ lɛ?

¹² Ani Yesu kɛ ehe wo nyɛɛ loo hetsɛ ni ka Yudafoi kɛ Samariabii lɛ ateŋ lɛ mli? Ojogbaŋŋ, kadimɔ nɔ kroko ni ba yɛ be kroko mli lɛ. Yesu kɛ ekaselɔi lɛ jɛ Yudea amɛmiiya Galilea ni esa akɛ amɛtsɔ Samariabii akrowa ko mli. Akɛni gbɛfaa lɛ etɔ lɛ hewɔ lɛ, Yesu ta Yakob nu bu lɛ he koni ejɔɔ ehe beni ekaselɔi lɛ yaa Sikar maŋ lɛ mli koni amɛyahe niyenii lɛ. Beni be shwieɔ mli lɛ, Samariayoo ko ba ni ebasha nu. Shi Yesu diɛŋtsɛ ewie Samariabii lɛ ahe yɛ be ko mli akɛ ‘maŋsɛɛ bii.’ (Luka 17:​16-18) Shi ekɛɛ yoo lɛ akɛ: “Ha mi nu lɛ eko manu.” Akɛni Yudafoi kɛ Samariabii bɛ nɔ ko feemɔ hewɔ lɛ, yoo ni naa ekpɛ ehe lɛ ha hetoo akɛ: “Te tɛŋŋ ni bo Yudanyo lɛ obaa mi Samariayoo lɛ nu ni onuŋ?”​—Yohane 4:​1-9.

13. (a) Te Yesu ha Samaria yoo lɛ wiemɔi ni ekɛteɔ shi ewoɔ lɛ lɛ hetoo eha tɛŋŋ, ni mɛni ji nɔ ni yoo nɛɛ fee? (b) Mɛni jɛ mli ba yɛ naagbee?

¹³ Shi Yesu ku ehiɛ eshwie yoo lɛ shitee-kɛ-woo wiemɔi lɛ anɔ. Kɛkɛ ni eŋɔ hegbɛ lɛ koni eye lɛ odase, ni ekpɛlɛ nɔ po akɛ lɛ ji Mesia lɛ! (Yohane 4:​10-26) Yoo ni naa ekpɛ ehe nɛɛ shi enu gbɛ lɛ, ni ejo foi kɛtee maŋ lɛ mli ni ebɔi mɛi krokomɛi nɔ ni eba enɔ lɛ kɛɛmɔ. Eyɛ mli akɛ ehi shi akɛ mɔ ni bɛ jeŋba moŋ, shi ejie ehe kpo akɛ mɔ ni sumɔɔ mumɔŋ saji, ejaakɛ ekɛɛ: “[Ani] jeee Kristo lɛ nɛ lo?” Mɛni jɛ mli ba yɛ naagbee? Maŋbii lɛ ateŋ mɛi pii he Yesu nɔ amɛye yɛ odase fɛfɛo ni yoo lɛ ye lɛ hewɔ. (Yohane 4:27-42) Nɔ ni yɔɔ miishɛɛ lɛ, Asafoŋ nyɔŋmɔjamɔ he nilelɔ Thomas O. Figart ŋma yɛ ewolo ni ji A Biblical Perspective on the Race Problem lɛ mli akɛ: “Kɛji akɛ wɔ-Nuŋtsɔ lɛ susu he akɛ ehe miihia bɔ ni ekɛ duromɔ loo mɔbɔnalɛ nifeemɔ ko aaaye blemasane weku mligbalamɔ ni ejaaa lɛ hiɛ lɛ, belɛ esa akɛ wɔkwɛ jogbaŋŋ koni weku mligbalamɔ faa ni yɔɔ ŋmɛnɛ lɛ akami wɔ.”

14. Mɛɛ hiɛaŋkwɛmɔ ni bɛ Yehowa gbɛfaŋ lɛ he odaseyeli je kpo yɛ Filipo sanekpakpashiɛlɔ lɛ sɔɔmɔ nitsumɔ be lɛ mli?

¹⁴ Bɔ ni Yehowa Nyɔŋmɔ jeee hiɛaŋkwɛlɔ ha lɛ ŋmɛ gbɛ ni gbɔmɛi ni jɛ wekui sɔrɔtoi amli batsɔmɔ Yudafoi ni atsake amɛ. Agbɛnɛ hu susumɔ nɔ ni ba afii ohai 19 ni eho nɛ yɛ Yerusalem kɛ Gaza shiaŋa lɛ nɔ lɛ he. Mɔdiŋ ko ni miisɔmɔ Etiopia maŋnyɛ lɛ ta eshwiili mli beni ekaneɔ gbalɔ Yesaia wolo lɛ. Nɛkɛ sɔɔlɔ nukpa nɛɛ ji mɔ ni atsake lɛ ni afo lɛ ketia ejaakɛ “ebaho Yerusalem eyaja Nyɔŋmɔ.” Yehowa bɔfo jie ehe kpo etsɔɔ Yudanyo sanekpakpa shiɛlɔ Filipo ni ekɛɛ lɛ akɛ: “Yaa ni oyakpetɛ shwiili nɛɛ sɛɛ.” Ani Filipo kɛɛ: “Oh, dabi! Ejɛ maŋ kroko nɔ”? Dabida! Shi moŋ eŋɔɔ Filipo naa akɛ eeehere Etiopianyo lɛ tsɛmɔ akɛ ebafata ehe yɛ shwiili lɛ mli lɛ nɔ, koni ekɛ lɛ ata shi, ni etsɔɔ lɛ Yesaia gbalɛ ni kɔɔ Yesu Kristo he lɛ! Beni amɛbɛŋkɛ nu kpaakpo ko lɛ, Etiopianyo lɛ bi akɛ: “Mɛni tsiɔ mibaptisimɔ gbɛ?” Akɛni nɔ ko nɔ ko etsiii enɛ feemɔ gbɛ hewɔ lɛ, Filipo kɛ miishɛɛ baptisi Etiopianyo lɛ ni Yehowa kpɛlɛ nakai nuu lɛ nɔ akɛ E-Bi Yesu Kristo ni kwɛɛɛ hiɛaŋ lɛ sɛɛnyiɛlɔ ni afɔ lɛ mu. (Bɔfoi lɛ Asaji 8:26-39) Shi ŋwɛi hiɛaŋkwɛmɔ ni bɛ he odaseyeli kroko hu jie ehe kpo.

Tsakemɔ Kpele Ko

15. Mɛɛ tsakemɔ ba yɛ Yesu gbele sɛɛ, ni Paulo tsɔɔ enɛ mli yɛ mɛɛ gbɛ nɔ?

¹⁵ Yesu Kristo gbele lɛ ejieee gbɔmɛi ni jɛ maji krokomɛi anɔ lɛ he jwɛŋmɔ fɔŋ ni ahiɛ lɛ kɛyaaa. Shi Nyɔŋmɔ tsɔ nakai afɔleshaa gbele lɛ nɔ etsake wekukpaa ni ka Yesu kaselɔi ni ji Yudafoi lɛ kɛ esɛɛnyiɛlɔi Jeŋmajiaŋbii lɛ teŋ lɛ. Bɔfo Paulo tsɔɔ enɛ yɛ be mli ni eŋma wolo eyaha Jeŋmajiaŋbii Kristofoi ni yɔɔ Efeso lɛ ni ekɛɛ: “Nyɛkaia akɛ nyɛ ni sa nyɛji wɔŋjalɔi yɛ heloo gbɛfaŋ . . . nakai be lɛ mli lɛ, nyɛbɛ Kristo, ni nyɛji mɛi kpɔji yɛ Israel maŋ gbɛnaa nii agbɛfaŋ kɛ gbɔi yɛ shiwoo kpaŋmɔi lɛ agbɛfaŋ hu, nyɛbɛ hiɛnɔkamɔ ko, ni nyɛbɛ nyɔŋmɔ tete yɛ je nɛŋ. Shi agbɛnɛ, Kristo Yesu mli lɛ, nyɛ ni sa ni nyɛyɔɔ shɔŋŋ lɛ, nyɛtsɔ Kristo la lɛ nɔ nyɛbɛŋkɛ. Ejaakɛ lɛ ji wɔhejɔlɛ lɛ, mɔ ni ŋɔ wɔ yi enyɔ lɛ fɛɛ efee ekome, ni ekumɔ gbogbo afabaŋ ni yɔɔ teŋ ni ji nyɛɛ lɛ.” Nakai “gbogbo” loo mligbalamɔ he okadi lɛ ji Mla kpaŋmɔ lɛ he gbɛjianɔtoo ni tsu nii akɛ afabaŋ yɛ Yudafoi kɛ Jeŋmajiaŋbii lɛ ateŋ lɛ. Atsɔ Kristo gbele lɛ nɔ ajie enɛ kɛtee koni kɛtsɔ Kristo nɔ lɛ, Yudafoi kɛ Jeŋmajiaŋbii fɛɛ “naa gbɛ, yɛ mumɔ kome mli, kɛyaa Tsɛ lɛ ŋɔɔ.”—Efesobii 2:11-18.

16. (a) Mɛni hewɔ akɛ Maŋtsɛyeli lɛ naa samfei lɛ ha Petro lɛ? (b) Samfei enyiɛ yɔɔ, ni mɛni jɛ amɛkɛ nitsumɔ mli ba?

¹⁶ Agbɛnɛ hu, akɛ “ŋwɛi maŋtsɛyeli lɛ naa samfei” lɛ ha bɔfo Petro koni gbɔmɛi ni jɛ maji sɔrɔtoi fɛɛ mli akase Nyɔŋmɔ yiŋtoo he nii, koni ‘afɔ amɛ ehee’ kɛjɛ mumɔ krɔŋkrɔŋ lɛ mli, ni amɛbatsɔmɔ niyelɔi kɛ Kristo. (Mateo 16:19; Yohane 3:1-3) Petro kɛ okadi samfei etɛ tsu nii. Klɛŋklɛŋ nɔ lɛ yɛ kɛha Yudafoi lɛ, nɔ ni ji enyɔ lɛ yɛ kɛha Samariabii lɛ, ni nɔ ni ji etɛ lɛ yɛ kɛha Jeŋmajiaŋbii lɛ. (Bɔfoi lɛ Asaji 2:14-42; 8:14-17; 10:24-28, 42-48) Yɛ nɛkɛ gbɛ nɔ lɛ, Nyɔŋmɔ ni jeee hiɛaŋkwɛlɔ, Yehowa, gbele gbɛ kɛha mɛi fɛɛ ni ahala lɛ koni amɛna hegbɛ amɛbatsɔmɔ

Yesu mumɔŋ nyɛmimɛi kɛ hefatalɔi niyelɔi yɛ Maŋtsɛyeli lɛ mli.​—Romabii 8:​16, 17; 1 Petro 2:​9, 10.

17. (a) Mɛɛ ninaa ko ni ekaaa akɛha Petro, ni mɛni hewɔ? (b) Hii komɛi nyiɛ Petro hiɛ kɛtee namɔ shia, ni namɔ mɛɔ lɛ yɛ jɛmɛ lɛ? (d) Mɛni Petro kai nakai Jeŋmajiaŋbii lɛ, ni kɛlɛ mɛni ji nɔ ni Nyɔŋmɔ etsɔɔ lɛ yɛ faŋŋ mli momo?

¹⁷ Bɔni afee ni asaa Petro kɛha samfei ni ji etɛ lɛ kɛ nitsumɔ​—kɛha Jeŋmajiaŋbii lɛ​—akɛ ninaa ko ni yɔɔ naakpɛɛ ni kɔɔ kooloi ni he tseee ahe tsɔɔ lɛ ni akɛɛ lɛ akɛ: “Petro, tee shi, gbee ni oye!” Nikasemɔ lɛ ji akɛ: “Nɔ ni Nyɔŋmɔ etsuu he lɛ, kaabu lɛ akɛ yakayaka nɔ ko.” (Bɔfoi lɛ Asaji 10:​9-16) Petro ehao waa ni enuuu nɛkɛ ninaa nɛɛ shishi. Shi etsɛɛɛ ni hii-etɛ ba koni amɛbaŋɔ lɛ kɛya Kornelio, Roma asraafoi-oha-atsɛ lɛ shia yɛ Kaisarea. Akɛni nakai maŋ lɛ ji Roma asraafoi ni yɔɔ Yudea lɛ maŋtiase hewɔ lɛ, jɛmɛ ji he ni esa akɛ efee Kornelio shia. Mɛi ni mɛɔ Petro yɛ nakai Jeŋmajiaŋbii lɛ ateŋ ji Kornelio, kɛ ewekumɛi kɛ enanemɛi ni bɛŋkɛ lɛ kpaakpa. Bɔfoi lɛ kai amɛ akɛ: “Nyɛ diɛŋtsɛ nyɛle bɔ ni Yudanyo bɛ hegbɛ akɛ ekɛ mɔ ko ni ji maŋ kroko nɔ nyo bɔɔ aloo ehaa eŋɔɔ; shi mi lɛ, Nyɔŋmɔ etsɔɔ mi akɛ mikatsɛ mɔ ko mɔ ko yaka gbɔmɔ loo mɔ ni he tseee. No hewɔ hu ni beni atsu abakpee mi lɛ, mitseee naa ni miba nɛɛ.”​—Bɔfoi lɛ Asaji 10:​17-29.

18. (a) Mɛɛ adafitswaa ko ni yɔɔ naakpɛɛ Petro jaje etsɔɔ Kornelio kɛ eshiabii lɛ? (b) Beni Petro ye Yesu he odase lɛ sɛɛ lɛ, mɛɛ naakpɛɛ nɔ ko ba? (d) Mɛni afee yɛ Jeŋmajiaŋbii ni heɔ yeɔ lɛ ahe?

¹⁸ Beni Kornelio etsɔɔ Nyɔŋmɔ gbɛtsɔɔmɔ yɛ nɛkɛ saji nɛɛ amli lɛ mli lɛ, Petro kɛɛ: “Lɛlɛŋ, miyoo akɛ, Nyɔŋmɔ jeee mɛi ahiɛaŋkwɛlɔ, shi moŋ maŋ fɛɛ maŋ mli lɛ, mɔ ni sheɔ lɛ gbeyei ni etsuɔ jalɛ nii lɛ, lɛ ji mɔ ni saa ehiɛ.” (Bɔfoi lɛ Asaji 10:​30-35) Kɛkɛ ni be mli ni bɔfo lɛ tee nɔ eye Yesu Kristo he odase lɛ, nɔ ko ni yɔɔ naakpɛɛ ba! “Beni Petro wieɔ nɛkɛ wiemɔi nɛɛ lolo lɛ, mumɔ krɔŋkrɔŋ lɛ ba mɛi fɛɛ ni nu wiemɔ lɛ nɔ.” Kɛkɛ ni Petro nanemɛi Yudafoi lɛ “anaa kpɛ amɛhe akɛ afɔse mumɔ krɔŋkrɔŋ nɔkee nɔ lɛ ashwie jeŋmajiaŋbii hu nɔ; ejaakɛ amɛnu akɛ amɛmiiwie maŋsɛɛ wiemɔi sɔrɔtoi ni amɛmiijie Nyɔŋmɔ yi.” Kɛkɛ ni Petro kɛɛ: “Ani mɔ ko aaanyɛ nu naa atsi, ni akabaptisi mɛnɛɛmɛi ni na mumɔ krɔŋkrɔŋ lɛ tamɔ wɔ nɔŋŋ lɛ?” Namɔ baanyɛ atsi enɛ feemɔ naa, akɛni afɔse Nyɔŋmɔ ni yɔɔ ŋwɛi ni jeee hiɛaŋkwɛlɔ lɛ mumɔ krɔŋkrɔŋ lɛ ashwie Jeŋmajiaŋbii ni heɔ yeɔ lɛ anɔ lɛ? No hewɔ lɛ, Petro fa akɛ “abaptisi amɛ yɛ Nuŋtsɔ lɛ [Yesu Kristo] gbɛi amli.”​—Bɔfoi lɛ Asaji 10:​36-48.

“Jɛ Jeŋmaŋ Fɛɛ Jeŋmaŋ”

19. Mɛni hewɔ maŋ nɔ ni mɔ ko jɛ mli lɛ he hetsɛ yaa hiɛ lɛ, ni etee nɔ kɛyashɛ nɛgbɛ?

¹⁹ Agbɛnɛ wɔmiina wɔhe yɛ “naagbee gbii” lɛ amli ni “jaramɔ bei” lɛ efee anɔkwale yɛ wɔshihilɛ mli. Kɛfata he lɛ, gbɔmɛi sumɔɔ amɛhe, shwalɔi, hewolɔi, mɛi ni edɔɔɔ mɔ he, kpaŋmɔ mlikulɔi, mɛi ni bɛ henɔyeli, mɛi ni hiɛ wa, mɛi ni yitsoŋ wa, henɔwolɔi. (2 Timoteo 3:​1-5) Kɛ nɛkɛ ji bɔ ni shihilɛ lɛ yɔɔ lɛ, belɛ ebɛ naakpɛɛ akɛ maŋ nɔ ni mɔ ko jɛ he hetsɛ loo nyɛɛ kɛ bei miifa yɛ je lɛŋ he fɛɛ he. Maji pii yɛ gbɔmɛi ni jɛ wekui loo hewolo nɔ sui sɔrɔtoi amli ni sumɔɔɔ loo amɛnyɛɔ amɛhe po. Nɔ ni ejɛ enɛ mli eba ji nɔmɔ diɛŋtsɛ kɛ yiwalɛ nibii ni yɔɔ gbeyei yɛ shikpɔji komɛi anɔ. Ewa akɛ gbɔmɛi pii aaaye hewolo nɔ su he jwɛŋmɔ fɔŋ ni ahiɛ lɛ nɔ kunim yɛ maji ni akɛɛ amɛhiŋmɛi egbele lɛ po mli. Ni etamɔ nɔ ni nɛkɛ “hela” nɛɛ miigbɛ kɛmiishwa kɛmiiya he ni akpaaa gbɛ kwraa yɛ jɛmɛ lɛ amli, tamɔ ŋshɔkpɔi ni be ko lɛ ale akɛ toiŋjɔlɛ ji nɔ ni yɔɔ jɛmɛ lɛ anɔ.

Sɔɔmɔ Yehowa Kɛ Gbee Kome

“Maŋɔ naabu krɔŋŋ maha majimaji, koni amɛ fɛɛ kwa amɛtsɛ Yehowa gbɛi lɛ, koni amɛkɛ gbee kome asɔmɔ lɛ.”​—ZEFANIA 3:⁠9.

 1, 2. (a) Mɛɛ gbalɛ Yehowa haa enaa mli agbɛnɛ lɛ? (b) Nɛkɛ gbalɛ nɛɛ teɔ mɛɛ sanebimɔi ashi?

YEHOWA NYƆŊMƆ miifee nɔ ko bianɛ ni adesai nyɛŋ afee gbi ko gbi ko. Awieɔ wiemɔi aaafee 3,000 yɛ jeŋ ni mli egbala nɛɛ mli, shi Nyɔŋmɔ miiha nɛkɛ gbalɛ nɛɛ aba mli: “Ni mikɛ wiemɔ krɔŋŋ baaha gbɔmɛi lɛ, koni amɛ fɛɛ amɛtsɛ Yehowa gbɛi lɛ, bɔni afee ni amɛsɔmɔ lɛ kɔŋ kɛ kɔŋ.”​—Zefania 3:​9, New World Translation.

² Mɛni ji nɛkɛ “wiemɔ krɔŋŋ” nɛɛ? Namɛi wieɔ enɛ? Ni akɛ aaasɔmɔ Yehowa ‘kɔŋ kɛ kɔŋ’ lɛ tsɔɔ mɛni?

Amɛwieɔ “Wiemɔ Krɔŋŋ” Lɛ

 3. Mɛni ji “wiemɔ krɔŋŋ” lɛ, ni mɛni hewɔ mɛi ni wieɔ enɛ lɛ amli gbalako lɛ?

³ Afɔse Nyɔŋmɔ mumɔ krɔŋkrɔŋ lɛ ashwie Yesu Kristo kaselɔi lɛ anɔ yɛ Pentekoste gbi lɛ nɔ yɛ afi 33 ŊB., ni ewo amɛ hewalɛ koni amɛwie yɛ wiemɔi ni amɛkaseko da lɛ amli. Enɛ ha amɛnyɛ amɛgba gbɔmɛi “Nyɔŋmɔ nii wuji” lɛ he saji yɛ wiemɔi pii amli. Kɛkɛ ni Yehowa je shishi akɛ eeebua gbɔmɛi ni jɛ wekui sɔrɔtoi amli lɛ anaa efee amɛ ekome. (Bɔfoi lɛ Asaji 2:​1-21, 37-42) Beni yɛ sɛɛ mli lɛ Jeŋmajiaŋbii ni heɔ yeɔ lɛ batsɔmɔ Yesu sɛɛnyiɛlɔi lɛ, kɛkɛ ni Nyɔŋmɔ tsuji lɛ batsɔmɔ gbɔmɛi ni jɛ majianɔ wiemɔi kɛ wekui sɔrɔtoi amli lɛlɛŋ. Je lɛŋ husui gbalaaa amɛmli, ejaakɛ amɛ fɛɛ amɛwieɔ “wiemɔ krɔŋŋ” lɛ. Enɛ ji Ŋmalɛ mli anɔkwale wiemɔ ni agba afɔ shi yɛ Zefania 3:9 lɛ. (Efesobii 4:25) Agbalako mɛi ni wieɔ “wiemɔ krɔŋŋ” lɛ amli, shi moŋ ‘amɛnaabu efee ekome,’ ni ‘amɛyitsoŋ kɛ amɛjwɛŋmɔ efee ekome.’​—1 Korintobii 1:⁠10.

 4. Zefania 3:9 tsɔɔ majianɔ wiemɔi kɛ majimaji ateŋ ekomefeemɔ lɛ mli yɛ mɛɛ gbɛ nɔ, ni nɛgbɛ anaa enɛ yɛ ŋmɛnɛ?

⁴ “Wiemɔ krɔŋŋ” aloo “naabu krɔŋŋ” lɛ baanyɛ aha gbɔmɛi ni jɛ jeŋmaji kɛ wekui sɔrɔtoi fɛɛ mli lɛ asɔmɔ Yehowa “kɔŋ kɛ kɔŋ” ni eshishi diɛŋtsɛ ji, ‘kɛ kɔŋ kome.’ Amɛbaasɔmɔ Nyɔŋmɔ kɛ “nɔkpɛlɛmɔ kome” (The New English Bible) ; “kɛ gbee kome” (The New American Bible) aloo “kɛ gbeekpamɔ nɔkpɛlɛmɔ kɛ kɔŋ kome.” (The Amplified Bible) Shishitsɔɔmɔ kroko kaneɔ akɛ: “Ni maha jeŋmaji lɛ fɛɛ anaabui ahe atse, koni amɛ fɛɛ amɛtsɛ Yehowa gbɛi lɛ, ni amɛkɛ lɛ akpa gbee yɛ esɔɔmɔ mli.” (Byington) Anaa nɛkɛ majianɔ wiemɔ kɛ wekui sɔrɔtoi babaoo ni efee ekome yɛ Nyɔŋmɔ sɔɔmɔ nɛɛ mli lɛ yɛ Yehowa Odasefoi ateŋ pɛ.

 5. Mɛni Yehowa Odasefoi kɛ adesa wiemɔ fɛɛ wiemɔ tsuɔ.

⁵ Akɛni Yehowa Odasefoi fɛɛ wieɔ “wiemɔ krɔŋŋ” loo naabu krɔŋŋ ni ji Ŋmalɛ mli anɔkwale lɛ hewɔ lɛ, amɛkɛ adesa wiemɔ fɛɛ wiemɔ tsuɔ nii yɛ gbɛ ni kwɔ nɔ​—amɛkɛjieɔ Nyɔŋmɔ yi ni amɛkɛjajeɔ Maŋtsɛyeli lɛ he sanekpakpa lɛ. (Marko 13:​10; Tito 2:​7, 8; Hebribii 13:15) Kwɛ bɔ ni eyɔɔ fɛo akɛ “wiemɔ krɔŋŋ” loo naabu krɔŋŋ lɛ haa gbɔmɛi ni jɛ jeŋmaji fɛɛ mli lɛ sɔmɔɔ Yehowa kɛ gbee kome!

 6. Te Yehowa susuɔ gbɔmɛi ahe ehaa tɛŋŋ, shi mɛni baaye abua kɛji akɛ hiɛaŋkwɛmɔ ko hɔ Kristofonyo ko tsui mli lolo?

⁶ Beni Petro yeɔ Kornelio kɛ Jeŋmajiaŋbii krokomɛi lɛ odase lɛ, ekɛɛ: “Lɛlɛŋ, miyoo akɛ Nyɔŋmɔ jeee mɛi ahiɛaŋkwɛlɔ; shi moŋ maŋ fɛɛ maŋ mli lɛ, mɔ ni sheɔ lɛ gbeyei ni etsuɔ jalɛ nii lɛ, lɛ ji mɔ ni saa ehiɛ.” (Bɔfoi lɛ Asaji 10:​34, 35) Bɔ ni shishitsɔɔmɔi krokomɛi tsɔɔ lɛ, Yehowa “jeee Mɔ ni Buɔ gbɔmɛi komɛi fe mɛi krokomɛi,” “ejieee gbɔmɛi amli,” ni “ekwɛɛɛ gbɔmɛi ahiɛaŋ.” (The Emphatic Diaglott; Phillips; New International Version) Akɛ Yehowa tsuji lɛ, esa akɛ wɔbu gbɔmɛi ni jɛ jeŋmaji fɛɛ mli lɛ tamɔ bɔ ni efeɔ lɛ pɛpɛɛpɛ. Shi kɛji akɛ hiɛaŋkwɛmɔ fioo ko yɛ Kristofonyo ko tsui mli lɛ hu? Belɛ eeeye ebua akɛ oookwɛ bɔ ni wɔ Nyɔŋmɔ ni kwɛɛɛ hiɛaŋ lɛ kɛ etsuji ni jɛ jeŋmaŋ fɛɛ jeŋmaŋ kɛ akutsei kɛ majianɔ wiemɔi sɔrɔtoi amli lɛ yeɔ haa lɛ mli.​—Agbɛnɛ Kwɛmɔ Awake! ni ji November 8, 1984 nɔ lɛ baafai 3-11.

Asumɔɔ Amɛ Ni Amɛjara Wa

 7. Yɛ wekukpaa ni aaaka wɔkɛ Nyɔŋmɔ teŋ lɛ he lɛ, mɛni hewɔ esorooo Kristofonyo ko yɛ mɔ kroko ni jɛ maŋ kroko loo weku kroko mli lɛ he?

⁷ Kɛ oji Yehowa Odasefonyo ni abaptisi lɛ lɛ, eka shi faŋŋ akɛ ‘Oyeɔ ŋkɔmɔ ni odɔmɔɔ ntsɔi yɛ nihii nii’ ni afeɔ yɛ yiwalɛ gbɛjianɔtoo nɛɛ mli lɛ he yɛ be ko mli. (Ezekiel 9:⁠4) No mli lɛ oji ‘gbonyo yɛ ohe eshai amli,’ shi Nyɔŋmɔ jɛ emɔbɔnalɛ mli egbala bo kɛba emasɛi kɛtsɔ Yesu Kristo nɔ. (Efesobii 2:​1-5; Yohane 6:44) Yɛ enɛɛmɛi ahewɔ lɛ, ojeee mɔ ni yɔɔ sɔrɔto yɛ mɛi krokomɛi ni ji onanemɛi heyelilɔi lɛ ahe. Amɛ hu amɛhao yɛ efɔŋfeemɔ hewɔ, no mli lɛ, ‘amɛji gbohii yɛ amɛhe eshai amli,’ ni amɛnine shɛ Nyɔŋmɔ mɔbɔnalɛ nɔ kɛtsɔ Yesu Kristo nɔ. Ni yɛ wɔweku loo maŋ nɔ ni wɔjɛ mli lɛ fɛɛ sɛɛ lɛ, hemɔkɛyeli pɛ nɔ wɔteŋ mɔ ko baatsɔ bianɛ ni ena shidaamɔ kpakpa yɛ Yehowa hiɛ akɛ edasefonyo.​—Romabii 11:⁠20.

 8. Hagai 2:7 miiba mli bianɛ yɛ mɛɛ gbɛ nɔ?

⁸ Gbalɛ wiemɔi ni yɔɔ Hagai 2:7 lɛ yeɔ ebuaa wɔ koni wɔkwɛ bɔ ni wɔɔsusu wɔnanemɛi heyelilɔi ni jɛ jeŋmaji sɔrɔtoi amli lɛ ahe wɔha. Jɛmɛ Yehowa jaje yɛ akɛ: “Ni mahoso jeŋmaji fɛɛ kwa, ni jeŋmaji lɛ fɛɛ anii ni jara wa lɛ aaaba, ni mikɛ anunyam sɔŋŋ aaawo shia nɛɛ obɔ.” Nɛkɛ jamɔ krɔŋŋ ni aaawo nɔ ni agba afɔ shi nɛɛ miiya nɔ yɛ Nyɔŋmɔ anɔkwale sɔlemɔwe lɛ, ejamɔ shihilɛ he lɛ. (Yohane 4:​23-24) Shi mɛni ji “jeŋmaji lɛ fɛɛ anii ni jara wa” aloo nii ni asumɔɔ lɛ? Amɛji gbɔmɛi akpei abɔ ni sumɔɔ jalɛ nifeemɔ ni boɔ Maŋtsɛyeli shiɛmɔ nitsumɔ lɛ toi lɛ. Amɛjɛ jeŋmaji kɛ wekui fɛɛ mli amɛmiiho yuu ‘kɛmiiya Yehowa we gɔŋ lɛ nɔ,’ amɛmiitsɔmɔ edasefoi ni abaptisi amɛ kɛ “asafo babaoo” ni jɛ majimaji anɔ lɛ fa. (Yesaia 2:​2-4; Kpojiemɔ 7:⁠9) Mɛi ni jieɔ Yehowa yi akɛ eshikpɔŋ nɔ gbɛjianɔtoo lɛ fa lɛ he tse, amɛyɛ jeŋba, amɛsheɔ Nyɔŋmɔ gbeyei​—amɛji nii ni asumɔɔ loo nii ni jara wa lɛlɛŋ. Yɛ anɔkwale mli lɛ, belɛ anɔkwale Kristofonyo fɛɛ Kristofonyo baasumɔ ni ejie nyɛmimɛi asuɔmɔ kpo etsɔɔ mɛi ni jara wa loo asumɔɔ ni wɔ Tsɛ ni yɔɔ ŋwɛi lɛ ekpɛlɛ amɛnɔ lɛ fɛɛ.

Amɛsu kɛ Baŋ yɛ Ehee

 9. Kɛji akɛ yɛ tsutsu lɛ wɔsusuuu gbɔi ahe ekpakpa lɛ, mɛni hewɔ esa akɛ nibii atsake bianɛ akɛni wɔtsɔmɔ Kristofoi nɛɛ?

⁹ Asumɔɔ wɔmumɔŋ nyɛmimɛi hii kɛ nyɛmimɛi yei ni yɔɔ shikpɔŋ muu lɛ fɛɛ nɔ lɛ hu, ejaakɛ amɛbo ŋaawoo akɛ ‘amɛjie gbɔmɔ momo lɛ kɛ enitsumɔi lɛ amɛshwie ni amɛwo gbɔmɔ hee’ “ni etsɔɔ ehee ekoŋŋ kɛyaa nilee mli yɛ mɔ ni bɔ lɛ lɛ subaŋ lɛ naa; he ni Helanyo kɛ Yudanyo, ketiafolɔ kɛ foolɔ, jekonyo kɛ Skitenyo, nyɔŋ kɛ odehe ko bɛ dɔŋŋ, shi moŋ Kristo ji nii fiaa yɛ mɛi fɛɛ mli” lɛ toi. (Kolosebii 3:​9-11) Kɛji akɛ mɔ ko yɛ ni tsutsu lɛ ewieee Yudanyo, Helanyo, loo mɛi krokomɛi ni jɛ maŋsɛɛ lɛ ahe ekpakpa lɛ, esa akɛ nibii atsake akɛni agbɛnɛ eji Kristofonyo lɛ hewɔ. Yɛ mɔ ko weku, maŋ nɔ ni ejɛ, loo tsɔsemɔ lɛ fɛɛ sɛɛ lɛ, mɛi ni yɔɔ “gbɔmɔ hee” lɛ jieɔ Nyɔŋmɔ mumɔ lɛ yibii​—ni ji suɔmɔ, miishɛɛ, toiŋjɔlɛ, tsuishiŋmɛɛ, mlihilɛ, ekpakpafeemɔ, hemɔkɛyeli, mlijɔlɛ kɛ henɔyeli lɛ kpo. (Galatabii 5:​22, 23) Enɛ haa nanemɛi Yehowa jalɔi lɛ sumɔɔ amɛ waa.

10. Yɛ mɛɛ gbɛ nɔ Tito 1:​5-12 baanyɛ aye abua wɔ kɛ aaka wɔ ni wɔwie wɔnanemɛi heyelilɔi ni jɛ maŋ ko nɔ loo amɛwieɔ wiemɔ kroko he efɔŋ lɛ?

¹⁰ Je lɛŋ bii komɛi wieɔ wiemɔi ni ehiii yɛ gbɔmɛi ni jɛ maji krokomɛi anɔ lɛ ahe, shi Yehowa tsuji efeee nakai. Kretanyo ko ni ji gbalɔ wie be ko yɛ lɛ diɛŋtsɛ ewebii lɛ ahe akɛ: “Kretabii maleɔ daa, kooloi fɔji ni, musutsɛmɛi hejɔlɔi ni”! Bɔfo Paulo kai nɛkɛ wiemɔi nɛɛ beni ehe bahia akɛ eha apasa tsɔɔlɔi komɛi ni yɔɔ Kristofoi ni yɔɔ Kreta ŋshɔkpɔ lɛ nɔ lɛ afee dioo lɛ hewɔ. Eka shi faŋŋ akɛ Paul ekɛɛɛ akɛ: ‘Kreta Kristofoi fɛɛ ji amalelɔi kɛ kooloi fɔji kɛ musutsɛmɛi hejɔlɔi.’ (Tito 1:​5-12) Dabi, ejaakɛ Kristofoi ewieee mɛi krokomɛi ahe efɔŋ. Agbɛnɛ, ehe bahia ni nakai Kreta Kristofoi lɛ ateŋ mɛi ni fa “awo gbɔmɔ hee lɛ,” ni mɛi komɛi hu he esa yɛ mumɔŋ ni aaanyɛ ahala amɛ akɛ onukpai. No hewɔ lɛ, esa akɛ wɔkɛ hiɛdɔɔ asusu enɛ he kɛji akɛ aaaka wɔ ni wɔwie wiemɔi ni esaaa yɛ wɔmumɔŋ nyɛmimɛi hii kɛ yei ni jɛ weku ko loo maŋ ko nɔ lɛ ahe lɛ.

Buu Mɛi Krokomɛi Akɛ Amɛ nɔ Kwɔlɔ Fe Bo

11. Kɛ hiɛaŋkwɛmɔ ko hɔ Kristofonyo ko tsui mli lolo lɛ, mɛni ebaanyɛ efee?

¹¹ Shi yɛ gbɛ kroko nɔ lɛ, kɛji akɛ Kristofonyo ko kwɛ hiɛaŋ yɛ weku loo maŋ ko nɔ ni mɔ ko jɛ hewɔ lɛ, ekolɛ ebaajie enɛ kpo kɛtsɔ wiemɔi aloo nifeemɔi anɔ. Nɔ ni baajɛ mli aba ji akɛ enɛ baaye henumɔi awui, titri lɛ yɛ asafo ni gbɔmɛi sɔrɔtoi ni jɛ maji sɔrɔtoi amli yɔɔ mli lɛ mli. Eka shi faŋŋ akɛ Kristofonyo ko basumɔŋ ni ekɛ naagba ni tamɔ nɛkɛ aba ekomefeemɔ ni yɔɔ Nyɔŋmɔ webii ateŋ lɛ nɔ. (Lala 133:​1-3) No hewɔ lɛ kɛji akɛ hiɛaŋkwɛmɔ ko yɛ Kristofonyo ko tsui mli lɛ, ebaanyɛ esɔle akɛ: “Mawu, taomɔ mimli, ni ole mitsuiŋ; kaami okwɛ, ni oyoo mijwɛŋmɔi! Ni okwɛ akɛ minyiɛ gbɛ fɔŋ ko nɔ lo ni okpala mi kɛya naanɔ gbɛ lɛ nɔ!”​—Lala 139:​23, 24.

12. Mɛni hewɔ esaaa akɛ wɔshwaa loo wɔwoɔ wɔhe nɔ loo wɔshwaa wɔfɔɔ mɛi ni jɛ wɔweku loo wiemɔ mli lɛ anɔ lɛ?

¹² Ehi akɛ wɔɔna jwɛŋmɔ ni ja lɛ akɛ wɔ fɛɛ wɔji adesai ni yeee emuu ni eji jeee Yesu Kristo afɔleshaa lɛ kulɛ, wɔnyɛŋ wɔna shidaamɔ kpakpa ko yɛ Nyɔŋmɔ hiɛ. (1 Yohane 1:​8–2:⁠2) Belɛ mɛni haa wɔfeɔ gbɔmɛi ni esoro amɛ yɛ mɛi krokomɛi ahe? Akɛni wɔbɛ nɔ ko ni jeee ha aha wɔ hewɔ lɛ, mɛni hewɔ esa akɛ wɔshwa yɛ wɔmli aloo yɛ mɛi krokomɛi ni wɔkɛ amɛ jɛ maŋ kome loo wiemɔ kome mli lɛ hewɔ?​—Okɛto 1 Korintobii 4:​6, 7 he.

13. Wɔbaanyɛ wɔye wɔbua ekomefeemɔ ni yɔɔ asafo lɛ mli lɛ yɛ mɛɛ gbɛ nɔ, ni mɛni abaanyɛ akase kɛjɛ Filipibii 2:​1-11?

¹³ Wɔbaanyɛ wɔha ekomefeemɔ ni yɔɔ asafo lɛ mli lɛ aya hiɛ kɛji akɛ wɔkpɛlɛ nɔ ni wɔjie hiɛsɔɔ kpo wɔha sui kpakpai ni yɔɔ mɛi krokomɛi amli lɛ. Yudanyo bɔfo Paulo kɛ sane ko ni wɔ fɛɛ wɔbaanyɛ wɔsusu he ha wɔ yɛ be mli ni ekɛɛ Filipibii Jeŋmajiaŋbii lɛ akɛ: “Nyɛhaa mimiishɛɛ lɛ ayia obɔ akɛ nyɛmiijwɛŋ nɔ kome, nyɛhiɛ suɔmɔ kome, susuma kome, jwɛŋmɔ kome [mli], ni nyɛkaŋmɛa mligbalamɔi loo yaka anunyam taomɔ gbɛ, shi moŋ nyɛkɛ heshibaa jwɛŋmɔ abubua nyɛnanemɛi fe nyɛ diɛŋtsɛ nyɛhe.” Su kpakpa ni esa akɛ wɔjie lɛ kpo yɛ wɔnanemɛi adesai ni jɛ weku loo maŋ kroko nɔ lɛ ahe lɛ je kpo yɛ Yesu Kristo mli. Eyɛ mli akɛ eji mumɔŋ bɔɔ nɔ ni he wa moŋ, shi “etsɔ tamɔ gbɔmɔ” ni eba ehe shi kɛtee sɛŋmɔtso nɔ gbele mli eha adesai eshafeelɔi ni jɛ wiemɔ fɛɛ wiemɔ kɛ maŋ fɛɛ maŋ nɔ. (Filipibii 2:​1-11) Akɛ Yesu sɛɛnyiɛlɔi lɛ, belɛ ani esaaa akɛ wɔfeɔ mɛi ni yɔɔ suɔmɔ, mɛi ni baa amɛhe shi ni amɛyɔɔ musuŋtsɔlɛ ni amɛkpɛlɛɔ nɔ akɛ mɛi krokomɛi anɔ kwɔlɔ fe wɔ?

Bo Toi Ni Okwɛ Nii

14. Mɛɛ gbɛ nɔ aaatsɔ aye abua wɔ ni wɔsusu mɛi krokomɛi ahe akɛ amɛ nɔ kwɔlɔ fe wɔ?

¹⁴ Abaanyɛ aye abua wɔ ni wɔsusu mɛi krokomɛi ahe akɛ amɛ nɔ kwɔlɔ fe wɔ kɛji akɛ kɛ amɛmiiwie lɛ wɔbo toi diɛŋtsɛ ni wɔkwɛ amɛjeŋba hu jogbaŋŋ. Akɛ nɔkwɛmɔ nɔ lɛ, ekolɛ wɔbaanyɛ wɔkpɛlɛ nɔ yɛ anɔkwayeli mli akɛ onukpa ko​—ekolɛ mɔ ni jɛ maŋ kroko nɔ​—eho wɔhe yɛ nyɛmɔ ni akɛwoɔ ŋaa kpakpa ni mɔɔ shi yɛ Teokrase Sɔɔmɔ Skul lɛ mli lɛ mli. Ekolɛ wɔbayoo akɛ ejɛ emumɔŋ shihilɛ lɛ hewɔ. Shi jeee bɔ ni etsɛɔ wiemɔi komɛi loo gbɛ ni etsɔɔ nɔ ewieɔ lɛ ji nɔ ni haa eyeɔ omanye yɛ enanemɛi heyelilɔi lɛ ayelikɛbuamɔ mli koni amɛbatsɔmɔ Maŋtsɛyeli lɛ jajelɔi ni he esa lɛ. Ni eka shi faŋŋ akɛ Yehowa miijɔɔ emɔdɛŋbɔi lɛ anɔ.

15. Mɛni wɔbaanyɛ wɔkadi kɛ wɔbo nanemɛi jalɔi awiemɔi atoi lɛ?

¹⁵ Kɛ wɔkɛ wɔnyɛmimɛi hii kɛ yei lɛ gba sane loo wɔbo amɛwiemɔi yɛ kpeei ashishi lɛ toi lɛ, wɔbaanyɛ wɔyoo akɛ amɛteŋ mɛi komɛi nuɔ Ŋmalɛ mli anɔkwalei komɛi ashishi jogbaŋŋ fe bɔ ni wɔfeɔ. Wɔbaanyɛ wɔyoo akɛ nyɛmimɛi ahe suɔmɔ ni amɛyɔɔ lɛ tamɔ nɔ ni emli wa, etamɔ nɔ ni amɛyɛ hemɔkɛyeli babaoo, aloo amɛnifeemɔ kɛ odaseyeli haa akɛ amɛkɛ amɛhe fɔɔ Yehowa nɔ babaoo. No hewɔ lɛ, kɛji akɛ amɛjɛ maŋ ni wɔjɛ mli lɛ loo jeee nakai hu lɛ, amɛkanyaa wɔ kɛyaa suɔmɔ kɛ nitsumɔi kpakpai ahe, amɛyeɔ amɛbuaa wɔ ni amɛwajeɔ wɔhemɔkɛyeli, ni amɛkanyaa wɔ ni wɔkɛ wɔhe afɔ wɔ ŋwɛi Tsɛ lɛ nɔ babaoo. (Abɛi 3:​5, 6; Hebribii 10:​24, 25, 39) Eka shi faŋŋ akɛ Yehowa etsi ebɛŋkɛ amɛ, ni nakai esa akɛ wɔfee.​—Okɛto Yakobo 4:8 he.

Ajɔɔ Amɛ Ni Awaje Amɛ

16, 17. Feemɔ anɔkwale ni eji akɛ Yehowa kwɛɛɛ hiɛaŋ yɛ jɔɔmɔ ni ekɛbaa etsuji ni jɛ maŋ ko loo wiemɔ ko mli lɛ nɔ lɛ he nɔkwɛmɔ nɔ.

¹⁶ Yehowa kwɛɛɛ hiɛaŋ yɛ etsuji ni jɛ maŋ ko mli loo amɛwieɔ wiemɔ ko lɛ ajɔɔmɔ mli. Akɛ nɔkwɛmɔ nɔ lɛ, susumɔ Brazil maŋ lɛ he okwɛ. Jeee maŋsɛɛ sanekpakpashiɛlɔi anaa ajɛ ajaje Maŋtsɛyeli lɛ he sane lɛ atsɔɔ Brazilbii klɛŋklɛŋ kwraa, shi moŋ, amlakui loo ŋshɔ hiɛ lɛji amli nitsulɔi kpaanyɔ ji mɛi ni fee nakai yɛ ajɔ̃ 1920 mli. Nyɔŋmɔ jɔɔmɔ eje kpo faŋŋ, ejaakɛ beni 1987 sɔɔmɔ afi lɛ shɛɔ lɛ, Maŋtsɛyeli jajelɔi ayifalɛ ni fe fɛɛ ji 216,216 yɛ maŋ ni emli bii shɛɔ 141,302,000 lɛ mli​—ni kɛ aja mli lɛ, shiɛlɔ kome shiɛɔ haa gbɔmɛi 654.

¹⁷ Susumɔ ŋwɛi jɔɔmɔ he nɔkwɛmɔ nɔ kroko he. Yɛ April 1923 mli lɛ, atsu mɛidiji ni ji Yehowa Odasefoi enyɔ kɛjɛ Carribean ŋshɔkpɔ ni ji Trinidad nɔ koni amɛya ni amɛyajaje Maŋtsɛyeli lɛ he sane lɛ yɛ Afrika Anaigbɛ. Nakai ebalɛ ni Nyɛminuu kɛ Nyɛmiyoo W. R. Brown sɔmɔ yɛ jɛmɛ afii babaoo, ni abale lɛ akɛ “Bible Brown.” ‘Amɛtɛo’ ni ‘Nyɔŋmɔ ha etee nɔ eshwere’ yɛ be mli ni mɛi krokomɛi hu tsuɔ nii yɛ nakai shikpɔŋ ni da lɛ nɔ lɛ. (1 Korintobii 3:​5-9) Ŋmɛnɛ, Maŋtsɛyeli shiɛlɔi fe 32,600 yɛ Ghana ni mɛi ni fe 133,800 yɛ Nigeria pɛ.

18, 19. Okɛ nɔkwɛmɔ nii ni tsɔɔ bɔ ni wɔ-Tsɛ ni kwɛɛɛ hiɛaŋ lɛ wajeɔ etsuji ni jɛ majianɔ wiemɔi kɛ maji sɔrɔtoi amli lɛ aha.

¹⁸ Jeee akɛ Yehowa jɔɔ etsuji ni jɛ maji kɛ wekui sɔrɔtoi fɛɛ mli lɛ pɛ kɛkɛ, shi moŋ ewajeɔ amɛ hu. Akɛ nɔkwɛmɔ nɔ lɛ, susumɔ Japanbii Yehowa Odasefoi enyɔ ko sane lɛ he okwɛ. June 21, 1939 mli ni amɔ Katsuo Miura kɛ eŋa yɛ gbɛ ni ejaaa nɔ, awo amɛ tsuŋ ni agbala amɛ kɛ amɛbinuu ni eye afii enumɔ lɛ teŋ, ni ehe bahia ni gbekɛ nɛɛ ayahi enaa ŋɔɔ. Ajie Nyɛmiyoo Miura kɛjɛ etsuŋwoo lɛ mli yɛ nyɔji kpaanyɔ sɛɛ, shi nyɛminuu Miura hi tsuŋwoo lɛ mli fe afii enyɔ dani aba abaye esane. Afee lɛ niseniianii, abu lɛ fɔ ni awo lɛ tsuŋ afii enumɔ. Shi Nyɔŋmɔ tsɔ Ŋmalɛi lɛ anɔ ewaje lɛ yɛ etsuŋwoo lɛ mli yɛ Hiroshima, ni enɛ shɛje emii ni ewo lɛ hewalɛ babaoo. Nɔ ni abaanyɛ atsɛ lɛ akɛ etamɔ naakpɛɛ sane ko ba, ejaakɛ Nyɛminuu Miura je August 6, 1945 atɔmik okplɛm ni afɛ ashwie etsuŋwoo he lɛ nɔ ni kpata jɛmɛ fɛɛ hiɛ lɛ mli. Yɛ no sɛɛ afii enyɔ lɛ, enyɛ ekɛ eŋa kɛ ebinuu lɛ yakpe ekoŋŋ yɛ Japan kooyigbɛ.

¹⁹ Akɛ yiwaa ni naa wa waa ba Yehowa Odasefoi anɔ yɛ Jeŋ Ta II mli yɛ shikpɔji pii anɔ. Akɛ nɔkwɛmɔ nɔ lɛ, Robert A. Winkler ji Germane nyɛminuu ko ni na nɔ yɛ Nazi gbokɛlɛfoi aŋsaraŋ sɔrɔtoi amli yɛ Germane kɛ Netherlands. Akɛni etsɔɔɔ enanemɛi Odasefoi lɛ asɛɛ gbɛ hewɔ lɛ, afee lɛ niseniianii kɛtsɔ yii ni ehiii nɔ ni enɛ haaa anyɛ ayooo lɛ po. Shi eŋma akɛ: “Yehowa shiwoi akɛ eeeye ebua mɔ ko yɛ haomɔi sɔrɔtoi fɛɛ mli lɛ he susumɔ kɛ miishɛjemɔ kɛ hewalɛwoo ha mi koni mato mitsui shi yɛ enɛɛmɛi fɛɛ mli. . . . Gestapo lɛ yi mi Hɔɔ, ni enɔ Ju hu lɛ, akɛ mi baaba amɛhiɛ kɛha sanebimɔ ekoŋŋ. Mɛni baaba agbɛnɛ, ni mɛni mafee hu? Mitsɔ mihe miha Yehowa yɛ sɔlemɔ mli, ni mikɛ mihiɛ fɔ eshiwoi anɔ. Mile akɛ enɛ tsɔɔ teokrase tawuu he ŋaa ni akɛaatsu nii yɛ Maŋtsɛyeli nitsumɔ lɛ hewɔ kɛ minyɛmimɛi Kristofoi lɛ ahebuu. Eji kaa kpele ni mli wa kɛha mi beni shɛɔ gbii nyɔŋma kɛ kpawo lɛ nɔ ni no mli lɛ mibɛ hewalɛ ko kwraa dɔŋŋ lɛ, shi miida Yehowa shi akɛ minyɛ miŋmɛ mitsui shi yɛ nɛkɛ kaai nɛɛ amli ni minyɛ mitee nɔ mihiɛ mimuuyeli mli yɛ lɛ ehewalɛ mli.”​—Lala 18:​35; 55:​22; 94:⁠18.

Wɔmiida Shi yɛ Wɔnyɛmifeemɔ lɛ Hewɔ

20. Te wɔɔfee tɛŋŋ ni bulɛ ni wɔyɔɔ kɛhaa wɔnanemɛi heyelilɔi ni jɛ majianɔ wiemɔi kɛ maji sɔrɔtoi anɔ lɛ aaaya hiɛ?

²⁰ Ŋwanejee ko bɛ he akɛ Yehowa jɔɔ ni ewajeɔ edasefoi ni jɛ jeŋmaŋ fɛɛ jeŋmaŋ kɛ majianɔ wiemɔi amli lɛ. Ekwɛɛɛ hiɛaŋ, ni akɛ etsuji ni wɔjɔɔ wɔhe nɔ lɛ, wɔbɛ naajiemɔ ko loo nɔ ni wɔɔdamɔ nɔ wɔkwɛ mɛi ahiɛaŋ. Agbɛnɛ, bulɛ ni wɔyɔɔ kɛha wɔ nyɛmimɛi hii kɛ nyɛmimɛi ni jɛ jeŋmaŋ fɛɛ jeŋmaŋ kɛ majianɔ wiemɔi sɔrɔtoi amli lɛ baaya hiɛ kɛ wɔsusu nibii amli ni amɛ nɔ kwɔlɔ fe wɔ yɛ lɛ ahe lɛ. Amɛ hu amɛkɛ ŋwɛi nilee tsuɔ nii, ni enɛ kɛ mligbalamɔ baaa, shi moŋ, ewoɔ yibii kpakpai. (Yakobo 3:​13-18) Hɛɛ, ni amɛ mlihilɛ, ejurɔfeemɔ, suɔmɔ kɛ Nyɔŋmɔ gbeyeishemɔ sui krokomɛi lɛ kɛ nɔkwɛmɔ nii kpakpai haa wɔ.

21. Mɛni esa akɛ wɔtswa wɔfai shi akɛ wɔbaafee?

²¹ Belɛ kwɛ bɔ ni esa akɛ wɔda shi, yɛ wɔ majianɔ wiemɔi kɛ majimaji ateŋ nyɛmifeemɔ lɛ hewɔ! Yɛ wɔŋwɛi Tsɛ lɛ yelikɛbuamɔ kɛ jɔɔmɔ hewɔ lɛ, nyɛhaa ‘ni wɔkɛ kɔŋ kome asɔmɔa,’ yɛ nyɛmimɛi asuɔmɔ kɛ bulɛ kɛha wɔ fɛɛ wɔhe lɛ mli. Yɛ anɔkwale mli lɛ, esa akɛ efee nɔ ni wɔshweɔ yɛ anɔkwale mli kɛ yiŋkpɛɛ ni ma shi shiŋŋ akɛ wɔɔsɔmɔ Yehowa kɛ gbee kome.a