Namɔ Gbɛ Wɔbaanyɛ Wɔkwɛ Kɛha Anɔkwa Jalɛsaneyeli?
Ani shikpɔŋ muu lɛ fɛɛ nɔ Kojolɔ lɛ yeŋ jalɛsane?—1 MOSE 18:25, The Holy Bible in Modern English ni Ferrar Fenton fee.
1, 2. Te gbɔmɛi pii feɔ amɛnii yɛ jalɛsaneyeli ni bɛ ni yaa nɔ lɛ he amɛhaa tɛŋŋ?
EKOLƐ ole kɛ awerɛho akɛ jalɛsane ni ayeee yɛ. Te ofeɔ onii yɛ anɔkwa jalɛsane ni bɛ nɛɛ he ohaa tɛŋŋ?
2 Mɛi komɛi feɔ amɛnii kɛtsɔɔ sane ni amɛbiɔ yɛ shihilɛ mli ni Nyɔŋmɔ yɔɔ lɛ he. Amɛbaanyɛ amɛkɛɛ po akɛ kɛ Nyɔŋmɔ ko yɛ hu lɛ,amɛleee (agnostic) . Eka shi faŋŋ akɛ ekolɛ onu nakai wiemɔ lɛ he da. Ekɔɔ gbɔmɔ ni nuɔ he akɛ “naagbee mɔ ni yɔɔ diɛŋtsɛ (akɛ Nyɔŋmɔ) lɛ ji nɔ ko ni aleee ni ekolɛ anyɛŋ ale” lɛ he. Nibii bibii ahe nilɛlɔ Thomas H. Huxley, ni hi shi yɛ afii ohai 19 lɛ mli ni fiɔ Darwin sutsakemɔ lɛ sɛɛ lɛ ji klɛŋklɛŋ mɔ ni kɛ wiemɔ “agnostic” lɛ tsu nii yɛ nɛkɛ gbɛ nɔa
3, 4. Nɛgbɛ ji he ni wiemɔ “agnostic” lɛ jɛ?
3 Shi nɛgbɛ ji he ni Huxley na wiemɔ “agnostic” lɛ kɛjɛ? Yɛ anɔkwale mli lɛ, ekɛ wiemɔ ko ni klɛŋklɛŋ afii oha lɛ mli mlalelɔ ko, bɔfo Paulo kɛtsu nii yɛ shishinumɔ kroko mli lɛ miitsu nii yɛ biɛ. Eje kpo yɛ maŋshiɛmɔi ni ehe gbɛi fe fɛɛ lɛ ekome mli. Nɛkɛ maŋshiɛmɔ nɛɛ kɔɔ wɔhe ŋmɛnɛ, ejaakɛ ekɛ shishitoo kpakpa ni hi ni tsɔɔ gbɛ ni wɔɔtsɔ nɔ wɔle be mli ni jalɛsaneyeli kɛha mɛi fɛɛ baaba, kɛ agbɛnɛ titri lɛ, gbɛ ni wɔɔtsɔ nɔ ni ehe aba sɛɛnamɔ kɛha wɔ lɛ haa wɔ.
4 Aŋɔ wiemɔ “agnostic” (“nɔ ni aleee”) lɛ kɛjɛ Paulo wiemɔ ni etsi afɔleshaa latɛ ko ni aŋma yɛ nɔ akɛ “Nyɔŋmɔ ni Aleko lɛ Nɔ” lɛ mli. Datrɛfonyo Luka ji mɔ ni ŋma nakai wiemɔ kuku lɛ yɛ yinɔsane wolo ni ji Bɔfoi lɛ Asaji yitso 17 lɛ mli. Klɛŋklɛŋ lɛ, yitso lɛ tsɔɔ bɔ ni fee ni Paulo baje Ateene. Obaanyɛ okane Luka hiɛkpamɔ wiemɔ lɛ kɛ wiemɔ muu lɛ fɛɛ yɛ akrabatsa ni fata he (baafa 6) lɛ mli.
5. Mɛni ni ha Paulo ha emaŋshiɛmɔ ni tamɔ nɛkɛ etsɔɔ Ateenebii lɛ? (Ha akane Bɔfoi lɛ Asaji 17:16-31.)
5 Paulo wiemɔ lɛ mli wa naakpa ni esa akɛ wɔsusu he jogbaŋŋ. Akɛni jalɛsane ni ayeee ebɔle wɔhe fɛɛ kɛkpe hewɔ lɛ, wɔbaanyɛ wɔkase babaoo kɛjɛ mli. Klɛŋklɛŋ lɛ kwɛmɔ bɔ ni shihilɛ lɛ yɔɔ, ni obaanyɛ okane enɛ kɛjɛ Bɔfoi lɛ Asaji 17:16-21. Ateenebii lɛ woɔ amɛhe nɔ akɛni amɛyɔɔ nikasemɔ he ni ehe gbɛi, he ni Socrates, Plato, kɛ Aristotle etsɔɔ nii yɛ lɛ hewɔ. Ateene hu ji maŋ ni jamɔ yaa nɔ yɛ jɛmɛ waa. Nɔ ni Paulo na ni ebɔle ehe fɛɛ ji amagai—tawuu nyɔŋmɔ Ares, aloo Mars amaga; Zeus amaga; Aesculapius, tsofafeemɔ amaga; Poseidon, ŋshɔ nyɔŋmɔ ni mli etsɛɛɛ fumɔ lɛ amaga; Dionysus, Athena, Eros, kɛ amagai krokomɛi.
6. Kɛ akɛ nɔ ni Paulo na yɛ Ateene lɛ to he ni oyɔɔ lɛ he lɛ, mɛni abaana?
6 Shi, kɛji akɛ Paulo ba ebakwɛ maŋ mli ni oyɔɔ lɛ, mɛni ebaana? Ebaanyɛ ena amagai loo jamɔ mli amagai babaoo, yɛ Kristendom shikpɔji anɔ po. Hei krokomɛi hu yɛ ni ebaana babaoo. Gbɛtsɔɔmɔ wolo ko kɛɛ: “India amagai, ni tamɔɔɔ amɛ Hela ‘nyɛmimɛi’ ni tsakeɔ lɛ ji amagai komekomei, ni akɛ hewalɛi ni yɔɔ naakpɛɛ fe fɛɛ lɛ baa amɛhefatalɔi ni ji yei lɛ . . . Yɛ anɔkwale mli lɛ, nyɔŋmɔi akpekpei abɔ ni tsuɔ shihilɛ kɛ adebɔɔ mli nibii sɔrɔtoi fɛɛ he nii yɔɔ, ni jeee akɛ aawie ni awo he tsɔ.”
7. Blema Hela nyɔŋmɔi lɛ tamɔ mɛni?
7 Afee Hela amagai loo Nyɔŋmɔi lɛ babaoo akɛ nɔ ni be jwɛŋmɔ ni bɛ jeŋba kwraa. Esa akɛ amɛjeŋba lɛ afee nɔ ni haa adesai, hɛɛ, awuiyelɔi ni yɔɔ shikpɔji pii anɔ lɛ po ahiɛ gboiɔ. Belɛ oyɛ nɔ fɛɛ nɔ ni ooodamɔ nɔ osusu akɛ, belɛ mɛɛ jalɛsane Helabii ni hi shi yɛ nakai blema bei lɛ amli lɛ baakpa gbɛ kɛjɛ nyɔŋmɔi loo amagai ni tamɔ nɛkɛ dɛŋ. Ni kɛlɛ, Paulo na akɛ Ateenebii lɛ eje gbɛ etuu amɛhe amɛha nɛkɛ amagai loo nyɔŋmɔi nɛɛ. Akɛni jalɛ mlifu yi lɛ obɔ hewɔ lɛ, eje shishi akɛ eeetsɔɔ anɔkwa Kristojamɔ mli anɔkwalei ni nɔ kwɔlɔ lɛ amli etsɔɔ amɛ.
Toibolɔi Ni Mli Wawai
8. (a) Mɛni ji Epikurobii lɛ ahemɔkɛyelii kɛ susumɔi? (b) Mɛni ji nɔ ni Stoamɛi lɛ heɔ yeɔ?
8 Yudafoi kɛ Helabii komɛi kɛ miishɛɛ bo toi, shi te Epikuromɛi kɛ Stoamɛi jeŋ nilelɔi ni ale amɛ waa lɛ baafee amɛnii yɛ enɛ he amɛha tɛŋŋ? Taakɛ obaana lɛ, amɛ susumɔi kɛ hemɔkɛyelii lɛ pii tamɔ ŋmɛnɛŋmɛnɛ beaŋ hemɔkɛyelii lɛ eko, kɛ ekomɛi po ni atsɔɔ yɛ skul. Epikuromɛi lɛ woɔ hewalɛ ni ahi shi ni ana miishɛɛ bɔ ni aaanyɛ, titri lɛ jwɛŋmɔŋ miishɛɛ. Amɛ jeŋ nilee ni ji ‘aye ni anu ejaakɛ wɔ lɛ wɔbaagboi’ lɛ jeɔ kpo yɛ amɛsubaŋ ni shishitoo mla kɛ jeŋba bɛ mli lɛ mli. (1 Korintobii 15:32) Amɛheee amɛyeee akɛ nyɔŋmɔi bɔ jeŋ muu fɛɛ nɛɛ; shi moŋ, nɔ ni amɛhiɛ mli ji akɛ wala ba shihilɛ mli kɛtsɔ oshara naa yɛ jeŋ ni yɔɔ kɛkɛ nɛɛ mli. Kɛfata he lɛ, nyɔŋmɔi lɛ bɛ adesai ahe miishɛɛ. Ni Stoamɛi lɛ hu? Amɛmaa sanetsɔɔmɔ ni ja nɔ mi, amɛheɔ amɛyeɔ akɛ nii ni anyɛɔ amɔɔ mli kɛ hewalɛ ji shishitoo taomɔ nii titri ni yɔɔ jeŋ muu fɛɛ. Stoabii lɛ susuɔ nyɔŋmɔ ko ni bɛ su kɛ baŋ he, moŋ fe ni amɛaahe Nyɔŋmɔ amɛye akɛ eji Mɔ ni yɔɔ diɛŋtsɛ. Amɛnuɔ he akɛ shɛɛ mli sane loo shade ji nɔ ni yeɔ adesai ashihilɛ mli nibii fɛɛ nɔ.
9. Mɛni hewɔ shihilɛ ni Paulo yɔɔ mli lɛ ji shihilɛ ni shiɛmɔ ni aaashiɛ yɛ mli lɛ wa lɛ?
9 Te nɛkɛ jeŋ nilelɔi nɛɛ here Paulo maŋ nitsɔɔmɔ lɛ nɔ amɛha tɛŋŋ? Nibii amli ni ataoɔ ale ni efutu jwɛŋmɔŋ henɔwomɔ ji Ateenebii asu yɛ no be lɛ mli, kɛkɛ ni nɛkɛ jeŋ nilelɔi nɛɛ je shishi akɛ amɛkɛ Paulo baaje ŋwane. Yɛ naagbee lɛ, amɛŋɔ lɛ kɛtee Areopago lɛ. Nɔ ni yɔɔ Ateene jarawoo he lɛ yiteŋ, shi eyɔɔ Acropolis lɛ shishi ji tɛsaa ko ni akɛ tawuu nyɔŋmɔ, Mars loo Ares gbɛi tsɛɔ lɛ, no hewɔ lɛ atsɛɔ lɛ Mars’ Hill, aloo Areopago. Yɛ blema bei amli lɛ, saneyeli bɛgwafoi kpeɔ yɛ biɛ. Ekolɛ akɛ Paulo tee saneyeli he kojolɔi lɛ ahiɛ, ekolɛ ni amɛkpe yɛ Acropolis lɛ kɛ Parthenon lɛ ni ehe gbɛi lɛ kɛ agbɛnɛ sɔlemɔ tsui kɛ amagai krokomɛi babaoo ahiɛ. Mɛi komɛi po susu akɛ bɔfo Paulo etɔ̃ akɛni Roma mla eŋmɛɛɛ gbɛ ni akɛ nyɔŋmɔi heei aba jɛmɛ hewɔ. Shi kɛji akɛ akɛ Paulo tee Areopago lɛ koni eyatsɔɔ ehemɔkɛyelii lɛ amli faŋŋ loo eyajie ehe kpo akɛ eji tsɔɔlɔ ni he esa hu lɛ, toibolɔi ni ekɛkpe lɛ ji mɛi ni mli wa naakpa. Ani ebaanyɛ etsɔɔ esane ni he hiaa waa nɛɛ mli ni efiteee amɛ jwɛŋmɔ?
10. Paulo kɛ ŋaa tsu nii ni ekɛkpa ewiemɔ lɛ hiɛ yɛ mɛɛ gbɛ nɔ?
10 Kwɛmɔ Bɔfoi lɛ Asaji 17:22, 23 ni ona ŋaa kɛ nilee gbɛ ni Paulo tsɔ nɔ ekɛje shishi. Beni ekpɛlɛ nɔ akɛ Ateenebii ji mɛi ni jaa nyɔŋmɔi diɛŋtsɛ kɛ amagai abɔ ni amɛyɔɔ lɛ, ekolɛ etoibolɔi lɛ ateŋ mɛi komɛi baasusu akɛ eejie amɛyi. Ni eeetutua nyɔŋmɔi loo amagai babaoo ni amɛjaa lɛ moŋ lɛ, Paulo gbala jwɛŋmɔ kɛtee afɔleshaa latɛ ko ni ena lɛ nɔ, nɔ ni ajɔɔ nɔ aha “Nyɔŋmɔ ni Aleko Lɛ” lɛ. Yinɔsane mli odaseyeli tsɔɔ akɛ nɛkɛ afɔleshaa latɛi nɛɛ yɛ, ni esa akɛ enɛ awaje hekɛnɔfɔɔ ni wɔyɔɔ yɛ Luka sane lɛ mli lɛ mli. Paulo kɛ afɔleshaa latɛ nɛɛ tsu nii akɛ he ni ebaajɛ ewie. Ateenebii lɛ buɔ nilee kɛ sanenaatsɔɔmɔ ni ja waa. Ni kɛlɛ, amɛkpɛlɛ nɔ akɛ nyɔŋmɔ ko yɛ ni “amɛleee lɛ” (Hela, aʹgno·stos) . Belɛ yɛ sane naatsɔɔmɔ ni ja naa lɛ, esa akɛ amɛŋmɛ Paulo gbɛ ni etsɔɔ mɔ ni amɛleee lɛ nɛɛ mli etsɔɔ amɛ. Mɔ ko mɔ ko nyɛŋ ana tɔmɔ ko yɛ nɛkɛ susumɔ nɛɛ he, aloo amɛbaanyɛ amɛna eko?
Ani Nyɔŋmɔ Ji Mɔ Ni Anyɛŋ Ale Lɛ?
11. Mɛɛ gbɛ nɔ Paulo tsɔ egbala etoibolɔi lɛ ajwɛŋmɔ koni amɛsusu anɔkwa Nyɔŋmɔ lɛ he yɛ?
11 Ojogbaŋŋ, te nɛkɛ “Nyɔŋmɔ ni aleee lɛ” nɛɛ tamɔ tɛɛ? “Nyɔŋmɔ Lɛ” fee je lɛ kɛ nɔ fɛɛ nɔ ni yɔɔ mli. Gbɔmɔ ko bɛ ni baaje ŋwane akɛ jeŋ muu fɛɛ nɛɛ yɛ shihilɛ mli, akɛ kwɛɛnii kɛ kooloi yɛ, akɛ wɔ adesai lɛ wɔyɛ shihilɛ mli. Hewalɛ kɛ jwɛŋmɔ, hɛɛ, nilee, ni jeɔ kpo yɛ enɛɛmɛi fɛɛ mli lɛ tsɔɔ akɛ Bɔlɔ nilelɔ kɛ hewalɛ fɛɛ tsɛ ko ji mɔ ni bɔ enɛɛmɛi, shi jeee heniianaa loo shade. Yɛ anɔkwale mli lɛ, gbɛ ni Paulo tsɔ nɔ esusu saji ahe lɛ sa jogbaŋŋ kɛha nɛkɛ wɔbe nɛɛ.—Kpojiemɔ 4:11; 10:6.
12, 13. Mɛɛ ŋmɛnɛŋmɛnɛ beaŋ odaseyeli fiɔ Paulo sane lɛ sɛɛ?
12 Etsɛko tsɔ ni yɛ wolo ni ji In the Centre of Immensities lɛ mli lɛ, Ŋleshi ŋulamii ahe nilelɔ Sir Bernard Lovell ŋma yɛ bɔ ni shikpɔŋ lɛ nɔ wala ni baa shi loo ni yɔɔ bibiibii lɛ yɔɔ hwanyaŋŋ ha lɛ he. Agbɛnɛ hu ewie kɛji akɛ wala ni tamɔ nɛkɛ baanyɛ aba trukaa lɛ he. Esane naamuu ji: “Akɛ eeenyɛ eba akɛ . . . trukaa ni nɔ ko ba ni nɔ ni jɛ mli ba ji niyenii amli nui ni tswaa gbɔmɔtso lɛ emaa shi lɛ ateŋ bibioo kwraa lɛ ji nɔ ko ni nyɛŋ aba. Yɛ bei kɛ gbɛhe ni afo akrabatsa awo he ni wɔsusuɔ he nɛɛ mli lɛ, wɔbaanyɛ wɔkɛɛ kɛ nɔmimaa akɛ enyɛŋ eba.”
13 Aloo susumɔ nɔ kroko ni yaa shɔŋŋ—wɔ jeŋ muu fɛɛ lɛ he. Ŋulamii ahe nilelɔi kɛ elektrɔn tsɔnei etsu nii ni amɛkɛkase eshishijee. Mɛni amɛna? Robert Jastrow ŋma yɛ God and the Astronomers lɛ mli akɛ: “Agbɛnɛ wɔmiina bɔ ni odaseyelii ni yɔɔ ŋulamii ahe nikasemɔ mli lɛ nyiɛɔ wɔhiɛ kɛyaa Biblia mli jwɛŋmɔ ni ahiɛ yɛ je lɛ shishijee he lɛ he.” “Kɛha jeŋ nilelɔ ni etsɔ ehemɔkɛyeli ni eyɔɔ yɛ ejwɛŋmɔŋ hewalɛ lɛ nɔ ehi shi lɛ, sane lɛ tamɔ lamɔ fɔŋ ko kɛha lɛ. Ekwɔ nilee ni abɛ gɔji lɛ; be eshɛ ni ebaakwɔ gɔŋ ni kwɔ fe fɛɛ lɛ; yɛ be mli ni egbalaa ehe kɛtsɔɔ naagbee tɛsaa lɛ nɔ lɛ, mɛi ni ekɛkpeɔ ni haa lɛ aekoo ji kuu ko ni kaseɔ Nyɔŋmɔ he nii [gbɔmɛi ni heɔ adebɔɔ amɛyeɔ], ni afii ohai abɔ ni eho nɛ ni amɛho amɛtara jɛmɛ.”—Okɛto Lala 19:2 he.
14. Mɛɛ sane naatsɔɔmɔ ni ja fiɔ Paulo wiemɔ akɛ Nyɔŋmɔ ehiii sɔlemɔ tsui ni akɛ niji fee mli lɛ sɛɛ?
14 No hewɔ lɛ wɔbaanyɛ wɔna bɔ ni Paulo wiemɔ ni yɔɔ Bɔfoi lɛ Asaji 17:24, ni kɛ wɔ boteɔ ewiemɔ ni nyiɛ sɛɛ ni yɔɔ Bɔfoi lɛ Asaji 17 kuku 25 lɛ mli lɛ ji anɔkwale ha. Nyɔŋmɔ ni yɔɔ hewalɛ ni baanyɛ afee “je lɛ kɛ emli nibii fɛɛ” lɛ yɛ hewalɛ kwraa fe jeŋ muu fɛɛ ni anaa nɛɛ. (Hebribii 3:4) No hewɔ lɛ jwɛŋmɔ bɛ mli akɛ aaasusu akɛ ebaahi sɔlemɔ tsui amli, titri lɛ nɔ ni gbɔmɛi ni kpɛlɛ nɔ yɛ faŋŋ mli akɛ “amɛleee” lɛ lɛ emamɔ lɛ amli. Mɛɛ sane oti ni mli wa waa ajaje atsɔɔ jeŋ nilelɔi ni benɛ yɛ nakai be lɛ mli lɛ, amɛwo amɛhiɛ nɔ amɛmiikwɛ sɔlemɔtsui babaoo ni yɔɔ amɛyiteŋ gbɛ lɛ nɛkɛ!—1 Maŋtsɛmɛi 8:27; Yesaia 66:1.
15. (a) Mɛni hewɔ Athena yɔɔ Paulo toibolɔi lɛ ajwɛŋmɔ mli lɛ? (b) Akɛ Nyɔŋmɔ ji Nihalɔ lɛ baaha amu sane naa yɛ mɛɛ gbɛ nɔ?
15 Eka shi faŋŋ akɛ Paulo toibolɔi lɛ kɛ jamɔ mli hetuu-kɛ-hamɔ eha amɛ nyɔŋmɔyoo, Athena yɛ Acropolis lɛ. Shwuɔwu kɛ shika akɛfee Athena ni ajaa lɛ yɛ Parthenon lɛ. Athena he amaga kroko ni damɔ shi lɛ shɛɔ ninetalɔi 70 ni anyɛɔ anaa kɛjɛɔ ŋshɔ hiɛ lɛji amli. Akɛɔ akɛ amaga ni atsɛɔ lɛ Athena Polias lɛ jɛ ŋwɛi ebaagbee shi; ni gbɔmɛi lɛ heɔ atadei hee amɛbahaa lɛ yɛ bei fɛɛ mli. Ni kɛlɛ, kɛji akɛ Nyɔŋmɔ ni gbɔmɛi nɛɛ leee lɛ lɛ ji Mɔ ni kwɔ fe fɛɛ ni bɔ jeŋ muu fɛɛ nɛɛ, mɛni hewɔ ehe baahia ni akɛ nibii ni gbɔmɛi kɛ amɛniji fee abaha lɛ? Lɛ ji mɔ ni kɛ nibii ni he hiaa wɔ lɛ haa wɔ: wɔ “wala,” kɛ wɔ “mumɔ” ni baaha wɔhi wala mli lɛ, kɛ “nibii fɛɛ” ni hulu, nugbɔnɛmɔ, kɛ shikpɔŋ kpakpa ni wɔ niyenii baa yɛ nɔ lɛ fata he lɛ. (Bɔfoi lɛ Asaji 14:15-17; Mateo 5:45) Lɛ ji Nihalɔ lɛ, gbɔmɛi ji helɔi lɛ. Eka shi faŋŋ akɛ Nihalɔ lɛ kpasaaa mɛi ni heɔ lɛ.
Mɔ Fɛɛ Mɔ—Jɛ Gbɔmɔ Kome Mli
16. Mɛni Paulo kɛɛ yɛ gbɔmɔ shishijee he?
16 Nɔ ni nyiɛ sɛɛ lɛ, Paulo kɛ anɔkwale ni esa akɛ mɛi pii asusu he lɛ ma shi yɛ Bɔfoi lɛ Asaji 17:26, titri lɛ akɛni ayeee jalɛsane yɛ weku mligbalamɔ mli ŋmɛnɛ lɛ hewɔ. Ekɛɛ akɛ Bɔlɔ lɛ “la kome eŋɔfee gbɔmɛi adesai fɛɛ, ni amɛhi shikpɔŋ lɛ fɛɛ hiɛ.” Jwɛŋmɔ ni ahiɛ akɛ adesa weku lɛ fɛɛ lɛ ekome ni, loo amɛji nyɛmimɛi (kɛ bɔ ni esa akɛ jalɛsaneyeli aba sane nɛɛ mli) lɛ ji nɔ ko ni esa akɛ nakai hii lɛ asusu he ejaakɛ Ateenebii lɛ hiɛ jwɛŋmɔ ko akɛ amɛ lɛ esoro amɛ yɛ he ni amɛjɛ hewɔ ni esoro amɛ yɛ adesai krokomɛi ahe. Shi Paulo kpɛlɛ 1 Mose he sane ni kɔɔ klɛŋklɛŋ gbɔmɔ, Adam, ni bafee mɔ ni wɔ fɛɛ wɔjɛ emli lɛ nɔ. (Romabii 5:12; 1 Korintobii 15:45-49) Shi obaanyɛ osusu akɛ: ‘Ani abaanyɛ akpɛlɛ jwɛŋmɔ ni tamɔ nɛkɛ nɔ yɛ ŋmɛnɛŋmɛnɛ beaŋ jeŋ nilee yinɔ nɛɛ mli?’
17. (a) Yɛ mɛɛ gbɛ nɔ ŋmɛnɛŋmɛnɛ beaŋ odaseyeli ko tsɔɔ gbɛ ni Paulo tsɔ nɔ lɛ nɔŋŋ? (b) Te enɛ kɔɔ jalɛsaneyeli he ehaa tɛŋŋ?
17 Sutsakemɔ he tsɔɔmɔ ni akaa yiŋ awieɔ lɛ tsɔɔ akɛ gbɔmɔ tsake yɛ hei sɔrɔtoi kɛ agbɛnɛ yɛ sui sɔrɔtoi amli. Shi nyɛsɛɛ afi lɛ shishijee mli ni Newsweek wolo tɛtrɛɛ lɛ tuu efa ko ni ekɛwieɔ jeŋ nilee he lɛ eha “Adam kɛ Hawa Taomɔ.” Egbala jwɛŋmɔ kɛtee nɔ ni ana nyɛsɛɛ nɛɛ yɛ fɔmɔ mli sui ahe nikasemɔ mli lɛ nɔ. Yɛ be mli ni wɔbaakpa gbɛ akɛ, jeee jeŋ nilelɔi fɛɛ baakpɛlɛ nɔ lɛ, nɔ ni jɛ mli ba lɛ tsɔɔ ni emuɔ sane naa akɛ adesai fɛɛ jɛ tsɛ kome ni fɔ amɛ lɛ mli. Akɛni jeeŋmɔ beebe Biblia lɛ kɛɛ, akɛ wɔ fɛɛ wɔji nyɛmimɛi hewɔ lɛ, ani esaaa akɛ ayeɔ jalɛsane ahaa wɔ fɛɛ? Ani esaaa akɛ akɛ wɔ fɛɛ yeɔ yɛ gbɛ ni hiɛaŋkwɛmɔ bɛ mli nɔ, ni bɔ ni wɔhewolo nɔ su, yitsɔi aloo sui krokomɛi yɔɔ lɛ kɔɔɔ he eko? (1 Mose 11:1; Bɔfoi lɛ Asaji 10:34, 35) Shi ehe miihia ni wɔle bɔ ni kɛ be mli ni jalɛsaneyeli baaba aha adesai.
18. Mɛɛ nɔdaamɔ nɔ yɔɔ kɛha Paulo wiemɔ ni kɔɔ bɔ ni Nyɔ mɔ kɛ gbɔmɛi ye ha lɛ he lɛ?
18 Ojogbaŋŋ, Paulo tsɔɔ yɛ Bɔfoi lɛ Asaji 17 kuku 26 akɛ, wɔbaanyɛ wɔkpa Bɔlɔ lɛ gbɛ akɛ eyɛ esuɔmɔnaa nii, aloo yiŋtoo ni ja kɛha adesai. Bɔfo lɛ le akɛ beni Nyɔŋmɔ kɛ Israel maŋ lɛ ye lɛ, E-kɛ akpɔ ha ni tsɔɔ he ni esa akɛ amɛhi kɛ bo ni esa akɛ maji krokomɛi kɛ amɛ ahi shi aha. (2 Mose 28:31, 32; 4 Mose 34:1-12; 5 Mose 32:49-52) Shi, Paulo toibolɔi lɛ kɛ ewiemɔi nɛɛ baato amɛ diɛŋtsɛ amɛhe titri yɛ henɔwomɔ mli. Yɛ anɔkwale mli lɛ, kɛji akɛ amɛle jio, amɛleee jio, Yehowa Nyɔŋmɔ etsɔ gbalɛ mli etsɔɔ nɔ ni esuɔmɔnaa nii ji yɛ bei loo yinɔsane mli be ko he, beni Hela baafee jeŋ hewalɛ kpeteŋkpele ni ji enumɔ lɛ. (Daniel 7:6; 8:5-8, 21; 11:2, 3) Akɛni Mɔ nɛɛ baanyɛ akudɔ jeŋmaji lɛ hewɔ lɛ, ani jwɛŋmɔ bɛ mli akɛ wɔɔsumɔ akɛ wɔɔkase ehe nii?
19. Mɛni hewɔ sane ni Paulo wieɔ he Bɔfoi lɛ Asaji 17:27 lɛ ji nɔ ni jwɛŋmɔ yɔɔ mli lɛ?
19 Etamɔɔɔ akɛ Nyɔŋmɔ eshi wɔ ni wɔleee ehe nɔ ko, ni wɔmiigbugbuu shi tamɔ shwilafoi. Ekɛ nɔ ni Ateenebii lɛ kɛ wɔ fɛɛ wɔɔdamɔ nɔ wɔkase ehe nii lɛ eha. Paulo ŋma yɛ sɛɛ mli yɛ Romabii 1:20 akɛ: “Ejaakɛ [Nyɔŋmɔ] ehe nii ni anaaa ni ji enaanɔ hewalɛ kɛ nyɔŋmɔyeli lɛ fɛɛ lɛ, kɛjɛ jeŋ bɔɔ mli beebe lɛ atsɔɔ nii ni efee lɛ nɔ ayɔseɔ ni anaa faŋŋ.” No hewɔ lɛ Nyɔŋmɔ kɛ wɔteŋ mɔ ko mɔ ko tɛŋ jekɛɛɛ, kɛji akɛ wɔmiitao kɛkɛ ni wɔna lɛ ni wɔkase ehe nii lɛ.—Bɔfoi lɛ Asaji 17:27.
20. Yɛ mɛɛ gbɛ nɔ eji anɔkwale akɛ Nyɔŋmɔ “mli wɔhiɛ kamɔ ni wɔtsiɔ wɔhe ni wɔyɔɔ yɛ”?
20 Taakɛ Bɔfoi lɛ Asaji 17:28 woɔ ŋaa lɛ, esa akɛ hiɛsɔɔ atsirɛ wɔ ni wɔfee nakai. Nyɔŋmɔ eha wɔ wala. Yɛ anɔkwale mli lɛ, wɔyɛ nɔ ni fe wala kɛkɛ, kɛ wɔkɛ wala ni tsei yɔɔ lɛ to he lɛ. Wɔ, kɛ kooloi babaoo yɛ shihilɛ ni nɔ kwɔ ko mli ni haa wɔnyɛɔ wɔtsiɔ wɔhe wɔyaa wɔbaa. Ani wɔbɛ enɛ he miishɛɛ? Paulo ŋɔɔ sane lɛ kɛyaa hiɛ lolo. Wɔyɛ shihilɛ mli akɛ bɔɔnii ni yɔɔ jwɛŋmɔ kɛ sui sɔrɔtoi. Aŋsɔ ni Nyɔŋmɔ kɛha wɔ lɛ haa wɔjwɛŋɔ, wɔnyɛɔ wɔsusuɔ shishitoo taomɔ nii ahe (tamɔ anɔkwa jalɛsaneyeli) , ni wɔhiɛ kaa nii anɔ—hɛɛ, koni wɔkwɛ bɔ ni Nyɔŋmɔ baatsu esuɔmɔnaa nii ahe nii aha yɛ wɔsɛɛ be. Taakɛ obaayoo lɛ, ekolɛ Paulo yɔse akɛ enɛ ji sane ko ni Epikurobii lɛ kɛ Stoamɛi jeŋ Nilelɔi lɛ baakpɛlɛ nɔ. Bɔni afee ni eye ebua amɛ lɛ, etsɛ wiemɔi kɛjɛ Hela lalafolɔi komɛi ni amɛle amɛ ni amɛbuɔ amɛ ni nakai lalafolɔi lɛ nɔɔ ewie nɛkɛ lɛ awiemɔi mli: “Shi lɛ nɔŋŋ eshwiei ji wɔ.”
21. Esa akɛ Nyɔŋmɔ shwiei ni wɔji lɛ asa wɔhe yɛ mɛɛ gbɛ nɔ?
21 Kɛji akɛ gbɔmɛi yɔseɔ akɛ Nyɔŋmɔ ji Ŋwɛi Floflonyo lɛ shwiei ji wo loo lɛ ebɔ wɔ lɛ, belɛ ehi jogbaŋŋ akɛ wɔkɛ wɔhiɛ aaafɔ enɔ kɛha gbɛtsɔɔmɔ kɛ gbɛ ni esa akɛ wɔtsɔ nɔ wɔhi shi. Esa akɛ ohiɛ asɔ ekaa ni Paulo jie lɛ kpo yɛ be mli ni edamɔ Acropolis lɛ shishi lɛ. Ekɛ ekaa tsɔɔ mli akɛ wɔ Bɔlɔ lɛ da kwraa fe amaga ko ni gbɔmɔ kɛ enine fee, fe shika kɛ shwuɔwu amaga ni yɔɔ Pathernon lɛ. Esa akɛ wɔteŋ mɔ fɛɛ mɔ ni kpɛlɛɔ Paulo wiemɔ lɛ hu akpɛlɛ nɔ akɛ Nyɔŋmɔ tamɔɔɔ amagai ni gbɔmɛi jaa ŋmɛnɛ lɛ ateŋ eko kwraa.—Yesaia 40:18-26.
22. Tsuitsakemɔ kɔɔ jalɛsane ni wɔnine aaashɛ nɔ lɛ he yɛ mɛɛ gbɛ nɔ?
22 Enɛ jeee naataomɔ ko ni esa akɛ gbɔmɔ ajɛ esusumɔ mli ekpɛlɛ nɔ kɛkɛ, koni eya nɔ ehi shi taakɛ eji yɛ tsutsu lɛ. Paulo ha enɛ fee faŋŋ yɛ Bɔfoi lɛ Asaji 17 kuku 30 akɛ: “No hewɔ lɛ, bei ni aleee lɛ, Nyɔŋmɔ eku ehiɛ efɔ nɔ [ni aasusu akɛ Nyɔŋmɔ tamɔ amaga bibioo ko ni mashi loo eeekpɛlɛ jamɔ kɛmiitsɔ nɔ ko ni tamɔ nɛkɛ nɔ lɛ], shi agbɛnɛ lɛ, eewo gbɔmɛi fɛɛ ni yɔɔ he fɛɛ he lɛ kita akɛ amɛtsake atsuii.” No hewɔ lɛ, yɛ be mli ni ewieɔ esanenaamuu ni hewalɛ yɔɔ mli yɛ nɛkɛ gbɛ nɔ lɛ, Paulo kɛ sane titri ko nii hɛle amɛ shi lɛ ma shi—tsuitsakemɔ! No hewɔ lɛ kɛji akɛ wɔmiikpa Nyɔŋmɔ gbɛ kɛha anɔkwa jalɛsaneyeli lɛ, no tsɔɔ akɛ esa akɛ wɔtsake wɔtsui. Mɛni ji nɔ ni enɛ biɔ yɛ wɔ gbɛfaŋ? Ni mɛɛ gbɛ nɔ Nyɔŋmɔ baatsɔ ni ekɛ jalɛsaneyeli kɛha mɛi fɛɛ aba?
[Shishigbɛ niŋmai]
a Huxley yoo jalɛsane ni ayeee yɛ Kristendom lɛ. taakɛ bɔ ni mɛi pii hu eyoo lɛ. Eŋma yɛ esaneyitso ko ni kɔɔ nii ni aheee ayeee lɛ he lɛ mli akɛ: “Eji wɔɔnyɛ wɔna . . . bɔ ni osatofeemɔ kɛ yiwalɛ etee hiɛ, malemɔ, gbɔmɔgbee, adesai ashihilɛ he gbɛnaa nii ni ajeɔ gbɛ akuɔ hiɛ ashwieɔ nɔ, ni eba kɛjɛ jɛɛhe nɛɛ kɛ agbɛnɛ kɛtsɔ jeŋmaji ni kɛɔ akɛ amɛji Kristofoi lɛ ayinɔsane mli lɛ kulɛ, bɔ ni wɔsusuɔ Hɛl he akɛ he ko ni ehiii kwraa lɛ baafee nɔ ko bibioo kɛ wɔkɛto ninaa nɛɛ he.”
Ani Obaanyɛ ona Hetoo?
◻ Mɛɛ jamɔ shihilɛ Paulo na yɛ Ateene, ni shihilɛ ko ni tamɔ nakai nɔŋŋ yɛ ŋmɛnɛ yɛ mɛɛ gbɛ nɔ?
◻ Yɛ mɛɛ gbɛi anɔ Nyɔŋmɔ da kwraa fe apasa nyɔŋmɔi ni tsutsu lɛ Ateenebii jaa amɛ yɛ Paulo gbii lɛ amli Iɛ?
◻ Mɛɛ anɔkwa saji ni kɔɔ bɔ ni Nyɔŋmɔ bɔ adesa weku lɛ eha lɛ he tsɔɔ akɛ belɛ esa akɛ aye jalɛsane aha wɔ fɛɛ?
◻ Te esa akɛ adesai afee amɛnii amɛha yɛ Nyɔŋmɔ dalɛ lɛ he nilee lɛ he amɛha tɛŋŋ?
[Akrabatsa ni yɔɔ baafa 6]
Jalɛsaneyeli Kɛha Mɛi Fɛɛ—Bɔfoi lɛ Asaji, Yitso 17
“16 Agbɛnɛ beni Paulo mɛɔ amɛ yɛ Ateene lɛ, emumɔ mli wo la yɛ emli beni ena maŋ lɛ mli ni emli eyi obɔ kɛ amagai sɔŋŋ lɛ. 17 No hewɔ lɛ ekɛ Yudafoi ni yɔɔ kpee he lɛ kɛ Nyɔŋmɔ gbeyeishelɔi lɛ kɛ mɛi ni kɛ lɛ kpeɔ daa nɛɛ yɛ jara lɛ nɔ lɛ yiyiɔ; 18 shi nilelɔi ni ji Epikuromɛi kɛ Stoamɛi lɛ ateŋ mɛi komɛi kɛ lɛ taa naa, ni mɛi komɛi kɛɛ: ‘Mɛni naafuutsɛ nɛɛ baakɛɛ po?’ Mɛi komɛi hu kɛɛ: ‘Etamɔ mɔ ni jajeɔ maŋsɛɛ wɔji ahe sane etsɔɔ.’ Ejaakɛ eejaje Yesu kɛ eshitee lɛ he sanekpakpa lɛ eetsɔɔ amɛ. 19 Ni amɛŋɔ lɛ kɛtee Areopago (kojomɔ he lɛ) ni amɛkɛɛ lɛ akɛ: ‘Ani oooha wɔle nɔ tsɔɔmɔ hee ni owieɔ he nɛɛ? 20 Ejaakɛ oha wɔtoii enu maŋsɛɛ saji; hewɔ lɛ wɔmiitao shishi wɔle.’ 21 Shi Ateenebii fɛɛ kɛ gbɔi ni yɔɔ jɛi lɛ, nɔ ni eshwɛ amɛ pɛ ji sane hee ko gbaa kɛ toiboo. 22 Shi Paulo yadamɔ Areopago lɛ teŋ ni ekɛɛ:
“‘Ataamɛi Ateenebii, miyoo yɛ nibii fɛɛ mli akɛ nyɛjaa wɔji pɛpɛɛpɛ. 23 Ejaakɛ beni mihoɔ ni mikwɛ nii ni nyɛjaa lɛ, mina afɔleshaa latɛ ko hu ni aŋma yɛ nɔ akɛ: “Nyɔŋmɔ ni Aleko lɛ lɛ nɔŋ.” No hewɔ lɛ, mɔ ni nyɛleee lɛ ni nyɛjaa lɛ kɛlɛ, lɛ nɔŋŋ ehe sane mijajeɔ mitsɔɔ nyɛ nɛɛ. 24 Nyɔŋmɔ ni fee je lɛ kɛ emli nibii fɛɛ ni ji ŋwɛi kɛ shikpɔŋ Nuŋtsɔ lɛ, ehiii sɔlemɔtsui ni akɛ niji fee mli, 25 ni asaŋ akɛ gbɔmɛi aniji jaaa lɛ, tamɔ mɔ ko ni nɔ ko fiɔ lɛ. Lɛ moŋ edɛŋ wala kɛ mumɔ kɛ nii fɛɛ jɛɔ haa gbɔmɛi fɛɛ; 26 ni la kome eŋɔfee gbɔmɛi adesai fɛɛ ni amɛhi shikpɔŋ lɛ fɛɛ hiɛ, ni yinɔi ni eto lɛ, kɛ amɛshihilɛ hei lɛ ahusui lɛ, ekpɛ mli eto momo, 27 koni amɛtao Nyɔŋmɔ sɛɛ gbɛ, akɛ aleee nɔ, kɛ amɛgbugbuu shi lɛ, amɛaana lɛ lo; tsɛbelɛ ekɛ wɔteŋ mɔ fɛɛ mɔ teŋ jekɛɛɛ. 28 Ejaakɛ emli nɔŋŋ wɔhiɛ kamɔ ni wɔtsiɔ wɔhe ni wɔyɔɔ yɛ; tamɔ bɔ ni nyɛ diɛŋtsɛ nyɛ lalatsɛmɛi lɛ ekomɛi hu ekɛɛ lɛ, akɛ: “Shi lɛ nɔŋŋ eshwiei ji wɔ hu.”
29 ‘“Shi kɛ Nyɔŋmɔ shwiei ji wɔ lɛ, esaaa akɛ wɔsusuɔ akɛ Nyɔŋmɔ su lɛ tamɔ shika loo jwiɛtɛi loo tɛ ko ni gbɔmɔ kɛ eŋaa kɛ ejwɛŋmɔ fee. 30 No hewɔ lɛ, bei ni aleee lɛ, Nyɔŋmɔ eku ehiɛ efɔ nɔ, shi agbɛnɛ lɛ, eewo gbɔmɛi fɛɛ ni yɔɔ he fɛɛ he lɛ kita akɛ amɛtsake amɛtsui, 31 ejaakɛ eto gbi ko, nɔ nɔ ni ebaatsɔ nuu ni eto lɛ nɔ ekojo jeŋ muu lɛ fɛɛ yɛ jalɛ naa, akɛni ekɛ hemɔkɛyeli eto mɔ fɛɛ mɔ hiɛ ejaakɛ etee lɛ shi kɛjɛ gbohii ateŋ lɛ.’”
[Akrabatsa ni yɔɔ baafa 7]
Abɔ Jeŋ Muu Lɛ Fɛɛ
Yɛ 1980 mli lɛ, Dr. John A. O’Keefe, ni jɛ NASA (National Aeronautics And Space Administration) lɛ ŋma akɛ: “Mikpɛlɛɔ nɔ ni Jastrow wie lɛ nɔ akɛ ŋmɛnɛŋmɛnɛ beaŋ ŋulamii ahe nilee ena odaseyeli ni anyɛɔ akɛ he fɔɔ nɔ akɛ Jeŋ Muu fɛɛ Nɛɛ aje gbɛ abɔ lɛ aafee afii akpekpei toi akpei nyɔŋma-kɛ-enumɔ kɛmiiya nyɔŋmai enyɔ ni eho nɛ.” “Odaseyeli ni minaa yɛ nibɔɔ he . . . ni jieɔ kpo faŋŋ yɛ nɔ fɛɛ nɔ ni ebɔle wɔ kɛkpe lɛ mli lɛ kanyaa mi: tɛsai lɛ, atatui lɛ, redio gbɛɛmɔi lɛ, kɛ shishijee mlai ni kɔɔ nii ni anyɛɔ amɔɔ mli kɛ hewalɛ he lɛ.”
[Akrabatsa ni yɔɔ baafa 9]
“Adam kɛ Hawa Taomɔ”
Newsweek wolo lɛ ŋma sane ko yɛ yitso nɛɛ shishi ni efa ko kaneɔ akɛ “Shitsalɔ Richard Leakey ni ehe gbɛi lɛ jaje yɛ 1977 akɛ ‘He kome ni afɔ ŋmɛnɛŋmɛnɛ beaŋ gbɔmɔ yɛ ko bɛ.’ Shi agbɛnɛ jeŋ nilelɔi miitsake amɛjwɛŋmɔ yɛ enɛ he . . . Stephen Jay Gould, Havard blema nibii ni atsaa shi anaa lɛ ahe nilelɔ kɛ niŋmalɔ lɛ kɛɛ akɛ ‘Kɛ eji anɔkwale lɛ, mikɛ shika baata abasaŋ yɛ nɔ, nɛkɛ sane nɛɛ he miihia babaoo diɛŋtsɛ. Ehaa wɔyɔseɔ akɛ adesai fɛɛ jɛ he koome yɛ bɔ ni wɔ gbɔmɔtsei yɔɔ sɔrɔto lɛ fɛɛ sɛɛ, ni yɛ nyɛsɛɛ nɛɛ nɔŋŋ hu. Nyɛmifeemɔ ko yɛ ni jɛ he kome ni jeɔ kpo babaoo fe bɔ ni wɔsusuɔ he.’”—January 11, 1988.