Agora lɛ Blema Ateene Teŋgbɛ Tuuntu

GIDIGIDIFEEMƆ yɛ woloŋlelɔi akuu ni yɔɔ Ateene lɛ teŋ! Afɔɔ susumɔi heei ahe adafitswaa yɛ nakai Hela maŋtiase agora, loo jarayelihe lɛ mli. Ni kɛlɛ, nɛkɛ be nɛɛ yɛ srɔto. Etamɔ nɔ ni nuu ko ni ji Yudanyo ni ba maŋtiase lɛ mli etsɛko lɛ ji “mɔ ni jajeɔ maŋsɛɛ wɔji ahe sane etsɔɔ.” Eekɛɛ “mɛi ni kɛ lɛ kpeɔ” lɛ saji ni sa kadimɔ. Epikuromɛi ni woɔ amɛhe nɔ lɛ kɛ Stoamɛi ni mli efu bi akɛ: “Mɛni naafuutsɛ nɛɛ bakɛɛ po?” Hɛɛ, Ateene agora lɛ ji he ni mɛi taa saji fɛɛ ni yɔɔ hulu shishi nɛɛ naa yɛ. Shi ni aaawie nyɔŋmɔi ni aleee lɛ ahe lɛ—dabi, enɛ baafee nɔ ni eteke nɔ tsɔ!—Bɔfoi lɛ Asaji 17:17, 18.

Nakai ji bɔ ni Ateenebii lɛ kɛ yiŋkɔshikɔshi fee amɛnii amɛha beni bɔfo Paulo bɔi shiɛmɔ klɛŋklɛŋ kwraa yɛ agora ni yɔɔ Ateene lɛ mli. Eewie Yesu Kristo kɛ gbohiiashitee lɛ he. Shi kɛha Ateenebii ni taakɛ amɛnifeemɔ ji lɛ, etamɔ nɔ ni amɛsumɔɔ ni amɛbo nɔ fɛɛ nɔ toi lɛ, mɛni ji nɔ ni yɔɔ srɔto kwraa yɛ nilee hee kroko nɛɛ ni aaajie lɛ kpo yɛ agora lɛ mli lɛ he?

Ateene Ná Emaŋ Gwabɔɔhe

Nɔ diɛŋtsɛ ni yɔɔ srɔto kwraa lɛ ji agora lɛ diɛŋtsɛ kɛ nɔ wulu ni enyɛ etsu yɛ Ateenebii ajamɔ kɛ maŋbii lɛ ashihilɛ mli lɛ he. Agora ni yɔɔ Ateene lɛ ji jɔɔ fioo ni lɛɛmɔ shɛɔ aaafee hɛktai 60, ni eyɛ Acropolis lɛ kooyi-anaigbɛ. Etamɔ nɔ ni mra be mli yɛ afii ohai ekpaa D.Ŋ.B. lɛ mli, beni Ateene maŋnɔyelɔ kɛ mlafeelɔ Solon yɔɔ shihilɛ mli lɛ, ahala nɛkɛ shikpɔŋ bibioo nɛɛ akɛ he ni akɛbaafee maŋtiase lɛ maŋ gwabɔɔhe. Maŋbii anɔyeli ni ato shishi yɛ Ateene, kɛ emli maŋbii lɛ ashihilɛ nɔyaa ni ama nɔ mi lɛ ha aje tsumaa nitsumɔ shishi trukaa yɛ mra beaŋ afii lɛ amli yɛ afii oha ni nyiɛ sɛɛ lɛ mli. Enɛ kɛ shihilɛ hee bawo agora lɛ mli, kɛ nitsumɔi babaoo ni ekaaa ni ebaatsu.

Hela wiemɔ ni ji a·go·raʹ lɛ na eshishifã kɛjɛ feemɔ wiemɔ ni shishi ji “abua he naa, akpe” lɛ mli. Enɛ saa agora lɛ ni akɛtsu nii akɛ kpeehe diɛŋtsɛ kɛha maŋtiase lɛ he. Agora lɛ bafee he ni maŋbii lɛ ashihilɛ mli nifeemɔi yaa nɔ waa yɛ titri. Eji maŋ lɛŋ nɔyelihe kɛ saneyelihe, he ni ayeɔ jara ni atsuɔ nii yɛ, he ni ajieɔ hiɛtserɛ yɛ Hela shwɛmɔi amli yɛ, he ni akɛ kpɔiaŋgbɔlemɔ jieɔ mɛi ahiɛtserɛ yɛ, kɛ kpeehe ni asumɔɔ ni woloŋlelɔi susuɔ saji ahe yɛ.

Ani obaasumɔ ni oyakpa shi ni okwɛ agora ni yɔɔ Ateene lɛ mli sɔlemɔtsui, ablanaa, amagai, kaimɔ tɛi, kɛ maŋ lɛŋ tsũi lɛ amli nɔ ni eshwɛ lɛ? Beni wɔbɔɔ mɔdɛŋ ni wɔpɛi agora lɛ blema shihilɛ lɛ mli lɛ, nyɛhaa wɔshia hoofeemɔ kɛ gidigidifeemɔ ni yɔɔ ŋmɛnɛŋmɛnɛ beaŋ maŋtiase lɛŋ, ni wɔyi mli kɛtsɔ nane gbɛ̀i kɛ enɔ ŋmilitsa lɛ anɔ, yɛ marmaratɛi ni efite kɛjwere shi lɛ ateaŋ, yɛ tɛi ni akpɛ lɛ ateaŋ, kɛ agbói ni efufulu ni jwɛi ni etsa kusuu yɛ nɔ lɛ ateaŋ.

Sɔlemɔtsui, Gbatsui, kɛ Nyɔŋmɔi Sɛɛfilɔi

Saralɔi anaa kpɛɔ amɛhe yɛ sɔlemɔtsui, gbatsui, kɛ he krɔŋkrɔŋi babaoo ni atuu aha nyɔŋmɔi srɔtoi lɛ hewɔ. Enɛɛmɛi fɛɛ haa anaa agora lɛ akɛ jamɔhe wulu ko, ni baa gbɛhe ni ji enyɔ yɛ Acropolis lɛ sɛɛ. Yɛ Ateenebii awoloŋlee he Yinɔ Kpakpa lɛ mli lɛ, jamɔ babote maŋbii lɛ ashihilɛ mli nɔ fɛɛ nɔ mli. Enɛ tsɔɔ diɛŋtsɛ akɛ akɛ sɔlemɔtsu lɛ mli hei krɔŋkrɔŋi komɛi ha nakai nyɔŋmɔi srɔtoi ni ahala akɛ nɔyeli nitsumɔi kɛ nɔyeli gbɛjianɔtoi “anyɔŋmɔ sɛɛfilɔi” lɛ yɛ agora lɛ mli.

Tsũi nɛɛ ateŋ nɔ ni ale jogbaŋŋ ji Hephaestus Sɔlemɔtsu lɛ. Akɛ nyɔŋmɔyoo Athena fataa Hephaestus he. No mli lɛ ajáa nɛkɛ nyɔŋmɔi enyɔ nɛɛ yɛ biɛ akɛ nitɛŋmɔi kɛ ŋaa nitsumɔi anyɔŋmɔi sɛɛfilɔi. Shitsaa mli nibii ni ana ni tsɔɔ akɛ atsu dade he nitsumɔi kɛ kukwɛifeemɔ he nitsumɔ yɛ nɛkɛ sɔlemɔtsu nɛɛ masɛi lɛ yɛ kɛha Hephaestus, ni ji Hela nitɛŋmɔi anyɔŋmɔ lɛ ni miitsɛ ni akɛ la atsu nii. Ekolɛ yɛ afii ohai kpawo Ŋ.B. lɛ, atsake nɛkɛ sɔlemɔtsu ni abaa yi jogbaŋŋ nɛɛ afee lɛ Greek Orthodox Church of St. George, eyɛ mli akɛ akɛtsuuu nii nakai ŋmɛnɛ.

Eji anɔkwale akɛ, ehe miihia ni agora lɛ diɛŋtsɛ aná nyɔŋmɔ ni baafi esɛɛ. Mɔ nɛ ji Zeus Agoraios, ni asusuɔ akɛ ekanyaa naatselɛ, lɛ ji mɔ ni atuu afɔleshaalatɛ fɛfɛo ko ni akpɛ kɛjɛ Pentelic tɛ mli lɛ aha. (Okɛto Bɔfoi lɛ Asaji 14:11, 12 he.) Anaa ni ato kakalɔi lɛ ahe kaimɔ tɛi ni sa kadimɔ lɛ naa sɛrɛnɛɛ kɛbɔle Nyɔŋmɔi lɛ Anyɛ lɛ afɔleshaalatɛ ni bɛŋkɛ jɛmɛ lɛ he.

Kɛ wɔtee hiɛ fioo lɛ, wɔnaa Ioniabii asɔlemɔtsu bibioo ko. Shikpɔŋ he nilelɔ Pausanias tsɔɔ akɛ eji Apollo, ni ji Tsɛ lɛ Sɔlemɔtsu. Mɛni hewɔ? Ejaakɛ taakɛ Hela blema adesã tsɔɔ lɛ, eji Ion tsɛ, ni ji Ioniabii aweku ni Ateenebii feɔ efã lɛ shishitolɔ.a Enɛ hewɔ lɛ, Apollo ji maŋ lɛ kwramɔ he gbɛjianɔtoo nyɔŋmɔ sɛɛfilɔi lɛ ateŋ mɔ kome, titri lɛ, yɛ nɔ ni kɔɔ nyɛmifeemɔi ni yɔɔ nakai maŋtiase lɛŋ lɛ he.

Kɛ wɔyi kooyigbɛ nɔŋŋ lɛ, wɔnaa sɔlemɔtsu bibioo ko ni ama yɛ afii ohai ejwɛ D.Ŋ.B. teŋgbɛ lɛ mli tɛi ni eshwɛ. Ajáa Zeus kɛ Athena Phatrios, ni ji blema jamɔi anyɛmifeemɔi anyɔŋmɔi wuji yɛ biɛ. Kɛ hoo lɛ, ebiɔ ni mɔ ko afee Ateenenyo dani ebaanyɛ efata nɛkɛ nyɛmifeemɔi nɛɛ he. Kɛ wɔfo gbɛ lɛ mli lɛ, wɔnaa Nyɔŋmɔi Nyɔŋma-kɛ-Enyɔ lɛ afɔleshaalatɛ ni eshwɛ lɛ.

Aku sɛɛ awo Hela nyɔŋmɔ onukpa lɛ hiɛ nyam ekoŋŋ yɛ Stoabii a-Zeus Eleutherios Agba ni bɛŋkɛ jɛmɛ lɛ mli, ni nɛkɛ be nɛɛ mli lɛ ákɛ heyeli kɛ kpɔmɔ nyɔŋmɔ. Nɛkɛ akulashiŋi loo agba nɛɛ ji shisharamɔhe loo kpeehe ko ni ale waa. Awie akɛ Socrates ni ji jeŋ nilelɔ kpanaa lɛ kɛ enanemɛi lɛ bakpe yɛ agba nɛɛ shishi, he ni amɛnyɛɔ amɛtaraa ni amɛgbaa sane loo amɛsharaa shi yɛ lɛ. Nibii ni ajɔɔ nɔ aha kɛ nibii ni akɛsaa agba nɛɛ, tamɔ tsɛŋi ni tatsɛmɛi ni gboi yɛ be mli ni amɛnɔɔ kɛfaa Ateene he lɛ kɛ maŋtiase lɛ kpɔmɔ kɛmiijɛ amɛhenyɛlɔi adɛŋ loo amɛheyeli lɛ yibaamɔ lɛ yɛ tsakpaa tɛɛ.

Panathenaea Gbɛ Lɛ

Kɛ wɔtsɔ agora koji lɛ amli lɛ, wɔnaa gbɛ lɛkɛtɛɛ kɛ enɔ ŋmilitsa ni atsɛɔ lɛ Panathenaea Gbɛ lɛ. Ana egbɛi kɛ esui ni ekaaa lɛ kɛjɛ Ateene maŋ gbi jurɔ ni ji Panathenaea lɛ mli. Yɛ nɛkɛ gbi jurɔ nɛɛ mli lɛ, atereɔ nyɔŋmɔyoo Athena hiɛhaa nɔ̃ lɛ kɛnyiɛɔ gbɛ nɛɛ nɔ kɛjɛɔ Nyiɛmɔ-kɛ-Shifoo Shia (ni bɛŋkɛ maŋtiase lɛ agbo lɛ he lɛ) kɛyaa Acropolis lɛ. Parthenon he nibii ni atɛŋ kɛbɔle he lɛ yeɔ ebuaa wɔ ni wɔnaa gbi jurɔ nifeemɔ lɛ nyam kɛ agbojee—okpɔŋɔ nɔtaralɔi lɛ, shwiilii ni hiɛ foi lɛ, tsinai kɛ tooi ni akɛshãa afɔlei lɛ, obalahii kɛ obalayei ni tere nibii ni akɛtsuɔ nii yɛ afɔleshaa lɛ mli lɛ. Mɛi ni kwɛ nifeemɔ lɛ ji Ateenebii kɛ amɛgbɔi lɛ, ni ji mɛi ahewɔ ni tsumalɔi lɛ shi gbɛ agbo ko eha amɛ beni amɛfeɔ agora lɛ tsumaa he mfoniri lɛ. Ákɛ nɔkwɛmɔnɔ lɛ, ato ablanaa kɛ amɛhiɛgbɛ atrakpoi lɛ he gbɛjianɔ fɛfɛo bɔ ni boteɔ gbɛ ni afoɔ shi kɛbajeɔ nɔ lɛ mli. Nikwɛlɔi babaoo baanyɛ aya atrakpoi babaoo ni akpɛ kɛbote tsũi lɛ amli lɛ anɔ.

“Emli Eyi Obɔ Kɛ Amagai Sɔŋŋ”

Akɛni sɔlemɔtsui, amagai, kɛ saŋi babaoo yɔɔ jɛmɛ hewɔ lɛ, ebɛ naakpɛɛ akɛ bɔfo Paulo ‘mumɔ mli wo la yɛ emli, beni ena maŋ lɛ ni emli eyi obɔ kɛ amagai sɔŋŋ lɛ.’ (Bɔfoi lɛ Asaji 17:16) Ekolɛ nɔ ni Paulo na beni ebote agora lɛ ha enaa kpɛ ehe. Hermes bɔlɛnamɔ nyɔŋmɔ lɛ, he okadi he amagai fa aahu akɛ ehe bahia ni akɛwo tsũ muu ko ni ale lɛ akɛ Stoabii a-Hermes lɛ mli. Mamai ni atɛŋ Hermes he mfonirii krokomɛi yɛ nɔ lɛ tsɔɔ swastika—ni ji fɔmɔ kɛ wala he okadii. Venus Genetrix, ni ji suɔmɔ bɔlɛnamɔ nyɔŋmɔyoo he amaga, kɛ eko kɛha Dionysus ni hiɛ krɔɔs babaoo ni feɔ bɔlɛnamɔ he okadi lɛ yɛ jɛmɛ. Nɔ ni kadiɔ agora lɛ “krɔŋkrɔŋfeemɔ” lɛ ji tɛ ni akɛfee husu kɛ kulo ko ni nu “krɔŋkrɔŋ” yɔɔ mli kɛha mɛi fɛɛ ni baa mli lɛ ahetsuumɔ nifeemɔ.

Yɛ jamɔ shihilɛ ni mli kwɔ nɛɛ hewɔ lɛ, wɔbaanyɛ wɔnu nɔ hewɔ ni Paulo shihilɛ lɛ yɔɔ oshara waa lɛ shishi jogbaŋŋ. Asusu yɛ ehe akɛ eji “mɔ ni jajeɔ maŋsɛɛ wɔji ahe sane etsɔɔ,” ni mla ni yɔɔ no beaŋ lɛ bi koni ‘mɔ ko mɔ ko akaná nyɔŋmɔi krokomɛi, loo eheei; ni esaaa akɛ ajáa nyɔŋmɔi ni aleee akɛ ja akpɛlɛ nɔ yɛ maŋ.’ Ebɛ naakpɛɛ mɔ akɛ, akɛ bɔfo lɛ tee Areopago koni ayabi lɛ saji.—Bɔfoi lɛ Asaji 17:18, 19.

Maŋ lɛ Nɔyelihe

Tsũ kokroo ko ni atsɛɔ lɛ Tholos lɛ mli Ateene nɔyeli lɛ nitsumɔhe yitso yɔɔ. Onukpai babaoo ni yɔɔ maŋtiase lɛ wɔɔ yɛ tsũ nɛɛ mli gbɛkɛ bɔni afee ni nine anyɛ ashɛ maŋ onukpai ni nitsumɔ mli gbɛnaa nii kã amɛnɔ lɛ anɔ daa. Akɛ nsɛniitɛi kɛ susumɔ nii komɛi to Tholos lɛ mli. Amamɔ tsũi kɛha nɔyeli lɛ mli nitsumɔhei lɛ yɛ emasɛi. Gwabɔɔ Shia lɛ yɛ ablanaa ni sɛɛ kwɛɔ Tholos lɛ kooyi-anaigbɛ ni tamɔ gɔŋ lɛ. Jɛmɛ ji he ni Gwabɔɔ lɛ mli bii 500 lɛ kpeɔ yɛ ni amɛtsuɔ nii akɛ ajinafoi akuu ni amɛwoɔ mla amɛhaa Gwabɔɔ lɛ.

Maŋ tsũ kroko ni he hiaa waa ji Royal Stoa lɛ. Jɛmɛ ji he ni Ateene Royal Archon—ni ji maŋ lɛ mli kojolɔi onukpai etɛ lɛ ateŋ mɔ kome lɛ—sɛi yɔɔ. Jɛmɛ ji he ni ejɛɔ etsuɔ nɔyeli mli sɔ̃i babaoo ni kɔɔ jamɔ kɛ mla saji ahe nii yɛ. Ekolɛ, biɛ ji he ni abi koni Socrates abapue yɛ beni afolɔ enaa akɛ ebuuu krɔŋkrɔŋ nii lɛ. Ákpɛ blema Ateene mlai lɛ yɛ tsũ ni kwɛɔ ehiɛ gbɛ lɛ gbogboi ahe. Archonbii lɛ, loo kojolɔi onukpai lɛ damɔɔ tɛ ni akɛfɔ̃ nakai tsũ lɛ nɔŋŋ hiɛgbɛ lɛ nɔ daa afi ni amɛkãa amɛnitsumɔ lɛ mli kita.

Stoa ni Yɔɔ Attalus Lɛ

Agora lɛ tsũ ni abaayi jogbaŋŋ fe fɛɛ lɛ ji Stoa ni yɔɔ Atallus lɛ. Ákɛ obalanyo lɛ, Attalus, ni ji Pergamum Maŋtsɛ lɛ (afii ohai enyɔ D.Ŋ.B.) bakase nii yɛ Ateene skul srɔtoi lɛ amli taakɛ bii krokomɛi babaoo ni jɛ odehei aweku ni yɔɔ Mediteranea je lɛŋ lɛ fee lɛ. Beni ebata maŋtsɛ sɛi lɛ nɔ lɛ, ekɛ nikeenii ni ekaaa nɛɛ—Stoa ni yɔɔ Attalus lɛ—ha maŋtiase lɛ mli skul ni etee lɛ.

Nɔ titri ni atsuɔ yɛ Stoa ni yɔɔ Attalus lɛ ji koni efee shisharamɔhe ni yɔɔ shweshweeshwe kɛha naanyobɔɔ kɛ he-kɛ-sharamɔ nifeemɔ. Eshikpɔji kɛ ablanaa lɛ fee hei ni sa jogbaŋŋ ni anyɛɔ ajɛɔ jɛmɛ akwɛɔ nifeemɔi lɛ, yɛ be mli ni eshisharamɔhe ni ale jogbaŋŋ lɛ hu eha ebafee jarayelihe ni yeɔ omanye. Ekolɛ Nɔyeli lɛ kɛ shwapoi lɛ ha jarayelɔi lɛ koni amɛwo he nyɔmɔ bɔni afee koni nakai tsũ lɛ afee shika namɔ jɛɛhe ko.

Beni aku sɛɛ akɛ lɛ eba etsutsu shihilɛ lɛ mli ekoŋŋ lɛ, Stoa ni yɔɔ Attalus lɛ kɛ akɔntaabuu he mfoniri ko he nɔkwɛmɔnɔ ni ekaaa ha. Emli fãi srɔtoi lɛ fɛɛ, srɔtofeemɔi fɛfɛji ni anaa yɛ bɔ ni asusu nibii aha kɛjɛ akulashiŋi lɛ ashishigbɛ kɛyashi ŋwɛigbɛ lɛ, kane kɛ duŋ ni jieɔ amɛhe kpo yɛ mli fɛfɛo lɛ, kɛ tsũ mli nibii kpakpai kɛ amɛ fɛo lɛ fɛɛ haa efeɔ nɔ ni nɔ bɛ kwraa. Ajie nɔ kome too ni aaana lɛ kɛjɛ jɛmɛ bɔ ni sa yɛ gbɛi srɔtoi anɔ, titri lɛ kɛtsɔ akulashiŋi lɛ ayiteŋgbɛ nibii srɔtoi etɛ lɛ kɛ nitsumɔ nɔ—Doriabii anɔ̃, Ioniabii anɔ̃, kɛ Mizraimbii anɔ̃.

He ni Atsuɔ Kusum Nifeemɔi Ahe Nii Yɛ

Tsũ ni bafee he ko kɛha Ateene kusum nifeemɔi babaoo lɛ ji Shwɛmɔhe asa lɛ. Eji nikeenii ni Vipsanius Agrippa, ni ji Roma Nɔyelɔ Augustus shaanuu lɛ kɛha. Akɛ marmaratɛ ni hiɛ sui srɔtoi lɛ shwie hiɛgbɛ shikpɔŋ lɛ nɔ. Asa, ni mɛi aaafee 1,000 baanyɛ ata jɛmɛ lɛ kɛlɛ shɛɔ aaafee mitai 25, ni tsutsu lɛ ahà yiteŋ ni nɔ ko ehiɛɛɛ emli yɛ mligbɛ. Enɛ ji tsũ yiteŋ hàa ni akɛ ekãa ni fe fɛɛ ka akwɛ lɛ ateŋ ekome ni ale yɛ blema je lɛ mli! Ni kɛlɛ, ekolɛ, hiɛtserɛjiemɔ lɛ ateŋ babaoo ni yaa nɔ yɛ jɛmɛ ni anɔkwa Kristofoi ni hiɛ jeŋba he tɛi ni nɔ kwɔlɔ lɛ kɛ amɛhe aaawo mli lɛ baanyɛ aha mɛi ayiŋ afee amɛ kɔshikɔshi.—Efesobii 5:3-5.

Eeenyɛ efee akɛ, aŋkroaŋkroi komɛi ni yɔɔ blema bei lɛ amli, ni taoɔ nibii amli ale lɛ yasara Pantainos Wojiatoohe lɛ. Adekai sɔŋŋ yɔɔ emli gbogboi lɛ ahe, ni akɛ papyrus kɛ kooloi ahe wolo kpoi ni akɛ niji ŋmala to mli. Wojiatoohe lɛ mli tsũ agbo lɛ kwɛɔ anaigbɛ kɛ akulashiŋi ni ato naa lɛ ateŋ, ni mɔ baanyɛ ana ablanaa lɛ kpote lɛŋ—he ko ni hi kɛha shisharamɔ, nikanemɔ, loo sane nɔjwɛŋmɔ. Ana niŋmaa ni kɔɔ wojiatoohe lɛ mlai enyɔ he. Amɛji: “Esaaa akɛ akɔɔ wolo ko kɛyaa,” kɛ “Agbeleɔ [wojiatoohe lɛ] kɛjɛɔ klɛŋklɛŋ ŋmɛlɛtswaa lɛ kɛyashi ŋmɛlɛtswaa ni ji ekpaa lɛ.”

Agora lɛ Ŋmɛnɛ

Yɛ nyɛsɛɛ afii nɛɛ amli lɛ, etamɔ nɔ ni American School of Classical Studies lɛ ejie agora lɛ kpo kwraa. Akɛni mɛi jɔɔ amɛhe yɛ kpoofeemɔ mli yɛ Acropolis ni kwɔ gojoo lɛ shishi hɔɔŋ lɛ mli hewɔ lɛ, ebafee he ko ni sa jogbaŋŋ kɛha shisharalɔi ni sumɔɔ akɛ amɛyakwɛ blema Ateene lɛ yinɔsane mli kuku lɛ.

Monastiraki Flea Jarayelihe ni bɛŋkɛ lɛ—ni aaashara shi fioo kɛjɛ agora lɛ kɛ Acropolis kɛya jɛmɛ lɛ—ji nifeemɔ kɛmiibote jeŋ kroko ni yɔɔ miishɛɛ mli. Ehaa saralɔ lɛ leɔ Hela adesã ni ŋɔɔ ni haa enaa kpɛɔ ehe kɛ jarayelihe ni tamɔ Boka-Teŋgbɛ nɔ̃ kɛ nibii ajara ni ayeɔ naa. Ni yɛ anɔkwale mli lɛ, saralɔ lɛ baana Yehowa Odasefoi yɛ jɛmɛ ni amɛkɛ miishɛɛ miifee nɔ ni bɔfo Paulo kɛ nɔ ni fe afii 1,900 fee lɛ pɛpɛɛpɛ—ni ji Maŋtsɛyeli sanekpakpa shiɛmɔ nitsumɔ lɛ ni ekɛmiiha ‘mɛi ni kɛ lɛ kpeɔ’ lɛ.

[Shishigbɛ niŋmaa]

[Akrabatsa ni yɔɔ baafa 28]

Jarayeli yɛ Ateene

Agora lɛ jeee Ateene woloŋlelɔi kɛ maŋ lɛ he ko ni he hiaa fe fɛɛ kɛkɛ, shi moŋ eji maŋtiase lɛ klɛŋklɛŋ jarayelihe hu. Ateene bafee jarayelihe titri ni ale waa kɛha eshika ni jara wa lɛ kɛ jeŋba kpakpa ni kojolɔi onukpai ni akɛ hegbɛ eha amɛ koni amɛkwɛ ni aye anɔkwa kɛ jalɛ sane yɛ jarayeli nitsumɔi fɛɛ ni atsuɔ lɛ mli lɛ hu hewɔ.

Ateene maŋ lɛ kɛ wein, mutso mli mu, wo, marmaratɛ, kɛ jarayeli nibii tamɔ sũ plɛtei kɛ dadei ni atsu he nii yaa maŋsɛɛ. Yɛ no najiaŋ lɛ, eheɔ ŋmãa titri kɛbaa maŋ lɛ mli. Akɛni Attica (kpokpaa ni yɔɔ Ateene masɛi lɛ) bɛ jarayeli nibii bɔ ni sa ni ekɛaalɛ emaŋbii lɛ hewɔ lɛ, mlai ni awoɔ yɛ jarayeli nibii ahe lɛ naa wa waa. Esa akɛ jarayelihe ni yɔɔ Piraeus (Ateene maŋ lɛ lɛji adaamɔhe) lɛ aná niyenii heei ni fa bɔ ni sa koni eha maŋ lɛ kɛ asraafoi lɛ fɛɛ eko. Ni aŋmɛɛɛ gbɛ ni jarayelɔi abua nii anaa amɛto bɔni afee ni amɛkahɔɔ kɛ jara ni wa yɛ hiamɔ bei amli.