Yehowa Wiemɔ Yeɔ Kunim!
‘Nɔ hewalɛ ni Nuŋtsɔ Yehowa wiemɔ lɛ na ni ekɛda ni ekɛye kunim nɛ.’—BƆFOI LƐ ASAJI 19:20
1. Mɛni abaakase yɛ Biblia mli wolo ni ji Bɔfoi lɛ Asaji lɛ mli?
YEHOWA miigbele gbɛ ni kɛ mɔ yaa nitsumɔ mli. Ni Paulo titri, ni ji “jeŋmaji abɔfo” lɛ baanyiɛ nakai nitsumɔ lɛ hiɛ. (Romabii 11:13) Yɛ anɔkwale mli lɛ, Bɔfoi lɛ Asaji lɛ ni wɔɔya nɔ wɔkase lɛ baaha wɔna lɛ ni ekɛ ehe ewo maŋsɛɛ sanekpakpa shiɛmɔ he gbɛfaai ni yɔɔ miishɛɛ mli.—Bɔfoi 16:6–19:41.
2. (a) Mɛɛ gbɛ nɔ Paulo tsɔ ni esɔmɔ akɛ niŋmalɔ ni mumɔ tsirɛɔ lɛ kɛjɛ aaafee afi 50 Ŋ.B. kɛbashi 56 Ŋ.B.? (b) Mɛni ba beni Nyɔŋmɔ jɔɔ Paulo kɛ mɛi krokomɛi lɛ asɔɔmɔ nitsumɔ nɔ lɛ?
2 Paulo hu ji niŋmalɔ ni mumɔ tsirɛɔ lɛ. Woji ni eŋmala aaafee afi 50 Ŋ.B. kɛyashi 56 Ŋ.B. lɛ mli lɛ ji 1 kɛ 2 Tesalonikabii ni eŋma kɛjɛ Korinto, Galatabii ni eŋma kɛjɛ nakai maŋtiase lɛ mli loo kɛjɛ Antiokia ni yɔɔ Siria lɛ, eŋma 1 Korintobii kɛjɛ Efeso, 2 Korintobii kɛjɛ Makedonia, kɛ Romabii kɛjɛ Korinto. Ni akɛni Nyɔŋmɔ jɔɔ Paulo kɛ mɛi krokomɛi lɛ asɔɔmɔ nitsumɔ lɛ nɔ hewɔ lɛ, “nɔ hewalɛ ni Nuŋtsɔ [Yehowa] wiemɔ lɛ na ni ekɛda ni eye kunim nɛ.”—Bɔfoi lɛ Asaji 19:20.
Kɛjɛ Asia Kɛmiiya Europa
3. Paulo kɛ enanemɛi lɛ to okadi kpakpa yɛ mumɔ krɔŋkrɔŋ lɛ kudɔmɔ shishi yɛ mɛɛ gbɛ nɔ?
3 Paulo kɛ enanemɛi lɛ to okadi kpakpa yɛ mumɔ krɔŋkrɔŋ lɛ gbɛtsɔɔmɔ ni amɛkpɛlɛ nɔ lɛ mli. (16:6-10) Ekolɛ mumɔ lɛ tsɔ kpojiemɔi ni anuɔ, lamɔi loo ninaai anɔ etsi amɛ gbɛ koni amɛkashiɛ yɛ Asia kpokpai wuji lɛ anɔ kɛ Bitinia niiaŋ, he ni sanekpakpa lɛ yashɛ yɛ sɛɛ mli lɛ. (Bɔfoi lɛ Asaji 18:18-21; 1 Petro 1:1, 2) Mɛni hewɔ mumɔ lɛ tsi shishijee nitsumɔ nɛɛ gbɛ lɛ? Nitsulɔi lɛ faaa, ni mumɔ lɛ miikudɔ amɛ kɛmiiya hei ni yɔɔ Europa ni baawo yibii babaoo. No hewɔ lɛ ŋmɛnɛ, kɛ atsi shikpɔŋkuku ko mli nitsumɔ naa lɛ, Yehowa Odasefoi shiɛɔ yɛ he kroko, kɛ nɔmimaa akɛ Nyɔŋmɔ mumɔ lɛ baanyiɛ amɛhiɛ kɛya mɛi ni tamɔ gwantɛŋi lɛ aŋɔɔ.
4. Te Paulo here Makedonia nuu lɛ tsɛmɔ kɛha yelikɛbuamɔ yɛ ninaa mli lɛ nɔ eha tɛŋŋ?
4 No hewɔ lɛ Paulo kɛ ehefatalɔi lɛ ‘ho Misia’ akɛ maŋsɛɛ sanekpakpa shiɛmɔ shikpɔŋ ni yɔɔ Asia Bibioo lɛ ‘he.’ Shi Paulo na nuu Makedonianyo ko yɛ ninaa mli ni eekpa fai akɛ abaye abua amɛ. No hewɔ lɛ maŋsɛɛ sanekpakpa shiɛlɔi lɛ tee Makedonia, shikpɔŋ ko ni yɔɔ Balkan Ŋshɔnine lɛ niiaŋ lɛ mli oya. Nakai nɔŋŋ hu ŋmɛnɛ, mumɔ lɛ kudɔɔ Odasefoi pii koni amɛsɔmɔ yɛ he ni Maŋtsɛyeli shiɛlɔi babaoo he hiaa yɛ lɛ.
5. (a) Mɛni hewɔ abaanyɛ akɛɛ akɛ Yehowa wiemɔ lɛ ye kunim yɛ Filipi lɛ? (b) Ŋmɛnɛŋmɛnɛ beaŋ Odasefoi pii tamɔ Lidia yɛ mɛɛ gbɛ nɔ?
5 Yehowa wiemɔ lɛ ye kunim yɛ Makedonia. (16:11-15) Yudafoi fioo ko pɛ yɔɔ Filipi, shihemɔ he ko ni Romabii titri yɔɔ jɛmɛ lɛ ni amɛbɛ kpee he hu. No hewɔ lɛ nyɛmimɛi lɛ tee “he ni afɔɔ sɔlemɔ yɛ lɛ,” ni yɔɔ maŋ lɛ sɛɛ faa ko naa lɛ. Mɛi ni amɛna amɛ yɛ jɛmɛ ji Lidia, eka shi faŋŋ akɛ eji mɔ ni etsake kɛba Yudafoi ajamɔ mli ni jɛ Tiatira, maŋ ko ni yɔɔ Asia Bibioo lɛ ni amɛ nitsumɔ titri ji mamai ni awoɔ amɛ tsofa lɛ mli. Yoo nɛɛ hɔɔ koojaŋ kɛ mamai sɔrɔtoi. Beni abaptisi Lidia kɛ eshiabii lɛ sɛɛ lɛ, ekɛ hiɛdɔɔ kpa gbɔfeemɔ mli eha amɛ aahu akɛ Luka ŋma akɛ: “Ekpawɔ fai koni wɔba.” Wɔmiida nyɛmimɛi yei ni ŋmɛnɛ amɛtamɔ nakai lɛ ashi.
Gboklɛfoi Anɔkwɛlɔ Batsɔ Heyelilɔ
6. Te fee tɛŋŋ ni daimonio nifeemɔ ha awo Paulo kɛ Sila tsuŋ yɛ Filipi lɛ?
6 Satan mli baanyɛ awo la waa yɛ mumɔŋ nɔyaa ni yaa nɔ yɛ Filipi lɛ hewɔ, ejaakɛ daimonioi anitsumɔ ni yaa nɔ yɛ jɛmɛ lɛ ha awo Paulo kɛ Sila tsuŋ. (16:16-24) Gbekɛyoo ko ni “klamɔ mumɔ yɔɔ emli” (yɛ wiemɔ faŋŋ mli lɛ, “jeŋ mumɔ”) nyiɛ amɛsɛɛ gbii pii. Ekolɛ daimonio lɛ etsɔ ehe Pythian Apollo, nyɔŋmɔ ko ni akɛɛ egbe onufu ko ni atsɛɔ lɛ pyʹthon (jeŋ) lɛ. Gbekɛyoo lɛ haa enuŋtsɔmɛi lɛ naa nii babaoo kɛtsɔɔ nɛkɛ mumɔi atsɛmɔ nifeemɔ nɛɛ nɔ. Ekolɛ ekɛɔ okwaafoi lɛ be mli ni esa akɛ amɛdu nii, obalayei lɛ, be mli ni esa akɛ amɛbote gbalashihilɛ mli, kɛ mɛi ni tsaa shi amɛtao shika hu lɛ, he ni esa akɛ amɛtao shika lɛ yɛ! Etee nɔ enyiɛ nyɛmimɛi lɛ asɛɛ ni eebolɔ akɛ: “Nɛkɛ gbɔmɛi nɛɛ, Nyɔŋmɔ ni yɔɔ ŋwɛi shɔŋŋ lɛ tsuji ji amɛ, ni amɛmiijaje walaheremɔ gbɛ lɛ amɛmiitsɔɔ nyɛ.” Daimonio lɛ baanyɛ eha ekɛɛ nakai koni no aha mɛi lɛ ale akɛ nɔ ni egbaa lɛ jɛ ŋwɛi, shi daimonioi bɛ hegbɛ akɛ amɛjajeɔ sane ko ni kɔɔ Yehowa kɛ egbɛjianɔtoo kɛha yiwalaheremɔ he. Beni ehaomɔ lɛ je Paulo tsine lɛ, ekɛ Yesu gbɛi fa daimonio lɛ kɛjɛ emli. Akɛni amɛnitsumɔ lɛ efite hewɔ lɛ, gbekɛyoo lɛ nuŋtsɔmɛi lɛ gbala Paulo kɛ Sila kɛtee jara lɛ nɔ, ni amɛkɛ tsei yi amɛ. (2 Korintobii 11:25) Awo amɛ tsuŋ ni abɔ amɛnaji apa. Abaanyɛ akudɔ apa nɛɛ koni elɛɛ amɛnaji amli bɔ ni eeewa amɛhe babaoo diɛŋtsɛ.
7. Paulo kɛ Sila tsuŋwoo yɛ Filipi lɛ tsɔ jɔɔmɔ kɛha namɛi ni yɛ mɛɛ gbɛ nɔ?
7 Nɛkɛ tsuŋwoo nɛɛ tsɔ jɔɔmɔ kɛha gboklɛfoi anɔkwɛlɔ lɛ kɛ eweku. (16:25-40) Paulo kɛ Sila miisɔle ni amɛmiila kɛmiijie Nyɔŋmɔ yi nyɔɔŋteŋ, akɛni amɛle akɛ ekɛ amɛ yɛ lɛ hewɔ. (Lala 42:9) Trukaa ni shikpɔŋ hoso ni shinaai lɛ fɛɛ gbelegbelei ni amɛgbokɛlɛi lɛ fɛnefɛnei kɛjɛ tsei lɛ kɛ gbogboi lɛ ahe. Gboklɛfoi anɔkwɛlɔ lɛ she gbeyei akɛ abaagbe lɛ akɛni egboklɛfoi lɛ ejo foi lɛ hewɔ. Beni eheɔ egbe ehe lɛ pɛ kɛkɛ ni Paulo tsɛ lɛ akɛ: “Kaafee ohe efɔŋ ko, shi wɔ fɛɛ wɔyɛ biɛ.” Gboklɛfoi anɔkwɛlɔ lɛ kɛ Paulo kɛ Sila je kpo ni ebi bɔ ni eeefee ni ahere eyiwala. Hetoo lɛ ji: “Hemɔ Nuŋtsɔ Yesu Kristo lɛ nɔ oye.” Beni amɛnu Yehowa wiemɔ lɛ fɛɛ lɛ, “abaptisi lɛ kɛ ewe lɛ bii lɛ fɛɛ amrɔ nɔŋŋ.” Mɛɛ miishɛɛ po enɛ kɛba nɛkɛ!
8. Mɛɛ nifeemɔ Filipi maŋ kojolɔi lɛ kɛ amɛhe wo mli, ni mɛni baaba kɛ amɛkpɛlɛ amɛtɔmɔ lɛ nɔ yɛ faŋŋ mli?
8 Enɔ jetsɛremɔ lɛ, maŋ lɛ mli kojolɔi lɛ kɛ wiemɔ ha akɛ aŋmɛɛ Paulo kɛ Sila he. Shi Paulo kɛɛ: ‘Wɔ mɛi ni ji Romabii lɛ, amɛyi wɔ ni amɛbuuu wɔ fɔ, ni amɛwo wɔ tsuŋ hu. Agbɛnɛ ani amɛmiiŋmɛɛ wɔhe nigii lo? Ha amɛ diɛŋtsɛ amɛba ni amɛbaŋmɛɛ wɔhe.’ Kɛ kojolɔi lɛ kpɛlɛ nɔ yɛ maŋ lɛ hiɛ akɛ amɛtɔ lɛ, amɛnyɛŋ amɛyi Kristofoi komɛi loo ni amɛaawo amɛ tsuŋ dɔŋŋ. Akɛni amɛnyɛɛɛ amɛshwie Roma maŋbii hewɔ lɛ, kojolɔi lɛ diɛŋtsɛ ba ni amɛbi ni nyɛmimɛi lɛ aya, shi amɛfee nakai yɛ be mli ni amɛwo amɛnanemɛi heyelilɔi lɛ ahewalɛ lɛ sɛɛ. Nyɛmimɛi ahedɔɔ ni tamɔ nɛkɛ tsirɛɔ Nɔyeli Kuu lɛ mlibii lɛ kɛ amɛnajiaŋdamɔlɔi gbɛfalɔi krokomɛi ni amɛyaa ni amɛyasaraa Nyɔŋmɔ webii ni yɔɔ shikpɔŋ lɛ nɔ he fɛɛ lɛ koni amɛwo amɛ hewalɛ.
Yehowa Wiemɔ lɛ Ye Kunim yɛ Tesalonika kɛ Beroia
9. Mɛɛ gbɛ, ni Yehowa Odasefoi kɛtsuɔ nii lolo ŋmɛnɛ, Paulo ‘kɛtsɔɔ sane mli ni ekɛye odase’ akɛ esa akɛ Mesia lɛ ana amanehulu ni atee lɛ shi kɛjɛ gbohii ateŋ?
9 No sɛɛ lɛ Nyɔŋmɔ wiemɔ lɛ ye kunim yɛ Tesalonika, Makedonia maŋtiase kɛ ŋshɔnaa maŋ titri lɛ mli. (17:1-9) Paulo kɛ Yudafoi lɛ gba wiemɔ lɛ he sane ni “egbele naa etsɔɔ amɛ faŋŋ” akɛ esa akɛ Mesia lɛ ana amanehulu ni atee lɛ shi kɛjɛ gbohii ateŋ da. (Paulo fee nakai kɛtsɔ gbalɛi kɛ amɛmlibaa ni ekɛto he etsɔɔ amɛ taakɛ Yehowa Odasefoi feɔ lɛ nɔ.) No hewɔ lɛ Yudafoi komɛi kɛ mɛi ni amɛtsake kɛba Yuda jamɔ mli kɛ mɛi krokomɛi he ye. Beni Yudafoi komɛi ni nii feɔ amɛ taŋ lɛ bua asafo yuu ko naa ni amɛmiitao Paulo kɛ Sila ni amɛnaaa amɛ lɛ, amɛgbala Yason kɛ nyɛmimɛi lɛ ateŋ mɛi komɛi kɛtee maŋ lɛ mli onukpai lɛ ahiɛ ni amɛfolɔ amɛnaa akɛ maŋjwalɔi ji amɛ, apasa naafolɔmɔ ni aka he akɛmiifolɔ Yehowa webii anaa ŋmɛnɛ. Shi aŋmɛɛ nyɛmimɛi lɛ ahe yɛ be mli ni “amɛhe sɛɛdaamɔ nii” pii kɛjɛ amɛdɛŋ lɛ.
10. Mɛɛ shishinumɔ naa Yudafoi ni yɔɔ Beroia lɛ ‘kɛkpaa Ŋmalɛi lɛ amli’ lɛ?
10 No sɛɛ lɛ Paulo kɛ Sila tee Beroia maŋtiase lɛ mli. (17:10-15) Yudafoi ni yɔɔ jɛmɛ lɛ ‘kpaa Ŋmalɛi lɛ amli amɛkwɛɔ’ taakɛ Yehowa Odasefoi woɔ mɛi ahewalɛ ni amɛfee ŋmɛnɛ lɛ. Nakai Beroiabii lɛ ayiŋ efeee amɛ kɔshikɔshi yɛ Paulo sane lɛ he, shi amɛpɛi sane lɛ mli amɛkwɛ akɛ Yesu ji Mesia lɛ lo. Mɛni jɛ mli ba? Yudafoi kɛ Helabii pii (ekolɛ mɛi ni amɛtsake kɛba Yuda jamɔ mli) batsɔmɔ heyelilɔi. Beni Yudafoi ni jɛ Tesalonika lɛ bawo maŋ lɛ mli hirihiri lɛ, nyɛmimɛi lɛ yajie Paulo gbɛ yɛ ŋshɔnaa, he ni mɛi ni kɛ lɛ faa gbɛ lɛ ateŋ mɛi komɛi etara lɛlɛ mli momo kɛmiiya Piraeus (ŋmɛnɛŋmɛnɛ beaŋ Piraiévs), ni ji Ateene ŋshɔnaa maŋ ko mli lɛ.
Yehowa Wiemɔ Ye Kunim yɛ Ateene
11. (a) Te Paulo ye odase yɛ ekaa naa yɛ Ateene eha tɛŋŋ, shi namɛi kɛ lɛ je ŋwane lɛ? (b) Mɛni mɛi komɛi tsɔɔ beni amɛwie Paulo he akɛ “naafuutsɛ” lɛ?
11 Akɛ ekaa ye odase yɛ Ateene. (17:16-21) Yɛ Paulo shiɛmɔ ni kɔɔ Yesu kɛ gbohiiashitee lɛ he lɛ hewɔ lɛ, jeŋ nilelɔi komɛi kɛ lɛ je ŋwane babaoo. Amɛteŋ mɛi komɛi ji Epikuromɛi ni maa miishɛjemɔ nɔ mi lɛ. Mɛi krokomɛi hu ji Stoamɛi, ni maa he-tsɔsemɔ nɔ mi lɛ. Amɛteŋ mɛi komɛi bi akɛ: ‘Mɛni naafuutsɛ nɛɛ baakɛɛ po?’ Amɛkɛ wiemɔ, “naafuutsɛ,” (yɛ wiemɔ faŋŋ mli lɛ, “mɔ ni kɛ enaabu halaa nii”) nɛɛ miitsɔɔ akɛ Paulo tamɔ loofɔlɔ ni halaa nilee bibii ni tamɔ dumɔwui kɛkɛ lɛ ekɛ enilee bibii lɛ miiha shi ebɛ nilee loo sanesɛɛkɔmɔ ko. Mɛi krokomɛi hu kɛɛ: “Etamɔ mɔ ni jajeɔ maŋsɛɛ wɔji ahe sane etsɔɔ.” Hiɛdɔɔ yɛ sane nɛɛ mli, ejaakɛ agbe Sokrate yɛ nɛkɛ naafolɔmɔ nɛɛ hewɔ. Etsɛɛɛ ni akɛ Paulo tee Areopago (Mars Ŋmeŋme) he ni kojomɔ he wulu lɛ ekpe yɛ faŋŋ yɛ Akropoli lɛ masɛi lɛ.
12. (a) Mɛɛ wiemɔi amli sui kpakpai jeɔ kpo yɛ Paulo wiemɔ ni ekɛha yɛ Areopago lɛ mli? (b) Mɛɛ saji otii Paulo kɛmamɔ shi yɛ Nyɔŋmɔ he, ni mɛni jɛ mli ba?
12 Wiemɔ ni Paulo kɛha yɛ Areopago lɛ ji hiɛkpamɔ wiemɔ fɛfɛo ni nɔ bɛ, jwɛŋmɔ yɛ mli, kɛ emli naataomɔi ni tsɔɔ mɔ yiŋ—wiemɔ sui kpakpai ni atsɔɔ yɛ Yehowa Odasefoi a-Teokrase Sɔɔmɔ Skul lɛ mli lɛ eko. (17:22-34) Ekɛɛ akɛ Ateenebii lɛ sumɔɔ nyɔŋmɔjamɔ pii fe mɛi krokomɛi. Ejaakɛ amɛyɛ afɔleshaa latɛ po kɛha “Nyɔŋmɔ ni Aleko Lɛ lɛ,” ekolɛ koni akaku hiɛ ashwie nyɔŋmɔ ko nɔ! Paulo wie Bɔlɔ lɛ ni “la kome eŋɔfee gbɔmɛi adesai fɛɛ” ni “yinɔi ni eto lɛ kɛ amɛshihilɛ hei lɛ ahusui lɛ ekpɛ mli eto momo,” tamɔ be mli ni abaabule Kanaanbii lɛ ashishi nɛkɛ lɛ he. (1 Mose 15:13-21; Daniel 2:21; 7:12) Abaanyɛ ana nɛkɛ Nyɔŋmɔ nɛɛ, ejaakɛ “lɛ nɔŋŋ eshwiei ji wɔ hu,” ni Paulo kɛ enɛ miitsɔɔ akɛ Yehowa ji mɔ ni bɔ gbɔmɔ, ni eetsɛ wiemɔ hu kɛmiijɛ amɛ lalafolɔi, Aratus kɛ Cleanthes wiemɔi amli. Akɛ Nyɔŋmɔ shwiei ji wɔ lɛ, esaaa akɛ wɔsusuɔ akɛ Bɔlɔ ni yeɔ emuu lɛ tamɔ amaga ni gbɔmɔ ni yeee emuu kɛ eniji fee. Be ko lɛ Nyɔŋmɔ ku ehiɛ eshwie nilee ni bɛ nɛɛ nɔ, shi agbɛnɛ eekɛɛ adesai fɛɛ akɛ amɛtsake amɛtsui, ejaakɛ eto gbiko ni ebaatsɔ Mɔ ni Ehala lɛ lɛ nɔ ekojo gbɔmɛi. Akɛni Paulo “miijaje Yesu he sanekpakpa” lɛ hewɔ lɛ, etoibolɔi lɛ le akɛ Kristo ji mɔ ni baafee nakai Kojolɔ lɛ. (Bɔfoi lɛ Asaji 17:18; Yohane 5:22, 30) Tsuitsakemɔ he sane lɛ gba Epikuromɛi lɛ anaa, ni Hela jeŋ nilelɔi lɛ baanyɛ akpɛlɛ wiemɔi ni kɔɔ shihilɛ ni gbele bɛ mli nɔ, shi jeee gbele kɛ gbohiiashitee. Eka shi faŋŋ akɛ taakɛ bɔ ni mɛi pii kuɔ amɛhiɛ amɛshwieɔ sanekpakpa lɛ nɔ ŋmɛnɛ lɛ, mɛi komɛi kɛɛ: ‘Wɔbaabo bo toi yɛ be kroko mli.’ Shi kojolɔ Dionisio kɛ mɛi krokomɛi batsɔmɔ heyelilɔi.
Nyɔŋmɔ Wiemɔ lɛ Ye Kunim yɛ Korinto
13. Mɛɛ gbɛ nɔ Paulo tsɔɔ eyeɔ ebuaa lɛ diɛŋtsɛ ehe yɛ heloo naa yɛ sɔɔmɔ nitsumɔ lɛ mli, ni mɛɛ ŋmɛnɛŋmɛnɛ beaŋ nɔkwɛmɔ nɔ wɔyɔɔ?
13 Paulo tsa nɔ kɛtee Korinto, Akaia niiaŋ maŋtiase lɛ mli. (18:1-11) Eyana Akwila kɛ Priskila ni amɛba jɛmɛ ejaakɛ Kaisare Klaudio efa akɛ Yudafoi ni jee Romabii lɛ fɛɛ ashi Roma. Bɔni afee ni enyɛ ekwɛ ehe yɛ sɔɔmɔ nitsumɔ lɛ mli lɛ, Paulo kɛ nɛkɛ Kristofoi hefatalɔi nɛɛ fee buui. (1 Korintobii 16:19; 2 Korintobii 11:9) Too he tsɔi loo ehe wolo ni akɛfee mama ni wa ni aafo loo aakpɛ lɛ ji nitsumɔ ni wa. Nakai nɔŋŋ hu Yehowa Odasefoi taoɔ amɛheloo gbɛfaŋ nibii kɛtsɔɔ heloo naa nitsumɔ nɔ, shi amɛ nitsumɔ krɛdɛɛ ji sɔɔmɔ nitsumɔ lɛ.
14. (a) Akɛni Yudafoi ni yɔɔ Korinto lɛ miite shi kɛmiiwo Paulo waa hewɔ lɛ, mɛni Paulo fee? (b) Mɛɛ gbɛ nɔ atsɔ ama nɔ mi aha Paulo akɛ ehi Korinto, shi mɛɛ gbɛ nɔ atsɔɔ akudɔɔ Yehowa webii ŋmɛnɛ?
14 Korinto Yudafoi lɛ tee nɔ amɛwie musubɔɔ wiemɔi yɛ be mli ni Paulo yaa nɔ eshiɛɔ akɛ Yesu ji Mesia lɛ. No hewɔ lɛ ekpokpo etadei amli eshwie amɛnɔ akɛ amɛhe gbɛnaa nii ko kaaa enɔ dɔŋŋ, kɛkɛ ni amɛje shishi amɛbɔi kpeei afeemɔ yɛ Titio Yusto, ni eka shi faŋŋ akɛ eji Romanyo lɛ shia. Mɛi pii (ni eka shi faŋŋ akɛ tsutsu kpee he lɛ nɔkwɛlɔ, Krispo kɛ eshiabii fata he) batsɔmɔ heyelilɔi ni abaptisi amɛ. Kɛji akɛ Yudafoi lɛ anaagba lɛ aaaha Paulo yiŋ afee lɛ kɔshikɔshi yɛ Korinto ni eeeya nɔ ehi lɛ he lɛ, enɛ laaje yɛ be mli ni Nuŋtsɔ lɛ kɛɛ lɛ yɛ ninaa mli akɛ: ‘Kaashe gbeyei. Yaa nɔ oshiɛ, ejaakɛ mikɛo yɛ ni mɔ ko efeŋ bo efɔŋ ko. Miyɛ mɛi pii yɛ nɛkɛ maŋ nɛɛ mli’ lɛ. No hewɔ lɛ Paulo tee nɔ etsɔɔ Nyɔŋmɔ wiemɔ lɛ yɛ jɛmɛ afi kɛ nyɔji ekpaa sɔŋŋ. Eyɛ mli akɛ Yehowa webii anine shɛɛɛ ninaai anɔ ŋmɛnɛ moŋ, shi sɔlemɔ kɛ mumɔ krɔŋkrɔŋ lɛ gbɛtsɔɔmɔ fɛɛ yeɔ ebuaa amɛ ni amɛkpɛɔ amɛyiŋ yɛ nilee mli bɔ ni aaasa Maŋtsɛyeli lɛ he nibii ahe yɛ gbɛ kpakpa nɔ.
15. Mɛni ba beni akɛ Paulo tee Amralo Galio hiɛ lɛ?
15 Yudafoi lɛ gbala Paulo kɛtee Amralo Junio Galio hiɛ. (18:12-17) Amɛmiitsɔɔ akɛ Paulo miitsake mɛi bɔ ni mla eŋmɛɛɛ gbɛ—apasa naafolɔmɔ ni ŋmɛnɛ Hela maŋ lɛ mli osɔfoi kɛfolɔɔ Yehowa Odasefoi anaa lɛ. Galio le akɛ Paulo yeee fɔ ni akɛ Roma maŋ lɛ hilɛ kɛ emla jeee nɔ ko ni kɔɔ Yudafoi lɛ ahe, no hewɔ eshwie amɛ kɛjɛ ehiɛ. Beni mɛi ni kwɛɔ nɔ ni yaa nɔ lɛ yi Sostene ni ji kpeehe lɛ onukpa lɛ, Galio kɛ ehe wooo sane lɛ mli, ekolɛ esusumɔ ji, mɔ ni nyiɛ hiɛ ni akɛte shi awo Paulo lɛ miina etoigbalamɔ ni sa lɛ.
16. Mɛni hewɔ Paulo kpɛlɛ nɔ akɛ aku eyiteŋ tsɔi kuku yɛ shiwoo ko naa lɛ?
16 Paulo ta lɛlɛ mli kɛjɛ Aegean ŋshɔnaa maŋ ni ji Kenkrea mli kɛtee Efeso, maŋ ko ni yɔɔ Asia Bibioo lɛ. (18:18-22) Dani eeefa nakai gbɛ lɛ, ‘eku eyitsɔi kuku ejaakɛ ewo shi.’ Awieee akɛ Paulo wo shi dani ebatsɔ Yesu sɛɛnyiɛlɔ aloo enɛ ji eshiwoo be lɛ shishijee loo enaagbee. Kristofoi bɛ Mla lɛ shishi, shi Nyɔŋmɔ ji mɔ ni kɛha, ni eyɛ krɔŋkrɔŋ, ni nɔsha ko bɛ nɛkɛ shiwoo nɛɛ he. (Romabii 6:14; 7:6, 12; Galatabii 5:18) Paulo kɛ Yudafoi lɛ susu ŋmalɛi lɛ ahe yɛ Efeso ni ewo amɛ shi akɛ, kɛ Nyɔŋmɔ aaasumɔ lɛ, ebaaku esɛɛ eba amɛŋɔɔ ekoŋŋ. (Nakai shiwoo lɛ ba mli yɛ sɛɛ mli.) Esɛɛ ni eku kɛtee Antiokia ni yɔɔ Siria lɛ kɛ emaŋsɛɛ sanekpakpa shiɛmɔ gbɛfaa ni ji enyɔ lɛ ba naagbee.
Yehowa Wiemɔ lɛ Ye Kunim yɛ Efeso
17. Yɛ baptisimɔ he lɛ, mɛɛ nitsɔɔmɔ he hiaa Apolo kɛ mɛi krokomɛi?
17 Etsɛɛɛ ni Paulo je emaŋsɛɛ sanekpakpa shiɛmɔ gbɛfaa ni ji etɛ lɛ shishi (aaafee afi 52-56 Ŋ.B.). (18:23–19:7) Beni enɛ yaa nɔ lɛ, Apolo shiɛ Yesu he sane yɛ Efeso, shi Yohane baptisimɔ ni ji tsuitsakemɔ yɛ esha ni afee ashi Mla kpaŋmɔ lɛ he okadi lɛ pɛ ele. Priskila kɛ Akwila “tsɔɔ lɛ Nyɔŋmɔ gbɛ lɛ fitsofitso,” ni eka shi faŋŋ akɛ amɛtsɔɔ lɛ akɛ ni aaabaptisi mɔ ko tamɔ afee Yesu lɛ tsɔɔ akɛ esa akɛ mɔ lɛ ana nu mli baptisimɔ koni enine ashɛ mumɔ krɔŋkrɔŋ ni afɔse ashwie shi lɛ nɔ. Beni mumɔ krɔŋkrɔŋ lɛ baptisimɔ ba yɛ Pentekoste yɛ afi 33 Ŋ.B. sɛɛ lɛ, agbɛnɛ ehe ebahia ni aku sɛɛ abaptisi mɔ fɛɛ mɔ ni akɛ Yohane baptisimɔ lɛ ebaptisi lɛlɛ ekoŋŋ yɛ Yesu gbɛi amli. (Mateo 3:11, 16; Bɔfoi lɛ Asaji 2:38) Yɛ sɛɛ mli yɛ Efeso lɛ, abaptisi Yudafoi hii 12 ni akɛ Yohane baptisimɔ lɛ ebaptisi amɛ lɛ “awo Nuŋtsɔ Yesu gbɛi amli,” ni enɛ pɛ ji baptisimɔ ni akusɛɛ afee ekoŋŋ ni aŋma afɔ shi yɛ Ŋmalɛi lɛ amli. Beni Paulo kɛ eniji shwie amɛnɔ lɛ, amɛnine shɛ mumɔ krɔŋkrɔŋ lɛ nɔ kɛ naakpɛɛ nibii enyɔ ni tsɔɔ ŋwɛi nɔkpɛlɛmɔ—lilɛii sɔrɔtoi awiemɔ kɛ gbalɛ.
18. Nɛgbɛ Paulo shiɛ yɛ, be mli ni eyɔɔ Efeso lɛ, ni mɛni jɛ mli ba?
18 Paulo naaa deka kwraa yɛ Efeso maŋ ni gbɔmɛi aaafee 300,000 yɔɔ mli lɛ mli. (19:8-10) E-nyɔŋmɔyoo Atemi gbatsu lɛ ji blema je lɛ naakpɛɛ nibii kpawo lɛ ateŋ ekome, ni mɛi aaafee 25,000 baanyɛ atara shi yɛ eshwɛmɔ he lɛ. Paulo kɛ ‘yiŋtsɔmɔ’ tsu nii yɛ kpee he lɛ ni ekɛ naataomɔ ni tsɔɔ mɔ yiŋ shiɛ, shi eshi jɛmɛ beni mɛi komɛi wie Gbɛ Lɛ, ni ji shihilɛ gbɛ ni damɔ Kristo mli hemɔkɛyeli nɔ lɛ he efɔŋ lɛ. Paulo kɛ afii enyɔ wie daa gbi yɛ Tirano nikasemɔ he lɛ, ni “wiemɔ lɛ” gbɛ eshwa Asia niiaŋ fɛɛ.
19. Mɛni tee nɔ yɛ Efeso ni ha ‘Yehowa wiemɔ lɛ tee nɔ eda ni eye kunim’ yɛ jɛmɛ?
19 Nyɔŋmɔ tsɔɔ akɛ ekpɛlɛɔ Paulo nitsumɔ lɛ nɔ, ejaakɛ eha enyɛ etsa helai ni efamɔ daimonioi. (19:11-20) Shi osɔfonukpa Skeva bihii kpawo lɛ nyɛɛɛ afa daimonio ko kɛtsɔ Yesu gbɛi kɛ nitsumɔ nɔ ejaakɛ amɛdamɔɔɔ Nyɔŋmɔ kɛ Yesu najiaŋ. Ejaakɛ nuu ni daimonio lɛ yɔɔ emli lɛ yi amɛ ni epila amɛ po! Enɛ ha gbɔmɛi she gbeyei, “ni awo Nuŋtsɔ Yesu gbɛi lɛ hiɛ nyam naakpa.” Mɛi pii ni batsɔmɔ heyelilɔi lɛ kpoo amɛ ŋkunyaayeli nifeemɔi lɛ fɛɛ ni amɛsha amɛwoji lɛ ni eka shi faŋŋ akɛ ŋkunyaayeli wiemɔi kɛ ashwai afeemɔ nibii yɔɔ mli lɛ fɛɛ. Luka ŋma akɛ: “Nɔ hewalɛ ni Nuŋtsɔ lɛ wiemɔ lɛ na ni ekɛda ni ekɛye kunim nɛ.” Ŋmɛnɛ hu Nyɔŋmɔ tsuji yeɔ buaa koni gbɔmɛi aye amɛhe kɛjɛ daimonioi ahewalɛ shishi.—5 Mose 18:10-12.
Mɛi Ahe Tsui ni Anaaa yɛ Jamɔ Mli Yeee Omanye
20. Mɛni hewɔ Efeso jwiɛtɛi ŋaalɔi lɛ wo maŋ lɛ mli hirihiri lɛ, ni te eba naagbee eha tɛŋŋ?
20 Yehowa Odasefoi kɛ gbɔmɛi asafoi yuu ni feɔ gidigidi ekpe shii abɔ, ni nakai eba Kristofoi lɛ anɔ yɛ Efeso. (19:21-41) Beni heyelilɔi lɛ ayi bafa lɛ, Demetrio kɛ jwiɛtɛi ŋaalɔi krokomɛi naaa shika dɔŋŋ, ejaakɛ gbɔmɛi fioo ko pɛ heɔ Artemi fɔmɔ nyɔŋmɔyoo kɛ efufɔ pii lɛ gbatsui ni akɛ jwiɛtɛi ekpa he lɛ. Demetrio ha sakasaka-feemɔ ba maŋ lɛ mli, kɛkɛ ni gbɔmɛi lɛ gbala Paulo nanemɛi ni ji Gaio kɛ Aristarko kɛtee amɛnikwɛmɔ he lɛ, shi kaselɔi lɛ eŋmɛɛɛ gbɛ ni Paulo abote mli. Onukpai ni kwɛɔ gbijurɔyelii lɛ kɛ shwɛmɔi lɛ anɔ lɛ po kpa lɛ fai akɛ ekɛ ehe akawo oshara ni tamɔ nakai mli. Gbɔmɛi asafo babaoo lɛ bolɔ aaafee ŋmlɛtswai enyɔ sɔŋŋ akɛ: “Efesobii Artemi lɛ kekenam ni!” Yɛ naagbee lɛ, maŋ lɛ woloŋmalɔ lɛ (ni ji mɔ ni kwɛɔ maŋ lɛ nɔ lɛ) kɛɛ jwiɛtɛi ŋaalɔi lɛ akɛ amɛkɛ sane lɛ ayafɔ amralo lɛ hiɛ, koni ekojo sane lɛ, aloo kɛ jeee nakai lɛ, “akuashɔŋ lɛ hu yɛ ni baanyɛ aye yɛ mla naa” aha amɛ. Kɛ jeee nakai lɛ, Roma baanyɛ afolɔ maŋ onukpai lɛ anaa akɛ amɛha maŋ lɛ efee hoo. Kɛkɛ ni ekɛ nakai kɛɛmɔ jie asafo lɛ gbɛ kɛtee.
21. Nyɔŋmɔ jɔɔ Paulo nitsumɔ lɛ nɔ yɛ mɛɛ gbɛ nɔ, ni mɛɛ gbɛ nɔ etsɔɔ ejɔɔ Yehowa Odasefoi anitsumɔ lɛ nɔ ŋmɛnɛ yɛ?
21 Nyɔŋmɔ ye bua Paulo ni enyɛ edamɔ kaai pii anaa ni ejɔɔ mɔdɛŋ ni ebɔ koni eye ebua gbɔmɛi ni amɛkpoo jamɔ mli tɔmɔi ni amɛkpɛlɛ anɔkwale lɛ nɔ lɛ nɔ. (Okɛto Yeremia 1:9, 10 he.) Kwɛ bɔ ni wɔdaa shi hu akɛ wɔŋwɛi Tsɛ lɛ jɔɔ wɔnitsumɔi anɔ nakai nɔŋŋ! No hewɔ lɛ agbɛnɛ, taakɛ eji yɛ klɛŋklɛŋ afii oha lɛ mli lɛ, ‘Yehowa wiemɔ lɛ miida ni eeye kunim.’
Te Obaaha Hetoo Oha Tɛŋŋ?
◻ Mɛɛ nɔkwɛmɔ nɔ Paulo kɛha yɛ mumɔ krɔŋkrɔŋ lɛ kudɔmɔ he?
◻ Mɛɛ gbɛ, ni Yehowa Odasefoi kɛtsuɔ nii ŋmɛnɛ, Paulo tsɔ nɔ ‘ekɛtsɔɔ sane mli ni ekɛye odase”?
◻ Mɛni yɔɔ ni je amɛhe yɛ bɔ ni ahere Paulo shiɛmɔ yɛ Areopago Iɛ nɔ aha lɛ kɛ Yehowa Odasefoi ashiɛmɔ Iɛ nɔkpɛlɛmɔ mli?
◻ Mɛɛ gbɛ Paulo tsɔ nɔ ekɛye ebua Iɛ diɛŋtsɛ ehe yɛ sɔɔmɔ Iɛ mli, ni mɛɛ ŋmɛnɛŋmɛnɛ beaŋ nɔkwɛmɔ nɔ wɔyɔɔ?
◻ Nyɔŋmɔ ejɔɔ Paulo nitsumɔ Iɛ kɛ Yehowa Odasefoi anɔ Iɛ nɔ ŋmɛnɛ yɛ mɛɛ gbɛ nɔ?