Yitso 121

Yɛ Sanhedrin lɛ Hiɛ, No Sɛɛ lɛ Pilato Ŋɔɔ

JE miitsɛre. Petro ekwa Yesu nɔ ni ji shii etɛ nɔ, ni Sanhedrin lɛ mlibii lɛ egbe kojomɔ ni amɛkɛye ehe fɛo lɛ naa ni amɛgbala amɛmli. Shi kɛlɛ, amɛbua amɛhe naa ekoŋŋ yɛ Sohaa leebi beni je bɔi tsɛremɔ lɛ, shi yɛ enɛ mli lɛ amɛbua amɛhe naa yɛ amɛ Sanhedrin asa lɛ nɔ. Ekolɛ yiŋtoo ni amɛkɛfee enɛ ji ni amɛha kojomɔ ni amɛkojo yɛ nyɔɔŋ lɛ mli lɛ afee tamɔ nɔ ni mla fiɔ sɛɛ. Beni akɛ Yesu ba amɛhiɛ lɛ, amɛkɛɛ lɛ, taakɛ amɛkɛɛ yɛ nyɔɔŋ teŋ lɛ akɛ: “Kɛ bo ji Kristo lɛ, kɛɛmɔ wɔ.”

Yesu ha amɛ hetoo akɛ: “Kɛji mikɛɛ nyɛ lɛ, nyɛheŋ nyɛyeŋ; ni kɛ sane ko mibi hu, nyɛhaŋ mi hetoo.” Shi kɛlɛ, Yesu kɛ ekaa tsɔɔ mɔ ni eji, ni ekɛɛ: “Shi kɛjɛ be nɛɛ kɛyaa nɛɛ, gbɔmɔ Bi lɛ aaata Nyɔŋmɔ hewalɛ lɛ ninejurɔ nɔ.”

No hewɔ lɛ amɛ fɛɛ amɛmiitao amɛle, ni amɛbi lɛ akɛ: “Belɛ bo ji Nyɔŋmɔ Bi lɛ?”

Ni Yesu ha amɛ hetoo akɛ: “Nyɛ diɛŋtsɛ nyɛmiikɛɛ akɛ mi ni.”

Nɛkɛ hetoo nɛɛ fa kɛha hii nɛɛ ni ekpɛ amɛyiŋ akɛ amɛaagbe gbɔmɔ lɛ. Amɛbu enɛ akɛ musubɔɔ wiemɔ. Amɛbibii amɛhe akɛ: “Mɛni wɔsaa wɔtaoɔ odase wɔfee dɔŋŋ? Ejaakɛ wɔ diɛŋtsɛ wɔnu yɛ enaa.” No hewɔ lɛ amɛfimɔ Yesu, ni amɛkpala lɛ kɛtee, ni amɛkɛ lɛ yaha Roma amralo Pontio Pilato.

Yuda, Yesu sɛɛgbɛtsɔɔlɔ lɛ miikwɛ nɔ ni yaa nɔ lɛ fɛɛ. Beni ena akɛ abu Yesu fɔ lɛ, edɔ lɛ waa diɛŋtsɛ. No hewɔ lɛ etee osɔfonukpai lɛ kɛ maŋ onukpai lɛ aŋɔɔ koni ekɛ jwiɛtɛi kukuji 30 lɛ aku sɛɛ ayaha amɛ, ni etsɔɔ mli akɛ: “Mifee esha akɛ mitsɔɔ lá ni efɔŋ ko bɛ ehe lɛ sɛɛ gbɛ.”

Shi amɛkɛ yitsoŋwalɛ here lɛ nɔ akɛ: “No jeee wɔhe sane ko; bo diɛŋtsɛ kwɛmɔ nɔ!” No hewɔ lɛ Yuda shɛrɛ jwiɛtɛi kukuji lɛ eshwie sɔlemɔ we lɛ ni eshi jɛmɛ etee akɛ eyaaka akɛ eeesɛŋ ehe. Shi, etamɔ nɔ ni tso nine ni Yuda kɛ kpaa lɛ fi lɛ ku, ni etse ni ebatswa tɛsaai ni yɔɔ shishigbɛ lɛ anɔ, ni emli gba enyɔ yɛ jɛmɛ.

Osɔfonukpai lɛ leee nɔ pɔtɛɛ ni amɛkɛ jwiɛtɛi kukuji lɛ baafee. Amɛmu naa akɛ: “Ejaaa akɛ aŋɔwoɔ sɔlemɔ we lɛ nitoo he lɛ mli; ejaakɛ lá hemɔ nii ni.” No hewɔ lɛ, beni amɛtee ajina sɛɛ lɛ, amɛkɛ shika lɛ yahe gbɛshɔ̃lɔ lɛ abɔɔ lɛ, koni afu gbɔi yɛ jɛmɛ. No hewɔ lɛ abale nakai abɔɔ lɛ akɛ “La Abɔɔ.”

Eka he eji leebi maŋkpa lolo yɛ be mli ni akɛ Yesu tee amralo lɛ shia lɛ. Shi Yudafoi ni fata ehe kɛtee lɛ kpoo akɛ amɛaabote shia lɛ mli ejaakɛ amɛheɔ amɛyeɔ akɛ kɛ amɛkɛ Jeŋmajiaŋbii bɔ gbagbalii nɛkɛ lɛ, eeebule amɛ. No hewɔ lɛ, Pilato je kpo eba amɛŋɔɔ koni efee bɔ ni amɛtaoɔ lɛ. Ebi amɛ akɛ: “Mɛɛ naafolɔmɔ nyɛkɛbaa yɛ nuu nɛɛ he.”

Ni amɛha lɛ hetoo akɛ: “Jeee efɔŋfeelɔ ji lɛ jikulɛ, wɔkɛ lɛ ebahaaao.”

Akɛni Pilato miisumɔ ni ejie ehe kɛjɛ mli hewɔ lɛ, ehere amɛ nɔ akɛ: “Nyɛŋɔa lɛ, ni nyɛ diɛŋtsɛ nyɛyakojoa lɛ yɛ nyɛmla lɛ naa.”

Ni Yudafoi lɛ jie amɛyiŋtoo akɛ amɛbaagbe lɛ lɛ kpo, ni amɛkɛɛ: “Wɔ lɛ wɔbɛ hegbɛ akɛ wɔgbeɔ mɔ ko.” Yɛ anɔkwale mli lɛ, akɛni mɛi pii buɔ Yesu waa hewɔ lɛ, kɛji amɛgbe Yesu yɛ Hehoo Gbijurɔyeli be lɛ mli lɛ, ekolɛ eeewo maŋ lɛŋ hirihiri. Shi kɛji amɛaanyɛ amɛha Romabii lɛ agbe lɛ yɛ maŋkwramɔŋ naafolɔmɔ ko hewɔ lɛ, no lɛ enɛ baaha amɛye amɛhe yɛ ehe gbɛnaa nii ni aaaka amɛnɔ yɛ maŋbii lɛ ahiɛ lɛ mli.

No hewɔ lɛ agbɛnɛ jamɔ mli hiɛnyiɛlɔi lɛ kɛ naafolɔmɔi heei kwraa shwie Yesu nɔ, ni amɛtsiii kojomɔ ni amɛkojo lɛ kɛtsɔ hiɛ ni amɛbu lɛ fɔ akɛ ebɔ musu lɛ ta kwraa. Amɛfolɔ enaa sɔrɔtoi etɛ amɛkɛɛ: “Wɔna nuu nɛɛ [1] ni eewo maŋ lɛ yiŋ ni [2] eegu oniatsumɔ kɛ Kaisare hamɔ, ni [3] ekɛɔ akɛ lɛ diɛŋtsɛ ji Kristo, maŋtsɛ lɛ.”

Naafolɔmɔ ni amɛkɛfɔ enɔ akɛ Yesu kɛɔ akɛ maŋtsɛ ji lɛ lɛ ji nɔ ni kɔɔ Pilato he. No hewɔ lɛ, ebote eshia lɛ ekoŋŋ, ni etsɛ Yesu kɛba, ni ebi lɛ akɛ: “Ani bo ji Yudafoi amaŋtsɛ lɛ?” Yɛ wiemɔ kroko mli lɛ, ani oku mla lɛ mli kɛtsɔ tsɛmɔ ni otsɛɔ ohe akɛ maŋtsɛ lɛ nɔ ni okɛmiite shi oowo Kaisare?

Yesu miitao ni ele nibii ni Pilato etsɔ hiɛ enu momo yɛ ehe, no hewɔ lɛ ebi lɛ akɛ: “Bo diɛŋtsɛ oyiŋ otoɔ owieɔ enɛ nɛɛ, aloo mɛi krokomɛi gbao nakai yɛ mihe?”

Ni Pilato tsɔɔ akɛ eleee nɔ ko nɔ ko yɛ ehe ni akɛ eeshwe ni ele anɔkwalei lɛ. Ehere lɛ nɔ akɛ: “Ani Yudanyo ji mi? Bo diɛŋtsɛ omaŋbii kɛ osɔfonukpai lɛ ŋɔo ha mi. Mɛni ofee?”

Yesu ebɔɔɔ mɔdɛŋ akɛ eeejo sane, ni kɔɔ maŋtsɛ ni eji lɛ he lɛ naa foi yɛ gbɛ ko gbɛ ko nɔ. Ŋwanejee ko kwraa bɛ he akɛ hetoo ni Yesu kɛha agbɛnɛ lɛ ha Pilato naa kpɛ ehe. Luka 22:66–23:3; Mateo 27:1-11; Marko 15:1; Yohane 18:28-35; Bɔfoi lɛ Asaji 1:16-20.

▪ Mɛɛ yiŋtoo hewɔ ni Sanhedrin lɛ naa bakpe shi ekoŋŋ yɛ leebi mli lɛ?

▪ Mɛɛ gbɛ nɔ Yuda tsɔ egbo, ni mɛni akɛ jwiɛtɛi kukuji 30 lɛ fee?

▪ Mɛni hewɔ ni Yudafoi lɛ taoɔ ni Romabii lɛ agbe Yesu, moŋ fe ni amɛ diɛŋtsɛ amɛaagbe lɛ lɛ?

▪ Mɛɛ naafolɔmɔi Yudafoi lɛ kɛshi Yesu?