Wolo Ni He Yɔɔ Sɛɛnamɔ Kɛha Ŋmɛnɛŋmɛnɛ Shihilɛ

Woji ni kɛ ŋaawoo haa fa waa yɛ je lɛŋ ŋmɛnɛ. Shi nɔ ni baa ji akɛ amɛbe hoɔ ni etsɛɛɛ kɛkɛ lɛ aŋma lɛ ehee loo akɛ ekroko eye najiaŋ. Ni Biblia lɛ hu? Aŋma agbe naa aaafee afii 2,000 ni eho nɛ. Shi kɛlɛ, afeko emli shɛɛ sane ni yɔɔ kɛjɛ shishijee lɛ ehee loo akɛ aaaha efee nɔ ni yɔɔ ebe naa. Ani eeenyɛ eba akɛ gbɛtsɔɔmɔ kpakpa yɛ wolo ni tamɔ nɛkɛ mli kɛha wɔgbii nɛɛ?

MƐI komɛi kɛɔ akɛ dabi. Beni Dr. Eli S. Chesen tsɔɔ nɔ hewɔ ni esusuɔ akɛ Biblia lɛ be eho lɛ, eŋma akɛ: “Mɔ ko kwraa bɛ ni baafĩ sɛɛ akɛ akɛ tsofai ahe nikasemɔ wolo ni afee yɛ afi 1924 lɛ atsu nii yɛ ŋmɛnɛŋmɛnɛ tsofai ahe nikasemɔ mli.”¹ Etamɔ nɔ ni nilee yɛ naataamɔ sane nɛɛ mli. Yɛ fɛɛ sɛɛ lɛ, gbɔmɔ ekase nibii babaoo yɛ jwɛŋmɔŋ hewalɛnamɔ kɛ adesai ajeŋba he kɛjɛ beni aŋma Biblia lɛ. No hewɔ lɛ, te aaafee tɛŋŋ ni blema wolo ni tamɔ nɛkɛ lɛ he baanyɛ aba sɛɛnamɔ aha ŋmɛnɛŋmɛnɛ shihilɛ?

Shishitoo Mlai ni Amɛbe Hooo

Yɛ be mli ni eji anɔkwale akɛ shihilɛi etsake lɛ, adesai ahiamɔ nibii titrii lɛ ehi shi nakai aahu. Kɛjɛ yinɔsane be fɛɛ mli lɛ, ehe bahiaa ni aná suɔmɔ kɛ hedɔɔ aha gbɔmɛi. Amɛmiisumɔ ni amɛná miishɛɛ kɛ shihilɛi kpakpai. Ŋaawoo ni tsɔɔ shika mli naagbai ni amɛaadamɔ naa, bɔ ni amɛaaha gbalashihilɛ aye omanye, kɛ bɔ ni amɛkɛ jeŋba kpakpa kɛ subaŋ kpakpai baatsɔse amɛbii lɛ he ebahia amɛ. Ŋaawoo ni tsɔɔ nakai hiamɔ nii bibii lɛ yɛ Biblia mli.—Jajelɔ 3:12, 13; Romabii 12:10; Kolosebii 3:18-21; 1 Timoteo 6:6-10.

Biblia mli ŋaawoo lɛ haa aleɔ bɔ ni adesa subaŋ yɔɔ lɛ mli jogbaŋŋ. Susumɔ emli shishitoo mlai pɔtɛɛ, ni be hooo ni abaanyɛ akɛtsu nii yɛ shihilɛ mli ŋmɛnɛ lɛ he nɔkwɛmɔnii komɛi ahe okwɛ.

Gbɛtsɔɔmɔ Kpakpa Kɛha Gbalashihilɛ

UN Chronicle lɛ kɛɛ akɛ, weku lɛ “ji adesai agbɛjianɔtoo lɛ shishijee kwraa ni etsɛ fe fɛɛ; nɔ ko ni he hiaa fe fɛɛ ni tsaraa yinɔi lɛ.” Shi, nɛkɛ ‘nɔ ko ni tsaraa nii’ nɛɛ mli miitserɛ waa yɛ gbɛ ni fãa mɔ tsũi nɔ. Chronicle lɛ kɛɛ akɛ: “Wekui babaoo kɛ kaai ni yɔɔ gbeyei ni woɔ nyɛmɔ ni amɛyɔɔ akɛ amɛaaya nɔ amɛhi shi, ni amɛje naagbai lɛ amli lɛ miikpe ŋmɛnɛ.”² Mɛɛ ŋaawoo Biblia lɛ kɛhaa ni baaye abua weku kɔkrɔɔ lɛ koni eje naagbai lɛ amli?

Nɔ ni wɔkɛɔ kɛjeɔ shishi ji, Biblia lɛ yɛ babaoo kɛɛmɔ yɛ bɔ ni wumɛi kɛ ŋamɛi kɛ amɛhe ahi shi lɛ he. Akɛ nɔkwɛmɔnɔ lɛ, ewieɔ wumɛi ahe akɛ: “Wumɛi hu asumɔ amɛ diɛŋtsɛ amɛŋamɛi, tamɔ amɛ diɛŋtsɛ amɛgbɔmɔtsei. Mɔ ni sumɔɔ eŋa lɛ, lɛ diɛŋtsɛ ehe esumɔɔ. Ejaakɛ mɔ ko enyɛko lɛ diɛŋtsɛ eheloo dã, shi moŋ elɛɔ lɛ ni ehiɛɔ lɛ dɔdɔɔdɔ.” (Efesobii 5:28, 29; wɔma efã ko nɔ mi.) Awo ŋa lɛ ŋaa koni “ekɛ bulɛ ni mli kwɔ aha ewu lɛ.”—Efesobii 5:33, NW.

Susumɔ nɔ ni Biblia mli ŋaawoo ni tamɔ nɛkɛ ni akɛaatsu nii lɛ baatsɔɔ lɛ he okwɛ. Wu ni sumɔɔ eŋa ‘tamɔ lɛ diɛŋtsɛ egbɔmɔtso’ lɛ he tsɛ̃ɛɛ lɛ loo ni eeefee lɛ niseniianii. Emaaa lɛ atswɛrɛ, loo ni eeejɛ́ lɛ loo ni eeeye ehenumɔi awui. Shi yɛ no najiaŋ lɛ, ekɛ bulɛ kɛ mɔ hesusumɔ ni ekɛhaa lɛ diɛŋtsɛ ehe lɛ nɔŋŋ haa lɛ. (1 Petro 3:7) No hewɔ lɛ eŋa lɛ nuɔ he akɛ asumɔɔ lɛ ni eyɛ shweshweeshwe yɛ egbalashihilɛ lɛ mli. Kɛtsɔ enɛ nɔ lɛ, nuu lɛ feɔ bɔ ni esa akɛ akɛ yei ahi shi lɛ he nɔkwɛmɔnɔ kpakpa ehaa ebii. Yɛ gbɛ kroko nɔ lɛ, ŋa ni yɔɔ “bulɛ ni mli kwɔ” kɛha ewu lɛ haaa woo ni ekɛaaha ewu lɛ aŋmɛɛ lɛ kɛtsɔ ehiɛ ni eeewie be fɛɛ be loo ni eeeba bulɛ ni eyɔɔ kɛha lɛ lɛ shi. Akɛni ebuɔ nuu lɛ hewɔ lɛ, nuu lɛ nuɔ he akɛ akɛ he fɔ̃ɔ enɔ, akpɛlɛɔ enɔ, ni hiɛ sɔɔ lɛ.

Ani abaanyɛ akɛ ŋaawoo ni tamɔ nɛkɛ atsu nii yɛ je lɛŋ ŋmɛnɛ? Eji miishɛɛ sane akɛ mɛi ni kɛ wekui ahe nikasemɔ efee amɛnitsumɔ ŋmɛnɛ lɛ emu saji anaa nakai nɔŋŋ. Gbɛjianɔtoo ko ni atsɔɔ nɔ akɛwoɔ weku ŋaa lɛ nɔkwɛlɔ ko kɛɛ akɛ: “Wekui ni yeɔ omanye fe fɛɛ ni mile ji wekui ni wekukpaa ni mli wa ni suɔmɔ yɔɔ mli kã nyɛ kɛ tsɛ ni yɔɔ mli lɛ teŋ. . . . Etamɔ nɔ ni wekukpaa ni mli wa ni hi fe fɛɛ nɛɛ haa gbekɛbii lɛ nuɔ he akɛ amɛyɛ shweshweeshwe.”³

Afii ni eho lɛ amli lɛ, Biblia mli ŋaawoo ni kɔɔ gbalashihilɛ he lɛ efee nɔ ni anyɛɔ akɛ he fɔ̃ɔ nɔ waa fe ŋaawoo ni weku ŋaawolɔi babaoo ni hiɛ yiŋtoo ni ja lɛ kɛhaa. Fɛɛ sɛɛ lɛ, be fioo ko ni eho nɛ ni mɛi babaoo ni he esa yɛ enɛ mli lɛ efi gbalamlitsemɔ sɛɛ akɛ nɔ ni kɛ gbalashihilɛ ni eŋɔɔɔ lɛ naa tsabaa baa oyá. Ŋmɛnɛ, amɛteŋ mɛi babaoo woɔ mɛi ahewalɛ koni kɛ aaahi lɛ, amɛha amɛ gbalashihilɛ lɛ sɛɛ atsɛ. Shi tsakemɔ nɛɛ ba beni nibii efite kwraa sɛɛ.

Nɔ ni tamɔɔɔ enɛ lɛ, Biblia lɛ kɛ gbalashihilɛ he saji ahe ŋaawoo ni anyɛɔ akɛ he fɔ̃ɔ nɔ, ni ŋmɛɔ pɛpɛɛpɛ haa. Ekpɛlɛɔ nɔ akɛ shihilɛi komɛi ni ehiii kwraa baanyɛ aha atse gbala mli. (Mateo 19:9) Yɛ nakai beaŋ nɔŋŋ lɛ, ebuɔ saji bibii ni akɛtseɔ gbala mli lɛ fɔ. (Maleaki 2:14-16) Ebuɔ anɔkwa ni ayeee yɛ gbalashihilɛ mli lɛ hu fɔ. (Hebribii 13:4) Ekɛɔ akɛ, nɔ ni fata gbalashihilɛ he ji gbɛnaa nii ni kã mɔ nɔ: “No hewɔ lɛ nuu aaashi etsɛ kɛ enyɛ, ni eeekpɛtɛ eŋa he, ni amɛaatsɔ heloo kome.”a—1 Mose 2:24, NW; Mateo 19:5, 6.

Biblia mli ŋaawoo ni kɔɔ gbalashihilɛ he lɛ sa jogbaŋŋ ŋmɛnɛ, taakɛ eji beni aŋma Biblia lɛ. Kɛ wu kɛ ŋa kɛ amɛhe hi shi yɛ suɔmɔ kɛ bulɛ mli, ni amɛbu gbalashihilɛ akɛ wekukpaa ni yɔɔ sɔrɔto kwraa lɛ, gbalashihilɛ lɛ yeɔ omanye bei pii—kɛ weku lɛ hu.

Gbɛtsɔɔmɔ Kpakpa Kɛha Fɔlɔi

Afii nyɔŋmai abɔ ni eho lɛ mli lɛ, fɔlɔi babaoo—ni gbekɛ tsɔsemɔ he “susumɔ heei” kanyaa amɛ lɛ—susu akɛ “agu gbekɛ tsɔsemɔ.”⁸ Amɛmiishe gbeyei akɛ, kɛ ato husui aha gbekɛbii lɛ, ekɛ henumɔŋ piŋmɔ kɛ nijiaŋwujee baaba. Gbekɛbii atsɔsemɔ he ŋaawolɔi ni hiɛ yiŋtoo kpakpa lɛ miima nɔ mi akɛ fɔlɔi atsi amɛhe kɛjɛ nɔ fɛɛ nɔ ni naa wa fe jajemɔ fioo ni amɛkɛaaha amɛbii lɛ he. Shi mɛi ni tamɔ nɛkɛ ni yɔɔ enɛ he nilee lɛ ateŋ mɛi babaoo miisusu nɔ ni esa akɛ tsɔsemɔ atsu yɛ mli lɛ he ekoŋŋ agbɛnɛ, ni fɔlɔi ni enɛ kɔɔ amɛhe lɛ miitao ni aha sane ni kɔɔ enɛ he lɛ afee faŋŋ aha amɛ.

Shi, Biblia lɛ kɛ gbekɛbii atsɔsemɔ he ŋaawoo ni yɔɔ faŋŋ ni nilee yɔɔ mli haa be fɛɛ be. Aaafee afii 2,000 ni eho nɛ ni ekɛɛ akɛ: “Nyɛ tsɛmɛi lɛ, nyɛkawoa nyɛbii amlifu, shi moŋ nyɛlɛa amɛ yɛ Nuntsɔ lɛ tsɔsemɔ kɛ ŋaawoo lɛ mli.” (Efesobii 6:4) Hela wiemɔ ni atsɔɔ shishi akɛ “tsɔsemɔ” lɛ shishi ji “ní aaalɛ, aaatsɔse, aaatsɔɔ nii.”⁹ Biblia lɛ kɛɔ akɛ tsɔsemɔ, loo nitsɔɔmɔ ni tamɔ nɛkɛ lɛ ji fɔlɔi asuɔmɔ he odaseyeli. (Abɛi 13:24) Gbekɛbii yaa nɔ jogbaŋŋ kɛ aha amɛ jeŋba he gbɛtsɔɔmɔi ni yɔɔ faŋŋ, kɛ ekpakpa kɛ efɔŋ he jwɛŋmɔ kpakpa. Tsɔsemɔ kɛɔ amɛ akɛ amɛfɔlɔi susuɔ amɛhe kɛ nɔ̃ gbɔmɛi ni amɛbaatsɔmɔ lɛ he.

Shi esaaa akɛ akɛ fɔlɔi ahegbɛ—“tsɔsemɔ tso lɛ”—tsuɔ nii kɔkɔɔkɔ yɛ gbɛ ni ejaaa nɔ.b (Abɛi 22:15; 29:15) Biblia lɛ woɔ fɔlɔi aŋaa akɛ: “Nyɛkɛ tsɔsemɔ ni fe nine akaha nyɛbii lɛ, kɛ jeee nakai lɛ, nyɛbaajie ekãa ni amɛyɔɔ lɛ fɛɛ kɛjɛ amɛmli.” (Kolosebii 3:21, Phillips) Ekpɛlɛɔ nɔ hu akɛ jeee be fɛɛ be yi ni ayiɔ amɛ lɛ ji nitsɔɔmɔ gbɛ ni mɔɔ shi fe fɛɛ. Abɛi 17:10 kɛɛ: “Kãmɔ boteɔ mɔ ni kɔɔ sane sɛɛ lɛ mli vii fe bɔ ni kpãai oha boteɔ kwashia mli.” Agbɛnɛ hu lɛ, Biblia lɛ jieɔ tsɔsemɔ ni akɛtsĩɔ nii anaa lɛ yi ehaa. Yɛ 5 Mose 11:19 lɛ, awo fɔlɔi ahewalɛ koni amɛkɛ be fioo ni amɛnáa lɛ atsu nii koni amɛkɛ jeŋba kpakpai atsɔse amɛbii.—Kwɛmɔ 5 Mose 6:6, 7 lɛ hu.

Ŋaawoo ni ebe hooo ni Biblia lɛ kɛhaa fɔlɔi lɛ yɛ faŋŋ. Tsɔsemɔ ni kɛ ehe kpãa gbee ni suɔmɔ yɔɔ mli he miihia gbekɛbii. Niiashikpamɔ ni abaanyɛ akɛtsu nii tsɔɔ akɛ ŋaawoo ni tamɔ nɛkɛ lɛ tsuɔ nii jogbaŋŋ lɛɛlɛŋ.c

Gbɛtsĩinii ni Gbálaa Gbɔmɛi Ateŋ lɛ Nɔ Kunim ni Aaaye

Hewolo nɔ su, maŋ, kɛ weku he gbɛtsĩinii egbála gbɔmɛi ateŋ ŋmɛnɛ. Gbɛtsĩinii ni gbɔmɛi kɛba nɛɛ eha agbe adesai ni efeko nɔ ko lɛ yɛ tai ni awuɔ yɛ je lɛŋ fɛɛ lɛ mli. Kɛ aaasusu nɔ ni ba yɛ yinɔsane mli lɛ he lɛ, gbɛkpamɔ ni ayɔɔ akɛ hii kɛ yei ni esoro amɛ hewolo nɔ sui kɛ maji lɛ baabu amɛteŋ mɔ fɛɛ mɔ akɛ gbɔmɛi kome ni amɛkɛ amɛhe ahi shi nakai lɛ miifee nɔ ni hiɛnɔkamɔ bɛ mli kwraa. Afrika maŋnɔkwɛlɔ ko kɛɛ: “Enaa tsabaa lɛ yɛ wɔtsuii amli.”¹¹ Shi adesai atsuii ni aaatsake lɛ bɛ mlɛo. Shi, susumɔ bɔ ni Biblia mli shɛɛ sane lɛ ŋɔɔ tsui lɛ naa ehaa ni ehaa henumɔi ni anáa kɛhaa ekomefeemɔ lɛ mli bawaa lɛ he okwɛ.

Biblia mli nitsɔɔmɔ ni tsɔɔ akɛ “lá kome” Nyɔŋmɔ ‘ŋɔfee gbɔmɛi adesai fɛɛ’ lɛ jieɔ hewolo nɔ su mli henɔwomɔ he susumɔ fɛɛ kɛyaa. (Bɔfoi lɛ Asaji 17:26) No tsɔɔ akɛ weku kome pɛ yɔɔ lɛɛlɛŋ—adesai aweku lɛ. Biblia lɛ woɔ wɔ hewalɛ lolo koni “wɔfee Nyɔŋmɔ kaselɔi,” mɔ ni ewie yɛ ehe akɛ: “[Ejeee] mɛi ahiɛaŋkwɛlɔ; shi moŋ maŋ fɛɛ maŋ mli lɛ, mɔ ni sheɔ lɛ gbeyei ni etsuɔ jalɛ nii lɛ, lɛ ji mɔ ni saa ehiɛ” lɛ. (Efesobii 5:1; Bɔfoi lɛ Asaji 10:34, 35) Kɛha mɛi ni kɛ Biblia lɛ tsuɔ nii kɛ hiɛdɔɔ, ni amɛsumɔɔ ni amɛhi shi yɛ enitsɔɔmɔi anaa lɛ agbɛfaŋ lɛ, nilee nɛɛ yɛ hewalɛ ni feɔ mɛi ekome. Etsuɔ nii kɛshɛɔ shɔŋŋ yɛ adesa tsui lɛ mli, ni efiteɔ gbɛtsĩinii ni adesai kɛba ni gbálaa gbɔmɛi ateŋ lɛ. Susumɔ nɔkwɛmɔnɔ ko he okwɛ.

Beni Hitler wuu ta yɛ Europa fɛɛ lɛ, no mli lɛ Kristofoi akuu kome ko yɛ—Yehowa Odasefoi—ni kɛ shifimɔ kpoo akɛ amɛkɛ amɛhe woŋ adesai ni efeko nɔ ko lɛ ahiɛkpatamɔ mli. ‘Amɛwoŋ klante nɔ’ amɛshiŋ amɛnaanyo gbɔmɔ. Amɛkɔ shidaamɔ nɛɛ yɛ suɔmɔ ni amɛyɔɔ akɛ amɛmiisumɔ ni amɛsa Nyɔŋmɔ hiɛ lɛ hewɔ. (Yesaia 2:3, 4; Mika 4:3, 5) Amɛhé nɔ ni Biblia lɛ tsɔɔ—ni ji akɛ maŋ ko loo hewolo nɔ su ko bɛ ni hi fe ekroko lɛ amɛye lɛɛlɛŋ. (Galatabii 3:28) Yɛ shidaamɔ ni toiŋjɔlɛ kɛ suɔmɔ yɔɔ mli ni Yehowa Odasefoi kɔ hewɔ lɛ, amɛfata yiwalɛ ŋsarai amli klɛŋklɛŋ gbokɛlɛfoi lɛ ahe.—Romabii 12:18.

Shi jeee mɛi fɛɛ ni kɛɔ akɛ amɛnyiɛɔ Biblia lɛ sɛɛ lɛ kɔ shidaamɔ nɛɛ. Jeŋ Ta II lɛ sɛɛ lɛ, etsɛɛɛ ni Martin Niemöller, Germany Protestant osɔfo ko ŋma akɛ: “Mɔ fɛɛ mɔ ni sumɔɔ ni eshwa Nyɔŋmɔ yɛ [tai] ahewɔ lɛ leee Nyɔŋmɔ Wiemɔ lɛ, loo esumɔɔɔ ni eleɔ. . . . Afii ni eho lɛ fɛɛ mli lɛ, Kristofoi asɔlemɔi lɛ kɛ amɛhe eha shii abɔ ni amɛjɔɔ tai, asraafoi akui, kɛ tawuu nibii anɔ ni . . . amɛsɔle yɛ gbɛ ni kɛ Kristofoi anifeemɔ kpãaa gbee kwraa nɔ, kɛha amɛhenyɛlɔi lɛ ahiɛkpatamɔ yɛ ta mli. Enɛ fɛɛ ji wɔ kɛ wɔtsɛmɛi lɛ atɔmɔ, shi esaaa akɛ ashwaa Nyɔŋmɔ kwraa. Ni wɔ ni ji Kristofoi ni yɔɔ ŋmɛnɛ lɛ ahiɛ egboi yɛ mɛi ni afɔɔ amɛ tsɛmɔ akɛ kuu-fã tamɔ Biblia Kaselɔi ni Yɔɔ Ekãa [Yehowa Odasefoi], ni amɛtee yiwalɛ ŋsarai amli yɛ ohai kɛ akpei amli ni gboi [po] yɛ tawuu mli nitsumɔ kɛ tui ni amɛkɛaatswia adesai lɛ ni amɛkpoo hewɔ lɛ ahiɛ.”¹²

Kɛbashi amrɔ nɛɛ, ale Yehowa Odasefoi jogbaŋŋ yɛ amɛ nyɛmifeemɔ ni feɔ Arabbii kɛ Yudafoi, Croatiabii kɛ Serbiabii, Hutubii kɛ Tutsibii ekome lɛ hewɔ. Shi kɛlɛ, Odasefoi lɛ kpɛlɛɔ nɔ amrɔ nɔŋŋ akɛ abaanyɛ aná ekomefeemɔ ni tamɔ nɛkɛ, jeee akɛni amɛhi fe mɛi krokomɛi lɛ, shi moŋ akɛni Biblia shɛɛ sane lɛ mli hewalɛ lɛ kanyaa amɛ lɛ hewɔ.—1 Tesalonikabii 2:13.

Gbɛtsɔɔmɔ Kpakpa ni Kɛ Jwɛŋmɔŋ Hewalɛnamɔ Kpakpa Baa

Bei pii lɛ, bɔ ni mɔ ko jwɛŋmɔ kɛ ehenumɔŋ hewalɛnamɔ yɔɔ lɛ náa egbɔmɔtsoŋ hewalɛnamɔ nɔ hewalɛ. Akɛ nɔkwɛmɔnɔ lɛ, jeŋ nilee he nikasemɔi etsɔɔ nibii ni yeɔ awui ni mlifu kɛbaa. Dr. Redford Williams, Onukpa ni kwɛɔ Behavioral Research yɛ Duke University Medical Center lɛ nɔ lɛ, kɛ eŋa, Virginia Williams, wie yɛ amɛwolo, Anger Kills lɛ mli akɛ: “Odaseyelii babaoo ni yɔɔ lɛ tsɔɔ akɛ etsɛɛɛ kwraa ni mɛi ni mli fuɔ oyayaayai lɛ náa tsui kɛ lá fãji amli hela (kɛ helai krokomɛi hu) yɛ yiŋtoi babaoo hewɔ, ni nɔ ni fata he ji nanemɛi fioo námɔ, gbɔmɔtsoŋ naagba ni fáa beni mɔ lɛ mli efu, kɛ ehe ni ekɛwoɔ nifeemɔi ni haa hela mɔɔ mɔ lɛ mli babaoo.”¹³

Afii akpei abɔ dani aaakase jeŋ nilee he nii ni tamɔ nɛkɛ lɛ, Biblia lɛ kɛ wiemɔi kukuji ni yɔɔ faŋŋ tsɔɔ tsakpaa ni kã wɔ henumɔŋ shihilɛ kɛ wɔ gbɔmɔtsoŋ hewalɛnamɔ teŋ lɛ mli akɛ: “Tsui ni mli jɔ lɛ, gbɔmɔtso lɛ yiwala ni; shi awuŋayeli lɛ, wuiaŋ sharamɔ ni.” (Abɛi 14:30; 17:22) Biblia lɛ kɛ ŋaawoo ha yɛ nilee mli akɛ: “Ha mlifu sɛɛ afo ni oshɛ mlila ofɔ̃,” kɛ “Kaaha omumɔ mli miifu oyá.”—Lala 37:8; Jajelɔ 7:9.

Ŋaawoo ni nilee yɔɔ mli ni akɛyeɔ mlifu nɔ hu yɛ Biblia lɛ mli. Akɛ nɔkwɛmɔnɔ lɛ, Abɛi 19:11 kɛɛ: “Gbɔmɔ ni yɔɔ jwɛŋmɔ lɛ, emli fuuu mra, ni ehiɛ ni ekuɔ efɔɔ nɔtɔmɔ nɔ lɛ, ehiɛnyam ni.” Aná Hebri wiemɔ kɛha “jwɛŋmɔ” lɛ kɛjɛ feemɔ-wiemɔ ni gbalaa jwɛŋmɔ kɛyaa nɔ ko he “yiŋtoo ni ale” lɛ nɔ lɛ mli.¹⁴ Ŋaawoo ni nilee yɔɔ mli lɛ ji: “Susumɔ he dani otsu he nii.” Ni aaabɔ mɔdɛŋ anu yiŋtoi pɔtɛɛ ahewɔ ni mɛi krokomɛi wieɔ loo amɛfeɔ amɛ nii yɛ gbɛ ko nɔ lɛ shishi lɛ, baanyɛ aye abua koni aŋmɛɛ saji ahe babaoo—ni mli akafu oya.—Abɛi 14:29.

Anaa ŋaawoo kpakpa ko hu yɛ Kolosebii 3:13, ni kɛɔ akɛ: “Nyɛnanaa nyɛhaa nyɛhe ni nyɛkɛfafaa nyɛhe.” Mlifu bibii hu ji shihilɛ lɛ mli nɔ ko. Wiemɔ ni ji “nyɛnanaa nyɛhaa” tsɔɔ nibii ni wɔsumɔɔɔ yɛ mɛi krokomɛi ahe lɛ ni wɔɔŋmɛɛ he. “Sane ni akɛaake” tsɔɔ mlifu naatsĩi. Bei komɛi lɛ nilee yɛ mli akɛ aaatsĩ henumɔ ni nyɛ̃ɛ yɔɔ mli lɛ naa moŋ fe nɔ ni aaaya nɔ asusu he; nɔ ni mlifu ni wɔkɛaawo wɔmli lɛ kɛbaaba kɛkɛ ji wɔ jatsu lɛ ni eeeha etsii.—Kwɛmɔ akrabatsa ni ji “Gbɛtsɔɔmɔ Kpakpa Kɛha Adesai Awekukpaai.”

Ŋaawoo kɛ gbɛtsɔɔmɔ jɛɛhei babaoo yɛ ŋmɛnɛ. Shi esoro Biblia lɛ kwraa lɛɛlɛŋ. Emli ŋaawoo jeee nɔ ni aka hiɛ awie kɛkɛ, ni asaŋ emli ŋaawoo lɛ yeee wɔ awui kɔkɔɔkɔ hu. Yɛ no najiaŋ lɛ, emli nilee lɛ etsɔɔ akɛ “anɔkwa sɔŋŋ ni.” (Lala 93:5) Agbɛnɛ hu, Biblia mli ŋaawoo lɛ be hooo. Eyɛ mli akɛ agbe eŋmaa naa aaafee afii 2,000 ni eho nɛɛ moŋ, shi anyɛɔ akɛ emli wiemɔi tsuɔ nii lolo. Ni etsuɔ nii pɛpɛɛpɛ ni wɔ hewolo nɔ su loo maŋ ni wɔyɔɔ mli lɛ kɔɔɔ he eko. Biblia mli wiemɔi yɛ hewalɛ hu—hewalɛ ni ekɛaatsake gbɔmɛi ni amɛfee gbɔmɛi kpakpai. (Hebribii 4:12) No hewɔ lɛ, nakai wolo lɛ kanemɔ kɛ eshishitoo mlai kɛ nitsumɔ baanyɛ aha oshihilɛ aya hiɛ.

[Shishigbɛ niŋmai]

[Wiemɔ ni akɔ ni akɛmiitsu nii ni yɔɔ baafa 24]

Biblia lɛ kɛ weku shihilɛ he ŋaawoo ni yɔɔ faŋŋ ni nilee yɔɔ mli haa

[Akrabatsa ni yɔɔ baafa 23]

Wekui Ni Yɔɔ Hewalɛ Kpakpa Lɛ Ahe Kadimɔ nii

Afii pii ni eho lɛ, tsɔɔlɔ ko ni ekase weku he nii lɛ fee niiamlitaomɔ babaoo ko, ni abi nitsulɔi ni fe 500 ni kɛ wekui tsuɔ nii lɛ koni amɛwie subaŋi ni amɛna yɛ weku ni yɔɔ “hewalɛ” lɛ ahe lɛ he. Nɔ ni yɔɔ miishɛɛ ji akɛ, nɔ ni fata subaŋi ni ato naa ni fa fe fɛɛ lɛ he ji nibii ni Biblia lɛ ejie yi kɛjɛ jeeŋmɔ beebe lɛ.

Sanegbaa kpakpa ji nɔ ni baa klɛŋklɛŋ yɛ saji ni ato naa lɛ amli, ni nifeemɔ gbɛ̀i ni mɔɔ shi ni tsɔɔ bɔ ni asaa béi lɛ fata he. Mɔ ni to niiamlitaomɔ lɛ he gbɛjianɔ lɛ wie akɛ, nifeemɔ gbɛ kpakpa ni fe fɛɛ ni anaa yɛ wekui ni yɔɔ hewalɛ lɛ ahe ji akɛ “mɔ ko eyawɔɔɔ gbɛkɛ ni emli efu mɔ kroko.”⁶ Ni kɛlɛ, nɔ ni fe afii 1,900 ni eho nɛ ni Biblia lɛ wo ŋaa akɛ: “Nyɛmli afua, shi nyɛkafea esha; hulu akanyɔ shi yɛ nyɛmlila lɛ nɔ.” (Efesobii 4:26) Yɛ Biblia bei amli lɛ, akaneɔ gbii lɛ kɛjɛ hulushinyɔɔ be mli kɛyashiɔ hulushinyɔɔ be mli. No hewɔ lɛ, jeeŋmɔ dani ŋmɛnɛŋmɛnɛ beaŋ nilelɔi aaakase wekui ahe nii lɛ, no mli lɛ Biblia lɛ kɛ nilee ewo ŋaa akɛ: Nyɛsaa saji ni gbálaa mɛi ateŋ lɛ mra—dani gbi lɛ aba naagbee ni ekroko aje shishi.

Niiamlitaomɔ he gbɛjianɔtolɔ lɛ yɔse akɛ, wekui ni yɔɔ hewalɛ lɛ “gbalaaa jwɛŋmɔ kɛyaaa saji ni baanyɛ atee mlifu shi waa lɛ anɔ nɔŋŋ dani amɛshiɔ shia loo dani amɛyawɔɔ. Mitee nɔ minu nakai wiemɔ ni ji ‘be ni sa mli lɛ’ shii abɔ.”⁷ Wekui ni tamɔ nɛkɛ lɛ haa Biblia mli abɛbua ni aŋma nɔ ni fe afii 2,700 ni eho nɛ lɛ jijeɔ ni amɛleee: “Wiemɔ ni awie yɛ be ni sa mli lɛ, etamɔ shika akutui yɛ jwiɛtɛi kpanyai amli.” (Abɛi 15:23; 25:11; wɔma efã ko nɔ mi.) Nɛkɛ nii ni akɛtoɔ nii ahe nɛɛ baanyɛ awie nɔ ko ni ekɛto shika hewulamɔnii ni tamɔ akutui ni akɛshwie jwiɛtɛi apaawai ni akpɛ́ lɛ mli lɛ he—nibii fɛfɛji ni asumɔɔ waa ni ayɔɔ yɛ Biblia bei amli. Ejieɔ bɔ ni wiemɔi ni awieɔ yɛ be ni sa mli lɛ ŋɔɔ ha ni ejara wa lɛ kpo etsɔɔ. Yɛ shihilɛi ni mli wawai amli lɛ, wiemɔi ni awieɔ yɛ be ni sa mli lɛ ajara wa waa.—Abɛi 10:19.

[Akrabatsa ni yɔɔ baafa 23]

Gbɛtsɔɔmɔ Kpakpa Kɛha Adesai Awekukpaai

“Nyɛhe akpokpoa ni nyɛkafea esha! Nyɛkɛ nyɛtsui awiea yɛ nyɛsaa nɔ, ni nyɛfea dioo!” (Lala 4:5) Yɛ shihilɛi babaoo ni tɔmɔi bibii yɔɔ mli lɛ agbɛfaŋ lɛ, eeefee nilee akɛ oootsĩ owiemɔi anaa, koni kɛtsɔ no nɔ lɛ okwa henumɔŋ béi.

“Mɔ ko yɛ ni wieɔ bambam, tamɔ adumɔɔ klante; shi nilelɔ lilɛi tsáa mɔ.” (Abɛi 12:18) Jwɛŋmɔ dani owie. Wiemɔi ni yɔɔ bambam baanyɛ aye mɛi krokomɛi awui ni efite naanyobɔi.

“Naajɔlɛ hetoo kuɔ mlila naa; shi wiemɔ ni wa teeɔ mlifu shi.” (Abɛi 15:1) Ebiɔ henɔyeli dani akɛ mlihilɛ ajie sane naa, shi bei pii lɛ, gbɛ ni tamɔ nɛkɛ baa naagbai ashi ni ehaa toiŋjɔlɛ wekukpaai yaa nɔ.

“Béi bɔimɔ tamɔ nu ni afã naa; no hewɔ lɛ ni naataamɔ lɛ mli wako nɛɛ, ŋmɛɛmɔ he!” (Abɛi 17:14) Nilee yɛ mli akɛ oootsi ohe kɛjɛ shihilɛ ko ni baanyɛ atee mlifu shi lɛ he dani omli afu.

“Kaaye oyai ni okɛ mlifu wo omli; ejaakɛ kwashiai buaa mlifu naa amɛwoɔ amɛmli.” (Jajelɔ 7:9, The New English Bible) Bei pii lɛ henumɔi baa dani nifeemɔi baa. Kwashia ji mɔ ni mli fuɔ oyayaayai lɛ, ejaakɛ gbɛ ni enyiɛ nɔ lɛ baanyɛ eha ewie kpalakpala loo ekɛ oyaiyeli afee enii.

[Mfoniri ni yɔɔ baafa 25]

Yehowa Odasefoi fata yiwalɛ ŋsarai amli klɛŋklɛŋ gbokɛlɛfoi lɛ ahe