Aha Yehowa Webii Na Hewalɛ Yɛ Hemɔkɛyeli Lɛ Mli
“Agbɛnɛ asafoi Iɛ na hewalɛ yɛ hemɔkɛyeli mli, ni amɛyi faa daa nɛɛ.”—BƆFOI LƐ ASAJI 16:5.
1. Nyɔŋmɔ kɛ bɔfo Paulo tsu nii yɛ mɛɛ gbɛ nɔ?
YEHOWA NYƆŊMƆ kɛ Saulo ni jɛ Tarso lɛ tsu nii akɛ “dɛŋdade ni ahala.” Akɛ bɔfo Paulo lɛ, ‘ena amanehulu yɛ nibii pii amli.’ Shi yɛ enitsumɔ kɛ mɛi krokomɛi anɔ hu hewɔ lɛ, Yehowa gbɛjianɔtoo lɛ na ekomefeemɔ kɛ yifalɛ ni yɔɔ naakpɛɛ mli ŋɔɔmɔ.—Bɔfoi lɛ Asaji 9:15, 16.
2. Mɛni hewɔ sɛɛnamɔ aaaba he akɛ wɔɔsusu Bɔfɔi lɛ Asaji 13:1–16:5 he lɛ?
2 Jeŋmajiaŋbii babaoo miitsɔmɔ Kristofoi, ni nɔyeli kuu lɛ kpee ni he hiaa lɛ ye bua babaoo yɛ ekomefeemɔ ni eha eba Nyɔŋmɔ webii ateŋ kɛ shiŋŋ ni amɛfee yɛ hemɔkɛyeli lɛ mli lɛ mli. Sɛɛnamɔ aaaba he jogbaŋŋ akɛ wɔɔsusu enɛɛmɛi kɛ nibii krokomɛi ni aŋmala ashwie shi yɛ Bɔfoi lɛ Asaji 13:1–16:5 lɛ ahe, ejaakɛ Yehowa Odasefoi miina nɔyaa kɛ mumɔŋ jɔɔmɔi ni tamɔ nakai nɔŋŋ mli ŋɔɔmɔ bianɛ. (Yesaia 60:22) (Yɛ be mli ni okaseɔ Bɔfoi lɛ Asaji ni yɔɔ nɔ ni akala nɛɛ mli lɛ yɛ teemɔŋ lɛ, wɔmiiwo bo ŋaa ni okane ŋmalɛi ni akala lɛ agboi yɛ nikasemɔ nɛɛ mli lɛ fɛɛ.)
Maŋsɛɛ Sanekpakpa Shiɛlɔi kɛ Amɛha Wo Nitsumɔ Mli
3. Mɛɛ nitsumɔ “gbalɔi kɛ tsɔɔlɔi” lɛ tsu yɛ Antiokia?
3 Hii ni asafo ni yɔɔ Antiokia yɛ Siria lɛ tsu amɛ lɛ ye bua heyelilɔi lɛ koni amɛhe awa yɛ hemɔkɛyeli lɛ mli. (13:1-5) “Gbalɔi kɛ tsɔɔlɔi” ni yɔɔ Antiokia lɛ ji Barnaba, Simeon (Niger), Lukio, Kireenenyo lɛ, Manahen, kɛ Saulo ni jɛ Tarso lɛ. Gbalɔi lɛ tsɔɔ Nyɔŋmɔ Wiemɔ lɛ kɛ nibii ni baaba ni agba afɔ shi lɛ amli, ni tsɔɔlɔi lɛ hu kɛ Ŋmalɛ mli tsɔsemɔi kɛ shihilɛ ni Nyɔŋmɔ gbeyeishemɔ yɔɔ mli haa. (1 Korintobii 13:8; 14:4) Barnaba kɛ Saulo nine shɛ nitsumɔ krɛdɛɛ ko nɔ. Ni amɛkɛ Barnaba nyɛmi bi Marko fata amɛhe kɛtee Kipro. (Kolosebii 4:10) Amɛshiɛ yɛ Salami, bokagbɛ ŋshɔnaa maŋ lɛ kpeehei amli, shi nɔ ko bɛ ni aŋma afɔ shi ni tsɔɔ akɛ Yudafoi lɛ bo toi. Akɛni amɛna heloo gbɛfaŋ nibii pii yɛ jɛmɛ hewɔ lɛ, mɛɛ gbɛ nɔ Mesia lɛ he hiaa amɛ yɛ?
4. Mɛni ba beni maŋsɛɛ sanekpakpa shiɛlɔi lɛ tee nɔ amɛshiɛ yɛ Kipro lɛ?
4 Nyɔŋmɔ jɔɔ odaseyeli nitsumɔ kroko nɔ yɛ Kipro. (13:6-12) Beni amɛshɛ Pafo lɛ, maŋsɛɛ sanekpakpa shiɛlɔi lɛ kɛ Yudanyo ŋkunyaayelɔ kɛ amale gbalɔ Baryesu (Elima) kpe. Beni ebɔɔ mɔdɛŋ ni etsi Amralo Sergio Paulo gbɛ koni ekabo Nyɔŋmɔ Wiemɔ lɛ toi lɛ, mumɔ krɔŋkrɔŋ lɛ yi Saulo obɔ ni ekɛɛ: ‘O, Abonsam bi ni shishiumɔ kɛ kutumpɔo fɛɛ eyio obɔ, bo nii ni ja fɛɛ henyɛlɔ, ani okpaŋ Yehowa jalɛ gbɛi lɛ akɔdɔmɔ?’ Kɛkɛ ni Nyɔŋmɔ toigbalamɔ nine lɛ shwila Elima hiŋmɛi yɛ be ko mli, kɛkɛ ni Sergio Paulo “he eye, ni ehe jɔ̃ ehe yɛ Nuŋtsɔ lɛ [Yehowa] tsɔɔmɔ lɛ hewɔ.”
5, 6. (a) Beni Paulo shiɛ yɛ kpeehe ni yɔɔ Antiokia yɛ Pisidia lɛ, mɛni ewie yɛ Yesu he? (b) Mɛni jɛ Paulo wiemɔ lɛ mli ba?
5 Kuu lɛ fa kɛjɛ Kipro kɛtee Perge maŋ ni yɔɔ Asia Bibioo lɛ mli. Paulo kɛ Barnaba tsɔ kooyigbɛ kɛtsɔ gɔji lɛ anɔ, eka shi faŋŋ akɛ ‘yɛ faai ahiɛ kɛ ojotswalɔi adɛŋ osharai amli’ kɛtee Antiokia yɛ Pisidia. (2 Korintobii 11:25, 26) Paulo shiɛ yɛ kpeehe ni yɔɔ jɛmɛ lɛ mli. (13:13-41) Eti bɔ ni Nyɔŋmɔ kɛ Israel ye ha lɛ mli ni eha ayoo David seshinyo Yesu akɛ lɛ ji Yiwalaherelɔ lɛ. Eyɛ mli akɛ Yuda nɔyelɔi lɛ bi ni agbe Yesu moŋ, shi shiwoo ni akɛha amɛ blematsɛmɛi lɛ ba mli beni Nyɔŋmɔ tee lɛ shi kɛjɛ gbohii ateŋ lɛ. (Lala 2:7; 16:10; Yesaia 55:3) Paulo bɔ etoibolɔi lɛ kɔkɔ akɛ amɛkagbe Nyɔŋmɔ yiwalaheremɔ nikeenii kɛtsɔ Kristo nɔ lɛ he guɔ.—Habakuk 1:5, Septuagint.
6 Mɛi pii na Paulo wiemɔ lɛ he miishɛɛ, taakɛ mɛi feɔ yɛ maŋshiɛmɔi ni Yehowa Odasefoi haa yɛ ŋmɛnɛ lɛ ashishi lɛ. (13:42-52) Yɛ enɔ Hejɔɔmɔ gbi lɛ nɔ lɛ, shwɛ fioo ni kulɛ maŋ muu lɛ fɛɛ afee mɛi ni ebua amɛhe naa koni amɛbo Yehowa wiemɔ lɛ toi, ni enɛ tee awuŋayeli shi yɛ Yudafoi lɛ ateŋ. Mɛni hewɔ? Ejaakɛ eka shi faŋŋ akɛ, yɛ otsi kome pɛ mli lɛ, maŋsɛɛ sanekpakpa shiɛlɔi lɛ etsake Jeŋmajiaŋbii babaoo fe bɔ ni Yudafoi lɛ efee yɛ amɛshihilɛ be fɛɛ mli! Akɛni Yudafoi lɛ kɛ musubɔɔ wiemɔ kũ Paulo naa hewɔ lɛ, be eshɛ ni esa akɛ mumɔŋ la lɛ akpɛ yɛ he fɛɛ he, ni akɛɛ amɛ akɛ: ‘Akɛni nyɛkwa Nyɔŋmɔ wiemɔ lɛ ni nyɛbuuu nyɛhe akɛ nyɛsa naanɔ wala hewɔ lɛ, wɔtsɔ wɔhe kɛmiiya jeŋmaji lɛ aŋɔɔ.’—Yesaia 49:6.
7. Te Paulo kɛ Barnaba fee amɛnii yɛ yiwaa he amɛha tɛŋŋ?
7 Agbɛnɛ Jeŋmajiaŋbii lɛ na miishɛɛ, ni mɛi ni sumɔɔ naanɔ wala lɛ batsɔmɔ heyelilɔi. Shi yɛ be mli ni ashiɛɔ Yehowa wiemɔ lɛ yɛ maŋ muu lɛ fɛɛ mli lɛ, Yudafoi lɛ wowoo yei ni abuɔ amɛ lɛ (eeenyɛ efee akɛ koni amɛnyɛ amɛ wumɛi loo mɛi krokomɛi anɔ) kɛ maŋ lɛŋ hiɛnaanɔbii lɛ ayiŋ koni amɛwa Paulo kɛ Barnaba yi ni amɛshwie amɛ kɛjɛ amɛkpokpaa lɛ nɔ. Shi enɛ nyɛɛɛ atsi maŋsɛɛ sanekpakpa shiɛlɔi lɛ anaa. “Amɛkpokpo amɛnaji ashi mlu amɛshwie amɛnɔ” kɛkɛ ni amɛtee Ikoniom ( ŋmɛnɛŋmɛnɛ Konya), maŋ wulu ko ni yɔɔ Roma nɔyeli he ni ji Galatia lɛ. (Luka 9:5; 10:11) Ojogbaŋŋ, ni kaselɔi lɛ ni ashi amɛ yɛ Antiokia yɛ Pisidia lɛ hu? Akɛni aha amɛhe wa yɛ hemɔkɛyeli lɛ mli hewɔ lɛ, amɛ “yimɔ obɔbɔ kɛ miishɛɛ kɛ mumɔ krɔŋkrɔŋ.” Enɛ yeɔ ebuaa wɔ ni wɔnaa akɛ shitee kɛ woo nyɛŋ atsi mumɔŋ shweremɔ naa.
Shiŋŋ yɛ Hemɔkɛyeli lɛ Mli yɛ Yiwaa Fɛɛ Sɛɛ
8. Mɛni ba yɛ omanye ni amɛye yɛ shiɛmɔ mli yɛ Ikoniom lɛ hewɔ?
8 Paulo kɛ Barnaba fɛɛ jie amɛhe kpo akɛ amɛhe wa loo amɛyɛ shiŋŋ yɛ hemɔkɛyeli lɛ mli yɛ yiwaa fɛɛ sɛɛ. (14:1-7) Nɔ ni jɛ amɛshiɛmɔ yɛ Ikoniom kpeehe lɛ mli ba ji akɛ Yudafoi kɛ Helabii pii batsɔmɔ heyelilɔi. Beni Yudafoi ni heee yeee lɛ wo Jeŋmajiaŋbii lɛ ayiŋ koni amɛte shi amɛwo heyelilɔi heei lɛ, nitsulɔi enyɔ nɛɛ tsɔ Nyɔŋmɔ hewalɛ nɔ amɛkɛ ekaa shiɛ, ni etsɔɔ bɔ ni ekpɛlɛ amɛnɔ eha lɛ ejaakɛ eha amɛfee okadii kɛ naakpɛɛ nii pii. Enɛ ha asafo yuu lɛ amli gba enyɔ, fa yɛ Yudafoi lɛ asɛɛ ni fa hu yɛ bɔfoi (mɛi ni atsu amɛ) lɛ asɛɛ. Bɔfoi lɛ jeee feetɔi moŋ, shi beni amɛnu akɛ akpaŋ amɛyi nɔ akɛ abaatswia amɛ tɛi lɛ, amɛkɛ nilee shi jɛmɛ koni amɛyashiɛ yɛ Likaonia, Asia Bibioo lɛ niiaŋ gbɛ yɛ Galatia wuoyigbɛ. Kɛ wɔkɛ hiɛtɛɛ tsu nii lɛ, wɔ hu wɔbaanyɛ wɔfee ekaa ni wɔhi sɔɔmɔ lɛ mli yɛ shitee kɛ woo fɛɛ sɛɛ.—Mateo 10:23.
9, 10. (a) Mɛni Listrabii lɛ fee yɛ nuu obubuafo ko ni atsa lɛ lɛ hewɔ? (b) Te Paulo kɛ Barnaba fee amɛnii yɛ Listra amɛha tɛŋŋ?
9 Likaonia maŋ ni ji Listra hu nine shɛ odaseyeli lɛ nɔ. (14:8-18) Paulo tsa nuu obubuafo ko ni afɔ lɛ nakai lɛ yɛ jɛmɛ. Akɛni amɛleee akɛ Yehowa ji mɔ ni ha afee nɛkɛ naakpɛɛ nii nɛɛ hewɔ lɛ, asafoi lɛ bolɔ akɛ: “Nyɔŋmɔi lɛ etsɔmɔ amɛhe tamɔ gbɔmɛi kɛyimɔ shi kɛba wɔŋɔɔ!” Akɛni awie enɛ yɛ Likaonia wiemɔ mli hewɔ lɛ, Barnaba kɛ Paulo leee nɔ ni yaa nɔ. Akɛni Paulo tsɔ hiɛ yɛ wiemɔ mli hewɔ lɛ, gbɔmɛi lɛ susu akɛ lɛ ji Herme (nyɔŋmɔi lɛ atsulɔ ni naa tse lɛ) ni amɛsusu akɛ Barnaba ji Dio, Hela nyɔŋmɔ titri lɛ.
10 Dio osɔfo lɛ po kɛ tsinai kɛ nyanyarai ba koni akɛsha afɔle aha Paulo kɛ Barnaba. Ekolɛ akɛni amɛwie yɛ Hela ni gbɔmɛi foji lɛ nuɔ shishi lɛ mli aloo kɛtsɔ naajielɔ nɔ hewɔ lɛ, gbɔi lɛ kɛ oyaiyeli tsɔɔ mli akɛ amɛ hu amɛji gbɔmɛi ni hiɛ gbɔjɔmɔi tamɔ amɛ nɔŋŋ, ni akɛ amɛmiijaje sanekpakpa lɛ kɛmiiha amɛ koni gbɔmɛi atsi amɛhe kɛjɛ “nɛkɛ yakayaka nii nɛɛ ahe” (nyɔŋmɔi loo amagai ni wala bɛ mli lɛ) koni amɛba Nyɔŋmɔ hiɛkalɔ lɛ ŋɔɔ. (1 Maŋtsɛmɛi 16:13; Lala 115:3-9; 146:6) Hɛɛ, tsutsu lɛ Nyɔŋmɔ ŋmɛ jeŋmaji lɛ agbɛ (shi jeee Hebribii lɛ) koni amɛnyiɛ amɛ diɛŋtsɛ amɛgbɛi anɔ, eyɛ mli akɛ efɔ̃ɔɔ shihilɛ mli ni eyɔɔ lɛ kɛ ejurɔ ni efeɔ lɛ he odaseyeli, ejaakɛ ‘ehaa amɛ nugbɔnɛmɔ kɛ bei ni woɔ yibii ni ekɛ ŋmaa kɛ miishɛɛ wò amɛtsuiaŋ obɔ.’ (Lala 147:8) Yɛ susumɔi nɛɛ fɛɛ sɛɛ lɛ, etɔ Barnaba kɛ Paulo dani amɛnyɛ amɛtsi asafoi lɛ anaa koni amɛkasha afɔle ko amɛmiiha amɛ. Kɛlɛ, maŋsɛɛ sanekpakpa shiɛlɔi nɛɛ ekplɛɛɛ woo ko akɛ nyɔŋmɔi anɔ, ni asaŋ amɛkɛ hegbɛ ni tamɔ nɛkɛ tsuuu nii koni akɛto Kristojamɔ shishi yɛ nɛkɛ he nɛɛ. Eji nɔkwɛmɔ nɔ kpakpa, titri lɛ kɛji akɛ wɔmiishwɛ ni ajie wɔyi yɛ nɔ ni Yehowa eŋmɛ wɔ gbɛ ni wɔnyɛ wɔtsu yɛ esɔɔmɔ mli lɛ hewɔ lɛ!
11. Mɛni wɔbaanyɛ wɔkase kɛjɛ wiemɔ: “Esa akɛ wɔtsɔɔ amanehului pii amli kɛboteɔ Nyɔŋmɔ maŋtsɛyeli lɛ mli” lɛ mli?
11 Trukaa pɛ kɛkɛ ni yiwaa jie ehiɛ taŋtaŋ lɛ kpo. (14:19-28) Te eba lɛ tɛŋŋ? Akɛni Yudafoi ni jɛ Antiokia yɛ Pisidia kɛ Ikoniom lɛ tsirɛ asafoi lɛ ayisɛɛ hewɔ lɛ, amɛtswia Paulo tɛi, ni amɛgbala lɛ kɛtee maŋ lɛ sɛɛ amɛmiisusu akɛ egbo. (2 Korintobii 11:24, 25) Shi beni kaselɔi lɛ bɔle ehe kɛkpe lɛ, ete shi ni ebote Listra ni anaaa lɛ, ekolɛ etsɔ duŋ mli kɛtee. Enɔjetsɛremɔ lɛ, ekɛ Barnaba tee Derbe, he ni mɛi saŋŋ batsɔmɔ heyelilɔi yɛ. Beni maŋsɛɛ sanekpakpa shiɛlɔi lɛ ku amɛsɛɛ amɛyasara Listra, Ikoniom kɛ Antiokia ekoŋŋ lɛ, amɛwo kaselɔi lɛ hewalɛ, ni amɛwo amɛ ekaa ni amɛya nɔ amɛhi hemɔkɛyeli lɛ mli, ni amɛkɛɛ: “Esa akɛ wɔtsɔɔ amanehului pii amli kɛboteɔ Nyɔŋmɔ maŋtsɛyeli lɛ mli.” Akɛ Kristofoi lɛ, wɔ hu wɔmiikpa gbɛ akɛ wɔbaatsɔ amanehului amli, ni esaaa akɛ wɔjoɔ naa foi kɛtsɔ wɔhemɔkɛyeli ni wɔɔŋmɛɛ he ni wɔkɛsaa nɔ. (2 Timoteo 3:12) Ahala onukpai yɛ nakai be lɛ mli ato asafoi ni Paulo ŋma Galatabii awolo lɛ eyaha amɛ lɛ anɔ.
12. Beni Paulo klɛŋklɛŋ maŋsɛɛ sanekpakpa shiɛmɔ gbɛfaa lɛ ba naagbee lɛ, mɛni maŋsɛɛ sanekpakpa shiɛlɔi enyɔ lɛ fee?
12 Akɛni Paulo kɛ Barnaba tsɔ Pisidia hewɔ lɛ, amɛshiɛ wiemɔ lɛ yɛ Perge, Pamfilia maŋtiase titri lɛ mli. Yɛ be ni sa mli lɛ amɛku amɛsɛɛ kɛtee Antiokia ni yɔɔ Siria lɛ. Akɛni Paulo klɛŋklɛŋ gbɛfaa lɛ eba naagbee hewɔ lɛ, maŋsɛɛ sanekpakpa shiɛlɔi enyɔ lɛ bɔ asafo lɛ “nii ni Nyɔŋmɔ kɛ amɛ eyatsu lɛ fɛɛ, kɛ bɔ ni egbele hemɔkɛyeli shinaa eha jeŋmaji lɛ” he amaniɛ. Amɛkɛ kaselɔi ni yɔɔ Antiokia lɛ hi shi be kpalaŋŋ, ni ŋwanejee ko bɛ he akɛ enɛ ha amɛhe wa babaoo yɛ hemɔkɛyeli lɛ mli. Ŋmɛnɛ, nɔkwɛlɔi gbɛfalɔi asaramɔ naa mumɔŋ hewalɛ ni tamɔ nakai nɔŋŋ yɛ mɛi anɔ.
Ana Sanebimɔ Ko ni He Hiaa lɛ Naa
13. Kɛ anyɛŋ agbala Kristojamɔ mli afee lɛ Hebribii kɛ mɛi ni jeee Yudafoi akui lɛ, belɛ mɛni he hiaa?
13 Shiŋŋfeemɔ yɛ hemɔkɛyeli lɛ mli lɛ biɔ ekomefeemɔ yɛ jwɛŋmɔŋ. (1 Korintobii 1:10) Kɛji akɛ ehiŋ akɛ aaagbala Kristojamɔ mli afee lɛ Hebribii kɛ mɛi ni jeee Yudafoi akui lɛ, belɛ ehe miihia ni nɔyeli kuu lɛ akpɛ eyiŋ yɛ Jeŋmajiaŋbii babaoo ni baa Nyɔŋmɔ asafo lɛ mli lɛ ni aaaha amɛye Mose Mla lɛ nɔ ni afolɔ amɛ ketia lɛ he. (15:1-5) Hii komɛi ni jɛ Yudea efa gbɛ ketee Antiokia ni yɔɔ Siria lɛ ni amɛje shishi amɛmiitsɔɔ Jeŋmajiaŋbii heyelilɔi lɛ akɛ kɛ afolɔɔɔ amɛ ketia lɛ, anyɛŋ ahere amɛyiwala. (2 Mose 12:48) No hewɔ lɛ atsu Paulo kɛ Barnaba kɛ mɛi krokomɛi kɛtee bɔfoi lɛ kɛ onukpai lɛ aŋɔɔ yɛ Yerusalem. Yɛ jɛmɛ po lɛ, tsutsu Farisifoi ni amɛbatsɔmɔ heyelilɔi ni jwɛŋmɔ yɔɔ mla nɔ lolo lɛ ma nɔ mi akɛ esa akɛ afolɔ Jeŋmajiaŋbii lɛ aketia ni amɛye Mla lɛ nɔ.
14. (a) Eyɛ mli akɛ ŋwanejeei te shi yɛ Yerusalem kpee lɛ shishi moŋ, shi mɛɛ nɔkwɛmɔ nɔ kpakpa afee afɔ shi? (b) Mɛni ji Petro susumɔ ni ejie lɛ kpo yɛ nakai be lɛ mli lɛ mli agugu?
14 Afee kpee ko koni akɛ le nɔ ni ji Nyɔŋmɔ suɔmɔnaa nii. (15:6-11) Hɛɛ, ŋwanejeei pii tee nɔ, shi bei bɛ mli yɛ be mli ni hii ni heɔ nɔ ni amɛtsɔɔ lɛ amɛyeɔ waa lɛ tsɔɔ amɛjwɛŋmɔ lɛ—okadi kpakpa kɛha onukpai yɛ ŋmɛnɛ! Yɛ be ni sa mli lɛ, Petro kɛɛ: ‘Nyɔŋmɔ hala akɛ minaa Jeŋmajiaŋbii lɛ [tamɔ Kornelio] atsɔ anu sanekpakpa lɛ ni amɛhe amɛye. Ni eye enɛ he odase, kɛtsɔ mumɔ krɔŋkrɔŋ ni eŋɔha amɛ lɛ nɔ, ni ekɛ mligbalamɔ ko baaa wɔkɛ amɛ teŋ. [Bɔfoi lɛ Asaji 10:44-47] No hewɔ lɛ mɛni hewɔ nyɛkaa Nyɔŋmɔ ni nyɛkɛ kɔŋtso [gbɛnaa nii akɛ aye Mla lɛ nɔ] ni wɔ loo wɔtsɛmɛi lɛ nyɛɛɛ atere fɔɔ amɛkɔŋ nɔ? Shi wɔ [Yudafoi yɛ heloo naa lɛ] heɔ yeɔ akɛ Nuŋtsɔ Yesu Kristo duromɔ lɛ moŋ nɔ aaatsɔ ahere wɔkɛ amɛ fɛɛ yiwala.’ Nyɔŋmɔ ni kpɛlɛ Jeŋmajiaŋbii ni afolɔko amɛ ketia lɛ anɔ lɛ tsɔɔ akɛ ketiafoo kɛ Mla lɛ nɔyeli jeee taomɔ nii kɛha yiwalaheremɔ.—Galatabii 5:1.
15. Mɛɛ shishijee saji otii Yakobo kɛfɔ shi, ni ewo ŋaa akɛ aŋma mɛɛ wolo ayaha Jeŋmajiaŋbii Kristofoi lɛ?
15 Asafo lɛ fee dioo yɛ be mli ni Petro gbe naa lɛ, shi awie babaoo afata he. (15:12-21) Barnaba kɛ Paulo gba amɛ okadii ni Nyɔŋmɔ tsɔ amɛnɔ etsu yɛ Jeŋmajiaŋbii lɛ ateŋ lɛ he sane. Kɛkɛ ni sɛinɔtalɔ lɛ, ni ji Yesu nyɛ bi Yakobo kɛɛ: ‘Simeon [Petro Hebri gbɛi] egba bɔ ni Nyɔŋmɔ gbala ejwɛŋmɔ kɛtee jeŋmaji lɛ anɔ koni ehala amɛteŋ maŋ ko eha egbɛi.’ Yakobo tsɔɔ akɛ “David buu ni ekumɔ lɛ” ni aaasaa atswa ekoŋŋ ni agba afɔ shi lɛ (maŋtsɛyeli lɛ ni aaato ama David wekukpaa lɛ mli ekoŋŋ) lɛ miiba mli yɛ Yesu kaselɔi lɛ (Maŋtsɛyeli niyelɔi) ni abuaa amɛnaa kɛjɛɔ Yudafoi kɛ Jeŋmajiaŋbii fɛɛ ateŋ lɛ anɔ. (Amos 9:11, 12, Septuagint; Romabii 8:17) Akɛni Nyɔŋmɔ eto eyiŋ yɛ enɛ he hewɔ lɛ esa akɛ kaselɔi lɛ akpɛlɛ nɔ. Yakobo wo ŋaa koni awo Jeŋmajiaŋbii Kristofoi lɛ ŋaa akɛ amɛtsi amɛhe kɛjɛ (1) wɔji anii, (2) ajwamaŋbɔɔ, (3) kooloi ni ashɔtɔ kɛ la he. Nɛkɛ naatsii nibii nɛɛ yɛ Mose niŋmaai ni akaneɔ yɛ kpeehei lɛ yɛ daa Hejɔɔmɔ gbi nɔ lɛ mli.—1 Mose 9:3, 4; 12:15-17; 35:2, 4.
16. Mɛɛ saji otii etɛ klɛŋklɛŋ afii oha lɛ mli nɔyeli kuu lɛ wolo lɛ kɛha akɛ gbɛtsɔɔmɔ ni ka shi kɛbashi ŋmɛnɛ gbi nɛɛ?
16 Agbɛnɛ nɔyeli kuu lɛ tsu ni akɛ wolo ni aŋma ayaha Jeŋmajiaŋbii Kristofoi ni yɔɔ Antiokia, Siria, kɛ Kilikia lɛ. (15:22-35) Mumɔ krɔŋkrɔŋ lɛ kɛ mɛi ni ŋma wolo lɛ bi ni atsi he kɛjɛ nibii ni akɛsha afɔle aha amagai; la (ni mɛi komɛi nuɔ daa lɛ); kooloi ni ashɔtɔ ni afɔseee amɛla ashwieee shi (ni wɔŋjalɔi pii buɔ loo ni tamɔ nɛkɛ akɛ eŋɔɔ waa lɛ); kɛ ajwamaŋbɔɔ (Hela, por·neiʹa, ni tsɔɔ bɔlɛnamɔ yɛ Ŋmalɛ naa gbalashihilɛ lɛ sɛɛ ni mla eŋmɛɛɛ gbɛ lɛ ahe). Kɛ amɛtsi amɛhe kɛjɛ nibii nɛɛ ahe lɛ, amɛbaashwere yɛ mumɔŋ, taakɛ bɔ ni Yehowa Odasefoi feɔ bianɛ ejaakɛ amɛyeɔ “nii ni he hiaa nɛɛ nɔŋŋ” lɛ nɔ. Wiemɔi ni ji “Nyɛhia shi jogbaŋŋ” lɛ tamɔ ni aakɛɛ akɛ “Ahi aha nyɛ,” ni esaaa ni amuɔ naa akɛ etsɔɔ akɛ taomɔ nii nɛɛ kɔɔ gbɔmɔtsoŋ hewalɛnamɔ pɛ he. Beni akane wolo lɛ yɛ Antiokia lɛ, asafo lɛ na miishɛɛ yɛ hewalɛwoo ni akɛha amɛ lɛ hewɔ. Ni yɛ nakai be lɛ mli lɛ, eha Nyɔŋmɔ webii ni yɔɔ Antiokia lɛ he bawa ni amɛfee shiŋŋ yɛ hemɔkɛyeli lɛ mli kɛtsɔ Paulo, Sila, Barnaba kɛ mɛi krokomɛi lɛ ahewalɛwoo wiemɔi lɛ anɔ. Eba akɛ wɔ hu wɔɔtao gbɛi anɔ ni wɔɔtsɔ wɔwowoo wɔnanemɛi heyelilɔi lɛ hewalɛ ni wɔtswa amɛ wɔma shi.
Maŋsɛɛ Sanekpakpa Shiɛmɔ Gbɛfaa ni ji Enyɔ Je Shishi
17. (a) Mɛɛ naagba te shi beni ato yiŋ yɛ maŋsɛɛ sanekpakpa shiɛmɔ gbɛfaa ni ji enyɔ lɛ he lɛ? (b) Te Paulo kɛ Barnaba tsu amɛ bei lɛ he nii amɛha tɛŋŋ?
17 Naagba ko te shi yɛ be mli ni ato yiŋ yɛ maŋsɛɛ sanekpakpa shiɛmɔ gbɛfaa ni ji enyɔ lɛ he lɛ. (15:36-41) Paulo wo ŋaa akɛ lɛ kɛ Barnaba aku sɛɛ ayasara asafoi ni yɔɔ Kipro kɛ Asia Bibioo lɛ ekoŋŋ. Barnaba kpɛlɛ nɔ shi eesumɔ ni ekɛ enyɛmi bi Marko aya. Paulo ekpɛlɛɛɛ nɔ ejaakɛ Marko shi amɛ yɛ Pamfilia. Yɛ enɛ hewɔ lɛ, “efee bei aahu po.” Shi Paulo kɛ Barnaba fɛɛ kɛ sane lɛ eyafɔɔɔ onukpai lɛ loo nɔyeli kuu lɛ hiɛ koni amɛteŋ mɔ ko kɛbu ehe bem yɛ amɛteemɔŋ sane nɛɛ mli. Mɛɛ nɔkwɛmɔ nɔ kpakpa po enɛ ji nɛkɛ!
18. Mɛni jɛ mligbalamɔ ni ba Paulo kɛ Barnaba teŋ lɛ mli ba, ni mɛɛ gbɛ nɔ wɔɔtsɔ wɔna nɔ ni ba nɛɛ he sɛɛ yɛ?
18 Nɛkɛ bei nɛɛ kɛ mligbalamɔ ba. Shi Barnaba ŋɔ Marko efata ehe kɛtee Kipro. Paulo hu, ni Sila ebafee ehefatalɔ lɛ “tsɔ Siria kɛ Kilikia eyawo asafoi lɛ hewalɛ.” Ekolɛ weku tsakpaa ni yɔɔ amɛteŋ lɛ ji nɔ ni na Barnaba nɔ hewalɛ, shi kulɛ esa akɛ ekpɛlɛ bɔfo ni Paulo ji kɛ “dɛŋdade ni ahala” lɛ nɔ. (Bɔfoi lɛ Asaji 9:15) Ni wɔ hu? Esa akɛ nɔ ni ba nɛɛ ana wɔnɔ hewalɛ yɛ bɔ ni ehe hiaa ni wɔyoo teokrase hegbɛ ni wɔkɛ “tsulɔ anɔkwafo kɛ nilelɔ” lɛ afee ekome kwraa kɛmɔ shi lɛ mli!—Mateo 24:45-47.
Nɔyaa loo Shweremɔ yɛ Toiŋjɔlɛ Mli
19. Mɛɛ nɔkwɛmɔ nɔ kpakpa ŋmɛnɛŋmɛnɛ beaŋ obalaŋtai Kristofoi baanyɛ akase yɛ Timoteo he?
19 Aŋmɛɛɛ gbɛ koni nɛkɛ bei nɛɛ asa asafo lɛ toiŋjɔlɛ he. Nyɔŋmɔ webii lɛ tee nɔ amɛfee shiŋŋ ni amɛhe wa yɛ hemɔkɛyeli lɛ mli. (16:1-5) Paulo kɛ Sila tee Derbe kɛ Listra. Jɛmɛ Timoteo, Yudayoo heyelilɔ Eunike kɛ etsɛ Helanyo ni heee yeee lɛ binuu lɛ yɔɔ. Timoteo ji obalanyo fioo, ejaakɛ no sɛɛ afii 18 loo 20 lɛ, akɛɛ lɛ akɛ: “Kaaha mɔ ko miigbe ohe guɔ yɛ obalanyo ni oji lɛ hewɔ.” (1 Timoteo 4:12) Akɛni “nyɛmimɛi lɛ ni yɔɔ Listra lɛ kɛ Ikoniom [aaafee shitooi 18] lɛ taa ehe sanekpakpa hewɔ lɛ,” ale lɛ jogbaŋŋ yɛ esɔɔmɔ kpakpa lɛ kɛ Nyɔŋmɔ gbeyeishemɔ sui lɛ hewɔ. Esa akɛ obalaŋtai Kristofoi ni yɔɔ ŋmɛnɛ lɛ hu atao Yehowa yelikɛbuamɔ ni amɛna gbɛi kpakpa ni tamɔ nakai nɔŋŋ. Paulo fo Timoteo ketia ejaakɛ ekɛ lɛ baaya Yudafoi ni le Timoteo tsɛ akɛ Jeŋmaŋnyo lɛ ashiai kɛ kpeehei, ni bɔfo lɛ sumɔɔɔ ni nɔ ko atsi lɛ Yudafoi hii kɛ yei ni esa akɛ amɛkase Mesia lɛ he sane lɛ aŋɔɔ ni eeeya lɛ he gbɛ. Yehowa Odasefoi ni yɔɔ ŋmɛnɛ lɛ hu kɛ Biblia mli shishitoo mlai ni amɛkuuu mli feɔ bɔ ni amɛaanyɛ koni amɛha gbɔmɛi sɔrɔtoi fɛɛ akpɛlɛ sanekpakpa lɛ nɔ.—1 Korintobii 9:19-23.
20. Mɛni jɛ klɛŋklɛŋ afii oha lɛ mli nɔyeli kuu lɛ wolo lɛ ni aye nɔ lɛ mli ba, ni te osusuɔ akɛ esa akɛ enɛ asa wɔhe aha tɛŋŋ?
20 Akɛni Timoteo ebatsɔ tamɔ amɛsɔɔlɔ hewɔ lɛ, Paulo kɛ Sila kɛ nɔyeli kuu lɛ akpɔi kɛ kitai lɛ ha kaselɔi lɛ koni amɛye nɔ. Ni mɛni jɛ mli ba? Yɛ be mli ni eka shi faŋŋ akɛ Siria, Kilikia, kɛ Galatia he ewieɔ lɛ, Luka ŋma akɛ: “Agbɛnɛ asafoi lɛ na hewalɛ yɛ hemɔkɛyeli mli, ni amɛyi faa daa nɛɛ.” Hɛɛ, nɔ ni jɛ nɔyeli kuu lɛ wolo lɛ ni amɛye nɔ lɛ mli ba ji ekomefeemɔ kɛ mumɔŋ nɔyaa kɛ shweremɔ. Mɛɛ nɔkwɛmɔ nɔ kpakpa po enɛ ji kɛha wɔ jaramɔ bei nɛɛ nɛkɛ, yɛ be mli ni ehe hiaa ni Yehowa webii ahi shi akɛ mɛi ni amɛfee ekome ni yɔɔ shiŋŋ loo amɛhe wa yɛ hemɔkɛyeli lɛ mli lɛ!
Te Obaaha Hetoo Oha Tɛŋŋ?
◻ Te Paulo kɛ Barnaba fee amɛnii yɛ yiwaa shishi amɛha tɛŋŋ?
◻ Mɛni abaanyɛ akase kɛjɛ wiemɔ: “Esa akɛ wɔtsɔɔ amanehului pii amli kɛboteɔ Nyɔŋmɔ maŋtsɛyeli lɛ mli” lɛ mli?
◻ Mɛɛ ŋaawoo wɔnaa kɛjɛɔ saji otii etɛ ni yɔɔ wolo ni klɛŋklɛŋ afii oha lɛ mli nɔyeli kuu lɛ kɛmaje lɛ mli?
◻ Yɛ mɛɛ gbɛ nɔ nibii ni ha klɛŋklɛŋ afii oha lɛ mli Yehowa odasefoi lɛ ahe wa yɛ hemɔkɛyeli lɛ mli Iɛ kɔɔ wɔ hu wɔhe ŋmɛnɛ?