Biblia Mli Wolo ni Ji 48—Galatabii
Mɔ ni Ŋma: Paulo
Heni Aŋma Yɛ: Korinto loo Antiokia ni Yɔɔ Siria Lɛ
Be ni Aŋma Agbe Naa: Aaafee afi 50–52 Ŋ.B.
EEENYƐ efee akɛ asafoi ni yɔɔ Antiokia yɛ Pisidia, Ikoniom, Listra, kɛ Derbe lɛ fata Galata asafoi ni atsĩ tã yɛ Galatabii 1:2 lɛ akɛ Paulo ŋma wolo lɛ eyaha amɛ lɛ ahe—maji nɛɛ yɛ kpokpai srɔtoi anɔ, shi fɛɛ yɛ Galata ni ji shikpɔŋ ni Romabii lɛ ye nɔ lɛ nɔ. Bɔfoi lɛ Asaji yitso 13 kɛ 14 lɛ tsɔɔ akɛ beni Paulo fã gbɛ klɛŋklɛŋ akɛ maŋsɛɛ sanekpakpa shiɛlɔ ní no mli lɛ Barnaba fata ehe lɛ, amɛyatsɔ Galata ni amɛto asafoi yɛ jɛmɛ. Yudafoi kɛ mɛi ni jeee Yudafoi ní ekã shi faŋŋ akɛ Celtbii loo Gaulbii fata he lɛ ji mɛi ni yɔɔ asafoi nɛɛ amli. Paulo fã eklɛŋklɛŋ gbɛ akɛ maŋsɛɛ sanekpakpa shiɛlɔ lɛ beni etee Yerusalem aaafee afi 46 Ŋ.B. lɛ sɛɛ nɔŋŋ.—Bɔf. 12:25.
2 Yɛ afi 49 Ŋ.B. lɛ, Paulo ŋɔ Sila efata ehe beni efãa egbɛ ni ji enyɔ akɛ maŋsɛɛ sanekpakpa shiɛlɔ lɛ, ni amɛtee Galata, ni amɛha asafoi lɛ “ná hewalɛ yɛ hemɔkɛyeli mli, ni amɛyi fáa daa nɛɛ.” (Bɔf. 16:5; 15:40, 41; 16:1, 2) Shi no sɛɛ etsɛɛɛ nɔŋŋ lɛ, amale tsɔɔlɔi kɛ Mɛi ni Miisumɔ ni Aye Mose Mla lɛ nɔ lɛ kɔne mɛi komɛi ni yɔɔ Galata asafoi lɛ amli lɛ ayiŋ koni amɛhe amɛye akɛ ketiafoo kɛ Mose Mla lɛ nɔyeli fata nibii ni esa akɛ anɔkwa Kristofoi afee lɛ ahe. Dani no aaaba lɛ, Paulo fã gbɛ kɛtsɔ Misia kɛtee Makedonia kɛ Hela, ni etse mli kɛtee Korinto ni ekɛ nyɛmimɛi lɛ hi shi nyɔji 18 yɛ jɛmɛ. No sɛɛ yɛ afi 52 Ŋ.B. lɛ etsɔ Efeso kɛtee he ni efɔɔ hilɛ ni ji Antiokia ni yɔɔ Siria lɛ, eshɛ jɛmɛ nakai afi lɛ nɔŋŋ mli.—Bɔf. 16:8, 11, 12; 17:15; 18:1, 11, 18-22.
3 Mɛɛ be Paulo ŋma Galatabii lɛ Awolo lɛ, ni nɛgbɛ eŋma yɛ? Beni enu akɛ Mɛi ni Miisumɔ ni Aye Mose Mla lɛ nɔ lɛ miikɔne mɛi komɛi ayiŋ lɛ nɔŋŋ ni eŋma. Eeenyɛ efee akɛ eŋma wolo nɛɛ yɛ Korinto, Efeso, loo Antiokia ni yɔɔ Siria lɛ. Eeenyɛ efee akɛ Paulo ŋma wolo lɛ beni eye nyɔji 18 yɛ Korinto aaafee afi 50-52 Ŋ.B. lɛ, ejaakɛ ewaŋ kɛhaŋ lɛ akɛ enine aaashɛ saji anɔ kɛjɛ Galata yɛ jɛmɛ. Akɛni Paulo ye be kukuoo pɛ yɛ Efeso hewɔ lɛ, anyɛŋ akɛɛ akɛ jɛmɛ eŋma wolo nɛɛ yɛ. Etamɔ nɔ ni yɛ afi 52 Ŋ.B. lɛ, Paulo ‘hi’ Antiokia ni yɔɔ Siria lɛ “fioo,” ni akɛni ewaaa ákɛ akɛ sane aaamaje mɔ ko kɛjɛ Asia Bibioo lɛ kɛyaha mɔ ko yɛ nakai maŋ lɛ mli hewɔ lɛ, eeenyɛ efee akɛ jɛmɛ ji he ni enine shɛ amaniɛbɔɔ ni kɔɔ Mɛi ni Miisumɔ ni Aye Mose Mla lɛ nɔ lɛ anifeemɔi lɛ nɔ yɛ, ni eŋma wolo ni eŋma Galatabii lɛ yɛ jɛmɛ, yɛ be nɛɛ mli.—Bɔf. 18:23.
4 Aŋma yɛ wolo lɛ mli akɛ Paulo ji “bɔfo ni jeee gbɔmɛi aŋɔɔ ejɛ ni jeee gbɔmɔ ko nɔ hu etsɔ, shi moŋ Yesu Kristo kɛ tsɛ Nyɔŋmɔ ni tee lɛ shi kɛjɛ gbohii ateŋ lɛ nɔ etsɔ.” Wolo nɛɛ hu haa wɔleɔ anɔkwa saji babaoo ni kɔɔ Paulo shihilɛ mli saji, kɛ sɔɔmɔ ni esɔmɔ akɛ bɔfo lɛ he, ni tsɔɔ akɛ Paulo kɛ bɔfoi krokomɛi ni yɔɔ Yerusalem lɛ fee ekome, ni akɛ ekɛ hegbɛ ni eyɔɔ lɛ tsu nii ni ekɛjaje Petro, ní lɛ hu eji bɔfo lɛ.—Gal. 1:1, 13-24; 2:1-14.
5 Mɛni tsɔɔ akɛ Galatabii Awolo lɛ mli saji lɛ ja, ni eja gbɛ akɛ akɛfataa Biblia mli woji lɛ ahe? Atsi tã yɛ woji ni Iranaeus, Clement ni jɛ Aleksandria, Tertullian, kɛ Origen ŋmala lɛ amli. Kɛfata he lɛ, eyɛ Biblia wolokpoi ni akɛ niji ŋmala ni he hiaa ni abuɔ waa lɛ amli: Sinaitic, Alexandrine, Vatican No. 1209, Codex Ephraemi Syri rescriptus, Codex Bezae, kɛ Chester Beatty Papyrus No. 2 (P46). Agbɛnɛ hu lɛ, ekɛ Hela Ŋmalɛi krokomɛi lɛ kpãa gbee, ni ekɛ Hebri Ŋmalɛi ni efɔɔ emli ŋmalɛi ayisɛɛ tsɛmɔ lɛ hu kpãa gbee.
6 Paulo shiuuu sane nɔ yɛ wolo ni eŋma kɛyaha “Galata asafoi lɛ” mli, ni emli wiemɔi lɛ kanyaa mɔ waa. Paulo fee lɛ faŋŋ yɛ wolo nɛɛ mli akɛ (1) eji anɔkwa bɔfo (anɔkwa sane ko ni Mɛi ni Miisumɔ ni Aye Mose Mla lɛ nɔ lɛ bɔ mɔdɛŋ koni amɛfite mɛi ajwɛŋmɔ yɛ he lɛ) ni agbɛnɛ hu (2) hemɔkɛyeli yɛ Kristo Yesu mli ji nɔ ni haa abuɔ mɔ ko bem shi jeee Mla lɛ nɔyeli, ni no hewɔ lɛ ketiafoo jee taomɔnii kɛha Kristofoi. Eyɛ mli akɛ bei pii lɛ Paulo yɛ mɔ ko ni ŋmaa woji ni eŋmalaa lɛ ehaa lɛ akɛ ewoloŋmalɔ moŋ, shi lɛ diɛŋtsɛ ekɛ ‘enine’ ŋma Galatabii Awolo lɛ. (6:11) Saji ni yɔɔ wolo nɛɛ mli lɛ he yɛ sɛɛnamɔ waa kɛha Paulo kɛ Galatabii lɛ. Wolo nɛɛ maa bɔ ni esa akɛ anɔkwa Kristofoi ahiɛ asɔ heyeli ni Yesu Kristo eha amɛná lɛ nɔ mi.
NƆ HEWƆ NI EHE YƆƆ SƐƐNAMƆ
14 Galatabii Awolo lɛ haa wɔnaa bɔ ni Paulo ni no mli lɛ eji yiwalɔ kpanaku lɛ batsɔ jeŋmaji lɛ abɔfo ni hiɛ yɔɔ ehe nɔ waa, ní efee klalo akɛ ebaafa enyɛmimɛi lɛ ahe. (1:13-16, 23; 5:7-12) Paulo kɛ eshihilɛ tsɔɔ akɛ esa akɛ nɔkwɛlɔ kɛ oyaiyeli atsu saji ahe nii, ni ekɛ Ŋmalɛi lɛ kɛ niiahesusumɔ ni kɔneɔ mɔ yiŋ aku mɛi asusumɔi ni ejaaa lɛ naa.—1:6-9; 3:1-6.
15 Galatabii lɛ ná wolo nɛɛ he sɛɛ, ejaakɛ emli wiemɔi lɛ ha nɔ ni heyeli ni amɛná yɛ Kristo mli lɛ tsɔɔ lɛ fee faŋŋ eha amɛ, ni eha amɛyɔse mɛi ni tsɔɔ sanekpakpa lɛ hiɛ amɛbuɔ shi lɛ. Wolo nɛɛ mli wiemɔi lɛ ha efee faŋŋ akɛ hemɔkɛyeli mli aaajɛ abu mɔ ko jalɔ, ni ákɛ ehe ehiaaa dɔŋŋ ni afo mɔ ko ketia dani ahere eyi wala. (2:16; 3:8; 5:6) Heloo mli nifeemɔ nɛɛ ni agu lɛ ha Yudafoi kɛ mɛi ni jeee Yudafoi fee ekome yɛ Kristofoi asafo kome lɛ mli. Akɛni shishitoo mla ni ji: “Suɔmɔ onaanyo taakɛ bɔ ni osumɔɔ bo diɛŋtsɛ ohe” lɛ miitsu nii lolo hewɔ lɛ, amɛhe ni amɛyeɔ kɛjɛɔ Mla lɛ he lɛ haaa amɛ nɔdaamɔ nɔ kɛha heloo lɛ mli akɔnɔi lɛ asɛɛtiumɔ. Ŋmɛnɛ hu lɛ, Kristofoi kɛ nakai shishitoo mla lɛ nɔŋŋ tsuɔ nii.—5:14.
16 Paulo kɛ Hebri Ŋmalɛ lɛ mli saji fee nɔkwɛmɔnii ni náa mɔ nɔ hewalɛ waa yɛ wolo ni eŋma kɛyaha Galatabii lɛ mli, ni ekɛye ebua amɛ ni amɛnu otii babaoo ni kɔɔ amɛhemɔkɛyeli lɛ he lɛ shishi. Mumɔ krɔŋkrɔŋ lɛ tsirɛ lɛ ni etsɔɔ Yesaia 54:1-6 lɛ mli, etsɔɔ akɛ, Yehowa mfonirifeemɔŋ ŋa lɛ ji “ŋwɛi Yerusalem lɛ.” Egbala Hagar kɛ Sara sane ni ‘aŋɔ bu wɔ abɛ’ lɛ mli, etsɔɔ mli akɛ mɛi ni baaná Nyɔŋmɔ shiwooi lɛ amli gbɛfaŋnɔ lɛ ji mɛi ni Kristo eha amɛye amɛhe lɛ, shi jeee mɛi ni miiye nyɔŋ lolo yɛ Mla lɛ shishi lɛ. (Gal. 4:21-26; 1 Mose 16:1-4, 15; 21:1-3, 8-13) Wolo nɛɛ mli wiemɔi lɛ ha efee faŋŋ ákɛ akɛ Mla kpaŋmɔ bafata kpaŋmɔ ni Nyɔŋmɔ kɛ Abraham fee lɛ he, shi moŋ akɛyeee no najiaŋ. Agbɛnɛ hu, wolo nɛɛ ha efee faŋŋ akɛ beni Nyɔŋmɔ kɛ Abraham fee kpaŋmɔ lɛ, ehe afii 430 dani afee Mla kpaŋmɔ lɛ, eji anɔkwa sane ko ni he hiaa waa yɛ Biblia mli be he akɔntaabuu mli. (Gal. 3:17, 18, 23, 24) Abaa saji nɛɛ ayi koni akɛtswa Kristofoi ahemɔkɛyeli ama shi ŋmɛnɛ.
17 Nɔ ni he hiaa fe fɛɛ lɛ, Galatabii Awolo lɛ tsɔɔ mɔ ni ji Seshi ni baaye maŋtsɛ ni gbalɔi lɛ fɛɛ kpa lɛ gbɛ lɛ mli faŋŋ. Aŋma yɛ mli akɛ: “Shi Abraham lɛ, awie shiwoo wiemɔi lɛ aha lɛ kɛ eseshi lɛ . . . mɔ ni ji Kristo lɛ.” Abuɔ mɛi ni batsɔmɔɔ Nyɔŋmɔ bii kɛtsɔ hemɔkɛyeli ni amɛyɔɔ yɛ Kristo Yesu mli lɛ nɔ lɛ hu akɛ amɛji seshi nɛɛ fã. Aŋma yɛ mli akɛ: “Kɛ́ Kristo nii ji nyɛ lɛ, belɛ Abraham seshibii [loo seshi] ji nyɛ, kɛ gboshiniyelɔi hu yɛ shiwoo lɛ naa.” (3:16, 29) Esa akɛ Maŋtsɛyeli lɛ he gboshiniyelɔi nɛɛ kɛ mɛi ni kɛ amɛ tsuɔ nii lɛ abo ŋaawoi kpakpai ni akɛha yɛ Galatabii Awolo lɛ mli lɛ toi akɛ: ‘Kristo eha nyɛye nyɛhe, no hewɔ lɛ nyɛdamɔa shi shiŋŋ.’ ‘Nyɛkahaa ekpakpafeemɔ miitɔa nyɛ, ejaakɛ kɛ́ nyɛnijiaŋ ejeee wui lɛ, nyɛbaakpa hu yɛ be ni sa mli.’ ‘Nyɛfea mɛi fɛɛ ejurɔ, titri lɛ mɛi ni ji hemɔkɛyeli lɛ webii lɛ.’—5:1; 6:9, 10.
18 Naagbee lɛ, wolo nɛɛ kɛ kɔkɔbɔɔ ni mli wa ha akɛ, mɛi ni kɛ amɛhe woɔ heloo lɛ nitsumɔi lɛ amli lɛ ‘anine shɛŋ Nyɔŋmɔ maŋtsɛyeli lɛ nɔ.’ No hewɔ lɛ, nyɛhaa wɔ fɛɛ wɔtsia wɔhe kwraa kɛjɛa je nɛŋ muji kɛ basabasafeemɔ lɛ he, ni wɔkɛ wɔtsuii fɛɛ atsu nii koni wɔwo mumɔ lɛ yibii ni ji “suɔmɔ, miishɛɛ, hejɔlɛ, tsuishitoo, mlihilɛ, ejurɔfeemɔ, hemɔkɛyeli, mlijɔlɛ, hiɛshikamɔ [loo henɔyeli]” lɛ.—5:19-23.