Tsi Obɛŋkɛ Nyɔŋmɔ
“Ekɛ Wɔteŋ Mɔ Fɛɛ Mɔ Teŋ Jɛkɛɛɛ”
KƐ́ AKƐ adesai to jeŋ muu kpeteŋkpele nɛɛ he lɛ, amɛdaraaa kwraa ni amɛhe waaa hu. Ekolɛ bo hu osusu enɛ he pɛŋ akɛ, ‘Ani eji anɔkwale akɛ adesai foji baanyɛ amɛkɛ Nyɔŋmɔ Ofe lɛ aná wekukpãa ni bɛŋkɛ kpaakpa?’ Enɛ baanyɛ aba lɛ nakai kɛ́ Nyɔŋmɔ ni gbɛi ji Yehowa lɛ miisumɔ ni eha wɔbɛŋkɛ lɛ. Ani eesumɔ ni wɔbɛŋkɛ lɛ? Abaanyɛ ana hetoo ni shɛjeɔ mɔ mii lɛ yɛ bɔfo Paulo wiemɔi ni kɔneɔ mɔ yiŋ ni ekɛ Ateene hii woloŋlelɔi lɛ wie lɛ mli, taakɛ aŋma yɛ Bɔfoi lɛ Asaji 17:24-27 lɛ. Kadimɔ nibii ejwɛ ni Paulo tsĩ tã yɛ Yehowa he lɛ.
Klɛŋklɛŋ lɛ, Paulo kɛɛ akɛ Nyɔŋmɔ ji mɔ ni “fee je lɛ kɛ emli nibii fɛɛ.” (Kuku 24) Nibii srɔtoisrɔtoi ni yɔɔ fɛo ni haa shihilɛ ŋɔɔ lɛ ji odaseyeli ni tsɔɔ akɛ wɔ-Feelɔ lɛ susuɔ wɔhe waa, ni esumɔɔ wɔ naakpa. (Romabii 1:20) Ebaafee nɔ ni nilee bɛ mli akɛ aaasusu akɛ Nyɔŋmɔ ni tamɔ nɛkɛ lɛ baatsi ehe kwraa kɛjɛ ebɔɔ nii ni esumɔɔ lɛ ahe.
Nɔ ni ji enyɔ lɛ, Yehowa ‘dɛŋ wala kɛ mumɔ kɛ nii fɛɛ jɛɔ haa gbɔmɛi fɛɛ.’ (Kuku 25) Yehowa ji wala Halɔ. (Lala 36:10) Kɔɔyɔɔ, nu, kɛ niyenii ní he hiaa waa koni anyɛ ahi wala mli lɛ fɛɛ ji nikeenii ni jɛ wɔ-Bɔlɔ lɛ ŋɔɔ. (Yakobo 1:17) Ani nilee yɛ mli akɛ wɔɔhe wɔye akɛ, wɔ-Nyɔŋmɔ ni feɔ ejurɔ lɛ kɛ ehe baatee wɔ koni wɔkale lɛ ni wɔtsi wɔbɛŋkɛ lɛ?
Nɔ ni ji etɛ lɛ, Nyɔŋmɔ ŋɔ ‘lá loo gbɔmɔ kome efee gbɔmɛi adesai fɛɛ.’ (Kuku 26) Yehowa kwɛɛɛ mɛi ahiɛaŋ, ni enáaa gbɔmɛi ahe jwɛŋmɔ fɔŋ hu kɔkɔɔkɔ. (Bɔfoi lɛ Asaji 10:34) Te aaafee tɛŋŋ ni Yehowa aaakwɛ mɛi ahiɛaŋ? Lɛ ebɔ Adam, ni ji ‘gbɔmɔ kome’ ni jeŋmaji kɛ wekui sɔrɔtoi fɛɛ jɛ emli kɛba lɛ. Eji Nyɔŋmɔ ‘suɔmɔnaa nii’ akɛ “ehere gbɔmɛi fɛɛ yiwala.” (1 Timoteo 2:4) No hewɔ lɛ, akɛ hegbɛ eha wɔ fɛɛ ni wɔtsi wɔbɛŋkɛ lɛ ekɔɔɔ he eko wɔhewolonɔ su, maŋ nɔ ni wɔjɛ, loo weku mli ni wɔjɛ.
Naagbee lɛ, Paulo ma anɔkwa sane nɛɛ nɔ mi akɛ: Yehowa ‘kɛ wɔteŋ mɔ fɛɛ mɔ teŋ jɛkɛɛɛ.’ (Kuku 27) Eyɛ mli akɛ Yehowa nɔ kwɔ gojoo moŋ, shi mɛi ni sumɔɔ ni amɛjɛ anɔkwayeli mli amɛbɛŋkɛ lɛ lɛ baanyɛ afee nakai be fɛɛ be. E-Wiemɔ lɛ maa nɔ mi ehaa wɔ akɛ, ekɛ wɔteŋ jɛkɛɛɛ, shi “ebɛŋkɛɔ mɛi fɛɛ ni tsɛɔ lɛ lɛ.”—Lala 145:18.
Paulo wiemɔi lɛ haa wɔnaa faŋŋ akɛ Nyɔŋmɔ miisumɔ ni wɔbɛŋkɛ lɛ. Shi kɛlɛ, Paulo tsɔɔ mli akɛ, mɛi pɛ ni Nyɔŋmɔ haa amɛbɛŋkɛɔ lɛ ji mɛi ni miisumɔ ni “amɛgbugbuu shi” ‘kɛtao esɛɛgbɛ’ lɛ. (Kuku 27) Biblia shishitsɔɔlɔi aniiamlitaomɔ wolo ko tsɔɔ mli akɛ, “feemɔ wiemɔi enyɔ nɛɛ [ni ji ‘gbugbuu shi’ kɛ ‘tao sɛɛgbɛ’] lɛ fɛɛ shishinumɔ tsɔɔ nɔ ko ni abaanyɛ aná . . . loo shwelɛ ko ni baanyɛ aba mli.” Ákɛ nɔkwɛmɔnɔ lɛ: Kɛ́ oyɛ tsu ko ni mli ewo duŋ kpii shi ole tsu lɛ mli jogbaŋŋ lɛ, ekolɛ obaagbugbuu shi kɛtao he ni asuɔ kane lɛ yɛ loo shinaa lɛ naa gbɛ, kɛlɛ ole faŋŋ akɛ kɛ́ otao lɛ obaana. Nakai nɔŋŋ hu kɛ́ wɔjɛ anɔkwayeli mli wɔgbugbuu shi kɛtao Nyɔŋmɔ sɛɛgbɛ lɛ, wɔbaanyɛ wɔná nɔmimaa akɛ wɔmɔdɛŋbɔɔ lɛ efeŋ efolo. Paulo maa nɔ ni ehaa wɔ akɛ, ‘wɔbaana lɛ.’—Kuku 27.
Ani oshweɔ ni obɛŋkɛ Nyɔŋmɔ? Kɛ́ okɛ hemɔkɛyeli ‘gbugbuu shi kɛtao Nyɔŋmɔ sɛɛgbɛ’ lɛ, onine enyɛŋ shi kɔkɔɔkɔ. Yehowa sɛɛgbɛ taomɔ waaa, ejaakɛ “ekɛ wɔteŋ mɔ fɛɛ mɔ teŋ jɛkɛɛɛ.”